روايه حافة المنتصف
الفصل التاسع والثلاثون 39
بقلم ايه
- لقد تم رمينا من حافة إلى أخرى ، هناك أبواب على طول الحواف ، أحدهما يقول "أنا أعرف" والآخر يقول "أنا أؤمن". لكن لديك رأس واحد.
إذا كنت تؤمن ، فأنت تؤمن دون أن تعرف ، وإذا كنت تعرف ، فأنت تعرف دون أن تؤمن.
✨✨✨✨✨✨✨✨
بعد مرور ست شهور وايام معدوده ✨
في حوش الجد كانو ملتمين كلهم ، بس المره هذي مش نفس ما كانو قبل الست شهور … و بزيادة وجود مرام بينهم بعد ما طلع عرسهم هيه ونبراس ❤️ بعد الفاتحه بشهر ✨
//
//
سديم ✨
اليوم جمعة وقت العصر بزبط وكلنا ملتمين كالعاده ، ما عدا مُعتز اللي من بعد زواجه الثاني وطلاقه رسمي من خلود والمشاكل يلي صارن له مع صالحه معش قعد يجي
مررت بعيوني علينا واحد واحد ، مرام خشت للعيله رسمي ، والحق كانت كافيه خيرها شرها ما تدخلش في اي حاجه كان نحن درنا قهوه فالعشيه انا وهديل و كل يوم الاخت مجد عندنا طبعا نكلموها وتجي تهدرز معانا … و للامانه يعني ماكانش فيه قبول نهائياااااا نهائيا بينها وبين عميمه جميله كانت الحق كل وحده في حالها ماتبيش تحتك بالاخره و حتى امي سالمين هابا منها كل مره عازقتلها كلمه
خش بدر الدين من الباب ، و كالعاده مع الاغنيه المشهوره وانتظريني وعدّي نجوم الليل … و تبو تعرفو من الي تعد فنجوم الليل ؟ ف اخر حلقة طلعت انا😂
طبعا من بعد يوم فاتحة نبراس و كيف مجد فضحتنا… بدر الدين ما قصرش طبعا و كانن حركاته
واضحه بكل وانا كنت فاهمه عليه بس على قولته نستعبط و شبه العيله كلها كلها عرفت انه انا وبدر حتصير بينا حاجه رسميه ماعدا عمو الهادي طبعا مازال ما عندش علم 😂 وتبو الصراحه؟ انا مازال مش ماليه يدي من بدر عشان الوجيج لي كان فحياته عشان هكي قاعده نستعبط شويه
خش لقمان ورا بدر، وعلى طول بحت في هديل وابتسم
وعلى سيرة هديل ، ف اكيده تسألو على الجو بينها وبين مرام … الحق هديل اختي كانت ردة فعلها عاديه جداااا تعامل في مرام زي ما كنا نعاملو في خلود مرات معتز … يعني مرام عباره عن مرات ولد عمها فقط…
//
//
مرام ✨
بحتت لقيت سديم تبحت فيا ، عرفتها تفكر في علاقتي انا وهديل
تبو الحق ؟ انا في البدايه كنت ما نتعاملش معاها بكل و كان شعوري ملخبط معاها مش عارفه هيه شن فاهمه ولا شن في فراسها عليا … فكنت حذره نوعا ما و كلامي اغلبه مع مجد و سديم .. بس يوم عن يوم عرفت انه هديل ونبراس عيال عم بس و هديل ما فيش اطيب منها و حرفيا ما حسستنيش ولا مره انه نبراس كان في حياتها ولا عمرها ذكرت حتى انها كانت مخطوبه من قبل قدامي … وبهكي عرفت انه هديل ونبراس فعليا كانت خطبتهم خطبة هل بس وعلاقتي بيها قعدت مريحه حتى لما يخش نبراس ويلقانا مع بعضنا نحن البنات ويقعد يهدرز معانا ما نضايقش عادي جدا كيف شعوري وهوا يهدرز مع مجد وسيسي كيفه الهديل
طبعا اكيده عرفتو من سيسي اني ما نجيش هنا واجد عشان العلاقه بيني وبين ام نبراس مش واحد .. الحق عمي الهادي يحترم فينا و بيناتنا خير خير وخلاص .. بس عميمه جميله تشوف الساس ولا تشوفني وبالعكس الوضع صح يضايق شويه بس انا لما وافقت على نبراس كنت عارفه ح يسير هكي
وعلى سيرة نبراس ، انا لعند صبح اليوم والله ما مستوعبه اني مراته ! و على قد ما كنت خايفه موت من الزواج من بعد لي صار فيا قبل ، على قد ما شفت حياة زوجيه ثانييييه مع نبراس❤️ كان الحب والاحترام و القدر هوا لي مالي حوشنا … حرفيا انا بدون نبراس يدوبك نعرف نتنفس ونعيش قعدت حياتي كلها هوا رغم انه وقته كله فالشغل بس كل شويه معايا ومستحيل يحسسني اني بروحي ❤️
✨ومن اول يوم زواج لنا اتفقنا ننسو كل شي ، لا انا كنت متجوزه قبله ولا هوا لي كان خاطب قبلي، حتى الورقه لي عطيتها له تثبت انه ماكانش زواجي الاول زواج كامل حرقها و نساها اصلا وقررنا يقعد السر بينا
//
//
هديل ✨
طبعا مش عارفه كنهم اليوم كلهم سرحانين … بس اكيده كل حد سرحان في حياته
خش لقمان بحت فيا وابتسم ، ومشى ورا بدر
طبعا اكيده بتعرفو شنصار بيني وبين لقمان اخر ست شهور؟
اللي صار انه انا وياه عكس العبيطين بدر سديم ، كانت علاقتنا واضحه ومن بعد اخر مره حكالي فيها لقمان قعدنا شويه هكي ممكن شهر وبعدها خذينا قرار انه يدوي العمو الهادي ويخطبني ، بس قبلها قتله خليني نحكي الماما قبل
واللي انصدمت منه انه ماما رفضت رفض تام ! من بعد خطبتي النبراس قعد عندها فوبيا من انه خطبتي توا من لقمان تسببلنا مشاكل مع العيله وعلى قول ماما انتن بنتين وما عندكنش الا راس خال واحد وعمامكن هما لي مسؤولين عليكن وانا صحتي مش كيف قبل وما نبيش تسير فيا حاجه وفيه مشاكل بينكم وبين هلكم 🙂
كبرت الموضوع وخشت في كلام كبير بس ردة فعلها صادمه بكل ليا وللقمان ، كان رفضها قاطع و انه المره الاولى فسختي مشتها المره هذي مش ح توافق اصلا 😅 و طبعا قعد سهم هوا اللي يشيل فيا ويجيب فيا للشغل عشان ماما قررت انه لقمان معش يشيلني 🙂
لقمان كان اعقل مني وقالي انه امك خايفه عليك وخليها حاليا مشيها انه كل شي تمام وخلي تمر فتره وح يحكي العمي الهادي ويحكي الباته ويقنعوها بمعرفتهم … انا الصراحه خايفه من رد فعل عمي الهادي لانه بمثابة بات لنا مش بس عم ف مش عارفه شن حيكون رد فعله
بس طبعا كيف سديم وبدر كيف انا ولقمان قعدنا مفضوحين فالعيله و البركه في مجد وسهم اللي ما خلونش فحالنا 😂
//
//
مجد ✨
من اول ما عرفت اني حامل وكان حملي صعب وخطير بكل ، تعبت واجد وكلهم مش عارفين سبب التعب لي انا فيه وليش حملي صعب هكي وكل اسبوعين كان عندي موعد عند الدكتوره … لدرجة لما خشيت الشهر الثاني جيت وقعدت عند هلي شهر كامل و كان الصالحين كل يوم عندي … فالبدايه كانت رد فعل لصالحين عالحمل فرح و عادي يعني مراته حملت .. بس يوم عن يوم وكل يوم بطني تكبر كنت نشوف فالفرحه فعيونه و هضا السبب لي خلاني ندير بالي اكثر و نصر اني نقعد كويسه عشان البيبي يعيش
بعد مرت فتره مسكوني فالمستشفى اسبوع تحولت فرحة الصالحين بالبيبي لخوف على حالتي ، خصوصا بعد ما قعد متابع معايا ويمشي معايا لكل موعد دكتوره رغم شغله … وزاد استغراب هلي لدرجة قعدت معش نقوللهم اني تعبت
و فالنهايه وعشان يخف الثقل على قلبي ، حكيت للبنات سديم وهديل ومرام على اللي صار يوم الحادث مع جلال خويا الله يرحمه ووصيتهم انه ما يقولنش الحد من الكبار في اي حال من الاحوال … انصدمن و قعدن خايفات عليا و هضا اللي انا مانبيش مانبيهمش يقعدو خايفين عليا و يحسسوني بخوف بس لما حكيتلهم تريحت نوعا ما
حاليا خشيت فالسابع وتفكيري وحياتي كلها توا في اني نجيب على خير وخلاص … ومن اول ما خشيت للسابع وانا كل يوم نحس بوجع في بطني
//
//
خلود✨
من بعد يلي صار معايا وانا معش قعدت خلود القديمه ، مش هاين عليا كيف سيبت العيله لي عشت معاهم ايامي وحياتي ومش هاين عليا فرج اللي كل يوم يبي باته وجدته وجده ويسأل فيا عليهم
و مش هاين عليا كيف معتز فرط فيا ، وما نكذبش عليكم حبي له كبير بكل وعلى قد حبي على قد زعلي منه كنت في اول فتره نسأل عليه وعلي مراته ، كيف شكلها و شن يديرو ومعتز وين وشن داير
بس بعدها لقيت روحي خلاص بذات بعد ما عمي فرج صبا معايا في طلاقي وعطاني حقوقي كلهن من معتز ، لهيت في فرج الصغير ولهيت في حياتي رغم اني محبوسه مع خوتي و بعد ما عرف انيس بطلاقي قلب الدنيا قلب … و تعارك مع سراج وسعد عركه كبيره بكل بس بعدها انفرض عليه الامر الواقع وقعد فارض عليا اني لا نطلع ولا نخش
.
.
فاليوم هضا خش عليا انيس و قالي انه معتز طالب يشوفني انصدمت عشان ليا وييييين ما شفتش يعني حتى بعد ما طلبت الطلاق رسمي وبدينا فالاجراءات ما طلبش يشوفني
✨ خشت خلود بعد ضغط من خوها انيس انها تحكي مع معتز وكان له ست شهور مش شايفها كان فالبداية سعد يجيبله في فرج ، وسراج ماكنش طايقه بكل بس كان يجي كل اسبوع يجيب كل شي ناقصه وحتى كان يجيب في حاجات لخلود في وسط الشكاير ، ست شهور مرن باليوم والساعه والدقيقة كانت اتعذب في كل ثانيه فيهن وهيه تشوف في ولدها يكبر قدامها ، وهيه تحاول ما تفكرش في معتز ومراته كيف يعامل فيها كيف يحكي معاها … التفاصيل هذينا كلهن تحاول اطلعهن من قلبها وراسها وكان كله ياخذ من طاقتها و من روحها
رفع عيونه وشافلها، خشت وهيه حاطه الحجاب علي راسها و لما شافها حس انه فعلا قعد غريب عليها ! مش معتز اللي كان راجلها … قطع سرحانه فيها صوتها
خلود >> ما اعتقدش مازال فيه كلام بينا !
كانت تجنب اتبحت فيه ، بس انتبهت بنظرات سريعة لحيته الي مطلوقه و عيونه الي باين فيهن التعب ! بس هضا كله ما اثرش فيها
معتز >> خلود قعمزي عشان نحكي معاك مش جاي انتعارك
بحتت فيه و نزلت يديها و قعمزت في نهاية الكرسي بعيد منه
خلود>> مع انه مازال مش مقتنعه انه فيه كلام بينا غير علي فرج هذي الحاجه لي تجمعنا ، و انا ما طلعتش الا بضغط من خويا وانت عارف
بحت فيها ونزل عيونه من كلامها حسها تغيرت وقست عليه ، بس الي درته انت يا معتز كان اقسى! جرب شوية من الوجع
معتز >> انا عارف اني وجّعتك ، و عارف اني غلطت في حقك باللي درته كنت نحساب روحي ح نقدر … مش عارف شن نسميه طيش ولا قلة تفكير ولا شنو بزبط ! كنتي كافيتيني ما كنتيش منقصه عليا شي ماحسيتش بقيمتك الا لما بعدتي ! لو بتسمعي كلمة اسف ف انا اسف لو بتسمعي اني ندمت ف والله نادم
خلود شبكت يديها بتوتر >> معتز الكلام هضا لا ح يزيد ولا ح ينقص والله مافيش منه فايده ، انت قررت وهذي النتيجة انا طلعت من حياتك خلاص معش يربطني بيك الا فرج
قرب شويه منها و بحت فيها>> طلقتها ، شلتها الحوش هلها معش نبيها انا نبيك انتي والله نبيك و انحبك و مانبيش غيرك وكنت غبي لما فرطت فيك
وخرت وما بحتتش فيه>> شن ينفع يا معتز ؟ شن ينفع … بننسى كسرتك ليا قدام هلك كلهم وهلي بننسى اني كل يوم نفكر انت راقد معاها تمسك في يدها تشوف لعيونها !وحاجات واجددددد انت مش ح تخيلهن ! انا ما صدقت بديت نتريح ليش جاي عشان تقولي طلقت ؟ و طلق انا شن دخلني ، يعني بعد ما اطلقها تحسابني ح نرد ! انت تحساب انه مشكلتي بس انك اجوزت واطلقت … الفكرة نفسها مش ح نتقبلها ، مش رخيصه انا عشان تعدي تجوز وتعيش رغباتك وبعدها تجي للغبيه خلود وتردها وترضى
"صبت من جنبه وتمسك في دموعها ويديها يرجفن"
خذت نفس وكملت كلامها >> معش فيه بينا نصيب ، ياريت لو ماكانش الموضوع بينا فرج معش تطلب تشوفني وما تحرجنيش مع خوتي !
"ولا تغفِري لمن أثقل الأيام على قَلبك، لمن جعَل الإنكسار يصِل إلى عَينيك وهو يَرى "
.
.
طلعت بسرعه من جنبه وخلت قلبه يدق ، ماكانش متوقع خلود ترد عليه هكي ماكانش حاسب حساب الي داره ح يقسيها ويقسي قلبها ماكانش عارف حجم اللي داره … خلود فكرتها انه شاف الغيرها من الاساس الموضوع مش موضوع زواج وطلاق و خلاص هيا رديلي !
وهوا كان نادم و كان يتمنى لو في ساعة ترد الوقت وما يديرش اللي يديره ! حط يده علي وجه بتعب وحزن ودموعه كانن شوية وينزلن بس مسكهن حس انه خلاص هذي النهاية ! وخلود مش ح تكون له ماكانش متقبل الفكرة ماكانش مستوعب ابدا … طلع بسرعه وخبط الباب وركب في سيارته
//
//
في المركز المُعتاد ✨
عند المقدم صالحين ، و الرائد نبراس والرائد خالد
كانو المره هذي في مكتب الصالحين … يلي قاللهم راجوني فالمكتب شويه وبنجيكم
نبراس >> سيادة المقدم شن يبي فينا
خالد>> له زمان ما عطانش اوامر
نبراس >> قالي انه عميد منصور مكلمه ما مكلمه
خالد>> مادام فيها عميد منصور معناها اوامر رسمي
خش عليهم صالحين >> غريبه سمعتو الكلام وراجيتوني
نبراس >> شوف الحقاره
خالد>> قتلك خلينا في مكتبك
نبراس بحت فيه >> قريب تفرش وتبات فيه
صالحين>> مغير اس بس انت وياه "وطلع راسا من الباب وضبّح لحسنين"
حسنين >> ايواااااا ياباشاا
صالحين >> حسنين المركز كبر عينك وين تختفي بس لازم بعد اناديك نزلز المركز
حسنين >> بشتغل ياباشا والله
صالحين >> كلنا على بعضنا ننعدو عالاصابع جرا ايه يا حسنين
حسنين>> عنيا ياباشا عاوز ايه
صالحين >> عارف مراتك صابرين؟
حسنين >> يااااااه دي وحشتني هيه والعيال
صالحين >> خلاص عارف الياااااه لي قلتها هذي نبي قهوه من مرارتها نقولك يااااااه
حسنين >> من عنيا
طلع حسنين وصكر صالحين الباب
نبراس بحت فيه >> شن فيه؟
صالحين >> عندنا مهمه جديده
نبراس >> والله عرفتها
خالد >> عميد منصور فالقصه يبقى مهمه مهمه
صالحين >> فيه خليه متمركزه في منطقه في الشرق … يترصدولها الجماعه لهم فترررررره … طاح في يديهم واحد من الروس واعترفلهم انه عندهم مهمه قريبه
نبراس >> مكافحة مخذ*را*ت يعني ؟
صالحين >> هما كل شي عندهم بس الاكبر حاجه تج*ارة اع*ضاء
خالد>> وامتى حتكون؟
صالحين>> الي مسكناه قال ممكن بعد شهر او شهر ونص هكي
خالد >> وكيف ح نعرفو باهي
صالحين >> في وحدين من جماعتنا مترصدين غادي واللي مسكناه مازال ما يعرفوش انه امتسك حنخلوه يتواصل معاهم
نبراس>> افطنوله را يغدر ولا يقعد فيه كلام مشفر بينهم
صالحين>> انت لي حتمسك اصلا المهمه هذي لما نبوه يكلمهم
نبراس هز براسه>> خلاص تم
صالحين >> المهمه هذي حيكون فيها ترقيه لنا ، حتقعد مقدم انت وياه ويقعد عندكم مكتب كيفي
خالد ضحك >> واخيرا ربي بيبحت فحالنا
نبراس >> و هضا حيقعد عقيد وجه اللفته
صالحين شير بحواجبه>> انتو اترقو وانا لا … 40 سنة عاد نقه كان ما قعدت عقيد
دق الباب وخش حسنين >> قهوة للحبايب امر من غيابي عن صابرين
ضحك نبراس >> روحلها يا حسونه
حسنين>> انا عايز اجيبها عندي هنا
صالحين>> يضرب عالدق القوي 😂
//
//
ليلى ✨
السلام عليكم وانا في سنة رابعه واخيرا 🤭
بعد ما درت دور ثاني في سنة ثالثه زي ما هو متوقع طبعا ، بس الحمدلله كنت خايفه نعاود السنه و نجحت و مشيت لسنة رابعه و قرب حلم دكتور ليلى
طبعا انتو مش هامكم قرايتي وانا في سنة كم ، تبو تعرفو سهم واخبار سهم 😂 سحم على قول لين كويس و علاقتي بيه ولله الحمد من افضل ما يكون … درنا دفع بعد عرس مرام ونبراس وكان دفع بسيط كتكوت بين العيلتين بس مش كيف هرجة عيت الرائد
وطبعا العرس شرط بابا يكون بعد ما نكمل سنة خامسه اللي هيه سنة الامتياز او عالاقل نخشلها يعني ويضمن اني وصلت لاخر سنه 🤭 وسهم متحلف اول ما نكمل سنة رابعه على طول ح يجي ويفتح مع بابا موضوع العرس اخرى😂
بدا سهم يشطّب في شقته وطبعا شقته فوق حوش هله اللي على اساس معتز كان يبي ياخذها بس طبعا هوا بروحه بعد ما حس عدم القبول من الجميع قعد في الاجار ولغى فكرة شقة سهم من باله واساسا سهم ماكانش حيعطيها له 😙 المهم يعني حنقعد جيران انا ومرام اختي 😂
✨ الحمدلله بعد كل اللي مريت بيه حاليا نقدر نقول اني في مرحلة الامان مع سهم … بالنسبة الادم ولجين معش سمعت عليهم ولا خبر ولا يهمني اصلا هما وين و ادم من بعد التعهد لي داره طلع من حياتي … اما الاخت زهرة برضو من بعد البلوك لي حصلاته من سهم معش تجرأت وتواصلت معاه .. حرفياً عالم تخاف ما اتحشمش
.
.
.
في حوشنا الهادي واللي مليان بريحة القهوه و الكيكه لي دوبها اسيل طلعتها من الفرن … وصلت اسيل لنهاية التاسع وفي اي لحظة ح تجيب وكانت تكثر في حركه اخر فتره وترقى وتنزل مع الدروج عشان تتسهل عليها الولاده
اسيل >> لويلا نطلعو برا
ليلى >> اها العيال مع ماما برا والجو حلو اليوم
اسيل مسكت ظهرها >> شيلي السفره هي
ليلى>> يابنتي قعمزي قعمزي نحس فيكي ح تجيبي اليوم
اسيل>> حاسه روحي ثقيله بكل اليوم وبطني كل شويه مغص
ليلى>> را تقعدي ولاده يابنتي
اسيل ضحكت>> لالا مازال التاسع كله يكمل هكي .. لعند ما يوصل الم معين نمشي للمستشفى
ليلى>> يا ماما معش بنجوز "وطلعت قدامها"
اسيل>> قلتها قبلك و تحقي في بطني اكبر من راسك
ضحكت اسيل ومشن هنا الاثنين برا
حليمه>> هالقعده ناقصه مرومه
ليلى>> مش ماليين عينك انا واسيل وبطنها بكل
ضحكت اسيل>> كلا بطني كان ما ملت عينها نقه
حليمه ضحكت >> والله نفكر في مرام انا عارفتها ماتحكيليش عشان ما تشغلنيش
ليلى مدتلها فنجان >> ماما خذت سيادة الرائد بطوبته شن تبي اكثر
حليمه >> كان هو سيادة الرائد هيه مرام 😒 وبعدين ما نحكيش مع الراجل نحكي بلكي مضايقه من عربها
ليلى >> لالا مش مضايقه ومبدري دزتلي عالواتس تشرب في قهوه مع البنات
حليمه>> باهي ما قالت لكش عاد تحس في حاجه مافيش حاجه
ليلى بحتت في اسيل>> هضا لي بتعرفه هيه قوليلي من الاول ، لالا يا ماما مرام مش حامل بعدين ما لهش خمس شهور يعني دوبهم عرسان
حليمه>> ما تنسيش انها اجوزت قبلها قريب سنه وبرضو ما صارش حمل ، نبي نحكي معاها غير معش حصلتها
ليلى >> ماما مرام زواجها الاول محسوب وخلاص يعني قصة الحمل هذي مش عشان مرام فيها حاجه مثلا لا بس نصيب بينهم
حليمه >> ان شاءالله ربي يسخرلها ونفرح بعويلتها
شربت ليلى من القهوه >> وعيالي
حليمه >> اشقي بقرايتك
ضحكت اسيل وحطت يدها على بطنها بوجع
ليلى >> والله حاسه بولادتك اليوم
حليمه>> مازال اسبوع وتكمل شهرها
ليلى >> بس وجها اليوم بكل مسكينه
حليمه >> لما تحسي بوجع فوق اللازم على طول نمشو للمستشفى
اسيل ماسكه بطنها >> محمد مسكين حتى شغله مسيبه من اول ما خشيت للتاسع بيش لو صارت اي حاجه يقعد قريب
ليلى >> يعني توا الالم عليش ساكته عليه
اسيل>> انتي مش عارفه قعدت المستشفى مغير نمشي ويقعدن الممرضات ما شيات جايات عليا ويضايقن علمي وخلاص
ليلى >> خليك هنا اليوم ما تركبيش
هزت اسيل براسها وهيه اتحس بوجع في بطنها
//
//
عند البنات مابين المغرب والعشاء و بعد ما شربن قهوتهن
رنت خلود على سديم ، وحكتلها انه معتز جاها اليوم
سديم>> ماتبيش ترديله
خلود>> كرامتي ح تمرغد فالوطا
سديم >> كرامة لما تردي وهوا مش رادلك اعتبارك بس جاك نادم واعتذر و حطي شروطك واكيد مش ح يقول لا
خلود تنهدت>>ياريت بسهوله هذي قلبي يا سيسي مش قادر يسامحه ما نقدرش بكل نرد معاه في نفس الحوش من جديد مانقدرش نوقف عقلي من التفكير في انه كيف كان معاها
سديم >> حقك ماحدش ح يلومك خوذي وقتك واهم شي صلي و ادعي و خليها علي ربي ما تصكريش راسك انتي بس … انتي عارفه اني معاك شن ما كان قرارك وعارفتيني ما ندافعش علي معتز بس والله العظيم من اول شهر من زواجه مش متريح كل ما نشوفه يكون مهموم ومضايق ويفكر و زايد بزياده الفتره هذي كل مانشوفه فحوش امي سالمين نلقاه اسوء من المره لي قبلها واساسا معش نحقو فيه واجد حتى انه طلقها توا كيف سمعتها منك ما حدش عنده العلم بكل فالحوش
خلود >> ربي يريحه فنهاية يقعد بات ولدي ما نتمنالش حاجه شينه ، بس صعب نسامحه مانقدرش هوا الي خلاني نقسى عليه بالي داره ، و بيها بكل معقبلي قطعه منه فرج كل ما يكبر كل ما يقعد نسخته حتى فالتصرفات
ضحكت>> رايفة عليه النقطه هضا
خلود>> تعالن انتي والبنات بلا سماطه ، وتو ندزه لكم حتى عمتي وعمي بيحقوه حرام مش كل مره بنبهدلهم يجو عشانه
ابتسمت سديم>> ياحنون انت
ضحكت >>بطلي بطلي سماطه ، سلمي عالبنات حذاك
سديم >> يوصل سلامك حاضر
صكرت منها وجت جنب البنات
سديم >> خلود تسلم عليكم
مجد >> شن دايره
سديم >> قالت معتز جاها اليوم
هديل >> والله؟ وشنصار
سديم>> يبي يردها دروحه
مجد >> و صلوحه وينهي
سديم >> تخيلن قالت لي طلقها
مجد>> تكذبي ما قالهشش الحد بكللل
مرام >> هوا اكيد عشان عايش في شقة بروحه برا وزي ما قلتو معش يجي كيف قبل ف اكيده لها فتره حرجانه معناها لي خلاص طلقها
سديم>> شكلها اكيده مش فيوم وليله شكله له فتره وتوا قاعد يحاول مع خلود
هديل>> وخلود اكيده مش ح ترد طبعا
سديم >> اكيده مش هاين عليها لي داره بكل
مجد >> انقنه غلط في حقها ربي يهديه ويصلح حاله
مرام بحتت في مجد>> انتي وجك اصفر راه خلينا نخشو جوا
مجد>> حاسه بثقل بكل في بطني
هديل >> مجد نكلمو صالحين ؟
مجد>> لالا كويسه غير تعب زي ديما عارفين وضعي انتن
مرام >> تحسي ب اي حاجه قولي على طول
مجد هزت براسها وصبن البنات خشن فالدار الكبيره لي جوا
//
//
روحو نبراس و صالحين من المركز درس صالحين عشان يروح بمجد ونزل نبراس من سيارته لقى معتز مقعمز في سيارته وفاتح الباب
في الليل كان مقعمز يدخن ، قرب نبراس لعنده بحت لوطا لقى عرم دخاخين معزوقات
قعد يعد فيهن بصوت مسموع>> اربعه ، ثمانيه "بحت فيه وشير على في فمه" تسعه … قصدك هضا تاسع واحد ! في كم ساعه
نفخ وبلا مبالاه رد >> ساعة
نبراس>> تبي تنت*حر ؟
معتز>> ياريت لو ربي محلل
نبراس >> استغفر استغفر ربي وتعوذ من الشيطان
معتز مسح علي عيونه وتنهد >> استغفر الله
نبراس >> شكلهن الامور ما مشنش كيف ما تبي
معتز هز راسه >> لالا ، معش تبيني بكل ! مستحقرتني ومنقرفه مني تخيل …ما بحتتش في وجي سمعتني كلام شويه من اللي في قلبها و نستاهله … عفست علي كرامتي و اعتذرت و طلعت روحي عيل قدامها وتخيل ما انهزتش منها شعره ! طلعتلي بحجاب يا نبراس قعدت مش محلل عليها مقعمزه في نهاية الصالون ماتبيش تقرب مني "غمض عيونه وسكت"
نبراس >> ما تيأسش حاول معاها ، معتز الي درته مش ساهل عليها حتى لو ربي محللك اديره بس مش ساهل علي اي بنت فالدنيا يا ما بالك انت ياريت غير علي شي يستاهل … انت تعتبر كيف الي خنتها وجرحتها … مانبيش نحكيلك بس انت عارف هيه شن تحس وشن اتخيل لما كنت متزوج !
معتز بغصه>> قالتها ليا قالت لي كل يوم كنت نفكر انت معاها وتلمس في يدها و تشوف لعيونها .. معش ح تردلي يا نبراس والله كيف ح ندير انا شن اللي درته فروحي بس حاس بقلبي والع اقسم بالله نحس ح نموت بدونها
حط يده على كتفه >> حاول معاها خلود ما قالتش الكلام هضا الا وهيه تحبك ، اكيد فيه شوي حب في قلبها لكي … تبقى بات ولدها اهم شي انت معترف ب
غلطك و انا متأكد انه عمرك في حياتك م حتشوف الوحده غيرها حتى لو قست عليك حتى لو شنو ما قالت ما تدورش خليها تعبر على زعلها لحد ما قلبها يهدا
ابتسم بحرقه وهوا يقول >> زايده سماحه تخيل ، ما قدرتش نشيل عيوني من عليها … عيونها باين فيهن الزعل رجفة صوتها و ايديها … ناقصه شكلها ما تاكلش كويس واكيده فرج متعبها … تمنيت ناخذها في حضني اول ما شفتها ، ماسكه دموعها من اول ما خشت ما تبيش تنزلهن شن درت فيها وفي روحي
ابتسم نبراس >> انت مش بس تحبها يا ولد عمي انت منتهي اقسم بالله ، بينلها حبك هضا و صدقني مافيش حد ما يغلطش وخلود عاقله وبنت اصل ح تعطيك فرصة بس انت كون قدها ، بعدين الي درته هضا بينلك كيف انت تحبها
معتز صبا >> يسير خير ، خليني نخش الحوش بكرا عندي شغل
نبراس >> تصبح على خير ، عبيت امي دخاخين
خش معتز ومشى نبراس لحوشهم جوا
.
.
خش عليهم وين ما كلهم ملتمين فالدار و وطلق عليهم السلام
مجد>> صالحين معاك
نبراس >> اها برا يراجي فيك
مجد >> تمام
بحت نبراس في مرام وابتسم
سديم >> فاطنينلكم يا عرسان راه
هديل >> خلي الناس في حالها يا امي
نبراس ضحك ومرام بحتت في سديم >> را تفطنلك جدتك يا سامطه تلزك
هديل>> حتى العروس عرفاتك ديما ملزوزه😂
سديم >> اسكتن را يخش بدر ويقعد يوم 🥲😂
لبست مجد محرمتها وهيه حاسه ب الم ومعش عرفت كيف اتحرك
بحت فيها نبراس لي كان واقف عند الباب وجا لعندها ، صبت مرام اللي تلفونها كان يرن
مجد >> نبي المستشفى نبراس معش نقدر كلم صالحين
انفجعو كلهم و صبو …مسك نبراس مجد من يدها و تلفون مرام يرن برضو … مسكت تلفونها لقاته ليلى ردت
ليلى وهيه مفجوعه >> نحن فالمستشفى اسيل جاها نزيف قوي و خششوها طوارىء على طول
مرام >> كيف ؟ المستشفى نفسها
ليلى >> اها اها نفسها توا كيف خشينا خفت عليها بكل سيبت ماما مع العيال وكلمتك
مرام >> تمام تمام جايه
صكرت وبحتت في سديم >> عطيني. جاكتك
سديم>> كنك ؟ شن فيه
مرام >> اسيل فالمستشفى
سديم >> تبصري الحقي نبراس بسرعه
لبست جاكة سديم وكانت محرمتها على راسها اصلا طلعت تجري لنبراس لي كان واصل نص الجنان وكلهم مفجوعين وراه
وصل للباب و نزل صالحين مفجوع
صالحين >> شن فيه كنها
نبراس >> ما فهمتش تحس في بطنها
فتح باب السياره وركبها و طلع على طول بدون ما يراجي حد ، ركب نبراس في سيارته وركبت مرام بجنبه
نبراس >> مرام خليكي لو صارت حاجه تو نكلمك
مرام>> كلمتني ليلى قالت لي انه اسيل فنفس المستشفى مش عارفه كنها
نبراس >> لا حول ولا قوة الا بالله خلينا نطلعو بسرعه صالحين يجري جري
//
//
في المستشفى
خشو مرام ونبراس، لقو الصالحين سابقهم
نبراس>> شنصار ؟
صالحين>> مش عارف يانبراس خذوها مني على طول ونحن فالطريق قالت لي نحس بروحي ولاده
مرام>> هيه في السابع توا مازال حتى ما كملاتش
صالحين >> مش عارف كلمت دكتورها توا جايه فالطريق
نبراس بحت يمينه>> اهو محمد خوك غادي
خبطت على راسها >> نسيت اسيل بكل
ومشت تجري شورهم لقتهم مصبين عند غرفة العمليات استغربت
مرام >> شن فيه ؟ شن صار معاها اسيل
ليلى>> مش معروف شي خذوها على طول وبعد شويه طلعت الممرضه قالت حتجيب بعمليه
بحتت مرام جهة نبراس و الصالحين لقت دكتورة مجد جت وخشتلها على طول.
لقراءة جميع فصول الرواية من هنا