روايه حافة المنتصف
الفصل الاربعون 40
بقلم ايه
خش بدر الدين للحوش ، ومشى للدار الكبيره كالعاده
بحت لقاهم كلهم وجوهم مفجوعين
بحت فيهم >> سلام قول من رب الرحيم كنكم يا اسلام الله
جميله>> مجد فالمستشفى
بدر >> كيف ؟ كنها تبي تجيب ولا شنو
جميله>> مش عارفه يستر الله والله طلعت مسكينه وجها ما يتفسرش
بدر >> شالها نبراس ولا منو
جميله >> صالحين كان مروح بيها عدا و معاهم نبراس و مراته 😒
طلع بدر الدين من الدار وهوا ماسك تلفونه بيحط علو رقم نبراس… لحقاته سديم
سديم >> تبي تمشيلهم للمستشفى
بدر>> بنشوف نبراس شن وضعها مرات تطلع حاجه بسيطه
سديم >> بدر وضع مجد حساس شويه اكيده مش حاجه ساهله
بدر>> ماهي حامل كيف حمل هالصبايا
سديم >> حتقعد طول عمرك متخلف 😒
بدر >> شن قلنا على طولة اللسان
سديم >> اوففف قصدي فيه بنات حملهن صعب شويه ومجد منهن
بدر >> انتي تدوي على الحادث لي زمان؟
سديم >> قصدك تعرف ؟؟
بدر >> عندي العلم من ايام الحادث مره قالي نبراس بعدها معش نندري نحسابه موضوع هكي بسيط وخلاص
سديم >> لا مش بسيط للاسف الضربه جتها في مكان حساس بكل بكل و حملها ح يأثر عليها بس الدكتوره طمنتها انه اول حمل مش حيكون خطير عليها
بدر>> قصدك لدرجة هذي الموضوع
سديم >> هضا لي نعرفوه من مجد ومحلفتنا مانحكوش الحد من الكبار وانا وهديل مش قادرين نصبرو ومرام معش ردت علينا
بدر>> اهدي بس انتي تو نرن على نبراس ونقولك وتوا حنمشيلهم
سديم >> بدر بالله كلمني مش تمشي ومعش ترد
بدر >> حاضر ياعيون بدر اهدي انتي بس ماتقعديش مرعوشه
سديم قرنت حواجبها >> شن قلنا عالكلام هضا
ضحك>> استغلال فرص بس
هزت براسها وخشت لدار ، رفع سماعة التلفون وطلع وهوا يرن على نبراس
//
//
في المستشفى
✨غرفتين عمليات بجنب بعضهن ، غرفة فيها مجد وغرفة فيها اسيل، واللي واقفين برا وعلى اعصابهم وتلفوناتهم ما وقفنش رن من العيلتين يبو يطمنو
مرام نبراس الصالحين ومحمد وليلى … كل واحد خايف بطريقته وكل حد عقله يشيل ويجيب
انفتحت غرفة العمليات الاولى لي فيها مجد وطلعت الدكتوره
الدكتوره >> نبو دم ضروري لازم دم نزفت واجد
صالحين >> انا ح نخش انا
نبراس مسكه>> صالحين مجد o+ وانت مش كيفها تاخذ من نفس فصيلتها ولا o- بس
صالحين باعصاب >> كلم كلم اي حد كيف مستشفى مافيهش وحدات دم لحالات زي هكي كيف
مسكه نبراس ومحمد لي اعصابه تالفات قرب منهم
نبراس >> انا نفسها وخر يا راجل بس وخر حانتبرع
الدكتوره>> مش انت بروحك كلم حد معاك o+ ولا o-
صالحين >> دماغي وقف من فصيلة دمه هكي من
نبراس رد مسكه >> بدر وسهم ياراجل ح نكلمهم توا ح يجو طياره المستشفى قريبه اقعد انت بس وخر يا بني ادم مش ذنبهم الممرضين
مسك محمد صالحين ووخره بدون ما يحكي حرف
الممرضه بخوف >> بعد تكمل تلفونك ح تلقاني لوطا و حتى اللي معاك قوللهم يجو نفس المكان عشان يتبرعو
نبراس هز براسه و مسك تلفونه ولقى بدر يرن عليه قاله يجي بسرعه ويكلم سهم
بحت نبراس في مرام >> خليكي هنا نككمل ونجي
مرام >> رد بالك بس را تتعب
ابتسم >> حاضر "بحت في الصالحين" اهدا الله يربحك اهدا ما تلبزش الدنيا
شيرله بيده 👍 و ما رفعش حتى راسه
.
.
.
يمرن الدقايق عليهم ساعات و شن اصعب من انك تراجي في حد مابين الحياة والموت ومحمد لي كان ماسك اعصابه معش قدر يمسكهن اكثر من هكي …. مش اول مره اسيل تجيب بالعمليه بس اول مره العمليه تاخذ وقت هكي
جا سهم وجا بدر الدين و تبرعو المجد بالدم هما ونبراس … وردو كلهم وركبو فوق مكان العمليات
✨✨✨✨✨✨✨
رن تلفون بدر وكانت سديم يلي ترن ، رد وحطه على وذنه وتباعد شويه
سديم >> بدر وينك شن صار معاكم مش قتلك رن عليا وقولي
بدر >> ما صارش شي حست بس تبرعنا بالدم لمجد و توا قاعدين نراجو
سديم>> كيف كنها نزفت واجد ولا شنو حي عليا يابدر صارت حاجه اكيده
بدر >> سديم اكبرن يا اشورخ بلا عياط تفجعي الناس جنبك تو عليش نبي نكذب عليكي
سديم >> قول والله كويسه مجد
بدر >> اقسم بالله ما في حاجه صارت يابنتي
سديم خذت نفس >> الحمدلله ، باهي قولي شن صار في عيت مرام
بدر>> قاعدين حتى هما مش عارف معش حد طلع علينا من جوا بكل
سديم >> قصدك حتى اسيل عمليه وقصه ؟
بدر >> والله ماني فاهم حاجه الدنيا كلها حايسه
سديم>> بدر بالله اي حاجه كلمني لو سمحت
بدر >> حاضر بلا توتر انتي بس
سديم >> راك ادوخ انت يلي متبرع بالدم
ضحك>> تو انجي ديريلي نسكافيه اه
سديم >> ايوه نسكافيه ودخان بيش ادوخ رسمي
بدر >> كثريلي سكر
سديم >> بدر عدي عدي شوف الدنيا وكلمني
ضحك >> حاضر
//
//
مسك سهم تلفونه وطلع قدام باب المستشفى شويه
جاه مسج وكان من ليلى
ليلى" كويس انت ؟"
سهم" كويس تبرعنا بدم بس"
ليلى " نزفت واجد شكلها"
سهم "اها ، ثلاث شكاير خذو"
ليلى " ربي يستر يارب"
سهم" انتي وجك تاعب بكل نجيبلك حاجه تشربيها"
ليلى" وجيب المحمد بالمره يشرب معانا 😒"
ضحك سهم ورد عليها " تي خطيبتي شن فيها تبي حاجه نجيبها لكي ؟"
ليلى" سلامتك ، انت وين مشيت"
سهم " طلعت ندخن برا اهو خاش"
انفتحت غرفة العمليات اللي فيها اسيل ، بحت محمد في الدكتوره لي وجهها ما يبشرش بالخير و قربو كلهم منها ما عدا بدر ونبراس و سهم كانو بعيد شويه
الدكتوره >> الحمدلله على سلامة المريضه
تنهد محمد براحه >> الحمدلله
بحتت مرام >> والبيبي ؟
الدكتوره >> حاولنا للاسف بكل ما نقدرو ننقذوه بس البيبي انولد ميت
مرام بصدمه>> كيف ؟؟؟ كيف يعني ميت
قرب نبراس منها ومسكها >> مرام اهدي بشويه
ليلى بحتت للدكتوره ومازالت ما استوعبتش >> يعني كيف لعند مبدري فالعشيه كانت تحس بيه كيف مات
تبصري معايا ولا شنو
الدكتوره >> ماكانتش تحس بحركته كانت تحس ب الم بس كانت عمليتها صعبه جدا هيه جتنا والبيبي ميت في بطنها حاولت والله ننعشه حاولت بس للاسف البقاء لله
محمد اعصابه اللي كانن معش يتحملن وكلنا كنا نراجو في ردة فعله ، قرب من عند الدكتوره وهوا هاجم
جا نبراس بسرعه وحط يده فالنص ما بين الدكتوره ومحمد
نبراس >> محمد بحت فيا ووحد الله ، محمد
بحتت في ليلى لقيتها تبكي ، جيت قربت من محمد
مرام >> محمد اهم شي اسيل كويسه عندك لين و قيس بالدنيا وما فيها
محمد ضغط على يده وبصوت عالي >> اسيل بنخش نشوفها را نطربقلكم ام المستشفى فوق روسكم
كان يحكي ونبراس ماسكله يديه
الدكتوره >> مازالت ما ناضتش عمليتها كانت صعبه جدا "وبحتت في مرام" مازال ما قلنالهش انه البيبي مش عايش
هزيت براسي نبيها تمشي بسرعه وما نبيهش تكثر كلام عشان مش ضامنه اي ردة فعل المحمد ، كانت لحظة مانتمناهش حتى العدوي
ومحمد كان مش مستوعب لي صاير نهائيا ، مازال مصدوم وحتى ردة فعله ماكانتش كامله
كان سهم يشوف لليلى وهيه تبكي ، ومش قادر يدير شي
مرام >> محمد لازم تكلم ام اسيل لازم تعرف وضع بنتها و اسيل اكيده بعد تحل عيونها تقعد تبي امها
محمد هز براسه وهوا يستوعب>> كلميها كلميها … بننزل نشوف الاجراءات شن بندير وكيف بندفنه وامتى
بحتت فنبراس انه يخلي عينه عليه ، ومشيت شور ليلى
مرام >> ليلى بالله عليك تبطلي ، معش تبكي شفتي حال محمد كيف انا بروحي ماسكه روحي بالغصب خلينا توا بس نطمنو على اسيل اهم شي تطلع كويسه
كنت نحكي مع ليلى وسهم عيونه معانا ، قرب من عندنا و جاب شيشة اميه فتحها ومدها لليلى
رفعت راسها بحتت فيه انه يهديها، ومشيت وخليتهم بروحهم
سهم >> اشربي واهدي
ليلى تبكي >> مش قادره والله
كانت مقعمزه عالكرسي ، نزل بركبه ونص قدامها
سهم>> اشربي شويه بس
مسكت الشيشه وهوا رفعها معاها شربت شويه ويدها ترجف
سهم >> خوذي نفس واهدي ، الحمدلله مرات خوك بخير و الحمدلله عندهم عويله صح تعبت فيه وصح حاجه توجع بس قضاء اهون من قضاء
ليلى >> الي يقهر انها وصلت للتاسع وتعبت فيه ، نفكر في ردة فعلها بعد تعرف واسيل كان حملها صعب بكلللل مسكينه
سهم >> مش ح يسير الا كل خير اهدي بس و تنفسي بشويه "وصبا سهم وهوا يصكر في شيشة المية"
خذت ليلى نفس و مسحت دموعها ، وهوا صبا جنبها
.
.
.
كنت واقفه و نكلم في ام اسيل عشان تجي ، على جيت نبراس
مرام >> اها يا عميمه كويسه اسيل والله كويسه ، خلاص تمام تلقينا كلنا لوطا
بحت فيا نبراس >> قلتيلها؟
مرام >> ما قدرتش والله تو تجي وتعرف قتلها اسيل تعبت وجبناها شكلها ولاده وخلاص
لف نبراس يده عليا وقربني من عنده >> الحمدلله على كل حال الحمدلله
مسحت دموعي >> ان شاء الله تنوض اسيل بخير و يهدا محمد " وبحتت في صالحين " ما صارش شي عندكم
نبراس بحت فيه >> ولا حاجه من بعد الدم ما فيش حد فيهم طلع علينا
وخرت شويه منا >> كويس انت بعد ما خذو منك الدم
ابتسم >> كويس يا روحي كويس
رديت الحضنه>> محمد وينه
نبراس >> خليته لوطا يدخن بروحه ويقعد مع نفسه شويه يستوعب و قالوله مازال الاجراءات
مرام >> ان شاء الله خير يارب
//
//
في حوش الرائد خالد والوضع هادي شويه
✨ خش خالد يلي كان دوبه مروح من المركز
غاده >> اششش بشويه ولدك محوتك رقد
ضحك خالد وسلح كندرته عند الباب وخش
خالد >> قصدك اليوم كله عالوضع هضا
غاده >> يرقدلي توا وينوض اخر الليل
خذاه منها خالد >> عطيه ليا بس
غاده>> خالدددددد تو تواعييييه
خالد>> خليه ينوض تو نسهر معاه انا
غاده >> ايوه وبعدها اقعد قول عندي شغل بكرا فالصبح و تطيح ترقد
خالد >> انتي كنك كيف اللي غايره مني انا وولدي
ضحكت غاده وهيه ماشيه شور المطبخ>> باهي لي ماجبت بنت كان هضا را قعدت ضرتي رسمي
خالد مسك مُعز ولده ولحقها >> جيبي باه بنت
غاده>> خالد اطلع انت وولدك برا المطبخ مصقع تو يمرض
خالد >> عندي مهمه تو تقعدي انتي وياه بروحكم
سيبت الي فيدها وبحتت فيه>> مهمه كيف ؟ امتى
خالد>> تي اهدي يا بنتي ، مازال ممكن بعد شهر شهر وشويه على حسب
غاده>> وانا باهي ؟ وولدك ! خالد
خالد>> يا قلب خالد تو انا مش حنمشي من هنا غير وانا مأمن عليك بعدين المهمه مرات تكمل بسرعه
غاده>> ومرات اطول "وطلعت من المطبخ"
لحقها وحط مُعز في السرير متاعه وجا لعندها
خالد>> بنقلبوها نكد ياريتني ما حكيتلك عاد مرات ما يسيرش منها بكل
غاده>> قول والله يارب مايسيرش
ضحك خالد>> ياهبله بنقعد مقدم مليت وانا رائد ، خلينا ناخذو مكتب الصالحين
غاده>> يامينتي عالصالحين من اول ما خذا الرتبه وعينكم على مكتبه
خالد>> ح يعدي المكتب احسن الاجرب حتى هوا ح يترقا
ضحكت>> نديرلك عشاء ؟
خالد صبا>> سريع سريع على ما صليت
غاده>> هي حاضر
//
//
فالمستشفى ✨
واخيرا طلعت الدكتوره من عند مجد
الصالحين >> مش مهم الجنين مش مهم اي شي بالله عليك قولي هيه كويسه
الدكتوره >> المدام بخير و البنوته الحمدلله … بس مجد نزفت واجد بكل وحاليا مش واعيه والبيبي جا ضعيف حيقعد في الحضّانه فتره ومجد برضو حتقعد كم يوم عشان وضعها الصحي ومازالت م تجاوزتش مرحلة الخطر خايفين من المضاعفات بعد العمليه
الصالحين >> بنخش نشوفها حتى من بعيد
الدكتوره >> توا ح تطلع من غرفة العمليات لغرفة العناية و ح يخلوك تشوفها بس من فضلك انت بروحك من ورا القزاز فقط ، والبيبي لازم ادير اجراءاته مع الممرضه و ممنوع اي حد يخش عليه لانه مناعته حاليا ضعيفه بكللللل ف حتشوفه من بعيد
الصالحين هز براسه ومن كثر الخوف والأعصاب يلي عنده معش قدر يصبي
خبطه نبراس على كتفه>> مبروك يا بطل
بدر >> الحمدلله على سلامتهم
صالحين >> الله يسلمك
نبراس >> صبي دير اجراءاتك وأمورك قاعدين هنا نحن
صالحين >> تمام تمام
صبا صالحين وخطم من جنبه محمد
سبحان الله الدنيا كيف انها غريبه ، حد ماشي يدير في اجراءات ولاده والثاني يدير في اجراءات دفن
محمد كانن اعصابه تالفات ، مابين يحمد في ربه انه اسيل كويسه ومابين حرقته على ولده اللي ما لحقش يفرح بيه
وما نفعُ الشموسِ الطالِعاتِ لِمن في قلبِهِ ليلٌ عتيق ؟
.
.
.
روح بدر الدين فالليل متأخر عشان يطمنهم شويه على حالة مجد ، وطمنهم انها كويسه بس مازالو ماسكينها فالمستشفى مش معروف لامتى و البيبي حيقعد فالحضانة برضو
جميلة>> بكرا لازم نمشولها انا وخالتك
بدر>> درتن لمه واتفقتن كلا انتي وخالتي
جميله >> راك تاخذ وجك بس بكرا الصبح تشيلنا
بدر >> غير خلينا نعرفو في زياره ولا لا بس الوضع مازال مش مفهوم
جميله >> علي كيفه نمشو وخلاص ماه حتى مرام واختها غادي
بدر >> مساكين مرات خوهم ماتت وعاشت
نجوى >> عليك بخت ساد غير تعب الشهور والحمل والثقل ربي يصبرها
سالمين >> الله غالب نصيب مسكينه مغير باهي محصله عويله قبل الحمدلله نعمه ، وربي يطمنا على مجوده يارب
جميله >> الحمدلله "وبحتت في بدر" حتشيلنا بكرا؟
بدر >> خرفي
سالمين >> خرف بروحك واسكت وانت ديما لاوي
بدر >> بلكي تبي تمشي تساولي حتى انتي ياسلومه
سالمين>> ريت هالكرعين لي عندي نراجي غير فيك انت تعزمني نشوف بنتي
هديل وشوشتله>> بدر اطلع بكرامتك خير را شويه وتجيك لزه الحق سديم فالمطبخ
ضحك>> حتى انا قلتها خليني نهرب
طلع بسرعه ومشى شور المطبخ
بدر >> بطوطه
سديم >> بطوطه فعينك
بدر >> مافيش رومنسيه بكل
سديم مدتله كبايه>> في نسكافيه تبي
ضحك وخذاها منها>> حطيتي فيه صبعك
سديم>> بطل يابدر بطل ، را شي مره تسمعك ماما تحرم عليا الجيه هنا بكل كيف ما حرمت على لقمان يشيل هديل
بدر شرب منه >> على اساس هناء مش عارفه اني نبيك
سديم >> بدر الدين شن قتلك انا
بدر هز كتوفه>> خرفي لكي عرم تستعبطي ما تعبتيش خلاص العيله كلهم عارفين و امك عارفه مازال باتي بس ونقرو فاتحه
كرت منه الكبايه وشربت منها >> بتقرا فاتحتك على من ان شاء الله كيف محدش قالي
بدر >> بنقراها علي جدي الفاتحه الله يرحمه ويغفرله عرفتيه جدي
ضحكت سديم >> الله يرحمه
رد خذا الكبايه منها >> لعند امتى باهي البراده هذي ؟
سديم >> لعند ما نتأكد انك مش بدر القديم ، ومش مخلي الدنيا كلها تعد نجوم الليل وراك
بدر >> وكيف تبي اتأكدي عاد
سديم>> مش ح نتأكد انت اثبتلي
بدر >> يا بنت الناس نقولك بنقرا فاتحه
سديم >> مش قتلي بنقراها على جدّي الله يرحمه
بدر >> سيسي احا!
سديم>> غير بس توا طمني بالله عليك مجد كويسه؟
بدر >> والله العظيم اللي نعرفه قلته لكي ما قلتش لهم حتى ، قتلهم كويسه وصح مازال ما ناضن بس ما قلتلهمش انها مازال ما تجاوزت مرحلة الخطر
سديم >> ياربي يستر الله وتطلع كويسه يارب ساد البيبي فالحضانه مش معروف لعند امتى
بدر>> ان شاء الله خير يارب الدكتوره نوعا ما قالت انه البيبي حيطول شويه فالمستشفى
سديم >> ما شفتهش تشبه منو ؟
بدر >> العالم الاخر ، خلينا نردو الموضوعنا
سديم >> ما فيش مواضيع عدي اشرب نسكافيهك
ضحكت وطلعت من حذاه وهيه تقول >> وانتظريني و عدّي نجوم الليل
سيبت بدر الدين وراها رافع حاجبه على البهدله لي متبهدلها
//
//
صباح اليوم الثاني في المستشفى
مازالو مجد واسيل على وضعهم ، مجد صارن لها مضاعفات بعد العمليه و قاعده مازالت ما ناضتش والبيبي حالتها خطيره
اما اسيل ف نهى محمد اجراءات البيبي وجت امها اللي ما وقفتش بكاء على بنتها وعلى حفيدها و لدرجة خذاها مؤمن ولدها وروح بيها بعدها جا هوا بروحه
و ليلى روحت للحوش عشان قيس ولين متعودين عليها وهيه لي بتشقى بيهم وسهم بعد اطمن على ليلى طلع برضو حتى هوا وقعدت فالمستشفى مرام ونبراس و صالحين و محمد ومؤمن خو اسيل
.
.
.
ركب نبراس من لوطا وجاب معاه شكاره فيها عصير واميه و شوكلاطه وفي يده الثانيه ماسك القهوه
نبراس >> النبي كل واحد ياخذ وياكل را قاعدين في مستشفى وكلنا علمنا ضايق ماتضايقوهش عليا اخرى
مد للصالحين قهوه ، بحت فيه
صالحين >> بالله عليك يا نبراس مش خاطري في ولا حاجه
نبراس >> ما جبتلكش رز بالخلطه انا جبتلك قهوه وعصير را مراتك فالعنايه وبنتك فالحضانه من بيشقى بيهم ؟ كول امسك روحك بيش يقعد عندك جهد امسك
مسح الصالحين عيونه و خذاهن منه
مشى شور مؤمن ومحمد مدلهم و كل واحد خذا مجامله
كنت مقعمزه عالكراسي هكي جايات في الجنب ، جا نبراس جنبي وفتحلي العصير مده ليا
مرام >> نبي قهوه
نبراس>> اشربي العصير بعدها تو ننزل نجيبلك قهوه
مرام >> اشرب منه انت باهي شويه، واجد مش ح نكمله
شرب منه شويه ومده لها >> هيا طشة عصير تعزمي بيه
ضحكت وخذيته منه
نبراس >> تروحي مش خير ؟
مرام >> خليني معاك هنا عالاقل نطمن وانا قريبه
نبراس بحت فالساعة >> مسكين خالد ازرط في شغلنا انا والصالحين مش حنقدر نسيبه بكل هضا لما يفصل ينعمي
مرام بحتت يمينها >> ما اشر منه الا محمد ، ان شاء الله ربي يستر و يعدي الفتره هذي على خير
خش بدر الدين ووراه هنيه و جميله
نبراس صبا بحت فيه >> تو مش قتلك ما تجيبليش حد
بدر>> اقسم بالله من صبح ربي مصبياتلي استيقاف عند الباب خالتي جت من الصبح عندنا و مشغوله
صبت مرام سلمت عليهم وردت قعمزت مكانها
جميلة قربت عند نبراس و مشت هنيه >> شن صار معاكم ؟
نبراس >> والله يا امي مافيش جديد طمنونا شويه على مجد بس ممنوع حد يخش عليها ولا على البنت
بدر >> وانساباتك شن الوضع عندهم
نبراس >> مازال ما ناضتش مراته ومازال ما قالولهش شنصار
بدر >> لا حول ولا قوة الا بالله
نبراس >> امي را تتعبو هنا مش ح يخلوكم تخشو
جميلة >> عادي نقعدو مع اللي قاعدين
بدر بحت في نبراس وضحك >> بننزل نجيب قهوة
نبراس >> جيب المرام معاك
شيرله بيده ونزل
//
//
عند خلود فالعشيه
خلود >> شنو نطلعو؟
سعد >> نشيله ونرد عليك ولا شنو
خلود>> لا خلينا نطلعو مره وحده نحطوه عند عيت عمي، بيش نلحق نمشي لمجد بلكي نقدر نشوفها فالمستشفى و بعدها نبي المحل لي قتلك عليه فرج ناقصاته دبش قعد يكبر بسرعه
سعد >> يعني بنشحور معاك اليوم
خلود >> معلش اليوم اليوم بس
طلعو للسياره و فرج راكب مع سعد و خلود طول الطريق تدعي انها ما تشوفش معتز
وصلو قدام الحوش و كان واقف يفتح في باب سيارته ما كانش عارف بجيتهم اصلا
بحتت خلود في سعد >> انت رنيت عليه ؟
سعد رفع حاجبه>> شن بنرن نقوله اطلع جايبلك خلود
خلود برمت وجها>> مش قصدي يا بايخ نحسابك قتله بتجيب فرج
سعد>> شكله قلبه حاس"وغمزلها "
هزت براسها >> بلا سماطه شن قلنا نحن
درس السياره قدام الحوش وماردش عليها ونزل و هوا رافع فرج
معتز جا شورهم >> تي وين يا بابا " ومسك فرج" شويه كنت جاي ناخذه " ومد يده السعد "
سلم عليه سعد >> والله خلود عندها كم مشوار قلت نحطه في طريقي هلك رايفو عليه وخلود ماتبيش اتعبهم
بحت معتز فالسياره وخلود منزله راسها عالتلفون ما تبحتش فيهم، قرن حواجبه وابتسم مجامله السعد
معتز>> تو نروح بيه معناها ما اتعبش روحك
سعد >> تم
مدله الشنطه فيها غيارات و حاجات الفرج و ركب للسياره وعيون معتز عليهم"
خش معتز لحوش جده وين ما امه والباقي قاعدين ، خششلهم فرج و طلع وهوا متنرفز
//
//
كانت ليلى تبرم فالحوش وما تبيش ترن على مرام و محمد عارفتهم متوترين
خذت تلفونها ورنت على سهم
ليلى >> مشيت للمستشفى ؟ ولا لا
سهم >> لا والله بدر توا خذا امه وخالته صكرو روسهم يمشو
ليلى >> نبي نطمن على اسيل
سهم >> كلمت نبراس مبدري شويه قالي الاوضاع نفس الشي فالعنايه كيف اسيل كيف مجد ومازال ولا وحده فيهم ناضت
ليلى >> محمد خويا ماسك اعصابه؟
سهم >> معاهم نبراس ماتخافيش سوا هوا ولا الصالحين
ليلى >> ان شاء الله خير يارب
سهم >> اطمني يا روحي وانا نكمل المعرض وحا نمشيلهم غادي بس في حسابات لازم ننهيهن مع لقمان حايس فيهن بروحه من امس
ليلى >> باهي تمام ، لما تمشي طمني
سهم >> حاضر ، شنجو العيال ؟
ليلى>> حبايبي قاعدين صغار مش فاهمين شي لين كل شويه تسأل على امها كلا قيس متعود يقعد معايا ما يدورش
سهم >> ناقصتهم حاجه نجيبها لكي
ليلى ابتسمت >> ربي يخليك ليا لالا مافيش حاجه ناقصه
سهم >> خلاص اي حاجه كلميني
ليلى >> تمام باي
//
//
في الليل
خذا معتز فرج ومشى شور حوش هل خلود
ماكانش في حد من الشباب فالحوش ، فتحت ام خلود الباب وسلمت علي معتز
معتز >> خلود قاعده ؟ بنعطيها حاجات الفرج
بحتت فيه وفهمت انه بيشوفها >> ح نكلمها بس ما نوعدكش ح تطلع
ابتسم بحزن>> معلش ياعمتي قوليلها عشان فرج مش عشاني
هزت براسها >> خش خش تفضل
معتز >> لا مدامك فتحتي معناها مافي حد فالحوش من الشباب خلينا فالجنان
ابتسمت و برمت خشت و فرج لقى سيارته فالجنان قعد يلعب بيها و معتز عيونه عليه
طلعت خلود كانت بنفس لبستها لي طالعه بيها
بحت فالساعه الي كانت ٩ وبحت فيها >>شكلك كيف روحتي
طبست علي فرج تسقم في لبسته وبدون ما تبحت فيه>> من مبدري بس كنت نهدرز مع ماما "فطنت الروحها انها تبرر ،بحتت فيه و ردت صبت " تهيالي مش موضوعنا
كان مقابلها ويبحت في لبستها >> مش هذي البلوزه لي دويتلك عليها من قبل
ربعت يديها >> كمل الكلمه !
رفع حاجبه
خلود >> اسمها البلوزة اللي دويتلك عليها لما كنا متجوزين "وابتسمت" ونحن حاليا مش متجوزين ف معتز اختصر ، ماما قالت لي تبيني عشان فرج
ضغط علي قبضة يده بالقوه >> جبتله حاجات وفيه دوا كحه شكلها باديه فيه ، عطيه له كل ثمان ساعات مكتوب عالباكو كم يوم نسيت
مسكت منه الشكاره >> اه وصيت سعد لما حطني قتله يجيبله
معتز >> مره ثانيه كلميني انا لانه هضا ولدي مش ولد سعد مش ملزوم بيه ، دزيلي رسالة واكتبيلي فيها شن يبي عارف انك مش طايقه تسمعي صوتي ف دزي رساله معلش " وابتسم بضيق"
خلود نزلت يديها >> عادي يعني كلها دوا كحه
معتز >> حتى ولو انا باته وهوا ولدي رغم الي صار وتهيالي حتى الفتره لي فاتت والشهور لي مرن ماكنتش مقصر معاه ماجتش على دوا كحه
بحتت فيه وهزت راسها موافقه الكلامه بدون ما ترد
نزلت عيونها الفرج وطبست لعنده، مسكت الشكاره >> هيا ماما تخش تغير دبشك وترقد
بحت فرج في باته الي كان مبتسم بضيق ومتمني يرد بالوقت ويرد كل شي احسن من الي كان
طبس لعنده وكان فالنص بينه وبين خلود >> بكرا حنجيك تمام ، خوذ الدوا وما تعبش ماما عشان نجيك
رفعاته خلود الي كانت اتهرب من معتز ونظراته وصبا هوا معاهم وفرج يبكي يبي باته ك اي طفل صغير يشوف حد طالع من الحوش يعلق فيه
خلود >> حنخششه جوا نسكته
برم معتز و طلع خذا الباب فيده و خلود خذت فرج فحضنها واطبطب عليه عشان يسكت ، وحست روحها ردت النقطة الصفر
//
//
فالمستشفى
مرن عليهم الساعات بدون اي جديد ، روح بدر ب امه وخالته اما مرام مابتش تروح ما كانتش حابه قعدت المستشفى بس بدون نبراس مش حتعرف تروح ، كانت متكيه على كتف نبراس و مغمضه عيونها
و صالحين واقف زي اول ثانيه قدام الغرفه ما بش يحول من قدامها ، يمشي يشوف بنته من ورا القزاز اللي كان حجمها ضعيف بكل ومغطيه بالاجهزه والنفاسات يرد لقدام غرفة مجد
خش خالد ، بحت يمينه لقاهم واقفين
خالد >> السلام عليكم
نبراس >> وعليكم السلام
بحت فيه صالحين و شيرله بحواجبه ، رفعت مرام راسها من كتف نبراس و سقمت قعدتها
مشى خالد شور الصالحين وخبطه >> قدها يا وحش قدها
هز الصالحين براسه >> ان شاء الله خير
نبراس >> شن الامور فالشغل
خالد >> تعال بندخن برا
نبراس >> لاحقك
وبرم على مرام >> ندخن برا ونجيك انا
مرام >> تمام
طلع نبراس ورا خالد ، خذا منه الولاعه وولع دخانه
نبراس >> قولي شن صار فالمهمه لي قال عليها عميد منصور
خالد >> اليوم كله ماسك ملفاتها ، العصابه اوف بكل حاجه ادوخ الراس مافيش نوع تجاره ما خاشين فيها و عندهم صبيان في كل مكان جو ناس يحركو فيهم
نبراس نفخ دخانه >> والروس الكبيره مش باينه
خالد>> ما هضا عليش نحن فالمهمه لانه اكبر راس عنده تسليم اعضاء وعلى قولت الشخص لي ماسكينه فالاعترافات على اساس انه التسليم بعد مده و حيكون الراس فيها
نبراس >> ويمتسك هوا تمتسك الشبكه كلها
خالد >> بزبط
نبراس عزق الدخان وعفس عليه >> اي جديد بلغني
خالد>> تم ، طمني عالصالحين انا زرقت نشوفكم بس وراد للمركز ماسك اليوم
نبراس >> ربي يعطيك الصحه نطمن عليهم بس ونرد معاك
فتح باب السياره >> كون هاني تم امورك بس
خش نبراس وعلى خشته طلعت ممرضه من غرفة اسيل
صبا محمد على طول وقف عندها
الممرضه>> المريضه ناضت "و بارتباك قالت" تسأل عالبيبي حابين تقولولها انتو ولا نخلي دكتورتها تقوللها
محمد >> نبي نخش عليها
الممرضه >> تفضل معايا
قربت مرام منه ، ونبراس مسكلها يدها انه خليه بروحه
سبقاته الممرضه ومحمد قبل ما يخش >> خلوني معاها بروحي ماحدش يخش وماحدش يلحقني
الممرضه >> انا قدام الباب لو صارت اي حاجه حنخش على طول
لقراءة جميع فصول الرواية من هنا