روايه حافة المنتصف
الفصل الواحد والاربعون 41
بقلم ايه
مرام
كنت واقفه برا ونراجي في عياط اسيل وردة فعلها كيف ح تكون لما تسمع الخبر هضا من محمد، مش كيف ما نحن حاسيين كيف ما هيه حاسه هيه امه وهيه لي تعبت فيه وهيه لي قعد في حشو بطنها تسع شهور كاملات ! مش حتى شهر ولا اثنين تعبت فيه وحست بيه وبنبضه وبكل شي و بعدها التعب كله يمشي عالفاضي ، صح عندها عيال وصح قضاء اهون من قضاء بس شعور فقد الاام الولدها غير بكل
.
.
.
خش محمد على اسيل ، اللي كانت تعبانه جدا ووجها شاااااحب
محمد >> الحمدلله على سلامتك
اسيل >> الله يسلمك " رفعت روحها بشويه وهيه تحس بألم" نحس بروحي رقدت واجد
محمد حط المخده وراها ومسك يدها >> تحسي بألم
اسيل تنفست بصعوبه >> رجليا مش حاسه بيهن بكل ، و ليش مازال التغذيه معلوقه تقول اول مره نجيب كنه الشعور المره هذي غير
محمد ابتسم بحزن وسكت
اسيل بحتت فيه>> العيال كويسين ؟ مع ليلى صح
محمد >> العيال بخير و انتي ان شاء الله حتطلعي بخير
اسيل >> الحمدلله ، البيبي وين من اول ما نضت وانا نقول للممرضه تجيبه ليا ، طلع وليد صح زي ما قالت الدكتوره ولا بنت ؟ و يشبه من ما تقوليش يشبهلك بس عشان حنقعد جبت طقم من محمد
محمد ضغط على يدها وخذا نفس >> اسيل من يوم ما عرفتك وانتي اعقل واهدا مني صح ؟ انتي اللي تهدي فيا وانتي لي تقوليلي ما نديرش شي ب اعصاب ونفكر قبل اي شي
بحتت فيه وهيه مش فاهمه >> محمد شن فيه
محمد >> قضاء الله وقدره يا اسيل البيبي ما لنش نصيب فيه ، ربي خذا امانته وهوا في بطنك والحمدلله نجاك انتي هذي اهم حاجه
اسيل فكت يدها منه >> انت شن تحكي ؟ كيف يعني ما لنش نصيب فيه ؟ "حطت يدها على بطنها بوجع" انت شن قاعد تحكي انا اكيده مازال نتخيل صح ؟ مازلت تحت تأثير البنج تي انا جبت ، العمليه هذي عملية شنو معناها كيف انت تحكي هكي محمد كنك تقول علي ولدنا انه ربي خذاه
محمد مسكلها يديها عشان ما تأذيش روحها و هيه مازال عمليتها جديده ، ورغم قوة محمد وضعف اسيل الا انه سبحان الله على قد ما الخبر كان واعر عليها محمد ما قدرش عليها ولا قدر انه يمسكها
خشت الممرضه تجري ، ومحمد قعد يشوف في نزي*ف من بطن اسيل …. خشت الدكتوره ورا الممرضه وخشت ممرضه ثانيه و قعدت اطلع في محمد برا اللي كان مصدوم
على طول نبراس مسك محمد وقعد يوخر فيه والممرضه صكرت باب الغرفة
محمد >> نبراس حول بالله عليك نبي نخش
قرب صالحين ومسك محمد يدف فيه برا
نبراس >> شيبتو امي انتو الاثنين محمد اسيل حالتها صعبه هضا رد الفعل الطبيعي انها بتتعب ومش ح تستوعب بسرعة
صالحين >> تعال معايا برا خوذ نفس برا
محمد >> مش متحرك من هنا لعند نطمن عليها
مرام>> محمد اطلع خوذ نفس برا بس انا هنا و الباب خطوتين … عشان خاطر اسيل باعد شويه من هنا ما اديرش مشاكل انت عارفها ماتحبش هكي
محمد>> كلمه هيه مش متحرك، ومش داير شي ، هاه قعمزت بعيد
ومشى عند الكراسي عالجنب وقعمز و هوا ينفخ
مرام >> لاحول ولاقوة إلا بالله العلي العظيم
بحت نبراس فيها ولفها الحضنه >> مرام نطمنو على اسيل وتروحي اليوم انتي
مرام >> ومن ح يقعد معاهم هضوما الاثنين شايف محمد انت كيف ماعندش اعصاب
نبراس >> خالد جاي و بدر وسهم يكملو معرض ويجو وانا نحطك وندوش ونرد
مرام>> ماتسيبنيش بروحي
نبراس >> مرام كلمه هيه قعدتك فالمستشفى تعب عليكي ، و انا عارفك ماتحبيهش
مرام >> باهي نطمنو بس عليها ويهدا محمد و نمشو
نبراس>> تمام
//
//
في الليل من نفس اليوم كان معتز في سيارته منزل الكرسي وحاط يده على وجه مغمض عيونه
بحت يمينه لما سمع صوت طقطقه عالقزاز ، كان بدر
نزل القزاز >>اوي
بدر >> انت اللي اوي كنك راقد هنا
رفع الكرسي واتكى >> اهو كساد
بدر >> متبيش تخش للحوش؟
هز براسه وطلع دخانه
بدر >> تخربو امها وتقعدو على تلتها كلكم شكله وراثه عندكم
معتز>> داير روحك طالع منها ام الخراب انت
ضحك بدر>> انزل انزل خلينا نلعبو طرح ڤيڤا في داري
معتز >> تي وين القدر
بدر >> انزل بس
رفع دخانه >> نكمل ونلحقك
سبقه بدر خش للحوش وهوا يدندن وانتظريني وعدي نجوم الليل
جميلة >> شيبتها لي تعد فالنجوم
بدر>> تراجي في بدر حتى هيه مش اي حد
ضحكت >> بو لسان بنركب انا تبي حاجه تاكلها؟
بدر >> لا تريحي نبي شاهي بنكسد انا ومعتز ، وشويه وبنمشي انا وسهم للمستشفى نبراس بيروح بمراته
وبنمشي انا غادي
جميلة ابتسمت>> سيسي فالمطبخ شوفها ، وبعد تمشي غادي طمني على مجد بالله عليك
ضحك بدر>> مش ساهله يا جموله
ضحكت جميله وركبت وهي تقول >> ردبالك سلم وليدي وراك تنسى تكلمني
شير على عيونه ومشى شور المطبخ
بدر >> اربعه وعشرين ساعه على تلفونك شن عندك فيه بس
حطت يدها على قلبها >> ديما نقولك دير صوت قبل ماتخش يا بارد فجعتني
بدر >> قلت بلكي نحق حاجه هكي ولا هكي
سديم >> غض بصرك و اسكت وانت مش مفوت شي
بدر اتكى عالمرمره>> نبو شاهي
بحتت يمين ويسار وحطت يدها عالمرمره واتكت بحنكها عليها>> حد قالك اني نشتغل عندك براتب ولا شنو برمة برمتين نسكافيه وشاهي
نزل يده وميّل لعندها>> وديريه حلو شوي زي حلاوتك
حولت يدها من المرمره وفردت طولها >> قليل ادب فعلا
بدر ضحك >> تعرفي اديريه
سديم >> الصراحه لا ، بس نجرب فيكم ليش لا " ومسكت البراد عباته اميه"
بدر >> فيران عيني عينك
ضحكت وبحتت فيه >> خطرها نبراس من العشيه معش كلمنا ، ومرام تلفونها مقفل
بدر >> اهو توا بنمشي غير بنساير معتز شويه ، قالبه عليه اليوم دراما بكل
سديم >> اها كلمتني خلود قالت لي مشى غادي يوصل في فرج و صارت بينهم دوا
بدر >> انقنه معتز خرب حوشه بيده
سديم >> تو انا نقولك حاجه؟ مع اني صالحه شفتها مره وحده لما دروحها جت تدحنس هنا بتعرف علينا ، بس تبي الحق هيه ومعتز لايقين على بعضهم عليش طلقها
ضحك بدر >> لما سألته ، قالي انه الحق مادارتش حاجه كبيره بس كانت متجوزته مصلحة بتهرب من عيشة هلها وبتعيش الحياه لي راسمتها
سديم >> ايوه ، ومعتز كان يحساب روحه لقى حب حياته و انها الوليه لي شايف انها بتملي النقص لي هوا حاس بيه مع انها خلود ما كانتش منقصه شي
بدر >> خلاص ، قالي كثرت عليا طلبات وكثرت نقيق و كثرت كل شي فخلاص حطيتها في حوش خالتها على اساس حرجانه شوي ثاني يوم كلماته قالت له نبي حقوقي كاملات واعتبرني ما خشيتش حياتك همها كلها في المؤخر
سديم هزت براسها وطفت عالغاز >> لا حول ولا قوة الا بالله مغير لبز حياته والله وخلاص لا جا من صالحه لا جا من خلود و عمي فرج لعند صبح اليوم ما يحكيش معاه وعميمه نجوى واجعتها طلعت خلود من العيله
بدر >> ماتعرفيش بلكي تردله
سديم >> ما انضنيش راه لانها تحبه ف صعب تسامحه
بدر >> وانت يا بطوط شن يفهم فيك فالحب ؟
سديم >> بدر الدين خوذ شاهيك وعدي ساير ولد عمك و خطاني
بدر ضحك >> بايته هنا
سديم>> اها ، وكلمني بعد تمشي المجد عليها وعالبيبي ان شاء الله ياربي يقولو بكرا يطلعو
خذا بدر السفره >> ان شاء الله يارب ، خليني نعدي للمهموم
ضحكت>> تمام
طلع بدر ومشى شور داره لقى معتز دوبه خاشه ، شيرله بالسفره يجي للدار وخش ومعتز وراه
//
//
روحت مرام للحوش هيه ونبراس بعد ما جا خالد ومؤمن و بدر الدين ، وبعد ما اطمنو على اسيل
اللي عطوها مهديء ورقدت بعد الخبر يلي قاله لها محمد
طلعت مرام من الدوش وهيه لافه شعرها وجت بجنب نبراس الي كان على كنبة الصاله حاط الابتوب قدامه
مرام >> نحس في روحي ليا شهر فالمستشفى مش يومين ، سبحان الله قعدت المستشفيات تجيبلي في ضيقه و الوقت فيها محوتكككككك يمشي
نبراس صكر اللابتوب >> قتلك روحي انتي مصكره راسك
مرام >> اول حاجه كنت بنطمن على اسيل حرام حتى امها تعبت مسكينه وثاني شي عارفني ما نقعدش بدونك
ابتسم >> مسيب الشغل عندي كومه مجد تطلع بالسلامه وحنغطسس
مرام >> تلمح يعني
بحت فيها >> لا والله ضغط بكل وعندنا مهمه فالشرق بعد فتره
مرام>> والله ؟ كيف يعني تدريب زي لما مشيت طرابلس زمان ولا شنو
نبراس >> لالا مهمه يعني فيه شغل حقيقي ومج*رمين بنقبضو عليهم
مرام >> تحكي جد"وحولت المنشف من شعرها" كيف باهي وامتى
نبراس >> كيف هذي شوري انا 😂 امتى وكم حنقعد مازال مش معروف
مرام >> نبراس انا ما صدقت التميت انا وياك مع بعضنا و انت على طول بتمشي المهمه
نبراس >> يا بنتي مش اول مره نمشي والله اجراءات روتينيه وبعدين فيها ترقيه لنا ف ماتخافيش
مرام>> انا نوثق فكلامك وانت عارف مدام قتلي ماتخافيش ف مش حنخاف
نبراس شير على عيونه>> بنخش ندوش ونرقد شويه بيش انوض الصبح بدري انشوف الجماعه شن صار فيهم دابينه بدر وسهم مشو غادي
مرام >> نديرلك سندوتش تاكل
نبراس >> لا ، تعالي انشفلك شعرك قبل مانخش ندوش
مرام >> خليه تو يجف بروحه خش انت دوش بيش ترقد شويه
نبراس خذاها من يدها >> مافيش حاجه اسمها يجف بروحها تعالي بس
ضحكت وصبت وراه>> سيادة الرائد رايح مامعاكش تفاهم
نبراس>> ما انتي ماتسمعيش فالكلام
مرام>> بريئه سيادتك🥹
ضحك وعلق الاستشوار >> مرام اركزي عشان نركز
ضحكت وحطت يدها على فمها >> هاه حاضر
//
//
صباح يوم جديد وبعد ما مرن ايام على حالة مجد و اسيل
طلعت اسيل من المستشفى بعد ما استوعبت اللي صار ، و طلبت من محمد انها تبي تقعد في حوش هلها ماتبيش تروح لحوشها ويجيبلها العيال !
وفعلا هضا اللي صار، من اول ما طلعت للمستشفى مشت حوش هلها ومن هضك اليوم لعند اليوم وكل ما محمد يجيها ماتبش تروح الحوشها
.
.
.
اما مجد ف اليوم وبعد ما مر اكثر من اسبوع على قعدتها فالمستشفى وبعد المضاعفات الكبيره يلي صارن لها … كان اليوم موعد خروجها
بس للاسف انها ح تطلع بدون بنتها اللي اختارو يسموها "جنّه" لانها مش ح تقعد اقل من شهر فالحضانه ومر منهن تقريبا عشر ايام
ومجد كانت خايفه بكل وكل يوم اتنوض وهيه مفجوعه من انها تفقد بنتها ، والصالحين كان معاها وحواليها في كل لحظة و حتى الشغل كان ما يمشيش
//
//
في المركز
ركب نبراس من لوطا بعد ماكان عنده استجواب مع حد من العصابه لي ح يمشولهم قريب
خالد>> وصلت الحاجه؟
قعمز نبراس عالكرسي >> الي نعرفه انه الفرخ مش كذاب و ميت خوف ، خليته يتواصل مع حد فيهم عشان يقوللهم انه حي و مختفي بس عن الانظار
خالد>> صدقوه؟
نبراس >> عيب.. هو انا ندير خطه ما تصدقش ، خليت كل الدلائل تدل على انه نحن مامسكنش وانه حر طليق و قاعد بس مختفي عالانظار عشان خطتهم تمشي
خالد ضحك>> وحش
نبراس >> خلاص ، قالوله ح يقولوله على موعد العمليه و مكانها في اي منطقه فالشرق حتكون والوكر لي ح يقعدو فيه قريب
خالد >> لوز اللوز معناها
نبراس >> حنمشي للعميد منصور نقوله اللي صار
خالد>> والصالحين؟
نبراس >> باذن الله يومين هكي ويرد ح يكون معانا فالمهمه هذي
خالد>> تم ان شاء الله " ومسك تلفونه"
بحت فيه نبراس>> تتعبو معاهن بتعطيها الاخبار يا شريني را مراتي ونقوللها فكل حاجه
ضحك خالد >> على اساس ما قعدتش زينا
خبط عالباب بدقه خفيفه>> و اشر منكم انت والصالحين
خالد >> كنت نقولك فيها اتهزا علينا لعند قعدت كيفنا واشر يا فرحة بدر
نبراس ضحك>> قصدك يا شماتت بدر كل ما يحقني انا وياها يقولي يا مراهق
ضحك>> هبهب هيا عندي مكالمه
نبراس >> مكتبي يا افندي
خالد >> خرفي اقعد في امه
طلع خالد وحط التلفون على وذنه ونبراس مشى العميد منصور
//
//
في الليل في حوش هل اسيل ، دق محمد للباب فتحله مؤمن
محمد شيرله بعيونه>> مافيش جديد ؟
مؤمن>> نفس الحاله
مسح على وجه >> استغفر الله
خش محمد و لقى العيال يلعبو برا ، واسيل مقعمزه حذاهم قرب منها وقعمز حذاها
محمد >> اسيل
بحتت فيه>> محمد لكي اسبوع من يوم طلعت من المستشفى تقولي في نفس الكلام ، اسيل انتي قويه اسيل قولي الحمدلله عندنا عيال ، اسيل عيالك محتاجينك ومازالوا صغار … فهمت يا محمد فهمت ممكن تعطيني وقتي ؟ ممكن تخليني بروحي ! انت ماعشتش يلي انا عشته بس خلاص مثلت واجد اني قويه انا مش قويه ، تسع شهور تعب و مستشفيات ووحم و كبر في بطني وحسيت بيه وبعدها حتى شوف ما نشوفش ؟ ما نلمسش حتى ؟ ماحد ح يحس ب لي نمر انا بيه خليني يا محمد
بحت فيها محمد >> ما قتلكش ما تزعليش حتى انا باته وحاس والله ، صح مش نفس شعورك بس نحس ، اسيل ما قتلكش ماتزعليش بس ردي للحوش و ازعلي فيه وانا معاك العيال متعودين على حوشهم ومتعودين على ليلى و يدورو فيها كل يوم
اسيل >> محمد بنخش جوا صقعت وعمليتي توجع فيا ، عطيني وقتي و بعدها تو نرد مافيش حد يبي يعيش في زعل ديما
وخشت اسيل جوا ومحمد مش عارف شن يدير معاها ، يحق فيها تذوب قدامه ومش قادر يديرلها شي
" ثُمّ إنَّ قلبك يستحقُ أن تجوبَ الأرضَ بحثًا عن صلاحهِ
//
//
فنفس الليله ، كالعاده روحت مجد من عند بنتها بس على حوش هلها مش على حوشها عشان كانت مازال تعبانه وصحتها مش كيف قبل وما تقدرش تركب وتنزل من دروج حوشها
صالحين >> ناقصتك حاجه؟
مجد >> لالا ، ماتنسش تجيني بكرا فالصبح بيش نمشو للمستشفى
صالحين >> مجد ما تهلكيش روحك انا حاطك هنا عشان نطمّن عليكي و يقعدن جنبك البنات ، مش عشان تقعدي تفكري كل شويه صدقيني الدكتوره قالت لك حاليا ردي بالك من صحتك بس
مجد >> والبنت ؟ انا الي درته هضا كله عشانها ! صالحين انت فاهم انه فيه حمل اول و ٧٠٪ مش حيكون فيه حمل ثاني ؟ وعمليتي لازم نديرها قريب عشان النزيف يلي في عمليتي هذي كان خطير كل حاجه تخلي فيا نزيد نتمسك بيها اكثر
صالحين حضنها >> انا عشان هكي نبيك تهتمي بصحتك ، تحسابيني مش خايف على بنتي ؟ خايف عليها و بنموت خوف بس حتى انتي ما تشغلينيش عليكي ! قلبي توا قعد مقسم اثنين بينك وبينها
مجد ابتسمت >> ان شاء الله نفرحو بيها "وخرت من حضنه " عندك شغل بكرا
صالحين >> عندي وحايس في مهمه جديده لازم بكرا نمشي خالد ونبراس لهم فتره حاصلين فيها
مجد >> مهمة شنو؟
صالحين >> شغل شغل ما تشغليش بالك
مجد مسكت فيده>> باهي عادي تبات هنا اليوم؟
بحت فيها >> هنا وين ؟
مجد >> هنا يعني فحوش هلي ما فيك ما روح تو تطلع بكرا فالصبح مع نبراس للشغل
شير بعيونه>> قصدك بتخليني نرقد فالمربوعه ؟
مجد >> ها امالا
كرها صالحين من يدها >> مش عندك دار فحوش هلك ولا خذوها
مجد >> صالحين عيب
صالحين >> فضيلنا الطريق خليني نخش نرقد ميت تعب "وبحت فيها" عيب هذي تقوليها لما نقعد صاحبك انا حاليا راجلك ان شاءالله، تو بكرا نوريك العقد مصوره فالتلفون
ضحكت مجد ومشت قدامه بشويه وهيه ماسكه مكان العمليه>> تعال تعال خليني ناخذلك حاجه تلبسها من بدر
صالحين >> ح يذلني عليها العمر كله
مجد >> طبعا
صالحين>> تحسي بحاجه
مجد>> شويه مش واجد مكان العمليه بس
صالحين >> لبسك خفيف اصلا خشي قدامي ندورلك حاجه دافيه
مجد >> هي تو نجيك
//
//
صباح ثاني يوم ، اصبحو كلهم على صوت هرجه فالمربوعه .. طلعت مجد من دارها وهيه كانت تلبس بتمشي لبنتها فالمستشفى … وبحتت في سديم لي كانت طالعه من المطبخ اديرلهم في فطور بما انها اليوم معطله
مجد >> شن فيه؟
سديم هزت بكتوفها>> مانعرفش شفت لقمان وبدر خاشين للمربوعه مع عمي الهادي وبعدها علن اصواتهم … بيفضحو بينا قدام سيادة المقدم
مجد هزت براسها >> سامطه 😂 خليني نلحق عليه طلع يدخن برا يحطني فالمستشفى ويعدي الشغله
سديم >> افطري باهي
مجد >> مانبيش وماتقوليش الامي طلعت تو تهزب وتبدا نافس وصحتك
سديم >> مجد بالله عليك كباية عصير حتى
مجد>> حاضر مش حيخليمي الصالحين حيوكلني بالغصب
بحتت فيها سديم>> اوعدنااااا يارب
ضحكت مجد
ومشت سديم بالسفره للدار الكبيره
.
.
فالمربوعه عند الهادي لي كان منجمط
الهادي>> عاود كذا شن قلت
بدر >> يا باتي مغير افهم
الهادي>> صكر فمك انت نحكي مع الاخر مش معاك
مسك لقمان ضحكته وبدر طبس راسه عشان ما يضحكش
الهادي>> احكي عاودلي شن قلت
لقمان >> نبيك تخطبلي هديل لانه امها رافضه
الهادي>> صدقت و طبعا تبي ترفض تلعبو علينا انتو ولا شنو
لقمان>> عمي والله ما نلعب اقسم بالله نحكي من جدي ونبي نخطبها وعمتى هناء رافضه
بحت فيه >> ايوا عمتي هناء صار
دار بدر صوت ضحكه التفت عليه الهادي
>> وباهي عاد وانت شن تبي قتلي
بدر >> اخطبلي سديم بس انا مش خطبه الحق فاتحه
ربع الهادي يديه>> وبلكي تبو العرس في يوم واحد شن رايكم ؟؟
بحتو هما الاثنين فبعضهم
بدر>> لا نبي عرسي بروحي مش ناقصه دعاك
الهادي>> على بوك وبو الي ضناك وقناك اطلع برا انت وياه اطلع من قدامي
صبا بدر يجري بعد لقا الهادي يدور في حاجه يطلقها فيهم ولقمان كان مش فاهم شي يعني بيخطبلهم ولا شن في بالزبط
وهما طالعين مهزبين قابلهم نبراس لي كان خاش من الباب بلبس الشغل
نبراس>> تي كنكم وكنك انت مطلع حس باتك عالصبح
بدر >> جا عاد رضي والديه ، باتمان مُنقذ العالم
بحت فيه نبراس>> مش وقت ثقالة دمك
لقمان >> فوته بس النبي بحت فيا هنا مش حتجيبها الا انت
نبراس >> كنكم
لقمان>> احكيلنا مع باتك بنجوزو ياراجل بنجوزو
ضحك نبراس>> وباتي كنه
بدر >> ماه النقناق من بنجوزو
على طلعت سديم من الدار ماشيه شور المطبخ بحتت فيهم واستغربت تصبايتهم قدام الباب شيرتلهم و مشت
بحت فيه نبراس>> وباه كلنا عارفينك تبي سيسي
بدر >> باتك مش عارف 😒 لزني برا بعد قتله بنقرا فاتحه
نبراس>> وانت عاد بعد ما لزاتك عمتي هناء توا جاي اتمسكن الباتي بيش يقنعها بهديل
لقمان هز براسه وبحت في بدر>> ولد من الذكي هضا
ضحك بدر >> دمه خفيف فطنتله
بحت فيهم نبراس>> قبل بنساعدكم بس علي برادة دمكم هذي اقعدو في امها
مسكه بدر من كتفه ولقمان من يده الثانيه
بدر >> وراس امك تدويلهم يسمعو في كلامك
لقمان >> سيادة الرائد افزعلنا مره
ضحك نبراس >> خلاص ساهل
ضبحله صالحين من برا >> هيا ياراجل خالد سكنلي بروحه قاعد ومازال بنحط مجد فالمستشفى
نبراس>> هيا جايك ، خلاص بعد نروح نشوف باتي بنوصل مرام الهلها تو يفصل الصالحين
ضربله لقمان التحيه , ضحك وطلع بسرعه للصالحين
//
//
يومها كانت مرام متغديه عند هلها ، حطها نبراس ومشى للمركز
كانت مقعمزه على مرمرة المطبخ تاكل في الخيار لي مقرضته امها للسلاطه وامها مصبيه تحرك فالطنجره حذاها وتهدرزلها …. وليلى عالقه المكنسه الكهربائيه عالحوش وصوتها عالي
مرام>> وباهي ؟ يعني ماتبيش تروح ولا شنو ؟ انا نكلم فيها نسأل عليها وخلاص وماتردش عليا اغلب الوقت
حليمه >> والله يا امي ما نعرف محمد مش عارف شن يدير ، فقدت الضنا واعره سوا جا ولا ماجا نفس ما صار مع اسيل
مرام >> نحس فيها كيف اللي صارلها اكتئاب
حليمه >> توا هيه نافس و عادي يجيها اكتئاب بعد الولاده حتى لو كان البيبي مات بس حاليا تعتبر نفاس واكيده مسكينه تحس بمشاعر واجده
مرام >> ربي يكون في عونها والله مسكينه قلت النبراس نبي نمشيلها بس معش فضى بيش يزرق بيا عندها
طفت ليلى المكنسه وجت فم باب المطبخ >> ظهري انقسم على اساس عطله اليوم بنتريح ما فهمتش الحوش من يحوس فيه ومافيش الا نحن الثلاثه
ضحكت مرام وكلت من الخياره
حليمه حولت التبسي من جنبها >> خلاص كملتيه ، وانتي تضمي و تذلينا معش تضمي مش واحله فيه حوشي
ليلى >> نستاهلها 😒
نزلت مرام من المرمره ونفضت يديها >> نساعدك في حاجه
اتكت اسيل على باب المطبخ >> ما لميتي حوست بيتك يابال اديري عصبان
بحتت في امها >> فكك منها ، قوليلي توا كيف حال عربك
هزت ليلى براسها >> بنعدي نكلم اسيل بلكي ترد عليا رايفة عالعيال "وطلعت"
مرام >> كويسين
حليمه >> وعمتك ؟
مرام>> ماما انتي عارفه يعني الطبيعي متاع العمات اكيده مش ح تكون تعشقني بس مش اذيتني
حليمه >> وجدتهم؟
مرام >> انا ما نخشش واجد حذاهم نسلم و نقعمز مع البنات مع بعضنا والحق محد جاي شوري
حليمه>> باهي و مافيش حاجه ؟ ما درتيش تحليل
مرام >> ماماااا عاد شن قلنا نحن
حليمه >> كيف عاد ما نسألش ، يا امي عدي للدكتور حتى اطمني بس مش ضروري اديري اي حاجه
مرام >> حاضر باذن الله تو نعدي
حليمه >> مشيني على قصاد عقلي تحسابيني صغيره " وبرمت تحرك فالطنجره"
طلعت مرام بدون ما ترد ومشت حذا ليلى
//
//
في المركز ، خشو كلهم لمكتب نبراس
صالحين >> تي هضا كنه لمنا هنا وطول
خالد>> مش عارف
خش عميد منصور عليهم
صبو الاثنين قدامه و ضربوله التحيه ، خش للمكتب و قعمز في كرسي نبراس
منصور>> نبراس لوطا ؟
خالد >> اها لمنا هنا و قال شويه وجاي
منصور >> قعمزو قعمزو
صالحين >> ما بانش شي من العمليه ؟
منصور >> هضا لي جاي بنسأل عليه بعد الاستجواب الاخير مفروض اتحدد المده عشان الموضوع كبير ويبي تخطيط مع مركز شرطة الشرق
خالد >> ان شاء الله يسعفنا الوقت
منصور>> العمليه هذي لو نجحت حنمسكو فيها اكبر واخطر روس
ركب نبراس ، مد راسه من الباب و ضرب التحيه بعد شاف العميد منصور
صبا منصور
نبراس>> سالتك بالله تقعمز بس والله مانك متحرك
رد العميد قعمز و صكر نبراس الباب وقعمز بجنب خالد والصالحين
نبراس >> المهمه تحددت
صالحين>> تكذب ؟
خالد >> احلف
فنص فيهم على اسلوبهم قدام عميد منصور اللي كان حاط يديه عالمكتب و يراجي فنبراس يكمل كلامه
نبراس >> بعد25 يوم بالزبط...