رواية ظلك أنت الفصل الثاني 2 بقلم منه ممدوح البنا
"مملكة مكين"
كان الملك اركان بيترأس طاولة الغداء في القصر الملكي بصحبة بناته الاتنين وكمان بعض الأفراد من عائلة ألدوين اللي ساكنين في قصور تانية بعيدة عن القصر الملكي.
ورغم إن القاعدة العائلية كانت مبهجة ومليانة أحاديث وحوارات دافية بينهم إلا إن الملك اركان كان شارد وفاقد للشهية، بيلعب بالشوكة بتاعته في طبقه من غير ما يتحاور معاهم أو يشارك في الكلام.
لاحظت الملكة ميراي شروده ده من وسط كلامها مع الموجودين، فرفعت إيديها وبسطتها على كفه التاني.
رفع عيونه ليها فبادلته بنظرات تشجيعية، هي حاسة إنه فيه حاجة متغيرة ولكن مش عارفة إيه هي.
لحد ما انتبهوا على صوت سيبال اللي وجهت كلامها لوالدها وهي بتقول بشموخ طفولي_جلالة الملك بابا
ابتسم تلقائيًا على ندائها المميز ليه، فانحنى براسه وهو بيسايرها_اتفضلي يا سمو الأميرة بنتي.
ابتسمت الملكة ميراي على حديثهم، فاتكلمت سيبال_كنت عاوزة استأذن سموك،
أنا ولقى عايزين نروح نصطاد أرانب من الضفة
باعتراض اتكلم الملك اركان_بس يا سيبال، أنتِ عارفة كويس إن الوضع مش أمان الفترة دي خارج حدود المملكة
عبست ملامحها وهي بتقول بتوسل_يا بابا عشان خاطري
أنتَ مربي مبارزة قوية هنا، أنا الأميرة سيبال مش أي حد!
بنفس اسلوبها قال_وعشان أنتِ الأميرة سيبال مش هقدر اعرض حياتك للخطر.
حاولت تلين دماغه، وهي بتسبل بعيونها اللي تشبه عيون الغزال عشان تأثر عليه، وقالت_عشان خاطري يا بابا
طيب خلاص هخلي جاسم يجهز حراس ييجوا معانا عشان يحمونا
وحياتي عندك!
ده أول طلب من لقى كده شكلي هيبقى وحش قدامها!
نقل الملك اركان نظره على لُقى البنت الصغيرة اللي بنفس عمر سيبال واللي كانت بتتوسله بنظراتها هي كمان، وبعدين بص لسيبال اللي بطفولية ونبرة رقيقة آسرة قالت_وحيـاتــي!
مالت الملكة ميراي ناحيته وهي بتقول بهزار_أنا لو مكانك مرفضش بعد النظرة دي
ملكش حق!
في النهاية اتنهد الملك بقلة حيلة وقال_تمام روحوا
وهنا قفزت سيبال وهي بتصقف بحماس وجريت على مكان والدها وهي بتقبله بعنف، ضحك الملك اركان وقال_بس على شرط
جاسم والحراس هيبقوا معاكوا خطوة بخطوة
وهتروحوا على آخر الاسبوع نكون اتأكدنا إن المكان أمان خارج الحدود
انحنت سيبال وهي ماسكة فستانها وبتقول بدلال_اللي تؤمر بيه يا جلالة الملك
ضحكت الملكة ميراي على أفعالها ورددت_شوف البنت!
تقدر تاكل بعقل أعظم ملك حلاوة!
وبعد مرور وقت
في جناح الملك أركان
كان أنهى ارتداؤه لملابس نومه، وكانت الملكة ميراي قاعدة على فراشهم وهي بتراقبه بعيونها
حالته الجديدة دي غريبة، مش متعودة عليها
شافته وهو بيتحرك وبيخرج لشرفة جناحهم
فبدون تردد قامت وقفت واتحركت راحت وراه، شافته واقف ساند على السور بإيديه الاتنين وهو بيراقب حدود القصر والمملكة
حس بيها وهي بتلف إيديها حوالين خصره في حين سندت خدها على ضهره وهي بتقول_حالك مش عاجبني يا مولاي
ايه اللي شاغل بالك؟
حست بيه بيتنهد بعمق وكإن هموم الدنيا فوق راسه
بعدت هي في الوقت ده بعد ما أدركت إن الوضع أكبر من ما هي متخيلة، ووقفت جنبه وهي بتقول بقلق_اركان!
فقال بصوت ثقيل بدون ما يتلفت ناحيتها_مش عارف يا ميراي، الأوضاع في المملكة مضطربة من وقت اجتماع الملوك الاربعة بشكل سري.
فيه حاجات غريبة بتحصل في المملكة، أنا متأكد إن اجتماعهم بدوني ده وراه غدر، اقتصاد المملكة بينهار
الصناعة وقفت
الجرايم كترت في قلب المملكة بدون معرفة الفاعل
فيه شيء غريب بيحصل ومش قادر أسيطر عليه، أنا خايف لتكون مؤامرة علينا!
ظهر القلق على ملامح الملكة ميراي، ولكنها محت ده بابتسامة خفيفة حاولت ترسمها، وملست على دراع الملك اركان وهي بتقول_هون على نفسك يا مولاي
متقلقش، المكتوب هو اللي هيتحقق
ولو فيه مؤامرة بتتعمل ضدنا، فأنا متأكدة إن بحكمتك وبذكائك هتقدر تكشف كل الألاعيب
نهت كلامها وقربت منه وضمته وهي ساند راسها على صدره، ربت هو على ضهرها وهو سرحان في الفراغ قدامه، أما الملكة ميراي فاتمحت الابتسامة اللي على وشها وحل مكانها الخوف والقلق
كلام الملك اركان صحيح
حتى هي بقالها فترة بتشوف رؤى..
رؤى كلها دمار ودماء ونيران بتلتهم كل اللي حواليها
اتنهدت بقلق وهمست_فينك يا زاهيرا
ليه مختفية؟!...
****
وعلى صعيد تاني بعد أيام.
داخل حدود المملكة، بيدخل عدد من الرجال اللي شكلهم بيكون غير مريح، وغريب عن شعب المملكة، ولكنهم قدروا يندمجوا بملابسهم وسط الناس من غير ما حد ياخد باله منهم
رغم أنهم كانوا متفرقين عن بعض ولكن كل واحد فيهم عارف مكان وقوف التاني، وقفوا يراقبوا بعض من على بُعد، مغطيين ملامحهم ما عدا عيونهم بوشاح مزغرف
وفي النهاية بدأ كل واحد فيهم يدي الاشارة للتاني، وبالفعل ابتدوا يتحركوا بانسيابية وسط المملكة وداخل الاسواق
بيطلعوا حاجات مجهولة من جيوبهم وبيدسوها في قلب البضائع والبيوت والمحلات
لحد ما وصلوا للباب الجنوبي للقصر الملكي، قابلهم من هناك جندي من جنود القصر، اللي صافحهم وسمحلهم انهم يدخلوا لجوا، ابتدوا يحطوا افخاخ بانتظام في ابراج الحراسة، مخازن الاسلحة، جميع بوابات القصر
وبعد ما انتهوا من مهمتهم رجعوا لأماكنهم كإنهم معملوش أي حاجة..
****
بمنتهى النشاط كانت بتجهز سيبال أدوات الصيد اللي هتحتاجها، نظرًا لإن النهاردة آخر يوم لبقاء أقاربهم في القصر الملكي، لازم تستغله وتعلم لُقى الصيد عشان تثبتلها إنها أميرة قوية.
اتحرك الحراس وحطوا كل الأدوات في العربة اللي هتاخدهم لضفة النهر، أما سيبال فكانت بتودع والدتها اللي كان ظاهر عليها القلق، ملامحها متجهمة فاقدة للحياة وكإنها شافت شئ قوي مخليها في الحالة دي
خاصة وإن الرؤى اللي بتجيلها مقلتش، بل كانت بتزيد كل مدى وبتزيد دموية كمان
صعدت هي ولُقى وسط اعتراض شقيقتها سيرين وبكائها عشان تروح معاهم، ولكن عشانها صغيرة ومش بقوة سيبال مكانوش يقدروا يضحوا ويخلوها تروح معاهم، لإنهم مدركين إن سيبال تقدر تدافع عن نفسها، لكن سيرين لسة مهارتها مش بالقدر المطلوب
بعدت سيبال عن حضن والدتها اللي قالت_خلي بالك من نفسك يا سيبال
أنا عارفة إنك قوية، اوعي تتخلي عن سيفك أبدًا
أنتِ مستقبل مملكة مكين
أنتِ ملكة المملكة القوية
اوعي تنسي ده مهما حصل!
عقدت سيبال جيبنها بتعجب، هي حاسة إن نبرة صوت امها غريبة عن العادة
كإنها بتودعها
ولكنها نفت الاحساس اللي بيساورها، وابتسمت وهي بتقول_متقلقيش يا سمو الملكة
الأميرة سيبال هي أقوى أميرة في الممالك الخمسة!
ابتسمت الملكة ميراي وقالت_بلا شك!
اتجهت ناحية والدها وضمته، فقالها_عايز عدد كبير من الأرانب
النهاردة العشاء هيكون شوربة أرانب من اللي اصطادتيهم!
فردت وهي بتلاعب حواجبها بمراوغة_على كده هنعمل شوربة للمملكة كلها
لإني هصطاد عدد أرانب لا نهائي، خليك قد كلامك بقى يا جلالة الملك!
قرص أنفها وهو بيقول بمزاح_مغرورة!
قاطع كلامهم جاسم اللي اتقدم منهم وهو بيحني وبيقول_سمو الأميرة
إحنا جاهزين للتحرك
بحماس ودعت سيبال أسرتها واتحركت هي ولُقى للعربة اللي هتاخدهم للضفة، وسط مراقبة الملك والملكة ليها، وفجأة حست الملكة ميراي بغصة قوية في صدرها، بسطت إيديها مكان الألم وهي بتراقب العربة اللي اتحركت مع الجنود..
****
داخل المملكة
كان السوق مكتظ بالناس، الأوضاع هادية وشعب المملكة كله بيتحرك بسعادة في لحظات اتبددت مع صوت انفجار قوي تبعه عدد كبير من الانفجارات المدوية اللي هزت كل أرجاء المملكة
ارتفعت النيران في كل مكان في السوق والبيوت والشوارع، الناس بتجري بهلع، منهم اللي بيجري والنيران مشتعلة فيه، واللي بيصرخ بالمساعدة لإن عائلته أصبحت أسيرة بين النيران
هرع الجنود كلهم عشان يلحقوا اللي بيحصل، وكمان بمساعدة الشعب عشان الكارثة اللي حدثت في المملكة
الخسارة مضاعفة
والوضع غير طبيعي
وقف الملك اركان بصحبة الملكة ميراي وأقاربهم والوزير جبران في ساحة القصر الملكي وهما بيحاولوا يتابعوا الأخبار اول بأول
في حين كان ظاهر القلق والغضب الشديد على وش الملك أركان اللي هتف وهو ضامم قبضته بغضب رهيب_كنت عارف!
كنت عارف إن فيه مؤامرة هتحصل
عملها الملك مظفر!
بس على جثتي أنوله اللي في باله، مملكة مكين هتفضل صامدة مهما حاول!
وفي لحظات دوى صوت انفجار عنيف من مخازن الأسلحة وأبراج المراقبة اللي في القصر انتفض على أثرها الملك اركان وهو بيحمي زوجته وبنته بجسده
ملى الهلع المكان، وجري الملك أركان بزوجته وبنته وهو بيضمهم ليه وبيتحرك بيهم لداخل القصر
وفي لحظات كانت انفجرت البوابة الرئيسية للقصر الملكي كمان، ووقتها هو وأقاربه كلهم كانوا دخلوا القصر واوصدوا الأبواب كويس
كانت الملكة ميراي بتبكي بعنف وهي بتحاول تهدي بنتها سيرين اللي كانت بتصرخ بهلع وهي بتنتفض، أما الملك اركان كان بيزمجر بصدمة_دي خيانة!
دي خيانة جماعية
دي خـيانة!
صوته اتملى بالحسرة وهو بيردد نفس الجملة، وبعد انفجار البوابة الرئيسية تليها كل البوابات الفرعية للقصر الملكي، دخل عدد كبير جدًا وغير مسبوق من الجنود المجهولين
أجسادهم ضخمة بشكل ملحوظ ومرعب، مرتديين كلهم دروع فولاذية سوداء، وعلى صدر الدروع وشم مجهول على شكل سيف ملفوف عليه جمجمة حيوان غريب بأنياب مرعبة ضخمة جدًا
شافهم الملك اركان من نافذة القصر، اتوسعت عيونه بدهشة وهتف_الفرسان السود!
عند الجملة دي اتنفضت الملكة ميراي وهي بتقول بعدم استيعاب_إيه؟!
فرسان سود إيه!
اتجمد الملك اركان وقال بملامح شاحبة_مظفر استعان بالفرسان السود!
الفرسان السود
جملة بتتردد على لسان كل اللي في القصر
وكإن اسمهم بيرتبط بالموت
اسم كافي يثير الرهبة في النفوس
يسبب الهلع من أصغر جندي لأكبرهم، أما الملكة ميراي فابتدت الرؤى بتاعتها توضح، نفس المشاهد الدموية والانفجارات، نفس الظلال الضخمة اللي شافتهم، فرددت بذهول_الرؤى!
سقط الملك اركان على الأرض بانهيار بعد ما استوعب إن المملكة هتنهار بلا شك، صوت السيوف والانفجارات ملت القصر، الموت أمر محتوم لا محالة مسألة وقت بس
رغم صدمة الملكة ميراي إلا إنها جريت على زوجها وهي بتسنده وبتقول_اركان
قوم، حتى لو هنموت لازم ندافع عن مملكتنا
مش هنسيب لجماعة مرتزقة حقيرة زي دي تثير الرهبة جوانا!
رفع عيونه ليها اللي كانت مليانة يأس وقال_قُضي الأمر يا ميراي
اتحامل على نفسه ووقف على رجله وقال_خدي سيرين والباقي وانزلوا السرداب اللي تحت المملكة
باعتراض قالت_مولاي...
ولكنه بحزم وحدة أكبر قال_خدي سيرين يلا
احمي نسلنا يا ميراي، هما جايين بقصد انهاء نسل عائلة ألدوين، متحققيش ليهم مبتغاهم
خرجت جملته الأخيرة بضعف وألم، عيونه لمعت بالدموع، مستحملتش ميراي الوضع واترمت في حضنه وهي بتضمه بقوة، برعب، بوداع، في حين كان بيتشبث بعناقها وكإنه ملاذه
بعدها عنه بصعوبة ونزل على ركبته قدام سيرين اللي كانت متشبثة بأرجل والدتها بهلع
احتوى وشها بين إيديه وهو بيمسح دموعها بحنان وبيقول_أميرتي الصغيرة
اوعي تبكي
أنت قوية
أنتِ أميرة مملكة مكين
لازم الأميرة تكون قوية!
فاهمة؟!
هزت راسها من بين دموعها، فقام وقف على رجله ووجه كلامه للملكة ميراي بأمر_يلا
رغم اعتراضها ولكن نظرته الحازمة كانت كفاية، اتحركت بالفعل وسط دموعها وانهيارها، وخدت كل العاملات والأفراد اللي في القصر الملكي واتحركت ناحية السرداب اللي تحت
وفي اللحظة دي وقف الملك اركان بصحبة الوزير جبران وعدد من الجنود، اتبادل الملك اركان النظرات هو والوزير جبران وقال_أنا ممتن لإن كان ليا صديق مخلص زيك
كنت اتمنى تكون نهايتنا احسن من كده، ولكن ده قدرنا، إننا نموت بشرفنا واحنا بندافع عن وطننا
ابتسم الوزير جبران بألم، وربت على صدره بقبضته وهو بيقول_نهايتنا تليق بقوتنا يا مولاي
كان شرف لي إني أخدم ملك عظيم زيك
وفي اللحظة دي انفجرت بوابة القصر الداخلية مسببه دمار كبير ارتطم على أثره الملك اركان والوزير جبران بالأرض بعد ما طاروا من شدته، وفلحظات اقتحم الفرسان السود القصر، وفي الوقت ده جهز الملك اركان سيفه هو وجنوده بعد ما اتحاملوا على نفسهم ووقفوا
وفي نفس واحد ارتفع هتافهم بـ_تعيش مملكة مكين العظمي
تعيش مملكة مكين العظمى
واتلاطمت السيوف بقوة شديدة
حارب فيها الملك اركان ببسالة
بسالة تليق بملك عظيم وشجاع زيه
ولكن في النهاية الكترة تغلب الشجاعة
واقتحم سيف أحد الفرسان صدره بعنف
وتليه رجاله اللي استشهدوا معاه
الفرسان السود
قتلة بلا رحمة
كلمات معينة بتوصفهم
دموية
عنف
جحود
مجردين من مشاعرهم
واقوياء بشكل ملحوظ
عددهم يفوق عدد جنود الخمس ممالك على بعض
عبارة عن جيش مرتزقة بيشتغلوا للي يدفع
ولكن الدفع ليهم بيكون مكلف شوية فمش أي حد يقدر يتواصل معاهم
ولكن مظفر قدر، ردم مبادئه وضميره واتفق معاهم
اتحرك بقيت الجنود بيدمروا كل حاجة موجودة في القصر، بيدوروا في كل الغرف اللي موجودة قاصدين إنهاء حياة كل الموجودين
أما في السرداب اللي تحت القصر اتحركت الملكة ميراي بصحبة كل النساء اللي في القصر
سرداب طويل مظلم غير معلوم نهايته
ولكن هو طريقهم الوحيد للنجاة
ولكن في أثناء سيرهم حسوا بحركة وضجة قوية في النفق، تليها اصوات عنيفة
في الوقت ده دفعت الملكة ميراي بنتها سيرين وهي بتصرخ_اجري يا سيرين
اجري واوعي تقفي
برفض ودموع قالت سيرين_ماما...
دفعتها الملكة ميراي وهي بتصرخ_اجري
اجري وانا وراكي
اوعي تقفي يا سيرين
اوعي..
وبالفعل ركضت سيرين بسرعة ودموعها على خدها ودميتها في حضنها
أما نساء القصر فرفعوا سيوفهم في وجه الجنود اللي كانوا وصلوا في الوقت ده ليهم
وجهت الملكة ميراي سيفها ناحيتهم وهي بتقول بحقد من بين أسنانها_مجموعة حشرات عديمة شرف
فكركوا إني هخاف منكم!
وفي لحظات دارت معركة قوية بينهم ولكن في النهاية اتصابت كل النساء بما فيهم الملكة ميراي اللي سقطت أرضًا وهي بتلفظ انفاسها الأخيرة
الدماء بتنزل من فمها وعيونها المليانة دموع مثبتة على الفراغ، رفعت إيديها المرتجفة بضعف في الهوا وهي بتهمس بضعف_سيرين...
سـيبال....
****
انتهت رحلة الصيد اللي كانت مرضية ليها بشكل كبير
كانت في طريق العودة بصحبة لُقى والحراس
في حين كانت سيبال بتتكلم بفخر وبتقول_وقتها أنا نطيت في الهوا، ولولا إن جاسم صد سيفي كان وقتها سيفي اخترق صدره
صح يا جاسم؟
ابتسم جاسم اللي كان بجوار قائد العربة وقال_صح يا سمو الأميرة
كانت عيون لقى متسعة بانبهار وهي بتقول_واو!
تحفة يا سيبال، أنا بتحايل على بابا وماما يسيبوني أتعلم المبارزة، بس قالولي إن الأميرة لازم تكون رقيقة ومتدخلش في أمور الرجالة زي المبارزة بالسيوف
عدلت سيبال من خصلاتها بغرور وهي بتقول_فيه فرق بين إنك تكوني أميرة عادية، وبين إنك تكوني أميرة هتكون ملكة في المستقبل
لازم اتعلم المبارزة وأبقى أحسن من أمهر جندي عشان أليق بكرسي العرش
عشان أكون ملكة قوية متتهزمش و....
قطعت سيبال كلامها وهي بتشهق بهلع لما حسيت أن العربة اتوقفت مرة واحدة بشكل غير طبيعي وكمان صدع صوت صهيل الأحصنة من حواليهم، فبارتياب هتفت سيبال_جاسم!
سمعت صوته وهو بيقول_سمو الأميرة، خليكي مكانك الوضع ممكن يكون خطر برا
وفي لحظات كان صوت تلاطم السيوف وصياح الجنود انتشر من حواليها
حست سيبال بالقلق، فطلعت سيفها من خصرها ووجهت كلامها لـ لُقى_خليكي هنا يا لُقى
اوعي تخرجي
الظاهر إن فيه قطاع طرق هنا
انكمشت لُقى على نفسها وهي بتقول بدموع_متسيبينيش يا سيبال
نزلت سيبال من العربة وهي بتقول_متخافيش
هحميكي
وفي لحظات شافت جندي مجهول واللي كان من الفرسان السود متجه ناحيتها، وبدون تردد رفعت سيفها وابتدت تبارزه وهي بتحمي نفسها، ولكن مهارتها كانت مسببة للجندي الدهشة الشديدة
كونها طفلة عمرها ١٢ سنة بس وبتبارز بالشكل القوي ده فهي ذات شأن كبير
في الوقت ده شافها جاسم اللي اتوسعت عيونه وهو بيصرخ بهلع_سمو الأميرة!
وبدون تردد ضرب الفارس في صدره، وطلع خنجره من جيبه وحدفه تجاه الفارس اللي بيبارز سيبال
فاخترق الخنجر رقبته بين الخوذة وبين الدرع اللي لابسه
وقبل ما يتجه جاسم ناحيتها كان واحد من الفرسان ضربه بسيفه من ضهره لدرجة إنه طلع من صدره، شخصت عيون جاسم وابتدى ينزل دماء من فمه وانفه، فصرخت سيبال بدموع وهلع_جـاسـم!
رفع إيده وبصوت مرتعش قال_سمو الأميرة...
شهق بألم لما سحب الفارس سيفه من ضهره
في الوقت ده كان جاسم وقع صريع على الأرض بلا روح
ملى الغضب والحقد ملامح وشها، ومن بين دموعها جريت على الفارس وهي بتصرخ بغضب، ابتدت تبارزه بعنف رهيب أثار دهشته لحد ما قدرت بقفزة دائرية في الهوا إنها تدخل السيف في موضع قلبه مباشرة
اتوسعت عيون الفارس بصدمة، فزودت من ضغط السيف وهي بتزمجر بوحشية وعيونها الحمرا مليانة دموع لحد ما دخل بعمق بقلبه، ولما وقع على الأرض رفعت القناع من على وشه، كان شخص مجهول ولكن اللي بيميزه هو الوشم اللي كان على جانب رقبته
واللي كان بيحمل نفس الشكل اللي في نص دروعهم، السيف اللي محاوطه جمجمة كائن غريب بأنياب
بهمس هتفت_انتو مين؟!
_سيبال!
قبل ما تستوعب كانت اتلفتت بفزع على صوت لُقى اللي كان مليان هلع، فشافت جندي ماسكها بعنف، وقبل ما تستوعب كان دبحها الجندي بسيفه بمنتهى العنف والدموية
شخصت أبصار سيبال واتجمدت الدموع في عيونها، وإنهارت على الأرض وهي بتصرخ بصدمة_لُقـــى!
وفي لحظات حست بشيء بيحجب عنها الضوء، وصوت ارتطام سيف قوي من خلف ضهرها، اتلفتت على الصوت من وسط دموعها، فشافت واحد من الفرسان ظهر من العدم ووقف قدامها، ومنع إن واحد تاني من الفرسان يقتلها بسيفه، وقال بقوة ونبرة أجشة_كـفايـة!
اعترض الفارس وقال_بس...
قاطعه وهو بيقول بحزم ونبرة لا تقبل النقاش_قـولـت كـفايـة
خلصنا على كل الجنود ومهمتنا انتهت مع سقوط المملكة، يعني اللي بنعمله ده مش من ضمن مهمتنا بعد كده!
الفارس باعتراض_بس العربة دي ملكية، يعني ممكن تكون فرد من عائلة ألدوين، القائد لو عرف...
قاطعه الفارس مرة تانية وهو بيخبطه بقبضته في صدره بعنف_قولت مهمتنا انتهت
اللي هيحصل بعد كده ميخصناش
يلا اتحركوا
كانت سيبال بتتنفس بعنف وهي بتراقبهم بهلع، بالفعل باقي الفرسان اتحركوا عشان يمشوا بعد ما تم اعلان إن مهمتهم انتهت، اتلفت ليها الفارس المجهول في الوقت ده
مكانش ظاهر من ملامحه أي حاجة غير عيونه السودا الحادة الآسرة بنظراته القوية، كان بيتأملها بعمق وبشكل أثار الرهبة جواها لحد ما اتركزت أنظاره على عيونها الواسعة اللي كانت مليانة دموع، ولكن في النهاية قال بلهجة باردة ساخرة_انكتبلك عمر جديد يا ذات الراس الناري
قالها وهو بيسيبها ويمشي بجسد مفرود وبخطوات شامخة، فضلت سيبال مكانها على الأرض وهي بتراقبه من بين دموعها ونفسها السريع، وبعدين قامت بسرعة جريت على لقى، رفعت جسدها بين إيديها ولكنها كانت فارق الحياة
نقلت عيونها على الوضع حواليها
كل الجنود اموات
مفيش غيرها عايش
نزلت دموعها بشدة، وقامت وهي بتحاول تتمالك نفسها وصوت لهاثها مالي المكان
بليونة ورشاقة امتطت واحد من الأحصنة واتحركت بيه للمملكة وهي بتسابق بيه الريح حرفيًا
وقوة الرياح كانت بتجفف دموعها اللي مبطلتش سيلان على وشها وهي بتفتكر لحظة موت جاسم ولقى اللي كانت في منتهى الدموية.
وعلى بُعد شافت الدخان خارج من المملكة، صابها الذهول وزودت من سرعة حصانها، لحد ما دخلت جوا المملكة
كان الدمار مالي المكان
النار كلت اجزاء كبيرة من المملكة
دمار، دمار و
دمار
وصلت للقصر الملكي اللي مكانش يقل دمار عن باقي المملكة
اضطربت دقات قلبها وارتجفت أناملها بهلع، نزلت من على حصانها بسرعة وهي بتصرخ بدموع_بـابـا....
مـامـا....
سيـريـن!
اتجمدت مكانها لما شافت مجموعة جنود غريبة عكس الفرسان اللي شافتهم حاملين عدد من الجثث للجنود والافراد من جوا القصر واللي كان من ضمنهم الملكة ميراي والملك اركان وباقي أفراد العائلة الملكية
شهقت بهلع وحست بالأرض بتدور من حواليها، وجريت وهي بتصرخ_بـابـا..
مـامـا
لااا!