رواية ظلك أنت الفصل الاول 1 بقلم منه ممدوح البنا
في عالم من العوالم اللي مسمعناش عنها غير في الأساطير اللي كانت بتتحكي لينا في حواديت قبل النوم.
وبعد إنهيار الحضارات الحديثة كلها تمامًا بعد حروب طويلة الأمد نتج عنها خسائر كتيرة، اتقسمت الأرض لممالك بتحكمها عائلات نبيلة بأسلحة وتقنيات قديمة كانت ضايعة من زمن.
وكانت الممالك الخمس اللي بتحكم الأرض هي:
مملكة "مكين"، المملكة الأعظم صاحبة النفوذ والقوة والهيمنة الأكبر على الأرض واللي بيحكمها عائلة ألدوين اللي كانوا مشهورين بإنهم ممكن يكون عندهم قدرات خارقة مميزة كل فرد في العيلة دي ولكن مكانش فيه اثباتات على ده بل مجرد أساطير بتتنقل بين الأفراد.
ملك المملكة هو الملك اركان، كان ملك معروف بالحكمة والعدل وكان محبوب من كل الشعب حتى شعوب الممالك التانية كانوا بيحبوه برضه.
زوجته الملكة ميراي وكانت بنفس صفات زوجها، امرأة رزينة متواضعة وخدومة، أما بالنسبة لأولادهم فكانت ولية العهد المنتظرة هي الأميرة سيبال اللي كانت لازالت طفلة عندها ١٢ سنة وشقيقتها اللي تصغرها بأربع سنين هي الأميرة سيرين.
المملكة التانية كانت مملكة "الغسق"، حكامها من عائلة دي لوران، ملكها هو عازم كان اهم حاجة عنده هي سلامة مملكته وشعبه لإنه كان محب ليهم بشكل كبير
زوجته الملكة كاميليا اللي كانت صفاتها بتحمل أنانية شوية عن زوجها، أما بالنسبة لوريث المملكة فهو الأمير المدلل أورهان وشقيقته الصغرى الأميرة فريال.
المملكة الثالثة هي مملكة "الفجر الأزرق"، وحكامها عائلة كرافن، ملكها هو المنتصر، زوجته الملكة سوزان وولي العهد هو الأمير أنس.
والمملكة الرابعة هي مملكة "فالدار" اللي كان حكامها عائلة آل أوريان وملكها هو زبير، واللي كان أهم حاجة عنده سياسة واقتصاد مملكته وتأمين حدوده بأي تمن
زوجته الملكة فخرية وولي العهد هو الأمير أوَّاب وشقيقته الأميرة شفق
المملكة الخامسة والأخيرة هي مملكة "ميراث الظلال" لصالح عائلة دارفين اللي كانوا اسم على مسمى
حاكمها الملك مظفر، ملك أناني وجشع، طموح بتوسيع مملكته حتى لو على حساب غيره، ملك المؤامرات والخطط اللي بتكون في الخفا، ودايما بيدعوه بصاحب الأفكار الشيطانية
زوجته الملكة حليمة، اللي كان اسمها ملوش علاقة بشخصيتها تمامًا وولي العهد الأمير اللي واخد صفات كتيرة من أبوه وهو الأمير أدهم وشقيقه اللي اصغر منه بعامين هو الأمير شهاب
وبعد اختيار الشعب اصبحت الخمس ممالك دي هي اللي بتحكم الأرض لأنهم كانوا من أنبل العائلات اللي كانوا موجودين، ولكن يظل الملك اركان هو صاحب الكلمة العليا نظرًا لإن مملكته هي الأكبر وصاحبة الموقع الجغرافي المميز ده غير قوة ونباهة ملوكها عبر الزمن لحد الملك أركان.
بين الممالك الخمسة علاقات وطيدة إلى حد ما وتبادل اقتصادي وتجاري مميز عشان يحافظوا على قوة ووجود ممالكهم، ولكن في النهاية في وجود كل الممالك دي كان لازم المؤامرات تكون طاغية حتى لو في الخفا..
****
"مملكة مكين"
قصر ملكي فاخر، على مساحة واسعة من المملكة، محاط بسور مزغرف برسومات ونقوش بتحكي انجازات كل الملوك اللي حكموا المملكة، وعلى مدخل القصر كان الشعار الرسمي ليها هو "طائر العنقاء"
وهو الطائر الاسطوري اللي بيُبعث من رماده، وكان دلالة على قوة المملكة وإن مهما صاب المملكة من صعوبات فهي قادرة تقوم تاني من رمادها.
كل فرد في العائلة الملكية بيحمل وشم الطائر وكإنها حاجة بيتولدوا بيها ودي حاجة كانت بتميزهم من بين عامة الشعب.
ساحات شاسعة مليانة جنود بثيابهم المعدنية وسيوفهم اللي مبيتخلوش عنها
وفي أحد الساحات كانت أصوات السيوف بتتلاطم بقوة
بين جنديين لابسين درع فولاذي، ملامحهم مش باينة من القناع الفولاذي اللي بيحموا بيه أنفسهم
بيدور بينهم معركة قوية، ولكن أحد الجنديين رغم صغر حجمه وجسده وقصر طوله إلا إنه كان بيتميز بالليونة والرشاقة بشكل واضح من حركاته المتمرسة وقفزاته في الهوا بانسيابية واللي بتدل على شخص بيتمرن منذ نعومة أظافره
وفي نهاية المعركة قفز الجندي الصغير قفزة عالية في الهوا وهو بيوجه سيفه ناحية الجندي التاني ولكن صدها الجندي بسرعة وهنا انتهت المعركة بينهم..
رمى الجنديين السيوف من إيديهم، ورفع الجندي الصغير خوذته
واللي ما كان هو إلا بنت صغيرة في الثانية عشر من عمرها، عيونها واسعة بلون العسل، رموشها طويلة وملامحها مرسومة بشكل فاتن، بتحرك خصلاتها الطويلة الحمراء في الهواء واللي كانت ملتصقة على جبهتها ورقبتها، وبتمسح قطرات العرق من على جبهتها وهي بتتنفس بعنف ناتج عن المجهود اللي قامت بيه
خلع الجندي التاني خوذته، واللي كان لشاب وسيم بملامح رجولية جذابه، اتقدم ناحيتها وصافحها وهو بيقول بابتسامة_براڨو يا سمو الأميرة
كل مدى بتبهريني بقدراتك القتالية رغم صغر سنك
أنا متأكد إن هيكون ليكي شأن عظيم في الجيش.
صافحته بحرارة وهي بتقول_شكرًا يا جاسم
انحنى ليها باحترام وبعدين سابها ومشي
التفتت وهي بترفع عيونها ناحية نقطة معينة، كان الملك أركان والملكة ميراي واقفين في أحد الشرف اللي بتطل على ساحة التدريب وهما بيراقبوها بابتسامة فخر حقيقية
ابتسمت ليهم وهي بتنحني، حاسة بالفخر وهي شايفة انبهارهم بيها.
اتحركت سايبة ساحة القتال فاتحرك الجنود بسرعة وهما بيلموا السيوف والأسلحة اللي استخدموها
أما سيبال فطلعت غرفتها بصحبة مرافقتها المخلصة بتول اللي كانت ماشية وراها وهي بتقول_جلالة الملك والملكة كانوا بيشيدوا بمهاراتك يا سمو الأميرة، ده إن مكانش كل اللي في القصر، رغم صغر سنك إلا إنك بتتفوقي على كبار الجنود اللي في المملكة
ضحكت سيبال بخجل وهي بتدخل للحمام وبتقول_مش للدرجة دي يا بتول، أنا إلى حد ما ممكن تكون حركاتي كويسة بس مش لدرجة إني أنافس كبار الجنود!
ساعدتها بتول في تغيير ملابسها وتنظيف نفسها وهي بتقول_سموك بس اللي مش عارفة قيمة مهاراتك
محدش شافك إلا وقال إنك هتبقي ملكة قوية وصاحبة شأن.
قعدت سيبال على كرسي فخم مطلي بالذهب قصاد مرآة عتيقة كبيرة وهي بترتدي مجوهراتها الثمينة، أما بتول فكانت بتصفف خصلاتها الحمراء النارية بحذر بالفرشاة المخصصة ليها هي.
اتفتح باب الغرفة، ودخلت منه الملكة ميراي بفستانها الأزرق المنفوش، شعرها الأحمر رافعاه على شكل كعكة أنيقة ومقدمة راسها مزينة بتاج ملكي ثمين.
انحنت بتول ليها بسرعة، فشاروتلها الملكة ميراي بعينها، سابت بتول الفرشة على طاولة الزينة واستأذنت وخرجت على طول، أما سيبال فكانت بتبص لانعكاس والدتها بابتسامة واسعة وهي شايفاها بتتقدم ناحيتها بملامح لينة بتشع بحنان أم.
وقفت وراها ومسكت الفرشاة وبدأت تصفف خصلات شعر سيبال هي مكان بتول، وهي بتقول_شوفت مبارزتك لجاسم النهاردة
هايلة يا سيبال
مهارة تليق بالوريثة الشرعية وولية عهد مملكة مكين العظمى
اتسعت ابتسامة سيبال وهي حاسة بانتعاش من ارضاء كلامها لغرورها، فكملت الملكة ميراي_وزي ما اتفقنا، تدريبك ومهارتك في القتال مش عايزاهم ينسوكي كونك أنثى
كونك أميرة رقيقة بتحمل دماء ملكية.
ردت سيبال بنبرة قوية رغم صغر سنها_متقلقيش يا جلالة الملكة
الأميرة تقدر تكون أميرة
وتقدر تكون فارس مغوار
واللي بيحدد هتكون إيه فيهم هو الموقف اللي هتتحط فيه.
تركت الملكة ميراي فرشة شعرها، وثبتت إيديها الاتنين على كتفي سيبال، ومالت ناحيتها وهي بتطبع قبلة حنونة على شعرها وبتقول بفخر_هي دي سيبال
سيبال الذكية
سيبال الناضجة
و..
سيبال الملكة..
اتفتح الباب في الوقت ده ودخلت طفلة عمرها ٨ سنين بخصلاتها الغجرية على عكس اختها وبشرتها الحليبية المليانة نمش وعيونها الزرقاء وهي بتجري عليهم
فهتفت الملكة ميراي_الأميرة الصغيرة جيالك بنفسها يا سيبال
ابتسمت سيبال وبصت لاختها الصغيرة اللي كانت بتقول بعبوس_سيبال، أنا عايزاكي أنتِ اللي تعلميني المبارزة مش شهرزاد
شهرزاد مبتعرفش تبارز كويس أنتِ اللي بتعرفي!
مالت الملكة ميراي ناحيتها وهي بتقرص انفها وبتقول_بس كده!
عيوننا للأميرة الصغيرة
ومن النهاردة سيبال هي اللي هتعلمك المبارزة..
****
مملكة "ميراث الظلال"
على طاولة الاجتماعات الكبرى كان قاعد الملك مظفر على رأس الطاولة بثيابه الملكية وتاجه اللي مزين راسه، وعلى يمينه ابنه الأمير أدهم اللي كان عمره ١٨ سنة، وعلى شماله ابنه التاني الأمير شهاب اللي كان يصغر أخوه بعامين واللي كان قاعد متبرم وملامحه ظاهر عليها الملل ولكن مجبر أنه يفضل موجود عشان غضب والده.
بصحبته الوزير الأكبر لمملكة ميراث الظلال وهو الوزير صفوان اللي كان عمره مقارب من عمر الملك مظفر
وجنبه عدد من قادة المملكة واللي دايمًا بيستشيرهم الملك مظفر في كل أمور المملكة.
اتكلم الوزير صفوان موجه حديثه للملك_تفتكر يا مولاي باقي الملوك ممكن يوافقوا على اقتراح جلالتك.
ولا هينسحبوا بل وممكن يبعتوا مرسال لمملكة مكين على اللي ناويين عليه.
رفع الملك مظفر أنفه بكبرياء وقال_قدامهم خيارين ملهمش تالت وهما عارفين كده كويس
يا ينضموا لينا، يا محدش فيهم يفتح بوقه بكلمه وإلا وقتها يكونوا كتبوا على مملكتهم الخراب.
اتفتح باب قاعة الاجتماعات في الوقت ده، ودخل منه واحد من الحراس اللي انحنى باحترام وقال_جلالة الملك، ملوك مملكة الغسق والفجر الازرق وفالدار وصلوا
شاورله الملك إنه يدخلهم، فبالفعل انسحب الحارس بسرعة، أما الملك مظفر فقام وهو بيعدل من وشاحه الأحمر المرصع بالأحجار الكريمة بغرور، وبعدين اتحرك بصحبة الوزير صفوان والأمير ادهم وشهاب ووقفوا قدام باب القاعة من جوا.
اتفتح الباب ودخل منه الملك عازم ملك مملكة الغسق بصحبة ابنه الأمير اورهان صاحب الخمسة وعشرين سنة، ومعاه الوزير الأكبر للمملكة وهو الوزير بيبرس
سلم عليهم الملك مظفر بحفاوة، وبعدين دخل الملك المنتصر ملك مملكة الفجر الأزرق، بصحبة قائد الحرس للمملكة وهو يزيد ولإن ابنه الأمير أنس كان لسة عمره ١٠ أعوام فمجاش بصحبته طبعًا.
وبعده دخل الملك زبير ملك مملكة فالدار بصحبة ابنه الأمير أوّاب اللي كان عمره اتنين وعشرين سنة وبصحبة الوزير أسعد.
رحب بيهم الملك مظفر بحفاوة واتحركوا كلهم لطاولة الاجتماعات وكل ملك وحاشيته أخدوا مكانهم
وبمنتهى الكبرياء قال الملك مظفر_أنا سعيد جدًا بوجود ملوك أعظم الممالك في مملكتي المتواضعة.
أتأمل الملك عازم الوجوه من حواليه، وبعدين قال بلهجة قوية_طبعًا أشكرك يا ملك مظفر على ترحيبك وحفاوتك بوجودنا، ولكن اسمحلي اسأل سؤال.
رد الملك مظفر بسرعة_أكيد يا جلالة الملك، اتفضل.
فقال الملك عازم_إذا كانت الأربع ممالك متجمعين دلوقتي فاجتماع مهم زي ما جلالتك قولت، إذن ليه مفيش أي فرد من مملكة مكين هنا
ليه الملك أركان مش موجود معانا؟
سكت الملك مظفر شوية وهو ملاحظ الوجوه اللي بتبصله بفضول، ابتسم ابتسامة صفراء ورد_سؤال جميل جدًا كنت متوقع إنه يطلع من جلالتك أنتَ يا ملك عازم
خاصة وأنا عارف قد إيه عقلك داهية!
مكانش الملك عازم من نوعية الملوك اللي بيحبوا المدح خاصة ولو كان مدح وراه مصالح شخصية زي ما هو حاسس إن سبب وجوده هنا كبير.
سند الملك مظفر ضهره على الكرسي الوثير واتكلم بقوة_طبعًا كل الملوك اللي موجودين هنا بيسألوا نفسهم سؤال واحد
وهو إحنا ليه هنا، وليه الملك اركان تحديدًا مش هنا
وأنا هنهي فضولكم وهقولكم السبب.
اتعدل طل الموجودين وهما بيبصوله بفضول كبير، وهنا كان الملك مظفر حاسس بانتشاء كبير، لحد ما قال بعد صمت_مملكة مكين
المملكة الأكبر مساحة، وصاحبة الموقع الجغرافي المتميز اللي مساعدها في إنها تكون أقوى وأعظم من ممالكنا كلها، وده اللي خلى الملك أركان تبقى كلمته هي العليا، والحقيقة دي حاجة مش عاجباني ولا عاجبة شعبي، وأكيد فيه منكم كتير برضه مش عاجبه الوضع ده، كونك ملك مش هتقبل إنك تكون في الظل.
بالنسبالي مملكة مكين بتضر اقتصاد وسياسة مملكتي خاصة وهي مستحوذة على كل المميزات لوحدها.
وأنا كملك غيور على أرضه مش متقبل وضع زي ده.
فاتكلم الملك المنتصر بفضول وقال_عايز توصلنا إيه بكلامك ده يا جلالة الملك؟!
رفع الملك مظفر راسه وقال بعيون بتلمع بحقد_أنا هسقط حكم مملكة مكين، وبعد ما يسقط حكمها، هوزع علينا مكاسب الحرب، هضمنلكم مزايا اقتصادية وسياسية كبيرة جدًا، كل مملكة هتاخد حقها وزيادة، كل مملكة هتستفيد من سقوط مملكة مكين وهنقدر ننهب كل ثرواتها، ده غير بعدها مفيش مملكة هتكون كلمتها هي العليا، كلنا هنكون متساويين على عكس الوضع دلوقتي.
ارتفع صوت الهمهمات من حواليه، بعضها كان اعتراض، والتاني كان صدمة، والأخير عيونهم بتملع بجشع وفضول.
وفيه الوقت ده اتنفض الملك عازم ملك مملكة الغسق وهو بيقول بحدة_اعذرني يا جلالة الملك مظفر، أنا استحالة اشترك في جريمة وضيعة زي دي، مملكتي حيادية، وهتفضل كذلك
لا هدعمك، ولا هدعم مملكة مكين في أي سياسة ممكن تؤذي مملكتي
لذا اسمحلي، أنا وشعبي برا مشاكلك.
وعلى عكس الملك عازم كان ابنه الأمير أورهان لمعت عيونه بجشع، حس إن حاجة زي دي هتزود من مكانته ومكانة مملكته بشكل كبير، كان بيتبادل النظرات هو والوزير بيبرس، نظرات هنا بس اللي فهموها، ولكن بمجرد ما سمع رد فعل والده حس بالضيق الشديد.
فاتكلم الملك مظفر وقال_صدقني يا ملك عازم، أنتَ هتبقى أكبر مستفيد من اللي هيحصل.
ولكن بما إنك مصمم على رفضك فولا كإنك سمعت حاجة، رفضك هقبله ولكن غدرك اللي مش هقبله أبدًا.
كان بيقولها بتلميح صريح ونبرة فيها تهديد إنه لو فكر يدعم مملكة مكين فهو هيتئذي زيهم بالضبط، سكت الملك عازم وهو بيبلع تهديده المبطن وبيبصله بنظرات مليانة غيظ، ولكن في النهاية قال_زي ما قولتلك
مملكة الغسق هي مملكة حيادية، أي شيء بيحصل برا حدودنا ملناش دعوة بيه
استأذن أنا، كده وجودي ملهوش داعي.
وجه نظره لابنه الملك اورهان والوزير بيبرس عشانه يقوموا، فوقف الامير اورهان اللي ظاهر على ملامحه الاعتراض من رد والده، وحاول يلين دماغه وهو بيقول_جلالة الملك...
ولكن قاطعه الملك عازم بحدة وقال_وجودنا ملوش داعي يا سمو الأمير.
بلع الأمير اورهان كلامه على مضض، واتحرك بالفعل بصحبة الوزير بيبرس اللي كان معترض هو كمان، ولكن رمى نظرة ناحية الملك مظفر خلت التاني يبتسم وهو بيهزله راسه بفهم.
حتى لو الملك عازم رافض، فيقدر يقنع ولي العهد والوزير بيبرس بنفسه.
وبعد خروجهم
وفي الوقت ده اتكلم الملك المنتصر ملك مملكة الفجر الأزرق وقال_اعذرني يا جلالة الملك، أنا شايف إن رد فعل الملك عازم طبيعي، خاصة وهما المملكة الحدودية بينا وبين مملكة مكين،
ده غير إن مملكة مكين قوتها عظمى، جيوشها مدربين بشكل مكثف، يعني سقوط المملكة مش بالسهولة دي، هيروح ضحاياها جنود وممالك كتيرة وقوى عظمى.
فقال الملك مظفر_أنا عامل حساب كل حاجة، وضامن إن في كل الحالات المملكة هتسقط، وعمري ما كنت هجازف بمعركة زي دي إلا ولو كنت متأكد من مكسبي
فرد الملك المنتصر تاني_أنا مقدرش ادعم الخيانة بشكل علني، مقدرش أحط مملكتي وشعبي في خطر، ومقدرش أظهر إن شاركت في خيانة زي دي
فقال الملك مظفر_وأنا مش عايز جلالتك تعلن دعمنا بشكل علني، ومش طالب منك غير حاجة بسيطة.
اضمنلي إن جنود من مملكتك يقوموا بعمليات استخبارية مكثفة في مملكة مكين، وفي المقابل هعزز من تأثير مملكة الفجر الازرق في المناطق الحدودية، وهحميها من أي ضربات خارجية سواء دلوقتي أو بعدين.
سكت الملك المنتصر واللي كان ظاهر عليه التردد والاقتناع في نفس الوقت، ولكنه كان خايف من إنه يجازف بحاجة زي دي.
فضل الملك مظفر باصصله شوية بابتسامة ثقة وهو متأكد إنه هيلين في النهاية، وبعدين وجه نظره للملك زبير ملك مملكة فالدار وقال_مسمعتش رأي جلالتك يا ملك زبير!
شبك الملك زبير إيديه الاتنين قدام بعض واتكلم بحيادية_والله يا ملك مظفر أنا مقدرش أجازف بحاجة مش مضمونة، لو فشلت محاولتنا في اسقاط مملكة مكين فكل الممالك هتتئذي بشكل مبالغ فيه
ولكن بالنسبالي مملكة مكين بتمثلي تهديد سياسي دائم، خاصة وإن الملك اركان مسيطر على مناطق حدودية حوالينا، فممكن هو بنفسه يستغل الوضع ده ويغدر بالمملكة في أي وقت غير محسوب.
حاول الملك مظفر يشعل الفتيل وبالفعل نجح في ده لما قال_بالظبط، أنا عارف إن مملكة مكين عينها على مناطق كمان تحت سيادة مملكة فالدار، في اي وقت ممكن يستغلوا قوتهم وإنهم محاوطين معظم المعسكرات الخاصة بمملكة فالدار ويقرر يسيطر على المملكة
عشان كده لازم نسقط مملكة مكين اللي بتمثل تهديد دائم لينا
وقتها المناطق الحدودية كلها اللي مستحوذة عليها مملكة مكين هتكون تحت سيطرة مملكة فالدار واضمنلك ده.
ظهر الاعجاب الشديد على وش الملك زبير اللي شاف إن دي حاجة في صالحه فعلًا، فقال بتساؤل حذر_وفي المقابل؟
ابتسم الملك مظفر باتساع وقال_بما إن العلاقة التجارية والاقتصادية بينكوا وبين مملكة مكين وطيدة بشكل ملحوظ، فدور جلالتك إنك توجه ضربات اقتصادية وسياسية ناحية مملكة مكين في الخفا ودي حاجة هتضعف قوتها بشكل ملحوظ.
بتساؤل قال الملك زبير_وبالنسبة لمملكة الغسق؟
الملك عازم رافض الخيانة بكل اشكالها، ومن رأيي إن دعم مملكة الغسق لينا مهم.
أيده الملك مظفر وقال_بالظبط، من خلال مملكة الغسق يقدروا يساعدونا في إنهم يسهلوا الحركات الهجومية لقصر مملكة مكين
الملك عازم رافض بالفعل
أما ولي العهد سمو الأمير اورهان، فأظن إن ليه رأي تاني.
بالفعل دقايق واتفتح الباب ودخل منه الأمير أورهان اللي كان ظاهر الاصرار على وشه، ابتسمله الملك مظفر بانتصار في حين كان ظاهر الصدمة على وش الملك الزبير والملك المنتصر اللي في الوقت ده ادركوا إن مظفر ملك عبقري بالفعل
اتحرك الأمير اورهان وقعد مكان والده وهو بيبصلهم بتصميم، وبعد صمت طويل مصحوب بعلامات الدهشة والتعجب، وجه الملك المنتصر كلامه للملك عازم وقال_إذا كانت كل مملكة هتقوم بهجمات غير علنية،
مين اللي هيهاجم قصر عائلة ألدوين مباشرة؟!
سند الملك مظفر ضهره على الكرسي، وبص قدامه في الفراغ، اتبدلت ملامحه لتانية بتلمع بشر وعزيمة واضحة، وبابتسامة واسعة قال_الفرسان السود...
وعلى ذكر اسمهم، اتسعت عيون كل الموجودين بدهشة واضحة، حتى ظهر القلق والارتياب على ملامحهم
وكإن الفرسان السود بالنسبالهم حاجة مرعبة.
ويبقى السؤال هو
مين هم الفرسان السود؟!