رواية عشق السلطان الفصل الرابع 14 والخامس عشر 15 بقلم دعاء احمد
سلطان فتح الباب و دخل و هو متعصب و غيران... و هو سامع أسلام بيتغزل فيها.
=و ايه كمان يا حيلتها....
غنوة بصت لسلطان بارتباك و قامت وقفت و هي شايفه بيقرب منهم بسرعة و الشر باين في عنيه... بسرعة وقفت أدام أسلام لأنها متأكدة أن ردة فعله هتكون عنيفة.
سلطان مسكها من دراعها بغضب و ضغط عليها بقوة
:اياكي تقفي في طريقي فاهمة... اياكي
غنوة بوجع : تبقى غبي لو فاكر إني هسيبك تاذيه... أنا عندي احميه على موتي فاهم.
نعيمة من وراهم:لا دا انتى متربتيش و بجحة كمان... يعني مدخله شاب غريب البيت و أوضة نومك و مش مستحية يا بجاحتك...
سلطان بحدة:ماما اخرجي دلوقتي دي حاجة بيني و بينها.
نعيمة بغيظ؛ ماشي يا سلطان
نعيمة خرجت من الاوضة و سابتهم غنوة بتبص لسلطان بتحدي و قوة
غنوة بهدوء :أمشي دلوقتي يا إسلام و أنا هبقي اكلمك.
أسلام :غنوة...
سلطان من قوة ضغطه على ايديها صرخت من الألم لأن دي مش اول مرة يمسكها بنفس الطريقة، كل مرة يتعصب يعمل نفس الحركة
اسلام بحدة و خوف عليها و هو بيشد غنوة بعيد عن سلطان :
إياك.... إياك تحاول تلمسها بالطريقة دي.
سلطان بعصبية و هو بيمسكه من باقه قميصه
:و أنت بقا اللي هتمنعني؟
أسلام :و أمنع الف زيك من اذيتها...
سلطان بغيرة :ليه... و لا هي مهمة عندك اوي كدا
غنوة بجدية و خوف على اسلام لانه لسه صغير و سلطان يقدر ياذيه فعلا
:أسلام امشي دلوقتي متخافش عليا.... بقولك أمشي .. اتفضل
اسلام بعد عن سلطان بالعافية و خرج من الاوضة و من الشقة كلها و هو قلقان على غنوة لانه كان متوقع ان سلطان بيعاملها كويس لكن اللي شافه حسسه الإحباط
عند سلطان
سلطان كان بيقرب منها و هي واقفه في مكانها و كأنها مش خايفة منه، وقف ادامها مباشرتاً و ايده حاوطت رقبتها بيرفع وشها له بعنف
:مين دا و ايه اللي بينك و بينه.... بتحبيه؟ هو دا اللي بتحبيه؟ انطقي ايه اللي بينكم... بس حتى لو جوازنا مجرد لعبه... أنتي شايله أسمى... و عايشة في بيتيو بكل بجاحة جايبه شاب غريب و مقعده في اوضة النوم و بيتغزل فيكي... صحيح كان عندهم حق واحدة زيك هتكون ايه يعني
غنوة رغم كل الوجع اللي حاسه بيه لكن غضبها كان قوي بما فيه الكفاية أنها تقدر تضربه في صدره بقوة بعدته عنها و اتكلمت بصوت عالي و غضب
=أنا ممكن اسمح لك تتكلم عني في اي حاجة الا شرفي سامع...اطلع برا... اطلع برا
غنوة من عصبيتها كانت بتزقه بقوة و بتبعده و هي مش شايفه ادامها
سلطان لأول مرة ميبقاش فاهم نفسه... هو غضبان و محتار و مش قادر يفهم نفسه
مخضوض من اللي بيحصل له... لكن في نفس الوقت كبريائها منعه يتعرف أنه متلغبط... خرج من الاوضة و هي قفلت الباب وراه غصب عنها و بسبب غضبها مسكت فازة رميتها على الأرض بعنف و قوة، قربت من صورة سلطان اللي متعلقه في الاوضة و بصت له بكره
:انت بني آدم حقير... متوحش و أناني... أنا بكرهك يا سلطان.
سلطان خرج من البيت و ركب عربيته و هو حاسس برغبه قويه في تكسير رأسها و عيونها شغله تفكيره و هي بتبص لاسلام بخوف
و افتكر كل مقابلتهم ببعض
مفيش مرة واحدة بصت له بنفس النظرة اللي مليانه خوف و حب
ضرب ايده بقوة و عنف في العربية و هو مش طايق نفسه...
عدي حوالي ساعة
غنوة كانت في اوضتها و هي مخنوقة المغرب إذن ماكلتش حاجة من وقت طويل غير اللي بيعمله فيها كل شوية... كانت حاسة بهبوط و أنها بتفقد طاقتها لكن مع ذلك مكنتش عايزاه تخرج تأكل معاهم و لا ليها نفس للأكل...
سارة كانت عايزاه تخبط عليها و تقولها تيجي تتغدا معاهم لكن نعيمة رفضت أنها تروح لها او تتكلم معها اصلا
سارة:يا ماما مينفعش كدا دي برضو مرات اخويا و دي ماكلتش حاجة من الاكل بتاع امبارح حرام علينا كدا.
نعيمة بحدة:و انا قلت لا يعني لا... لو هي جعانه يا حبيبتي تخرج من اوضتها و تيجي تقعد على السفرة زيها زينا... إنما بقا هتعمل فيها بنت السفرة عزيزة و تفضل في اوضتها هي حرة و بعدين ايه مرات اخويا دي
مشوفتيش اخوكي عمل معها ايه الصبح دا مكنش طايقها و دا معناه أنه أعلن جوازه بس علشان الناس متتكلمش
و فترة و هيطلقها يارب يطلقها بدل ما انا اموت مشلولة.
سارة:مالك يا نعيمة... مش انتي و لا دي امي اللي انا اعرفها... دا انتي كنتي احن واحدة علينا... ليه كدا؟
نعيمة بهدوء و حزن
:هو انتي فكرك انا بعمل كدا و انا مبسوطة يا سارة... يا بنتي أنا مقهورة من جوازك اخوكي دي... واحد زي سلطان يستاهل واحدة تحافظ عليه و تصونه مش واحدة تدخل شاب غريب أوضة نومها
سارة:استغفري يا نعيمة... و استهدي بالله علشان انتي عارفه من جواكي ان دا مش صح
و بعدين الشاب دا شكله يا دوب عشرين سنة و كمان الشغاله قالت إنه ابن عمها و يمكن هم قريبين من بعض و هي اتحرجت تقعد معه في الصالون ادمنا و يمكن في كلام تخاف تقوله ادامك و بطلي سوء الظن دا علشان انتي مش كدا يا ماما.
نعيمة؛ و الله اللي أنا اعرفه ان لو هي محترمة مش هتعمل كدا في الصباحية بتاعتها و اخوكي اللي خرج للشغل دا النهاردة
بذمتك لو كان اتجوز مريم كان هيخرج يوم الصباحية... و لا حتى لحد السبوع.
سارة:يا ماما شيلي مريم من دماغك اذا كان هي صاحبة الشان و قالت مش نصيبي و قفلت الموضوع معه و كل واحد راح لحاله
و آه لو كان اتجوز مريم كان هينزل يوم الصباحية عادي
و لو مكنش نزل كان هيبقى علشانك انتي بس لأنك تفضلي تنزني عليه انه ميصحش
انتي عارفة سلطان و عارفه انه بيحب الشغل و عمره ما حب مريم
بل بالعكس دا مع غنوة مختلف في تعامله عن غنوة.... استهدي بالله كدا و قولي اللهم اخزيك يا شيطان و بطلي تتكلمي في الأعراض و لا انتي تفرحي لما تتردلك فيا.
نعيمة :انتي بتقارن نفسك بيها؟!
سارة:يلهوي عليا و على سنين... انا هقوم ادخل اوضتي الحمدلله شبعت.
نعيمة:غوري ان شاء الله ما اكلتي.
سارة هزت رأسها بيأس و راحت اوضتها كانت عايزاه تتكلم مع غنوة لكن بسبب اللي حصل اتحرجت تدخل تكلمها دلوقتي
عدي حوالي خمس ساعات
سلطان دخل البيت مع ابوه بعد ما خلص شغل، كانوا طالعين السلم سوا.
احمد :المهم تكلم وائل تقوله يشوف موضوع المكن الجديد
سلطان:متقلقش انا اتفقت مع أنه هيجيب لي كل المعلومات و نقعد انا و انت و فريد نتناقش اذا كنا نشتريه و لا لاء
احمد:صحيح في واحدة من اللي كانوا في الفرح امبارح... عميله
لما شافت الشبكة اللي انت قدمتها لغنوة قالت أنها عايزاه نفس التصميم دا.. عز كلمني من ساعتين و بلغني و قالي انها توافق على اي مبلغ...
سلطان :أنا قلت قبل كدا ان التصميم دا مش هيتكرر تاني و مش هنعمل منه نسخ تانية.... التصميم دا غالي عليا شوية... صحيح ايه رايك في فريد اليومين دول.
احمد:مستغربة، مش عارف اول مرة احس انه مركز في الشغل... و حاسس كدا ان حسناء معلمه الأدب اليومين دول و بيجي المصنع بدري... مسمعتش انه سهر و دا مخليني قلقان.
سلطان:ربنا يهديه.
احمد من بين سنانه:و يهديك...
سلطان ابتسم و راح ناحية اوضته و ابوه راح اوضته.
الاوضة كانت ضلمة، سلطان استغرب و فتح النور لكن وقف مصدوم و هو شايف غنوة واقعه على الأرض و فيه زهرية مكسورة على الأرض
جري عليها بسرعة، انحني حاول يفوقها لكنها كانت فاقده الوعي
سلطان:غنوة.... غنوة فوقي في ايه؟
مال عليها شالها و راح ناحية إلانترية قعدها عليه و اخد كوباية ماية و بدأ يحط لها على وشها بيحاول يفوقها و هو خايف عليها
غنوة شهقت فجأة اول ما كب عليها الكوباية كلها... فتحت عنيها و بصت له بتعب و هي بتبعد ايده عن وشها...
سلطان:أنتي كويسة... حصل ايه؟
غنوة بارهاق:مالكش دعوة... انا كويسة بس ياريت تفضل بعيد عني... ايه اللي انت عملته دا.
سلطان:كنت بفوقك...
غنوة:قصدك كنت بتغرقني...
قامت من على إلانترية كانت رايحة ناحية الحمام لكن من التعب مقدرتش تقف و قعدت تاني مكانها، حطت ايدها على دماغها من التعب و بدأت تاخد نفسها بهدوء...
سلطان بقلق:غنوة في ايه...
غنوة:مفيش دايخة شوية...
سلطان بحدة و غضب:ما انتي ماكلتش حاجة عايزاه ايه اللي يحصل اكيد لازم يحصل لك كدا.
غنوة بحدة :بالله عليك اسكت...
سلطان:لو كنتي اهتميتي بنفسك كنت سكت لكن انتي بتتلككي علشان تقلقيني...
غنوة:بتلكك..
سلطان سابها و قام خرج من الاوضة.. غنوة هزت رأسها بضيق و هي بتاخد فوطة تمسح وشها و هدومها...
دقايق و دخل الاوضة و هو شايل صنية عليه أكل و عصير حطها على التربيزة ادامها .
سلطان:ياله كُلي...
غنوة :دا على اساس اني هسمع كلامك بالشكل دا؟
سلطان:هو دا اللي عندي...
غنوة:أنا مش جعانه
سلطان؛ بطلي كذب بقا...
غنوة بحدة:انا مش كذابة...
سلطان بغضب:كلمة كمان و هطفحك الأكل... اتفضلي كُلي انا مش ناقص دلع مالوش لازمة و ياريت تخلي بالك على نفسك لان لو جوالك حاجة هتكلفيني و خلاص على الفاضي.
غنوة مهتمتش و اخدت كوباية العصير تشرب منها و هي معندهاش قدرة للكلام معه...
بدأت تهدأ و تفوق... سلطان كان واقف أدام الدولاب بياخد هدوم ليه و هو بيراقبها بدون ما تاخد بالها.
غنوة حطت الكوباية و مسحت على وشها بهدوء و قامت اخدت مخده و لحاف حطيته على إلانترية بدون ما تبص له و هي لسه محافظة على ثبتها الانفعالي.
سلطان رغم انه كان خايف عليها و عايز يقولها تاكل لكن رفض يعمل كدا و دخل الحمام يغير هدومه.....
تاني يوم
سلطان خرج للمصنع و غنوة خرجت من الاوضة و هي مش عارفه تعمل ليها لقت نعيمة بتقف ادامها و بتتكلم بهدوء
=ياله يا غنوة البيت مكركب من الفرح و عايز يتنضف و السلم يتمسح... الشغاله اخدت اجازة النهاردة و سارة نزلت مع خطيبها و أنا تعبانه اكيد مش هتخلي حماتك تنضف و تمسح...
غنوة بهدوء:نعم يا ست نعيمة..
نعيمة:حلوة ست نعيمة دي... ياله يا حبيبتي نضفي البيت قبل ما حد يجي... و السلم يتمسح انا هدخل ارتاح لان ضهري شادد عليا...
الفصل الخامس عشر
بعد أسبوع
سلطان كان قاعد في المحل و هو حاسس بالتعب من التفكير في علاقته هو و غنوة..
اتنهد بضيق رغم ان مفتش فترة طويلة على جوازهم لكن من قبل ما يتجوزوا و هي شاغله تفكيره...
فاق من شروده على صوت مصطفى
:سلطان بيه... يا سلطان بيه.
سلطان :في اي يا مصطفى؟
مصطفى :في واحد برا عايز يقابلك بيقول اسمه أسلام جابر...
سلطان :اسلام جابر؟! دخله يا مصطفى و قول لمحسن يعمل لي فنجان قهوة...
مصطفى؛ حاضر...
اسلام دخل بهدوء و بص لسلطان اللي وقف و هو بيبص له بحدة
اسلام: ازيك يا سلطان بيه...
سلطان بهدوء:بخير الحمد لله... جاي احد هنا برجليك..
اسلام؛ جاي علشان في كلمتين محشورين في زوري لازم اقولهم لحضرتك...
سلطان:اقعد يا اسلام...
اسلام قعد بهدوء
:أنا آسف لو جيت في وقت مش مناسب بس.. غنوة
سلطان؛مالها غنوة
أسلام :هو حضرتك تعرف عنها حاجة علشان تتعامل معها بالشكل دا
سلطان:تقصد ايه
أسلام بتنهيدة:يعني اقصد ان دي مش طريقه تتعامل معها... غنوة مغلطتيش في حقك في حاجة انا جايز معرفش ايه اللي حصل بس أنا عارف غنوة كويسة مش بتحب تغلط نفسها... و طول عمرها ماشية صح
انا و غنوة اه ولاد عم لكن علاقتنا احسن من الأخوات
لا و حضرتك شكيت فيها لما شفتني معها...
سلطان بحدة :و أنت لو متجوز و دخلت البيت لقيت مراتك قاعده مع شاب في اوضة نومك هتعمل اي.
اسلام:أنت بتقول ايه يا استاذ سلطان... احنا كنا في البيت مع والدتك و اختك.. اه يمكن غنوة اتصرفت بعفوية و غلط أنا معاك بس مش كدا... هي يمكن اتحرجت من والدتك انها تقعد تتكلم معايا في وجودها و خصوصا ان تفاصيل حياتنا مش زيكم.
سلطان:ايه حكاية غنوة يا اسلام؟
اسلام بهدوء:غنوة حكايتها طويله الأفضل تسمعها منها هي
بس اللي لازم تعرفه أنها معشتش حياة مرفهه و لا عاشت مرتاحه هي و أمها..
مرات عمي كانت أطيب و احن حد عليها الله يرحمها لما ماتت غنوة كانت منهارة و كانت هتتجنن لانها اشتغلت كتير اوي علشان توفر فلوس العلاج لكن أمر الله... و انكتب عليها تبقى وحيدة
لا ابوها رحمها و لا ابويا... كان همهم أنهم ياخدوا منها فلوس شغلها و لان ابويا شديد شويه كان بيعرف ياخد فلوسها بالغصب لحد ما جيه في يوم و قالها أن في واحد متقدم لها
بس عايز يتجوزها في السر مدة هيحددوها في مقابل فلوس
لكن غنوة كانت رافضه و عملت معاهم مشكله لكن ابويا وعدها أنها هتاخد كتير من الموضوع ده فهي وافقت و اقنعتهم انها موافقه في نفس اليوم سابت الغورية و جيت اسكندرية على طول من غير ما تفكر لحد ما في حد بلغ عنها و بلغهم عن مكانها...
سلطان سكت و هو حاسس بالندم أنه خلي عز يبلغ عنها...
اخد نفس عميق و هو بيرجع راسه لوراء و غمض عنيه
أسلام :أنت كويس؟
سلطان بهدوء:اه الحمد لله... صحيح انت هتتغدا معانا النهاردة...
اسلام:كتر خيرك بس أنا لازم ارجع علشان اخواتي..
سلطان؛ مفيش مشكلة هتتغدا سوا و بعدها هترجع..انا هكلم الجماعه في البيت يجهزوا الغداء
اسلام ابتسم بهدوء و سلطان طلع موبايله كلم والدته بلغها ان في ضيف هيجي معه على الغداء.
في البيت عند غنوة
دخلت اوضتها و هي حاسة بارهاق و تعب و خصوصاً ان كل يوم نعيمة تتحجج بحجة تخليها هي اللي تنضف البيت و تمسحه و تجهز الغداء.... لكنها معترضتش و لا حتى اتكلمت مع سلطان كانت بتحاول تعدي الايام.
اخدت هدوم و دخلت تاخد دش... عدي الوقت بسرعة
كانت قاعدة بتسرح شعرها لحد ما سمعت صوت سلطان و هو بيتكلم مع حد...
قامت بهدوء و لمت شعرها و هي مستغربة انها سامعه صوت اسلام
خرجت من الاوضة و هي بتلف حجابها لقت سلطان قاعد مع اسلام بيتكلموا، متعرفش ليه حست بالدهشة لأنها مكنتش متوقعه أنهم يقعدوا سوا في يوم من الايام و يتكلموا عادي كدا
لكن ابتسمت و هي بتقرب منهم
:اسلام!
اسلام وقف و ابتسم و هو بيمد ايده يسلم عليها لكن غنوة بحركة عفوية حضنته
:أنت كويس؟
اسلام بعد و هو بيبص لسلطان
:بخير الحمد لله أنتي عاملة ايه؟
غنوة:بخير الحمد لله...
سلطان قرب من غنوة و هو حاسس بالغيرة، مد ايده لفها حوالين خصرها قربها منه بقوة
غنوة بصت له بدهشة و عيونها وسعت بصدمة لكن سلطان اتكلم بهدوء
:أسلام هيتغدا معانا النهاردة يا غنوة... ايه هنفضل نتكلم كدا، هو مستعجل و عايز يرجع القاهرة هنفضل نتكلم كدا كتير..
غنوة ابتسمت و هي بتبص لاسلام
:لا طبعاً... ثواني و الغداء يكون جاهز أنا اللي عامله الاكل...
بعدت عن سلطان و راحت ناحية المطبخ و هي مبسوطه انها اطمنت على اسلام كانت خايفه سلطان يعمل له حاجة.
طلعت الاكل و حطيته على السفرة بهدوء... نعيمة خرجت من اوضتها بعد ما صلت العصر...بصت لسلطان اللي قاعد مع اسلام و دخلت قعدت معاهم في الصالون
نعيمة :السلام عليكم...
:و عليكم السلام ورحمة الله وبركاته
نعيمة بضيق:ازايك يا ابني...
اسلام :أنا بخير الحمد لله...
نعيمة :يدوم الحمد... هو دا الضيف يا سلطان.
سلطان بجدية:لا اسلام دلوقتي صاحي بيت... دا اخو مراتي...
غنوة كانت داخله الصالون لكن سمعت كلمة "مراتي" ارتبكت و بصت له باستغراب...
غنوة بابتسامة:الغدا جاهز
سلطان بهدوء:طب ياله يا اسلام...ياله يا ماما
غنوة خرجت و كلهم معها
كانوا بيتغدوا في هدوء و غنوة حاسة ان فيه حاجة غلط و خصوصاً سلطان اللي بيتعامل بهدوء و خلها تقعد على الكرسي اللي جنبه... كانت قلقانه و حاسه ان في مصيبة مستنيها لكن كانت بتاكل بهدوء
سلطان مكنش بياكل تقريباً و هو بيقلب في الطبق و بيفكر في اللي بيحصل معه و علاقته بغنوة... و الطريقه اللي بيتعامل بيها معها... طريقه جوازهم و اللي بالنسبة له "عك"
كل حاجة حصلت بسرعة مخيفةحتي هي مكنش عندها اوبشن الاختيار
لا دي كانت مجبرة.... و كمان سمعتها و احتجازها في الشقه اللي كانوا فيها و الحرس اللي كانوا موجودين و منعوها من الخروج
شكه فيها حتى لو بدافع الغيرة اللي اول مرة يحس بيها...
و الأصعب هو هدوئها طول الفترة دي و انها منفجرتش فيه...
كان فيه سؤال بيدور في باله...
"ايه اللي مرت بيه في حياتها قبله خلاها بالبرود و الهدوء دا.... هل اللي فات في حياتها كان أصعب من كدا و دا اللي مخليها هادية في التعامل معاهم....
نعيمة بخوف :مالك يا سلطان....
سلطان:لا أبدا انا تمام...
نعيمة :ما هو واضح...
غنوة مهتمتش و حطت لاسلام الاكل في طبقه
:بالهنا و الشفا.
اسلام ابتسم بهدوء
عدي الوقت و اسلام خرج مع سلطان من البيت في طريقه للقاهرة...
سلطان كان داخل البيت لكن حارس البيت وقفه و هو محرج منه
سلطان :في ايه يا عم محمد ما تتكلم..
عم محمد بحرج:بصراحة يا بيه مش عارف ابدا منين بس الموضوع مبقاش يتسكت عليها و انا مش مصدق انها تطلع منك انت يا سلطان بيه
دا انت الكل بيحلف بيك تقوم تعمل حاجة زي دي
سلطان :حاجة ايه؟ ما تتكلم يا عم محمد.
عم محمد:بصراحة يعني ميصحش ان مدام غنوة كل يوم تطلع تكنس السلم و تمسحه... لا و كمان
أنا قلت لست نعيمة اني ممكن اعمل كدا بدالها لكنها رفضت و زعقت لمدام غنوة ادامي... و غير كدا اللي بيجي البيت و بيشوفها مش هيسكت و هيطلع يقول مرات سلطان البدري شغاله خدامة
طب ليه اديتوا الشغاله اجازة طالما محتاجينها و لو مش هينفع و لازم تمشي قولي و انا اجيبلك واحدة امينه و نضيفه. و لو حد غريب دخل البيت بيبص لست غنوة و..
سلطان بحدة و هو بيمسكه من ياقه عبايته بغضب و شراسة
:انت بتقول ايه ايه الجنان دا... غنوة ايه اللي بتكنس و تمسح.... انطق
عم محمد بخوف:في ايه يا سلطان بيه... انا بقول الحقيقة...
مدام غنوة من ساعة ما دخلت البيت و هي اللي بتعمل كل حاجة و الشغاله اللي كانت هنا ست نعيمة مشيتها
و لما أنا طلبت من الست نعيمة اعمل اللي المدام بتعمله رفضت و اتخنقت معايا و قالت لي خليك في شغلك
بس ميصحش حد يدخل البيت يشوف مرات سلطان بيه و هي بتنضف...
سلطان سابه و طلع البيت بسرعة و هو هيتجنن من اللي سمع و مش مصدق ان امه تعمل كدا...
فتح باب الشقه و قفل الباب وراه بقوة اتكلم بصوت عالي مخيف
:ماما يا ماما.... غنوة.... غنوة
نعيمة :في ايه يا ابني صوتك عالي ليه؟
غنوة خرجت من اوضتها بخوف لان دي اول مرة تسمع صوته عالي كدا
سلطان:الكلام اللي عم محمد قاله دا صح؟ انتي مشغله مراتي خدامة...
نعيمة بارتباك:ايه الكلام اللي بتقوله دا يا سلطان
سلطان بعصبية و بيحاول يسيطر على نفسه
:بقول اللي حصل انتي مشغلها خدامة...
نغيمة:لا طبعا و بعدين هو مش تنضيف البيت دا من مسئوليتها و لا هي هتقعد و تحط رجل على رجل و انا اللي اقوم انضف...
سلطان:يعني عملتي كدا فعلا يا أمي؟
مشيتي الشغاله مخصوص و خليتها تطلع تمسح السلم و اللي داخل البيت و خارج يشوفها.... طب ليه
دي مرات ابنك... مراتي يا أمي مراتي
مهمكيش اللي ممكن يحصل لو واحد كدا و لا كدا من اللي داخلين البيت يتعرضوا ليها او حد بيبصلها بنظرة زباله... و لا مهمكيش سمعة العيلة مش دي اللي انتي بتسعي ليه دايما أن العيلة محدش يفرقها و تفضل سمعتها في السماء
نعيمة بحدة:
ما أنت خليت سمعتنا في الأرض... و بعدين مين اللي هيبص لها، خايف عليها اوي
لا و كمان بتزعق فيا علشان واحدة خطفتك من خطيبتك و خليتك تتجوزها في السر
واحدة مالهاش اصلا و حتى ابوها متبري منها و الله اعلم لو كانت شريفه و .
سلطان بحدة و مقاطعه
:كفاية... كفاية بقا
اللي أنتي بتقولي أنا متجوزها في السر دي... استحملت العك اللي بيحصل دا من غير ما تتكلم... غنوة عمرها ما كانت مراتي
أنا اتجوزتها فعلا بس في النور... و موضوع الجواز في السر دي كانت لعبة انا لعبتها
و هي بتدفع تمنها...
نعيمة بصت له باستغراب هي و سارة.. غنوة غصب عنها دموعها نزلت لأول مرة
سلطان راح ناحيتها و مسك ايدها
:غنوة بياعة الرز بلبن زي ما حضرتك شايفه انها بنت مش متربية و ازاي تاجر دهب يتجوز واحدة زيها و اكيد عملت لي عمل... و لفت عليا علشان اتجوزها و اسيب مريم بنت الحسب و النسب
انا لا عمري حبيت مريم و لا عرفت معها الحب....
و إذ كان على غنوة فهي واحدة القدر حطها في طريقي انا و فريد
فريد اللي انتي عارفه انه اتجوز حسناء بس علشان يرضيك و يخلص من الزن في موضوع الجواز ف راح لأول واحدة كانت بتفتح قلبها له و قرر يتجوزها و هو مش عايزاها فقرر يعاند معاكي و معايا و مع الكل
و يمشي في الطريق اللي انتي كنتي خايفه منه
السهر... مع ناس لا عندهم دم و لا اخلاق
و بقا زيهم مش فارق معه حاجة فقرر يسهر و ينبسط بالطريقه اللي هو شايف انها صح
و ظلم معه حسناء
لكن علشان حظ غنوة منيل
وقعت في طريقه و فريد بقا يرزل عليها ما هي بياعة الرز بلبن اللي ملهاش حد يدافع عنها او يحميها...
فريد بيه كان عايز يتجوزها في السر لكن برضو علشان حظها ماندل
انا عرفت فقررت أوقف الجوازة دي و اللي حصل أنها أتعرض لحادثه و في ناس اتهجموا عليها و ضربوها
صحيت تاني يوم في المستشفى مش في وعيها و انا مضيتها على عقد الجواز العرفي لما لقيت فريد عندها و خايف عليها
حسيت انه ممكن يحبها و يعمل مشكله مع حسناء و خالي يوسف
و يبوظ الدنيا و أنا عارف خالي معندوش غير حسناء يخاف عليها و ممكن يقطع علاقته بينا لو الغبي فريد زعلها
فعملت لعبة اني متجوزها و طبعا الظابط مكدبش خبر و جيه قالكم و في ناس تانية عرفت...
و بالنسبة بقا لابوها متبري منها... فدى حاجة متخصناش
انا حاولت افهمك لكن انتي كنتي مصرة اني حيوان اتجوزت في السر مع انك اكتر حد عرفني
لكن سكتت و قلت عدي... و كل ما انتي تزعلي مني او تغضبي
اروح انا و أفضى عليها غضبي بمنتهى الغباوة و كل مرة كانت بتسكت... لكن بحد هنا و كفاية اوي كدا
مرات سلطان البدري اشرف من ان حد يتكلم عليها نص كلمة...
بس تعرفي أنا اللي غلطت لما فكرت بالشكل دا و فكرت اني ممكن اكون بحمي علاقتك انتي و خالي يوسف
و في المقابل ظلمتها معانا.... لدرجة لأول مرة احس نفسي حقير اوي... اوي
على العموم أنا هسيب البيت و هروح شقتي
نعيمة مكنتش عارفه تقول ايه و هي بتستوعب صدمة جديدة و ان غنوة مالهاش ذنب في حاجة.
سلطان مستناش رده فعل من حد و دخل اوضته و هو ماسك ايد غنوة اللي كانت حاسه بان هي اللي انفجرت فيهم كانت بتبكي بشكل هستيري و هي بتبص له بالنفور منه و من المكان حتي من الهواء اللي بيجمع بينهم في نفس الاوضة
سلطان كان بيلم حاجته المهمة و هي بتبص له و قاعده على إلانترية
غنوة وقفت ادامه و هي بتمسح دموعها :اظن كدا انت عملت اللي انت عايزه.. أنا بقا من حقي دلوقتي انسحب من اللعبة دي، أنا عندي مسئوليات كتير و فيه ناس في رقبتي و من حقي أمشي... أنت عملت اللي انت عايزاه و أنا مشكوره ليك انك دفعت عني دلوقتي... بس كفاية لحد كدا
انت اتفقت معايا أن الجوازة دي فترة و هتنتهي ياريت بقا نخلص
فاكر انت قلت ايه... مش هتقدر تتنفس معايا في نفس الاوضة
انا دلوقتي اللي كارهه وجودي معاك بالله عليك ارحمني لوجه الله...
والدتك برضو عندها حق أنت تستاهل واحدة بنت ناس ترفع منك و تعليك... و انا مسامحه في حقي بس سبني امشي لحالي
سلطان قرب منها و وقف ادامها و اتكلم بهدوء و تفكير
:عايزاه الطلاق..
غنوة:ياريت...
سلطان:و انا موافق بس مش دلوقتي
اديني كم شهر هنعيش فيهم سوا... و بعدها انتي من طريق و انا من طريق
اظن مش حلو ليكي انك تطلقي بعد عشر ايام و انا كمان.... هنطلع دلوقتي على شقتي التانية هي جنب محل الدهب
غنوة سكتت و هي بتفكر و افتكرت كلام اسلام ان ابوها و عمها موجودين في اسكندرية و ان لو فعلا اتطلقت منه دلوقتي لا يمكن يسبوها في حالها و أنها ممكن تبقى في امان معه.
غنوة:موافقة.
سلطان ابتسم بهدوء و راح ناحية الدولاب :طب لمى الحاجة اللي عايزاها تاخديها معاكي... صحيح هو انتي فين موبايلك
غنوة راحت ناحية الدولاب تلم حاجتها و اتكلمت بحسرة و هي بتفتكر عمها
:كان معايا واحد بس.... اتكسر
سلطان حس انها بتكذب لكن محبش يتكلم و جهز حاجته
بعد نص ساعة
سارة:يا ماما ما تعملي حاجة... دا هيمشي
نعيمة بحزن :سبيني دلوقتي يا سارة و روحي اوضتك...
سارة:معقول هتسبيه و موبيل بابا مقفول و فريد مبيردش عليا و سلطان هينشف دماغه و اكيد هيمشي اعمل ايه دلوقتي
نعيمة:امشي و سبيني يا سارة انا مش ناقصكي.
سارة:حاضر يا ماما حاضر
سارة خرجت من الاوضة كان سلطان خرج من البيت مع غنوة