❤️بسم الله توكلنا على الله
اللهم أشفي مرضانا وفك كربنا يا أرحم الراحمين ❤️
____________
فى منطقة شعبية للغاية يقف طفل فى محل والده (محل عطارة) ،،أتت فتاة تقول :- فين أبوك يا عبدالله
عبدالله/ بتسألى علية لية عايزه حاجة
الفتاة/ يا غلباوى أبوك فين
عبدالله/ فى المخزن بيجيب بضاعة
الفتاة/ قوله مرات أخوك الله يرحمة تعبانه أووى
الطفل بفزع/ مرات عمى دى حامل ،،ثم دفع الفتاة وطار للمخزن وهو يتعثر ويلحق نفسة قبل سقوطه
الفتاة/ ينيلك يادى الواد كنت هقع
______
وصل لأبوة وقال وهو ينهج / مرات عمى الله يرحمة تعبانه
عصام/ فردوس وسع يا واد دى حامل ،،،أخذ عصام الطريق يهرول لمنزلها وأبنه عبدالله صاحب العشر سنوات وراة وعند وصولة وجد رجال وستات فى بيت أخوه لم ينكر أنه أدايق فهو ترك مرات أخوه فى رعاية أهلها تحديدآ أمها ،، كما طلبت كيف تكون بمفردها
أحد الجيران/ الست فردوس تعبانة يا معلم رمينها لوحدها ليه
عصام/ مع أهلها معرفش عايشة فى شقتها المفروض عند أمها دى رغبتها
الجارة/ بقالها يومين مختفية قولت أشقر عليها سمعتها بتنادى تعبانة نديت الجيران وكسرنا باب الشقة حد يعمل فى لحمة كدة دى صغيرة وحامل وأرملة رمتوها لية
عصام بحدة/ قولت عند أهلها محدش يرمى لحم أخوة وحيات أبنى عبدالله معرف ورحمة أبنى الكبير إللى مفرحت بيه م عندى علم بالموضوع دة، ،،وسعوا كدة أطمن عليها
الجارة/ معاها دكتور جوا
أنتظر عصام وتحمل تلقيح الكلام من السيدات، ،وعبدالله يود الفتك بهؤلاء السيدات اللاتي يتهمون أبية بشئ ليس لة أساس من الصحة
________
خرج الطبيب وقال:- مين فيكم جوزها
عصام/ دى مرات أخويا الله يرحمة مات وهى حامل فى ٣ شهور خير يا دكتور
الدكتور/ أنيميا وضعف عام وحالة الجنين مش مستقرة
عصام/ المطلوب إيه
الدكتور/ مستشفى يكون أفضل فى حالتها علشان الجنين ،،لو تقدر توفر الرعاية هنا فى البيت يكون أفضل
الجارة/ المستشفى طبعا أهل جوزها رموها
عصام بحدة/ يا ولية اتقى الله كل كلمه تتحاسبى بيها قدام ربنا
عبدالله بهجوم/ حاسبى يا ست أنتى على كلامك
عصام بحدة/ أخرص يا واد طول ما أنا بتكلم تخرص ملكش دعوة بكلام الكبار غور على المحل وحسابنا فى البيت
أدايق عبدالله وزعل لأن أبوة أهانه أمام الجميع ونزل جلس أمام المنزل ورفض يذهب للمحل فهو تربى فى المحل يعنى الشارع وعارف لازم يقف راجل فى ظهر أبوة فى ظرف ذى دة
________
عصام ندة على أبنه من البلكونه فهو عارف ينتظرة ولا يتركة وقال:- عبدالله أنت يا واااااد
عبدالله بلفهة/ نعم يا بابااااااا
عصام/ عارف بيت أم مرات عمك فى حلوان
عبدالله/ أيوة
عصام/ معاك فلوس
عبدالله أخرج من جيبة ١٠ جنية وقالة
عصام/ خذ ال١٠ جنية دى كمان ورح هات أمها على إيدك إياك ترجع من غيرها
عبدالله/ حاضر يا بابا ثم جرى بعد ما ألتقط الفلوس من الأرض
عصام بصوت عالى/ براحة يا واد محدش بيجرى وراك وأركب المترو أمان وسط الناس بلاش تاكسى برااااحة يا عبدالله معنديش غيرك
بقلم نجلاءفتحى عاشقةالكلمات
ملحوظة طبعآ عارفين القاهرة كبيرة و واسعة والمكان الذى ذهب لة عبدالله بعيد وبيغير فى المترو محطة تبادلية حتى يوصل لأم مرات عمه وهذا يدل أن هذا الصبى راجل يعتمد علية وقد المسؤوليه
بقلم نجلاء فتحى عاشقة الكلمات
____________
وصل عبدالله وريقة ناشف وجعان فهو على لقمة الفطار بعد الفجر وطول اليوم يعمل والأن هو بعد العشاء خبط على باب الشقة وقال:- شقة أم فردوس
الست/ لا يا حبيبى الشقة فى السابع أحنا الرابع
عبدالله/ أسف
الست بطيبة/ الجو حر النهاردة أوى وأنت عرقان أجبلك تشرب
عبدالله/ كتر خيرك مش مهم
الست بقلب أم/ أستنا يا ضنايا معايا زيك معلش مش ينفع تدخل الراجل محرج عليا مفيش دخول أستنا وحيات أمك متمشى،،،، ثم أغلقت باب الشقة ،،وبعد دقيقتين فتحت باب الشقة وأعطت لة كوب كبير من المانجا المثلج المطعم بنكة مياه الورد ،ألتقطها عبدالله وأفرغها بمعدته دفعة واحدة ،،أبتسمت الست وقالت:- تعرفها منين أم فردوس
عبدالله/ أم مرات عمى
الست/ ماشى يا حبيبى ربنا معاك يا ست صعبة
أبتسم عبدالله بضيق فهو يعلم ذلك ثم شكر الست وصعد للدور المطلوب
رن الجرس خرجت لة وقالت بعشوائية :' جرا إيه يا واااااد زن زن إيدك يا زفت عن الجرس تبوظه ،،عايز إيه
عبدالله/ يبقى أنتى أم فردوس مرات عمى
الأم/ أنت مين
عبدالله/ أنا عبدالله أبن أخو جوز بنتك الله يرحمة
الأم/ الله يجحمه أخلص مش فضيالك عايز إيه العشاء هيبرد
عبدالله بأدب عكس طبعة / بنتك تعبانة وعندها الدكتور شكلها تعبانه أوووى ،،،جاية ولا لا
الأم لطمت/ يالههههوى يا خرابى فردوس،،،،، هى جوازة الندامه والشوم كان يوم أسود لما عمك أتجوز بنتى غور يا فقر من وشى وزقته من على السلم لدرجة تعور فى جبينه ،،لم يهتم وقال بصوت هادى :- أبويا المعلم عصام بعتنى ليكى رجلى على رجلك
الأم/ أقسم بالله لو مغرت من قدامى يا نسب الشين لكون رمياك من على السلم للبدرون وأنا مستحيل أمشى معاك المسافة دى ثم أغلقت الباب فى وشة ،،، نزل جرى هو على السلم وبحث عن بقال عندة تليفون أرضى وأتصل على أبوة فى المحل لم يجدة ،،،،،أتصل على أمه فى البيت جرس ولم تجيب قلق أكثر فهى لم تتحرك من البيت معقول راحت لمرات عمه ،،،، أتصل على المحل تانى وشخص قالة نمرة بيت عمة من الدفتر، ، ثم أتصل على نمرة بيت عمة ،،وكلم أبوة وحكى لة الحوار ،،،فأمرة يرجع قبل المترو ميقفل ومش يتأخر ،،،سأل الصغير على أمه فأجابة أبوه هى معاه
💐ملحوظة الزمن دة مفيش تليفون محمول ولسة الجنية لية قيمه 💐
بقلم نجلاء فتحى عاشقة الكلمات
________
وصل الصغير بالسلامة وطاقة جسدة ضعيفة من قلة الطعام اليوم لولا كوب المانجا أعطى له طاقة شوية،،،،وحكى لأبوة بالتفصيل، ،،تفقد والده جرح رأسة ليس خطر لكنه وارم وخربوش سطحى دايقة من جوا ،،
أتت راضية/ يالهوووى مين عمل كدة وقعت ،،عربية خبطتك ،،أنطق
عبدالله/ مفيش يا ماما أتخبط بس
راضية/ لا أنت واقع دى واقعة حرام عليك يا عبدالله بتوجع قلبى كدة خلى بالك من نفسك علشانى أنا وأبوك يا بنى
عبدالله/ نصيب يا ماما ،،مرات عمى عاملة إيه
راضية/ تعبانة يا ضنايا ،،،عارفت توصل المنطقة بتاعة أمها
عبدالله بفخر/ أبنك صغير ولا إيه
راضية بفخر/ أبنى راجل وحضنته ،،أخطف نفسك وأنزل أشترى سندوتش فول ولا طعمية تلاقيك جعان
عبدالله رغم جوعة/ لا مش جعان مستحيل أكل وأنتى وبابا مش أكلتوا
راضية/ محدش عارف ناكل أمتى
عبدالله بأمر/ الأمر منتهى ثم تركها وذهب لأبوه
نظرت راضية لية/ يارب أحمية معنديش غيره وأبعد عنه عين القريب قبل الغريب
_________
أتت الأم بزفة و ولوله وسب من أسفل المنزل حتى صعدت لشقة بنتها
راضية/ حرام تدخلى على بنتك كدة دى مريضة
الأم/ ومين السبب أخو جوزك مكنش لية داعى الحمل دة مش عايزينه بنتى صغيرة لية تتربط وهى لسة فى عز شبابها مش كفاية أرملة كمان تتحرم من لذة الدنيا والراجل
عصام/ لولا أنك مرا قدامى كنت رديت عليكى أحترمى نفسك فضحتينى بقا أنا رامى مرات أخويا ،،،ردى،،، فردوس المفروض عندك بعد أخويا متوفى قاعدة لوحدها أزاى وكمان عايزة تنزلي العيل يا جبروتك
راضية/ راعى ربنا جوزى متكفل بطلبات بنتك كل شهر وأنتى مطلعة عليه سُمعة
الأم/ عايزة بنتى تموت ذى أبنك
أتلجم لسان راضية فهذا الموضوع حساس لديها ،،،،تدخل عصام وكانت خناقة كبيرة
وأنتهى الحوار أن الأم أقامت مع بنتها فى شقتها ترعيها،،، ورجع عصام بأسرته للبيت
بقلم نجلاءفتحى عاشقةالكلمات
_______
حضرت راضية الطعام
عصام/ مليش نفس
راضية/ ومين ليه نفس ياكل بس بقينا بعد نصف الليل وأحنا على لقمة الفطار بعد الفجر لأزم تاكل أبنك رافض من غيرك
تنهد عصام/ ماشى، ،شيلى الطبيخ واللحمة لغدا بكرة وجهزى لقمة خفيفة
راضية/ فى عيش وجبنه بيضا وخيار وأقلى بيض لعبدالله
عصام/ زودى السمن البلدى علشان بيحبة
راضية / عنيا يا أبو عبدالله
______________
وبعد وقت تناول الجميع الطعام وناموا على طول ،،كلها ساعتين و يبدأ يوم جديد لعملهم ٠
__________
(فى صباح اليوم التالى )
عبدالله واقف على العربية نصف نقل مع الرجالة التى تنزل البضاعة ،،،لمح أم مرات عمه تأتى
قفز من على السيارة وهدومة وشعرة توابل / جاية لية
الأم/ أبوك فين
عبدالله/ مش هنا لو عايزة حاجة قولى أبلغة لما يجى
الأم/ عايزة فلوس أجيب علاج لمرات أخوة
عبدالله/ أبويا جايب العلاج وأنا إللى أشتريته وأداكى فلوس لحقتي تخلصيها فى كام ساعة
الأم/ بتحاسب مين يا أبن 🐕 أنت ،،،،المحل دة بنتى ليها فيه دة خير جوزها ثم دفعتة فى الأرض
أتى عصام وشاف هذة السيدة دفعت أبنه لأرض وأمبارح عورته ومش حاسبها