بقلم يارا عبدالسلام
ويحيي الكبير راح المصنع وبدأ يشوف المكن وبتطمن على العمال لو محتاجين حاجه ..
كان صابر واقف مع حسن
_عامل اي يا عم صابر
_بخير يا ابني
يحيي بص للشخص اللي واقف معاه واتصدم لما شافه..
_حسن!!!
حسن اتصدم لما شافه شاف صاحبه اللي خدعه وخانه زمان قدامه وهوا شغال عنده للدرجادي الدنيا ضيقه كدا ..
_يحيي…
يحيي قرب عليه وقاله
_حسن انت جيت هنا امتى وبتشتغل هنا من امتى
_انا انا النهارده اول يوم ليا..
_طيب شغلك اللي في مصر
حسن خفض رأسه في الأرض ومتكلمش..
_لو سمحت يا يحيي مش عاوز اتكلم في اللي فات..
يحيي عذره وهوا عارف اساسا كل اللي حصله لانه كان متابع أخباره دائما هوا لسه بيعتبره صاحبه بس ممكن الزمن يرجعهم تاني …
_سيبتهم لي يا حسن !؟
لقى نفسه بيسألوا السؤال دا من غير تفكير عنده فضول يعرف لي ساب فريده وولاده لي …
حسن بصله بحزن والم
_انا اسف يا يحيي اسف على كل اللي عملته فيك زمان عن خيانتي وعن حبي لنفسي وعن كل حاجه عملتها وعن الشغل اللي خدته منك وعن فريده كمان انا كان كل همى انى اخد الحاجه اللي انت بتحبها وبس ومكنش هاممني انا بحبها ولا لا بس فريده لو كانت معاك كان هيبقى الوضع احسن دلوقتي انا بجد اسف جرحتك وجرحتها وولادي جرحتهم وابني اتولد بعيد عني واول لما شافني افتكرني حرامي نا اسف ..
وبدأ يعيط ودي كانت أول مره يحيي يشوف حسن بيعيط فيها قرب منه وطبطب على كتفه .
_الاسف مش هيفيد بحاجه دلوقتي يا حسن اللي هيفيد بجد انك تكون فعلا اتغيرت وتعرف ترجع ولادك لحضنك وفريده تسامحك عن الجرح اللي سببتهولها..
_والله انا هعمل كدا وهبذل كل طاقتي في أنهم يسامحوني انا بجد تعبان اوووي ومراتي التانيه اللي اديتها كل حاجه خدت فلوسي وسابتني واتجوزت واحد تاني انا بجد كل لما افتكر اني سبت فريده وعيالي علشانها بستحقر نفسي اوووي ..
_بص يا حسن كلنا بنغلط بس اهم حاجه لما نفوق نعرف نصلح الغلط دا يا صاحبي اهم حاجه انك تعرف ترجعهم ليك…
حسن لما مسح دموعه سأله..
_انت عرفت كل دا منين..
_يحيي ابتسم وقاله اصل انا ويحيي ابنك شركا هنا وغير كدا أن شقتي قدامهم من ساعت مارجعوا وانت سبتهم ..
فارس ابنك مولود على ايدي .ويحيي اشتغل معايا وكبر نفسه بنفسه ودلوقتي في كليه هندسه ..ونور القمر بتاعتنا في تانيه ثانوى ..وغير كدا فريده اللي بتدعم ولادها دائما وحقيقي تستحق لقب الام المثاليه..
_شكرا يا يحيي انت عملت اللي انا معرفتش اعمله كسبتهم وحببتهم فيك ووقفت جنبهم وجنب يحيي انا بجد مش عارف اقولك اي .
_يحيي اللي صمم يصرف على اخواته وأمه موافقش أنها تشتغل اشتغل هوا واتكفل بمصاريفهم وفعلا كان راجل وقد المسئوليه صعب ان الواحد يلاقي طفل في سنه بيفكر كدا حقيقي ذكى وشاطر في الشغل والدراسه..
_ربنا يحميه ويحفظه ..
يحيي جاله تليفون من رقم غريب..
_الو ايوا انا ..
اي!؟
يحيي في المستشفي عامل حادثه..
حسن اول مره يحس بقبضه في قلبه وخوف مش عارف اي مصدره يحيي طلع يجري وحسن وراه حاسس ان الدنيا بتلف بيه ابنه عمل حادثه قبل ميشوفه ويسامحه..
يحيي وصل المستشفي وهوا قلبه بيدق بخوف شديد …
سال عن الأوضه اللي يحيي فيها وعرف المكان وراح جري ..
دخل الأوضه كان الدكتور بيخيطله جرح في رأسه وأيده كان فيها جبس ..
قرب منه بقلق وهوا خايف عليه وحسن كان واقف مذهول من يحيي وهيئته وأنه باين عليه فعلا أنه راجل وملو هدومه..
_يحيي حبيبي انت كويس..
_ايوا يا عمو يحيي والله كويس انا بس ايدي انكسرت وغرزتين في دماغي متقلقش ابنك بطل ..
_بطل اي بس بلا نيله انت متشلفت خالص انا قلبي هيقف من الخضه
_اهم حاجه متقولش لماما اصلك عارفها ممكن تقع من طولها فيها وهتفضل تعيط جنبي .
_لا طبعا مش هقولها دلوقتي..لما تروح انت اللي هتقولها علشان تتعامل..
وضحكوا سوا ..
كل دا وحسن واقف واتمني انوا يكون مكان يحيي وابنه يكون بيحبه كدا بس اساسا ابنه كارهه..
يحيي ابنه بص عليه واتصدم لما شافه والدموع اتجمعت في عينيه وكل الذكريات اتجمعت في دماغه ..
ونطق كلمه واحده
_بابا….
حسن بصله بدموع وكسره ووجع..
يحيي ضغط على أيده بعصبيه وضغط على سنانه واعصابه أنشدت واحمر..
وتتكلم بعصبيه وصوت مبوح وعينيه حمرا .
_انت اي الي جابك هنا جيت لى جاي لي جاي بعد عشر سنين تعمل اي وبتعمل اي هنا انا مش عاوزك …
حسن الدموع اتجمعت في عينيه وبصله..
_يا ابني..
_انا مش ابنك متنطقهاش..انا مش ابنك ولا انت ابويا انت رميتنا زمان وجاي تقولى يا ابني ابنك اي انت تعرف معنى الكلمه دي اصلا …اللى يعرف معناها فعلا واقف قدامك اهو هوا دا حقيقي اللي يعرف معناها عرفت مين يستحقها ..
اتفضل روح مكان ما جيت ومتتعشمش أننا ممكن تسامحك لانى عمري مهسامحك يا بابا عمري…اتفضل..
يحيي زعق وسكته..
_يحيي متنساش ان دا ابوك ربنا قالك تعلي صوتك على ابوك فين القران اللي انت حافظه .
_وهوا فين من كل دا هوا فين هوا مين اصلا انت مش زيه لي قولى هوا كل الابهات بترمي عيالها كدا معتقدش يا عمو يحيي ..
يحيي سكت مش عارف يرد كلامه كلو صح ..
حسن خد بعضه ومشي بكل هدوء ..
ويحيي حس انو زودها معاه وبعد لوم يحي ليه عرف أنه غلطان وأنه مهما عمل راجع وندمان كان لازم عالاقل يسمعه …!؟
يحيي خلص .وروح البيت وجت المواجهه التانيه بينه وبين أمه اللي هتشوفه بالوضع دا وغير كدا هيقولها ازاي أنه شاف أبوه بعد عشر سنين …وأنه راجع وعاوزهم يسامحوووه…
يحيي دخل البيت ..
فريده كانت في صراع غريب بينها وبين نفسها بتفكر فاللي حصل وحسن وكلامه وكل حاجه وبتفكر برضو هتقول ليحيي ازاي .!؟؟
اول لما يحيي دخل عليها قامت مخضوضه وفضلت تعيط لما شافته كدا ..
وهوا فضل يهدي فيها لحد ما هديت ..
_انت كويس اي اللي حصلك دا ومن اي فيك حاجه تانيه يا عمري من اي دا كله ..
_يا ست الكل انا كويس والله بس حادثه خفيفه كدا
_ازاي
_,كنت بقالي يومين مطبق ومش شايف قدامي ركبت العربيه وعيني زغللت فدخلت في الرصيف وانا مش واخد بالي بس..
_طيب بص بقى مفيش حكايه تطبق دي تاني ولما تلاقي نفسك تعبان مش قادر تسوق تعالى مواصلات الا مش هخرجك من البيت خالص
_لا وعلى اي انتي تؤمري يا ست الكل ..
_تسلملي يا عمري ..
_انا هدخل اغير علشان ريحتي كلها بنج ..
_ماشي وانا هحضرلك الغدا ..
_ماشي..
فريده دخلت تحضر الغدا وهي بتفكر هتقوله ازاي .
وهوا كذالك كانت بيلبس وبيفكر هيقولها ازاي ….
….
عند حسن ..
بعد لما خرج من المستشفى..
حس بتعب وان عياله مستحيل يتقبلوه وحس أن الدنيا بتلف بيه..
ووصل المكان اللي عايش فيه ..
وقعد على القهوه وطلب شاي..
وكان قاعد باصص في الفراغ وتعبان ..
وفجاه سمع التليفزيون بيعرض اخبار عن جر*يمه ق*تل في القاهره في الحي اللي كان عايش فيه والفضول خلاه يبص واتصدم من اللي شافه..!؟
_معقول ….
#الفصل_١٢
الفصل الثاني عشر
عند حسن ..
بعد لما خرج من المستشفى..
حس بتعب وان عياله مستحيل يتقبلوه وحس أن الدنيا بتلف بيه..
ووصل المكان اللي عايش فيه ..
وقعد على القهوه وطلب شاي..
وكان قاعد باصص في الفراغ وتعبان ..
وفجاه سمع التليفزيون بيعرض اخبار عن جريمه قتل في القاهره في الحي اللي كان عايش فيه والفضول خلاه يبص واتصدم من اللي شافه..!؟
_معقول ….
وقرا الخبر..
واتأكد أن زوجته السابقه هى اللي اتقتلت(احلام)
بقى مصدوم وعرف أن زوجها اللي قتلها ودخل السجن بس لسه موصلوش لتفاصيل..
حسن حس أنه في دوامه كل الاحداث اللي حواليه ضده هوا مصدوم من نفسه ومصدوم من اللي حصل ..
اتقتلت لي وبنته فين اللي لحد دلوقتي ميعرفش عنها حاجه ولاده كلهم ميعرفش عنهم حاجه المفروض أنه عنده اربعه لكن مفيش حد فيهم متقبله هوا اللي عمل فيهم وفي نفسه كدا هوا السبب هوا اللي غدر بيهم وبنفسه..وسلم نفسه لواحده دلوقتي ماتت لسبب مجهول ميعرفش اي السبب بس اكيد سبب متعلق بالفلوس هوا عرف انها تعمل اي حاجه علشان الفلوس لكن جوزها اللى اتجوزته مش غلبان زيه وهيسيبها ..
وقرر في نفسه أنه يحاول يرجع ولاده تاني لحضنه ويرجع فريده اللى لحد دلوقتي متجوزتش وعايشه انها تربي ولاده وفعلا ربتهم احسن تربيه…
في بيت فريده …
مكنتش عارفه هتقول ليحيي ازاي ان أبوه جه هنا وهوا مش عارف يقولها ازاي أنه جاله في المستشفي..
فريده قعدت جنبه والدموع على خدها وهوا بيهديها..
يحيي بالنسبه ليها مش ابنها بس لا دا روحها وعيونها اللي بتشوف بيها وحياتها كلها وسندها ومتستحملش عليه الهوا وكونه أنه يعمل حادثه دي حاجه تخليها تعمل كدا واكتر .
_والله يا ماما انا بقيت كويس والحمد لله جت سليمه متخافيش وامسحى دموعك انتى عارفه انها غاليه عليا ومستحملش أشوفها…
_قلبي واجعنى يا ابني حط نفسك مكانى انت مش عارف انت بالنسبه ليا اي انت سندي وضهري وحياتي كلها
قرب منها وباس أيدها ورأسها
_انا عارف كل دا بس انتي عارفه أن بفضل دعواتك أنه نجانى انا شوفت الموت بعنيا بس كان في حاجب بيني وبينه وشوفتك انتى …ارجوكي متعيطيش انا مقدرش اشوف دموعك انتى عارفه …وكمان انا كنت عاوز اقولك على حاجه..
_اي يا حبيبي
_بابا جالى المستشفي
_اي..جالك ازاي وعرف ازاي اصلا
_تقريبا كدا بيشتغل عندنا في المصنع وعمو يحيي شافه وعرف منه فجالى..
_اه هوا برضو جه هنا
_وقالك اي
_عاوز يرجع بعد عشر سنين بعد وفراق عاوز يرجع ويرجعكوا
_لا طبعا انا مش موافق انا عمري مهسامحه دا سابنا في عز محنا محتاجينه سابنا واحنا اطفال انا عمري مسامحه..
_متقولش كدا يا يحيي عيونك يا حبيبي بتقول كلام غير دا مهما كدا دا ابوك والاب مفيش بعده غالى مهما كان مين الشخص ومدي المساعدات والحنيه اللي ادهالك بس مفيش اغلى من الاب وكلنا بنى ادمين وبنغلط
يحيي بصلها بذهول عاوز يقولها انتى ازاي طيبه كدا وبتسامحي بعد كل اللى حصل دا
_انا مش هقدر تسامحه انتى اكتر واحده عارفه احنا عيشنا ازاي انا وانتى كنا بننام من غير عشا علشان نجيب اكل لفارس علشان نحوش مصاريف المدرسه والدروس انتي متخيله أننا يكون لينا اب وكان حاله متيسر ونعيش عيشة الفقراء ونعيش فقرا ونبدا من الصفر ومنلاقيش حتى لقمه ..
في الاخر جايه تقولى كلنا بنغلط..
اللي بيغلط بيعرف غلطه بعد يوم اتنين شهر سنه حتى …لكن دا قعد عشر سنين ميعرفش عننا حاجه كان فين كل دا قوليلي…
فريده دموعها نزلت وخدت يحيي في حضنها للاسف هى مش عارفه ترد لأن كلامه صح وعارفه كم المعاناة اللي يحيي عاشها …
_انا اسفه يا حبيبي اللي انت شايفه اعمله بس هقولك حاجه واحده دا ابوك والاب مهما عمل ميتعوضش انت فاهمني انا عارفه انك بتحبه بس زعلان منه على نفسك وعلى اللي حصلك ..
_انا عارف انك اكتر واحده فهمانى وانى مليش غيرك بس صدقيني مش هقدر اسامحه يا امي لازم اخد وقتي دول عشر. سنين..
*الله الله انتو هنا قاعدين في حضن بعض وانا جايه على رجلى انا والمسكينه..
انت مجتش تاخدنا لي ياض ولا انت حليت القاعده في حضن امك .
فريده بصتلها وقالت:كذا مره اقولك ماتحكميش على حد من غير متديله عذره واللي في دماغك في دماغك..
_ودا عذره اي يعني
يحيي:هوا انتى عاميه مش شايفه اني دماغى ملفوفه ومتخيط
نور جريت عليه بلهفه ..
يحيي بالنسبه ليها مش اخ بس دا ابوها كمان ..
_مالك يا يحيي يا حبيبي اي وجعك واي حصلك أن شاء الله كنت انا وأنت لا اي حصلك مالك ..
وعيطت..
_يا بنتي هوا انا اسكت امك تفتحى انتى متقلقيش يا حبيبتي انا كويس
اسف اني مجتش اخدكوا بس للاسف عملت حادثه ..اعتذري لآليا بالنيابه عني..
_دى لو عرفت اصلا هتقلبها نواح ..
_لي؟
_ها لا لا مش قصدي قصدي انها هتزعل يعني ..
_اااااه منا عارف
_يشيخ عارف
_امال يبنتي نص المنطقه اصلا بتجري ورايا بس انا اللي كاريزما في نفسي وتقيل
_اه منا عارفه بأمارة النحنحه اللي بتكلم بيها آليا
_مهوا انا كنت لسه هقولك الا بعض الصالحين
_وآليا من الصالحين
_دي هي الريس بتاعهم
_طيب هتصل بيها اقولها الكلام دا
يحيي مسكها من ياقة القميص
_اياكي احسن اعلقك هنا
_وعامل نفسك تعبان وامك بتعملك شربه
_انا فيتنيس يا به مش اي حد
_اه مهو واضح بعضلاتك اللي هتقفل علينا المكان دي..
_مش عاجبك..
فارس جه ..
_ماما انا جعان..
يحيي_اهلا بالبيه اللي عاوز عجله ومتوسط عند الكبير
_امال يا ابني انا مهم برضو..
_طيب مفيش عجله الا لما تنجح وتطلع الاول السنه دي ومش هتنازل عن الاول
_طيب وانا اعملها ازاي دي
_انا مالى اتشقلب اللي عاوز حاجه لازم يتعبلها خليك قد التحدي واطلع الاول
_حاضر وانا قدها ومش هتنازل
_رايح فين
_رايح اذاكر لازم اطلع الاول وتيجي العجله
_جدع بس اتغدا الاول علشان تعرف تذاكر
_حاضر..
وجلسوا في جو عائلى لطيف متناسيين كل احداث اليوم المنهكه وكل ما حدث وجاء الليل منتظرين يوم جديد ملئ بالاحداث..
في مكان ما …
مجهول:الواد حصله اي
_اتعور في دماغه واتخيط
_اغبيا كان لازم تبقى حدثه أعنف شويه امال هخلص من يحيي ازاي لازم انتقم منه في حاجه بيحبها
_انتي ناويه على اي
_ناويه اخلص من اخويا…!!؟؟
عدت السنين ورجعت اقوى ولازم احرق دمه زي ما طرد امى من البلد هنا وحرمني من انى اعيش هنا وخد ورثي وفلوسي ماماا حكتلي على كل حاجه..!…
جيالك يا يحيي!؟