رواية مغامرات عائليه الفصل الثامن والعشرون 28 ج 2 بقلم همسه كاتبه
اوس : انا لازم اسافر انجلترا بكرا الصبح
حبيبة بصدمة : ايييه ؟!
اوس : عندي مشكلة في الشغل و انتي عارفة زياد ما يقدرش يسافر عشان فرحه
حبيبة : طب ما حازم موجود
اوس : ما المشكلة حصلت معاه
حبيبة : هو مش كان واخد اجازة و راح يشوف مراته ؟!
اوس : اممم .. بس امبارح تعب و دخل المستشفى و بنفس الليلة حصل خلل في الشغل
حبيبة بصدمة : تعب ؟! طب هو عامل ايه دلوقتي ؟
اوس : بقى احسن الحمدلله .. بس لازم اروح اطمن عليه و اشوف ايه الي حصل
حبيبة : طيب و ليلة تعرف ؟
اوس : لا .. و انتي اوعي تقوليلها حاجة
حبيبة بقلق : اوس .. خودني معاك .. مش هستحمل تبعد عني تاني
اوس بهدوء : هروح يوم واحد بس و هرجع على طول .. هبقى مطمن اكتر و انتي هنا خصوصا ان كنان لسا صغير و مش هيستحمل السفر
حبيبة بضيق : انا هاخد بالي منه كويس بس ما تسيبنيش هنا
اوس : منا كدة كدة مضطر اسيبك و اروح الشغل .. الافضل انك تبقى هنا
جلست على السرير و بدأت تهز ساقها بتوتر و عدم رضا
اوس : انتي قولتي مش هتزعلي
حبيبة : ما طبيعي ازعل يا اوس طالما هتسيبني هنا لوحدي و تروح
جلس بجانبها و قال بهدوء : طب مش تقدري ان صاحبي تعبان و لازم ابقى جنبه ؟
حبيبة : ربنا يشفيه .. هو ايه الي حصله بالزبط ؟
اوس : مراته قالت حالة تسمم .. بس دلوقتي بقى احسن
حبيبة : الحمدلله .. يعني انت حاسس ان الي حصله مش صدفة ؟
اوس : الظاهر كدة .. هتاكد الاول و بعدين اقولك
حبيبة : ماشي بس لازم تكلمني و تطمني عليك كل شوية
اوس : حاضر .. اي اوامر تانية ؟
حبيبة : تروح و ترجع بسرعة و مش هقبل اعذار ابدا .. انا بحذرك اهو
اوس بابتسامة : حاضر يا حبيبتي .. لو حصل اي حاجة بغيابي تكلميني على طول …و اوعي حد يتكلم بالموضوع ده قدام ليلة
حبيبة : ما تقلقش عليها … هيا اصلا مش مركزة مع حد غير مصطفى و على طول تلاقيهم قاعدين في ركن لوحدهم
اوس بضحكة : اهو جيه اليوم الي اشوف مصطفى الرخم مرتبط و عايش جو العشاق ده
حبيبة : ده انت قدوته … بس الفرق الوحيد ان مصطفى ملهوش بالزنق
اوس : ما طبيعي دي ضيفة لو حد شافهم هتقوم القيامة
حبيبة : يعني مش عشان صغيرين
اوس بغمزة : صغيرين ايه ؟! ده انتي اتزنقتي من و انتي باللفة
حبيبة بغيظ : اه يا سافل … متحر..ش بالاطفال
اوس : هيا طفلة وحدة بس الي سرقت قلبي .. و بعدين انا كنت صغير اش فهمني يعني
حبيبة بضحك : انت اصلا عملت سكيب لمرحلة الطفولة
اوس : و انتي لسا ما خرجتيش منها اصلا .. يلا ع النوم يا شاطرة و راكي مدرسة الصبح
حبيبة بمشاكسة : طب يلا يا بابي نام جنبي و احكيلي حدوتة
****************************
في صباح اليوم التالي
بعد ان ودعت اوس دلفت للمطبخ وجدت دينا منهمكة في تحضير الطعام
حبيبة : بتعملي ايه يا دينا ؟!
دينا بفزع : اعااا .. يخربيتك خضيتني
حبيبة : ايه الي مصحيكي بدري كدة ؟
دينا بابتسامة : انا ما نمتش اصلا .. قولت لنفسي لازم ادلع ختيبي و اعمله فطار تحفة طالما نايم عندنا
حبيبة بسخرية : يا نحنوحة … و الله ما بلومش لارا ع عملته .. ده انتي تستاهلي ضرب الجزمة
دينا : اتلمي يا ولية في ايه ع الصبح ؟!
حبيبة بضيق : مفيش .. هروح اطمن على كنان
دينا : مالك يا بت مكلضمة وشك كدة ليه ؟
حبيبة : اوس خرج من شوية و هيسافر انجلترا
دينا : عارفة .. يزن قالي امبارح .. بس ما تقلقيش مش هيقعد كتير .. هيرجع مع حازم و يمنى
حبيبة : يمنى ؟ على كدة هيا موجودة هناك كمان
دينا بتحذير : بت .. اتلمي و ما تعمليش حوار الست محترمة جدا
حبيبة : حلوة ؟
دينا : حلوة ايه ؟ اقل وصف ليها انها تحفة فنية ..تحسيها خارجة من مسلسل تركي
حبيبة : امممم واضح ان ليلة واخدة من جمالها كتير
دينا : مامتها احلى صدقيني
دلفت البنات سويا
حلا بغضب : انا زهقت من العيشة دي .. جدو كل شوية يزود العقوبة فاكرني الشغالة الفلبينية بتاعته
كارما : ما احنا كلنا بنشتغل جات عليكي يعني ؟!
حلا : اخرسي يا خاينة .. انا هموت و اعلم على قفاكي الحلو ده
كارما بخوف : ما قصديش حاجة و الله
نظرت دينا الى لارا التي اتجهت لغسل الاطباق بصمت
دينا : حضرتك بتعملي ايه ؟!
لارا ببرود : بشتغل
دينا : انا لسا مخلتصش الفطار .. استني و تغسليهم مرة واحدة اسهل
لارا : انا عارفة شغلي كويس مش محتاجة نصايحك
دينا بحدة : طب اتكلمي عدل
حلا : دينا .. ما تنسيش القرار بتاعنا
دينا : ماشي .. خودي دول وديهم و ارجعي خودي الباقي
حلا بجوع : الله … ريحة البيض تفتح النفس
كارما : وسعي يا لارا هساعدك
لارا ببرود : اتفضلي
ليلة : طب انا اعمل ايه ؟!
دينا : انتي اعملي الشاي و اللبن لابو عضلات بتاعك
ليلة بضحكة : مصطفى بيشرب لبن الصبح ؟
دينا : اممم من يوما علقتيه بيكي بقى عايز يعمل كل حاجة صح بالدنيا … سبحان الله
كارما : يا بنات .. هو انا ممكن اسأل سؤال ؟
حبيبة : اه طبعا
كارما و هي تغسل الاطباق : هو في حب بيبقى من نظرة بس ؟ .. يعني من غير كلام و لا معرفة .. بس مجرد نظرة كدة
مرت لحظات من الصمت .. وضعت الطبق و استدارت وجدت جميع البنات ينظرن لها باستغراب شديد
كارما بتوتر : في ايه ؟!
حبيبة : ايه لزوم السؤال ده يا كرملة ؟ هو في حاجة ؟
كارما : لااا .. مفيش حاجة .. بس يعني شوفت فيلم امبارح قبل ما انام و كان بيتكلم على الموضوع ده فقولت اسألكم
دينا بشك : متأكدة ؟
كارما بخوف : اه
ليلة بضحك : مالكم عاملين كدة ليه ؟ هيا سألت سؤال مش جر..يمة على فكرة
حلا : بت .. في نظرات متبادلة و لا ايه النظام ؟
كارما : انتي بتقولي ايه ..اتلمي يا حلا عيب كدة
لارا : ما تركزيش معاهم يا كارما .. دول شايفين الحب حلال ليهم هما بس
حلا : ما تخرسي يا ام لسان و نص
ليلة : طب محدش جاوب على السؤال .. هو في كدة بجد ؟
حبيبة : ممكن .. كل شيء وارد .. بس ما اعتقدش انه هيكون حب مية بالمية .. ع الاغلب اعجاب
حلا : ما بلاش هطل .. الحب عمره ما كان من نظرة .. ازاي هتحبي شخص من غير ما تعرفيه و تعرفي صفاته و اسلوبه و تفكيره و من الكلام ده
دينا : على فكرة .. الحب بيتولد معانا من ساعة نخرج من رحم امهاتنا .. اروحنا بتتلاقى بعالم تاني و بتتعلق ببعضها عشان كدة اول ما تلتقي بالشخص المناسب هتحسي انك عارفاه و في مشاعر جواكي مش فاهماها
حلا : اهو ده الكلام الي ما بيتفهمش منه حاجة .. كفاية فلسفة يا دينا و خليكي واقعية شوية .. اوك ممكن الواحدة تحس انها استريحت لواحد اول مرة تشوفه بس مش من اولها نقول حب .. يعني انتي مثلا حبيتي يزن اول ما شوفتيه ؟
دينا بتفكير : بصراحة لا .. كنت حاسة انه شخص كويس بس لما اتعاملت معاه اكتر حبيته و اتعلقت بيه
حلا : اهو يعني مش زي ما قولتي
كارما : و انتي يا حبيبة ايه رأيك ؟
حبيبة : معرفش .. يعني انا و اوس نعرف بعض من زمان و انا اتعلقت بيه من احنا عيال .. بس يعني بعد ما كبرت حبيته اكتر
كارما : طب و لما سابك و سافر ما حسيتيش ان حبك ليه قل ؟ او ان الي كان بينكم مش حب حقيقي ؟
حبيبة : لا طبعا .. بالعكس انا اتعلقت بيه اكتر لما سافر .. و بصراحة كلام حلا منطقي جدا .. يعني ما اعتقدش ان النظرة بتبقى حب حقيقي .. تقدري تقولي بداية الطريق للحب .. ممكن بعدها تحبي الشخص ده و ممكن لا
دينا بخبث : و عشان كدة عملو الخطوبة يا كرملتي
كارما بتفكير : اوكييي
دينا : ممكن نعرف بقى ايه السر ورا السؤال ده ع الصبح ؟
كارما بتوتر : مفيش سر و لا حاجة
حلا بمكر : طاما اتوترتي يبقى في
اقتربت دينا منها ببطىء و قالت : يلا طلعي المستخبي يا بت
كارما بخوف : وسعي كدة و الله ما في حاجة
حلا : مش علينا الحركات دي
حبيبة : انتي مالك يا حلا .. و انتي يا دينا اتلمي .. هيا حرة مش عايزة تقول براحتها
حلا : اقسم بالله يا بت لو ما نطقتي لافضحك في البيت كله و اقولهم كرملة عشقانة من ورانا
كارما : مفيش حاجة الله يحرقني ساعة ما سألت
حلا : بقولك اتكلمي يلا .. مين ده الي بينك و بينه نظرات حب و اعجاب
كارما ببكاء : ابعدي عنيييييي
اقتربت لارا و دفعت حلا بعنف
لارا بغضب : انتي بتحشري نفسك بحياتها ليه ؟! ملكيش دعوة بيها
حلا بضحكة : انتي عايزة تتضربي يا بت ؟
امسكت لارا السكينة و قالت : قربي مني و شوفي هطلع مصارينك ازاي
حلا برفعة حاجب : و الله ؟
ليلة بصراخ : بسسس … في ايييييه ؟ ما تتلمو احنا جايين نشتغل مش نتخانق
حلا : وطي صوتك لاحسن اجيبك من ودانك الحلوة دي
دينا : انتي يا بت عايزة تضربي اي حد و خلاص ؟! كفاية اتلمي مش عايزين نعرف .. بس مصيرك تقوليلي يا كارما
كارما : مستحيل .. انتي الوحيدة الي مش بقولك اسراري عشان عارفاكي هتروحي تقولي لزياد كل حاجة
دينا : انا خايفة على مصلحتك يا بت .. خصوصا لو عندك اصدقاء سوء يعني
لارا بغيظ : دينا اخرسي مش مكفيكي الي حصلك ؟!
دينا برفعة حاجب : حد وجهلك كلام يا بت ؟!
دلفت سحر و قالت : انتو بتعملو ايه كل ده ؟! فين الاكل ؟
دينا : اهو يا طنط جاهز .. ليلة روحي ودي الشاي .. انا هطلع اصحي الولاد
سحر : طب بسرعة
بعد وقت قصير اجتمع كل الافراد على طاولة الطعام
تميم : ايه عقوبة النهاردة يا جدي ؟
عبدالله : هتجهزو انتو لسبوع كنان
فارس : و مالو .. اي حاجة بعيد عن التنضيف
عدنان : امته هيرجع اوس يا حبيبة ؟
حبيبة : قالي هيكون هنا بكرا
ليلة : على كدة مامي و بابي هيجو معاه ؟
حبيبة بتوتر : و الله مش عارفة
سعاد : انا عزمت كل قرايبي و خالتك وفاء جاية مع عيالها بكرا
دينا : طب زيزي مش هتيجي ؟
سحر : لا طبعا ماما مش بتحب الحفلات دي
دينا : و الله وحشتني اوي .. كان زمانها هي الي بتتعاقب دلوقتي
حلا بسخرية : مش هتقدر تبعد عن توفي بتاعها خالص .. دي ما صدقت رجعتله
تميم : ربنا يخليهم لبعض و يبعدهم عننا
سحر : اتلم يا تميم دي جدتك الي بتتكلم عليها
تميم : مقولناش حاجة
التفتت غادة الى زياد الذي يأكل بصمت مريب
غادة بخفوت : زياد .. مالك يا حبيبي
زياد : مفيش بس بفكر بالشغل
غادة : مش شرط تبقى ملتزم على طول .. انت دلوقتي واخد اجازة ما تفكرش غير بفرحنا
زياد : حاضر يا حبيبتي
غادة بتوتر: زياد … افتح الموضوع دلوقتي ؟
زياد : اه .. بس اعتقد مامتك مش هتسكت
غادة : هقول الي عندي و الي يحصل يحصل
التفتت لهم و قالت بصوت واضح : جدو
عبدالله : ايوة
غادة: انا عايزة اطلب طلب يعني لو ما عندكش مانع
عبدالله : اتفضلي يا حبيبتي
غادة : احم .. يعني انا بصراحة عايزة الفرح يبقى اسلامي
خديجة : لي يا بت هو احنا كفرة ؟! ما افراحنا دايما اسلامية و مفيش اختلاط
غادة : بس في اغاني و ده حرام
حلا باندفاع : قولتلكم البت دي مش سالكة محدش رد عليا .. اهي بتدور على مشاكل من تحت الارض
غادة : حلا اسكتي و ما تدخليش
خديجة بحدة : غادة اقفلي الموضوع ده و الي عايزاه مش هيحصل
غادة : ده بدل ما تشجعيني ع الصح يماما ؟! .. الاغاني يعني ذنوب و انا عايزة ربنا يبارك في جوازتنا .. ده فرحي و يحقلي اعمل الي انا عايزاه
سحر : يا بت احنا لو عملنا كدة الناس هتاكل وشي .. ازاي فرح من غير اغاني و رقص ؟!
غادة : رضا ربنا اهم من رضا الناس يا طنط … و انا مقولتش الفرح يبقى من غير رقص .. انا بس مش عايزة موسيقى .. ممكن نستعمل الدف و نغني براحتنا
فريدة : طب و الله فكرة .. البت دي صوتها حلو اوي ممكن هيا الي تغني بفرحها
خديجة بغضب : كفاية .. مش عايزة اسمع ولا كلمة .. انا من يوما خلفتك مستنية اليوم ده بفارغ الصبر تقومي تخربيلي فرحتي عادي كدة ؟!
غادة : ما احنا ممكن نفرح من غير ما نعصي ربنا يا ماما .. المفروض حضرتك تشجعيني
فارس : زيزو ايه رأيك ؟
زياد : براحتها طبعا .. ده فرحها تعمل الي هيا عايزاه
خديجة : بس يا زياد .. مش عايزة ازعل منك انت كمان
سعاد : غادة يا حبيبتي احنا متعودين على كدة .. بكرا الناس هتقعد تتريق علينا
غادة : بس …
خديجة بحدة : اخرسي .. مش عايزة اعكنن عليكي قبل الفرح
عبدالله بحزم : بسسس .. ايه هتتخانقو قدامي ؟!
خديجة : حضرتك مش سامع البت بتقول ايه ؟! دي عايزة تفضحنا
عبدالله : سمعت .. و البنت كلامح صحيح .. ده فرحها و من حقها تعمل الي هيا عايزاه
سحر بصدمة : يعني ايه يا عمي ؟!
عبدالله : يعني الي غادة عايزاه هيحصل طالما مش حاجة غلط .. بالعكس دي هتعمل حاجة كويسة جدا … و المفروض ان حضراتكم ستات مؤمنة و بتعرفو ربنا .. يبقى لازم تشجعوها و تفرحو ان بنتكم بالزمن ده بتفكر بالطريقة دي
غادة بابتسامة : ربنا يخليك لينا يا جدو
عبدالله : ربنا يثبتك يا حبيبتي و يكتبك الاجر و الثواب
كارما : و ده هينطبق على فرح الرجالة كمان يا جدو ؟
عبدالله : لو زياد عايز كدة انا معنديش مانع
كارما برجاء : زياااد اوعا توافق عشان خاطري
تميم بضحك : و انتي مالك ؟! ده فرح رجالة يا بت
كارما : اوك بس انا بقالي كتير بتفشخر قدام صحابي البنات باخويا و فرحه الي هيتعمل .. مش عايزة اتخزوق و يفضحوني
غادة : انا مش فاهمة ليه كلام الناس مهم بحياتكم كدة ؟!
دينا : سبحاان مغير الاحوال .. الله يرحم سنينك يا بت
غادة بضيق : دينا اتلمي و اتلهي بخطيبك
دينا : اكتر من كدة ؟! ده شوية و هياكلني
بدأ يزن يكح بخنقة .. و ناولته دينا كأس الماء بسرعة و اخذت تخبط على ظهره بقوة
دينا : اسفة اسفة و الله مش قصدي
حلا : كام مرة قولنا ما نتكلمش على حد و هو بياكل .. افرضي طب ساكت دلوقتي هتعملي ايه ؟!
دينا : بعد الشر اتلمي يا طفسة .. اشرب يا حبيبي
يزن : كفاية .. هتخنقتي اكتر
دينا : الحق عليا بساعدك ؟!
يزن : ايدك تقيلة يا بت هتطلعيلي الروح
دينا : بعد الشر عليك
تميم : هما دول هيتجوزو امته يا جدي ؟
عبدالله : لسا ما اتكلمتش مع الحج محمود
يزن : هو مستعجل اكتر مني .. و كل يوم بيسألني على الموضوع ده
عبدالله : و الله يا ابني انت شايف في فرحين قدامنا .. بعد فرح فارس نقعد و نحدد موعد لفرحكم
خولة : احنا مش مستعجلين ع الجواز .. سنة كمان مش هتأثر
يزن بصدمة : سنة يا طنط ؟!
خولة : اه .. دينا لسا ما خلصتش جامعة و مفيش جواز قبل التخرج
عبدالله : قولنا نتكلم بالموضوع ده بعدين يا خولة .. خصلو فطار و كل واحد يشوف شغله
سحر : مش عايزة اشوف حد من الاولاد في المطبخ .. عندنا شغل كتير و مش ناقصين دلعكم
فارس : احسن .. نقعد قدام التلفزيون بقا و نشتغل براحتنا
***********************
دلف مصطفى الى اوضة المكتب بحذر شديد
عبدالله : كل ده على ما تلملي اخبارهم يا مصطفى ؟!
مصطفى : اعمل ايه ما هما الي بقو خايفين مني و مش بيقولو حاجة قدامي عشان عارفين اني هقولك
عبدالله : ها اخلص … ايه الي حصل ؟
مصطفى : مش نتفق الاول ؟!
عبدالله بخبث : كارما بتقولي كل حاجة من غير مقابل .. اندهلها ؟
مصطفى بضحك : قديمة .. البت اتقفشت و اعترفت بكل حاجة
عبدالله : ايه ؟! و عملولها حاجة ؟
مصطفى : لا طبعا .. زيزو ما بيسمحش بكدة ابدا
عبدالله : و اشمعنا انت الي فرموك ؟!
مصطفى : بتعايرني يا بيدو ؟!
عبدالله : اخلص ياض ايه الي حصل ؟!
مصطفى: الي حصل حاجة ما بتتقالش و الله .. البت لارا عملت مصيبة
عبدالله باهتمام : عملت ايه ؟
اقترب مصطفى من عبدالله اكثر و اخبره بكل ما حدث
عبدالله بصدمة : هيا حصلت ؟!!
مصطفى : انا تعبت و انا اتحايل ع البت ليلة عشان تقولي و اول ما عرفت جيتلك جري
عبدالله بغضب : روح اندهلي لارا بسرعة
مصطفى بخوف : ابوس ايدك هيفرموني و الله
عبدالله : قولت اندهلها
بعد دقائق دلفت لارا و اغلقت الباب خلفها
لارا : حضرتك ندهتلي يا جدو ؟
عبدالله بحدة : ايه السبب الي يخليكي تعملي كدة ؟
لارا بتوتر : عملت ايه ؟
عبدالله : كنت عارف من البداية انك عملتي حاجة غلط … بس ما توقعتش انك هتوصلي للمرحلة دي .. ايه الي يخلي بنت بسنك تعمل في بنت عمها كدة ؟ دلوقتي حالا هتقولي كل حاجة
لارا : انا معملتش حاجة .. هيا الي بدأت
عبدالله : عملت ايه ؟؟ اتريقت عليكي ؟ ده سبب كافي عشان تأذيها كدة ؟
لارا بغصة : عارفة اني غلطت .. بس ..
عبدالله بغضب : بس ايه ؟! فهميني انتي عايزة ايه بالزبط ؟! ليه بتأذي بنات عمك بالشكل ده ؟ مش احنا اتكلمنا و قولتي هتبقي احسن .. ايه الي حصلك ؟
لارا ببكاء : انا عملت كدة من حرقة قلبي .. كلهم بيتريقو عليا و بيدايقوني و محدش بيدافع عني خالص
عبدالله : و انا روحت فين من كل ده ؟! ليه ما بتيجي تقوليلي و انا اعاقبهم زي كل مرة
لارا : حضرتك عارف كل حاجة و مش بتعملهم حاجة .. لو انا دايقت اي وحدة بتعاقب على طول من غير ما حد يشتكيلك .. بس انا اتبهدلت و اتشتمت و اتضربت كمان و حضرتك ما عملتش حاجة عشاني
عبدالله بصدمة : يا سلام ؟ يعني ايه ؟ انا ظلمتك ؟
لارا بانكسار : حضرتك مش شايف حد غير كارما و حبيبة .. دول الملايكة بالنسبالك .. ما بتعتبرنيش حفيدتك زيهم و كلهم بيعاملوني على اني شيطانة … محدش شايفني و لا حاسس بيا .. الي عملته رد فعل على الي عملوه معايا
عبدالله : رد فعل قولتيلي ؟ الحق مش عليكي … انا ليا كلام تاني مع الي خلفوكي هما الي لازم يتعاقبو .. اطلعي برا
لارا : اهو اول ما انا اغلط الدنيا كلها بتقوم عليا .. لو واحدة تانية الي غلطت مش ….
عبدالله بحدة : قولتلك اطلعي برا من غير نقاش
انتفضت برعب و خرجت بسرعة .. مجرد ان اغلقت الباب بدأت تبكي بحرقة
كارما بشهقة : لارا .. مالك في ايه ؟!
ارتمت في حضنها و ازداد بكائها اكثر
كارما : اهدي يا حبيبتي اهدي .. قوليلي ايه الي حصل
لارا : انا بكرهكم .. بكره العيلة دي كلها .. يا رب خودني عشان ارتاح
كارما : ما تقوليش كدة يا لارا .. اهدي بس و فهميني مالك ؟
لارا ببكاء و شهقات : لما .. انا .. اغلط .. لازم اتبهدل .. بس اي واحدة تانية تغلط محدش بيحرك ساكن
كارما بصدمة : جدو زعقلك ؟
لارا : اه .. منا الحيطة المايلة في البيت ده .. كلكم بتكرهوني .. كلكم
دفعتها و ذهبت تركض باتجاه الحديقة الخلفية
صعدت كارما بسرعة للطابق العلوي حيث يجلس الشباب
كارما : دينا .. ممكن نتكلم شوية ؟
دينا : بعدين .. مش شايفاني بشتغل
كان السباب جميعهم يجلسون على شكل دائرة و امامهم جبال من توزيعات السبوع يقومون بتعبئتها في اكياس زرقاء صغيرة
كارما : خمس دقايق بس يا دينا عشان خاطري
دينا : امري لله يا ستي .. هاتي ايديك
مدت كارما يدها و ساعدتها على الوقوف
حبيبة : انا مش فاهمة ليه كل ده ؟ منا طلبت حاجة السبوع كلها اونلاين
حلا و هي تأكل : جدك عايز الحاجة تبقى كتيرة و قد المقام
غادة : طب بطلي اكل ابوس ايدك ما سبتيش حاجة للناس الي هتيجي
حلا : ما تقلقيش خير ربنا كتير اهو .. اااه معدتي بتوجعني اوي
ليلة : ما انتي خلصتي على التوفي كلها جاتك القرف
زياد بملل : ما بيردش برضو
حبيبة بقلق : انا بدأت اقلق بجد .. المفروض وصل من ساعتين
زياد : معرفش ده قافل موبايله
حبيبة بخوف : كلم .. كلم حازم او حد من الفرع الي هناك و اسأله
زياد : حاضر اهدي انتي بس
قام زياد و اتجه الى البلكونة لاجراء المكالمة
حلا : ما براحة يا بت مش هيسيبكم و يهرب
حبيبة بقلق : هو وعدني هيكلمني كل شوية و يطمني
تميم : تلاقيه مشغول شوية .. ما تخافيش اكيد هيكلمك
اتى زياد و قال : حبيبة خودي اوس عايز يكلمك
اخذت الهاتف بسرعة و ردت
حبيبة : اوس .. انت فين ؟ ليه مش بترد على الموبايل ؟
اوس : اسف يا حبيبتي و الله نسيت الموبايل في العربية .. انا لسا واصل المكتب حالا
حبيبة : طب انت كويس ؟
اوس : اه يا روحي ما تقلقيش .. اول ما اخلص هرجعلك على طول
حبيبة : ماشي … اه صحيح حازم عامل ايه دلوقتي ؟
نظر لها زياد و عيناه تبرق
حبيبة بتوتر : قصدي ان ليلة يعني بتسأل عليه
اوس بابتسامة : هو كويس و بيسلم عليها .. بكرا هييجي معايا هو و مراته
حبيبة : اوك توصلو بالسلامة .. بس ما تقفلش موبايلك تاني
اوس : حاضر يا حبيبتي .. خودي بالك من نفسك و من كنان .. انا هقفل دلوقتي و هكلمك اول ما اخلص
حبيبة : ماشي يا حبيبي
اوس : بحبك
حبيبة بابتسامة : و انا كمان
انهت المكالمة و اعطت الهاتف لزياد
حلا بقرف : كمية تلزيق تسد النفس اقسم بالله
فارس : محن متجوزين .. ربنا يوعدنا يا رب
حلا : اقسم بالله لو سمعتك بتقول الكلام الزبالة ده هديهالك بوشك
فارس : ليه كدة ده انا محترم جدااا
******************
اتجهت دينا للحديقة الخلفية حيث تجلس لارا … جلست بجانبها بهدوء
دينا : ايه الدموع دي ؟ ده انا كنت فاكراكي جبلة ما بتحسيش بحاجة
لارا : اخفي من وشي يا دينا مش ناقصاكي
دينا : براحة يختي انا جاية اواسيكي
لارا : مش عايزة اسمع نصايحك .. قومي من هنا
دينا : نتكلم جد شوية ؟
لارا : لا .. خلي الصمت العقابي شغال اهو ارتحت من قرفكم
دينا بذهول : يااااه ده انتي عارفة كل حاجة اهو
لارا بغضب : دينا قومي من هنا .. اقولك .. خليكي انا هقوم
امسكتها دينا من معمصها و قالت : اقعدي .. خلينا نتفاهم الاول
لارا : قصدك تسمعيني محاضرات .. انا مش عايزة اسمع شكرا .. و لو عايزة تعايريني برضو مش عايزة اسمع………… يتبع