رواية انعدام ثقه الفصل الخامس 5 بقلم رنا سليمان
_ريم انا عارفه ان نور بتضغط عليكي علشان دفاعك عن كارم وانها شايفه ان هو القاتل وانتي شايفه انه بريئ بس
_بس ايه يا فريده عايزه تقولي انتي كمان ان هو القاتل وانه قتل صاحب عمره واللي كان بيعتبره اكتر من اخوه
_يا ريم يا حبيبتي كل الادله ضده علشان كده نور متاكده انه القاتل
_فريده انا هسالك سؤال واحد وتجاوبي بصراحه
_اسالي يا ريم
_لو اللي حصل دا كان حصل معايا انا ونور وانا اتقتلت واتهموا نور في قتلي كنتي هتصدقي انها تعمل كده
فضلت ساكته وباصه عليا.......هزيت راسي ب اه واتكلمت بهدوء
_شوفتي ساكته ازاي.........علشان بتثقي في نور ومتاكده انها مستحيل تعمل كده عمرك ما هتصدقي زي ما انا بالظبط مش مصدقه ولا هصدق........في الاول انا كنت مصدومه ومش فاهمه اللي بيحصل بس لما هديت وفكرت بالعقل قولت ان مستحيل كارم يعمل كده في صاحب عمره واللي كان اكتر من اخوه........اللي عمل كده واحد مصلحته انه يخلص من مازن وكارم مش واحد بس علشان كده قتل مازن ولبس التهمه لكارم علشان يبان هو القاتل .........ف علشان خاطري يا فريده بلاش نتكلم في الموضوع دا لاني مش هغير رايي وهعمل المستحيل علشان اخرج كارم في الاول وبعدين هوصل للقاتل الحقيقي لو حتي دا كلفني عمري
هزيت راسها ب ماشي قربت مني وطبطبت علي كتفي وبدات تتكلم بهدوء
_انا ونور عايزينك تكوني مرتاحه وحق مازن يرجع........احنا مش في حرب علشان كل واحد فينا يتخانق مع التاني ويقنعه بوجهه نظره بالعافيه كل اللي عايزينه ان الحقيقه تظهر والقاتل ياخد جزائه ودا هيحصل قريب وهنكون معاكي لحد ما دا يحصل وهنشتغل علي القضيه دي مع بعض
_ومين قالك اني عايزه اننا نشتغل سوا عليها
_مش فاهمه
_يعني دي مشكلتي انا يا فريده وانا اللي هحلها
_واحنا من امتي بنعمل كده يا ريم ما احنا كل قضيه بتيجي للمكتب بنشتغل عليها احنا التلاته
_بتيجي للمكتب يا فريده بس القضيه دي تخصني انا لوحدي ومجاتش للمكتب من الاساس
_ريم انتي مش واثقه فينا؟!
_انا مقولتش كده يا فريده......المشكله كلها اني عايزه اعرف مين السبب في موت جوزي لوحدي من غير مساعده اي حد......ارجوكي يا فريده افهميني
اتنهدت وهزيت راسها ب ماشي
_تمام يا ريم براحتك بس لو احتاجتي اي مساعده هتلاقينا جمبك
ابتسمت وهزيت راسي ب ماشي.......لحظت لون شعرها المتغير للون الاحمر .......اتكلمت ب استغراب
_ايه دا يا فريده انتي غيرتي لون شعرك امتي
_عجبك؟!
_هو حلو بس غيرتيه امتي؟
_مش ١٠ ايام تقريبا........انتي عارفه انا بحب التغيير ف قولت اغير لون شعري علشان زهقت من اللون الاسود
_جميل اوي
_انا هروح احضر الغدا مع نور علشان نتغدا واسيبك ترتاحي شويه
ابتسمتلها وانا ساكته........فضلت باصه عليها لحد ما خرجت من الاوضه .......الابتسامه اللي علي وشي بدات تروح تدريجيا........غمضت عيني وبدات اهز في راسي ب لا
_لا لا مستحيل........اكيد صدفه
قومت من علي السرير وقعدت علي المكتب ومسكت الورقه والقلم اللي عليه وبدات اخطط علي الورقه وانا بحاول الاقي طرف خيط لحل القضيه
"كارم"
كنت قاعد باصص في الارض ومش بتكلم وهو قاعد قدامي وبيبص عليا........بدا يتكلم وهو باصص عليا بهدوء
_باصص في الارض ليه يا كارم.......مش قادر تبص في عيني؟!
_مش قادر ارفع عيني في عين حضرتك.........عارف اني لو قعدت اقول لحضرتك اني مقتلتهوش مش هتصدقني
_مين قالك اني مش هصدقك........بالعكس انا اكتر واحد مصدق انك متعملش كده
رفعت راسي بصدمه وبصتله وانا مش مصدق
_يعني حضرتك مصدق اني معملتش كده
_طبعا يا كارم.........انا عارف انت مين كويس اوي........انت مكنتش صاحب مازن وبس انا طول عمري بعتبرك اكتر من انك صاحب ليه .......بعتبرك ابني يا كارم .........عارف انك متعملش كده وعارف ان مهما الخلافات كترت بينكم عمرها ما توصل للقتل........القاتل الحقيقي محدش يعرفه بس هو عايش حياته برا وانت هنا بتتعاقب علي جرايمه
_انا مش قادر افتكر اي حاجه في اليوم دا
_هتفتكر كل حاجه يا كارم انا واثق انك هتفتكر وكل حاجه هتتحل بس الموضوه ع محتاج صبر........متقلقش انا واثق ان ريم في الجلسه الجايه هتخرجك.........ريم عمرها ما مسكت قضيه غير وكسبتها والمره دي كمان هتكسبها وهتعرف القاتل الحقيقي........انا جيت انهارده علشان اقولك اني معاك وواثق انك هتخرج من هنا........متقلقش يا كارم يا ابني
_انا مش عارف اشكر حضرتك ازاي يا عمو جمال........انا ابويا نفسه كالعاده شك اني فعلا اللي قتلت مازن بس حضرتك اللي صدقتني
_لاني اعرفك اكتر من اي حد يا ابني........انا همشي دلوقتي وهحضر الجلسه ان شاء الله.......مع السلامه يا كارم
قام وقف وكان هيمشي وقفت وندهت عليه
_عمو جمال
_نعم يا كارم
قربت منه وحضنته وبدات اعيط اتكلمت من وسط دموعي
_شكرا انك صدقتني
طبطبت علي ضهري واتكلم ب ابتسامه
_مفيش اب حقيقي بيشك في ابنه يا ابني
بعدت عنه.......ابتسم ليا وخرج........مسحت دموعي وانا باصص عليه وانا مبسوط انه مصدق اني معملش كده.........انا اه مش فاكر حاجه بس هعمل كل اللي اقدر عليه علشان افتكر اللي حصل اليوم دا.......رغم خوفي اني اكون انا القاتل واخذل كل اللي وثق فيا
قاعد قدام اللابتوب وشايفها قدامي وهي ماسكه ورقه وقلم وبتخطط علي الورقه وقدامها ملف القضيه.......كنت باصص عليها ب ابتسامه ........بدات اتكلم
_اعملي كل اللي انتي عايزاه يا ريم بس مش هتقدري توصلي غير ل اللي انا عايزك توصليله........كارم مستحيل يخرج منها لو عملتي المستحيل
سمعت صوتها داخلي الشركه بخطوات سريعه........قربت مني وبدات تتكلم بعصبيه
_الحق في مصيبه
اتكلمت وانا باصص في اللابتوب من مكاني من غير ما اتحرك
_خدي نفسك الاول واتكلمي بهدوء وبعدين قولي في ايه
_اقفل الزفت دا وركز معايا بقولك في مصيبه
قربت من اللابتوب وكانت هتقفله.........مسكت ايديها بعصبيه ........قومت وقفت وبصتلها وانا لسه ماسك ايديها
_تاني مره اوعي تعملي الحركه علشان المره الجايه انا ممكن اقطع ايدك مش هتكلم بلساني
_سيب ايدي وخلينا نركز في المصيبه اللي جايه اقولك عليها
سيبت ايديها واتنهدت وبصيت قدامي
_مصيبه ايه دي
_ريم شكلها شكيت فينا
_ازاي؟!
_رفضت اننا نشتغل معاها علي القضيه وبدات تشتغل في اوضتها لوحدها من غير ما تقول لحد فينا اي حاجه........ولسه مصممه ان كارم بريئ رغم ان احنا الاتنين حاولنا نقنعها بكل الطرق ان هو القاتل
_مش مهم
_مش مهم! يعني ايه مش فاهمه
_قولتلك قبل كده وهقولها تاني انا ميهمنيش ريم عرفت اي او بتفكر ازاي لانها هتعرف اللي انا عايزها تعرفه وبس ولو عايز اخليها تتاكد مش بس تشك انك خنتيها وخنتي ثقتها فيكي هعمل دا دلوقتي حالا........فبلاش يا حلوه تجربي حظك وتدايقيني تاني علشان صدقيني هتزعلي من رد فعلي
قعدت تاني مكاني وبصيت علي اللابتوب بس ملقتهاش قاعده علي المكتب استنيت شويه بس مرجعتش
"ريم"
كنت قاعده في كافيه مستنياه يجي.......شوفته جاي من بعيد قومت وقفت وانا علي وشي ابتسامه اول ما وقف قدامي ابتسمت ومديت ايدي ليه
_ازيك يا فريد عامل اي
_ازيك يا ريم.......انا الحمدلله كويس
_انا حقيقي اسفه اني اتصلت بيك في وقت متاخر كده وجيبتك هنا بس انا كنت محتاجه منك حاجه ضروري جدا
_ولا يهمك يا ريم بس هو في ايه........انا بدات اقلق
_متقلقش هي حاجه بسيطه ان شاء الله
_قولي يا ريم
_فريد انت مش كنت قولتلي قبل كده انك تعرف واحد شغال في المطار وانه ممكن يساعدك في اي حاجه مش كده
_ايوه بس انتي محتاجاه في ايه
_كنت عايزه اسال عن حد كده اعرف هي وصلت مصر امتي بالظبط
_تمام هتصل بيه واساله بس هي مين دي اللي عايزه تسالي عليها........واحده ليها علاقه بقضيه كارم ولا اي
_لا خالص دي حاجه تانيه
_طيب عايوه تسالي عن مين
_عن فريده علي عبدالله
_ايه.......فريده؟!
.......يتبع....