رواية انعدام ثقه الفصل السادس 6 بقلم رنا سليمان
_ليه عايزه تعرفي معاد رجوع فريده من السفر.........هو انتي شاكه في حاجه ولا ايه يا ريم
_لا ابدا انا بس عايزه اتاكد من حاجه ف علشان كده عايزه اعرف
_طيب ما انتي عارفه هي رجعت امتي ولا انتي مش واثقه فيها
_اكيد طبعا واثقه فيها بس انا عايزة اتاكد من حاجه بس .........هتساعدني ولا لا يا فريد
_طبعا هساعدك يا ريم........هتصل ب عمار صاحبي وهساله
_شكرا جدا يا فريد
_العفو علي ايه يا ريم
مسك تلفونه وبدا يطلع الرقم........كان باين عليا القلق والتوتر........كنت بشبك صوابعي في بعض بتوتر وبدعي ان اللي بفكر فيه يكون غلط.......فريده مش بس صاحبتي دي اكتر من اخت ليا هي ونور انا مقدرش استغني عنهم ولا حتي افكر انهم ممكن يخونوا ثقتي فيهم........نبضات قلبي بدات تزيد وانا في عالم تاني ومش سامعه منه اي حاجه........رجعت بصيت ليه بهدوء وانا قلبي بيدق جامد........سمعته وهو بيقفل مع صاحبه
_تمام.......انا مش عارف اشكرك ازاي يا عمار الف شكر بجد........مع السلامه يا حبيبي
قفل معاه بصتله ب اهتمام وخوف في نفس الوقت اتكلمت وانا بحاول اداري خوفي وقلقي
_قالك ايه يا فريد
_قالي ان فريده وصلت مصر يوم ٢٠ في الشهر اللي فات يعني من ١٠ ايام.........ريم دا اليوم اللي اتقتل فيه مازن........اكيد اللي في دماغي مش صح يا ريم مش كده
فضلت ساكته ومردتش عليه......كنت مصدومه ومش قادره ارد ولا قادره اصدق ان فريده تكون ليها علاقه بقتل مازن او خيانته ليا........فضلت ساكته ومش بتكلم كان بيتكلم قدامي بس انا لا قادره اسمعه بيقول ايه ولا حتي قادره ارد ........اخدت شنطنتي ومشيت من غير ما ارد عليه خرجت برا الكافيه ........خبطت في كذا حد وانا ماشيه ........مكنتش قادره حتي اعتذر او ارد علي كلامهم........ركبت في عربيتي وقفلت الباب..........دموعي نزلت مني.........اشمعني انا اللي يحصل معايا كل دا.........في الاول موت مازن وبعدين اللي يتهم في قتله هو كارم اقرب الناس ليه وليا وبعدين اعرف ان مازن كان بيخوني ومع اعز اصحابي واللي احتمال تكون هي كمان ليها ايد في موته.........ليه يحصل معايا كل دا........ايه الذنب اللي عملته في حياتي علشان يكون دا عقابه.........مسحت دموعي وسوقت العربيه لحد البيت........اكيد في حاجه غلط وانا هعرف الحقيقه.........فريده عمرها ما تخوني ابدا .........مستحيل
وصلت البيت ومكنش فيه حد في البيت ولا نور ولا فريده........وصلت لحد اوضتها......فضلت واقفه قدام الاوضه ومتردده اني افتح الباب حطيت ايدي علي اوكره الباب.......اتنهدت بخوف وفتحت الباب........دخلت الاوضه وبصيت علي الصوره بتاعتنا احنا التلاته اللي كانت علي المكتب........مسكتها وحطيت ايدي عليها........الدموع بدات تنزل من عيني........هزيت راسي ب لا وكنت بمنع نفسي اني اصدق كل الادله اللي بتاكد انها هي اللي كانت مع مازن يوم الحادثه.......سيبت الصوره وقربت من الدولاب ........فتحته وبدات ادور فيه لحد ما لقيت اللي بدور عليه.........لقيت بلوزه زرقا متعلقه وكان متعلق معاها بنطلون ابيض ........بصيت بصدمه رجعت خطوه لورا وانا بحط ايدي علي بوقي.........دموعي زادت وانا مش مصدقه نفسي........قعدت علي الارض بصدمه ومكنتش قادره اتحرك من مكاني حتي.......فضلت قاعده في مكاني اعيط
"كارم"
كنت قاعد علي الارض وساند راسي ل ورا بتعب........واحد قرب مني ومد ايده ليا علشان يسلم عليا
_فارس محمد
بصتله وانا ساكت ورجعت بصيت قدامي تاني
_شكل جاي هنا وانت بريئ علشان كده ساكت ومش بتتكلم مع حد بس علي فكره سكوتك دا مش هيغير حاجه من اللي هيحصل وبعدين انت ليه محسسني ان انت رايح تتعدم كمان نص ساعه
بصتله بتعب وبدات اتكلم بهدوء
_لاني متهم في جريمه قتل والادله كلها ضدي يعني حكم الاعدام هيكون من نصيبي في الجلسه
_ليه هو انت اللي عملتها
_انا جراح يعني بحافظ علي ارواح الناس مش بنهيها
_طيب يبقي خايف ليه
_علشان الادله كلها ضدي
_مش مهم الادله معاك ولا ضدك المهم هو
بصتله ب استغراب
_هو مين؟!
شاور ب ايده علي فوق وابتسم
_هو الاهم........لو كان حطك في المشكله دي وانت بريئ ف اكيد علشان يعلمك درس عظيم.........او شيلك خير كبير ورا كل دا........هو دخلك هنا بتهمه قتل انت بريئ منها واه الادله كلها ضدك بس هو هيخرجك منها بطريقه عمرها ما تخطر علي بالك ابدا ولما تخرج من هنا هتلاقي خير كبير اوي مستنيك .......اوعي تقلق ولا تخاف طول ما انت صاحب حق لان ربنا عمره ما هيسيبك في نص الطريق ابدا وخليك عارف كويس ان لو العالم كله اجتمعوا علشان يأذوك وربنا مش رايد الاذي ليك عمرهم ما هيأذوك
ابتسمت ليه وهزيت راسي ب اه.........كلامه كان صح انا ازاي كنت شايل هم وربنا معايا.......
ربنا لو رايد ان اخرج من هنا هخرج لو كانت الادله كلها ضدي وكل الناس متاكده من اني اللي عملتها........كلامه فوقني انا ليه خايف وقلقان ......ربنا مش هيسيبني ابدا
لاول مره انام وانا متطمن ومش خايف من اللي هيحصل وعارف انه هيقف جمبي ويساعدني زي كل مره ما كان بيساعدني.......تاني يوم صحيت بدري وفضلت قاعد ساكت لحد ما الباب اتفتح دخل العسكري ونده عليا
_كارم محمود
_ايوه انا
_البيه الظابط عايزك تعالي معايا
قومت معاه وروحت علي مكتب الظابط اول ما دخلت شوفتها قاعده ولابسه.........ايوه هو دا اللي كانت لابساه البنت اللي كانت مع مازن يوم الحادثه بصتلها بصدمه........الظابط سابنا وخرج من المكتب.......قعدت قدامها بصدمه وانا مش مصدق نفسي بدات تتكلم بهدوء
_ازيك يا كارم عامل ايه
هزيت راسي ب اه من غير ما اتكلم
_ساكت ليه يا كارم ما تتكلم
_ريم انتي جيبتي الطقم دا منين
_هو دا الطقم اللي البنت كانت لابساه يوم الحادثه مش كده
_هو........ايوه هو بس انتي عرفتي منين وجيبتي منين
_هسالك سوال يا كارم وحاول تفتكر لان الاجابه بقيت مهمه بالنسبه ليا سواء في القضيه او براها
_انا مش فاهم حاجه بس هحاول افتكر
_البنت اللي شوفتها دي كانت في طولي ولا لا
_ايوه تقريبا في طولك بس ليه السؤال دا
هزيت راسها ب لا وقامت وقفت بدات تعيط وهي حاطه ايديها علي شعرها بحزن وكانت بتكلم نفسها وانا كنت واقف مش فاهم حاجه
_لا لا مستحيل........يا رب يكون كل دا غلط دي بالذات مش هستحملها .........يا رب لا بلاش دي بالذات
_ريم انتي بتقولي ايه انا مش فاهم حاجه
_انا عرفت مين البنت دي
_هتكون مين اكيد واحده متعرفيهاش صح
_عارف تبقي مين
_مين يا ريم
_البنت دي تبقي فريده
_نعم!......فريده ازاي فريده كانت مسافره اصلا.........لا اكيد انتي بتهزري يا ريم صح
......يتبع....