رواية انعدام ثقه الفصل التاسع 9 بقلم رنا سليمان
_فريده مالها يا ريم ايه اللي حصل
_مش عارفه يا نور........واحد اتصل بيا من تلفونها وقال انها عملت حادثه وجابوها علي هنا
_طيب هي فين دلوقتي هي كويسه صح
_في العمليات بقالها اكتر من ساعتين.........مفيش حد خرج يطمني لحد دلوقتي
_انا قلبي كان حاسس ان في حاجه هتحصل.........مكنش لازم تعملي اللي عملتيه معاها دا يا ريم
_انتي شايفه ان دا وقته اننا نتكلم في الموضوع دا يا نور
_اومال امتي وقته يا ريم.......اختنا بين الحياة والموت ودا بسبب اللي حصل معاكم لو مش دا وقته يبقي امتي وقته فهميني
_فريده هتبقي كويسه يا نور وهتخرج منها........مش هينفع يحصلها حاجه لا
غمضت عيني بحزن وخوف واتكلمت وانا بهز راسي
_مش هستحمل يحصلها حاجه هي كمان .........يا رب لا
الدكتور خرج........انا وهي جرينا عليه بسرعه
_طمنا يا دكتور هي كويسه صح
_انتو اخواتها مش كده
_ايوه احنا اخواتها........طمنا يا دكتور ارجوك
_العمليه كانت صعبه كده.........ومش هقدر اقولكم خرجت منها سليمه في كسور في الايد والرجل غير اني خايف لما تفوق يكون جالها مضاعفات تانيه.........هنستني لما تفوق واقدر احدد في مضاعفات حصلت لها من الحادثه اكتر من كده ولا لا........بعد اذنكم
سابنا ومشي........فضلت واقفه مكاني وانا مش مستوعبه وخايفه عليها
_اكيد هتكون كويسه يا ريم مش كده
_مش عارفه.........مش عارفه يا نور.........انا خايفه يحصلها حاجه بسببي.........انا السبب في كل دا ........انا السبب
_لا يا ريم.........فريده هتكون كويسه وهتفوق وهتبقي كويسه
_تفتكري هتسامحني يا نور
_اكيد هتسامحك يا ريم.........احنا طول عمرنا بنتخانق بس عمرنا ما هنبعد عن بعض اللي حصل دا عادي انه يحصل بين اي اتنين اخوات بس الاهم انهم في الاخر يتصالحوا وميسبوش الزعل يدمر علاقتهم........احنا التلاته علاقتنا عمرها ما هتبوظ مهما حصل يا ريم
هزيت راسي ب اه وانا بعيط.......حضنتنها بخوف وقلق علي اقرب واحده ليا.........خايفه لحظه موت مريهان تتكرر ..........خايفه فريده تموت وهي زعلانه مني زي ما مريهان ماتت.........يمكن تكون فعلا مش هي اللي كانت مع مازن وانا ظلمتها ولو حتي هي اللي كانت معاه لازم اسامحها علشان انا مقدرش ابعد عنها هي ونور هما الاتنين السبب في اني اكمل حياتي هما اللي بيقفوا جمبي وقت تعبي .......مقدرش اني ابعد عنهم بجد
عدا ساعه وكانوا نقلوها اوضه عاديه.........كنت قاعده جمبها علي السرير وماسكه ايديها ونور قاعده علي الكرسي اللي جمب السرير واحنا الاتنين باصين عليها........بدا تفتح عينيها وتمسك في ايدي.......قومت بسرعه وانا بتكلم
_فريده
قامت من مكانها بسرعه
_فريده انتي كويسه
بصيت ليا وبعدين لفيت وشها الناحيه التانيه وفضلت ساكته
_انا هروح انده الدكتور
خرجت بسرعه من الاوضه.........بدات اتكلم وانا ماسكه ايديها ب ايدي ودموعي بدات تنزل
_كنت خايفه يحصلك حاجه يا فريده.......انتي مش متخيله كنت خايفه عليكي ازاي
من غير ما ترد عليا سحبت ايدي وفضلت باصه الناحيه التانيه........فضلت واقفه ساكته ومش عارفه اتكلم اقول ايه........نور دخلت الاوضه ومعاها الدكتور .........الدكتور بدا يكشف عليها واحنا واقفين ساكتين
_فريده تقدري تركزي مع حركه القلم وتحركي عينك مع حركته
هزيت راسها ب حاضر وبدات تمشي عينيها مع القلم.......بدا يشاور علينا ويتكلم
_انتي عارفه مين دول يا فريده
هزيت راسها ب اه
_طيب ممكن تقوليلي هما مين
شاورت علي نور وبدات تتكلم
_نور
بصتلي وفضلت ساكته شويه وبعدين اتكلمت
_ودي ريم
_طيب انتي ايه اخر حاجه فكراها
_كنت واقفه علي النيل وحد جاه اتكلم معايا......فضلنا نتكلم شويه وبعدين ركبت عربيتي وبعدها في عربيه كبيره دخله في عربيتي وبس
_طيب يا فريده.........انا هسيبك ترتاحي دلوقتي بس البوليس برا مستني ياخد افادتك علشان الحادثه
_بس دي حادثه عاديه ليه لازم ياخدوا افادتها
_لازم يحصل كده لانها حادثه كبيره وممكن يكون حد وراها........بعد اذنكم
_شكرا يا دكتور
_العفو
خرج وهي لفيت وشها الناحيه التانيه.......نور بصتلنا وبدات تتكلم
_انا هطلع اجيب حاجه نشربها وهرجع تاني
خرجت وسبتنا........بصتلها وفضلنا احنا الاتنين ساكتين لحد ما بدات اتكلم
_هتفضلي ساكته كده كتير؟!
_المطلوب مني اني اقول ايه
_اتكلمي عاتبيني زعقي طلعي اللي جواكي
_هيفيد بحاجه؟!........انتي مش حكمتي عليا من غير حتي ما تسمعيني........كأني واحده تعرفيها من يومين مش اختك وصاحبه عمرك اللي عيشتي معاها سنين
_كنتي عايزاني اعمل ايه يا فريده بعد كل اللي شوفته والادله اللي كلها ضدك
_ادله تاني يا ريم.........ادله ايه اللي بتتكلمي عنها دي........انتي حتي مسألتنيش ليه الهدوم دي عندي ولا غيرت لون شعري ليه ولا رجعت من السفر ليه.........
انتي كأنك انتي محتاجه طرف خيط علشان تمسكيه وتحكمي عليا اني الخاينه اللي بتدوري عليها مع ان اللي انتي بتدوري عليها قدامك وباينه اوي بس انتي اللي مش عايزه تشوفيها لانك بتحبيها
_قصدك مين
_قصدي نور يا ريم........نور هي اللي بتدوري عليها يا ريم مش انا
_نور........طيب ازاي يا فريده
قبل الحادثه ب كام يوم اتكلمت انا ونور وهي اللي اقنعتني اني بعد ما اخلص شغلي انزل مصر واعملك مفاجاه من غير ما اقولك علشان احضر الفرح........قبلها عجبها البلوزه والبنطلون اللي شوفتيهم دول وطلبتهم اونلاين وقالتلي اجيب انا كمان زيهم علشان نكون شبه بعض وكمان جيبتلك انتي كمان زينا .........بس كان موجود في الشنطه مع باقي الهدايا بتاعتك علشان مجاتش فرصه اديكي الهدايا بتاعتك .........نور هي اللي اقترحت عليا اغير لون شعري وهي اول واحده شافته قبل ما ارجع مصر يا ريم
_كارم قالي ان اللي كانت مع مازن في نفس طولي لكن نور اقصر مني
_لسه مصممه؟!........نور اه اقصر مني ومنك يا ريم بس لما بتلبس كعب عالي بتوصل ل طولنا
_وهي نور مصلحتها ايه انها تعمل كل دا
_انتي كنتي شايفه اني مصلحتي ايه اني اخونك؟!........لمره واحده صدقي انها مش بتحبك لمره واحده بس شوفي كرهها ليكي........نور هي اللي طول عمرها بتكرهك علشان اسباب كتير.........كانت بتغير منك علشان كنتي اشطر منها في المدرسه وعلشان اهلها دايما كانوا بيقارنوكي بيها وقد ايه انتي كنتي اشطر منها اهلها حبوكي اكتر منها........حتي انا لما كنا صغيرين كنت قريبه منك اكتر منها........نور طول عمرها بتكرهك بس انتي اللي مش عايزه تشوفي دا ولا حابه تصدقي بس انا........انا في اول فرصه جاتلك كذبتيني وصدقتي اني ممكن اخونك مع اني اكتر واحده بتحبك في الدنيا دي وبتخاف عليكي يا ريم.........عمري ما كنت اتوقع انك تشكي فيا وتجرحيني بالشكل دا...........ازاي هونت عليكي
_هو انتي فاكره انه سهل عليا اني اعمل كده.........انتو مش بس اصحابي ولا حتي اخواتي انتو اقرب ليا من نفسي انا مليش غيركم مجرد بس التفكير ان البنت اللي مازن خاني معاها كانت انتي ساعتها الدنيا كلها اسودت في وشي ومكنتش قادره اصدق كل دليل كان بيظهر قدامي وكان بياكد ان انتي البنت اللي بدور عليها كان بيخليني اتجنن احساس جوايا بياكدلي انك عمرك ما تخونيني ونفسي اصدق احساسي دا بس في نفس الوقت كل الادله اللي بتاكد انك انتي السبب بتكتر ..........كنت خايفه اصدق احساسي وخايفه تكون دي الحقيقه ..........ودلوقتي بتقوليلي نور هي اللي خانتني..........انتي مش حاسه بيا انا محطوطه في اختبار صعب واختيارين اصعب من بعض ياما اكذبك دلوقتي واخسرك ياما اصدقك وساعتها هخسر نور وفي الحالتين انا اللي هخسر.........محدش فيكم هيحس باللي انا حاسه بيه يا فريده ..........انا حقيقي تعبت من كل اللي بيحصل دا ونفسي ارتاح واعرف الحقيقه..........خيانه مازن مش فارقه معايا قد ما انا عايزه اعرف الحقيقه ومين هو القاتل وليه بيعمل كده والاجابه مع واحده فيكم يا انتي يا نور وفي الحالتين هتبقي تقيله عليا اوي الحقيقه
.......يتبع......