رواية احببت وأنا علي ذمة اخر الفصل الثالث والثلاثون 33 بقلم نوسه حمد
رامي قال لي نوسه عبله ضيعت ولد طارق قلت ليهو كيف يعني قال لي زي م اقول ليك قالت لي بخشمها انو ولدها ضاع وحتي سالتها من ابوهم قالت لي ابوهم طلقها وجدع الاولاد وما خلت نبز ما نبزتو ليهو كلو مسجل ي نوسه قلت ليهو كذابه ربنا بيسالها طارق نهاي م قصر معاها بس هي الله يسامحها قال لي نوسه انا عارف وفاهم اي شي بمشي فيها هي عايزه تحلل شغلها الشغاله فيهو دا انو م عندها صنعه وانو مريضه وكلام وتبرير انا لو صدقتو واقتنعت تمشي من ربنا وين ويا نوسه انا ماف شي خلاني استعد اني اوقعها غير انها مستعده بتها تشغلها الشغله دي وطارق م جايب خبر قلت ليهو طارق يا عالم الحاصل عليهو شنو كلام هديه لي انو اختو ما قاعده تجيب سيرتو ما بعيد اكون افتش لي عبله وهي عبله ما ظاهره ليهو عشان يقبضها شكلها بس قاعده في شقتها دي قال لي اصبري دا كلو بعرفو قلت ليهو اعمل حسابك عبله دي م ساهله احتمال تكون بتعرف رجال الشرطه ديل ويعملو فيك مصيبه قال لي مالي الدرجه دي رجال الشرطه لو قبضو عليها شي م بخلوها حتي لو الواحد ضعف بتراجع وانا صاحبي زول صعب شديد ورتبتو كبيره كل الضباط بخافو منه اشاره منو بقبض علي الناس كلها انتي بس م تشيلي هم وانا اتصلت عشان اقول ليك الايام الجايه ح اكون مع عبله ف الدخله والطلعه افهم طبيعه شغلها وافهم الولد اختفي كيف وقصصص كتيره عشان تدينها ومهيد ح يظهر في النهايه انو السعودي ياخ مهيد دا قصه والله اتكلم لي لهجه السعوديين كانو سعودي وتاني شي انا جبت معاي لبس يعني مخطط لاي شي بس عاوز اشوف طارق وما عايز اظهر ليهو انو انا رامي زميلك عشان يصدقني احتمال لو عرف اني رامي زميلك اقول عاوزين نتهم عبله عشان كده خليك بعيده الايام دي لا رساله لا اتصال وهديه م عارفه حاجه وانا محزر مهيد انو ما يتكلم وادعي لي لو جاتني حاجه عاوز اقول ليك اعفي لي علي اي تقصير حصل مني اعفي لي اني م كنت في حياتك من زمان وعايز اقول ليك انتي الزوله البحلم بيها ليا زمان صابر راجيها انا اتبكمتا وغلبني اتكلم بقيت اتمتم قال لي نوسه ما عاوزك تردي المهم انا قلت النفسي اقولو م معروف الظروف احتمال اموت طالما الناس ديل موتو لدن انا م غالبهم يقتلوني لو شكو فيني قلت ليهو رامي خلاص ما تمش قعد اضحك قال لي خايفه علي م رديت عليهو قال لي متاكد انك خايفه علي بس انتي زي ما اتعهدتك زوله تقيله ورزينه ما اتكلمتا بحرف لاني اتبكمتا عديل قال لي نوسه يلا في رعايه الله استودعك الله الزي لا تضيع ودائعه وخلي بالك من نفسك واولادك وقفل الخط رامي خلاني في حيره من امري وبقيت بين عايزاهو وبين ماضيني اليوم داك شبعت بكا بتي نور جات لقتني ابكي قالت لي ماما انتي مالك قلت ليها لا لا ماف حاجه ي نور بس اشتقت للاهل واخوي وبناتو قالت لي ارح نرجع قلت ليها قريب ان شالله بعد رامي يجي يمسك الشغل بتاعو قالت لي خالو رامي بحبني يا ماما جاب لي لعب كتيره ما زي بابا ولا زي خالو قلت ليها نور لا كده عيب م تقولي كده ابوك دا في مقامك الاول يكون وابوك بحبك شديد بس ظروفو ما خلتو يكون معاك قالت لي لا بابا زعلك وبابا بكورك فيك انا كنت بحبو يا ماما بس هو بقول لي امشي نومي كل م اقعد جنبو بقول لي امشي نومي ولا يفوت مني شهد صحبتي كل يوم بتقول لي بابا بسوقني الدكان وبشتري لي وبلعبني انا واخواتي غلبني ارد ارد اقول شنو اعتزر بشنو قصر في حق بتو شديد الاطفال مستحيل ينسو اي شي وهم صغار حاولت ابرر ليهو وكل م ابرر هي تقول لي بابا م بحبني وحبوبه م بتحبني انا بحبك انتي بس يا ماما لانك بتحبيني وبتجيبي لي اي شي نفسي فيهو بعد اكبر بجيب ليك بيت كبير وبجيب ليك عربيه انتي ورانيه رانيه دي البت الشغاله معاي ضميتا علي قلت ليها حبيبتي انتي انا كونو انك تبقي كبيره وتتعلمي دا عندي بالدنيا انا بفرح لمن اشوفك ناجحه والناس بجيبو سيرتك بالخير ما بفرح لمن تجيبي لي ولا تعملي لي انا الح اجيب ليك اي شي لغايه م تتزوجي قالت لي كيف قلت ليها بعدين بعد تكبري تتزوجي واكونو عندك اولاد قالت لي لا م عايزه اتزوج عشان بعدين زوجي يكورك فيني ويشاكلني ويدقني زي ما ابوي دقا خالتو هديه ماما خالتو هديه مسكينه بس بابا الكعب قلت ليها نور جبتي الكلام دا من وين قالت لي يوم ودينا خالتو هديه كانت بتبكي وجسمها كلو كابي دم قالت ابوي طارق دقاها قلت ليها لا لا لا يا نور ابوك م دقاها م تقولي الكلام دا وعيب ي نور عشاني انا حبي ابوك وما تكرهيهو ابوك م يستاهل والله يجازي الكان السبب بقيت ضاماها علي وببكي وبتزكر في طارق اول ايامي معاهو ولمن كنت حامل بنور كان بخت يدو في بطني وبقول لي ان شاءالله بت وكان ملهوف عليها كنت بقول ليهو طارق انت غريب الرجال بقولو عاوزين ولد عشان ينفعهم بعدين كان بقول لي لا لا ي نوسه انا كان ولدت اولاد م دايرهم ينفعوني عاوزهم ينفعو نفسهم وانا بحب البنات بقولو البنات حنينات وكان بقول لي بسميها نور عشان تنور لي حياتي اجمل سنين عشتها في حياتي السنتين الاوائل طارق كان بحبني وبحب بتو لدرجه كل الناس بتغير مننا بالذات امو انا م بنسا طارق وحبو لي وحبو لي بتو ولا بقدر انكر عشرتي معاهو بس من دخلت حياتنا عبله حولتها لجحيم حسبي الله ونعم الوكيل فيها بقيت احكي لنور بي انتظار ابوها ليها قبل ما تجي علي الدنيا وبقيت احكي ليها علي اي لحظه حلوه عيشني ليها ولمن كانت صغيره كان بخاف عليها وقلت ليها مهما كان انتي تكوني فخوره بي ابوك ابوك م كعب بس عبله هي السبب وكنت ببكي حسيت روحي ح تطلع اكتر شي اثرني بتي والكراهيه الشالتا لي ابوها وياريتها من زمان قالت لي كل الكلام القالتو لي هسي مهما حصل من طارق لي ومن خلافات بس ديل اولادو وهو ابوهم ما نفسي اولد جواها كراهيه اتجاهو حتي لو كان كعب معاي وما غيرتو الظروف لانو الاب عظيم مهما قسي بكون سند نور قالت لي ماما انا اسفه بس بابا م بحبني قلت ليها القال منو ي نور ما تبكي حبيبتي انا هسي بتصل عليهو ويوريك هو بحبك قدر شنو شيلت تلفوني واتصلت في رقمو ردا علي قلت ليهو طارق كيفك قال لي نوسه انا بخير انتي كيف كويس انك اتصلتي وانا كنت فاتحه الاسبيكر قال لي نور وفارس كيف انا مشتاق ليهم وفاقدهم بس مطمن وهم معاك ومتاكد تماما انهم في احسن حال احسن من لمن كانو معاي نور بقت تبكي وخطفت التلفون مني وبقت تقول ليهو بابا انا بحبك بابا تعال وكانت بتبكي وهو زاتو ببكي انا ضميتا علي وهو اقول ليها نور انا مشتاق ليك شديد ما تبكي ح اجيك ان شالله واجيب ليك معاي لعبات حلوه وفتح الكميرا وكان شايل العروسه الجابا لي نور اول ما وعت للدنيا قال ليها شايفه عروستك دي هي المصبراني وفيها ريحتك وكان ببكي ولاحظت ليهو مبهدل وشعرو كتير. وبكو بكا قطعو قلبي في لحظه اتمنيت ادوس علي كرامتي بالجزمه ولا اطلب الطلاق واصلح اغلاط طارق وبدل المره استحمل الف مره عشان خاطر نور وفارس بس فات الاون والنصيب كان فراق شيلت التلفون منها وضميتا علي قلت ليهو طارق كيفك ان شالله بخير قال لي الحمد لله ي نوسه خير وين واولادي كل واحد في اتجاه نور وفارس ونسيبه واولاد عبله الما عارف هم حيين ولا ميتين ولا الدنيا الداست علي شديد امي ي نوسه بقت راقده في السرير ما طالب منك غير تعفي ليها ولا لدن يا نوسه الماتتت والما معروف سبب موتها طارق كان تعبان نفسيا حسيتو م طبيعي قلت ليهو طارق ما تبكي ما تضعف للدنيا وعايزه منك طلب قال لي اتفضلي قلت ليهو جهز اوراقك انت وامك عاوزه اجيبكم عمره قال لي الخساره الخسرتها في حياتي انتي لا قروش زعلت عليهن ولا صحه حزنت عليها حزنت علي فراق اكتر انسانه كانت ملاذ امن في حياتي والحمد لله نوسه شكرا ليك اعتبري اني جيت وعمرتا وجبتا امي قلت ليهو وليه اعتبر تعال يا طارق وشوف اولادك انا م بحرمك منهم انا بس عندي شغل هنا قال لي ياريت ي نوسه لكن بخلي اختي تصلكم جايه العمره قلت ليهو م شاء الله متين الكلام دا م عارفه قال لي ع فكره الفضل يرجع ليك قلت ليهو انا م عملت شي قال لي كنتي سبب في عمرتها قلت ليهو كيف قال لي تتزكري لمن جبتي الداعيه محمد سيد الحاج قلت ليهو اي قال لي اهداها عمره قلت ليهو ي سلام تستاهل اختك والله قال لي تقريبا يومين وح تسافر قلت ليهو بركه الكلمتني لازم تنزل عندي انا ماجره شقه واسعه قال لي بخليها تتواصل معاك وبرسل لي حاجات لي نور وفارس وخلي بالك منهم قلت ليهو حاضر وقفلت منو قلت ليها نور شفتي بابا بحبك قدر شنو قعدت تضحك قالت لي انا اسفه يا ماما م تكلميهو قلت ليها ما حكايه اكلمو بس عايزاك نهاي م تفكري في الكلام دا وعمتك جايه تقعد معانا فرحت شديد وجرت كلمت رانيه قالت لي صحي حكيت ليها بالحاصل قالت لي سبحان الله تستاهل العمره والله ومن بكره بجهز ليها الغرفه التانيه وبعمل الاكل قلت ليها م بتقصري اتصلت علي هديه قلت ليها ليه م بتكلميني انو عمتنا جايه السعوديه قالت لي والله انا م عارفه عرفت الليله نادتني وكلمتني وودعت نسيبه وقالت يومين وبتسافر وطارق بكره جايها قالت لي انتي عرفتي من وين قلت ليها من طارق قالت لي بقينا نحن ولا شنو قلت ليهو هديه طارق دا ابو اولادي بتربطني بيهو صله وبقيت احكي ليها بي نور قالت لي نور عندها حق قلت ليها هديه تعال نخت علاقتنا وطلاقنا بس جهه طارق دا ابو اولادنا ومافي ولد بستغنا عن ابوهو هسي هم صغار م واعيين بس بعد اكبرو ح يفتشو لي ابوهم ليه نحنا نحرمهم من حنانو ليه نخليهم ناقصين مجرد انو علاقتنا بيهو فشلت وكونو انو اطلقنا دا نصيبنا بس انو نكرهم في ابوهم ربنا بسالنا ونصيحتي ليك ي هديه خلي مشكلتك مع طارق بي جهه وعلاقتو مع بتو بي جهه انتي احتمال عاشرتي طارق بعد جسمو اتسمم باعمال عبله بس طارق عمرو م كان كعب اقسم بالله تسعه شهور وانا حامل بنور بقعد لي في الارض وببوسها وهي في بطني وكان بدعي ربنا انها تكون بت عشان تكون حنينه عليهو اجي هسي اقول ليها اي انتي معاك حق وابوك كعب والله يعمل ليهو ويسوي ليهو هديه قالت لي نوسه م قصدي انتي زوله فاهمه اخديني ع قدر عقلي انا ما بالفهم الانتي فيهو دا وكلامك لي دا خلاني اتنازل وبكره لو جا بشيل نسيبه اوديها يسلم عليها قلت ليها صدقيني لو م وديتيها بجي يسلم عليها هو وعاوزه اقول ليك في حاجه لو طارق عرفها بموت قالت لي شنو قلت ليها ولدو المن عبله ضاع هديه من قلت ليها كده انفقعت بالبكا انا نسيت انها كانت مربياهو وبكت قدرتها قلت ليها هديه استهدي بالله ما تجيبي لي الهواء بقولو انا عرفت من وين قالت لي صحي انتي عرفتي من وين قلت ليها م بقدر اقول المهم انسي الموضوع دا وربنا يجمع بيهو والكلمني كلمتو يقول لي طارق انتي بس اسمعي حلو قالت لي تمام قفلت منها ورسلت لي اخت طارق قلت ليها لازم تنزلي عندي قالت لي ما عايزه اتقل عليك وشكرتني علي وقفتي معاها قلت ليها العفو انا اختك وانتي عمت اولادي قالت لي نفسي اصل هناك وادعي لي بتي ربنا يتولاها بي رحمتو بتي ماتت بي سرها ي نوسه انا م قادره اتكلم قلت ليها الله يرحمها وادعي ليها بس ولازم تنوريني اديتا العنوان ورسلت ليها اللوكيشن وبقينا منتظرنها
ومرت الايام واخت طارق وصلتنا بالسلامه ولمن شافتني انفقعنا بالبكا لمن رانيا فكتنا من بعض وشالت نور وفارس وبقت تبكي معاهم وتوصف وادت نور عروسه وفستان رغم انهم بسيطات وما احلي من العندها بس نور من عرفت انهن من ابوها اليوم كلو لابساهو وجاب لي فارس جلابيه وعندو حلابيه بتاعت طهور حقتو كان محتفظ بيها من هو صغير رسلها ليهو انا العبره خنقتني وقطع قلبي الجلابيه بتاعتو دي كان محتفظ بيها نهاي م بطلعها وغاليه عليهو بقول لي نهاي م بطلعها لانها زكره من طفولتي وشكلو فارس غالي عليهو عشان كده رسلها ليهو وقال لي اختو بعد تعمري ديل قروش طهري بيهن الولد قلت ليها ما بحتاج هو امو عيانه قالت لي حتي ولو ديل اولادو وولدي بقا ماسك ليهو المحل وفتحو مطعم صغير جنبهم قلت ليها الحمد لله ربنا عوضو
اكرمتها وقلت ليها نومي عشان بكره نمشي بدري نعمر قالت لي تمام اتصلت اخدت اذن من الشركه ومشينا تاني يوم عمرنا لمن رجعت لقيت مكالمات كتيره من رامي وقلق علي شديد قال لي نوسه بعد تقري رسايلي دي ارجعي لي ووصلنا تعبانين اخت طارق نامت وانا دخلت غرفتي اتصلت علي رامي كان مقلق علي قلت ليهو نحنا كويسين بس معانا اخت طارق قال لي م شاء الله خوفت عليك بالذات لمن اتصلت الشركه وقالو انك في اجازه قلت ليهو لا نحنا كويسين انت كيف اها بشرني الحصل شنو قال لي طبعا مشيت لي طارق في بيتهم ولقيتو ماف وشيلت رقمو ورسلت ليهو في الواتساب شريحه مسجله بي اسم الولد القتل لدن قلت ليهو انا فاعل خير ولدك عبله ضيعتو وبتك في خطر لو م لحقتها بتك ح تضيع وعبله ح تتاجر بيها ورسلت ليهو تسجيل من عبله لمن قالت لي بتي لو كبيره كان طوالي اديتك ليها ومن كلامها لمن قالت لي ولدي ضاع ولمن نبزتو هو حظرتو ورسلت الرسايل من شقتها هي ورسلت ليهو لوكيشن الشقه وجدعت الشريحه وكسرتها وطبعا يا نوسه الولد القتل لدن ولد شغال معاها ولدن استهدفتا وجابتا الشقه ع اساس انها مرت طارق والدار امان ولدن كانت مضايقه من حبوبتها لانها بتشاكلها وفي يوم كسرو قلب لدن ودمروها والبت العامله فيها صاحبتها شغاله معاها وما بتقرا في الجامعه كانت ممثله انها بتقرا في جامعه لدن وصاحبتها من ضمن البنات واستدرجتا الكلام دا كلو عرفتو كيف اديت البت البتنظف لي عبله قروش كتيره وقلت ليها انا استخبارات تحكي لي كل الحاصل هنا وبديك زيهن الف ولو م وافقتي ح تقعي في الشبكه معاهم والقانون ما برحمك البت خافت وبقت تحكي لي بي كل القصص دي وما كده بس قالت لي ولد عبله اكون خطفو الدكتور لمن سالتها من الدكتورر قالت لي دا دكتور بجي هنا طوالي وكان بقنع في عبله انها تبيع كلي اولادها واديها قروش تراب وهي طمعت طلبت قروش كتيره قلت ليهو يعني وافقت قال لي طبعا دي مجنونه قروش قالت ليهو تديني ليهن مقدم وبديك ليهم بعد يكبرو وهي باعت كليتا وبقت بين الحياه والموت والقروش الباعت بيهن كليتا ما كفنها علاج انا بقيت محتاره معقوله الحوجه توصلها للمرحله دي قلت ليهو بس الولد صغير قال لي م عارف بس دا كلام البت وكلو كلام ي نوسه بس الحقيقه شنو م عارف لكن بصدق اي شي عبله قادره تعمل اي شي وطبعا انا فرحانه بي لاني مشبعها قروش وكانت بتقول للبنات البجوها ما تجو بس انا اصريت اشوف نوعيه البنات المعاها في واحدات اقسم بالله تقولي الغنمايه تاكل عشاهن بس بتحت تحت بايعات هوي وما هينات ويطلبن ويتشرطن في الرجال بس ليهن يوم وهسي بكره مواعدها اجيب السعودي وهنا الشرطه ماسكه كم ديل بقبضو عليها بس كان نفسي طارق يصلها ويعرف ولدو وين قلت ليهو ربنا يستر
تاني يومي قلبي في يدي وخايفه شديد الاكل ما نافعني وفي الشغل سرحانه اليوم انتهيتو بالجلاله رجعت البيت وما قعدت سمح هديه لقيتا متصله لي مليون مره رجعت ليها قالت لي نوسه طارق عبله قتلتو انا هنا اتجمدتا وقلبي وقف وروحي طلعت والدنيا دارت بي وفكيتا صرخه ………….يتبع.