رواية احببت وأنا علي ذمة اخر الفصل الثلاثون 30 بقلم نوسه حمد
مرت الايام ورامي قال لي نوسه م حكيت ليك قلت ليهو شنو قال لي عبله شكله متورطه ليها في قصه قلت ليهو ياتو قصه قال لي في بت متواصله معاها وشكلها من اهل طارق واظنها عبله عرفتها علي واحد والولد اكل مخها وعمل فيها حاجه وهسي البت بين الحياه والموت قلت ليهو انت عرفت كيف قال لي والله يا نوسه انا من. لحظة انتي وصلتي السعوديه واطمنت عليك تاني عبله م دخلت صفحتها يوم اظني شغال في الفيس واظنو غلبني النعاس ودوستا علي استبدال الصفحه بتاعتي بصفحه عبله وصحيت الصباح لقيت كميه من الرسايل وكنت ملخوم م فتحتهم قفلت البيانات وخلصت شغلي جيت راجع البيت داير افتح الرسايل لقيتهم مفتوحات وفي زول رادي وكلام انا زاتي م بعرفو ولا رديت بيهو قلت يا حسابي مهكر يا في حاجه غلطت لمن مشيت للبروفايل لقيتا صفحه عبله وجاني فضول اعرف ديل منو والقصه شنو والمحادثه كلها تهديدات اول شي الولد القلت ليك قال ليها يا تجيبي لي القروش يا ما بفضحك داك وهي جاتك عشان تهددك وتشيل القروش تديهن للولد المهم الولد دا هو زاتو الغلط مع البت واظنها البت حملت وهي صغيره قلت ليهو لا لا ياخ ماتقول كده حصلت للدرجه دي قال لي نوسه واحده زي عبله دي اتوقعي منها اي شي يخطر علي بالك قلت ليهو رامي البت كاتبه اسمها عديل ولا داخله بصفحه مستعاره قال لي كاتبه اسمها عديل انا زاتي قلت تكون مستعاره بس شكلها صفحتها الرسميه قلت ليهو طيب اسمها منو قال لي دقيقه اشوفها قال لي اسمها لدن محمد قلت ليهو لا لا ياخ م بصدق كيف الكلام دا قال لي جد والله بتعرفيها قلت ليهو دي بت اخت طارق البت دي صغيره ياخ قال لي شكلها كده انا فتحت التسجيلات المرسلاهم لي عبله دي ما هي دي صاحبها مسجله لي عبله وشكلو البت متورطه وعاوزه الولد يعقد عليها الولد قال ليها تديني القروش بعقد عليها م تديني القروش ما عندي فيها شغله ولو جو سالوني بقول ليهم جابتا لي عبله في شقتها وتاني انتي اعرفي اطلعي منها وعبله صفحتها كلها رسايل تشحد في الناس زول داير اديها القروش ماف وقالت ليهو م قدرت اجيب القروش قال ليها طيب حرام البت تتفضح انا بشوف لي دايه شاطره تتخلص من الحمل واظنهم ساقو البت والدايه غلطت فيها وشالو ليها رحمها وبقيت بين الحياه والموت وعبله بتحاول تهرب وتاني ما عارف الحاصل بالظبط شنو قلت ليهو دي مصيبه لكن انا ح اعرف الحاصل بالظبط شنو لو الكلام انتشر بصل هديه لانو هديه ساكنه معاهم في نفس المنطقه قال لي بس اوعك تجيبي سيره اي شي انا م خايف علي نفسي خايف عليك الناس ديل بعد بعدتي منهم ابعدي منهم للنهايه قلت ليهو لا لا هديه انا وهي واحد وقلت ليهو طبعا م وريتك مهيد الولد الاشتغل معانا جديد عجبتو هديه واتعرفو علي بعض وعاوز يتزوجها قال لي ي سلام والله مهيد دا راجل كبر في نظري البت دي تستاهل كل خير لانها انظلمت قلت ليهو فعلا والله ربنا يسعدها قال لي امين وعقبالك ياغاليه قعدت اضحك قلت ليهو رامي اقسم بالله م عارفه اقول ليك شنو بس مع احترامي الشديد ليك بس انا حاجه اسمها رجال بكرها موت بقيت ما عارفه مالي قال لي نوسه دا الطبيعي انتي طلعتي من قصه كانت قاسيه بمعني الكلمه وفي الاول كنتي تايهه بس حسيتك بعد الطلاق احسن قلت ليهو الحمد لله عشان كده مستحيل انا ارتبط براجل كفايه علي اشتغل واربي اولادي احسن تربيه وافرح بيهم
قال لي م مشكله يا نوسه اصلا الاقدار بتغير اي شيء احتمال ربنا اديك واحد يكون محل ثقه قلت ليهو وطارق دا كان اكتر واحد محل ثقه بس دخلت وسطينا شيطان وبقا بعاملني معامله العدو صدقني فقدت الثقه حتي في نفسي قال لي طيب نغير الموضوع ما نفسي اقلب عليك المواجع قلت ليهو عادي ما بتفرق قال لي بالنسبه لي بتفرق ما عايز اشوفك زعلانه ولا مضايقه قلت ليهو م بتقصر وعمري ما بنسا الوقفه الوقفتها معاي كل الناس اتخلو عني الا انت طلعتني من الف مشكله ومن الف شبهه كانت ح تقع علي قال لي لاني عارفك انتي شنو وهم م عارفين انتي شنو قلت ليهو بتمني اكون عند حسن ظنك قال لي اكيد واها خلينا من الماضي ح تنزلي متين معانا قلت ليهو انا هسي اتصلت عشان اقول ليك انا جاهزه في اي وقت قال لي بكره رايك شنو امر عليك ونمشي مع بعض قلت ليهو تمام قال لي طيب النخليك تنومي بدري عشان بكره تصحي بدري قلت ليهو تمام ودعتو وقفل بقيت اتزكر في كلامو وقلبي وجعني علي اخت طارق مسكينه شديد بس سبحان الله بتها دي فايره فوره عجيبه وعبله استقصدتا بس عبله ليه تعمل كده دي جريمه رسلت رساله لي هديه قلت لو صاحيه اتكلم معاها بس م ردت علي نومتا طوالي صحيت الصبح صليت وكلمت بتي اني ح انزل شغل تخلي بالها من نور وفارس وهي اصلا م بتقصر قالت لي نوسه ان شاءالله الشغل يعجبك هنا ونقعد هنا قلت ليها عاوزه تقعدي هنا قالت لي من زمان وكان حلمي ازور الكعبه وانتي حققتي لي كل الاتمنيتو قلت ليها لانك انتي بتي زي فارس ونور ما حصل يوم حسيت انك شغاله معاي ونفسي ما اقصر منك قالت لي انتي مافي زيك وربنا ح يجزيك كل خير قلت ليها امين يارب يلا انا ح امشي والشقه فيها تلفون احتجيتي لي اي شي اتصلي علي تمام قالت لي تمام رامي اتصل علي قال لي منتظرك نزلت ليهو صبحت عليهو واتحركنا الشركه ودخلني علي المدير والمدير كان سعودي وشكلو زول بخاف ربنا رحب بي وقال لي لينا الشرف تشتغلي معانا وما نفسنا مده شغلك تكون بالشهور انا عندي استعداد اديك الراتب الانتي عاوزاهو بس تستقري هنا قلت ليهو انا م ح اقصر منكم حتي لو رجعتا السودان ممكن ادير شغلكم من هناك بس انا عندي الاهم الفرع الفي السودان حتي لو بي اقل راتب نفسي بلدي تستفيد مني قال لي يا سلام انا اسمع انو السودانين بحبو بلدهم شديد ومخلصين ليها قلت ليهو فوق م تتصور قال لي النعمه فيكم م مشكله كونو انو تجي عشان تطوري معانا الشغل دي براها بالدنيا قلت ليهو ان شاء الله اكون عند حسن ظنكم رامي وداني مكتبي وبديت معاهم الشغل بكل حماس ووضعت ليهم خطط ح تربح الشركه اضعاف اضعاف وعملنا اجتماع واتناقشنا التطورات المفترض تحصل شنو ورامي مجالو ما زي مجالي بس حسيت انو مخو متفتح في الشغل ممكن اساعدني كتير وبدينا بكل حماس وطبعا انا م بحب اللعب في الشغل واكتشفتا انو الزول الكان ماسك الشغل الارباح بحولها في حسابو والوحيد الما عاوزني اشتغل ما كلمت رامي ولا المدير مرت الايام ودخلت عليهو في مكتبو قلت ليهو انا م بحب اقطع رزق زول وفي نفس الوقت ما بحب اشوف الخيانه في الشغل وانا. م جايه احاسبك قال لي ويش تقصدي قلت ليهو حتي عيونك بتقول لي انك فاهمني انا عاوزه اقول ليك لعبك قبل ما اجي الشركه دي حاجه بترجع ليك بس من اليوم تعمل حسابك شديد اي لعب ح احملك المسؤوليه بقا جايط فيني وعاوز يسئ لي ولي دولتي قلت ليهو دولتي خط احمر كلامك يكون معاي انا وانا لمن جيت اتناقش معاك بكل هدوء احترم الحته دي قلت ليهو اكون لمعلوميتك انا نهاااي ما بخاف لو ختيت سيف علي رقبتي ما بتخوفني ويلا سلام سبحان الله م خوفتا منو لانو نيتي كانت سليمه اتجاهو حزرتو عشان ما يفقد وظيفتو بي امكاني انا ارفع فيهو تقرير وتاني يوم بعيني ما اشوفو بس م بحب اقطع الرزق رامي لقاني طالعه من المكتب قال لي محتاجه حاجه قلت ليهو لا كنت عاوزه اوريهو شغل ورغم انو شكلي كان نهاي م بقول كده بس مشيتو وهو حسا بي اني مشيتو وبقا سرحان وفي راسو في الف سؤال بس اتجاوزتو مشيت المكتب جهزت ليهو خطه ارهب من الاول وطلبت اني ننفذها انا ورامي فقط من غير باقي الموظفين المدير في الاول رفض وقال لي عبدالله لازم يكون موجود عاوزو يدرب علي الشغل معاك ويفهم منك اي شي قلت ليهو انا مسؤوله عن اي شي بس اديني راحتي رامي اتناقش معاهو وبعد جهد جهيد وافق وقلت ليهو صدقني عشان مصلحتك انا قلت كده المدير حسا انو في شي قال لي م مرتاحه مع عبدالله ولا في شنو قلت ليهو لا انا عندي اسرار م ينفع اوريها لي اي زول انت وثقت فيني ومسكتني شغل مهم وحساس انا عايزاك تشوف الفرق بي عينك وكمان ما بقدر اطلع اسرار شغلي في الاول زعل قال لي كنت عاوزاك تدربي عبدالله بس خلاص الشايفاهو اعمليهو غلبني اقول ليهو عبدالله حرامي وح ياكلك وطبعا لو عبدالله اشتغل معانا في خطتنا دي المدير م ح يحس بفرق لانو متاكده منو ح ياكل الشركه ورجعت البيت صارحته رامي وحذرتو من يفتح خشمو نحنا نشتغل من سكات نطور الشركه ونبذل فيها مجهود ونحلل اي قرش اخدناهو ونكون قدر الثقه الادانا ليها المدير وبدينا من تاني يوم تنفيذ من غير مشاركه اي موظف لينا انا ورامي بس وطبعا رامي ركيك في الشغل عشان م عندو خبره بس كان عندو هدف عاوز يصل ليهو وكان مخلص شديد وبنشتغل دوام في الشغل والدوام التاني في البيت كنت بسوق معاي رامي ونتفرغ للشغل والبت كانت بتساعدنا شديد ومرات نتعب ننوم في الكرسي وحرفيا بقيت حاسه نفسي راجل وحمار شغل وكل يوم بمر علي الشركه بتحقق ارباح خياليه بعد كانت رقم عشرين في الشركات الناجحه قدرنا خلال شهر بخليها نمره واحد والناس كلها محتاره المدير عرف اننا بنشتغل دوام ف الشغل ودوام في البيت ومن استلمنا الشغل ما وقفنا شغل كان متكيف مننا شديد وعاجز عنالتعبير وعبدالله شغلنا معاهو كان ضاغط وبكرهني شديد بس انا نهاي م مركزه معاهو مركزه في شغلي لغايه ما يوم براهو جابا لي روحو اتناقش مع المدير انو لازم يوقفني من الشغل وانو انا بشتغل شغل حرام وسبحان الله الله خلا المدير براهو يراغب شغلنا وحسا انو عبدالله م عاوز مصلحه الشغل عاوز مصلحه نفسو شديد المدير كان جايط قلت ليهو هدي نفسك ومشيت لي عبدالله في مكتبو قلت ليهو عبدالله م تخاف انا عقدي معاكم مدتو شهور يعني مستحيل اشيل منصبك وما تخرب علي نفسك بي انك تتهمني اتهامات زي دي كان غضبان م ردا علي وللاسف المدير فصلو يوم كان صعب علي شديد بكيت قدرتي حسيت اني سبب في قطع رزقو الشي الجبر خاطري عبدالله زاتو رجع لي وقال لي اسف انا غلطت عليك وانا م زعلان اني اترفدتا دا نصيبي ودا جزاي وانا مبسوط منك اتكلمت معاهو اني ح اتناقش مع المدير انو يرجعو بس رفض كلامو لي حسيت انو ريحني شويه وواصلنا في شغلنا وانجازاتنا وابدعنا في الشغل لدرجه ملفته للانظار ورامي زاتو كان متكيف شديد مني قال لي اريتو طارق دا كان طلقك من زمان ياخ انتي مبدعه قلت ليهو والفضل يرجع ليك تعبت معاي شديد قال لي بالعكس انا شيلتا منك خبره لو قريت جامعه ما اظن اكون كده عاوز اعرف السر شنو قلت ليهو ماف اي سر توفيق من عند ربنا وحب في الشغل قال لي م عارف بس نحنا لو عملنا ورش تعليميه هنا ح نكون ناجحين شديد وح نكسب دهب قلت ليهو رامي انا جيت هنا عشان انت طلبت مني كده بس انا زي م وريتكم شغلي وكفائتي في النفع اولي بيها بلدي لو ادوني كنوز الدنيا هنا م عاوزاها ممكن اجي شغل زي دا كده شهور بس لكن اكون دايمه هنا لا قال لي بجد انتي مخلصه وتستاهلي السودان كلو يكرمك وما عارف ي نوسه دخلتي لي فكره اني ارجع السودان وزي ما قلتي خبرتي اولي بيها بلدي زي ما طورنا بلاد الناس احسن لينا ننفع بلدنا قلت ليهو بالظبط وصدقني رزقك القاسمو ليك ربنا لو هنا ولا في السودان ما ح تاخد غيرو قال لي احي وطنيتك يا نوسه وربنا يحفظك قلت ليهو امين
الشغل كان ماخد كل وقتي وشبه انقطعت من الناس أخوي بقيت م قادره ارد علي رسايلو اتصلت عليهو وصوتو كان كعب وباين عليهو تعبان قلت ليهو مالك فشنو قال لي زوجتي عيانه قلت ليهو الف سلامه عليها مالا عندها شنو اديني النكفر ليها قال لي ما بتقدر تتكلم انتي كيف عامله قلت ليهو تمام انا ح انزل السودان قال لي لا خليك في شغلك وبناتي ما مقصرات والفتره دي بالذات م تجي راجعه قلت ليهو ليه قال لي لا مافي شي حسيت انو في حاجه بس ما حبيت اطول معاهو قفلت منو واتصلت لي هديه وكنت حزنانه حكيت ليها بي مرت اخوي كفرت لي ليها قلت ليها انتي كيف ونسيبه كيف قالت لي كويسين بس يا نوسه ما شفتي الحاصل قلت ليها حاصل شنو قالت لي لدن بت اخت طارق اتزكرت كلام رامي وعملت نفسي فيها م عارفه شي قلت ليها مالا ياساتر قالت لي اتوفت وقالو ماتت مقتوله ……..بتبع