رواية القاصرات الفصل الرابع والعشرون 24 بقلم خديجة احمد
نور _♡_بعد ما اطمنا على ام احمد اصريت على سلمى تمشي معاي البيت والحمد لله وافقت وعرفت انو زوجها متفهم اللهم بارك.. المهم وقفنا عربية وركبنا كلنا.. بعد وقت وصلنا البيت ونزلوا ودخلوا.. قعدوا في الصاله واستاذنتهم ودخلت خالتي غرفتها عشان ترتاخ وتنوم.. رجعت راجعه ولقيت خديجة عملت الضيافه والعصير.. ضيفتهم وبعدها سلمى جات معاي المطبخ لاني اكيد م اقعد معاهم في الصاله لانو زوجها قاعدة... قعدنا نتونس وكل واحدة تحاول تخلي التانيه تضحك ... وما حسينا بالزمن.. بعد وقت سلمى طلعت ومعاها زوجها ووعدتني تجيني تاني لانها خلاص عرفت البيت بي وين.. ما احكيلكم كمية الراحه الكنت حاسة بيها خلاص هم سلمى نزل من قلبي وان شاء الله قريب القى سديم وتقر عيني بشوفتها واطمن عليها يارب...♡
سلمى _♡_وصلنا بيت نور وكان خيااالي تحفه.. يجنن.. ما اتوقعته بالجمال دا.. وخاصه من جوا روعه.. ما حصل شفت بيت زي دا اللهم بارك.. ونور تستاهل اكتر من كدا.. تستاهل كل خير لانها بجد احن انسانه واقوى انسانه في نفس الوقت.. فرحت لاني حسيت انها مرتاحه وسعيدة ومتأقلمه مع وضعها الجديد.. قعدنا عندهم وقت طويل حتى طلعنا منهم ووعدتها اني اجيها تاني.. اكتشفت انو بيتها قريب من بيتنا.. ودي حاجه خلتني فرحانه شديد...
سديم _♡_ طول اليوم وانا قاعدة بين اربعه حيط منتظرة مسيلمه الكذاب...طول الوقت كنت ابكي وانا قلبي محروق...قاعدة معاهم في نفس البلد..بس ما قادرة اصل ليهم وبليل سمعت طق في باب الغرفه.. قربت من الباب وقلت منو.. قال لي افتحي.. فتحت وكان شايل اكياس ودخل وانا كنت ساكته ما اتكلمت... قال لي دا غداء جاهز حطي بس.. شلت الاكياس وانا ساكته وهو يعاين لي ومستغرب اكيد ليه ما سالته ونكدت عليه.. بس انا وصلت معااي للنهاية وقررت اسكت لاني بجد تعبت.. حطيت الاكل في صحانه ورصيته في تربيزة مربعه جنبها كرسيين بالمناسبه الغرفه كانت واسعه شديد وفيها اي حاجه.. مشيت اتوضيت وصليت وكان في كنبة كبيرة اتمددت فيه وقبلت بالجهة التانيه وانا ابكي بصمت.. سمعت صوته ويقول..بالمناسبه انا منتظرك الغداء برد.. رديت بصوت متقطع بسبب دموعي وقلت.. ما جيعانه.. قال لي.. .. قومي اكلي وخلي حركاتك دي.. قلت لي .. ما دايرة قلت ليك... صح ما شفته بس متاكدة مسح وشه حتى قال.. حركات الاطفال دي شنو... ما رديت بس سكتت.. رجع قال.. طيب راحتك... سكت مسافه وقال.. لو ما قمتي اكلتي بكره ما خ اوديك لي اخواتك.. وهنا كانو كهرباء ضربتني قمت بسرعه ووشي مليان دموع وحالتي حالة.. عاين لي كدا وقال هسي في داعي لي دا كلو.. رديت وقلت بتوعدني.. قال لي انا قلت بكره يعني بكره... مسحت دموعي وغسلت يدي وقعدت اكل.... خلصنا اكل ولميت الباقي ورجعت رقدت وانا منتظرة بكره بفارق الصبر واتمنى ما يخذلني زي كلو مرة..
نور _♡_ طول اليوم وانا فرحانه وافكر في سلمى والحمد لله اطمنت عليها وبليل لمن جاء احمد حكيت لي الحصل وسالني عن اتصالي.. ماحبيت اقلقه كتير.. واختصرت لي الموضوع وطمنته انو امه كويسه.. وحكيت لي عن سلمى.. وفرح وقال لي دي نهاية الصبر يا نور.. الصبر جبر وربنا بعوضك عن اي حاجه صبرتي عليها''♡'' عاينت لي وقلت فعلاً والله..
سديم _♡_الصباح قمت بدري صليت ولبست.. وبعد وقت صحى طارق وصلى.. بعد شويه طلعنا طوالي.. ونحنا ماشين حسيت طارق عايز يقول حاجه وهو ما قادر يقولها.. وفجأة قال لي ابوك..... وسرعه وقف اتلفت عليه وقلت لي ابوي! مالوو... قال لي هاا انسي قلتها بالغلط... استغربت منه بس ما اهتميت كتيرر وقفنا العربيه جنب بيتنا وانا كنت خايفه ومتردد من ردة فعل ابوي لانه ما طايق وجهي بس انا جيت عشان نور ومستعده اعمل اي شئ.. قربت من الباب وكانت الصدمه.. لقيت الباب مقفول من برا وكانه ليه شهور ما اتفتح.. وما عرفت ليشنو بقيت اطق وانادي وابكي.. اول شي خطر في بالي انو اكيد ابوي زوج نور ومشت وتاني م ح اشوفها..او ضربها او حبسها.. بقيت ابكي زي الشافعه الدايرة امها... طارق قرب مني وقال لي قولي بسم الله.. لمن تعرفي الحصل شنو... عاينت لي ووشي احمر من الدموع وقلت بصوت عالي ما دي المشكله اني ما عارفة.. الشعور الحسيته اللحظة ديك ما قادرة اوصفه او اعبر عنه.. طارق كان واقف جنبي بس ما عارف يعمل شنو... فجاءة قال لي ما عندكم قرايب هنا تساليهم.. وبمجرد ما قاال كدا خطرت عمتي في بالي.. وجريت وطارق ورايي ما عارف حاجه.. ويسأل فيني ماشه وين.. بس انا ما رديت.. وصلت بيت عمتي ودخلت بسرعه.. لقيتها قاعدة.. كنت ابكي واتكلم وقلت ليها بدون مقدمات وين نور وابوي عمل فيها شنو.. عمتي قامت مخلوعه وتعاين لي.. قالت لي بسم الله.. الله يقطع قلبكن كل اسبوع جاية واحدة خالعاني.. ادوكن رجال م تتلمن عليهم شنو كلو تمام يومين جاية واحدة هنا.. اتجاهلت كلامها وسألتها تاني وقلت.. وين نور.. وريني.. كشرت في وشي وقالت.. نور مشت من هنا ليها شهرين وما عارفه وينها... قلت ليها بخلعه وخوف.. شنو؟.. مشت وين... قالت لي يومك المشيتي حصلت بينها وبين ابوك مشكلة وطردها من البيت.. كانو موية باردة انكبت فيني كيف يعني طردها ومشت وين.. وهي براها.. وهنا صرخت وقلت ليه يطردها ما كفى العذاب المعيشنا ليه.. وين ح تمشي المسكينه..ليه هو قاسي كدا وما عنده رحمة ... قطعت كلامي عمتي وهي تقول.. يابت هووي الزمي حدك.. وبعدين احسن ما عمل لانو اصلا ما مسؤول منكن.. سنوات يربي فيكن ودي اخرة عمايلو معاكن..اصلكن ما منكن فايدة انا كلمتو قلت لي ما تتزوج المراة البي بناتها دي بس ركب راسو وقال الا يتزوجك..واها دا اخر الجزاء .. ما فهمت قصدها شنو وبتتكلم عن شنو تحديدا.. وما اهتميت اصلا عاينت ليها بحقد وبكره... الناس دي نوعها شنو من بين البشر.. قبل ما اتكلم قالت لي ممكن تطلعي نش عرفتي الحصل.. ما انصدمت ولا استغربت زي ما اخوها طرد بتو ف طبيعي تطردني.. طلعت وانا حتى ما سالتها عن ابوي لانه ما يستاهل يكون اب اصلا.. كمية الكره الجوايي ليو بقت اضعاف ومستحيل افكر فيه بعد العملو في نور.. والهم بقى همين.. والله اعلم حالها بكون كيف..