رواية بين الحاضر والماضي الفصل الثالث 3 بقول ايته عبدو
في الماضي
أنا ست البنات ما الكبيره وكمان ما الصغيره نحن كنا خمسه بنات وولد واحد ابوي عمدة القرية الشيخ بُشره واخوي أكبر واحد فينا كلنا أبوي واخوي كانوا شغالين في المزرعه ونحن علينا شغل البيت ونسرح بالبهايم كان جدول مقسم علينا مره اختي الكبيره سندس ومعاها اختي البعديها طوالي فينا دار النعيم
ومره علينا أنا واختي الاكبر مني واصغر من دار النعيم اسمها سعاد بس اخواتي سندس ودار النعيم عرسوهم واي واحده مشت مع راجلها بقينا أنا وسعاد بس كل يوم نمشي نسرح بالبهايم وفي يوم أنا واختي سعاد ونحن راجعين من السرح بالبهايم لاقانه واحد ونحن عارفين إنو ممنوع نتكلم مع رجال نهاي بس الفاجاني أختي سعاد الردة أنا من زمان عارفه اختي سعاد ما بتخاف ومتمرده وطوالي بتنضرب من أخوي أيوب لأنها بتعاند وبترد الكلام بس ما اتوقعته تصل أنها تتكلم مع واحد غريب ما بنعرفه اصلا
.........:بنات الحاج بُشره والله أنا رايدكن وعاجباتني وداير منكم واحده
سعاد: أنت منو وما عارف إنو الحاج بُشره لو عرفك ما بتسلم منه
ضحك وهو بواصل
........:ماجد والله الواحد من يشوفكن ما بقدر ما يسلم عليكن ويشاغلكن عاد
اختي سعاد ضحكت ومشينا لكزتها أنا
ست البنات: إنتي مجنونه ابوي أو أيوب لو عرفوا أنك رديته عليه وضحكتي ليه بقتلونا
سعاد:يابت إنتي ما تخليك خوافه أنا سعاد معاك مافي زول بعمل ليك حاجه وبعدين أنا بس كنت دايره اشوف نهايته شنو
بس اختي سعاد شكلها دايره تجيب نهايتنا نحنا مشينا البيت والوقت كان أتأخر بسبب حركات سعاد اختي وتسكعه مع أني حاولته معاها بس هي ما بتسمع كلام زول لمن وصلنا البيت لقينا أخوي ايوب بكورك وأنا بقيت ارجف لانه شكلنا الليله ح ننضرب عكس سعاد أختي الكانت ثابته بس كواريك أيوب ما كانت بتبشر بالخير.....
________________________
*في الحاضر::*
قطع قرايتي للدفتر دخول لبنى اختي وهي بتكورك فيني
لبنى:قومي ياخي ساعدينا شويه ما ممكن معاك قاعده في الاوضه اربع وعشرين ساعة أنا تعبته من وجدي ومصعب وكمان فوق ده محمد ود عمي مزمل ياخي لو داير مويه برسلني أنا وهو عنده اخته لكن لا أنا بس
ضحكته فيها تستاهل لأني لمن اقول ليها ارفضي بتقول لي إنتي قايلاني قليلة ادب زيك دخلته الدفتر الدولاب وأنا متحمسه اجي اتمه لكن لو مسكته اليوم كله وما اشتغلته ممكن عادي يشيلوا مني ويشرطوا عشان كده مجبوره أمشي اشتغل طلعت من الاوضه بعد ما دسيته كويس في هدومي وطلعته اشوف دايرين يشتغلوا شنو لقيت مصعب اخوي في وشي قال لي
مصعب: الأكل جهز
طبعاً غاظني كيف أنا طالعه من الاوضه شوف عينه ح اعرف الاكل جهز من وين ده حاله رجال البيت ده ما بعرفوا يقولوا اختي كيفك اكبر مثال مصعب اخوي ده هو شويه احسن بس ما بقدر يكون حنين ويعبر عن مشاعر يعني نحن اخواته ما بقدر يتونس معانا ويدلعنا لانه كده أنت ما راجل وخايب وبتتابع النسوان فهم عقيم رديت ليه باختصار عشان ما يعمل موضوع وأنا عارفها داير يفتح موضوع وبس اخوي وبعرفه
لميس:ح اشوفه ليك اسي اي أوامر آخره
قلت كلامي واتحركته من قدامه وخليته يتلفت مشيت المطبخ وأنا بكورك
لميس: أمي يمه أمي
نجلاء: يا بلاء إنتي قصري حسك ده ابوك لو سمع صوتك العالي ده بجي بكتموا ليك
طبعاً طبعاً ما أنا عارفة حتى النفس بصوت عالي ممنوع
طبعاً نسوان اعمامي القاعدات في المطبخ يعاينوا لي بقعر عيونهم مغيوظين مني عارفه هم اصلا ما بطيقوني بس يلا المهم أنا بحب نفسي
لميس: الأكل جهز يا يمه
نجلاء:بس ده الفالحه ليه ما تجي تساعدي فيه وتعملي بدل قلة ادبك دي
لميس:ما لي أنا لولدك العذبني ده عايز يعرف الاكل جهز مصعب يمه مصعب
نجلاء:كر علي مصعب ولد ما قاعد يأكل اظنه جاع
عاينت ليها بضحك
لميس:مصعب منو الما قاعد يأكل ده ما فضل ليه إلا يأكلني أنا
جريت وأنا بضحك قبل ما الشبشب يصلني وهي بتكورك
نجلاء:قليلة أدب عليك الله طقي اخوك عين شوف الوسخه دي
وأثناء جريتي دي اطقشته بزول لأني كنت بجري وبعاين ورأي...
يتبع....