رواية بين الحاضر والماضي الفصل الثاني 2 بقول ايته عبدو
رجعت قعدته في السرير بعد قفلت الباب في وش الفقر ده ياخ أنا ناقصه جات داخله اسماء وهي بتكورك
اسماء:لميس يا بت إنتي عندك توحد مالك قاعده براك والنسوان والبنات كلهم برا يشربوا في الجبنه عاينت ليها بملل هي عارفه بس بتحاول تصلح علاقتي بيهم وفي نفس الوقت عارفه إنو كل نسوان البيت بما فيهم أمي شايفني قليلة أدب علشان برد لو كنت مظلومه وبحاول ادافع عن حقي بس أنا مستحيل أسكت لكن لقيت أني في النهاية المتأذي الوحيد يعني لو واحده اتظلمت بتسكت وأنا علشان ما برضى الظلم بتكلم وهي نفسها بتقول لي ما كان تدخلي كان شاكلوني واخدته ضربتي وانتهى الموضوع هم الراضين إنو حقهم ينهضم علشان كده بقيت ما بشتغل بزول لأنه في النهاية أنا الوحيده البنضرب من أبوي واعمامي وأي زول بحاول يضربني علشان رديت بقيت بطلع شجرتي في الجنينه بقعد فيها لحدي قبل المغرب علشان ما يلقوا سبب جديد ويضربوني عشانه أو بقعد في الاوضه كافيه خيري شري لأني لو شفته ظلم ما بعرف اسكت وأنا في النهاية المتضررة الوحيده مابقدر اسكت بحس أني ظالمه زيهم لو سكته
لميس: اسماء ما تتعبي نفسك أنا ما طالعه ولا اقول ليك حبوبه وين
اسماء: قاعده في مظلته
لميس:تمام أنا ح اقعد مع حبوبه علشان ما يجيني توحد مش ده إنتي الدايره
اسماء عاينت لي بيئس نظام ما منك فايده وهي دي الحقيقه
مشيت لحبوبه حبيبة قلبى حبوبه اسمها ست البنات بس أنا بقول ليها حبوبه ستو دلع وكده هي بتريدني وأنا بريدها شديد لو ماهي في البيت ده يمكن كان قتلوني عديل بس هي بتقيف ليهم ممكن أقول إنو هي المرأة الوحيدة في البيت ده بحترموها غير كده ولا حتى أمي ونسوان اعمامي أي واحده راجلها بعاملها اسوء معامله ولو اتاخرت دقيقه أنها تنفذ طلبه بتنضرب أي والله بضربوهم أنا قلت ليكم ما عندهم احترام للنسوان شايفنهم خدامات عندهم موجودين بس علشان ينفذوا أوامرهم ما اكتر ما معتبرنهم بشر بحسوا وعندهم رأي وقرار أبدا
لميس:حبوبه ستو
ست البنات:لموسه حبيبتي تعالي والله دايره ارسل ليك من قبيل
لميس:شوفتي أنا بحس بيك أها عندك لي شنو لمن دايره ترسلي لي عديل
ست البنات:مش أنا وعدتك أنك لمن تبقي بت كبيره وواعيه وعاقله ح اوريك قصتي
اتصلحت في قعدتي عديل وأنا متحمسه لباقي الكلام كانت بتطلع من تحت لحافه في دفتر جلدي شكلو مخيط كده وعامله براها طبعاً حبوبه بتعرف تكتب وتقرا لانها خلوهم يقروا لحدي سادس وبعد كده قالوا بيجيبوا ليهم العار ونحن قرينا لحدي ما قرينا وده طبعاً بعد حبوبه هي الوقفت معانا بس ممنوع نصل ونمتحن للجامعه علشان مافي واحده في يوم تشيلها الهاشمية وتقول دايره أقر الجامعه وطبعاً أصل بنات الاسره مستحيل يعارضوا الكلام القرار ده لي أنا الوحيده الح عارض طبعاً
حبوبه ستو مسكتني الدفتر في يدي وأنا يديني من الفرح برجفوا ما مصدقه أخيراً ح اعرف حبوبه بكل طيبته دي كيف عاشة في قريه عامله كده وكيف استحملت يمكن اتعلم من تجاربها واتمالك نفسي زي حبوبه وأكون بهدوئها ده قمته حضنتها وأنا دايره اطير من الفرح
لميس:واااي يا حبوبه ستو شكراً شكراً
جات نمارق وشافت حبوبه لمن ادتني الدفتر وطبعاً هي بتغير مني لشنو ما عارفه
نمارق:مالنا يا حبوبه ما بتدينا هدايا ولا الهدايا للناس القليلة أدب بس
ست البنات:بت خلي قلة الأدب لي بتقولي عن لميس كده وهي بتساعدكن كلكن يا المابتستاهلن
طبعاً نمارق زعلة ومشت وأنا ابتسمت لحبوبه ابتسامه مكسوره اتعودته على الكلام البشكل ده منها أو من غيرها أختي زاتها لمن تتغاظ مني بتقول زيهم وأمي طبعاً يعني أقرب الاقربين لي
مشيت ودخلته الاوضه وأنا حاضنه الدفتر الح يكون انيسي الفتره الجايه وح يخفف علي ضغط البيت والناس الحوليني كنت حاضنه شديد زي الح يضيع أو يهرب مني قعدته في السرير وفتحته وأنا عايزه أعرف كل شئ بمعنى الكلمه ................
يتبع......