رواية ماذا لو عاد معتذرأ الفصل العاشر 10 بقلم ايته عبدو
نون
كنت قاعده مع عدي في الصاله وأنا بحاول اكون طبيعيه واظهر إنو الموضوع اتقفل ومافارق معاي لحدي ما جاء إتصال لعدي وبقى فجاء متوتر ووشه جاب ألوان وعاين لي ودخل غرفته وأنا والله في همي يعني ما اهتميت بالموضوع كتير لمن سمعت الباب بدق مشيت افتحه لأن عدي شكلوا عنده مكالمه مهمة لمن فتحت الباب لقيت سمر في وشي ومعاها مودي فرحته شديد دخلتهم وأنا مبسوطه بيهم
نون: أهلا والله شرفتوني
سمر:يحليلك حبيبتي بقيتي كيف ما نكون ازعجناك مع باقي الليل ده وراجلك قاعده لكن ما قدرته ما اجي اشوفك بعد جيتي من المستشفى قلت لازم اجي اشوفك والله
نون:لا لا عادي وبعدين عدي ما عنده مشكله حارس الغرفه طبيعي يعني ما تشتغلي بيه
في كلامي ده عدي جاء طالع
عدي:نون ده منو الجاء
بس لمن شاف سمر سكت
عدي: السلام عليكم
سمر: وعليكم السلام وكفاره ليها كمان واسفين على الازعاج
عدي:كفر الله سيئاتك والله مافي ازعاج ولا حاجه أنا اصلا طالع الدكان وجاي احسن تقعدوا مع نون الخوافه دي
كوركته ليه من المطبخ وأنا بجهز عصير لسمر ومودي
نون:سامعاك على فكره يا عدي
هو ضحك واستاذن وأنا جيبته العصير وجيت
سمر: والله ما كان في داعي للتعب إنتي براك اسي جايبنك من المستشفى
نون:تعب شنو هو أنا لاقياكم وين وبعدين تعبكم راحه
أول ما قعدته جاء مودي قعد جنبي
مودي: سلامتك يا صحبتي
نون: الله يسلمك يا صاحبي أنت عارف أنا من شوفتك بقيت كويسه سبحان الله
مودي: أنا ما كلمتك وقلت ليك عرسيني بس إنتي اخترتي عمو عدي بس على فكره أنا احلى منه
طبعاً سمر علشان المره الفاتت كانت في المطبخ وما سمعت كلامه بقت مخلوعه وأنا بقيت اضحك عليه
نون: والله أنا غلطانه مفروض اختارك أنت وكلامك صح والله أنت احلى بكتير حتى شعرك عاجبني شديد على فكره
ضحك وحرك راسه وشعر اتحرك نظام بوري فيني شعره
ضحكته فيه وشلته وبوسته وختيته في رجلي
نون: والله إنك حلوه يا خساره أني اكبر منك ياريت لو كنت اصغر حبه يمكن كان احسن
طبعاً هو يحليله عشان حلبي لمن بوسته وبقيت اشاغل فيه وشه حمر وقعد يضحك بخجل وامه دي ميت من الضحك على ولدها
سمر: طبعاً يا مودي ما اتوقعتها منك وكمان قدام امك لا خجله ولا استحى
نون:غيران مش
بقيت اكاويها وابوس فيه وهو يضحك وهي كمان
سمر: أن شاء الله الله يديك ولد ولا بت يملو عليك البيت
ابتسمت ليها وقبل ما ارد نطى مودي وقال
مودي:بت أنا داير بت عشان هي قالت ح تعرسها لي مش يا صحبتي
طبعاً ضحكته ضحك وسمر اتخلعت
سمر:يلا أنت يا مودي ما عندك ادب بربع جنيه
وقعد تضحك بقينا قاعدين نتونس ومودي راقد في حضني وبلعب باطراف شعري وانا وسمر نحكي كأننا بنعرف بعض من سنين لحدي ما جاء عدي داخل مشى المطبخ خته الاكياس وأنا مشيت وراءه وأنا شايله مودي بعد رفض ينزل مني وسمر مغيوظ من انه ما بسمع الكلام وقالت عذبني لمن دخلته كان عدي طالع من المطبخ عاين لي مودي الراقد في كتفي ولسه مواصل لعب في شعري وهو ما جايب خبر للحواليه وقال لي بضحك
عدي: حتى الشافع ما سلم منك وسحرتيه
نون:بطل هبل براه بحبني
عاين لي بسرحه وقال وهو ما واعي لنفسه
عدي:ما إنتي اصلا تنحبي بدون ما الواحد يحس
طبعاً انخلعت من كلامه وعاينت لي مودي لقيته مدروخ ولسه بلعب بشعري يعني ما واعي بينا وعدي لمن شاف ردة فعلي انخلع واستوعب هو قال شنو وقال لي باستعجال وهو بتخطاني ومارق من المطبخ
عدي:جبت عشاء اتعشوا انتوا أنا اتعشيت
بعد مشي أنا بقيت اتبسم براي عدي بحبني معقول ما مصدقه حسيت عيوني بلمعوا من الفرحه أنا كنت بحبه من طرف واحد وما اتوقعت يعرسني بس عرسني وما اتوقعت يحبني بس كمان بقى بحبني أنا داير اكتر من كده شنو كان نفسي احكي لمونه واقول ليه الزول الكرهتك سيرته و قلته ليك مستحيل يحبني الليله بقى بحبني بس فجاء وعيت أني بفكر في ايمن ده شنو الغباء ده وأنا القلت صفحه واتقفلت بس كيف انساه معناتها انسى ذكرياتي افهم ربنا يساعدني يارب طلعت برا لسمر وقلت ليها
نون: طبعاً ح تتعشوا معاي
سمر:لا لا يا زوله راجلك قاعد ونحن نزعجكم زاتو زوق ما عندنا والعجب المستريح ده عايش الدور يبدو إنو مودي وقع في غرامك جد جد
وضحكت عاينته ليه وهو راقد مرتاح ولا على باله شئ في كتفي ومستمر في البيعمل فيه
نون: والله أنا زاتي حبيته شديد كان ما ولدكم الوحيد كان شلته منكم زمان
سمر: أنا غايتو ما عندي مشكله لكن أبوه كان بخليك أنا ما حارسه اليوم كله ومعذبني وهو بيجي من الشغل ياهو يقعد يتونس معاه نص ساعه والنص التاني يتفقوا على وتاعبني تعب
ضحكته فيها والله حياتهم حلوه واسرته الصغيره دي احلى كمان
نون:يابت والله دي نعمه احمد ربك عليها المهم ح تتعشوا معاي يعني ح تتعشوا معاي أصلا عدي اتعشه وخلاني براي يرضيك اكل براي هو اسي مشى ينوم ما بطلع من الغرفه تاني إلا الصباح ما تخافي اخدي راحتك
سمر:ما كده والله بس أنا بتكلم إنو نحن الزاعجنكم مع الليل
نون: والله زعلتيني منك يعني أنا المره الفاتت زعجتكم مش
سمر:بري والله ما زعجتينا إنتي نورتينا
نون: طيب انتهى الكلام يلا علشان اخت العشاء أصلا عدي جابه جاهز
سمر:طيب كيف مع النايم فيك نوم ده مودي حبيبي انزل خلاص عيب كده
رده ليها بترخيم وشكلو على وشك ينوم
مودي:ماما حبه بس هي ما قالت أنزل مش يا صحبتي
ورفع راسه يعاين لي ضحكته وأنا بهز رأسي وهو طوالي رجع رقد بدون كلام كتير
سمر: وآلله مودي ده غلبه خلاص يعني هو جادي داير يشيلوا وعمره خمسه سنه راجل كبير كده
نون:خلي وآلله عسل وبعدين حجمه صغير خلاص ما ظاهر عليه وما تقيل
على كده هي قالت إلا تخت الاكل هي وأنا شايله مودي الما داير ينزل مني وكده ومشينا مع بعض المطبخ هي تخت وأنا اونس فيها وبعداك قعدنا نأكل وبرضوا قعدته مودي واكلته أنا وهو داير ينوم بالغصب غايتو اكلته وهو راقد فيني ارفع راسه اديه لقمه ويرقد تاني
سمر: عليك الله عان الولد ده عذبك كيف اسي إنتي ولا قاعده تاكلي بس اكلتي هو
نون:لا لا والله باكل
اكلنا واتونسنا وهي استاذنت ولمن شالت مني مودي كان نام ودعتهم على الأقل نسوني شويه خشيت غرفتي ورقدته ومره علي كل شريط لحظاتنا أنا ومونه لحدي أخر كلام قال لي في المطار دموعي تاني جات جاريه لحدي ما نمته
________________________
_*عدي::*_
المكالمه الما كنت متوقعه كانت من لنا أنا كيف انشغلته مع نون ونسيت لنا بس مكالمتها دي وترتني وخلتني اخاف نون تعرف بلنا وتزعل دخلته غرفتي وانا بقول ليها
لنا:اهلين عدي كيفك قلت بما أنك ما بتسأل أسأل أنا أنت نسيت وعدك وعجبتك نون ولا شنو
عدي:لنا خلينا نتلاقى بكره ونتفاهم اسي أنا تعبان بكره لاقيني في مطعم........... تمام
لنا:تمام أن شاء الله الكلام الداير تقول يعجبني يا عدي وإلا كلامي أنا الما ح يعجبك
وقفلت الخط دي شنو المصيبه دي أنا امرق من أيمن تظهر لي لنا يعني ما دايرني اعيش مرتاح مع نون أنا الغلطان كان اتقبل حياتي مع نون وما اوعد لنا بشئ بس أنا دائماً كده ما بعرف أني غلط إلا الوقت يفوت الله يستر من الجاي الله يستر...
يتبع...