رواية خطايا واجتثاث الفصل الخامس والخمسون 55 بقلم نور علي البصري
رفسة واحدة لزجاجِ الماضي فيتناثر الخوف ليجتث السر من جذوره فتعلن بداية النهاية فالحقيقة تظهر يوماً لتكون كفيلة لأجل تعرية المستور فبعض الخطايا لا تموت بل تختبأ ذليلة خلف إطار الصور المنسية فما عاد في حبال الصبر متسع للمجاملة
ـــــــــــــــــــــ♡ــــــــــــــــــــــــ
مـــاجدة..
طلعت لكيت مـاجد.. لازم المسدس ورافعة للسما يرمي طلقات
ويصيح:
ــ كتلكم أنتم جوارين ليش تتعاركون بيناتكم على طيور؟
شلون وكع گلبي كعدت فضائل بالباب وهي تردد:
ــ ما يبطل هوبزة لمن يجيب العيد شلون وكع گلبي.
طلعتله أرجف لزمت زنده وكتله:
ــ عبالي قتلوك ما تدري شصار بيه.
باوعلي وبساع جرني لداخل الحديقة وصاح بفضائل:
ــ أنتِ هم طبي وسدن الباب وأنتِ شلون تطلعين بالبرمودة.
باوعت لسيقاني البيض يلجن وهو تتبع نظرتي بحدة:
_ دعيديها و أطلعي بهيج ملابس إلا أكسر كراعينج.
_ كراعيني؟! آني عندي كراعين شبيك وياي مو أمس تصالحنا؟
رد بخباثة وبرود:
ــ قصدج تونسنا.
بقيت صافنة هذا شبيه شنو هالألفاظ صدوك كذب معقولة أمس جنت بالنسبة إله مجرد ونسة يعني ما يحبني كولش أنقهرت من عنده والنبي قهرني دمعت عيني وكوتله:
_ صار بعد ما أطلع هيج آني خفت عليك ما فكرت شلابسة.
_ هاي مو بلدج ذاك و تطلعين سيقانج ما أقبل.
_ إي حقك عيني ببلدي ذاك عيونهم مليانة ما يباوعون شي عادي عدهم لو تطلع المرة بمايوه ما يركزون بجسمها عكسكم أنتم هنا.. بس تدورون ونسة.
بسمرته ودرت وجهي وصعدت طبعاً لا عبالكم جنت بالخارج ألبس ممحتشم وأروح بمايوهات زلط ملط لا كل لبسي جان محتشم ومحترم كوني بنت عربية ومسلمة بس ردت أغثه أبو ونستنا.
صاح بية بصوت معصب:
_ أنجبي لج شنو قصدج؟
يطبك طوب شلون فور دمي ليش هيج ولك آني.. صالحتك لأني أحبك أعشقك أتنفسك وبكل برود تكولي ونستنا تبينلي ما هامتك مشاعري وما تملكلي أي مشاعر غير الغريزة والونسه فلا أنساها آني الك ظليت أصعد الدرج وكفت بطلعة المشتمل و درت وجهي إتجاهه باوعتله و غمزتله بعيني وكوتله:
_ مممم صدوك أبو ونستنا! نسيت أنتم هنا عدكم المرة مو كيان لا بس للونسة
_ هاي نظريتج ما تشملني!
بخباثة اليوم ألا أخلي روحي وياك آني تكولي ونستنا:
_ امممممم لعد وونستنا؟
_ أنتِ ونيتج شنو أقصد بيها حسب مفهومج الأثول شوفي رايح مسافر فد يومين كولش كولش أسبوع ما أريد طلايب زين.
حجاها و طلع ركع الباب حيل باوعت لفضائل و ميلت راسي شفت بنتي طبت جوة عاد هنا تجرأت.. غميتها و رحت لمشتملي و هي ظلت تشتمني وتسب وتدردم:
_ يمج بكرباج يالسحارة يالحية.
طبيت وسديت الباب باوعت للمشتمل حسيت بخنگة رحت فتحت الشبابيك أريد شمس الله تعقم المشتمل أجت عيني بمطيرجي واكف على سطحهم هنا هواي يربون حمام الظاهر المنطقة كولها متعودة على الطلايب عكس قبل أول ما تزوجت جانوا الشباب ملتهين بغير أمور نفضت الأفكار من راسي طبيت للحمام غسلت غسلة الجنابة و بدلت ملابسي أباوع للمشتمل من يوم اللي رجعتله أحس بخنگه
تمددت.. وحضنت المخدة البارحة جان مشاركني بيها عطره Black Man يذكرني بعطر ببرت الأخضر رغم عطور رجالية بس أحبها أكثر من النسائية رحت للميز أخذت العطر رشيت جسمي من عطره غمضت عيوني أستنشقه لويت شفتي وآني أقلد صوته:
ــ ونستنا شلون ضوجني وكسر واهسي.
خابرت لبنتي تصعدلي شو هاي ليش مرايحة للدوام صعدتلي وسألتها:
_ شو ممداومة.
ضحكت : غبت.
_ أيي ولويش بلة.
_ بكيفي و مزاجي شنو ماما تردين تحكميني عمتي تكول راح تبدي الأوامر وعود تتحكمين بية من هسة أكولج آني مبقيتج هنا بمزاجي مو تتجاوزين الحد ما تحكميني من تالي زين.
باوعتلها عود تخليلي حد والله بيها كتلة:
_ كوعدي نسولف.
_ تردين تسحريني مو؟
_ أسحرج؟!
_ عمتي تكول تزوجتي بابا بالسحورة وبهذلتيهم.
_ يمة آني والسحر شنو.
رحت للثلاجة طلعتلها نساتل:
_ تريكتي؟
_ إي.. من زمان متعودات نكعود آني وعمتي من صلاة الفجر نصلي ونكمل شغلنا ونتريك.
_ تمام حلو النشاط.
_ زين إذا تعرفيه حلو ليش نايمة للضحاوي.
_ آني.
_ لعد أمي.
ضحكت:
_ أي.. أمج المظلومة شوفي طيوفة.
لزمت شعرها ألعب بيه كوتلها:
ــ الإنسان لازم يفكر قبل لا يحجي ويخلي بنظره أمور المقابل شكد عمره ومكانته إن كان أب أم خالة أو صديقة أكبر مني الأحترام يا بنتي ما يقلل من شخصيتج بالعكس.. هنا راح تبرزين تربيتج زين عندي سؤال.
_ تفضلي.
_ تقبلين العالم تكول بابا وعمتج ما ربوج صح.
_ غير العب بيهم طوبة وفلك أسود غير ما جابته أمه اليجيب سيرة تربيتي.
_ والله يا أمي يا روحي وكل حياتي ثقي العالم تحجي ما تلزميهم بلسانج بالعكس يضيفولج صفات هبشة مهموشة ممترباية.
وكفت وهي تباوعلي:
_ بس آني مو هبشة ومستحيل أصير فقيرة مثلج ماما شوفي روحج لوين وصلتي لأنج فقيرة.
عافتني ونزلت تحسرت بقهر والله ولا عاجبتني هالتصرفات وأخاف لا فد يوم أمد إيدي عليها عاد كضيت هذا اليوم على الهامش.. ولليل بالوحدة فزيت مفزوعة على صوت النقال يدك كوة أفتح وأسد بعيوني لكيت نفسي مصخنة و إجتني نوبة مفاجأة رغم التزامي بالعلاج بهاي الفترة وهو اللي جان يأخر نوبات الصرع ويخليها تجي خفيفة والفضل كوله لماجد هو ينبهني ويشرف على شرب العلاج بوقته عيني على النقال يدك مكالمة فيديو بس جنت متشنجة مكدر أمد إيدي نوبة خفيفة هزتني وظلت بس دموعي تصب لحد ما هدأت حسيت بتعب عظامي وأستمر النقال يدك ويتوقف لمن سيطرت على عضلاتي عاد فتحت خط.
_ نايمة؟ والله كلت آخر محاولة.. بس شبي وجهج عركان.
_ نوبة خفيفة لذا مكدرت أرد أصلاً تشنجت عضلات جسمي.
ظل مصفن علية و ذب حسره
همس:
_ أشتاقيتلج.
بتعب كوتله :
_ لازم تريد ونستنا وإلا المن متصل بية أنت ما تحبني.
أنرسم أستغراب بملامحة بس شوي و أنتبه لحاله:
_ هاااا بعدج تذكرين حجايتي الصبح.
سكتت وهو ضحك:
_ نصبه أنتِ هم برمودة وبدي بوية أنتِ بعد مو عازبة عندج رجال يحب تلبسيله.
خجلت من التلميح:
_ إذا بعدج تحسين جونا و شتانا حار شلحي كولشي تتبردين.
_ هاااا.
_ شنو هاااا مو تشكين من الحر نزعي.
خجلت من تلميحه ممتعلمه هيج رزلته وسديته دزلي بصمة:
_ والنبي مو زاحوف ولج آني رجلج.
دزيتله كتابة:
ــ مممم ونستنا تصبح على خير أحس نفسي مصخنة أريد أنام.
تفاعل على رسالتي بأيموجي أضحكني ودزلي رسالة:
ــ راح أخابر وديري بالج ما تفتحين خط آني ما نعسان وأريدج تسهرين وياي ترى هسة إحنا عرسان يا غمة.
ــ لا.. نعسانة أنت مو مريح وين زوجي القديم الفقير.
دزلي بصمة صوت بكلمة كولش مو لائقة من أعترضت كال رجال ومرته:
_ هههههه تعودي علية ترى رجال ومرة كولشي يحجون قابل ناهبج غير مرتي.
_ روح لذيج حاجيها هيج آني ما أقبل.
سديته وغلقته ونمت ظليت أتكلب بفراشي ما أجاني نوم و أبتسمت لا إرادياً بس أختفت أبتسامتي وكعدت :
_ يااا مو كالي غمة شو يغلط علية بكيفه وآني أخلاقي ما تسمح أناقشه.
خلال فترة سفره عانيت من فضائل..
و تدفع بنتي ضدي.
أجتني طـيف :
_ ممكن أستفسر.
بگلبي كلت خير ياطير:
_ تفضلي أستفسري.
_ ليش تصيرين خرابة بين الأخوان توزين أبوي على عمتي بس متت قهر والنبي شلون تخابرلة تريد تطمن عليه ما يجاوبها و ينطيها رفض لمن أتصلت عليه من نقالي وحاجته النوب رزلني كلي لتعيديها لو الي خلكها جاوبتها من نقالها.
_ إذا ميجاوبها آني شكو وشعلية يا أمي.
_ لا تكوليلي أمي مو بنتج لأن تخربين على عمتي الربتني من عفتيني لحمة حمرة أنتِ هم الج عين و تصيحيني يا أمي؟ حمدي الله تقبلتج و ذبيت وراي ضوجتي منج لأن تركتي بنت طفلتج بيد العمات ورحتي لونستج بالخارج.
_ طـيف.. هواي تتجاوزين و دأسكت هاي عمتج دتعلمج ضدي كوليلها تخسى تخربج علية ثقي بالله إذا ما تكف شرها عني لأخلي أبوج يسحبج منها وخلي عود ساعتها دموعها تصب على خسارتج فخلي تستجن وتكعود راحة
هدت لسان دلالة مو بنية:
_ قابل آني بكيفج لو بكيف أبوي ترى وجودج هنا بكيفي لخاطري والله كلمة مني تنشحتين شحته الكلب.
وسعت عيني بصدمة لا هالبنت هواي تحتاج تأديب ميهون علية أضربها بس هي زادت بقلة أدب شنو هاي تربيتيش لزمتها من شعرها بكل قوتي ولزكت راسها بالحايط:
_ بعد بس تتجاوزين علية لو على أي شخص أكبر منج ولله أعيد تربيتج من جديد ترى جنت ساكتتلج لأن ميهون علية أضربج بس لهنا وبس و رسالة وصليها لعمتج خلي تكف شرها مني اللي حصلته من عماتج ومن أهل أبوج كلفني سنين من قهر و حزن وتهميش لذاتي.
بس هي أستمرت تبجي وتناشغ وتصيح:
ــ بسيطة إذا ما أخابر بابا وأكوله عليج تضربيني لو بيج خير مو أهلج نكروج وعافوج لو بيج خير جان أخذتي حقج من اللي بتر أصبعج يلة طلعي برى رجعي منين ما أجيتي لا تهجمين بيوت وتخربين بين الإخوان وتخربين بيني وبين بابا.. أنتِ بلاء أسود.
_ لحظة منيلج هذا الكلام مو أكول عمتج الحية الله يأخذها وينتقم منها.
_ ترى أعرفج.. أنتِ الحية و الوزازة داشوف شلون صار بابا يعامل عمتي بتهميش وشلون يدلل بيج ترى الليلة اللي بات بيها يمج.. جنت أصنت على غرفتكم طبيت للمشتمل وما حسيتوا شنو عود عشاق أنتوا والله باوعتلكم.
وجهي صار أصفر ودم مبقه بية طفلة وتتصنت على علاقة زوجية وتشوف هالخصوصية عزا شنو من طبع هذا تختل وتتجسس وهاللسان الحلو و التعلق وراء تتحول هجومية من جوة لجوة شفته برحمة.. ظليت أنهت حيل تضايقت بشكل مو طبيعي إيدي اللي ترجف فتحت أول دكمة من البدي مالي لأن حسيت روحي حختنك:
_ ترى عيب اللي سويتي تراقبين أبوج وعلاقتنا الزوجية ألا أكوله من يجي يطيح حظج أدبسز والظاهر أنتِ متعلمة على هالسالفة وتراقبينه وي نسوانه اللي تزوجهن مو؟ هاي تربية عمتج أدبسزيات.
عبالي من أهددها أكول لأبوها راح تخاف بس صدمتني و بكل وقاحة ردت:
ــ كوليلة.. وما أخاف أنكر وكل شي ما يطلع بيدج سبق واشتكت فيروزة.. ونكرت والنتيجة ضربها وزعلت راحت لأهلها.
_ الظاهر أنتِ تسوين طلايب ومشاكل بين المرة ورجلها مع الأسف البنت اللي بجيت عليها سنين لأن كالو ماتت طلعت عايشة وتربية سز على عماتج.
_ يعني عماتي تربية سز؟
سكتت بس ظلت تلح ألا اجاوب
عصبتني فكوتلها:
_ مو بس سز أكبر من السز يلة ارتاحي
أبتسمتلي وطلعت وهي تهدد:
ــ أشتكي علية ونشوف يصدك بمنو أنتن نسوان مو أمينات.
_ والله أنتِ أم المؤامرات مبينه.
_ قصدج آني سببت مشاكل طلاقاته لا أبد وأكو دليل أصلاً آني بس أنبهه لأن هو يطلع والمسكين ملتهي بين محلاته وبين شغله شمدريه ببيته حياية.
بس طلعت دزيتله بصمة:
_ يمتى ترجع الورث ما يهمني وحتى أسمي بالتحليل أثبته عوف كولشي وأرجع ربي طـيف.. لا يرجع يتكرر الماضي.
سمع البصمة وخابر شنو أقصد وشنو يتكرر الماضي عاف كولشي ولزك بهاي
حجيت بصراحة:
_ بيها أندفاع رحمة لا تزعل ولا تعصب ترى هذا الواقع سبق وحذرت رحمة.. و
أستمرت هي برضاتها أنت ما صدكتني ليومنا هذا جرب تثق بكلمتي و تصدك بلة رحمة.. ضاعت وما تعرفون ميتة لو عايشة عاد تلاحك لقليلة الأدب بنتك والنبي ركعتها بالحايط فلا تزعل ولا تعتب أصلاً لو باقية بس تتمقلج إلا بالصوندة أربيها لهالأدبسز.
_ غير أفهم شكو وموضوع رحمة.. شجابه بالنص وشعلاقتها ببنتي فهميني شصاير بالبيت.
سولفتله كل نقاشنا:
_ تمام أتصل و أفهم منها.
_ تفهم منها شنو الأفضل تربيها زين.
_ يمعودة حالج حال هالطفلة بالذاته متخابرين رجلج آني تشوفيني شبية ما بية لو بس إذا أكو طلايب تتصلين وتشتكين.
_ عمي ربي البنت لا تدلل ولد ولا بنت دلال مثل دلالك خراب وذنب رحمة.. بركبتك أنت جنت ما تقبل أحد يعاقبها أو يحاسبها وتغطي على كل أخطائها و تصرفاتها والنتيجة شنو صارت صيد سهل للؤي..
سكت وطبعاً يسكت شيكول؟ هو فعلاً السبب المباشر بشخصية رحمة.. ما أنزه نفسي من ذنبها بس الحقيقة إن دخولي لبيت مـاجد.. كان دمارهم لأن لـؤي دمر كل الناس اللي إلي علاقة بيهم إنتقام موروث لأمي و لأبوي هو إنسان مريض بلا عقل ولا حكمة وحملني ذنوب كل هالوادم.
_ المهم.. عوفج من هالمشاكل التافهة ولا تدخليني بطلايب نسوان المهم هسة...
قاطعته:
ــ دنبهك عن البنت باجر أنت نفسك ما تكدر تشكمها لو غلطت لأن تستسهل أبسط الهفوات لازم تربيها صح والنوب يبرر طلايب نسوان هة هاي الحجاية لو متعاركة وي حماتي وي أختي وي إي مرة غير بنتك هنا لا ستوووب رجاءًا إذا متعرف تربي آني أعيد صقلها عشتوو هاد الحبل و يبررلها وباجر لو أختفت مثل عمتها تعال هد علية وكولي أنتِ أمها ووين بنتي ومسؤوليتج و كوله منج منتبهتي ووو خريطك الما يخلص سالفه أختك ليومنا هذا تسأل وين رحمة عبالك آني جنت سارحة بيها ترى عصبتني منك اوووي ما يحاسب أخطائه بالتربية تالي يهد علية لو غلطن عشتو.
_ أهدئي وعوفي الموضوع هسة بنتج دزت بصمات أكمل منج وأشوف شنو شكواها وراها نتفاهم بالبنت هسة خليني أكل تبن شوفي رحت للرجال اللي دزني إله العقيد سولفتله وانطيته الأسماء وحتى حجيتله عن الأستاذ سـهيل.. زوج أمج وشلون أمج خربت بين الإخوان وتاليتها أفترت أفترت ورجعت لأبن خالها أخذته هنا الرجال صفك إيد بإيد وكال أنت من طرف بيت أستاذ سـهيل هذا صاحب فضل علية أمرني شتريد.
دمعت عيوني والغصة وكفت ببلعومي تذكرت بأيام شدتي ببيت لـؤي.. جنت أحلم ببابا سـهيل.. وهو يحميني وكلما حلمت بيه وشفته تنحل قضيتي من يومها وآني أستبشر خير كلما يمر بطيفي أحسه ملاك حارس يرافقني:
_ سبحان الله.. أمس حلمت بيه وما يوم حلمت بيه إلا وتنحل قضيتي ورى فترة أحسه يرافقني سندني بحياتي وبقى ساندني وحاميني حتى بعد وفاته رغم آني جنت السبب المباشر بموته.
ظليت أبجي:
_ كافي بجي و ان شاء الله تنحل قضيتج لصالحج و تأخذين كل حقوقج.
_ آمين ماجد وسلملي عليه وكوله ذمة إذا تفاوضت وياهم.. وما لكيت حل يتركوني بيه بحالي إلا تنازل عن الورث ولله أتنازل إلهم بس لا ينكروني أريد أعيش بإسم إله قيمته ومكانته بالمجتمع الهوية أهم عندي من أموال الدنيا كولها تفهمني مـاجد..
ضحك:
ــ أعرفج شايفة وعايفة بس هذا حقج وحق ذريتج من بعدج.. وإذا أسمج أستعدتيه ذاتياً ورثج تاخذينه أصلاً تقاضيهم على التمويه والتزوير وعلى كل فلس صرفوه من أموالج و هيج وأشوف نهاية هالمحامي أذكر يوم شفته بعزيمة الحجي تذكرين من كتلج ما أرتاحله وشلون جان يتمضحك وياج.
_ تراه رجل عمتي!
ــ وإذا هذا الهتلي يدور مناصب ويريد فلوسج يصعد بيهن يريد يقوي ظهره ويشتري ذمم لأجل مصلحته.
سديت الخط منه هنا شوي وحولي بصمات بس أصلهن تسجيل صوتي مقتطعات فقط مقتطفات لكلامي و مختارة الطفكة بنتي الكلام اللي يوحي آني أذم بأخلاق عماتها وجامعة شكو شي يأول ضدي.
خابر يضحك:
_ عبالك مو أم وبنت أنتِ تشكين منها وهي تتآمر و مسجلتلج و قاصة كل الحوارات مختارة اليفيدها بس كلامج على أخواتي ترى ما أرضاه لا تعيديه أعرف بنتي أستفزتج بس لخاطري لا تحجين عليهن رجاءًا.
تفشلت صح محد يقبل على أخواته بس هي ضايقتني:
_ أعتذر منك وفعلًا غلطت.. بس هي كولش أذتني وتلح والله أتهمتني آني أوزك عليهن وحجت هواي حجي لو أملك عقل بنتك المـ،وسـ،اد اليـ،هودي جان لحكني الخير ومو هذا حالي.
_ أعرفها لو تآمرت وأعرف أميز بين صدقها فآخذ بيه وبين كذبها بس بعد متلطف بيها و أعرف منو وراها وثقي بالله مو ناسي بس خليني أتفرغ وأحل هالقضية قبل أندفع أي ماجدج القديم اللي تحنين إله الغبي عمي عوفي ذاك ميفيد غبي ويتهمج بسهولة ويأذيج خليج بالجديد خوش زلمة يفكر وعقله بوليسي وما يظلمج.
ورى ما سديته منه صعدت فضائل.. و الظاهر مخابرهن ومرزلهن بس يمي ما بين لأن أجت ووراها طـيف.. قلقة وخايفة تتختل ورى عمتها:
_ وزيتيه يدز تهديد لطيف بس يرجع يكطعها تكطع بحياته مكاتلها ألا من أجيتي صار يضربها مرة لأن رادتج وهسة بسببج ولج أنتِ أم السحورة الساقطة شردتي و عفتيها عميتي عيون أخوي لدرجة رجعج والله يدري هاي السنين كم زلمة لاعب بيج ولج تمدين إيدج على بنتي إذا ما أموتج.
هدت تريد تضربني هنة طبلي للمطبخ جنت مصدعة داريد أسوي كهوة لزمت السجين:
_ خطوة وحدة ثقي أنحرج سبق قتلت شخص آذاني و مستعدة أكررها فتحذري مني.
تراجعت هي باوعت لبنتي تحضن عمتها وتصرخ:
_ لحكونا مجرمة تريد تذبح عمتي.
_ أشش لا تلمن الوادم علينا هاي سجين رجعتها بس لا والنبي أحطج وابيس بيج طوختيها طـيف.. تنقلين حجي وتهيجين البقرة عمتج بلا عقل.
خزرتها لبنتي وكررت:
_ مو عيب نقل الكلام عادة مو حلوة.
ردتني:
_ تضوجين عمتي و تهدديها وتردين أسكتلج ترى آني ما أقبل وجودج صار متعب لعمتي ما عبالي هيج حتى بابا الما يرفضلي طلب صار ضدي وكلي آني الج بس أرجع أربيج مدللة صايرة أدبسز الا أكطع الصوندة عليج كوله منج رجعي لبلدج ما أريدج.
أنقهرت من كلامها:
_ ليش ولج ترى عمتج هي اللي باكتج مني وهسة توزج علية تكرهج بية.
_ عمتي ما تكذب تكول وزيتي بابا يعاركها وهاي الأيام ماله خلك عمتي ويحجي معلك وياها وتأكدت من دزلي يهددني بس يرجع أكيد وزيتيه علية.
_ لا والله ما وزيت ولا حجيت على عمتج أما أنتِ آني أمج أشوف تصرفج يضرج مستقبلاً أكيد أنبهه يأدبج بنية متحترم ومشكلجية و تتصنتين وتباوعين علينا آني وأبوج بفراشنا
دورت فتحة بغرفتنا منين طلعتي من زرف بالباب القديم لازم يتبدل أما أنتِ يا فضائل.. معلية بيج وهو يجوز بباله موقف منج خابريه تأكدي شبيه وياج لا تظلمين حظج وبختج وتتهميني سبق جنتي سبب تسليمي للؤي.. أنتِ وأبوج ما باريتكم ذمة بدل مترفضون تنطوني لعدوي.
ردت طـيف:
_ يعني ماما.. ما وزيتيه على عمتوو
_ أبـد.
فضائل: طيف.. هاي حية لا تصدكينها تريد تحرمني منج ومن أبوج وحدة أجت من تالي تدمرنا لازم تنطرد.
طـيف: ليش ما ترجعين لبيتكم ترى أريد عمتي أنتِ تردين تبوكيني منها.
ظلت وحدة ترفع ووحدة تكبس تعبت منهن كمت وجريتهن طلعتهن برى قفلت المشتمل عشتو:
_ يلة لا تصعدلي وأنتِ طيف ما يسوى دموعي عليج بعتيني وتميلين للي باكتج مني بس الله موجود يمهل ولا يهمل يا فضائل.. آني مستعدة أخسر الورث اللي أنباك مني ما مهتمة والله بس أريد أثنين أسمي وبنتي.
من ورى الباب الغلقته بوجهن حجت فضائل:
_ كوترة تريد بتها طـيف يمة يلة ننزل هاي جاية من الخارج ورى ما شبعت دياحه ونسة وزلم هسة تريدج.
طيف: بس عمة خاف زعلت مني يمكن قسيت وياها بالكلام مدرسة الإسلامية تكول كولشي ولا عقوق الوالدين وخاصة الأم.
_ أمشي لج أم عقوق هي هاي هم أم وتخافين تعقينها أمشي كدامي لا دفرة أشمرج من الدرج و أفتك منج.
_ااخ.
سمعت صرخة بنتي عبالي دفعتها من الدرج بساع بخوف أم وقلق أم همشوها و أخذوا بنتها أندفعت وفتحت الباب وآني أصرخ:
_ يمة بنتي بس لا دفعتيها..
جريت نفس الحمد لله هي تنزلها دفع ما شمرتها من الدرج بس ما أنطاني گلبي فصحت:
_ ديري بالج لا توكعينها تنكسر شنو من گلب عندج والنبي أموتج وراها بس كون صدوك تأذين بنتي.
التفتت فضائل.. الي وغمتني:
_ لا تفرحين مصيرج أرجعج منين ما أجيتي و أخلص منج شكد أكرهج.
سديت الباب أبجي شلون مسيطرة على طفلتي ولكم ما تهنيت بيها و لاحظت الأيام الي ماجد مموجود طـيف تجيني بالبوكة من تجي من مدرستها تفتح الباب على كيف تصعدلي بسكوت عرفت بنتي فطيرة مو بگلبها حقد والله مو لأن بنتي وابرر الها بس لاحظت تندفع من عمتها وتالي تجي تريد تراضيني وهم متخوفة من أبوها حسيتها تخاف منه وتهابه.
جنت أنظف طلعة المشتمل والدرج من دخلت على كيف تأشر باي لصديقاتها بالخط وهنه من الجامة يأشرلها
شفتهن من حايط طلعة مشتملي أعلى الدرج باوعت لباب بيت عمتها مسدود وصعدتلي على كيف ضحكت:
_ ترى مبايكين أنتِ بنتي الي شنو خايفة منها لو عليها لا تزعل لأن تصعديلي.
_ آني أحبها و أضوج تنقهر وأنتِ هم مأذيتهم حجتلي عنج وعن حقارتج وياها.
_ آني؟ حقارتي! أستغفر الله يارب بعد شحجي شكول هو بقى عليها تتبلى علية.
_ ماما جبتلج كيكة ونساتل أشوفج تحبين الحلويات أكثر من طبخ..
_ المن أطبخ منو يأكل وياي و أطبخ وأتعب هي نستلة لو باكيت بسكت وعصير كافي لو أفتح جبن كرافت لو بيض سلك والسلام عليكم.
_ خوب أعترفي و كولي مو نادرة بالطبخ وتطبخين ترى بابا يحب المرة السنعة اللي تطبخ.
_ و أبوج وينه هو مسافر بلكت الله ينور طريقة ويحل شغلة أسمي بطريقة تفاهم ودي بلا محاكم ولا طلايب.
_ ماما أكدر أفوت.
_ ما مانعتج بس كفيني لسانج وتعلمي الأحترام حتى العالم تحبج.
فتحت الثلاجة:
_ فارغة بس أجبان و بيض.
_ أبوج مخلي مصرف لكيتهن بكنتوري وكاتب ورقة خاف أحتاج شي ولو عندي فلوس محولتهن عملة هذا البلد ونزلت الصبح أشتريت أجبان وبيض بالثلاجة ومعلبات بكاونتر المطبخ ضميتهم جعت وأنتِ أكيد جوعانة راح أسوي سلطة فطر خضروات وأضيف ثومية وهاي السوالف.
_ ماما هذا مو غدة هاي مقبلات ترى أمس خابرلي بابا كال يشيل العقوبة مني إذا تصرفت بأدب وياج وإذا أهتميت باكلج وصاني يكول أمج شلون عايشة بالخارج كوله نواشف مشوفيها أجتني ناشفة ميبسة.
_ تتأدبين وي كل الوادم مو بس وياي أوك.
غلست و أستمرت تحجي عني الأم الناشفة فتفاخرت:
_ آني ناشفة؟! متوهمين أصلاً هواي شابات تسوي نظام ورياضة حتى توصل لخصري الكوري ورشاقتي الفرنسيه و قوة لياقتي الأمريكية.
ضحكت بنتي وآني اتغامزلها:
ــ ماما ناقصج طول وتصيرين واو.
_ ها ولج بنت مويجد.. دتقصفيني دتمدحيني مفهمت؟ توني جنت منغرة بروحي نزلتيني من عليائي دكوليلي أنتِ قصيرة وفضيها تعاي سويت أمس كيكة بركانية نوتيلا حشيتها وما أكلت تعاي حبيبية أمج.
طلعت الكيكة وقطعتلها قطعة وخليت كدامها قوطية راني:
_ سودة علية أكيد بنيتي جوعانة إذا بمصرفها جابتلي علاكة نساتل وعافت روحها.
تذوقتها وكالت:
_ أطيب كيكة أكلتها بحياتي.
كلت بلهفة:
_ آني تعلمت طريقة الكيك الجاهز من أرقى محال صناعة الكيك ببلدي ذاك من صاحبة محل كيك جانت تتعالج نفسياً يمنا وتصادقت وياها وصرنا صديقات ونتواصل فدزتلي وصفات حلويات بس طبخ مو هلكد بيه لأني هناك أغلب وقتي شغل لذا أعتمد على كافتريات ومطاعم قليل آكل طبخ بيت وهم صاحبتي أجنبية مو كل طبخهم آكل البيت أقصد يعجبني أعتمد آكل المعلبات أكو معلبات طبخ كامل عندي مرق فاصولبا معلبه دولمة معلبه ومعلبات تونة و سردين باقلاء هواي شغلات كاملة بس أحررها وتعوض بديل طبخ بيت.
كامت و أنطتني نظرة ممقتنعة:
_ آني معلية رجلج كلفني و مسؤولة عن تغذيتج و كال لعمتي تخصص ألج ميزانية مركزة لمسواك مركز يريدج مدنفشة شعلية آني وهاي المعلبات ممنوع بيها مواد حافظة هاي تاكلينها مرة بالأسبوع مرتين مو يوميه يلة أنزل تأخرت و هسة عمتي تقلق علية حلينا من وقت وما أنتظرت السايق أجيت مشي.
_ إذا أبوج ما يقبل وخصصلج خط يوديج ويجيبج لشنو بعد تجين مشي شوفي يمة لا تعيديها سايق ما يجي سايق يعطل ترحين للإدارة تتصل بينا نجي نجيبج.
_ غلسي غلسي والله كيكة تخبل أكدر أخذ قطعة من الكيك الي أكلها جوة وآني أدرس أضمها لليل فدوة وهم قوطية راني تقبلين آخذ؟
_أخذي اللي يعجبج وراح أسويلج هاي الأمور آني نادرة بالمعجنات.
خليتلها ثلاث قطع بصحن و خليتلها وياها زنود ست أشتريته من المحل بس آني.. أعرف أسويه أبتسمت بنتي مثلي هم تحب الحلويات راح يومية أسويلها شي الف الحمد لله ربي هيج وبنتي طلعت عايشة شعور الأم وآني أطبخلها حلويات معجنات اللي تحبهن هي فرحت لأن ترستلها الماعون مدت أيدها و أخذت باقي القطع كولهن حسيت هاي تلملم لعمتها تتنغصلها كلت بنتي حنينة أبد والله ما ضجت ولا شي آني شريد منها قابل أريد بس تتربى و تتأدب وتصير خوش بنت العالم تمدح وتكول بنت ماجدة والنعم منها.
نزلت تركض صحت عليها:
_ ديري بالج ولج لا توكعين.
سمعت صوت أبو الستوتة و أخذت من الكنتور من الفلوس البقاهن الي ونزلت أسوك فواكه بس سمعت ضحك فضائل وبنتي ظليت واكفة يم الباب الخارجي وعيني على باب بيت فضائل مفتوح أشتعلت داخلي غيرة على بنتي من عمتها فدخلت للبيت أنس نس على كيف أشوفها أنطت الكيكة لو أخذتها إلها لكيت فضائل.. تأكل وتدردم:
_ زين أمج الخارمة تعلمت تسوي كيك بيها الخير ههههههه والله هاي الكيكة سحرتنا حرمتنا الغدة هههههه أكيد منا ورايح تغدي وتعشي لو تريكه لماجد كيك و الأنسولين يعلك عند الزلمة.
حجتها وبنتي الخاينة تضحك:
_ عمي مو لهاي الدرجة والله حبيت الكيكة وتنغصتها وغصيتها عليج كلت ألا أنزل لعمتي منها.
شافتني فضائل الخبيثة رجعت كالت لطـيف :
_ ولج طـوفة علك سكري ركضي خايبة ماي بساع مو خوش شغل كولش حالية تسحن.
هنا تدخلت وحجيت:
_ ليش تأكلين حلا إذا عندج سكر.
_ ما عندي بس كيكتج تسوي سكر وجالي بمعدتي.
دنكت طـيف.. متفشلة وصارت حمرة لأن هي كالت تريد الكيكة لليل وهي تدرس وتعرف كذبت درت ظهري وطلعت صعدت فوك هالبيت شهد أغلب الأحداث حلوة ومرة بزواجي لدرجة صرت أختنك بيه مرت أيام ثانية يمكن فوك الأسبوع واكفة يم الشباك أباوع للمطر هنا قليل مطر ومو مثل عواصف ذاك بلدي الثلجية.
رنين رسائل نقالي رسائل من زملائي بالشغل ولكيت سـؤدد.. مراسلة ناوية ترجع للبلد الأجنبي وتسأل أستقريت لو أرجع وياها خابرتها بساع فتحته:
_ هـلو..
_ هـلاوات سوادي راح ترحين و تعوفيني؟
_ شبيدي عليج.. هواي تأخرنا والتر وشغله وشغلي آني وهم عمي إجه بس صارله مجال بشغله وأخذ بخاطر حسين.. بأمه..
_ زين إجه زحمة ما واصل بالفاتحة
_ تعرفين أشغالنا هناك و إلتزام والاجايز مو بسهولة أنتظر إجازته السنوية أخذها وإجه العالم هنا ما تعذرنا عبالهم بلاد العالم هيتة مثل هذا البلد شتكولين ترافقينا ونسويها شردة من الغثيث مالج لو أستقريتي وناوية تبقين؟
_ روحي خية آني لهسة ما قررت شي أشوف لوين تصفى بية هاي الدنيا وشتطلبني بعد من ثأر وطلايب حالياً مستقرة والله كريم.
_ هو أنتِ رجعتي و عقد عليج زعرور أستجني مدام تحبيه مـاجدة.. مدام الرجال لا يضرب لا يهين بس مطلع لسانه علية وعلى العالم ويمج طلي مخضرم.
ضحكت:
_ اليسمعج يكول لازمته لزمة من أذنه و أسحله شلون سمعة هاي يمعودة دخلي أفك روحي منه أول خية أنتِ روحي آني باقية و اتحمل كولشي لخاطر بنتي لازم أضحي.
_ زين ودوامج؟
_ أتركه شسوي حالياً عندي إجازة دون راتب و راسلت مسؤولي و شرحتله وضعي عندي قضية وطلبت أجازة طويلة دون راتب بس أشوف شلون تصفى حياتي إذا أستقريت كولش أرجع للبلد أصفي أموري هناك.
_ لو يقتنع تاخذينه هو وبنتج والله أفضل من عيشتهم هنا.
_ بعد شسوي بقت يمه مو كيفي.
_ قـنعيه..
_ عود أقترح عليه بعدين.
_ والله أنتِ ومـريم.. شلون تعيشن وعدجن ضراير.
_ شنسوي بيدنا؟ مـريم.. هي الدخلت على ضرة وآني ميتة ومفقودة وتزوج وراي ثلاثة و أستقر وي فيروزة.. المرة مشايفتها ولا أريد أشوفها هيج أحسن كلمن بيتها وما نتلاكه.
_ أول وتالي تتلاكن حبي.
_ بعد شسوي هم حرام أوزه تعال طلق المرة وعنده منها طفل.
مــــريم..
صعدت كم باية من الدرج أريد أنزل بردة الشباك اللي مطلة على الدرج
حسيت بدوخة ووكعت على جانب صدري صرخت :
_ ااااخ.
ركض عـون.. وهو قلق:
_ شبيها البردة وتنزليها بس لا أنكسرتي.
_ النظافة حلوة عـون.. بس أسندني.
حسيت خنكة بصدري و ألم بضلوعي
أخذني للمستشفى إشاعة للضلوع الحمد لله سليمة بس من وراها بقيت أيام مصخنه مالي خلك وطلعت أسفل أباطي مثل دنبلة حيل خفت هاي شنو
مرت بذاكرتي أمي ومعاناتها لا يا الله ورثت مرضها يارب وأولادي وعون ما أريد أموت أنهاريت بهستريا وبجي ونوح لدرجة إجت وجدان:
_ ولج شبيج خية أحجي.
_ بية سرطان ولج حموت.
_ لا اله الا الله ولج شنو هذا الحجي.
راويتها الدنبلة صارت هي صفرة وعـون واكف بالباب وكع على رجليه خايف:
_ بدلي يلة للمستشفى.
سوينا التحاليل وكالو باجر لازم أسوي خزعة وزرع خلال يومين سوينا كل المطلوب وبقى ننتظر أسبوع تطلع نتيجة الزرع هنا دزيت بصمة بكروب الصديقات:
_ هلو بنات يمكن ورثت مرض أمي نفس الأعراض بنات إذا متت لا تكطعن بأولادي شيلان خية أمانة الله ورسوله ولدي.
ظليت أناشغ وأبجي بس محد شافت البصمة أكيد ملتهيات كلمن وضيمها لليل أول وحدة شافت بصمة سـؤدد وراها شيلان.. أما ماجدة.. مختفية زوجها راجع ويمها وهي إذا متواجد زلمتها ما تراسلنا ولا تلزم نقال كولش قليل تكنك.
مـــاجد..
بقيت 10 أيام بالعاصمة ما عفت هذا الشخص ولا رجعت إلا رتبلي الوضع وي جهات بمحافظتي تساندني بقضية مرتي
موضوع قضية مـاجدة.. أخرني أدور بملفات بيتي أخواتي اللي بقن وخاصة فضائل أستعملت بذيج الفترة أسلوب الأستفزاز وياهن كولهن حتى ماجدة.. لمن تأكدت برائتها حتى قبل لا أعرف نسبها خففت الضغط عليها وبقى بخاطري أختي التعرف أمور وشافتني من ردت أقتل ماجدة.. أول ما وصلت وقتها فقدت كل أعصابي وإدراكي يومها رجعت الغبي ماجد الي دون ميتأكد وتفكير ودليل يحكم بظلم لبنت بريئة لو ما صرخت طيف اللي رجعتني لعقلي و وعيي وألا تحولت قاتل بذاك اليوم..
تمددت ورى مراسلات ومشاكساتي لجيجي سديته منها وآني أفكر بقضية رحمة.. أكو حلقة مفقودة والحل صرت متأكد 100% يم فضائل أنكشفت الغشاوة عن عيني لدرجة صرت بارد وي أختي تتصل ما أجاوب أخذت موقف قوي منها وأذا أخابر على نقال طـيف.. أنطي تعليمات توصلها لعمتها
مثل تخصص مبلغ وميزانية لغذاء مركز لماجدة.. من يوم سرقتني وحدة من نسواني صرت ما أخلي فلوسي يم مرة أبقيهن يم أختي وأخلي فلوس طوارئ يم فيروزة.. واللي قبلها سابقاً وحالياً خصصت هم طوارئ بقيت يم ماجدة..
أتصال من فيروزة:
_ وينك أبنك وكع وأنكسرت إيده.
_ شنو أنكسرت إيده أنتِ وين جنتي هاااا أميش أنتِ ملتهية أكيد بكروبات صديقاتج وبنات عمج وخوالج والله دخلي أرجع إذا ما نعلت والديج و أسحب النقال منج.
سكتت وراها صوت أخوها يهوبز:
_ شو أنت يومية ضاربها وطاردها وما تجي تأخذها وتجيب شيوخ عشاير تردها أنت ورطة تورطنا بيك.
_ خوية هذا آني ضاربها؟ لو حارمها من حقوقها؟ عريانة ما أجيبلها ملابس؟ طبيب؟ كل مستلزماتها؟ ما مدللها؟
_ المرة تريد كلمة وشقى وضحكة وغزل مو بس ماديات.
_ كل هذا موفره بس مال أسكت على إهمالها للطفل ولبيتها لا ما أقبل بهذا أبد أحاسبها تزعل تلم ملابسها أنتم علموها الحياة كولشي بيها يصير والمرة الحوك تسلك ببيتها وتكسب زلمتها.
_ مرجع أم طـيف.. وتريد تسكت هي تزوجتك ما عندك مرة
_ بعد صارت عندي مرة خلي تتأقلم هذا وضعي وتتعلم عليه بس لا تشجعوها ضدي وعلموها لا تسمع لبنات عمها وخوالها ومدري منو ذن يغارن منها ويردن يخربن بيتها.
ورى ما كملت منه وعدني بس أرجع يجيبها وراح يعلومونها وينصحوها تلم بيتها لأن عدها ضرة صارت وما يصير تتيه حياتها وياي وتنطي فرصة لضرتها تتملكني وحدي ضحكت على تفكير هاي الناس آني محد يملكني غير ربي
من رجعت دزيت رسالة لفيروزة.. لأن مرحت لبيت ماجدة.. و أول روحتي لفيروزة.. لأن من فترة بس طلايب وحبيت أراضيها هم خطية و فعلاً تزوجتني ما عندي مرة جايب هدايا الها ولسند نزلت جنطتها هي وسند.. أما جنطة ماجدة.. وطيف.. بقيتها داخل صندوك السيارة طبعاً ما بلغت طيف.. ولا ماجدة.. برجعتي طيف تلح الا أجي وتتمزعل.
دخلت لبيتي ركضت حضنتني و أنتبهت أكو تغير بيها الشعر الأسود تحول لأشقر طوخ أصفر حول بشرتها الى شحوب لأن ما ملائمها اللون:
_ شمسوية بروحج.
_ دكيت تاتو و صبغت وميش الوحدة تهتم بروحها.
_ ليش ولج كل أنسان وخالقة الله ومنطيه لون الشعر ورسمة الحاجب التلائمه.
زعلت:
ــ ما عجبك مو أكيد تحب شعر أم طيف.. إي أعترف.
أبتسمت على هاي الغيرة اللي تحولت مرض:
_ كل وحدة وجمالها الي الله خلقها بي وأحب عليج شعرج الأصلي.
حضنتها وبست كصتها:
_ وين سند شلون إيده خوما كسر قوي.
_ أنطيته علاجه ونام مشتاقتلك.
_ وآني هم.
حضنتها وشلتها لغرفتنا بس مر طيف عيون بنت عسلية مخضره ووجه ناعم مدلل مر بخيالي هزيت راسي أنتبه ها ماجد.. مو ظليت تلعب بذيلك كل وحدة والها حقوقها وأنت كدها تراعي الله بيهن.
بقيت يومين يم فيروزة.. وبطريقي لبيتي ذاك وصلت فيروز.. وسند لبيت أهلها لأن ما أقبل تبقى وحدها وآني ممتواجد و أبات بعيد.
تبجي متقبل:
_ هي مرة جبيرة عجوز مو مثلي المن تبقى يومين يمها خليلها ساعة كل أسبوع وأنت كلك الي وحدي.
مغلس ما أجاوب هو أريد بس أوصل لبيتي ذاك مشتاق لجيجي ظلت تحجي وتبجي:
_ نزلي وصلنا آني أجي عليج ورى يومين وكلمن والها حقها يمي بما يرضي الله.
_ يا يرضي الله أنت أكيد تميل الها وتحبها أكثر مني.
_ أم سند.. كافي رجاءًا يلة وصلتي هياتها أمج طلعت فتحت الباب.
نزلت معنفصة وهي تنفض نفسها
شلت سند.. أنطيته لأمها:
_ شلونج عمة..
_ يا هلا ومرحبا.
_ هذا سند وديرو بالكم عليه وانتبهوله حرك يوم فلاونزة يوم مكسر يوم مفشوخ لا يوم النوب تخابرولي أبنك توفى.
سلمت ورحت دخلت لبيت فضائل
لكيت فضائل تنظف باوعتلي ودارت وجهها زعلانه و تدردم:
_ تجي علمود المجرمة الفوك عشتوو ولك هاي سبب أختفاء رحمة واللي صارلك وصار لأهلنا لويش ما تطردها يمعود وجودها طاقة سلبية بالبيت.
_ فضائل.. مدام مستمرة بالتهم لعد نخلي نقاط عالحروف ماجدة بريئة و المذنبة أنتِ أو مو ذنب يجوز الحقيقة عندج لذا تعترفين لو أكسر باب غرفة رحمة.. وأشوف شضامة أنتِ بيها أحتمال أمور تثبت أختفاء رحمة لذا أختصري علية الوقت و أريد مفاتيح غرفة المرحومة دوم أطلبهن تترددين محتاج أشوف غريضات أختي كولش مشتاقلها وهم أشوف يجوز مثلاً فايتج شي؟
_ لا غرفة رحمة أنغلقت بس آني أنضفها و أغلقها ليش تعذب روحك خلاص خيتنا بسبب المجرمة مرتك أختفت.
_ اممممم عود أفكر أرمم الغرفة باقية الوحيدة ببيتج على قبل وعلى حتى نفس الأثاث.
_ أبو سند هسة وقت ترميم؟ هو شتا تمطر و تصير هوسة.
_ لعد يمتى صيف العام هم كوتلج مقبلتي.
_ أريد تبقى الغرفة أحس أختي بيها.
_ وأنتِ ليش تحسين بذنب أحس كلامج كوله مو منطقي.
_ شبيك خوية من رجعت هاي صاير كولش أكيد سحرتك أم السحورة ترى متجنبتها لخاطرك وينج طيف.. تعاي يمة تعاي أخذي هاي الجنطة أكيد هدايا الجن أنتِ و أمج ااايه لو شاف مريته فات وداس على خيته.
_ ما دايس عليج بس جبرتيني أنتِ أتعامل وياج بهاي الطريقة.
ركضت طيف حضنتني:
_ أخذي الجنطة فوك جبت هدايا
ألج و لأمج هم يلة صعديها.
باوعتلي:
_ و عمتي؟
صرخت بيها:
_ أخذي الجنطة وصعدي فوك يلة!
ظلت فضائل تفشر علية وعلى ماجدة صحت:
_ بس المن الفشاير حتى بنتي أتعلمت منج ما تحترم لا عبالج ما أنطي بيها كدام العالم بس سبق و نبهت إي تجاوز بعد أستعمل وياها أسلوب الضرب وعود حاجزي و زعلي شوفي فضائل.. ماجدة مظلومة وبريئة هذا منتهين منه بس أقسم بالله إذا عندج علم بالموضوع ثقي تنتهي بينا الخوة لأن أختي هنا هجمت بيتي.
ردتني تبجي:
_ عاشت أيدك خوية رجعت الما تسمى وتوزك علية.. إي خوش أستاهل آني والله.
خزرتها وصعدت لماجدة.. أبتسمت وغيرت مزاجي لكيتهن فاتحات الجنطة وكلمن ماخذة هديتها ماجدة صايرة حمرة وتلفلف بالهدية بجرجف لأن طيف.. أصرت تفتح الكيس وتشوف شنو فرزلتها:
_ طيف عيب بابا شعليج بهاي الأمور
_ بس جايبلها هديتين لعد وين هدية عمتوو بابا ليش شاد وي عمتي.
_ ما عليج بسوالفنا أحنا الكبار أنتِ طفلة شفهمج بينا عليج بدراستج يلة نزلي نامي جوة وخلي ببالج وبلغي عمتج أحتمال أشتري بيت لأمج وتجين بعد يم أمج أفضل لتربيتج فبلغي عمتج هي تعرف شنو أريد منها كوليلها نفذي أوامر أخيج لا تخسرين بنية أخيج للأبد.
توترت وبجت ونزلت تتنعوص وتدردم:
_ شنهاي النوب قوانينك علينا لا والله خاف ما ترضى.
باوعت لماجدة:
_ مشتاقلج.
_ آني هم.
دنكت مستحية وجريتها لحضني وآني أسولف عن رحلتي متجنب أبين الها صارلي يومين بالجنوب ما أريدها تغار وتضوج بعدين تمددت بين حضني وعبرتلي عن خوفها لا بعدني أعاقب بنتي بالضرب ضحكت:
_ خلي أول أضرب الأم يالله البنية طبعي نادراً أمد أيدي على مرة أحياناً التفاهم والتعلوم يوفي بالغرض.
ثاني يوم أخذتها رفعنا قضية إستعادة النسب و قضية الورث هي ما رادت بس آني الي أصريت طبعاً خابروني الجهات المعنية بمحافظتي الي كلفهم العرف تبني قضيتي والله هم الي بادروا قبل لا آني أتواصل وياهم الواسطات تسوي كولشي ببلدنا مابعد سقوط النظام والحقيقة لكل حكومة وناسها والواسطات الي بين ثناياها
برجعتنا ماجدة.. صعدت فوك وآني رحت لفضائل.. كالعادة بين ترهيب وترغيب عاد أقترحت عليها:
_ أكو حملة دار ترحين سفرة سياحة أنتِ مطلعين مجلبة بهذا البيت.
دنكت فضائل:
_ هذا البيت شهد هواي دمارات بحياتي أستشهاد خطيبي ببدايات التسعين وراه ما فكرت بأي رجال بس لمن...اااااااحححح.
تحسرت وسكتت:
_ إي لمن شنو؟ الكلمة المفقودة هاي إي أريدها بيها مفتاح لكولشي.
_ يا كلمة المفقودة يمعود شبيك من رجعت هاي تخبلت دوم أحجي هيج من حرگة گلبي على عمري كضيته بأنتظار وما حصلت شي لا آني برجل ولا خلفة عود سترت علية طيوفة.. ربيتها.
_ محد لزمج وكلج لا تعرسين.
_ ما أجت قسمة تقنعني أبد والله شنو المرة تريد رجال تقتنع بي ويحبها ويصونها.
حاولت أستفزها بأسلوبي:
_ والله أخواتي طلعتن تلعبن لعب وآني ملتهي أكد وأشتغل و أعاون أبوي ويا غافلين الكم الله
توترت:
_ شتقصد سامع شي عني؟
_ لا بوية قابل سامع و أكعد أتلاطف وياج ونتبادل أطراف الحديث.
حجيت فصحى خاف ما تفتهم عامي آني شاك بيها:
_ تستهزأ حضرتك خاف عبالك مرت سنيني ترى آني لحد هسة أنخطب بس طيف.. بنتي خوما أعوفها والله كل سنة يخطبوني عشرة.
_ أويلي يابه لعد شكو بقيتي يمي ما عرستي عوفج من طيف أكيد من جنت شاب صح جبيرة أنتِ بس أول زواجي بماجدة.. هم أجوج العشرة وطلبوج لو العشرات الكل سنة صاروا يجونج ورى السقوط أكو شي ممفهوم بيج وبموضوع رحمة و مصيري أعرفه ولو بالقوة.
_ لا والله هواي مستفز وراك سالفة خوية صدعت راسي.
_ سلامتج قبل لا نرجع مريت آني وماجدة لتوحة طبعاً بقيت ماجدة.. بالسيارة ما أريد تصرف ممقبول بحق مرتي كدام العالم لأن توحه أكيد تفكيرها ماجدة مذنبة المهم رحت لتوحه هم معاركها النذل رجلها كوتله شعندي آني شبقالي من تسع خوات بس خمسة بقلي فدير بالك تمد إيدك على تفاني..
_ إي هذا دومه حقير شنسوي ما عدنا حظ بالزلم زلم خبيثة وزلم تقشمر وزلم تضرب حظنا بالزلم صفر.
_ امممم ليش منو مقشمرجن أنتِ ليش متحجين أكو شي مضموم ديزل لسانج سنين و دتجفصين وآني أكول يجوز مو بقصد ما أركز وياج مثل هسة الج الأمان يلة فضائل أحجيلي عن رحمة آخر فترة جانت متوترة قلقة مو أختي الاعرفها أنتِ بالبيت وهي تربيتج كولي لـؤي قشمرها؟ جندها حتى يدمر ماجدة.
باوعت ونزت بعيد تشهك:
_ خوية كافي والله ما أريد نحجي برحمة خلي ذكرها طيب.
دمعت عيني:
ــ ذكرها طيب يا فضائل على حساب بيتي و مرتي اللي تعوقت إيدها لو على حساب أمراضها من غير متحجين العيون تكشف واللسان يجفص وآني مو ماجد.. القديم الطيب الفطير الي يثق بسهولة ويصدك بساع الي ميعرف يميز بين حق وباطل أنتِ أنطيتي براءة لماجدة من غير أعتراف وثقي آني من زمان ترى أقتنعت بيها بريئة وذمة الي صارلها بركبتج وركبة رحمة مع الأسف عليجن وسفة خوية تأذيني بمرتي و تعبي عليجن ودلالي الجن ورباي لرحمة هيج يروح وسفة نزلتن راسي وسفة وسفة.
هي لا نكرت ولا أيدت دنكت تبجي من حصرتها بالحجي ردودها بينت الي الحقيقة ولو دون كلام ودليل بس كرجل أمن لازم دليل مو حتى أتأكد لأني تأكدت بس حتى شي ملموس كدام الكل تنحط النقاط على الحروف
و رغم اقتناعي بقيت يم ماجدة.. أكابر ما بينت ودوم أسالها أحقق وياها تعيد القصة المسكينة تعبت من الإعادة بس لازم أثبت ما أكدر أواجه ولا أصارح
ماجدة وهم أستمريت بأسلوب المكابرة رغم دأسعى وأحقق وأدور شهود
وبيوم دخلت للبيت.. شفت المفتاح جان بالباب وكفت ومشت بروحي قشعريرة غريبة حسيت كأنو بيني وبين هذا الباب ومفتاحه زمنين منفصلين الحاضر يمي برى الغرفة و الماضي خلف هذا الباب
جانت فضائل نايمة بغرفتها لاحظتها مريضة من آخر مرة ضغطت عليها حتى تعترف ومن بينت أعرف ماجدة بريئة والذنب يمها ويم رحمة.. و الأسرار بالغرفة ويجي يوم وتنكشف وهنا تخسرني تخسر خوتنا ذبيت حسرة هي الظاهر سهت عن الغرفة والا شعجب المفتاح بالباب؟ بس طلعت طـيف.. من الغرفة وبيدها سطل مي والماسحة جانت تنظف دتقفل الباب بالمفتاح خلت السطل بالكاع وباوعتلي تضحك:
_ بابا صدوك باجر تروح لذيج ليش ما تجيبها يمنا هي وسند.. وهم حتى نشوفك يوميه.
_ ما ترهم.
عيني على المفتاح الي بقى بالباب وهي التهت تسولف وياي ونست روحها.
_ اممممم هم صح تفتح عليك باب من عرايك ضراير ومرتك فيروزة هبشة وماما صح أم خنيس من جوة لجوة بس أفقر من ذيج.
_ بنتي عيب تتجاوزين على أمج يلة روحي نظفي المشتمل هي تعبانة.
بساع أخذت السطل خليته بيدها وبيد أدفعها على كيف برى للحديقة وللدرج :
_ يلة أمج مريضة ما بيها حيل والمشتمل يحتاج غسل والحمام جلف
يلة بنيتي النادرة.
ظليت أمدحها ونسيتها المفتاح فضائل مأمنه طيف تنظف وأكيد السر مضموم مكان لا على بال ولا على الخاطر لذا مأمنة طـيف متشوفه بس ما تأمن بية تعرف عقلي رجل أمن يدقق بأبسط الأمور رجعت على كيف باوعت لفضائل نايمة بعمق نامي خوية وشبعي نوم نامي رجعت أباوع على مفتاح غرفة رحمة..
الصدر ضاك و الشهكة صارت ببلعومي
مديت إيدي وآني أرجف سحبته المفتاح ولجيبي كبل وفتحت الباب على كيف و بلة صوت دخلت.. الغرفة مرتبة نظيفة الهوى بيها بارد بس أحسه يخنك غرفة دون حياة ريحة ذكرى رحمة بعدها بالحياطين بصورها وهي طفلة رضيعه وصورة و هي بعمر ست سنين وصورة وهي مراهقة آخر صورة قبل الأختفاء بسنة ونص واكفة بزي المدرسة بين أعز صديقاتها الي أخذوهن الأمن فجأة باوعت لزوايا الماضي و زادت خنكتي وعيوني دمعت مديت أيدي وبطرف أصابيعي أتلمس صورة رحمة وسؤال يطرح بداخلي
ــ وينج خوية ميتة؟ عايشة؟ مذلولة؟ معتدين عليج وقتلوج؟ أختفيتي فجأة ولج خوية دورتج بكل مكان يم عيون الحلوة
تلمست عيونها الخضر بالصورة ظليت أناشغ أبجي:
_ نار گلبي مجمرة عليج بلة أخواتج رضاء. و رفاه. و سيناء. ايست منهن أنعدمن بس أنتِ مصيرج مجهول وهذا هاضمني لا أعرفج عايشة ولا ميته زين أغتصبوج وتخافين مني وشردتي لو قتلوج ولج خوية گلبي هنا نار عليج حتى بالمقابر الجماعية مالكيتج.
تأثرت كولش لدرجة كامت الكاع تفتر بية أحس بدوخة بس سيطرت هاي فرصة أدور هنا على الماضي عسى الكاج يا خوية نزلت دموعي وآني أهمس بحرگة گلب:
_ يا مدللتي شنو سرج؟ خليتي راسي بالطين؟ كسرتي ظهري؟ أنتِ بريئة مثل ماجدة.. بريئة لو أنتِ مذنبة؟ ولج وينج خوية ولج جنت أكولج بنتي هنا أحسج بنص گلبي تاليها تجازيني بوجع وخذلان؟
صفكت إيد بإيد وهمست:
_ وسفة يا رحمة يالمدللة ما أعرف مصيرج.
دورت بالغرفة وفتشت بكل مكان بالكنتور بالجرارات فوك الكنتور حتى على كيف زحفته أدور وراه ملكيت بس صدى ذكريات نغز بگلبي وتوجعني لعاباتها المرتبة بمكانها و ملابسها المعطرة كولشي بمكانه موجود إلا رحمة.. أختفت مالها أثر
شهكت ووكعت على الجرباية كعدت أبجي وأنحب مثل الفاكد لميت مخدتها لحضني أشم بيها وأبجي.
التفتت وعيوني غوشت بالدموع ووجعي تحول إلى نار من شفت الصورة الجبيرة للريس هاي الجانت معلكة بالهول هسة هنا مرزومة ومضمومة ورى زاوية الملابس أم الجرارات بس طالع من الصورة طرفها و كلمة السيد الرئيس أسفل الصورة أستغربت هاي الزبالة ليش ما أنشمرت ليش فضائل محتفظة بيها لليوم؟جانت متچاية ورى على الحايط ورى زاوية ملابس جانت الصورة كبيرة وضخمة من هذني الصور العتيقة الشايلتها الناس قبل ومعلكتها كبال الباب الإستقبال رحت سحبتها وطلعتها تچيتها كبالي ووكفت أباوع بحقد لوجه المقبور و بغضب نز بجروحي ملح ولجمني..
_ ظلمت شعبك وظلمت نفسك جيرة بفركك والله ولك شنو من فال تطلعلي هسة بوجهي وين أختي؟ وين رحمة ؟
آخ يا رحمة وين صفى بيج الزمن؟
بغضب رفعت رجلي ورفسته حيل ما مهتم تكعد فضائل رفست الصورة بكل حقد الجام تكسر وصوته صدى شتت هدوء البيت ما كفاني كعدت أضرب برجلي على وجهه فلشت الجام تفلش والإطار الخشبي تفكك وتطشر وكعت صورة الريس أنفكت من رباط الإطار طاحت على وجهها بالگاع.
ظهر الصورة جان عبارة عن خشب يسندها من وكعت أنشلع الخشب وتطشرت وراه أوراق.. أوراق مرتبة وحدة بصف الخ جانت مصفوفة ومضمومة ورى ظهر الريس تناثرت كولها كبالي.
گلبي دك سريع الدم صعد لراسي وحسيت روحي تفور بساع مديت إيدي أخذتهن وآني أرجف كعدت على ركبي أقرا والأنفاس مكطوعة وفجأة.. نزيت من صدمتي صوت فضائل تصرخ وتلطم وتريد تخمش من بين إيدي الحقيقة..
يتبع ....