مروان
اتحركنا وكان الطريق طويل شويه
بس معاها بحسه سريع ...
وصلنا البلد بعد ساعتين تقريبا!
وأخيرًا
نزلنا ووقفنا قدام البيت..
واتكلمت انا وقولت بتساؤل:
__هو إحنا هنقولهم إحنا رجعنا ليه؟
ممكن يشكوا في حاجه!
ردت ليلى بذكاء وقالت:
__هنقولهم انك راجع تدور على صاحبك عادي
ومش هنقولهم على الخطه التانيه!
هزيت راسي باقتناع
ودخلنا وطبعا كالعاده انا اللي شايل الشنط!!
تمتمت في سري وأنا بقول:
__حسبي الله على القادر والمفتري
روحت اسلم على ابويا
وليلى راحت تسلم على أهلها
دخلت الشقه بالمفتاح
بابا سابه معايه حتى بعد جوازي
تحت مسمى:
__لو مراتك طردتك تعالى بيت ابوك..
ضحكت وأنا بفتكر كلامه وتوصيته ليا اني لازم اكون مسيطر في البيت..
دخلت ادور عليه ملقتهوش!!
قعدت أنادي وأنا بقول:
__يا حجج انت فين؟
وفجأه لقيت حد بيحط ايديه على بقي وبيقول:
__مسكتك يا حرامي
كنت هتخنق وأنا بشيل إيده من على بقي وبقول:
__حرامي مين بس؟
انا مروان.
أتكلم وهو لسه مكتفني من ورا وقال:
__اديني دليل.
رديت بزهق وأنا بقول:
__دليل إيه
أبعد إيدك وهتشوفني!!!
حمحم وقال:
__ما إنت ممكن تغدر!!
رديت بغضب:
__اللهم طولك ياروح
رد وقال:
__خلاص هسيبك
بعد ايديه بحذر ..وأول ما شافني
ابتسم وحضني وهو بيقول:
__ابو حمييد
وخرج من حضني وهو بيضحك وبيقول:
__هي طردتك ولا ايه
رديت بضيق وأنا بقعد على الكرسي وبقول:
__لا طبعًا
انا كنت جاي ادور على فارس بقاله يومين مختفي ومش بيرجع البيت!.
قعد باابا وبصلي بدهشه وهو بيقوب:
__هو مش دا فارس الصايع اللي قولتلك تبعد عنه وعن طريقه!
قلبت عيني بملل وأنا بقول:
__لا بابا مش وقته خالص امه هتموت عليه..
رد بعصبيه وهو بيقول:
__أمال وقته امتى هااا؟
امتى؟
لغايه ما يجرك في الشمال معاه؟..
رديت بعنف وكأني بدافع عن نفسي وبقول:
بابا فارس مش كدا!
وقبل ما أكمل قاطعني صوته:
__أمال ازاي؟
ازاي؟ دا واحد صايع ماشي مع عيال صيع زيه
وشارولي بإيديه وهو بيقول:
__الصاحب ساحب يا مروان
رديت بسرعه وقولت:
__وعشان كدا انا بحاول ارجعه
فارس عمره ما كان كدا!!
بصلي بنظره طويله وقال:
عارف اي مشكلتك يا مروان؟
بصيت له بجهل ف قال:
__مشكلتك انك شايف فارس بعين العيل الصغير...
شايفه الطفل اللي كنت بتلعب معاه قدام البيت!
لكن فارس كبر وضاع وأنا مش هسمحلك تضيع معاه!!..
مسحت على شعري بضيق وبصيت له بثقه وقولت:
__بابا!
فارس انا ..وأنا فارس!
وكملت وأنا بقوم اقف:
__ومحدش بيسيب نفسه ..
وقبل حتى ما يرد ....كنت رزعت الباب ورايا.
وطلعت لمرات عمي
اللي هي مامت ليلى عشان اسلم عليها.
_____________
ليلى
كنت قاعده مع ماما وفتون
وطبعًا القاعده كانت عباره عن
__عملتوا ايه؟
بيزعلك؟
ولا بيعاملك كويس؟
بيضرب؟
مستريحه معاه؟
كأنهم ميعرفهوش وميعرفوش تربيه عمي!
لكني كنت عارفه ان كل الاسئله دي بس بسبب خوفهم عليا.
وحرصهم إني اعيش حياه سعيده.
ف كنت بطمنهم على قد ما اقدر ..
وفجأه وإحنا قاعدين خبط الباب
روحت افتح لقيت مروان...
دخل وبدأ يسلم على ماما وفتون
وبعد كدا قعد ..
قامت ماما وهي بتقول ببشاشة :
__هعملكم حاجه تشربوها
كنت حاساه متضايق
وشه متحفز زياده عن اللزوم
والحزن باين في عيونه..
وطيت عليه وأنا بقول بتساؤل:
__مالك ؟
مسح على وشه وهو بيقول:
__اتخانقت مع عمك
متشغليش بالك .
وقام وقف وهو بيقول:
__انا همشي
هروح ادور مع العيال على فارس يمكن نلاقيه ..
هزيت راسي بهدوء وقولت:
__إن شاء الله هتلاقيه
وقبل ما يتجه للباب
قرب مني بطريقه غريبه وباسني في خدي بسرعه وهو بيقول:
__سلام يا حلوه
حسيت اني قلبي اتشنج لثواني كدا
قبل ما يدق جامد!..
بصيت لفتون اللي كانت قاعده قدامنا وماسكه التلفون وكاتمه ضحكتها!!
ضيقت عيني وأنا بقول:
__بتضحكي على إيه يا بتاعه انتي!!!
اتكلمت وهي بتضحك وقال:
__ها؟
ولا حاجه
وغمزت وهي بتقول:
__مكنتش أعرف أنه رومانسي أوي كدا..
شهقت وأنا بفتح عيوني
وأخدت مخده من جمبي وخبطتها وأنا بقول:
__قله ادب!!!
قامت وجريت وهي بتقول:
__امك هتفرح أوي لما اقولها على اللي حصل.
اتصدمت!
دي هتروح تقولها!
مش كفايه الكسفه اللي انا فيها..
قومت وأنا حاسه ان الحراره هتنط من وشي وقولت:
__بت هتقولي ايه؟..
تعالي هنا!!..
واتحركت ناحية المطبخ وأنا بتمتم في سري:
__حسبي الله فيك يا مروان يا بن عمي ...
_____________
مروان
روحت للكافيه اللي بنتجمع فيه
وطول الطريق كنت بفكر في كلام ابويا ...
يمكن عنده حق
يمكن فعلا فارس ضاع ...بس أنا عمري ما هتخلى عنه ...
لأني دايما بفتكر أيامنا الحلوه مع بعض
فاكر أول مره اتخانقت فيها
العيال اتكاتروا عليا ..!
بس هو فضل في ضهري
إحنا آه اضربنا إحنا الاتنين
بس هو مسابنيش اتضرب لوحدي!!
فاكر لما كان بيجيلي عشان نذاكر مع بعض.
ونفضل نلعب ومش بنذاكر...
كان بابا يدخل ويزعقلنا إحنا الاتنين
ويقعد يذاركلنا ....
حسيت بضيق في صدري لمجرد إني فكرت انه ممكن يكون حصله حاجه وحشه!..
وصلت الكافيه وبدأت اسلم على صحابي ...
وكل واحد اتجه يدور على فارس في حته شكل ...
معرفش عدت ساعات قد إيه
يمكن ساعتين
او تلاته
او يمكن اربعه
كل اللي عارفه اني كنت بدور عليه زي المجنون...
الدنيا بقت ليل والهوا بيضرب في وشي وكأنه بيقولي:
__فارس ضاع خلاص
حاولت انفض الفكره من دماغي وقررت اروح
وادور عليه تاني بكره ....
وصلت البيت لقيت بابا واقف في البلكونه مستنيني.
اتنهدت بضيق عارف إنه أكيد هيديني اسطوانه تاني من بتاعت الصبح.
طلعت وفتحلي الباب
وهو بيقول:
__اتأخرت يعني.
دخلت وأنا برد وكأن الكلام نفسه رافض يطلع:
__مش لاقيينه ..
ضحك بسخريه وقال:
__تلاقيه وقع في مصيبه تانيه!
بصيت له ورديت بعصبيه:
__هو انت ليه بقيت تتعامل على إن فارس غريب؟
مش الواد اللي انت مربيه من وهو عنده خمس سنين!!
قرب مني وهو بيقول بحده:
__لان فارس مبقاش فارس الصغير اللي انا ربيته ...
بقى واحد تاني انا معرفوش!
ولو انت عملت نفس اللي عمله ...هقول نفس الكلام!!
بصيت له بقله حيله عمره ما هيقتنع بوجهه نظري
ف قولت:
__زي ما قولتلك قبل كدا ...
فارس انا وأنا فارس.
وقومت وأنا بكمل:
__انا رايح ارمي الزباله..
ومشيت وسيبته!
روحت خدت الزباله بتاعتنا
وطلعت عشان آخد الزباله بتاعت البيت
كنت عارف إني بهرب...
بس دا الحل الوحيد عشان متجننش!
طلعت وخبطت خبطتين
فتحت ليلى
بصيت لي بدهشه وهي بتقول:
__مالك مبهدل كدا ليه وشكلك مرهق!
هزيت راسي وقولت:
__مفيش حاجه
كنت رايح ارمي الزباله.. هاتي الزباله يلا!
لقيتها بتحط ايديها على بقها وهي بتضحك وبتقول:
__اكل العيش مُر برضه
(للتوضيح هي بتقول على شكله مش على اللي بيعمله يعني مقصدش لي اساءه لعمال النظافه)
بصيت لها بضيق وقولت:
__طب يلا يا حلوه بسرعه .
هزت راسها وغابت كام دقيقه
وبعد كدا رجعت بالكيس
خدته منها وقبل ما أمشي
قاطعني صوتها وهي بتقول:
__خلي بالك لكلب يعضك كدا ولا كدا.
كانت في نبرتها تريقه
ف اتديرت لها وأنا ماسك الكيس وبقول:
__طب ادخلي بدل ما اخبطه في دماغك منعرفش وشك من قفاكي!!
سمعت صوت ضحكتها اللي بتدوبني
ف ابتسامه ارتسمت على شفايفي غصب عني..
اتجهت عشان ارمي الزباله وكالعاده البرلميل مليان ومفيش مكان ...
اتنهدت واتحركت ناحيه البراميل اللي جمب الترعه عشان ارمي فيها
وصلت وفتحت البرميل وحطيت الزباله
وقبل ما اقفل شوفت حاجه غريبه!..
شيلت الزباله اللي كنت لسه حاطتها
لقيت ايد.!!!
ايد مدفوسه في الزباله!!!..
يتبععع