قلت ليهو مزمل كنت وين؟ انا من قبيل بفتش فيك قال لي يا ملاذ قبيل لمن مشيت الدكان إتعرفت لي على واحد سعودي إتعرفتا عليهو وإتعرف علي وعزمني عندو في البيت مشيت ليهو لعبنا بلايستيشن والوقت مره ما حسيت بالزمن قلت ليهو إنت عارف انا بي سببك قرب يجيني إنهيار عصبي ياخ يا مزمل خلي عندك ذرة إحساس كوركت فيهو وشاكلتو في الاخير قلت ليهو امشي من قدامي وبكره طوالي تمشي السودان انا ح احجز ليك طلع طوالي بقيت اعاين ليهو بعد مسافه دكتور إيهاب جا نازل قال لي ما تقسي عليهو في النهايه ما قصدو قلت ليهو شكرا ليك ومعليش ازعجناك معانا قعد يضحك قال لي عفوا... ومشى حسيت بيهو زعل من كلامي دور عربيتو ومشي طلعتا لقيت مزمل برتب في شنطتو لفتو علي وقلت ليهو ما تزعل مني ما قصدي يا مزمل بس إنت عارف إنو نحن في مكان غريب خفتا تكون ضعتا وعقلي بقى يجيب افكار كتيره قال لي عشان ما تخافي علي تاني انا ح ارجع السودان قلت ليهو يا مزمل ياخ خلاص قلنا قال لي انا ما شافع يا ملاذ عشان اضيع قلت ليهو حتى لو ما شافع بس تصرفك غلط على الاقل كان تكلم الاستقبال عشان انا لمن اجي اعرف إنت وين قال لي والله ما كنت متخيل ح اجي راجع متأخر الوقت مره سريع وما شعرنا بيهو قلت ليهو طيب ما مشكله بس دي اخر مره تعمل كدا تمام قال لي تماام مشيت عملتا العشاء وجيت ختيتو إتعشينا وصلينا العشاء ونمنا .صحيت بي صوت المنبه كنت تعبانه شديد قمت بالقوه لبستا عملت الشاي والفطور ووريت مزمل في الغدا يعمل شنو طلعتا على المستشفى مشيت المكتب طوالي دخلتا سلمت على إيهاب ردا لي السلام قعدتا قال لي دي ملفات العمليات بالترتيب اقريها مسكتهم منو قعدت اقرأ في الاول لحدي ما خلصتا وقريت الباقات المهم دخلنا العمليات ونهائي إيهاب ما كان بتكلم معاي لمن خلصنا اخر عمليه وطلعنا بدلنا جيت وقفتا قدامو قلت ليهو معليش أمبارح ما قصدتا مع إنو كلامي عادي بس حسيتك إضايقتا قال لي ما إضايقتا من حاجه قلت ليهو طيب ليه ما قعد تتكلم معاي؟!قال لي لانو انا ما عايز يكون بينا حاجه انا عايزك بالحلال يا ملاذ وعارف إنو عمي ح يرفض عشان كدا احسن يكون في حدود في معاملاتنا قلت ليهو انا مستعده اقنع ابوي إنت ح تجي تخطبني منو؟ عاين لي قلت ليهو مالك موش قلت عايزني بالحلال قال لي عمي م ح يوافق إنتي ما عارفه اي حاجه قلت ليهو عارفه وسكتنا على كدا وصلني الشقه
نزلت دخلتا طوالي لقيت مزمل برتب في شنطتو قلت ليهو دا شنو؟ قال لي انا راجع السودان احجز لي قلت ليهو ليه أنت ما مرتاح هنا قال لي يا ملاذ ابوي محتاج لي لازم ارجع إنتي هنا ما منك مخافه المجمع مأمن والمستشفى قريبه قلت ليهو كلامك صح ابوي محتاج ليك قال لي الحجز كيف الا نمشي المكتب قلت ليهو لالا في وكاله بتحجز ليك كان ابوي حجز بيها بس الموقع حقهم ما عندي الا ننزل الاستقبال وفعلا مشينا حجزنا ليهو حاسبت البت وجينا طالعين ساهرنا حبه إتونسنا وبعدها كل زول مشى غرفتو مره يوم بكره برضو ولمن جاء وقت مزمل مسافر مشيت معاهو لحدي المطار وإنتظرنا زمن رحلتو بعد مسافه ندهو ودعتو ومشى وقفت عاينت ليهو لحدي ما طلع تاني رجعتا للوحده حقتي مشيت المستشفى طوالي دخلتا المكتب لقيت دكتور إيهاب مافي عاينت للملفات تلقائيا عرفتهم حقين العمليه بديت اقلب فيهم كدا هو جاء داخل كان بتكلم في التلفون وغضبان شديد قال لي الزول في التلفون اسمعني اجمعهم كلهم وخليهم يجوني في المكتب ،،انا اساسا ما مفترض اعتمد عليك..
قفل الخط وعاين لي قال لي جيتي متين قلت ليهو الناس العاديه بتقول السلام عليكم صباح الخير ماردا علي مشى قعد في مكتبو وانا قعدتا في مكتبي سمعتا صوت الباب بدق قال أدخل دخلو تلاته دكاتره ودكتورتين إيهاب عاين ليهم مسافه وقال ليهم خمسه دكاتره قارين سته سنه ما عارفين تتصرفو في حاله جاتكم واحد من الدكاتره قال ليهو الحاله جاتنا فجأه ونحن مشغولين إيهاب قال ليهو مافي حاجه اسمها مشغولين الخمسه واقفين قصاد مريض واحد!! شوفوا هنا دا كلكم ح اكتب ليكم إنزار ودا اول واخر إنزار لو جاني منكم شكوه تاني الا تشوفوا مستشفى تقبلكم تاني فاهمين كلهم قالوا ليهو فاهمين قال ليهم إتخارجو طلعوا وهو فتح الابتوب قدامو إشتغل فيهو مسافه قال لي من دون ما يرفع راسو قريتي الملف حق العمليه ؟ قلت ليهو لأ قبل علي قال لي ليه؟ قلت ليهو إنت ما اديتني ليهو اساسا شال الملف من الطاوله قال لي دا الملف اقريهو سريع شلتو منو وقعدتا اقرأ فيهو خلصتا جاء وقت العمليه دخلنا عملناها وجينا طالعين قال لي المريض عمر في غرفة العنايه عايزك تشوفي ليهو النبض ولو ممكن اعملي ليهوECG وبرضو شوفي لي نسبة الاكسجين في دمو وتعالي لاحقاني في المكتب قلت ليهو تماام مشيت عملت زي ما قال لي كان محتاج اكسجين مشيت وريتو النتائج كتب لي الاكسجين مشيت ركبتو ليهو جيت طالعه قال لي البسي الاسكارب ح نمر على العنابر وشيلي سماعه معاك وجهاز الضغط شلتهم ومشيت معاهو كان زعلان شديد من شغل الدكاتره لفينا العنابر كلها ووقفنا على حالة كل المرضى اخر حاجه كان عمبر الباطنيه دخلنا لقينا سحر بتنفز في جرعا لمن شافتنا خلصت سريع وجات إيهاب قال ليها عايزين نعمل كشف عام للمرضى قالت ليهو إتفضل عاينت لي بعد دكتور إيهاب فات قالت لي في شنو مالو غضبان كدا قلت ليها ما بعرف في دكاتره غلطوا في حاجه تغريبا وهو إتنرفز قالت لي الله يستر كشفنا على المرضى لمن جينا طالعين وقف سحر قال ليها المتابع حالة المريض الاسمو إبراهيم منو سحر قالت ليهو دكتوره رجاء قال ليها اولا لا إنتي لا رجاء ما شايفين شغلكم المريض دا سكريهو مرتفع سحر قالت ليهو قبل شويه فحصت ليهو هو سكريهو كان مرتفع اكتر من كدا كان داخل في DKA لكن هسي بقى شويه احسن قال ليها والبخلي حالتو تصل DKA شنو ؟ قالت ليهو يا دكتور إيهاب المريض جانا بي DKA قال ليها حسب معرفتي المريض دا ليهو إسبوع معقوله إسبوع كامل ولسه سكريهو مرتفع؟ قالت ليهو نحن ما مقصرين منو والله يا دكتور إيهاب بس هو عندو ضغط ودا خلى الشغل صعب شويه ولو حاولنا ننزل السكر سريع ممكن تحصل ليهو وزمه دماغيه لمن قالت ليهو كدا إبتسم قال ليها عارفه إنتي اشطر ممرضاتي قالت ليهو دا كلامك 😇 عارفه🙂 عاين لي وقال لي إتعلمي قلت ليهو على فكره اي ممرضه عندها خبراتا الخاصه ومتميزه في مجالا قال لي كلامك صح عشان كدا انا ما ببدل وحده فيهم نهائي وما بقارنهم قلت ليهو واضح من إتعلمي دي قعد يضحك سحر قالت ليهو سبحان مغير الاحوال من حال ٍ الى حال قال ليها خلي فلسفه ويلا على شغلك جرت قالت لي الله يعينك
في السودان
امي كبت لي ابوي قهوة العصريه وقعدت جمبو قالت ليهو يا عبد الفتاح هسي عمر اخوك ما منو اخبار قال ليها مالك سالتي عنو كدا فجأه قالت ليهو لالا مافي حاجه بس ما صح تقاطع اخوك كدا بالسنين في النهايه دا رحمك وربنا بسألك منو قال ليها يا إنعام بالله فكيني من الموضوع دا هو لو خاتي فيها خوه ما كان عارض كلام الكبار قالت ليهو يا عبد الفتاح العرس قسمه ونصيب وانتوا اساسا ما مفترض تقرروا ليهو يعرس منو ولا يخلي منو وكان على الحصل انو باع البيت ف دا من حقو هو عندو في الميراث زي ما انت عندك وما بحق ليكم تشيلوا منو ابوي عاين ليها وقال ليها كلامك صح بس دا كلو ما بشفع ليهو وقفتو قدام المحكمه وزواجو العرفي وكمان مقاضاتو لي ابوي دا كلو نسيتي ابوي غلط إنو كتب الميراث لي بس عمر لمن جاب شهود ووليان إتولو ليهو موضوع الزواج حقو دا ما بعني إنو نكر ابوهو؟! امي قالت ليهو والله يا عبد الفتاح زواجو اصلا ما بعتبر عرفي لانو مافي دليل شرعي بمنع زواج زول مسلم من مره مسلمه عشان بس هي غريبه قال ليها اي مافي شرع بمنع بس قالت ليهو ما بس يا عبد الفتاح ،عمر اخوك وربنا بسألك منو ودا ماسبب تقاطع بيهو اخوك،،ابوك الله يرحمو إنت هسي ما ليك غير اخوك يا عبد الفتاح والانسان لو غلط مره بنديهو فرصه تانيه ....
يتبع
يا ضحكة في لحظة عشم خلت حواسي مبعثرة 💛.🍂