رواية بين الحاضر والماضي الفصل السادس عشر 16 بقلم ايته عبدو
رجعته فتحته الدفتر وخليت الهدوم في محلها بغسلها براحتي كفايه اصلا بعد العمله أني دايره اغسل ليه من زوقي يلا ما علينا منو نشوف الحصل شنو في دفتري الحلو ده وعلى كده بقيت مركزه بكل حواسي فيه
________________________
_*في الماضي::*_
كنت بعاين لسعاد بصدمه اكيد مستحيل وقت تكون مشت تسرح بالبهايم قابلت الراجل داك بس الورقه دي ما خلتني افكر باحتمال تاني جيت لفحته الورقه منها وهي كانت سرحانه لمن شلتها اتخلعت ونططت عيونه وأنا طوالي فتحتها وبقيت أقر فيها
*الورقه::*
السعاد أنا خلاص بقيت دايرك بطريقه ما هي طبيعيه بس اهلك ح يحرمونا من بعض وأنا ما بقدر على فراقك وأنتي لو في قلبك لي ولو حبة ريده خلينا نهرب ونعرس نمشي بعيد أنا وأنتي لو موافقه أنا ح اكون منتظرك جنب المزرعه القديمه قبل صلاة الفجر عشان الرجال بطلعوا وأنا متأكد انك ح تجي وما تخيبي املي
محبوبك ماجد
*نهاية الورقه::*
عاينت ليها بصدمه بعد قريت الورقه مرتين وجسمي كله متكهرب سألتها بحذر وأنا من كل قلبي تنكر أو تطمني بعد القريته ده
ست البنات:اكيد بتهظري لا اكيد ما قابلتي صح واكيد ما ح توافقي على الجنون الهو كاتبه عايني لي هنا
قلت اخر كلام بصريخ وهي التفت على بابتسامه غير مباليه بالمصيبه الح تدخل فيها لو فكرة مجرد تفكير تعمل كده
سعاد:ما اكيد ما ح افضل زيك غبيه وخوافه أنا ح أقرر حياتي تمشي كيف ومع منو ح اكملها ما وقت يخطبوني هم يوافقوا عشان مصلحتهم وقت تنتهي المصلحه يفسخوها ويقولو ح تعرسي فلان ما هو ما بمزاج زول دي حياتي وأنا الوحيده البحق لي ارفض وافق بأي زول مش هم بس إنتي خليك كده أنا ح اهرب مع ماجد وأنتي لو دايره تكلميهم أمشي بس من لو كلمتيهم إنتي ولا اختي ولا بعرفك
رمت كلامها ده وطلعت خلتني في صدمه أنا خايفه عليها بتين ح تفهم إنو الناس ديل اخطر من إنو تتحداهم بتين ح تبطل تعيشني في رعب عليها ااااخ يا سعاد قعدته في السرير بقلة حيله أنا لازم اقنعها أنها ما تعمل كده دي اختي اكيد ما ح اخليها تعرض حياتها للخطر طلعت بره لقيتها شغاله مع أمي في المطبخ وكأنه مافي حاجه كبيره زي دي حاصله سعاد بتين ح تبطل بروده وأنها لازم تعرف حجم المصايب وتاخدها على محمل الجد لحدي اخر اليوم لحظت ليها بتتجنبني بس أنا مستحيل برضوا اخليها لمن جاء الليل وخلاص دخلنا الاوضه قفلته الباب ومشيت قعدته جنبها وحاولته اتكلم معاها بهدوء لانه سعاد اختي بتكره صيغة الأمر
ست البنات: سعاد أنا والله بريدك اكتر واحده في اخواتي إنتي مع انك ما كنتي الكبيره بس كنتي بتحمينا كلنا باخواتي الكبار من الضرب وتضربي بدلنا كنتي درعنا الحامي ولحدي اسي أنا والله ما بقدر بدونك وبخاف عليك ما تخليني براي
دموعها جرت للمره التانيه ونظرها كان بعيد وبعدين عاينت لي وهي بتقول
سعاد:خليني من موضوع الهروب أنا لو متَ ح تعملي شنو من غيري عشان كده أنا بحاول اخليك تقوي وتقدري تواجهي الدنيا كلها براك أنا ما دايمه ليك يا ست البنات
لمن جابت سيرة الموت أنا دموعي جروا والله ما بقدر بدونها حضنتها وأنا ببكي وبتنهد
ست البنات:ما تقولي كده بعد طول عمر ليك بس ما تمشي عشاني أنا خليك والله بقيف معاك وح ابقى قويه واي شئ بس إنتي ما تخليني براي يا سعاد
سعاد:بت خليك قويه أنا خلاص ما ح اخليك بس إنتي لازم تبقي قويه سامعاني في وجودي أو حتى في عدم وجودي فاهمه
حضنتها زياده وأنا مبسوطه أني قدرته اقنعها
ست البنات:فاهمه فاهمه بس خليك معاي
قضينا الليله كلها ونسه وضحك واتذكرنا ذكريات ليها سنين كانت ليله بالف ليله وسعاد كانت بتحضني كل شويه وتقولي مهم يحصل اعرفي أني بريدك اكتر واحده في حياتي كلها إنتي الحاجه النضيفه في الحياة الكلها ناس وسخانه من جوه ومن بره واعماله اوسخ منها نمنا قريب الصبح أنا من التعب تاني ما حسيت بشئ إلا الصبح
________________________
رفعت راسي وأنا بنتبه لصوت لبنى الجايه وشكلها وشكلها جايبه لي خبر ابتسمت وهي بتقول لي
لبنى: مبروك لاخوك داير يعرس
عاينت ليها باستغراب وأنا برد
لميس:اخوي أنا منو فيهم
لبنى:وجدي وداير يعرس اسماء حبوبها رشحتها ليه وهو قال اصلا ما عنده بت في راسه وموافق عليها وخلاص ح يعرسوا
عاينت ليها بصدمه لا ما بصدق الخطط ليه نجح ابتسمته بفرح وأنا بقول
لميس:احلفي كذابه ده خبر رهيب عديل
بس فجاء كل الذكريات حقت الايام الفاتت وطريقتها معاي وأسلوبه وانو أنا حاولته اساعده بس هي صدقت كلام نمارق وكيف كانت بتعاملني طول الفترة دي و الكلام القالته عني كل فرحتي فجاء اتحولت لابتسامه منكسره ما قدرته حتى اعبر بطريقه تانيه عن كل الوجع الجواي لبنى عاينت لي باستغراب للتحول الحصل لي في اقله من دقيقه
لبنى:مالك يا بت لونك انخطف فجاء بعد كنتي فرحانه ولا غيرتي إنو صحبتك ح يعرسوها وأنتي لا
عاينت ليها بقلة حيله ما أنا ما عندي اخ يسندني وقت احتاجه ولا اخت تفهمني وابكي في حضنها على الأقل حبوبه ستو كان عندها حبوبه سعاد بالجد كانت محظوظه بيها لبنى طلعت وخلتني وهي بتقول
لبنى:خلي الغيره وقومي باركي لصحبتك
دي حتى ما سالتني لو أنا الزعلني الغيره بالجد ولا حاجه تانيه وحالتي الكنت بمر بيها لمن كنت وحيده ولمن اسماء انقلبت ضدي وكانت طول الوقت بتسمعني كلام فاضي بس دائماً هم بعملوا حاجات عشان يذكروني أني وحيده وح افضل طول عمري كد واثناء تفكيري ده الباب انفتح وجاء زول داخل وأنا رفعت راسي اشوف ده منو..
يتبع....