رواية بين الحاضر والماضي الفصل الحادي عشر 11 بقلم ايته عبدو
مشيت الاوضه وأنا مبسوطه وحاسه عملته انجاز أني كلمته حبوبه قلت خلاص اختلي بعد ده بدفتري كمكافأة على أني بت شطوره يلا يا دفتري الحلو خلينا نواصل بس قبل ما افتح الدفتر اتذكرته اخر الاحداث النسيتها بسبب موضوع اسماء واااي حسب الرسول اطعن وده منو الوراء حبوبه ستو فتحته الدفتر باستعجال بعد الاساله دي داهمتني
________________________
_*في الماضي::*_
اتشجعته ولفيت لقيت دي اختي سعاد شكلها شافت كل شيء وكانت بتعاين لي بصدمه جرتني وراءها على الاوضه وأنا كنت خايفه من ردة فعلها دخلنا الاوضه وتربست الباب قبلت علي وهي بتعاين بصدمه اتجهت على السرير ومشت قعدته فيه وهي خاته يدينها في رأسها ولسه تأثير الصدمه ظاهر عليها بعد استوعبت قامت وبقت ماشه وجايه في الاوضه وأنا بس واقفه زي التلميذ المستني عقابه قبلت علي فجاء بعد وقفت وكانت مدياني ظهرها
سعاد: إنتي شوفتي الحصل صح شوفتي الأنا شوفته أيوب طعن حسب الرسول في حضور أبوي بدون حتى ما يوقفه ديل طلعوا غير الظلم عندهم القتل زي شراب المويه لا لا ما بصدق نحن لازم نتكلم لازم ما نسكت لازم نوريهم أننا عرفنا وشفنا الحصل
قالت كلامها وكانت طالعه بس أنا جريت عليها ولحقته قبل ما تفتح الباب وتطلع مسكتها وأنا بقول
ست البنات:لا لا ماتعملي كده ديل لو عرفوا ممكن يعملوا فينا اكعب من كده سعاد الله يخليك أنا ما عايزه اخسرك أنا خايفه البيت ده بقى مرعب ما تعملي شئ يخسرك نفسك ويخسرني ليك أنتي حالياً سندي الوحيد في البيت الموحش ده
عاينت لي بصدمه من ردة فعلي
سعاد: يعني إنتي ناويه تسكتي حتى بعد العملو ده كله لا لا ما بصدق جنيتي صح
هزتني بعنف وهي بتصرخ في وشي
سعاد:ده حسب الرسول الانطعن إنتي ملاحظه طيب خلينا من إنو خطيبك وحبيبك ده ود خالك معقول ما جاتك الشجاعه حتى ولو شويه علشان تدافعي عنه وهو انطعن وهو بدافع عن حبكم إنتي عارفه إنتي ما بتستاهلي حسب الرسول ده نهاي وتستاهلي إنو تعرسي موسى وتندفني معاهوا في التخلف و الجهل ده
لزتني لمن وقعته وفتحت الباب وطلعت وأنا والله شدة ما حيلي مات حتى قومه ما قدرته اقوم من الواطه بالجد أنا ما ماعندي احساس بس أنا ما بقدر اخسر كل الحولي وهم بدافعوا عني وانا ساكته حتى نفسي ما قادره ادافع عنها بالجد اليوم داك كرهته نفسي اكتر من أي شئ تاني ونومته في محلي وسعاد ولا جات علي من شدة ما زعلة مني وخلتني انوم في الاوضه براي صحيت الصباح وأنا رأسي تقيل من التفكير من جهه سعاد ومن جهه حسب الرسول والحصل ليه وأنا ما عارفه حي ولا ميت بالجد قلبي واجعني ده حسب الرسول سعاد قايله الموضوع ساهل على أنا حاسه روحي بتتسحب مني وكل ما اسكت قلبي بوجعني بس اعمل شنو
________________________
رفعت رأسي بهجمه بسبب رزعت الباب كانت أسماء بتعاين لي بعيون محمره وغضبانه أول مرة اشوفها كده
لميس:مالك يا اسماء الحاصل شنو
كوركت فيني لمن انهجمته
اسماء:الحاصل الحاصل إنو إنتي واحده وسخه وما بتستاهلي أني الوحيده الكنت بعاملك كويس بس تستاهلي إنو الكل بعاملك أسوأ معامله يا خاينه أنا جيت اشكي ليك تمشي تحكي لحبوبه يعني ما عايزه تكوني القليلة الادب الوحيده في الاسره عايزه يقولو أني بحب في الرجال وبتبكى وراهم كلام نمارق صح إنتي واحده حاقده وبتستغلي الفرص علشان تعملي نفسك بطله لكن عمرك كلوا مافي زول ح يحبك لانك ما بتتحبي وأنا غلطانه أني كنت واقفه معاك
في لحظه واحده لحظه واحده حقة زعل خلتها تطلع كل الفي قلبها ضدي اكيد نمارق كان عادي ممكن أرد عليها واوريها وشي التاني وردي البعمله للرجال علشان كده كارهني لكن ختيت اعتبار لأنها زعلانه وانو أسماء ما كده لمن تهدي اكيد ح تجي تعتذر وأنا اسي مستحيل اتكلم معاها
لميس: اسماء إنتي علشان زعلانه ما ح أرد عليك بس بعد تهدي ح نتفاهم
اسماء:نتفاهم ما عايزه معاك أي تفاهم إنتي كنت قاصده تعملي كده انك تفتنيني ولو الرجال عرفوا اتعاقب زيك ولا عشان مجتبى ملحقك وكده وشايفنك قليلة أدب والله اشك انو مجتبى لاحقك وعاملها لينا نحن حركه وأنتي القاعدة تعرضي نفسك عليه وهو راجل وما عليه عيب لكن أنت الوسخ والتافه والرخيصه
هنا ما قدرته اسكت اديته كف وأنا كلي برجف كيف تفكر فيني كده معقوله الكان بينا كله تمثيل واسي بعد موقف واحد كل الاقنعه وقعت هي عاينت لي بصدمه وضحكت بسخريه
اسماء: علشان دي حقيقتك وأنا أول زول يقوله ليك في وشك صح عشان كده اتصدمتي بس أيوا إنتي كده مش لو ضربتيني كف لو قتلتيني عديل
لزيتها برا الغرفه ولقيت نمارق واقف جنب الباب بتتصنت ومبتسمه بشماته اصلا مافي غيرها قفلت الباب في وشهم وأنا بتكل ظهري عليه بالجد حيلي ماشايلني معقوله دي اسرتي ديل الناس الأنا عايشه معاهم من طفولتي شايفني بالدناء دي طيب الناس البره خلو ليهم شنو دموعي جرت على نفسي وعلى الاتهامات الجاتنني من وراء مجتبى طيب لو عرفوا إنو حاول يتحرش بي كانت ردت فعلهم شنو اكيد ح يقولوا دي أنا العرضته نفسي ليه واغريته عشان يقرب مني معقوله دي اسماء الأنا كنت شايفها غيرهم كلهم خلتني احس بنار في قلبي وبرخصي للدرجه دي بكرهوني ونمارق عملته ليها شنو علشان تكرهني للدرجه دي بالجد في اللحظه دي اتمنيت اموت وارتاح من كل شئ مجتبى اسماء نمارق اخواني وكل اهلي ارتاح وبس...
يتبع.......