لقيت صورتي لمن كنت صغيره وكان معاي بنات كتار قدرت اعرف جزو منهم والباقات ما عرفتهم بس لفت إنتباهي في الصوره كان في مجموعه اولاد صغار بعمرنا واكبر مننا كدا كان في واحد من ضمنهم بعاين لينا ومركز معانا شديد بقيت احاول إتزكر الصوره دي كانت وين والصورنا منو اساسا قدر ما حاولت إتزكر ما قدرتا فتحت الورقه لقيت فيها القلب الدهبي وتحتوا مكتوب حين إلتقت عينينا لأول مره علمت انه لم يكن لقاءً عاديا ،،قريت الكلام دا قريب تلاته مرات دا ما كلام زهره وريم فجأه إتزكرت كلام زهره معاي يوم داك لمن قالت لي الشكر دا ما لينا ياربي كان قصدها شنو بقيت أفكر كدا حسيت راسي وجعني قلت بس ناس زهره بقدروا يجاوبوني على اسألتي دي مشيت وقفت الغساله وشريت الملابس جيت فتحت البيتزا بجد البيتزا دي جات في وقتها كنت جعانه شديد وكسلانه أعمل لي حاجه أكلها،،، اكلت منها ودخلت الباقي في التلاجه شلت طقم الملابس الجاني هديه وبقيت أجرب فيهو عجبني شديد قلت خلاص ح البسو بكره دخلتهم في الدولاب إنتظرت العشاء ازن صليت ونمت طوالي...
صحيت الصباح رتبت البيت وعملت لي كيكه مع الشاي نفسياتي كانت عاليه شلت منها في صحن وطلعت بره الشقه كان في بت ساكنه جمبي كنت بلاقيها كم مره كدا وبعدها بقينا صحبات مشيت سلمت عليها وقلت ليها الليله عملت كيكه وقلت ما باكلا براي قالت لي تسلمي ما قصرتي قلت ليها ما عملت حاجه قالت لي طيب إتفضلي اشربي معاي الشاي قلت ليها والله ياريت لكن عاملاهو ومستعجله لازم اغير ملابسي الوقت إتأخر على الشغل قالت لي موفقه ياخ بس لازم يوم تجي تشربي معاي قلت ليها إن شاء الله والله،، ومشيت الشقه شربت شاي ولبست وطلعت طوالي مشيت اخت مفتاح الشقه في الاستقبال لقيت البت معاها زول كان مديني ضهروا إنتظرتها حسيت الوقت إتأخر قلت ياخ انا لو شلت مفتاح الشقه معاي أكيد ح اضيعوا وخصوصا إني متعوده اديهو ليها وأطلع قلت احسن إعتمد على نفسي دايره أمشي كدا الزول وقف وحسيت إنو جاي طالع لمن إتلفت علي لقيتو دا دكتور إيهاب جاء علي قال لي كيفك قلت ليهو تمااام الحمد لله إنت كيف قال لي كويس الحمد لله بالنسبه لي أمبارح مالك مشيتي قلت ليهو الدوام إنتهى صح؟! قال لي اي إنتهى بس انا ما قلت ليك ما تمشي براك وبعدين الوقت كان متأخر والشوارع كعبه قلت ليهو ما مشكله انا بعرف إتصرف وبعدين إنت ما مجبور توصلني كل مره قال لي لأ انا مجبور عارفه ليه لانو انا الجبرتك تشتغلي الشغل دا لو كنت ممرضه شغاله في قسم ما كان إتأخرتي كدا عشان كدا انا بأدي في واجبي تجاهك فاهمه وتاني ما تعيدي لي الكلام دا لو سمحتي زائد اسرعي انا منتظرك بره ،، ومشى خلاني قلت في نفسي البني ادم دا مجنون ولا شنو تصرفاتو كانت غريبه محسسني إنو بعرفني من زمان ما جمعنا الشغل دا وبس مشيت اديت المفتاح للبت وطلعت لقيتو منتظرني كنت عايزه إتجاوزو عملت نفسي ما شفتو ضرب لي بوري مشيت طوالي ركبتا حسيتو شويه كدا و ح يكفتني لحدي ما وصلنا المستشفى ساكتين بركن العربيه وقال لي تعالي وراي سريع مشيت لحقتو مدى لي ملف قال لي داخلين عمليه بعد شويه اقري الملف دا قلت ليهو طوالي كدا قال لي عندك إعتراض قلت ليهو لأ شلت الملف وبقيت اقرأ هو طلع قريتو سريع طبعا انا عندي عاده لمن اكون بقرأ لازم إتحرك ما بعرف اقرأ وانا قاعده في مكان واحد بقيت أمشي واجي مره اقعد في الكرسي حقي ومره في حق دكتور إيهاب لحدي ما خلصتا قعدتا في كرسي دكتور إيهاب وبقيت إتخيل إني المديره شلت الملف ختيتو في المكتب وبقيت إتصور لفت إنتباهي الدرج الاخير كان فاتح دنقرت اقفلو لقيت فيهو كتاب كدا طلعتو كان صغير وعامل زي روايه كدا فتحتو من جوه كان مكتوب بي خط يد ومطبوع جاني فضول اقراهو تاني خفت دكتور إيهاب يجي قلت خلاص اعمل منو كم صوره في تلفوني وأقراهم تاني قلت هوي يا ملاذ يمكن دي مزكره فتحت الصفحه الاولى كان مكتوب الفصل الاول قلت اكيد لو مزكره ما بكتب الفصل الاول صورتا كم صوره كدا وختيتو وقفلت الدرج اثناء ما قاعده كدا دكتور إيهاب جاء قال لي إنتهيتي قلت ليهو اي قال لي طيب اسرعي البسي عشان ندخل قلت ليهو تمااام لبستا وطلعنا من المكتب دخلنا غرفه العمليات الحاله الدوره دي كانت مره كبيره عايزين نعمل ليها عملية إستبدال صمام جهزتها طبعا كان مخدرنها تخدير عام وبدينا العمليه دكتور إيهاب قال لي جهزي لي ملاقط جهزتهم ليهو المهم العمليه إستمرت قريب خمسه ساعات متواصله كانت عمليه معقده شديد عملنا ليها إيقاف للقلب وإستخدمنا جهاز قلب_رئه
لمن إنتهينا دكتور إيهاب قال لي راقبي النبض راقبتا الجهاز بتاع دقات القلب مسافه كان في لخبطه النبض ما طبيعي والدقات برضو وريت دكتور إيهاب قال لي الكهربه ح تظبط الدقات كهربة القلب بعد العمليه بتتغير ركبنا ليها اسلاك منظم مؤقت بعد نقلناها لي غرفة عنايه عشان تكون تحت المراقبه...
يتبع