بقلم نور الشمس
بنين...
رجعت وياهم اصواتهم اسمعها وبالي مو يمهم افكر شلون اجيت وشلون رجعت وشلون چنت وبيا حال هسه
اني حتى مالحگت احفظ ملامح الفرح بوجهي
مالحگت البس ملابس العرس كلها مالحگت احقق جزء قليل من احلامي وياه
وظليت الوم روحي الطريق كله
اني ليش خلصت اول ايام وياه مشاكل وزعل
جنت اضوج من اعاركه وازعل ويرجع يعاملني چن كلشي ماكو بينا ويتعامل وي مشاكلي ابرود ويتصرف وچنه ميعرف غيري واني بنفسي سامعه حبه
واتذكرت شكد اني مذهولة وبالي كله يمه مامستوعبه موته بالفاتحه بس عيني مافارگت بت عمه وچان ابچيها حرگه غريبة ع البعض بس مو عليه ..حزن رشا غطا عليها
وتأثرها خله الكل يحس بنات عمهم خواتهم يحبنهم هوايه مو لأن اكو مشاعر تأكدت هي هم تبادلة نفس الشعور
هو ليش اتقبلت الموضوع واتغاضيت عنه مااعرف يمكن لأن مات ماصفى الها ولا الية مابقى منه الا ذكريات وبس وهسه شبقى كلشي مابقى وصرت بذمة غيره
شلون هيج بليلة ويوم انساه
وفكرة تجر فكرة
يعني صدگ حرام افكر بيه وابجي عليه واني على ذمة غيره ومنو اخوه !
يارب اختبارك صعب اثقل كاهلي مااگدر عليه
احمد اول فرحه اليه وأول شاب افتح عيني عليه
وأول ذراع لمني ونمت على ذراعه بعد ذراع ابوي
شلون اتجاوزه شلون
شگد چنت اكره موضوع زواج الأرملة من حماها وچنت اگول مستحيل اتقبله والمستحيل صار واقع بس واقع مررر ماينجرع طعمه
عيوني على الطريق وابچي خليت ابوي وامي وراي يبچون لأن گتلهم اعتبروني متت وبالنسبة الي انتم مثله متو وياه
واني رايحه ومااريد اي واحد منكم بيوم يوصلني لو يسأل عليه
حجيتها بس گلبي جذاب بحيث ظل بالي يمهم رغم كلشي ابوي تعبان وخفت يتخربط وعيني ع التليفون متوقعه يخابروني صايرله شي
اتذكر كلام صادق اخوي وياي گلي
.. السويته هذا علمودچ وبعد سنين راح تكولين زين سوه ويريدلي الخير البنت من صالحها تربى بين ام وأب وماكو احن من اهلها ..ومن صالحچ انتِ تكونين وياهم تكملين دراستچ توصلين وانتِ بأسم رجال يعتبرچ امانة اعز ماعنده وتصيرين امانته هو
حياة اختچ المخربطة ماتنعاد ومااخليچ تعيدين خطواتها وضياعها
اني انطيتها الجدها حتى تصحين وتتقبلين الفكرة لأن طرحوها علينا من البداية وماكو فرق اذا هسه صار او بعد سنين امر واقع لامحاله ومتأكد مراح تفارگيها ولا يخذوها ويخلوچ
مارديت عليه ولاجاوبته بس بگلبي هوايه حچي ضميته لأن لو طلع يخرب كلشي
طلعت واني ابالي خلص اكسر رجليني اذا جابني لدروبهم بعد
عيني على بنتي بحضني حضنتها الصدري اكثر وشهگت
انمدت ايد عمي ابراهيم الچتفي يطبطب عليه يصبرني زاد بچيي
..ذكري الله بابا والله اني وياچ ومااتركچ ابد انتِ امانتي وامانة اخوانچ مايقصرون وياچ لا حمزة ولاصخر وحسام خوش حسام گد الأمانة لو ماگد الأمانة مايتحملها ويصر عليها
الموضوع صعب عليه وعلى حسام وعليچ بس واقع حال انفرض علينا كلنا
ميلت براسي عليه محتاجه حضن يطبطب عليه بأيده سحب راسي الصدرة
وباسه
احس اكتافي عليها حمل بحمل الجبال
شنو هالسرعة الفرت حياتي فر
اني طالبة شجابني على الزواج شبسرعة اتزوجت شبسرعة اترملت وصرا ام .. وزواج ثاني معلن يم اهلي ويم اهله سر
دخت صوت دووي براسي صار
احس غيمة سودة حوطت گلبي من كل مكان
النفس من اجره يصعب عليه صدري ضاق بشكل ماينوصف
اااخخ يااحمد احس ماعنده حظ بالدنيا ابد ..شنو مرته تتزوج بعد العدة بشهر وشويه
بحياته مظلوم من امه واجيت اني ظلمته اكثر
ظلت تتراوالي صورة عيونه وكسرتهن من يحاول يواصل امه وترفضه چانت الدنيا تضيگ بعيونه يموت قهر
هسه مقهور مني اكيد گلبي يتگطع وصل ومابيدي شي
وبداخلي اتوسل
فدوه لاتزعل مني فدوه والله مو بيدي
شكله وهو زعلان ومخنوگ ماراح من بالي وصلنا ونزلت البيت فتت وحدي الدنيا ليل وحشة
والبيت الچان بنظري احلى واجمل بيت صار گبر بالنسبة الي
بكل مكان اباوع النا ذكرى خليت بنتي بكاروكها الجهزناه بآخر طلعه اني وياه مرتباته البنات
وطلعت من الغرفة ركض احس روحي فرفحت اريد اركض اريد اهج المكان مابي احد
شمرت عباتي وحجابي وعيني ع السواد الي مغطيني ضربت وجهي بقهر
صلفة اني فايته البيتك واني بذمة غيرك
احمد شلون گلبك انطاك تعوفني شلون
ورجعت اصرخ
انوب اني الاعاتب شگد صلفة اني انت الموت خلاك تعوفني واني عفتك بالحياة عفتك وبعدك طري بترابك يگلولي صرتي بذمة رجال حرام تبچيه ولك ابچيك عمري كله
ابچيك الحد ماينشف منهن دمع
بس لو اسمع صوتك هسه واحس بأمان
طلعت تليفوني مثل المخبله وارجع اسمع بصماته
وحده منهن يضحك عليه لأن سمع امي تصيحني بنينه وهو بشغله دازلي
..بنينه ولچ شنو هالأسم احلى بهواي بعد مااصيحچ بغير بنينه هيج تحسينه طالع من الگلب
وهنا اني متعصبه واحلفه لا يسمع من امي ويمشيها عليه اكره واحد يسميني هيج بس من امي اتقبله
بچيت واني اسمع ضحكه وهو يگلي صار بنينه ادللي
شهگت
..كول كلشي گول بس تعال
صوت الباب وعاني من اندگ حيل وصوت حلا وعمي ابراهيم
..بنونه فتحي الباب نشوفچ
وعمي يگلي
..فتحي عمي تعبان وارد ابات يمچ اليوم
فتحته ماحچو شافو وضعي شلونه
محد جاب سيرة للعقد ابد
وگعدو وحلا اخذت مني فاطمة
الأسم هذا اختاريته لأن اخر اسم ثبت عليه گال (فاطمة احمد )احلى الأسماء مااريد اسامي جديدة مااحبها وهيج اسماء مو تجي هبة او موده وتروح وتأسيا بالنبي وبنته عليهم افضل الصلاة والسلام
اختارلها اسمها وفعلا سميتها مثل ماراد
اخذتها حلا حللتها وبدلت الها ورجعت لفتها وانطتها العمي يباوعلها وگوه لازم دموعه
باسها بجبينها
ورجع گال
..شوفي بابا اني مااريد اتفلسف واحجيلج عن القوة لأن اصلا اني مو قوي ..اني مريت بهوايه ظروف صح غيري يشوفها طبيعية
بس چانت مو طبيعية عندي چانت اكبر من طاقتي ضعفت الها واتغلبت عليه ونتائج هالضعف ادفع ثمنه وضريبته لليوم مهما چانت مشاعرنا وخيبتنا غلط نسلم مقاليد الأمور للعاطفة تتحكم بينا لازم العقل يكون الحكم بالعقل السويتي انتِ واحنا او اهلج مو غلط
ولا تنلامين عليه
عيوني عليه وعلى حلا احس الكل راح يشوفني خاينة للعشرة وبلا احساس وصلفة وكل صفة سيئة بيه فهم نظراتي گال
..حلا تعرف والكل راح يعرف اني عقدكم مااخلي يستمر بخفيه لازم ينعلن بس بعد ماانطيج وانطيه مساحة تعيشون حزنكم بعيد عن بعض وبعدها تتقبلون بعض وهذا الگلته بالأخير لتعقبين عليه هسه تركيه للأيام
فيا بابا ماامنعچ من البچي ابچي بس مو دائما .. واريدچ تحافظين على بنتج وتخلين العقلچ قرار
ولوم ابد لاتلومين روحچ مرات نلگه نفسنا مسيرين بهالدنيا وتتلاعب بينا الأقدار
واتذكري هذا امر الله لا اعتراض عليه
بچيت
..امر الله يگول الأم تتهدد ابنتها او انفذ امر يميل چتفي ويكسر ظهري لأن مالي حمله حاشا لله هذا حكم البشر
..يا بابا ماالومچ حقچ شتحچين حقچ بس تبقى اكو حلول وهذه من ضمن الحلول اقتنعي بي وهونيها على نفسچ
سكتت وحلا تصبر عليه بكلامها الحلو المتعودين عليه بس شيصبرني
خلوني انام يلا عافوني ونامو قريب عليه بالغرفة المقابيلي
الصبح وي اذان الفجر عمي طلع رايح الأبوه يحجي وياه بموضوع ومناك يشوف الگيعان لأن صخر مكلفه بيهن يراقب الولد ع الأقل وهو يتفرغ للشركة
وحلا بالستة ابنها بچه واخذته وراحت وهي تبلغني اليوم البنات ينامن يمچ
والعصر امرلج هم لو تجين يمنا احسن
كلتلها مالي خلگ
گمت وراها سديت الباب واباوع الثلاجه مليانه مسواگ البيت نظيف ومرتب البارحه منتبهت
اريد شي يشغلني عقلي وگف رن تليفوني امي تتصل رفضته وماجاوبت وبعدها اخويه واختي والبنات ابد ماجاوبت واحد منهم غلقته
وابالي لازم اغير الخط مااريدهم بعد
اندگت الباب رحت فتحته هاجر بس شافتني حضنتني واني چني شايفه الأقرب من اختي واهلي الي شبعت بچي اشهگ وهي وياي
..شفتي الصار بيه هاجر شفتي شلون فرتني الدنيا فر
..سوده عليه بنونه ماتستاهلين والله ..الله يكتبلچ الخير ويعوضج يارب
..ولچ گلبي يريد يوگف گلبي يوجعني هاجر اتمنى اموت واخلص
وين عمتي شهله اريدها خل تجي يمي خل تنعيلي
اريد اسمعها منها
اليوم الگلب شنهي اليريده
يطلب مطاليبه البعيده
ويبجي على السكنو البيده
..كافي ولچ بنتچ ترضعيها لاتموتين من قهرچ شبيچ وين بنين القوية اعرفچ اصلب من هيچ
..ولچ والله كل خير مابيه لو بيه خير مااتزوجت وبعده توه اشهر صارله من مات ست اشهر ماصاير
..زواجيش بنين شبيچ هو عقد يسكتون اهلج والناس اليمكم بي قابل زفوج هسه على كيفچ وي روحچ
هو مو احسن منچ لو تشوفين حجيه وي اخوانه هم ميت قهر على اخوه و يحلف موصيچ عليه احمد وگايله لو كلفك الأمر وتوصل للحلال سوي الحلال ولا تسأل بي
وصخر يكول اني شاهد صح كلامه هو وصاه بعد ماحمزة اعتذر ..بس مع هذا يلوم بروحه شلون ماخذ مكان اخوه
بچيت
..شلون گلبه انطاه هيج يوصي شلون نطقها ليش مابلغني بمرضه چان مامفاركته والله چا خليت راسه بحضني الآخر لحظة
..وشتسويله تمنعين الموت عنه ياحبيبتي هم اخوته يمه وميتين قهر ماگادرين يسوون شي .. عوفي هالحجي وذكري ربچ وخليچ سباعية بنتچ امانته فرحيه بيها وحسام خوش ولد ترى هو رافض فكرة الزواج كلها بعد انفصاله هم انجبر هسه
باوعتلها مستغربة مسحت دموعي ارد اركز الدموع تغوش النظر
..منفصل؟
..اي من اول مااجيتهم عرفت هو اتزوج تركية اول سنة سافر بيها يكولون وزواجه جان بدون حضور اهله مجرد بلغهم واخذها وبعد فتره ماوالمته تطلع بكيفها تدخل بكيفها تتصرف من راسها بيئتها مختلفة وصارت مشاكل طلبت الطلاق وانفصل..انتِ متدرين ؟
..شمدريني بي ماسائله عبالي مامتزوج وشعليه بي مايتزوج عشرة ويطلگ مية شكو اسأل اصلا
بعدنا نحجي واني منفعلة واندكت الباب
اريد اكوم مابيه حيل كوه اسحل بروحي وهاجر كامت كبلي عبالي عمي لو البنات
من كلت منو
صوت امي تبچي من وره الباب
..انه يابعد امچ واهلها ولج يمه مانمت الليل اجيتچ وگلبي طاير
فتحت الباب هاجر وصلت گبلي
واني گلبي هم طارلها ذبت نفسها عليه حاضنتني وتبچي واباوع ابوي وراها بچماغه مغطي عيونه
عمري كله ماشايفه ابوي يبچي خفت عليه ايده ترجف ومو على بعضه گوه واگف ميلت عنها
واتقربتله مديت ايدي اله ارد اسنده
وهاجر اخذت امي ترحب بيها وتدعيلها بالصبر والصحة وفاتن
سحبني عليه حضني باس راسي
بسته ونسيت كل عهد اخذته وكل وعد اتوعدته بيهم راح اتذكرت زعل امه وياه شحصلت من الزعل مااتحمل ابوي يصيرله شي واني زعلانه
..شجابك بويه تعبان انت
..يابعد ابوچ ماغمضت عيوني والله.. وامچ فرفحت عليچ ماطلع علينا الضوه الا واحنا بالدرب ..الصارلچ كاسر ظهري بس يايابه هذا الأنسب وانتِ تعرفين
فوتتهم وهاجر اتصلت على عمي
شويه ودار علينا عمي ابراهيم يرحب بيهم ويكلهم ماتأمنون بيه انتم اني بمكانك هنا ومن الليل طمنتك وكتلك اني وخالتها يمها ولو بيوم وشفتني مقصر حقك عليه اضعاف
اخذتهم السوالف وعيني على امي شفتها بيضة وعيونها ممروده مرد
..يمه انتِ زينه
..چا شبيه يايمه انتِ التنسألين ولو مااسألج اعرف حالچ شنو.. بس يايمه الحزن من الله يبدي چبير اكبر من فكرچ واستيعابچ واكبر من طاقة گلبج بس الله سبحانه يهونه الى ان يصغر ويصير ذكرى
اختچ كاسرة ظهورنا الهسه ماعرفت تستوعب الدنيا ماتوگف على احد ربطت مصيرها بموته لاترضا بزواج ولا عاجبتها عيشتها هاي حتى من چان ابنها يمها هي تايهه وتاهت اكثر ابعده هسه
يوميه ابنها يجيها ولا گدرو يمنعوه اهله الولد مايمنع اول وتالي الأمه
ويجينا ينام بحضني ويشمني وجده وخواله يترسون جيبه مصرف وعلاقته وياهم شحلاتها ولا متأثر وهي نفرت الكل كرهت حتى روحها ماتعرف شتريد وكل شويه اطالبت وي اخوانها گوه مغلسين عنها
صدگ جرحها بگلبها ومايألم غيرها بس هي ماتعرف اداري امورها
البارحه بطلعتج شدت وي جهالهم ولطشت علوان بالگاع ابوه طلعه يسكته ماحاجاها ولا حرف واشر المرته تسكت كون انتِ البعيدة حجيتي هي حجت بس چن دوب ابن ادم يسكت
انتِ صيري سباعية لاتصيرين مثلها البشر يماشي الدنيا مسايس يرتاح واليمشي بالعفرته يشلع گلبه وگلب الحواليه
..يمه جنت انصح بيها وعبالي النصيحة تفيد بس صعبه يايمه صعبه والله بس هي تعرف شنو البيها
..والله يايمه لاتصدگن مر على گلوبچن وچع وماجاس گلبي متمرمره عليچن بس شسوي
..دير بالچ على صحتچ يمه ..نعيش ماعلينا شي
..چا مو كل عيشة عيشة ...عيشي عيشة تريحج ماتخليچ نقمه ع الحواليچ وشلون يرتاح البشر يايمه اخذيها مني يرتاح البشر من يقنع بعيشته
..تعاي اتمددي يمه علاجج جايبته
..والله طلعت رايي تايه نشدي ابوچ جاب وياه دواي لو لا
رحت اتأكد من ابوي ..عمي گال اني اوصي الولد اذا ماجايبه وابوي گاله مايحتاج احنا نرجع مانظل وجايب وياي دواي مال الضغط يرهملها
مو نفسه بس هم تشربه للضرورة
عمي ماقبل بطلعتهم ابد .. واتصل بحمزة گله تعال
شويه واجه حمزة لبست عباية جتف وحجاب اسود كامل بدون ماارفع عيني عليه هو من قبل يكرهني انوب يشوفني جاحده هيج متأكده كارهني موت هسه وماالومه طلع هو هم موصيه ورافض هنياله گدر يرفض الف هنياله
سلمت وفكري مشغول
..السلام عليكم
..هلا بيچ خيتي ..شلونچ فطومه شلونها
..الحمدلله
سكتت وابالي سلامه رده بمبالغه يمكن لأن اهلي وابوه وهاجر هنا
اسمعه يحاجي عمي ع العلاج گله لا اخذها هي شكلها تعبان خل يجيكوها العصر اني ونور نجي وناخذها
شكد امي رفضت ماقبل كلها حجيه تنهتين مبينه تعبانه اني ابنج مو غريب واحنا اهل ان شاءالله بيبية فطومه العزيزة شلون نخليچ اذا مارجعتي وي الحجي وانتِ عال العال مااتسمى حمزة
امي تدعيله وتشكره وخجلانه ماتتقبل بسهولة بس حرجها
ضربت وجهي شگد عيب يربي هسه يتذكر سوالفي ويگول خل اهينها بعد استاهل
العصر اجو وامي عارضت حجت ماقبل الا ياخذها
هاجر ماطولت يمنا اتصلت بيها عمتها ابنها بچه
والعصر اجونا صخر وامه ورحبو بأهلي ومن طلع حاچاني بالباب
..ام فاطمة محتاجه شي
..سلامتك متقصرون والله
..عشه الوالد والوالده عليه يكمل ويجيج ارتاحي وريحيهم يابعد اخوچ.. اهلچ تعبانين والطريق بعيد لو ظل گلبهم مشلوع عليچ مايستقرون
نزلت دموعي وكوه داريتهن اشرتله براسي اي بدون مااحجي
حتى على العشه ماشكرته اتصلت بهاجر صوت ابنها يبجي الهسه مااگدر الفظ اسمه
..يمه شوكاحته ابنچ بچيه من كل گلبه الله يساعدچ هاجر ولچ مفضوح هذا
..ههههههه اي ولچ عمتي تسمي المسودن الصغير
ضحكت
..لو يدري عمي
..يدري سمعها ومكيف
..هجوره اتشكريلي من صخر والله الساني انربط مااعرف شحاجيه شدعوه الا عليه العشه
..شمسويلهم قابل شبيچ بنين على كلشي شكر اهل احنا انوب ازعل عليچ كل شويه وجرختينا بشكر ..ارتاحي وي خاله ..و بس يكمل اجيبه الچ واجي اكعد وياها مشتاقه الها هوايه واجيبلكم حمودي تشوفوه
..حبيبي فدوه العمره هلا بيكم
نهيت الأتصال ورجعت يمهم البعد المغرب اجت امي جابها حمزة وطلع ضغطها كلش مرتفع وعدها دهون عالية وناطيها كومه ادوية
سلم حمزة وقبل لايطلع گال جيبي حبيبة عمها
رحت اجيبها والهم كتلني
شگد يحبه ومتغير هيچ شگد مكسور عليه
ماچان هيچ ضعفان حيل وجهه شاحب
شلتها واختنگت لأن ابوها ماشافها ولا حضنها
انطيتها اله
باسها براسها وشمها حيل
..اووف ياريحتچ يابه شهالريحة الطيبة
اخذ وياها صور سيلفي ماده السانها وعيونها كل شويه بمكان الهسه ماتركز توها طالع اربعينها
باسها جوه حنجها عدها نونه شلون الرصعة جوه الحنچ مثل ابوها بس چانت اللحية تغطيها ماتبين عنده
باسها مرتين وتلاثه ماعافها لمن انزعجت
ورادت تبجي ابتسم وانطانياها
..محتاجه شي خيتي
نصيت راسي مااكدر اخلي عيني بعينه
..سلامتك عمي ممقصر ولا انتو الله يحفظكم
طلع وهاجر جابت العشا مسوي مشكل مشاوي وحتى الخبز وياه
باتو يمي واجه الليل وهم رجعتلي افكاري وگلبي انملى هم وفاطمة كل شويه فازة حتى من اريد اشرد وانام مااكدر اگعد كل شويه هي ترجع تنام واني افكاري تاخذني الحد مايطلع خيط الصبح انام كم ساعة وتكعد ثاني يوم رجعو اهلي شكد عمي راد يعطلهم اكثر ماقبلو وامي گالت ماابطي عليج كل سبة وكت اجيج امرچ
وخلصت هذه الأيام محد مقصر ويانا كل احتياجاتي احتياجات الطفلة لقاحاتها كلشي هم وياي بس اني جني وحدي وكلهم ماسدو مكانه ابد بس بديت استوعب حياتي واحاول ارتبها خاص هو حسام حتى رساله لو اتصال مااتواصلنا وشفت روحي مرتاحه من هالموضوع مو مثل اول خايفه وشايله ذنب چني
البنات يجن يباتن يمي اكثر الايام ومرات عمي وحلا ومرات اني اروح يمهم
وبالي كله يم الدوام شلون لو رجع اداوم لو تتأجل السنة
....
رشا ...
من لحظة السمعت الخبر واحس گلبي طار منه وصله وفقدت امان مارجعلي ابد شكد اني قوية واصبر بروحي كل الم مريت بي طلع احس الموت محاوطني من كل مكان
ولد عمي ابراهيم عزاز عليه بس خوفي چان على صخر من المشاكل مو اكثر واحمد ابد مو ع البال ابد حتى الولد علاقتنا وياه گد السلام
من يوم الي اندفن وروحي طايره گمت ماانام اذا نمت ساعة ساعة ونص وافز مرعوبة اخاف احلم
ابويه جدي رنا الي ينام منهم كل شويه افززه واني واكفه على راسه احس انفاسه موجوده لو لا
ريمة اجتني بعد مامخابرتها رنا تبلغها وضعي مو طبيعي ظليت اراقبها هي وجهالها خو ابنها خبلتها عليه حتى بالكاع مااخليها تخليه
احس فقدت عقلي وبدا راسي يصدع صداع غريب وصرت اكلهم اكيد عندي ورم وشكد راجعت تحاليل وفحوصات كلها تگلي سليمة بس الألم ماخف ابد كل مااله يزيد
صخر شگد حجه وياي عمه شهلة اهلي كلهم ينرفزوني احس ارد املخ روحي من يكلولي استغفري ربج وهذا وهم ودي اخنگهم وانفعل واصيح واخبص الجو
اول ايام اسعد موجود عزاني وشافني وجنت مو هيج اتواصل وياه كد اتصال قليل واترخص وهو عاذرني بعدها قفلت تليفوني وكل شويه اطلع عذر
واجاني مره هم اخذني طبيب وكتله اتحسنت بس جذب ساء وضعي اكثر
الى ان بيوم ابويه جبرني اراجع رحت تعبانه واتمنى اخلص
انطاني مسكن بس المسكن نحلني ايدي مااكدر ارفعها وعيني ماافتحها بس الألم نفسه والخوف بگلبي زاد الوب بفراشي الوب اريد اگوم اشوفهم لو يجون يمي حسيت راح اموت ومحد يمي
دموعي بدت تنزل
واسمع صوته وصوت رنا تگله
..والله ماردت اخوفك عليها بس شوفة عينك منتهيه
..افاا عليچ عمه صدگ عود وماتحچين چا اخابرچ يومية واسأل تكليلي تعبانه هذا تعب هذا ذيج جيتي ماجانت هيچ چانت ارحم بهواي
ارد افتح عيوني اله لو انهض مااگدر
رنا تگله
..عمك مارضا گال هالأيام عدهم انذار ومشغول انتظرتك تفرغ
..هذا عذر بلا.. مامقبول اي عذر لو ماصخر حاچيلي ماتحجون انتو ادري غير مرتي هي شنو ناقص انه هي بهالحال وانه مو يمها
اتقرب عليه حسيته باس راسي ويمسح بشعري رفع ايدي باسها
قبضت ايده بخفه ارد اگله اني واعيه
..رشا ..حبيبتي تسمعيني
نزلت دموعي مسحهن بيده وباس جبيني ورجع يحاجيني مااجاوب صاح على رنا تجيه
..عوفي من ايدج مااريد كلشي مااريد اتسمم ..شبيها ليش هيج حالها واعية ترى بس ماتگدر تنهض شمنطيها رشا مخدرة وضعها مال تخدير علاجها شنو
..اخر طبيب نصحنا نحولها طبيب نفسي واخذناها اليوم كتبلها علاج وگال اول ايام العلاج يتعبها الحد مايتعود جسمها عليه
..رنا علاجها وين اريده بساع
..بس على كيفك والله عيب من عمي ليش تصيح هسه ابوها يجي وافهم منه
..يمعوده اني حايط لو ثلاجة وتردين ماانخبص واتعصب اكو شي يخليني اهدأ ..مرتي هاي مرتي شصاير بيها ليش مالي علم ..طبيب نفسي شنو انوب شبيها هي چنها ورد
..اخر ايام وضعها ابد مو تمام واصلا عمك يريد يحاجيك خاف شسمه يعني خاف تغير رايك كال من حقه
..لا اله الا الله ..والله لو ماعمتي تدريني شسوي رنا اتكفي شري واطلعي هسه احسن
..بس اهدأ اني متعوده على طلايبك هم لا اهدأ ونتفاهم
..بس خليني وياها هسه وبعدين نكمل حچينا
هي طلعت واسمع الباب انطبگت وهو رجع قريب الي يتفحص حرارتي
ظل يوعي بيه سند راسي شربني مي غسل وجهي كوه گدرت اكله
..ها اسعد اجيت
..ها يعيون اسعد ها ..شبيچ حبيبتي شصاير بحالچ ليش هيچ وضعچ
دموعي نزلت مسحهن وباس راسي
..رشا ما اخليچ راح اخذچ يمي بس اقنع ابوچ لا تعترضين انتِ زين حبيبتي لاتعترضين خليها عليه
..اريد اموت اني المن ماخذني
..اني يمچ ميخالف مااخليچ تموتين وحدچ اموت وياچ
مثل الجاهله كلمة رغم مو صحيحه هدت خوفي وقنعتني لزمت ايده قوي حيل بكل قوتي
فهمني شحسيت
اتقرب اكثر الي
..نامي تگدرين تنامين وانه يمچ ماعوفچ والله
ظليت اباوعله عيوني ع النص فاتحتها
اشوف خوفه عليه وشلون عيونه تراقبني بخوف حسيت بحنيته من عدل شعري بچف ايده وغلغل اصابعه براسي يدلكه خفيف
شويه شويه بديت انام نمت واني لازمه چفه ولأول مره انام هالگد گعدت اسمع صوته يحچي وي ابوي وابوي يكله
..ع الأقل نام ارتاح وين ترجع هسه
..اخذ موعد من عم صديقي مايتحصل ومايستقبل حاله بكل وقت بس اطيح عليه وبلكي الله تنفع اخذها اله باسرع وكت وهاي گدام الوالد جدنا وعمتي مااريدك تعارض بس تتحسن شويه اخذها وماارجعها ها
..اني اصلا خجلان منك لأن عطلت عرسك احترام النا اكثر من مره بس هم ماتعقلها اب يرضا يزوج بنته وهي على الفراش
..اعالجها عمي والله ابدل روحها بروحي بس انطيني مجال
..انت معدل مااخاف عليها وياك ..بس خلي يكون كلشي برضاها بعد ما تتحمل صدمات رشا تعبت من المكابر
اجتني رنا لگتني گاعده حاجتني اگوم اغير ملابسي واسبح
گمت گوه واحس رجليني مشدود بيهن حجر
ماينشالن اسحلهن سحل
ساعدتني رغم حملها متعبها
..خليني وحدي لاتتأذين رنا لاتخافين مااسوي شي
بقت يمي بالباب كوه سبحت وبدلت وطلعت شعري مبلل بس لافته بأهمال ماخليت رنا تمشطه مرتين ريمه مشطتلياه واتگطع بيدها لأن هاملته بس سرحته البارحه وراحت وغزاله بالي يمها ابنها حاصر وطهروه وماسألت عليه بس لايصيرله شي واحنا ماندري گلبي طار من اتذكرته
بدا راسي يصدع
فات والخاولي على راسي بدون ماالف شعري وشعري يقطر على ملابسي نگعها
باسني براسي وخدي ولزم الخاولي نشفلي شعري وجگارته بحلگه ويحجي وياي وعيني عليه الهسه ودي اسأله شلون مسيطر وارجع واكول اني بياحال
..شلون صرتي يالحبيبة
..الحمدلله احسن .. شجابك اسعد
..على راسي اجيج زعلان عليج اني صيري زينه وازعل مو وكتها هسه
سكتت وعيني تباوع للبعيد وابالي افكر خاف اروح وابويه يموت لو جدي
..ها حبيبتي على اتفاقنا اجيج باجر بالزايد عگبه ونروح ..شتگولين
هزيت راسي لا
دار وجهه يتلفت شاف المشط مشطلي شعري على كيف
نعست من جديد
..اريد انام
..ماكو نوم بعد صحصحي انه اروح هسه
..وين تروح مو گتلي وياچ
..ارتب روحي واخذج المكان راح تحبيه وترتاحين بي هم بس انطيني مجال
يومين ابوي سوده عليه ماعافني ورنا هملت نفسها والبيت وانشغلت بيه وجدي يروح ويرجع عليه حتى عمي ابراهيم وعمامي كل شويه متصلين
گعدت الصبح اشوف رنا حضرتلي جنط
شويه ووصل هو
گالتلي اروح وياچ مااعوفچ بدلت وطلعنا اني وهو ورنا واخذوني بس ماادري وين
الطريق طويل شكد مشينا انام واگعد على لمسات ايده وسوالف رنا وياه وارجع انام وانوب من المدن دخلنا للأرياف
گالو وصلنا اتعدينا للاخير بعيد عن البيوت اكو بيت معزول بنصه نخله عملاقة رفعت راسي اشوف نهايتها دخت ماگدرت نزلت راسي والدنيا الظهر قريب لتلاثة تقريبا
هذه مو مثل اريافنا طابعها صحراوي وترابه اكثر من الخضار
بقينا بالسيارة وهو اتصل ونزل اجاه ولد من البيوت البعيده وطلع رجال جبير لحيته وشعره ابيض حتى حواجبه وعلى راسه عرقچين اخضر وكوفيه على متنه
اول ماشافنا وويانا هذا الشاب فوتنا وهو يسلم ويرحب
تونا گاعدين وعدهم ولد بعده طفل دعش سنة اثنعش جاب بيده صينية بيها كاسات فافون صغار لبن وبنصها زبد وياها صحون صغار رطب
خله يم كل نفر كاسة وماعون
الولد ماكو اختفى دخل الهم بس مافات ويانا
عيني بدت تتجول ع المكان
صالة چبيرة ممدودة على كولها سجادات حياكة كبار من القديمات چنت اظنهن انقرضن بس بعدهن جدد عبالك الوانهن زاهية جذبني
رفعت راسي مقابيلي اية الكرسي جبيرة منقوشة على قطعة قديفة ناشفه لون بيجي ومخطوطة بأسود عجبتني دقة الخط بس راسي صدع حيل واخر اسطر ماكدر اقراهن غمضت عيني من الألم
اباوع الحيطان بيها لطخات چفوف من الحنة
وصور ناس كبار متوفين يمكن شياب وشباب وشكلهم هيبة
فزيت على صوته وهو يسلم ويرحب للمرة الثانية واول ماحچه گال
وليدي بلغ الشايله طفل خل تطلع ادور مناك يم العلويات لاتنضر مو زين عليها
عيني الرنا خافت او اندهشت يمكن لأن مايعرف هي حامل اصلا منين عرف وشلون شك انتبهت هو اصلا نظراته عليها
واشرلها تگوم گامت وعثرت كوه سيطرت بمشيتها واسمع ترحيبهن وسلامهن الها حر صوت مره جبيره اللاگتها
اني هم لزمتني رهبة غريبة بس بأسألته ضيعها عليه
ماادري شنو الأسئلة السألها مامترابطة ابد
باوع الأسعد وگله
..بنيتي هذه عدها عارضين الأول مسگية
والثاني خايفه حيل مهبوطة خل نگول وهي عليها ضرر وصارت عدها مضاعفات اكثر المضرور بالخوفة يدوس
اسعد گله
..متلبسه؟
..لا بس صار عدها ضرر مضاعف اتعقدت امورها اكثر وبدا يعدد الأعراض الصارتلي واكو مامنتبهه عليهن اصلا قبل وفاة احمد وحتى قبل وفاة ابني وحتى عن فقدي الأبني لمح
لزمتني خوفه رهيبه شلون عرف ظل يقرالي قرآن وايده على راسي
ابتعد وكل الاسعد
..بين مااصلي وهي ترتاح ارجع اكمل الها بس راح تتعب وحضرلها مغذيات بس حتى نتلافى الجفاف
طلع هو من الباب الثاني
ورجليني ترجف من الخوف وعيوني تتوسل اسعد ترك مكانه واجه يمي
..نامي حبيبتي بس خلي راسچ على رجلي لاتخافين انه يمچ
لزمت چفه بيدي حيل وهو هم احتضنها بچفه ماگدرت اغفى
من رجع اندگت الباب فزيت
..بسم الله على كيفچ لاتخافين يمج انه يمچ
وصاح
..فوت سيد
عدلت حجابي ولامه نفسي مامرتاحه بالگعده ابد المكان مريح مو مخيف الخوف من الجاي احسه
انطاني كاسه شربت منها مي
شويه وبدت نفسي تلعب قدملي طشت
استحي احس مااريد اسويها هنا رفضت اهز راسي بس نفسي غلبتني تقيأت امعائي تگطعت اريد اخلص اورجع اذب انتهيت
وهو يقرا ايات واسعد لازمني بقوه ساند ظهري وراسي
مسح وجهي وغسله الي واتخربطت انتهيت خلاني شويه ارتاح طلعني للسيارة قبلي رنا صاعده تحجي بالتليفون وتبچي
طلعنا كل ظني اني طالعه البيتنا راجعه
بس الي صار انتهيت ماادري فقدت الوعي صحيت ويمي رنا وصوته وصوت اول مره اسمعه يشدلي مغذيات
من حجيهم عرفته جعفر اخوه
طلع فتحت عيوني
..اني وين
باستني رنا
..الف الحمدلله على سلامتچ رشاوي يايمه گلبي وگف خل ابشر ابوچ لايسوي حادث اجاچ هسه هو وصخر وعمچ
طلعت تخابر بدون ماتحجيلي شي
واجاني هو تعبان وعيونه تراقبني نظراته ربكتني
..اني وين
..بگلبي انتِ ..عندچ العافية يومين وتصيرين ورد
يتبع