بقلم نور الشمس
....
هاجر...
صرت اعشق گعدة الصبح الفجرية هنا غير
اگعد على صوت الديچ ودجاجات عمه شهلة.. شفتها شگد متعلقه بيهن وشلون تضوج من تتمرض وحده منهن وتصر على علاجها وعرفت ومستها شنو هنا بيتها مسويته مزرعة مصغره بي بيوت للدجاج وبي زرع ورود ومتسلق ومخضر تزرع بوكته
ريحة الورد هنا تنعش الروح الصبحية وجمال وسحر الشمس بأول شروقها اصوات الطيور
والحمام... صوت البلبل العراقي اليتميز بتغريدته ماموجود بس بالعراق واريافنا بالذات
الطبيعة الحلوه الي مصبرتني على كلشي صارلي
اگعد اتأمل كل هالمخلوقات وكيف الله سبحانه مسخرهن ومسخرلهن مايصعب عليه تدبير امري
گعدت اليوم من الفجر وقررت انزل مااراقب من الشباك مثل كل يوم واخذتني رجليني الريحة خبز تنور الطين الملت المكان
عمتي بصوتها تدعي دعاها الحلوو البسيط المليان طمأنينة
ونور گاعده قبلي للسادس تقرا ..خليتها اتصلت بحمزة تگعده يقرا وياها
ومثل العادة من يجي وكت الريوگ اذا مامتريگ يصعد ع الحايط يصيحها تناوشه من الموجود واذا مسوين ريوك يكلها اتريكت
صبحت على عمه وطلعت ارد اشتم هوا واشوف نشاط اشهل شلون يومية بهالوكت يعيد هالروتين
لحگت عليه يشلع اخر خبزة
واخذ مغرفة طلع بيها جمر للمنقلة وخله عليها قوري الجاي وبعدها
فل الثامة واندار صارت عينه بعيني
ابتسمت واني اعدل اطراف شالي باحراج ..مامتعود يلكاني بهالمكان يومية ابدل واكمل يلا انزل اكلي شي بسيط واشرب جاي ونغسل ونطلع
..صباح الخير
..ياهلا بهاجر زين مغبشه اليوم بديتي تتعودين علينا اكثر
..جابتني ريحة خبز التنور واصوات الطبيعة خلتني انزل ومااكتفي بالمراقبة من الشباك
شال طبك الخبز المعمول من خوص النخل وفات وهو يمشي علق على كلامي
..لا طبعا الشباك شنو.. احلى شي من تشوفين الطبيعة بكل مدى توصله عيونچ بدون اي حاجز
شايفه هنا بحوشنا شگد حلووه الأجواء بس بالبستان والگيعان المفتوحة غير
..اول مااجيت طلعني عمي عثمان وشفت حتى بنات يشتغلون بالزرع والرعي صح حلوه الحياة هنا بس متعبة
..متعبة صح بس بتعبها لذة مو طبيعية للمتعود عليها
بصغرنا حتى خواتي وبنات عمي يطلعن بس من كبرن لا منع جدي طلعتهن وصار كله علينا احنا الشباب عدا شغل الحلال حلبهن ومنتجاتهن هنه يسوونه ونسوان عمامي وكل بيت بي وحده تتخصص الهذا الشغل من حلالهم
..اني اكلت من ايد ريم يخبل شغلها وهم ام حمزة تسوي مضبوط انتو هنا بالبداية انصدمت من عرفت عمتي متحبه وانت تسويه بالمناسبات بس ..اكو شغلة عجبتني اكول شلون محافظ على بشرتك وانت تطبخ وتخبز بره طلعت تتلثم
..نتلثم حتى بالزرع من نطلع هنا نتلثم بالشغل صيف شتا ..بالصيف من الشمس وبالشتا من البرد ..بس البستان العصريات مايطلب منا نتلثم لأن هو مظلل وشغله حلوو مهما كان متعب ..واتلثم للتنور بالذات لأن ريحته تچلب وحرورته صح هادئة مو مثل الحديد بس هم تلهب الوجه
صاح نوره تصيح حمزة رحت اريد ابدل ونتحضر نطلع صاحني
..مو تتأخرين دقايق والريوگ يجهز
وفعلا حاولت اكمل ع السريع رتبت وجهي بمكياج يلائم بشرتي وقدر المستطاع بالجامعة البس لبس رسمي والوان تناسب الدوام
رشيت عطر ونزلت
عمتي تحضر الاستكاين وتحجي وياه عن اختها توصيه وهو يحجيلها علي معاتبه كايله صار فتره ماشفناك ولاتحسب علينا الأتصال الأتصال مو كافي
اراقب واحلل شنو الي يخليه مياكل من ايد امه وهي معروفه بنظافتها معقولة المشاكل بين الأهل توصل الأنسان الهذا الحد من التعقيد
اشو مبين لطيف ومامبين عنده عقد ولا من النوع الي كاره الناس ويحب ينعزل تصرفاته كلش طبيعية ليش بالأكل تفرق
وليش هي متقبله ومستسلمه الأرادته بحيث حتى هي تاكل من ايده وحتى احنا مااحسها جاي تحاول تخليه يحب اكلها ولا تريد تضغط عليه مااعرف احس اكو حلقة مفقودة والغموض الي بشخصيته يجذب اكثر من وضوحه
اول مااجينا سوتلنا كم مره الاكل بعدها من اتعودنا عليهم وهم اتعودو على وجودنا صرنا حالنا حالهم ناكل كلنا من ايده حتى الغدا ننتظره ونكعد كلنا بسفرة وحده بعد ماجنا اول ايام بعزلة ناكل
انتبهلي اباوعله اشرلي وبأيده البيض طگ وحده بوحده
..الحلوو بيچ مو مثل بنات هالوكت تحبين الأكل الريفي البيض بالدهن الحر گلت مراح تاكله اول يومين وسويت وياه نوع ثاني بس حبيتي احسن من غزالة الي تفضل الزيت النباتي على الحيواني ووحده ثانية هم منتظرة تاكل جبن مثلثات وتعوفه
ضحكت نوره تريد تحجي وحمزة من السياج صاح
..اللفة يمعودين
رد صخر يضحك
..خلوه يتسامرون هو والديچ وطليان عمي قادر بس اصواتهم طالعه هالوكت
نزل طاوة البيض وطلع مربى من الشيشة والاجبان الي تحبها نوره
خلاهن گبالنا وعمتي ويانا ورجع سوه اله وصبله چاي اكل وهو واگف ماگعد ويانا ..وعمتي تگله شلعت گلب اخوك لو ادري اني مسويتله
نوره تضحك عليه وهو يصيح
..خشوووم شكو صحتوني اذا مامسوين بسيطة
طلعله وبيده ريوكه وجايه
اكلت ع السريع وگمت لأن لازم نطلع من وكت هو متعود ياكل سريع واني مااكدر اظل اكل وهو منتظر
ظلت بنفسي اكمل الريوگ بس ماگدرت
لگيته يحجي وي حمزة بعدنا بالحوش واندكت بابهم وحمزة گال هاي امي مغبشه اليوم
بس طلع فتحها وعمي ابراهيم طلع ع الصوت وهي بصوت عالي اشكال حجت
ضحك صخر وگال
..شراح يسكتها فيحاء ..بكته وانتفحت خل يدورله عذر عود
طلعنا واسمعها تگله
..شوكت تخلص عمارة الدامرجي هجولتني حتى يظل يومي الحلا وتگطع رجلك مني وين اكو ترميم هالگد يطول
ماادري شجاوبها صعدنا ومشينا عيني ع الطريق الفلح طالعه الشغلها
مشينا مسافة طويلة اني ساكته وهو ساكت
كسرت هذا الصمت واني اسأل
..هو مو صدگ عمي چنه طول بترميم البيت ؟
..عمچ قابل عامل شو يطلع عمال وسبحان الله يوم واحد ويبطلون
..ليش
..عد عمچ السر
حسيته هو هم مامقتنع
..نوره اذا امها هنا بقت تروح وياها لو تبقى يمكم
شغل مسجل ورد متأخر كأنما بعدين يلا استوعب السؤال
..ليش تسألين لاتربطين مصيرچ بمصير نوره ولاتسكتين وتستسلمين التوجيهات ابوي
سكتت وبودي اگله شلون كمل يطلع راسه يشوف من خلفنا حتى يرجع ويدوير
..يعني عاجبج تبقين يمنا ابقي عاجبج ترحين روحي نوره تبقى تظل ابوي مادام هو اتكفلج مجبور يسعى الراحتج مو بس انتِ ترضيه ..
اتنفس وزفر الهوا فاجأني من گال
..ترى ابوي مو خير ولا ملاك
..ليش شبي عمو مافهمت
..بمرور الوقت تفهمين
سكتت محتاره اكو كلام ارد اكوله واعجز اكوله بهالقرب
بعد فتره طال بيها الصمت دقايق گلت
..يمكن هو صح عنده وياكم تقصير لاحظت انتو الكل مو راضين عليه يمكن لأن خذل امهاتكم ..بس يبقى اب واشوفه يسعى الرضاكم ..اني ابويه كلها جانت تحبه واني بسبب قصر نظري وعدم توفيقي مايوم سمعته كلمة طيبة وراح وهو بحسرة الكلمة مني وهذا اكثر شي مضوجني الناس كلها تحبه وتقدره وبنته ماعرفت شلون تفهمه وتفهم منه
عقد حواجبه ورد بجواب يصدم اكثر
..الله يرحمه ابوج اني مااحبه منو گلج الكل يحبه
وانتِ ماگدرتي تتوالفين وياه بسبب تقصيره وياج لاتحملين نفسچ اثم هو سواه
..بعيد عني وعن وضعه وياي ..ليش متحبه شسوالك
..المحبة من الله واكيد اكو اسباب تخصني مااحب احجي بيها
..متحبه بس لو تتمنى يتعذب
..لا طبعا ماكو انسان عاقل يتمنى ميت يتعذب الا واصل مرحلة وعاصم الله يرحمه ماچان مدمرني الهذا الحد بس يمكن لأن چان قريب الأبوي
..انت متحب عمو ابراهيم
..تردين الصراحة لو احجي مجاملة واحسب انتِ بت عمنا المتكفلها الي تشوفه اقرب شخص بين اهلها الها
..لا طبعا الحقيقة اريد
..الحقيقة ماادري احبه او لا لأن المواقف تحدد هالشي مو الكلام
..شتشوف ليش استقبلتنا بطلب منه وليش اتكفلت امر دوامي وتوصيلي اذا متحبه ترفض اكيد
..لا مو اكيد ..اني اخواني وخواتي مااقيس غيرتي عليهن ولا محبتي الهم بعلاقتي وياه وانتِ محسوبه علينا كلنا مو بس على ابوي اذا اني او مهيب تبقين بنت عم النا
..اكثر شي حبيته بيكم هذا الترابط اتمنى اخواني من يكبرون يكونون مثلكم
..ان شاءالله ..وهاي وصلنا ست هاجر ..تليفونج لتخلي صامت واذا عندج بعد مواضيع نسولفها بطريق الرجعة
ابتسمت ونزلت للدوام ومثل كل يوم احاول اصب كل تركيزي بالمحاضرات..وببين المحاضرات اگعد وي كم بنيه صادقني بس مخليه حدود الهالصداقة خاص ان اول موقف جمعني بيهن چان محرج حيل
...سراب ...
الناس تگعد تگول يا صباح الخير
وگعدنا على كونة فيحاء وبرود ابوي اليريد عليها بكلمة وحده بس
..صوتچ لاتعليه لاعلى يوم اطك براسي واطلگج من وراه
هي تسكت لا
گالت
..اكيد اطلگني حتى يومي يظل للجديدة الحلا هانم
صاح هو وخبلها اكثر
..حلاوة وينچ صعدي ريوگنا فوگ
ودار على فيحاء
..البيت جنت ناوي بس صبغ وترميم بس شفت حمزة منتظر يكمل سادس ويريد اخطبله ومادام رايد زواج ومخليه اباله حرام عليه اعطله اكثر وهو بالكلية يتزوج ولهذا راح اهده البيت وابنيه من جديد
تردين تظلين هنا بعيني تردين اجرلج يم اهلج هنا ماكو ايجار هم بعيني بس سوالف العرك والصوت العالي ماتفيد وياي
..واذا مارضيت اظل هنا ..والايجار ادري بيك تريد تخليني وواحد من اخواني وياي وتجينا بالشهر مرتين بحجة مااكدر اطلع من الديرة والجهال دوام
الحلين هاي مااريدهن مايرهمن وياي
..معناها نروح للحل الثالث تگعدين عد اهلج ونعرس بالبيت اني وحمزة
اني صافنة عليهم وهو يحجي بكل برود وحلا ولا يمها تفتر وتجهز ريوگ وامي تراقب متخوصرة بلكي تلگالها فرصة تدخل بهالكونة
وبعد ماسعن الجواب خلص قررت ماتصبر فيحاء ردتله
..وشلون تعرس وانت ماعندك مجال مقبط بسلامتك
ضحك هو وارتچى ع الحايط وامي ردت
..يطلگ شهلة ايس منها تلتفتله بعد عرسه الرابع
دار عليها خازرها واني اعضلها شفة ولا مهتمه هي
الله يعديها على خير يارب
..اسمعي انتِ وياها من تشوفني مقدرجن وجاي ادور الراحتجن ومامقصر بحق وحده منجن ..اسمها لاتجيبنه على السانجن تسلمن تظلن الهذا العمر الشيب اخذ روسجن وبعدجن مزعطة وبكل سالفة حشرتنها وهي مو يمجن لا والله اطلجن اثنينجن وارتاح وحلا تكفيني بعدها مااتزوج بعد بكد بناتجن وفاهمه شريد وشنو الي يريحني الا انتن علل
..احنا علل وشهلة الزينة
..كلجن علل والله وهي هم علة لو ماراسها اليابس چان ماشفتچن
عبد الإله نزل ويحجي ع الصوت العالي ابوي كله عوفك منهن وباشرلي بالفهمتك عليه البارحه وصعد يتريكون فوك والقهر كتلهن وامي من عرفت بفيحاء راح تبقى هنا زاد قهرها رغم صحبتهن ماتتحمل تكابلها وابوي يطب عليها هنا كافي عليها حلا وقهرها البنية فوك بس هي طبيعتها فرفوشة وضحوكية ومن يجي ابوي الحد مايطلع تخلصها وياه ضحك وشقى وصوتهم واصلنا
العصر طلعو عمال صدگ هدو البيت وقرر يبنيه من جديد كله
هنه يحجن منقهرات من تصرفاته المايستشير بيهن احد واني عيني صارت على بيت ام صخر
صدگ مساحته جبيرة بس البيت ضايع بين بيوتنا بناءه قليل هو محتار بيهن وهنه لاحكاتها ع الحسرات اليتحسرها لو يشوفن قهرها الي بگلبها من تقصيره اتجاهن شيسوون
وفعلا استقرت فيحاء فرغولها غرفتي اني وبطة وظلينا بغرفة امي وامي من شافت ابوي الصبح طلع من فيحاء وفيحاء وجهه ملمعته وتقهر بحلا المو مهتمه وصارت القهره بأمي هم لزمت ابوي وعاركته
والله استحي من اخواني كبار ويفهمون ويغلسون شيردون يحجون بس اشوف احمد وحمزة يخلصوها ضحك وتحشيش خو احمد فحط من اجت عينه بعين ابوي خله ابوي يهز بأيده
انسحبت من الغرفة مال اهلي وبطلت ابات بيها خاص من حلا حلفتني اصعد اسهر يمها اذا ابوي مو يمها والسهره صارت مبيت وبطوط اكيد وياي
بهالفتره استغليتها اعلمها كبرت هي ولازم تبطل تنقل كلام صارت متعلقة بيه حيل اكثر من اي شخص بالبيت وبديت افهمها عن لبسها عن سلوكها وهوايه امور غايبة عنها
وبدت تحجيلي عن كلام حارث وشكيت كلامه وياها اعجاب مو تنمر وهي هم حسيتها فاهمه قصده بالأخير انه معجب حذرتها بأي كلمة وگعدت اشرحلها
الحب عدنا بالريف مرسوم بحدود اليتعداها يخسر نفسه واهله وعمرج مامؤهل اله لأن هسه كلشي اختلف
الحب عدنا مثل ماوصفه جدي وهو يوصف حبه البيبي قبل
يگول حبنا هنا ينرسم بالعين لا برسالة يبدا ولا بلقاء يتم اذا وصل للقاء خرب وصعب
من چنا نسأله واحنا نستغرب وفاءه الها بعد وفاتها ورفض الزواج صح هي جبيره وهو هم عنده احفاد من اتوفت بس جان باستطاعته يتزوج وعادي بمناطقنا الزواج للبعمره بس هو رفض ومن يسولف عنها وعن شبابها ياخذنا وياه بخياله لسنين جمعتهم باقية بذاكرته للأبد
چان يگول چنت اتحين طلعتها للگاع وگدامها اعرض مهارتي بكلشي اعرفه واتقنه حتى ركوب الخيل.
ويسأله مهيب بعجب
..ماسمعتها كلام ولا مره شلون اقتنعت رايدها
يرجع جدي يگله
..العيون ياجدو تسولف السوالف اليعجز عنها اللسان
ورجعت اكد عليها خليج عزيزة وابد لاتنطيه مجال
وبگلبي حيره المن احجي واگول وشلون احذر حارث يجوز منها هي بعمر مايسمح المراهقته
بس اخواني مستحيل ابلغهم يكتلوه
خواته ماامن خاف هنه يطلعن حجي عليها وظليت بحيرة
ومرت فتره طويله بيت ابويه الثاني انبنى ويحتاج بس تمشيط وترتيب اخير
اريدهم يشيلون وارتاح من عركات امي وفيحاء الصداقتهن ماطولت ورجع ابوي فلشها بجمعتهن
حلا هالأيام تعبانه حيل ومريضة وكل مااسألها تگلي ماكو شي وبيوم ابوي يم امي صعدت يمها بعد كم ساعه اجاني صوت ابوي صاحها جنت متمدده لاگدرت اسوي نفسي نايمه للأخير ولا كدرت اكعد شلون احراج هذا
ابوي صاعد يسألها عن حالة ناشرتها يسألها
..ليش هالحزن تالي الليل شغلتي بالي شبيچ هالأيام احجيلي اني مقصر وياج وضعي مضوجج كلها ايام ويترتب كلشي اتحمليني
جاوبته بصوت ناصي تريد تحسسه اني هنا
..والله ماعندي شي ضايجه ومو انت المقصود والله
بعصبيه ابويه جاوبها
..لعد منو احجيلي ؟منو القاصدته
ردت وصوتها اقرب للبچي
..اخوي المقصود وتعرف ليش ولاتگلي ميخالف اخوچ وغلط وهسه مريض لتسوي مثلهم مااريده ولا اريد اوصله ولا يوصلني حتى لو مريض
..ومنو الجابرج تواصليه هسه انتِ القهر ماكلچ على هالموضوع مو گتلج انسيهم اهلچ
..هم ماينسون هم مخبليني محسسيني توهم لاگيني
..المهم انتِ بس هذا المضوجج لو مريضة احسچ مريضة اني
..لا مابيه شي
..متأكده حلا ..ترى انتِ تختلفين عندي بذمتج لاتشمين عليه شي وتصدميني صدمة عمري احتمال هالمره مااصمد
...ليش تخوفني والله ماضامه شي
..اني من خوفي عليج احجي هالكلام لأن مامتعود اشوفج هيج ومتأكد ضامه عليه شي
طلع وهي اطمنه وتحلف ماضامه واني سويت نفسي نايمه ماردت احرجها
ثاني يوم سألتها جني مااعرف فعلا هي متغيره وتعبانه حيل
..ليش هيج تعبانه حلا شبيچ عوفي الشغل اني اكمله واحجيلي مو تگولين الله مارزقني بأخت وصرتي انتِ اخت الي
بچت قبل لاتحچي
..اخويه مريض عنده سرطان بالعظم
..يا حبيبتي الله يشافيه ويعافيه الله يكون بعونچ
..اني جنت اطلب يوميه من الله يطلع حوبتي بكل من ظلمني بس ارد اموت من گالولي اتمرض بهالمرض حيلي انهد
..شسوالج
..گولي شنو الماسواه بيه هو ومرته اني چانو اهلي مزوجيني گصة بگصة هو راد وحده ورادوني الاخوها وبدون سؤال انطاني ومن رضيت وحبيته واتعودت عليه الله سبحانه ابتلاني بعقم
زوجي جان صابر وياي وننتظر فد يوم ينجح العلاج ويصيرلنا اطفال بس كل سهر جنت اتلهف بي للطفل افشل
وتجي هي يجيبها اخوي ومن تسأل واكلها ماكو بكل وكاحه كدامي تگل الأخوها اتزوج
هذا صرفك الصرفته ع العلاج جان جايب بيهن مره مخلفتلك بدل الواحد تلاثه بهالخمس سنين
واخويه بدل مايطيب خاطري يعززلي يشجعه ويظل يحجي عليه وجن الامر بيدي بكل برود يگلي كدام زوجي
..حتى هاي مادبرتيها شبيچ
وهي يومية تعيرني بخلفتها يومية واكول اصبر الله سبحانه ضاملي شي يقر عيني بي الحد مارجلي زهگ وگام يتحجج بالمشاكل واخته تشجعه وبدت گدامي تحرضه على الطلاگ وبيوم سواله مشكله اتصل على اخوي يگله تعال اخذ اختك والخاطرك واعرفك زين اختي ماادخلها بمشكلتنا خليها يمك مااكلك تزعل وتجي
اخويه الحنين ماگله ليش وشنو مشكلتك گله اذا جبتها تأثر على بيت اختك واطلكها اني اذا طلگت حلا انت ..تريد زواج اتزوج عليها ماتسمع كلامك تضوجك كل ماتضوج ادبها وموتها موت وهي تنعدل
هو جان عصبي واخته منا خابرته تلومه گالتله
..تريد تخرب بيتي خلي مرتك يمك وانت اتصرف وياها باليريحك هذا كام يسبني ويسب ابوي من وراك انت وياها
بقهره جرني وطبك عليه صونده وبالليل موتني موت جسمي خدر وصار قطعة من الزراگ ايدي گمت ماارفعها وعرفت من كلامه يحبله وحده وشارطه عليه يطلگني يلا تقبل ذب قهر اخوي واخته بيه ويگلي خلصيني منج موتي شردي روحي الاخوج وكليله خلصتي المهم مااريدج تبقين هنا بعد
ردت بس الصبح يطلع ورحت العمامي وعمي سوده عليه هو وابنه الشهيد استشهد بعدين لزمو اخوي ورجلي سگطوهم وطلكوني
عبالج خلصت لا
هو ظل يتهدد تختي اريدها يمي اروح يمه يسويني خدامه اني هم كمت لا اخاف ولا احترم وماعندي شي اخسره صرت اتفنن بقهر مرته لأن هي سبب دماري
الحد ماقررت خلص تطردني لو اني لو هي رجعت البيت عمي الجناين صاره يخافن مني الحد ماجمعتني صدفة بأبوچ ويمكن لأن غريب حجيتله كلشي يخصني وقرر يتزوجني ويخلصني من قهري وفعلا خلصني وارتاحيت وياه ومريحته والله شاهد على كلامي شمااسويله مااوفيه حقه سوالي مشية ترفع الراس وخاف الله بيه ومثل ماحجيتله حجالي عن ظلمه الزوجته الهاجرها وهاجرته وحبها الها وگال جنت طايش حالي حال الاذوج وظلموج ويمكن تشوفيني اسوأ بس اني نادم وراح انتشلج كل الاريده منج عصبية نسواني لتثيرج تجيهن فوره ويهدن ينسن كلشي بعدين
وشجابرك ع المر غير الامر منه وافقت والحمدلله بس عمامي عماتي تعاي كوه صالحي اخوج الدنيا ماتسوه اصالحه شكله مبري الذمة جذب ماباريته
اكله اني شامته بيك هم جذب ماشامته وشابعه قهر عليه والله ماادري شجاي يصير بيه
..الله يفرج همج حبيبتي فعلا الانسان اله الظاهر ماجنت اتصور هذا قهرج عبالي غيرة نسوان وعدم ارتياح مو اكثر
بالليل ابويه اخذها يطلعها وصاحني اطلع وياهم بس كلت عيب احشر نفسي وانقهرت من عرفت نوره وهاجر راحن وياهم ع الاقل شايفه هاجر البنات يسولفن بيها
رجعت للبيت وسوالف امي وفيحاء
فيحاء تسولف عن غرفتها وشلون تريدلها غرفة كون بس يمها يرتاح الحجي ابو وسام
وتگل الامي غرفتج تغمت الگلب
وامي ترد
..يلوگ لأم حلوك ليش لا
لگيت حمزة واحمد واگفين ويضحكون
احمد يكله
..امك هوايه تغث بأمي ترى احط هسه وادوسك
وحمزة يكله
..اذا تفض بهاي الدوسة دوسني وخل نخلص من عركهن على براد بيت
ضحكت وهم رجعو يضحكون من حمزة صاح
..هسه انتن هنا متمالخات وابوي عايفجن وماخذ حلا وطالع ومو بس هي وماخذ وياه نوره وهاجر من ريحة الجماعة
امي گالتله
..ماتگل الامك العوبة فوك مالفيتها ابيتي صارت تعيرني بغرفتها
وام حمزة ردت
..وين عيرت اصلا ناويه اكله يجددلج خطيه والله ماتهونين عليه
بصوت امي صاحت
..لاخلف الله عليج تجديد ومنج مااريده اذا ماهو يفكر من ذاته مااريد
احمد گال
..كلام قوي هذا يمه ثبتي عليه مو من تشوفينه يجيج وجايبلج علبة حلا لو محبس تتسرسحين
انتبهت حمزة يسجل بصمات ويدز الابوي
عضيتله ايدي
..اخ منكم ولد فيحاء شعلم بطة من النقل انوب انت تسجيل
واحنا بهاي الهوسه جرتني بطة
..سراب بعد مااصبر الا اكلج
..شكو ولج
..تعاي مو هنا مااكدر احجي
مشيت وياها وجهه احمر دم
..شبيج ولج
..اليوم من رجعت من الدوام بعدني انتظر عبد وحارث ابن عمي من شافني نزل جام السيارة ووياه مهيب وگال
..شوكت تكبرين عاد كبري الخاطر الله مو تعبت
مهيب غلط عليه وهو صاح
..ترى منتظرج تكبرين واتزوجج
..شكد ادبسز هذا معليج بي وفشليه انوب لو حاجاج
وظليت افكر لازم يتخلاله حد وين الگاه وبيمن اتعذر واطلع العمامي واحاجيه
الليل كله مانمت الحد مااتصلت بمآرب وحجيتلها وكالت اخلي عمار يحاجيه وهيج انسدت السالفه فتره طويله مرت ماحاجاها بعد
...
صخر ..
ماباقي للدوام هواي وراح ندخل بالعطلة الصيفية البنات يقرن وخاص نور الي طلبت هدية نجاحها من ابوي عملية الخشمها وهو رافض وتريدني اقنعه وعدتها اقنعه
وهاجر تقرا امتحاناتها اقرب منهم
طولت ظلتهن يمنا بعد ماابوي قرر يطور بيته ويريد يعزله طوابق هم علي صرت كلش قليل اشوفه بس بالعطل وقنعته هو يجيني سنين واني اروحله وفهمته مسؤولياتي خاص هاجر لازم اخذها وارجعها مااكدر من الدوام واطلعله
صار يمرني عصريات
بيوم هو يمي واتصل عليه جدي يريدني ضروري
گال مبروگ ظهره بگومته ويريدني اسويه اله
چنا بالبستان گاعدين طلعت عليه مستعجل رغم جدي جبير اول مره يشتكي الهذا الحد صوته كلش تعبان گمت مهتم
وعلي يريد يفهم شصاير
كتله تعال وياي جدي تعبان يمكن
وصلت للبيت طلعت غزالة ظنها وحدي وانصدمت بيه اني وعلي بوجهه
اشرتلها ترجع وفتنا
دخلت عليه شگد ماچنت مهتم اتظاهرت بالهدوء من شفته بغرفته تعبان متمدد بسريره مايكدر ينهض ولا يحرف نومته ويتنفس بثقل واضح.
واضح بملامحه التعب وابتسامته وهو يشوفني حاول يخفي بيها ألم اعرفه زين.. هذا الألم الي يجعل أبسط حركة و كأنها حمل ثقيل.
اقتربت منه وگعدت قربه بعد ماعرفته على علي وسلم عليه بصوت هادئ گتله احاول اطمنه
..ها جدي بعدك تتألم ؟
حاول يگعد وماگدر وبتعب گال
..الظهر صار خشب ياجدو ... حتى بالنوم ما يرحمني.
باوعت اله صار سنين اشتغل هوايه حالات وشكد المقابل يشوفه امر بسيط بس اني اعرف المه وبشنو يحس المريض ماچنت اباوعله بعين المعالج لاچنت اباوعله بعين الحفيد.
شفت شدّ العضلات القاسي على طول الظهر، وتيبس الحركة، والتعب المتراكم من عمر كامل گضاه الرجل في العمل والأرض والتعب بدون شكوى.
ساعدته يعدل نومته ابطء ، وبديت امرر ايديه بخبرة وهدوء على العضلات المشدودة.
چنت دقيف اضغط بخفه مرات ومرات اشدد بتدليكهن واخفف التشنج تدريجيًا،
وهو يلتقط انفاسه بصعوبه ويطلق زفرات متگطعه
من شدة الألم الي تحول تدريجيا الراحة
..هنا يوجع ؟
سألته واني اضغط على جانب العمود الفقري.
غمض عيونه بتعب وگال
..إي... چن لازمته نار
تابعت علاجه بصبر وعلي يراقب وساعدني من اطلب منه
حركن الساقين قليل احرر الشد
ومددت العضلات المتيبسة الي ارهقها تعب السنين
چانت ايدي ثابته بس گلبي معصور ويرجف بعمري مااتمنى احد يخصني يكون تحت ايدي بعلاج اعرف اذيته
وبديت ازيد واريح شويه شويه الى ان حسيت بخفة الامه وارتياحه
..وهسه جدي احجيلي شلونك
..الله يرضا عليك ياجدو.. عساك ماتشوف التعب وتنلف ايدك بالحرير
..صحة وعافية باجر اجيبلك دهن هوايه يفيدك
اتشكر جدي مني وطلب ضيافه العلي وماقبل يطلع الا بضيافته ووصامي امليله خيرات من البستان
طلعنا وسألني هو
..اگلك الفتحتلنا الباب نفسها غزالة الصغيرة الشايفها قبل
..اي ليش
..لابربك هاي البنات شبسرعة تكبر
..ترى انت شايب
..ولك هو شفرق بيني وبينك هنه كم سنة
..شايب بابا شايب وخالتي تشهد
..خالتك راح اطلب منها لجوء واخلص
اخذتله من خيرات الگاع وطلع البيتهم واني رجعت
وابالي هاجر وكلامها الاخير
احاول بقربها خطأ وجاي اقترب اكثر
كل مااريد ابعد اكو شي يشدني بس الابتعاد صار واجب وابراهيم ومصايبه ماتخلص لو ماهو چان باقي مرتاح وكلشي ماشي مثل مااريد
اول مافتت امي بالحوش تحذر بنبتاتها
وهاجر يمها بس شافتني دارت وجهه زعلانه مني
زين اني ردت اخلي حد ليش انقهر من تزعل
اني بلغتها قربنا الهذا الحد بي غلط
رحت اصلي وكملت صلاة وماصبرت راسلتها
..لاتزعلين هاجر بس فهمتج اسبابي
..ترى انت تغث والله العظيم
..فعلا والله
..اي والله زين من تعرف نفسك علاقتنا شعليها بكرهك للزواج
..مالها علاقة بس لازم اوضح اسبابي
..اسبابك مو كافية ومعليه اني بهالموضوع بالذات صار مرتين تلمح وكأن بينا شي اني اتصلت بعمي ابراهيم وبلغته اريد اروح يمهم ابيتهم الجبير ضايقناكم هواي
..اها بديتي تخربطين نزليلي نتفاهم حبابه عقلج جبير لتصغريه ويلا تعاي انتظرج اني نزلي
..ماانزل والله
مانزلت وظليت الليل كله متعود انامه من وكت بس السهر اخذني احس اكو غلط وصدي الها هم غلط
الصبح طلعت وهي عدها عطلة لاگاني ابوي صفنت عليه انتظرته يعلق على الصار بس هو هم استغرب صفنتي
..خيرك بابا
..ماكو شي يابه لايظل بالك
طلعت واول ماحركت راسلتها
..خابرت عمو ابراهيم موو
..تتوقع اعرضك الهيج موقف بعدك ماتعرفني
..زين الغي الحجيناه البارحه كله.. ومن ارجع نتفاهم ملاحظة خليها ابالج ماانسالج هالمعروف كلشي ولا ابراهيم يصير صاحب موقف وياي ويطلبني بسالفة
..انت بس هذا الهمك
..لا مو بس هذا طبعًا
يتبع..