بقلم نور الشمس
....
هاجر..
احيانًا الأنسان يحاول بكل مايگدر يطلع من قيوده ويتحرر ..وبظنه يخلص من تبعات اخطاء الغير ويستعد ويساعد اشخاص يشوفهم اقرب اله أو واجهو نفس المصير .. وهذا الآنه بديت اسويه الحد ماغرگت نفسي اكثر ..مع هذا ووي كل احساس ياخذني بي تفكيري النقطة الحذر ..تجيني موجات بلفل عالي من السعادة ومشاعر مشحونة بتحدي تاخذني الأعمق نقطة بذاك البحر "بحر الأشهل وعيوونه "
جنت اغامر بمساعدتي وكل همي انتشله ...الى اللا نهاية
ومااعرف هو غامر واتحمل ثقل بمساعدتي واستقبالي ابيته الس سنين محافظ على حدوده وحفظ خصوصيته.. لو انه الغامرت بخوض التحدي والرهان مع نفسي ومعاه ..
بنت مثلي ماعاشت حياتها طبيعية بنفس الوقت ماچنت هامش ولا شخص منبوذ من امي
لكن زعلي عليها چبير اخفيه بين ثنايا القلب ..هذا الزعل التطلع حسراته ويتحرك بمقطع من اغنية يذكرني بيها..اوو بعطر فد يوم جربناه سوه ..اوو شوق يهزني للوقت الچنت اني وياها نتسوق بي سوه ..و موقف بين ام وبنتها بشارع تجمعهم سالفة وضحكة .. لحظة حنينة ترجعني الذاك الحضن الي قرر بصعوبة وفجأه ينفضني بعد سنين من الاحتواء
صرت اشتاق النفسي القديمة واجبر نفسي اتعايش وانجح بالجديدة اكثر لأني وحيدة
بس يبقى الحنين يأسرني بلحظات اكون اضعف شخص بيها امام نفسي لهذا اني اسعى للبديل
اسعى البدايات حقيقية تعوض ايامي وترتب هذه الفوضى الأعيشها
كل الامور المريت بيها خلتني اراجع تقلبات حياتي واشوف ان اني كبنت ماعشت فترة استقرار روحي وعاطفي الا ابيت (العمة شهلة)
وهذه حقيقة صدمتني عدما بديت استوعبها
روحية هالمكان وتفاصيلة مريحة يمكن لأن نفوس اصحابه تنعكس عليه .. والا المكان لا فيلا ولا قصر ولا من هذه البيوت الحديثة المبالغ بيها
ويمكن احلى مابيها بساطته والحديقة ..الحديقة او الحوش
المكان الشهد تقلباتي من بنت غريبة يملأ صدرها حسرة وخجل وخوف ..الى بنت تشوف هالمكان چنها عايشته بعالم اللامعلوم ..او عالم الذر مثل مانقرا ابعض التفاسير
من اعيش موقف بخيالي بالضبط ينعاد بالواقع بلقطات تعيده جزء من الذاكرة كأني عايشته قبل
وهذا يعني صاير الموقف قبل الوجود بهذه الدنيا ..وهذه الصور التتكرر بحوش العمة وبتعاملي معاها بشكل يومي احس هالشي صاير ويايه قبل
وارجع افكر بغرابة الموقف
الناس الوحيدين الي المفروض يمنون عليه وماحسسوني بمنة !
بالوكت الي چانو خوالي يومية يذكروني بسبب وجودي بينهم هو نبذ اهلي الي ..وهم متحمليني ومحمليني فضل ..ويلوموني العزوف امي عن الزواج بسببي
هذا الاحساس لطالما رافقني وكأنه حمل على كاهلي التحرر منه جعل مني انسانة بخف الريشة روحي مثل نسمة عذبة ابارح الصيف
صار كل همي اسعاده هو بالذات بقدر هذا الاحساس العشته
وبديت افكر ..الانسان شنو يحتاج ؟
يحتاج انسان يطبطب عليه قدر المستطاع عكس ذاك اليجرح
طبطبة تجدد خلايا يحيي بيها جذور القلب ونياطه
اشهل انسان جدًا طبيعي مو غريب اطوار مثل ماكرت بالبداية
وانما شخص مخذول بسبب مشاكل ماگدرو اهله يخصموها قبل وعيه وادراكه وزادوها عليه بهجرانهم البعضهم وهذه مشاكل عادية لو مستوعبيه متسببله عقدة من الاساس لهذا اشوف بسهولة راح اغيره ومن بعيد بدون مااحسسه بشي
صح مرات افكر هو مبالغ بردة فعله بس اعتقد ماحاولو وياه وراح احاول اني
زين ممكن انجح؟ هذا السؤال الي رددته هوايه وچان بداخلي اصرار يخليني استمر
بوابة هذا التطور چان فضول ..وبعدها ادراك ودعم وبعدها..وأبتدا مسرى السفن بدون تحديد وجهة الموانئ الترسي عليها وتستقر
ماچنت اعرف أن الفضول اخذ يسلك طريقه إلى القلب بهذه الخفة.
بالبداية، جنت أراسله فقط لأني احتجت إلى مساعدة. او ارد جميل ومعروف مامجبور بي سؤالٌ صغير، و سؤالٌ آخر ..و حديثٌ عابر تركناه ع النص بالطريق وهكذا
چنت أگول لنفسي إنه أقدّر لطفه ، وإن الأمر ماله أي معنى ثاني مثل ماساعدني اساعده باستعادة الثقة بالناس وبأبوه الي يسعى لارضاءه
.
لكن بديت ألاحظ شيئ غريب
صرت أفتح هاتفي أكثر .. وأدور بعيني عن اسمه اذا كان غايب صوته بالبيت او معتزل ..او قريب لكن داخل بعزلة مصحوبة بصمت يفصله عن واقعنا بالبيت
چنت ادور اسمه بين الرسائل.
او اصلا ماانتظر رسالة من غيره!
ولا اهتم
ومن يتأخر بالرد، أحس بفراغٍ صغير ما أفهم سببه.
چنت أحاول إقناع نفسي وأكول انه أنتظر جوابه.. مو شخصه،
لكن بدا گلبي يميل ونكر هذه الميول
وينكر هذه الحقيقة خوف من الردع
أصبح حديثه جزء من يومي
أفرح من يكتب لي صباح الخير ..بادي الحديث بنفسه ..وابادر لو شفته تأخر
وأبتسم من يسأل عن يومي وكأنه يهتم فعلًا بكل هذه التفاصيل الي غيره يشوفها عادية
"وهكذا، دون أن أشعر، تحول الفضول إلى اهتمام، وتحول الاهتمام إلى تعلقٍ هادئ، حتى وجدت قلبي يميل إليه خطوةً بخطوة، كما تميل زهرةٌ نحو الضوء دون أن تدري متى بدأت رحلتها إليه ..ودون ان تسأل نفسها هل تزهر بنوره ام تحترق"
وصرت اخط بمذكراتي كلمات حلوه وكلام يعكس نقاء روحي دون اكتراث بأراء الناس المتطفلين
واذكر فد موقف ودعمه الي
بيوم چان بارد حيل والغيم عالن نفيره بالسما
معكر صفوها وعاكس بلونه القاتم على الأرض ..وعلى وجوه الناس الكل حسيته كئيب بالدوام الا اثنين
چانو عايشين يومهم بسعادة بعيدة عن انظار الطلاب مع هذا صارو محط انظار الكل التميزهم
چانت تعابيرهم تحچي مايدور بينهم من كلام
والعيون تتسيد الموقف وتخط اجمل صور للكلام
چنت شاردة البال ..مايوم خليت نفسي مكان وحده تنحب او تحب ..بس حبيت الموقف وبنات شويه عني يتهامسون بيهم وضحكاتهم الهادئة ماليه المكان ممزوجة بكلمات تعبر عن حسدهم او حسرتهم
وحده تخاطب زميلتها
..بخت شوف شلون يموت عليها ..لچ مخبلته ومطيره عقله شوكت احب وانحب مو تعبت واني اراقب
ضحكن وصديقتهن تكلهن
..اليسمعجن ميگول يومية واحد يريد يصارحها وترفض
..ارفض لأن اخاف ماالگه شخص امين يستحق يناسب اهلي ..بس الموقف حبيته من بعيد من اعيشه يصير مو حلوو يعني لتاخذين بكلامي جد
چنت اكعد وحيده استأنس بوحدتي
واخذتني سوالفهن لگيتني مبتسمة وياهن عن بعد واني وحدي
واجاني صوت من الخلف درت وجهي مستغربة على ضحكة بنات الي يشوفهن يگول هنيال اهلهن على هذا الترتيب والجمال بس للأسف قليلات ذوق وادب وجمالهن كله اتبخر من قباحة اخلاقهن
حتى النظرة الاولية الاخذتها عنهن اختفت وحل محلها سخط مو على نفسي لا عليهن هنه بهذه المرحلة ولساهن بعقل جاهل ..جهل الفكر هو الصعب تقبله مو جهل العمر وهنه جاهلات فكر للأسف
ضحكن بأستفزاز وگالن
..انتِ بالذات ظلي راقبي واتحسري بعمرج متعيشين هاللحظات
باوعت بطرف عيني مستحقرتهن ومارديت الظاهر ذني من المجاميع الي تسوي شلة ولد وبنات ع اساس هم الماخذين الاجواء ع الجامعة
كملها الولد الوياهن وهو يجاوبهن
..بالعكس انتن طلعتن كلشي متعرفن بذوق الشباب
درت وجهي وبعد مااتحمل اسكت اكثر وبصوت عالي گلت
..ذوق سز انتو وهنه ..من تشوفون امثالكم ميخلون حدود وعادي عدكم هالكلام تسمعونه وتسمعوه هوايه ترى الأغلب مو مثلكم فأحترمو نفسكم افضل
انسحبت والبنات الجانن منعزلات ويحجن بينهن ومتونسه ع سوالفهن رزلنهم واتبعني
ماجنت اعرف وين امشي رجليني اخذتني المكان لامحدود الحد ماوگفني البنات بصوتهن
..ياحلوه يبنية تعاي معليچ بيهم ذوله شلة شايفين نفسهم ماادري على شنو
والثانية حجت من انداريت الهن بأبتسامة اخفي بيها حزني من وقاحة هالبشر ضحكتني من صاحت
..ماشاءالله على هالعيون الجميلة لچ شنو انتِ لعابة عمه بعين كل شخص ماعنده ذوق يحجي عن الجمال وعازلكم عنه السمر اموت عليكم والله
..حبيبتي والله ..الناس اذواق .. والحمدلله الي نعم علينا بتمام الخلقة وحسن الخلق بدونه الأنسان لاشيئ
..ياعمري وطلعتي متحچية هم
..انه بنين من شمال ذي قار وبنت المدينة الي يسموها بعروس الغراف ومدينتها اتسمت بأسم مؤسسها "قلعة سكر" اعرفچ عن نفسي جنوبية الأصل والمنشأ
وهذه
..حور بنت البصرة الفيحاء وجوهرة بلدنا العريق من منطقة الزبير
..وهذه الحلوه هولير بغدادية جميلة تمتد جذورها بجبال وقمم شمالنا العريق
..اهلا بيكم كلكم ماشاء الله مكس رهيب وي وصفج وتعريفج مااعرف شلون اعرف نفسي
اسمي هاجر عشت وكبرت وربيت بالبصرة لكن رجعت الأصلي هنا من ريف اليوسفية
..بنين استمرت بالترحيب وحسيت حور اتغيرت ملامحها وانسحبت
وهنه بقن شويه وراحن يشوفنها حسنها انزعجت وكان ظني غيرة بنات
فيما بعد اكتشفت اخو حور الوحيد كان ضابط واستشهد باليوسفية وبالبداية ظنت ممكن احنا كأهل الها النا ايد بينما حسب ماعرفت بالفتره القصيرة الاجيت بيها.. اهلي هوايه ناطين شهداء بأعتبار اغلبهم عسكر وكانو يستهدفوهم بشكل خاص هم
بعد جلسات جمعتنا وحجيت عن الحوادث وعين غزالة وفقد امها ..رجعنا للحقيقة الي مرات تخفي علينا ومرات العاطفها تغيبها
بس الواقع يثبت كلنا كمواطنين ضحايا المخططات كبيرة يوگعون بيها العزل من شعبنا بكل اطيافهم بسبب جهال القوم وشرارها وهم يتحولون ادوات تقتل ناسها قبل البعيد
والحمدلله كونت صداقة وياهن ورغم صداقتنا ماغيرت شي اتجاه اشهل ولا شغلتني عنه بقيت انتظر الرسايل ..
وبقيت اتلهف الصوته واغرم ابحته وخشونته وصوته من يغني مرات.
وبقيت التوي وانكر واعيش وياه مشاعر مقنعة حتى ميصد مني ولا يحس بقربه شنو يعنيلي لأن اعرف رفضه كلش زين ماردت افرض نفسي عليه بس حاولت اكسب واغير
واكثر شي احبه مداهره هو وعمة شهلة
ومكالماته وي ابوه
هو مو كئيب بالبيت مسوي اجواء
بس يخفي هوايه من الحزن والمواقف الي معقدته قبل وحتى هسه
باليوم الي صار الموقف الجمعني وي البنات وذكرته ورغم كلامهن رجعت مقهوره
وأول ماصعدت وياه وسلمت
گال
..مو كافي الدنيا مغيمة وجهچ ليش مغيم هم
ابتسمت واتخيلت هو منا شلونه انوب مغيم
..منو مضوجج هاجر ..امچ رجعت حاچتج
..لا بعد مااتصلت بعد وعرفت زعلي ورفضي متصله بعمي ابراهيم تعاتبه وتكله غيرتوها عليه بعدهي مامستوعبه طريقة تخليها من رفيقة العمر كامل ولا يوم افترقنا البعد كامل وقطعي ..المفروض ماتعرضني الهيج صدمة تحاول تدرجلي البعد ع الأقل كلام منها يطمني بس خلص بعد مااريد اسمع شي
..كل هذا وتكولين لا مو هي مبين سبب ضوجتج هذا ..عادي اسولف وياچ لو ماتتقبلين
..لا والله مو هو ..بس بحياتي يمكن ماانجرح من شخص گد جرحي من امي لهذا كل المواقف گدام موقفها لا شي
سكت شويه وبعدين گال
..امچ اتصرفت غلط من بعدتج وانقطعت عنج فجأه المفروض تبقى تحاول شگد متصدين تحاول اكثر الى ان تغسل گلبچ المواقف والمحاولات
وهو يشرح اجه ابالي اصرار عمي ابراهيم على المواصله وياه والاحتكاك بي بأقرب المواقف ورفضه يمكن هو هم يستخدم هالطريقة ويكابر
نصى المسجل الأوطى صوت وكمل
..بس امچ مو سيئة الدرجة هذا العقاب لاتنسين السنين الراحت هم وتعبها وصبرها وياچ امچ بالحالتين ابتعدت ثورة الكرامتج قبل كرامتها بس هي متعرف تتصرف صح اللمسات الأخيرة ضايعه عدها وهم محد ساندها من اهلها خلي هالشي ابالچ
وانتِ على ابوج العافج وماسأل ندمانه اتخيلي لاسامح الله وصار شي شلون راح يكون الندم على الحضن الأواج وكبرج وقواج
..لو انت بمكاني تسامح
..اني مو نموذج صالح تقتدين بي ..اني گلبي صاير جلمود بسبب مواقف من تعدين مواقفچ يمها تشوفيها لاشيئ ..وهم بدون امي مااگدر رغم اجت فتره ابتعدت عنها هوايه واذيتها بس لليوم مامرتاح بأذيتي الها ..ولحد الآن نص هموم امي مني
..بالعكس تعاملك كلش حلوو وي عمه وهي حيل متعلقة بيك ..بس سؤال اذا سألتك عن المواقف الي مأذيتك تحجيها ؟
..احجي شنوو مواقف قديمة ماتنحجي ولا اريد اشغلچ بيها وهسه مااريد اصير ناصح ومنظر عليج اكثر عوفي امچ ..واحجيلي منو مضوجج
..بنات اتنمرو عليه ماضجت على نفسي الحمدلله عندي ثقة بنفسي ..بس ضجت من وقاحتهن وقباحتهن وهنه بصرح تعليمي المفروض يكونن قدوة الغيرهن
..شنو البيچ يعيبونه؟ على گولت شهلة المزيونه يغدلچ فدوه..
لاتهتمين وخليها ابالج الأنسان وين ميكون تلكين منه جزء نافع وجزء ضار ماكو مكان مقدس وتحيطه هالة من البشر لا جامعة ولا مستشفى ولا اي دائرة ومكان تختلط بي الناس وكل واحد من بيئة وتربية مختلفة
الشهادة ابد متنطي اخلاق صغرت او كبرت هي وسيلة مو صك وبراءة
قاعدة اخذيها اتعاملي وي الناس بدون رتوش واضافات وبدون توقعات عالية مراح تنصدمين من البشر .
وهسه مطري ولاتغيمين
..تريدني ابچي
ضحك
..ضحكي يابه الدنيا خيرها مطر ..وخير وجهچ ابتسامة
ابتسمت بفرحه مختلطة بشعور بداخلي حفلة فرشات ترفرف ومعدتي اتقلصت الدرجة عدلت گعدتي احاول اخفي اثار العصف التركه بروحي
كلمة يمكن بيها مجاملة وبيها مبالغة اكيد بس تركت عزف بروحي بنوتات مختلفة مشكلة بمسامعي اجمل مقطوعة ممكن اسمعها
عيني على الطريق مبتسمه
بفضول رفعتها على المراية اراقب عيونه لگيته هو يباوعلي هم
مرت ايام قربنا صار واضح
نوره التهت تقرا واكثر وقتي اتركها وصرت وياه وي عمة
عمة الاحسها لاحظت وصارت تقربني اكثر بتوجيهه وتحذرني هم ..كل شويه تعيد رفضه للزواج وتدعي الله يهديه ومن اوصل النقطة ليش هذا الرفض
تول بسبب مشاكلنا بس عيونها تسولف غير الدرجة مره بچت وظلت يومها كله حزينة
صرت اتجنب افتح وياها هالموضوع ويوم بعد يوم
نتناقش نضحك
الحد ماعطلت وصرت التقيه بالبيت بس فترات قليلة فترة تحضيره للأكل وبس بين دوامه وطلعته للبستان وتجهيزه للزرع الموسمي وهوايه امور تشغله
ظلينا نتراسل وحسيته بدا يبتعد
صراحته تغث وقرر بيوم يراسلني واني انتظر جيته
بكلام متناقض ماموزون
بعد ما گال رجع الطريق موحش وطويل مو حلوو بغيابچ كأن هالاعتراف طلع دون ارادته ويريد يصححه وبدون اي لف او دوران كتبلي
..ترى غلط هذا القرب والتعلق مني اني مامتعود عليه ومااقبل بي ولا اقبله الغيري مو اقصدج الج الخطأ مني اني
دزيتله علامة استفهام وكتبت
..حسابك اتهكر لو كلامك هذا ..منين اجتك هالافكار وشنو المو صحيح مسويه وماترضا بيه
..شالقصة تهكير شنو ..بس اني مااحب اتعلق والله ومااتخيل بيوم اتعلق بأحد ..الخلل مو بيج افهمي اني احس اكو شي غلط مني واعتذر هوايه
..عن شنو تعتذر ..تريد تبتعد قصدك ..لازمتك اني الله عليك كلام هذا تكتبه الي
..لا مالازمتني اكيد اني الغلط مني
..وين الغلط ؟
..هاجر صرتي تعرفيني وتعرفين موضوع رفضي الأي ارتباط مااكلج اخاف اعلقج بيه اعرفج عاقله وتعرفين تتصرفين ..اخاف من نفسي ومن تلميحات امي وعيت
..خلص فهمت وراح ابتعد نهائيًا من البيت كله لأن كلامك مااعرف الغاية منه شنو ؟
..لا عليچ الله..لاتاخذيها بهالجانب البيت شعليه بالعكس لتظنين وجودج ثقل وداعة عزيزة گلبي شهلة مو هذا القصد ولا الغاية بس حسيت من باب الرجولة احجي حتى هذه العلاقة تكون بحدود
مارديت عليه وبعدها حجيت وياه وجني اتغابى عن احساسه واحساسي واسوي هو غلط ولا كأنه قاريني وحسيت بمشاعره بدت تتغير ورافضها مع هذا استمريت ابعد هالشعور بقناع الي يشوفني يظني ثابته بقراري وان اني اشوفه مجرد اخ او صديق بالحقيقة
كلشي بيه يلهج بأسمه اشهر قليلة امتلك بمواقفه وساعات النقاش وياه بمواضيع تخصني يهون بيها عني وبالحقيقة اني المس روحه واحاول اعالج شعوره بنفس القدر وهذه اول البوادر
ماچان الزعل منه صحيح ..جنت اشوفه ردة فعل انفعالية العلاج بديت اشوف تأثيره
بس الموقف يطلب مني ثبات اكثر
بليلتها شكد رادني انزل واحجي وياه وافتهم مانزلت خفت انفضح كدامه يظني زعلانه ومصدومه من احساسه هذا افضل
ثاني يوم راد مني رجع يعيد نفس الكلام ويذكرلي هو ميريد زواج وبكل وقاحة وبجاحه مني واني انكر كل شعور سألته
شعليه بهالكلام والبينا شنو علاقته جنت بسؤالي اتمنى رد يرده ويگلي مشاعري اتغيرت بس اعرف هالشي وبهالوقت مستحيل مجرد رفضه هو بداية وراح انتظر واثابر بس صار لازم ابتعد فعلا حتى يكون تأثير البعد وي التواصل القليل اذا استمر اقوى
صح هددته احاجي عمي ابراهيم بس مستحيل اعرضه الهيج موقف خاص اعرف الحساسية من جانبه بينه وبين عمي
شويه وطلع وهو يراسلني اتصل عمي ابراهيم وبعد السلام سأل
..صخر شبي اليوم مو على بعضه
فهيت مااعرف شرد وفكرت مخلي علينا كامرات لو تجسس لو شنو گمت امتمت واسأل ليش وشكو ماكو شي
گال
..ماكو شي عمو بس سارح ولأول مره يگلي يابه مامتعود عليه ..اكو شي شاغله بدوامه مشكلة شي هم سامعه
جريت النفس وايدي على گلبي اهدي نبضاته
..لا عمو ماكو شي ليظل بالك
وسألته
..البيت شوكت يكمل
قبل شهر رمضان ان شاءالله منتقلين بي
..ان شاءالله عمو يعني اقل الشهر
..ان شاءالله
ورجعت اقرا رسالة اشهل وهو يطلب مني الغي كل الدار بينا من كلام قبل يوم ..وشلون الكذبه مني مأثره بي عنده اهم شي ماينحرج او يتصرف بقلة تصرف ينحسب عليه وي ابوه بالذات
رحت النوره الخابصة نفسها تقرا اريد احجي واخاف وقررت ادفن حبه سر بگلبي الى ان يأذن الله ويجمعنا مو بعيده عنه واذا لا وماصار خليت ايدي على گلبي الله ليگولها
مااعرف مااتخيل نفسي الغيره مهما كانت الصعوبة بكسب قلبه
...
سراب...
صعدت اشوف حلا وضعها جاي يسوء
اتصل بيه ابويه وهو بشغله گال شوفيها شلون صارت واتصلي بيه وبلغيها بس ارجع اخذها للطبيبة وحضري نفسج تجين ويانا
رحت ابلغها چانت تعبانه كلش
..صدك تحجين حلا ..ترى المريض الله يشفيه شبيدج عليه وذبحتي نفسج هيج
..قابل شبيدي عليه ..لا والله مو منه بس ضجت جنت كم نفر اتواصل وياهم من اهلي قاطعوني واعتبروني قاطعة الصلة الرحم وماعندي رحمة ويمكن اثرو بيه
..يمعوده ياعم ياعمة ياولدهم يابناتهم شوفي ابوي خبص الجو عليچ وخلاني اصعد اشوفج وكال اتصلي بيه منها يريد يحاجيج وحضري نفسج اروح وياكم للطبيبة العصر
..طبيبة شنو ماعندي شي تعب نفسي هذا اعرف نفسي من اتضايق اضعف هيج وارجع اقوى
..ابويه يكول تحتاج تكدرين تعترضين عليه فنچ تعترضين
اتصلت وهي تحلفني اكله زينه انطيتها التليفون
وتركتها تخابر ولميت الغرف دخلت الحمام خليت الملابس بالغسالة وطلعت لكيتها تسلم وتنهي الاتصال
..ملابسج وين كومي سبحي يلا تتنشطين ..ولج خاف امهاتي حسدنج
ضحكت
..امهاتج بطرانات عبالهن اني جايه انافس واخذ ابوج بس الي مو هو فقير ابراهيم وخاف اقشمره
الوت بشر شايفته بحياتي ابوج ولاتسألين ليش
..بدون مااسأل اعرف اكثر وحده تعرف ابوي اني من اولاده وبناته
..صح واشوفه الأقرب الچ هم يگول سراب احن البنات وفعلا انتِ حنينة ..الله يحفظج ويسعدج يارب
..حبيبتي والچ بالمثل انطيني ايدج وكومي ذكري الله وسبحي واتمكيجي ونزلي وياي ترى يمكن اشتاقلچ يسألن عليچ
..فيحاء بس خلي تخلصني من صوتها والسانها اغلفلها ابوج اليوم ادزه بس مابيه حيل
ضحكت
..عافنج والتهن بينهن هي وامي اليوم فيحاء صابغه احمر رماني وطالعه فد شي بس امي تگلها صابغته بصبغ سجاد حياكه شبيج تكبرين تصغرين
..امج ولاتكعد تمشي وتعلق ماعاجبها العجب ءاك اليوم من جان ميشي جديد تكلي جنج شيبات عمتي فرحانه بعطوبج
..مو هي تحب الاولن البنية وتلائمها بس من تشوفجن يمكن تنقهر ماتغامر
نزلت بعد ماتركتها ترتاح وكملت سبح وتمشيط ولاكتني بطه ع الدرج
..من اليوم ماطولها عطلة بديت دايت واريدج وياي نلعب رياضه حبابه
..ادللي بطوط
..يارب شوكت اصير كتكوته مو بطه مليت من هاللقب
ضحكت وامي تسأل
..شبيها حلا
..مابيها مالها خلك وهسه زينه العصر ابوي ياخذها للطبيب
ماكلتلها اروح وياها تاكل گلبي ..من يجي ابوي ويكلي اروح تسكت ماتعارضه بس اذا عرفت هسه ماتخليني .
كملت شغلي وفات عبد جايب الجهاله والنا علاگه انطانا حلويات وصعد بطة عينها عليهن وكالت
..حصتي الچ
..يا الله بداية حلوه والله احس اكو ارادة هالمره
بطة بهالفتره صارت تسمع الكلام وبديت احسها فعلا جاي تكبر وصارت تتحسس من وزنها وتريد تتغير
خلي رياضتج للعصر المغرب الظهر حاره ولچ
..هو اني اريد اعرگ وجوه سقيفة العنب ماكو شمس
السقيفة تصير بظهر بيتنا على جهة بيت عمي ابو مهيب
رحت وياها امري الألله
بطه لاتزغلطين لعبي عدل يلا
بيدي نستله وعصير راني وواكفه اعد البطه صعداتها ونزلاتها على بلوكه بتك رجل تريد تضعف
..يلا يسار يمين
يسار يمين
اجانه صوت عرفته حارث من وره حايط اهله يصيح
..شلع گلبي السمين
وجهه هو طماطه لأن فحطانه واجتها منا صاعقة گامت تتعثر ع البلوكه طاحت ورگبتها انزلغت
واني من قهري منه ومن تأثرها بكلامه وحسيت هي هم صارت تراقب بيتهم وتدور اخبار من اخر كلام دار بينهم شگد حذرتها منه بس الظاهر مافاد
..اووف هاي كالج سمين ومعتي لو متغزل بيچ شتسوين دكومي يالفطيرة گومي ..مو گتلچ لتنطيه مجال منين عرف احنا هنا وشجابه الظهر
قاطعني صوت صخر يرزل بي
... مو اسحگ راسك حيوان
دك ع الباب الصغيربيده الشبه ملغي محد منا يطلع منا شجابه هو هنا ماادري وبصوت اعلى صاح
..طبن يلااا اتحركن شكم مره حذرتج من الگعده هنا بطة
ركضنا للبيت وبطه ادردم
..هو مو مايحبنا وعنده خواته ذنيج اقرب خل يحكمهن ماله علاقة بينا اخوانا موجودين
..انچبي هو هم اخونا مايحبنا صح مثلهن بس مامأذينا اهلي مأذيه ترى ..وبعدين شنو يكول محذرچ اتذكرت ولچ خو شجابه هنا الظهر بيتهم
وليش انتِ صار فتره حتى قرايتج جانت هنا شحجيت شحذرت اني
..شبيج تصدكين انتِ ..هو مدري شلونه معقد ماصدگتي تحجين عليه ..بس عندي فضول اشوف امه كون
....بطه بداعتي ماكو شي
..ماكو والله لايظل بالج ..هم شايفه امه بيوم
..ولچ ماتدرين ليش هيچ خافيها
..ليش
..سمعت سر بس بيني وبينچ ترى حاسبتج بنتي واختي وخوات نسولف
شايفه الأثر الي بحاجب ابوي
..اي ؟
..من جنا صغار هو مسويه اله لأن رايح الأمه وشسمه يعني المهم حالف مايخليه يشوف نظرة عينها
ترى ابوي يلوب عليها ذاك اليوم گال روحي اخذيلهم اكل وشوفيها بس النحس من الباب وطردني وابوي سمعه وبيومهاحقد عليه اكثر بس مدري شتغير واختلف بينه وبين ابوي بحيث نوره وهاجر خلاهن يمه
..ماادري والله شايفه بنات ولد عمامي البعيدين ولد عمام ابونا بالمدرسة شكد يسألني عليه ..لو يدرن بي شگد مكروه ومعقد انوب يريد يصير براسي اخو اني اشايفه منه
..انچبي ولتعيدين هالكلام كلساع اخونا طبعًا بعدين اتخيلي اخواني يسمعونج تحجين عنه هيچ يطيحون حظج والله ..والهسه اشك بكلامه من يكول محذرج شجان يقصد محاجيج قبل
..لا لا وين
تعاي يلا خل نروح
درنا للبيت وطلعو حمزة واحمد يركضون حفاي
..شكو اسم الله
اخواني الصغار كالو صخر اتعارك هو وحارث وولد عمي التمو كلهم وكتلهم صخر وحده
لطمت خدي وگرصتها من زندها حيل
..صخام بعينچ بطة امشي
بيمن اتصل احتاريت الحد مافاتو هم
..شكو شصاير
..ماكو شي صخر وحارث متمالخين حارث متفلش وجهه ويصيح معليكم شغله بينا مافهمنا شي بس صخر جبناه وهو يتهدد مايفوتها اله ويگله الا اربيك من جديد من زمان مامتعارك هيج يمكن حاجي ع امه!
سكتت ماحجيت وبگلبي خوفه بس الله يعلم بيها
خاص بعد مااجه ابوي وسأل اخواني واتصل بصخر وكالعادة صخر اجوبته استفزازية
نسيت الصار وطلعنا اخذنا حلا للطبيبة وهناك الصدمة والفرحة النستني كلشي من جبروها ع التحليل رغم رفضها واصرارها ع العقم طلعت حامل لمت الناس علينا ابجيها نريدها تسكت ماكو
فرحت الها لأن جانت مأيسه وبعدين استوعبت هذا الطفل ياخذ تسلسل رقم 13بينا ورغم هذا الرقم الصادم شفت ابوي فرحان وعبالك عنده طفلين واجاه ثالث يونسه بعد ماكبرو القبله
اول ماوصلت لكيت تليفوني بي اتصالات من نوره هوايه وبس اتصلت اجاني صوته خلاني ارجف وهو يگلي
..اريدج تجين البيتي هسه ..لاتتأخرين وممنوع تغلسين ضروري اشوفچ فهمتي؟
انبلع الساني ومااتمنيت يكون اول لقاء بينا يبدي بمشكلة اتخله طرف بيها
...
هاجر ...
بهذه الفتره وبعد الرسالة واتفاق ان نلغي كلشي صار ماكدرت الغيه حتى ماكون طرف ضاغط فارض نفسه بأكراه لأن اعرف الشخص العنودي يكره الفرض بأي طريقة كانت
بديت اشغل نفسي حتى بجيته وكل حواسي تراقبه وهو احسه يجاهد هم
الحد اخر ايام بقتلنا يمهم اريد استغلها واجمع صور وذكريات
صورته هوايه بدون علمه وفرحانه بنفسي شلون عندي القدرة الاخفي بيها واسيطر على انفعالاتي
بالليل دزلي رسالة
..نزلي اخذي لفاتجن وعصاير سويتها بأيدي النور لأن تقرا والج خاف تجوعين هم
..شكرا والله اجت بوكتها
نزلت وابتسمت على ترتيب لفات الصاج بالصينية والعصير الي مخليله اشياف ليمون وورق نعناع
طلعت فوني اخذ صور
واجاني صوته يضحك
..دزيلياهن الصور التاخذيهن
صفنت لحظات اريد استوعب عبالك واحد ضربني صفگه براسي طلع دماغي من خشمي
حك طرف انفه وگال
..اقصد الأخذتيهن هسه ليش صفنتي
..لا هيج .هسه ادزهن
فلتت وگلبي يدگ وقت طويل حتى العصير حر يلا كدرت اشربه واكل اللفة واستمتع بطعمها
ثاني يوم بديت اجهز بجنطة ملابسي بهالفتره البقيت بيها هنا هوايه اشتريت واجمل مابالموضوع التوصيل للجامعة يجيني بالعطلة ماكدرت اوصي شي بعد
صاحتني عمه شهلة خايفه وقلقه
..فدوه عمه اتصلي بي شو هوسه يم بابنا واصوات اخوانه وولد عمه يحاجوه جنه مطالب
..لا عمه لاتخافين يجوز يضحكون اتصلت رفضني
دزيت رسالة تعال عمه خافت عليك
شويه وفات وهو يصيح
..ولو خلصوني منكم مااريد سؤال روحو سألوه هو اذا بي خير خل يگلكم ليش حتى اطلع حليب امه من خشمه
عمتي اتلكته تسأل ماحجه بس گلها
..اني وحارث غلط وادبته
اجاه اتصال شمر التليفون بالحايط فلشه
اول مره اشوف عصبيته هيج بس عمتي خلته براحته ومن انسحبت سويت مثلها ماكدرت احاجيه
وهم كلبي ماانطاني اعوفه واطلع رجعت عليه
اباوعله گاعد ع الكرسي و رجله يهزها بقوة وقابض ايده حيل
بهدوء كتله
..اهدأ ماصار شي
باوعلي خازرني عيونه تگلي لاتوكفين هنا بنظرة خوف وكل مابداخلي من حب اله وخوف عليه بعيوني بادلته
..اهدأ خيولون اكيد ماغلطان انت
فرك وجهه وگام
..صيحيلي نور ولاتخافين ماكو شي
صحت نور احجيلها باختصار الصار انخبصت ونزلت احذها الغرفته ماادري شكد طولو بس طلعت وجهه ابد مو مثل مافاتت مگلوب گلاب ومقهوره حيل
مرت فتره واندكت الباب طلع هو وفاتت سراب
عمتي من بعيد تراقب ابد ماادخلت وحاجته اخذها ع جهه بره يحجون
اراقبها جانت خايفه حيل مدت فونها ترجف
وهو يحجي وصارت دموعها تنزل واتحولت لدموع النوبة بكاء
لزمت ايدي عمه وگالت
..طلعيلهم عمه طلعي وحاجي خل يفوتها وانه جايه وراج
وصدگ طلعت توني حجيت كال
..فوتي هاجر
..بس تعالو هنا عمه تكول فوتو خل تفوت هي ع الأقل
دار وجهه اشرلي افوت بدون كلام وطلعت عمه وراي
..تعاي يمه هلا بيج فوتي البيت بيتج هلا
سوت نفسها ترحب عادي ماجن اكو شي صاير
صفك ايد بأيد وگال
..الصبر يارب ..فوتي سراب وابقي هنا شواي نكمل سوالف
..يتبع ..