بقلم نور الشمس
.....
صخر..
اليوم رحت اشوف علي ..وفاجأني وهو مغير رايه ومفكر بالزواج ويريد يكلف خالتي تدورله بنيه
..لك انت قبل فتره رافض منو قشمرك واقتنعت
هو يضحك وخالتي بخوف ادخلت
..على بختك خالة ليش هيج تريده يبطل خليه مااصدك يسويها واشوف عليوي عريس يوم عيد هيج وربي يهديك وتفرح شهلة المگرودة بيك
..خاله خلي دعائج العلي يستاهل كل خير شهلة المزيونة مقتنعة شبيها وصارت مگرودة چنها العافية وتزهي شتسوي بالچنة
..ياخالة فرح امك ابخلفتك ..جابتك وحالت وظلت بحسرة الخلفة لااحرمها فكر بيها هم
..والله اصيرلها عشيرة ياخلفه ياابوهم ..اني اعوض
طلعت منهم وافكر بالبداية عبالي اباله وحده
بس من وصى خالتي ادورله بعد هالأحتمال مني
وظنيته يشاقه وطلع مفكر صدك
جان مثلي رافض شغيره بس هو ماعنده اسباب قوية مثل اسبابي البيه اني مختلف
واني اسوق وراجع بالطريق وافكر وبالي يسولف ومرت بفكري وخيالي الأكثر من مره ملامحها تفصل ذاكرتي وارجع اشتت فكري وتنعاد ابالي الصور
اني مو غشيم واعرف نظرة الأعجاب وحتى نبرته
من ايام الدراسة للتعيين ومباشرتي بدوامي واختلاطي بأنواع البنات وشفت مختلف النظرات والتلميحات ووصلني حتى الاحساس العذري البنت بريئة تفضحها عيونها
جنت اشمئز وابد مااتأثر بس هي غير
هي جاي تخليني اطالب وي روحي
وجودها صار يربكني والتفكير ابعدها مو مريح
نظراتها ماتفارگ مخيلتي وصوتها وضحكها وهي تخلق اجواء سرقتني من حبي للوحدة ومن شعور الأرتياح للصمت اكثر من الكلام
وهذا سببلي توتر وقلق
اني ماچنت ارفض الحب لأن ماعرفه،
رفضته لأن أعرف الألم الي يصيب گلوبنا ولأن مااريد اجرح واكون سبب تعاسة بنت مالها ذنب.
من سنوات واني اقنع نفسي.. أن المشاعر عبء، وأن التعلق بالناس مخاطرة لا تستحق الثمن.
چنت اشوف الحياة بعين العقل فقط.
حاسبها بحسابات دقيقة، ومخليلي مسافة آمنة، وجدران عالية لا أسمح لأحد بالاقتراب من حدودها
الى أن ظهرت هي!
كلشي اتغير شوكت وشلون مااعرف
من اگعد افكر واراجع نفسي شنو الي صار ..اتأكد ماصار شي يستحق الذكر بالبداية .
عدا ان هي امانة من انسان انجبرت اتقبل امانته مو كرامة اله لكن غيرتي ماتسمحلي ارفض واني اعرف ماكو مكان انسب من بيتي ولا انسانة احن من امي تتگدر تتقبل وتحتوي حالتها
"هاجر "ماجاي اشوفها قصة من هذه القصص الي تبدأ بالعواصف.
لا مجرد إنسانة شفت نفسي مرتاح الوجودها. لكن هالراحة صارت أخطر مما أتخيل.
صرت انتظر حديثها بدون أن اسمح النفسي مو بس بالأعتراف ..لا .مااسمح النفسي افكر بالنهايات اصلاً
كل النهايات مرفوضة مهما كانت بالنسبة الي .
صرت افتقدها واگول هذا تعويد مو اشتياق.
وأقلق عليها بدون أن امنح هذا القلق اسم.
چنت اوگف كل ليلة أمام نفسي وكأني قاضٍ يحاكم قلبه.
العقل يگول:
هذه مجرد مرحلة عابرة، لا تبالغ.
وگلبي عنده رأي ثاني چان يزيد بتعلق صامت .
وبكل مرة أحاول أن أبتعد، أشعر وكأني أنتزع شيئ من روحي .
وبكل مرة ارجع طبيعي، أشعر براحة مؤقتة ويرجع الخوف يطاردني من جديد.
ماعشت الصراع بين الحب والرفض.
الصراع چان بين حاجتي إلها وخوفي منها وعليها .
بين رغبتي بأن تبقى، وخوفي من هذا الأعتياد على وجودها.
چنت أؤمن بمقولة أن الإنسان لا يخاف من الغرباء، بل يخاف ممن أصبحوا جزءًا من يومه.
لأن فقدانهم لا يترك فراغ بالمكان فقط، بل في القلب أيضًا.
أرهقني هذا الصراع حتى صرت أشعر أن شخصان يعيشان داخل جسدي
أحدهما يريد أن يفتح الباب.
والآخر يمسك المقبض بكل قوته كي لا يُفتح.
مااريد افكر بيها وافكر ..اقرر واتعهد اليوم مااشوفها مااخلي عيني بعينها مااعلقها ولا اتعلق
ومن اسمع ضحكتها أبتسم،
شعور كريه من اشوف حجم هذا التناقض والرفض وي نقاط بجسمي وروحي ماجاي اعرفها حتى اسيطر عليها واتحكم بيها
گلبي يتقدم خطوة.
وعقلي يرجعني تلاثة..من اتذكر خيبات الماضي،
الحد اليوم الحاجيتها بي وشفت زعلها
هذا اليوم الي صار عندي بيه أدراك بجفاها وتهديها بالرحيل من بيتي مجروحه..
حسيت اني مااقاتل شعور الحب بداخلي
بل أقاتل نفسي..
أقاتل خوفي القديم، وجراحي القديمة، وصور الماضي الي ما زالت تحكم حاضري.
وصلت للبيت
گعدت وحيد بهذه الليلة.
بدا ابوي يجهز بيته ومعناها راح يشيلون ويرجعن للبيت ..شگول عليك ابراهيم ..شنو الداعي من هذا كله شجابكم بطريقي
كل مااريد انسى واكول اني متوهم تسويلها حركة تخليني اتأكد من احساسها وياي مختلف مو بس اني احس بهذه المشاعر يمكن حتى هي الفرق رفضي
توترت حيل طلعت بره افرك بصدري بخفه
اكو سوالف هوايه مااگدر احجيهن
اني أحس بتعب ومو گادر اشكي ..تعبي مو من كثرة التفكير ، من كثرة المقاومة.
سنوات طويلة واني احرس اسوار گلبي وبيتي ، حتى نسيت شلون يكون الشعور بالحياة خارج هذه الأسوار.
ولأول مرة اعترف لنفسي ..
اني مو رافض الحب... أني أخاف أخسره
واخسر اي شعور واخسرها نقاء روحها وطراوة گلبها رغم المرت بي كله اعرف اصعب كسرة راح تكون هالكسرة
مااريد اصير ابراهيم ..بوجه ثاني ..ماجاي اتخيل ممكن انجح بمعاشرة تحت مسمى الزواج
ورغم دگ گلبي الها بس بعدني اقرف من ذاك الشعور التاخذني اله تزاخم الصور بذاكرتي ومن ابشعها
صرت مااتواجد بهالأيام داخل البيت وحتى هي صارت تشغل نفسها عني بس ماتنسى تصورني واني اعدل بالحديقة ..واني اجهز الأكل ..ولا تنسى تصور الأطباق ووردات الحديقة المهتم بيهن
اني منا روحي طالعه وحسيت شخص وره بيت ابوي يهمهم باتصال او بحديث هامس واتذكرت قبل فترة شفت بطة هنا تراقب وحسيت عدها شي وحذرتها
هالمره ماانطيت صوت الحد ماسمعت حارث صحت بي ورجعت حاجيتهن
الاعرفه سراب عاقلة شلون تغطيلها وتسمحلها بهيج امور
والخسيس من رحت احاجيه اول حجايه يكلي انت اطلع منها ..احنا اهل بينا واقرب منك وهي هم ماحاسبتك اخ ترى
..تحس ماتحسب تبقى اختي وغصبًا على راسك هم وهي طفلة ياحيوان تتلاعب بعقل طفلة انت.. شهادتك ماثقفتك ماعلمتك ..اذا ابوك مارباك بيوت الجيران العادية تنحسب اهل شلون واحنا عمام واهل حارث وحق الله ظهرك اكسره
بعده ماراد ضربته وهو هم دفعمي وضربني رجعت ضربته اقوى لفيت ايده بطريقة شنجت جسمه كلها بيها ..حركه وحده اطگ رگبتك اصگطگ واشمر عالة على اهلك تأدب ولاتخاي راسك براسي وبطة ابتعد عنها فاهم
التمو اخوانه وولد عمي هم طلعو ع الهوسه التمو يحلون الموضوع بينا واجو اخواني مناك حفاي يردون يفزعون لگوها خالصة
..هذا المنظر يگلك منو الأقرب يانذل واني اخوهم لو لا ..ومراح تخلص من ايدي وماارتاح اذا مااكسر ظهرك لأن ماتعرف اصول ولا عندك ذرة غيرة ياناقص
رجعت وي اخواني وحمزة واحمد شكد يريدون يفهمون شصار ماحجيت
حمزة سأل
..اتجاوز ع امي شهلة
خزرته
..اذا متجاوز عليك الله ارجع بينا نأدبه
..امشي روح للبيت وخليك نبه انت واحمد
ماحجو شي ولا فهمو
فتت للبيت افور ..عمار اتصل بيه واول اتصال گال
..ماجاز النذل منها ..مو طيحت حظه وگتله طفله خلي بعينك ملح واصبر
..لا عاشت ايدك والله وطلعت تعرف هم
..اعرف بس شسوي افزع لخلخته راشديات بينا وكتله جوز ..اني منين اعرف سراب متصله بمآرب تريد حل تبعده وگالتلي اخواني لو درو محد يسكت خوفه وحلها من يمك ..اني هم اخوكم غريب قابل
فركت راسي بقوة احس بهامتي گبت نار
..هسه شسويله هذا من تكسره واگعده ابيت اهله يتربى من جديد ماانلام ..الناقص يگلي اطلع منها انت واحنا اقرب عود امهاتهم بنات عم وعائلة وحده يجبرني اطلع من طوري واسب هالسلالة كلها من تاسع ظهر لأبوي وابوه
..اهدأ صخر كلشي ينحل ..زين هو وحده لو هي منطيته مجال
..منطيته مجال انت الثاني شنو مجال ايش تنطيه لكم طفله بطه طفلة .
..ادري طفلة بس غير من حذرنها خواتها تنردع بطة عرمة مو مثل خواتها يرادلها فركة اذن هي هم
..عمار خليني راسي راح ينفجر بعدين نسولف ولتجيب سيرة انت محذر وحاجي وحتى مآرب لاتبلغها اني اتصرف
..ليش غير اختها تعلمها
..اني احاجي سراب ..عوف مآرب ينشغل بالها لاتحجي شي عمار
وبالحقيقة اني اعرف مآرب عدها مشاكل وي فيحاء ومرات تعلگ بينهن وخاف تستخدم هالموضوع بمشكلة وسيلة انتقام على ابو ماربيتي
هي صح لو مربيتها وماملتهيه بأبراهيم ومشاكلها وي الضراير چان بطة حايرة بلعباتها ودراستها
اذا امهات كل همهن يتسابقن على رجال شتشوف تحس محور الدنيا الزواج ورضا الرجال
گمت لعبانه نفسي اكثر ومنتظر نوره تگلي اتصلت سراب
لأن هوايه اتصلت وماترد
وحسب الفهمته من نوره سراب اقرب شي البطة اقرب منها وهنه من ام وحده ..وتكول سراب كلش تخاف وتحرص عليها شلون غافلتها
واني اريد اعرف هم
لأن اكثر من مره اشوف سراب وياها بهالمكان تريد تغطيلها لو شنو
ومره من سمعت همهمه وسألتها وي منو تتصل ومنيلج تليفون گالت تليفون سراب اتصل بصديقتي منها وبرفعة خشم تحاجيني بت فيحاء
شويه ونورا جابتلي التليفون سراب تتصل جاوبتها بقلة صبر امرتها تجي وتجيب التليفون وياها ضروري هسه
اريد افهم راسي راح يطگ
وشكد ماجنت تعبان وفكري ياخذ ويودي ويجيب نفسيتي تعبت اكثر
فاتت ومن تعابير وجهه عرفتها تعرف كلشي .
بدون مقدمات سألتها
..من شوكت بينهم علاقة
بعبرة ردت
..والله مابينهم
خزرتها نزلت عيونها مارفعتهن بعد
..لتقسمين سراب قسم لتقسمين بينهم وتعرفين وعمار مدخل بطلب منچ
..والله مو هي هو بس وهي شكتلي منه وحاجيت مآرب حتى تفكر ويايه بحل ودخلت عمار
مديت ايدي تنطيني تليفونها مابي رمز بس حركت شاشته انفتحت
وهي تحجي ووتلكأ
طلعت تليفوني شاشته مفطورة من شمرته بسبب اتصالات مهيب ماردت اجاوبه لأن راح يبرر اعرفه ولح بأتصاله وشمرته اريد اخلص
فتحته وطلعت رقم حارث كتبته طلع مسجل بأسم
جنات صديقة بطة
..جنات موو
اتصلت بي وماجاز ولا تاب رد بلهفة
..ها بطة
..انعل ابوك لابو بطة ياناقص ياغيرة سز
..صخر اسمع خل نتفاهم
..انچب انچب يتفاهم هو
نهيت الاتصال وخزرتها
..تنسقيلهم ست سراب ..هذا دورج كأخت چبيره
جانت دموعها تنساب بهدوء هي سمعت كلامي وشافت الرقم وتأكدت دخلت بنوبة بچي قوية
..والله ماادري ..وداعة بابا ماادري
اني انسق اني ..محد بگدي يخاف عليها شلون سوت هيچ ولا مبين عليها والله
اريد احجي واجت هاجر مو وكت جيتج بهذا الوقت
لحگتها امي مثل عادتها من تتجاهل اصل المشكلة وتسلك الموضوع وچن ماكو شي
تهلي وترحب وسراب صفنت وهي تباوعلها
وتمسح بدموعها
خليتها تفوت وناوي ارجع نسولف من جديد
اخذت تليفوني اتصلت بعمي ابو ريمه
..ها يابه متصل عليه هواي
..حبيبي وليدي وينك ..لو مامتصل هسه ناوي انه اجيك اشوف شعدك
عمك اتصل بيه يريدك تجي يمي ويجون يتفاهمون وياك شنو مشكلتك وي ابن عمك
..خل يجون عمي هسه اجيك
نهيت الأتصال منه واتصلت بأبراهيم
رد ولا عبالك قبل ساعات زهگته واني ارد باستفزاز من يعاتب ليش اني وابن عمي نتعارك
..ها يابه صخر گول
..اذا اگلك هالمره لاتفشلني وتسمع مني وترفض اي طلب يطلبه اخوك ترضا لو تعتبرني ابن شروگية مثلهم وغريب وهم اقرب الخواتي مني
..شنو شعدك گول اطلعلي بالباب نسولف
..يلا انتظرك اني طالع
طلعت وابوي فتح بابهم
..شنو هالحجي شبيك منو محاجيك هيج
..حارث يريد يخطب بطة وبطة صغيرة بعدهي جاهلة گتله هسه ماتصير الك يگلي انت اطلع منها احنا اقرب والهذا السبب ضربته
قلص عيونه بشك
..يريدها لو اكو غير سالفة
..ماكو لا يروح بالك بعيد بس بطة ماتصير اله اذا يريدها صدگ يصبر تكبر وبشرط مايفكر يلمحها لمحه بهالفترة
..صاير شي احجيلي اريد افهم منك مو من غيرك
..ماكو اكثر من الحجيته ..حارث اني اعرف بي مخلص الجامعة دراسة وونسة وعلاقات ويريد بطة على اي اساس وهي طفلة
..منعك انت خوف لو تحدي بينكم
..ابراهيم لاتخبلني اني اتحداه بهيج مواضيع تافه اني ..غير خواتي شلون ماخاف عليهن
..يابه بس اهدأ حارگ اعصابك على شنو ياحارث يابطة ..خواتك انت اقرب الهن من كل واحد منو يگلك غيرك اقرب هذا هو شاب وتعرفه مو مناسب خلص ..هو منو خطب هسه
سحبت نفس اهدأ
..ابن اخوك واحد سافل والله اظفر بطه ميشوفه اذا ماثبت رايدها صدك وصابر عليها
..مسمعك حجايه عليها
..اي مسمعني وطيحت حظه
..يستاهل هذا هو ..سراب وين گالو عندك
..خليتها يم البنات
..خل نروح سوه ونفهم اكو كلام ماتريد انت تگوله بس راح اعتمد عليك اني وبدون فهم راح اگول الي تگوله لأن واثق من حرصك
سكتت ماحجيت
وصلنا البيت جدي صوت عمي ومهيب وعمي مروان وعمار وعزام وجدي سلمت وفتت بعد ابوي
لأول مره يمكن نطب مكان سوه
جدي عينه علينا مبتسم
وعمي مثل مامتوقع بداها بولد عم واخوه واهل وبناتنا النا وولدنا البناتنا ومن هالكلام وگال نريد بطه الحارث
راسلت عبد ووسام يجون
وسام مابين وعبد بساع اجه وياه احمد هم
لگو ابوي يجاوبهم
..بطه طفله هسه شلون فكر بالزواج منها اذا رايدها يصبر عليها تكبر والله كريم
حجيت الاخواني الموضوع
بأستغراب ردو
..على هاي عركتكم لو اكو شي
..ماكو شي گال اريد اخطبها وكتله صغيره لاتفكر بيها
ولأن استفزني وگال انت مالك حق تمنع احنا اقرب النا منك اتلاغينا
عمي ومهيب نصو روسهم واضح يعرفون السالفة وحاجيلهم كلشي
عمي كال
..يخسه اخوها واقرب الها غصب عن الكل انتم من صلب واحد على اي اساس هو أقرب..وهذا هو يصبر عليها اذا رايدها اني هم رايي هيج
عبد هم ظل يحجي
..صخر مو غريب وهذا الكلام عيب يحجيه حتى بينه وبين نفسه ونبقى اهل الخلافات تنحل واني نفس الراي عندي بطة طفلة ترى الهسه تتعارك وي جهالي على حلوياتهم مو مال زواج ابد
انسد الموضوع ورجعنا
اتصلت بحارث محذره
..اسمعني زين حارث انت اذا حاسبني غريب عيد حساباتك زين بطة اظفرها ماتحصله اذا مامشيت عدل وهذا رايي ومشه زواج هسه ماكو وقبل نجاحها من السادس ماتحصلها خليها ابالك زين
..انت ماتگلي شبيك وياي ..يااخي والله مامرخصها اني ويمكن خاني التعبير وهيج حجيت بس ماكفرت ليش شخصنتها للسادس هواي اربع سنين مو شويه
..اربع سنين تشوف نفسك بيها رايدها صدگ لو رغبة وبس ..بهاي الأربع سنين لو حجايه تحجيها وياها بكريق تجمعكم صدفة وغلاة امي هالمره كلشي يختلف وياك ومايوكف شي بعيني ..تكلي احترم رغبتكم والصار غلطة واشوفك صادق بكلامك ترجع اخوي وابن عمي وتاخذها من عيني من اتأكد منك
..هذا هو الي تريده يصير
رجعت للبيت عيون سراب مطگگه اكثر من ماعفتها راسي برد وارتاح ..وردت اسولف وياها صحتها بغرفتي وامي اخذتني توصي
..على كيفك وي اخيتك يمه لاتخوفها هيج
..ماكو شي يمه لايظل بالچ
لگيتها راجعه تبجي اقوى
..وداعة بابا
..ابوج غالي عليه لاتحلفين بي
صفنت عليه ماتعرف شتعلق
..اني الاعرفه انتِ الشايلة مسؤوليتهم وراح اثق بيچ لأن سامع عنچ اخبار زينه من حمزة ونوره اسألج وجاوبي بأي لو لا
هزت راسها
..تعرفين بيهم يتواصلون من تليفونچ
..لا والله
خلص معناها اختچ عرمة بيچ ومافركتي خشمها مو بعرك وصياح هو هذا الدمرها استخدمس الاسلوب الي يجيب وياها نتيجة انتِ اعرف بي وفتحي عيونج زين وراقبي وشددي ابد لاتنطينها مجال ولا تضغطين عليها هم يعني باعتدال اتعاملي زين
..هذا هو والله اطيح حظها ولا ابالي يطلع منها هيج تصرف
..الأريده منچ ..تفهميها حارث طلبها والجواب ينتظر الى ان تكمل سادس اذا صبر عليها ومصر على رادتها رغم ابتعادهم وانقطاع تواصلهم ..مانمنع تكبر والله وياها ويسعدها
وفهميها عيوني مفتوحه عليها عشرة عشرة
ابوي اذا راد يعرف منج الحقيقة احجيها مثل ماهي عنده اوليات مامقتنع بيهن ومتأكد معتمد يسمعها منج اعرفه مايهدأ
بس نفر غير ابوچ اياج يطلعله كلمة من الصار وموضوع التليفون خاص خواتج الكبار
زين
..زين
..عاقبيها وزعلي عليها لأن استغلتچ ..يس لاطوليها حتى لاتبقى بتياه احتويها من جديد ..اعتمد عليچ
رفعت عيونها رموشها ناگعات سراب تشبه ابوي هوايه على شكل بنية كلش حلوه اول مره اركز بملامحها هيچ وشي بداخلي اتحرك يگلي احضنها طمنها بس شي اقوى مني مقيدني بحيث اديه چنت مچتفها الوره
ابتسمت بوجهه
..متأكد انتِ گد هالمهمة ..وارجع واگول اني اخوجن لاتستنكفن مني من ادخل ..حرصي وخوفي يدفعني مو هينات انتن عليه شگد ماتبعدن ماتتغير حقيقة احنا اخوه
..احنا مامبتعدين انت المبتعد والله مانستنكف منك لاتحجي هيچ
..اني مامبتعد بطران اني شفت بروحي سنين غير مرحب بيه بس امي ربتني بطيب ومااگدر انكر الرابط اليجمعنا غيرتي ماتسمحلي حتى لو ردت مااگدر
بچت
..الله يحفظك النا
..كافي تبچين ..سامع بيچ قوية
ابتسمت وتمسح بدموعها
..منيلي قويه ..هم رادوني اصير قوية واشيل عنهم مسؤولياتهم بالحقيقة اني كلش ضعيفة والله الدرجة من صوتك مساع خفت نظري ماگدرت ارفعه بعيونك واني متأكده من نفسي مامسويه غلط
..انسي ..وهذا مو اخر لقاء بينا ان شاءالله ..تعاي علينا نشوفچ وي البنات ولو هنه هم مامطولات هنا
..اني اتمنى اجيكم بس اخاف تطردني
..اني اطردچ ليش؟
..سويتها قبل فتره
..لأن ماجيتي من ذاتچ ..والأكل هم حرامات ينذب
اطلبيني انتِ عزيمة
..يعني مصدكني مالي علاقة ومسامحني
..كل هذا وبعدج تسألين
..وصلني عفيه للبيت صار الدنيا ليل اريد الحك ع بطة اشوف مصيبتها
..مثل مااتفقنا
..اي اكيد على اتفاقنا
..انطيني رقمج
صفنت بوجهي
..رقمچ مو تليفونچ ..اريد اتواصل وياج واعرف اخبارها منچ
..اي بس ماحافظته ردلي رقمك اتصل
رديت رقمي اتصلت رفضته وسجلته وطلعت وياها
ومن رجعت فهمت امي والبنات حارث طلبها ورفضت واتعدا عليه بالكلام وهنته وخلص
صعدت ماحجيت اكثر ارد انام من وكت بس النوم شگد مااتعب واهلك عناد يعاندني
من يوم البديت اتصارع وي افكاري
ثاني يوم قررو خلص يرجعون البيتهم وبطلعتهن ضجت وضجت لأن ضجت هم ..ليش اهتم يمكن احسن ..خابرت البنات رشا وريمة وغزالة اريد اسد الفراغ
وفعلا ملن الجو بسوالفهن وضحكهن ورجعن العصر
ومر المغرب بوحشة مو بس عليه حتى على امي
حاجتني امي
..عگبة زيارة ابو الجوادين ماتاخذني باجر الخالتك ومن بيتها نمشي للإمام
..اوصلچ الصبح وي دوامي ونزور العصر ارجع من الدوام الكم لأن ماالحك ارجع اخذج ونروح ازدحامات قوية
..هذا هو يمه ..نعم الراي ..
سكتنا حتى اكل مااكلنا مثل كل يوم .
ثاني يوم اخذتها من الصبح وصلتها البيت خالتي ورجعت من الدوام وزرنا
وعلي يسأل امي
..خالة ماعندج بنية تعرفيها اخطبها
..خالتك عدها منيلها بنية
سكت ماحجه ومااخذت بالموضوع الحد مامرت فتره طويلة اجه يحاجيني بغزالة!
...
سراب...
طلعت من بيته واتذكر خزرة عيونه شلون تخوف لونهن فاتح وحواجبه معقودة ويخز نظرته حيل تخوف عكس عيونه بهدوءه
يعني اني اول لقاء متمنيته يصير عليه رعب وانحط بموقف صعب وبموضع اتهام شگول عليج بطه
اول مافتت امي تريد تحجي على روحتي اشرتلها فوك
..ابوي هو گال روحي ترى اصيحه والله بس تحجين مالي خلگ ابد
هزتلي ايدها متحلفة
..بسيطة سراب بسيطة ..ابوج يطلع ظال هنا دوم هم يطلع
عفتها ورحت ادور عن بطة لگيتها مسويه روحها نايمه وملفلفه بفراش بغرفة امها
دفرتها حيل
..گومي ولچ گومي ..حتى لو نايمه تگعدين
هاي مجازاتي هيج تسنغفليني واني اعلم بيج واحبج واحرص عليج واشرحلج ..ولچ اني ماقربت واقتربت الاخت بكدج ليش هيج تسوين بيه
..گعدت تبجي
..شنو شسويت ..ليش هيج تحاجيني
..لو ماتدرين شمسويه ماشردتي وسويتي روحج نايمه هيج ..ليش هيج بطة تاخذين تليفوني تتواصلين وياه ..ولچ مو كتلج صغيره انتِ على هالسوالف گلت لو لا
..والله هو بس مرتين حجينا
..ماگايله شي ولو ماصخر چان سويتو الأكثر
..والله گال يحبني
..ولچ الي يحبج يتقدم ويكول اريدها ويصبر عليج عمام احنا مو غربه ..هاي اني سنين حجو بيه الفارس وهو استقر هناك يدرس عد خواله ..اروح اكله تعال خلي نسوي علاقة..شنو نهاية هالعلاقات ..يريدني يدك بابي مايريدني الله وياه لو اموت ماافكر بالسويتي رغم هوايه حاول
تبچي وماترد
..روحي بطة زعلانه عليج اني ..راح تشيلون انتو هم ابقي يم امج بعد
..لا فدوه سراب عليچ الله لاتزعلين والله مااواصله بعد ابد بس لاتزعلين عليه ..ولاتحجين شي الامي فدوه
..لا مااحجي شكول ترى خطبج هو وكلوله هسه ماتصير الك ..اذا تريد انتظرها تخلص سادس يلا
بجت اكثر
..ابوي عرف
..لا راح يعرف بس شغلة التليفون مااسولف بيها بس اكله يسمعها حجي وسمعهم صخر واتعاركو لو سألج كولي معليه اني وجنت اشكي السراب اخذ منها الحل بس خلي ابالج اخر فرصة الج هاي
..وراح تزعلين وماترديني ..مااريد احد غيرج اني حتى امي مو مثلج حبابه سامحيني
حضنتها ابجي وياها
..والله بعدج صغيره ياحبيبتي مو مال تسوين بنفسچ هيچ ..وصخر اخوج ويحبج من خوفه عليج هيج اتصرف الف وصيه وصاني عليج
ظلت تشهك وفاتت علينا فيحاء مطعونه طعن عبالس حست بالصار وخافت ع بتها
طلعت مقهوره على حمل حلا
..مو گال جبتها ماتخلف مااريد جهال تالي سواها وقرر يخلف منها
..ارزاق ربچ هاي لابيده ولا بيد احد ..عينچ على بطة مريضة هاليومين بالج عليها لو شلتو باجر
ماجاوبت ولا اهتمت النا وصاحت ياسر اخوي
..اتصل بابوك خل ينزل احاجيه
..شتردين منه يمه ترى ابوي دار بذاك البيت هو وعبد يرتبون الاغراض الجديدة
اخذت عباتها وراحت وراهم
حضنتني بطة جنها تگلي
ماالي غيرج اني
بستها وكعدت احجي وياها هوايه واخذت منها وعد ماتعرض نفسها وتعرضني الهيج موقف
وتليفوني منعته عليها فتره لأن تبقى بعمر حرج ماتكدر تتخذ بي قرار قاطع بدون ماتتغلب عليها عواطفها
ثاني يوم انتقلو فيحاء واخواني وهناك شفت نوره وهاجر
حسيت فيحاء مزعوجة لأن اكبر غرفة ناطيها ابويه الهاجر وعازلها بحمام داخلي الها خاف تستحي من حمزة حسب مافهمت وهي تريد الغرفة الحمزة بس ابوي سكتها ونوره وبطة بغرفة بصفها
وحمزة جوه يم غرفة ابوي غرفته واخواني الصغار وياه
رجعت قبل ليكملون كلشي بالي يم حلا احسها صحت من هالخبر وحياها بعد ماجانت شبه منتهيه فرحتها مو سايعتها وفرحة ابوي محتلفة الفرحتها
ظليت اداريها وامي ترزل وتحجي ومااهتم
ومرت فترة واجانا الشهر الكريم ويمكن احلى شهر هذا فطرت بي مرتين ابيت صخر وي بنات عمي
وبدت علاقتنا تقوى خاص من يخابرني على بطة حتى هي اتعودت على سؤاله ومره منهن هي ردت ومن سمعت صوته انسخطت بعدها ابتسمت
وگالت
..باجر معزومين اني وانتِ ونوره وهاجر
..لمة حلوه ويم شهلة تصير احلى ..باجر تشوفين وصفي الها صح لو مبالغة
...
رشا ..
تعبانه من حملي بطني كبرت وصارت تعيقني كلش على وجه ولاده وخايفه بالعيد اسويها واخبصهم
هاجر عمها قرر يعزمها بقت يمنا اربع ايام وعمي ابراهيم اتصل بيها يريد يطلعهن هي والبنات بعد الفطور يشترن ملابس للعيد
راحت بعد ماعثمان انطاها مصرف كوه اخذته وحلفتله مصرفها ماشي مثل ماهو
وصلناها البيت عمي وبطريقي مريت اشوف غزالة
لگيتها تنظف تنظيف العيد سوده عليه كل مره اساعدها هالمره وحدها
سألتها عن خالتي
گالت عند اهلها
احسها تريد تحجي وتتردد اخر شي بعد محاولات مني حجت
..نشرت بحسابي مقطع الي واني بالمزرعة واجاني اعجاب من حساب عرفته بالأخير ابن خالة صخر اخوي
وبعدها اخته دخلتلي تسلم وتتعرف وهذا الكلام صارله فتره طويلة بس هسه فاجأتني تگلي بعد نتائج السادس ان شاءالله نريد نجي نتقدملج
..المن يتقدمون
..الي شبيج
..وصخر يعرف
..لا ميعرف عود يبلغوه من يعرفون ردي ..مو هنا المشكلة
..شنو المشكلة احجيلي
..الولد يريد يحاجيني ويفهم مني ويشرحلي ليش رايدني واذا اقتنعت يتقدم
..وانتِ شرايج
..متردده وخايفه ..لاتنسين عيني واعاقتي معاقة اني مو طبيعية الولد ماشاءالله عليه ماناقصه شي مو اعتراض ولا تقليل من نفسي بس اخاف من الخيبات
..يتبع