بقلم نور الشمس
...
هاجر ...
انتقلنا واني كل فكري يمه اخر ايام ابد ماچان طبيعي چان اعصاب ومتوتر وموضوع خطوبة اخته كلش ضوجه مااعرف ضوجته من شخص ابن عمه لو من اساس الموضوع كله
اول يومين انتقلت عيني ع التليفون اريده يذكرني لو لا وماحبيت اني ابادر بس اخذت تليفون عمه شهله واتواصل وياها
وبيوم واني اسفط بكنتوري وارتبه اتصلت بيه
فرحت حيل باتصالها السوالف وياها تريح واني جنت ضايجه من حسيت عمه فيحاء مزعوجة وگالبه وجهه وتحجي بنتر وياي ووي بناتها بس احسها قاصدتني
فتحت المايك وخليته بخانة الكنتور مقابيلي واني اسفط ملابس واحجيلها شگد مشتاقه الها وواحشتني سوالفها الحلوه
واني احجي اندكت الباب صحت فوتي جنت اظن نوره فات عمو ابراهيم
عمتي تحجي وياي واني رحبت بعمو اشرلي اسكت واخليه مفتوح
وگعد ع طرف السرير واشرلي اكمل وياها
ظليت امتمت مااعرف احس خاينه طرف ومتعاطفة وي عمو هواي احسه مو هو ملامحه كلها ارتخت مااعرف بس تعابيره جانت توحي للحزن واللهفة
وعمتي مستمرة تحچي
..ولچ ياحلوة شلتن البيت ورحتن خاص انتِ نورة جانت تقرا معزولة .. بس انتِ عودتيني عليچ بعد ماچنت متعوده ع الوحده ومتونسه بيها ..خليتيني احب السوالف وياج ورحتي
..حبيبتي عمة والله هنيال الي يگعد يمچ ويشبع من سوالفچ ..اني هم مشتاقتلچ هوايه الج والامثالچ عندج وي كل سالفة مثل
ضحكت
..هاي سوالف امي عمت عيني اني مااتعلمت بس منها وخلف الله ع القراية من اتعلمتها هم هوايه غيرت بيه ..سولفيلي خو ماضايجة مرتاحه هناك عمه
..فدوه اروحلج والله مرتاحه
..المسودن مداريچ مچانچ زين .. لو بس عودنا عليچ وخذاچ
ضحكت وعيوني صارت عليه مااعرف شلون اغطي ع الموقف ردت الغي الكتم اشرلي لا ومبتسم براحه بحيث نزل من السرير للگاع وارتكا عليه وربع رجل ووگف الثانية وايده على خده مستمتع يمشط بلحيته باصابعه
..لا والله احلى مكان منطيني ..ترى عمو حباب احبه عمه وازعل ماارضا عليه
..خوش عليچ وعليه ..شرايده منه اذا مداريچ هذا هو كثر الله خيره ..انه گلبي عليچ ولو بيدي ماانطيچ اخليچ يمي وبحضيني الله ماقسملي بنية انتِ بنيتي
..اروحلچ فدوه وين الگاها شهلة المزيونة تصير امي
..هذا المسودن العندي علمچ عليها ..سوده عليه مستاحش عليچن بس طبعه مايحچي ولايبين وياكل بروحه ..هو هم مسودن طالع على الماله ذكر مايريحولهم بشر
ضحكت بصوت عالي وعمي ماكدر يضم ضحكته بس ماطلعله صوت يعرف لو سمعت ماتبقى ويمكن ماتعيدها وتتصل بعد
..شنو اليوم عمه شو مو عوايدج تشكين من اشهل
..حجي السان عمه ..هذا روحي من الدنيا وحتى سويدنه احبها ..المهم چنت بالزيارة رحت ازور ابو الجوادين عليه السلام ودعيتلچ والكل محب جبتلچ وياي صوغة خل حميزة يمرني اوديهن بيده
..يمه فدوه للذكرني بس الي الصوغة مو
اني عمده حجيت اسمع عمي المركز بسوالفها
..لا ولچ چا اخلي نويره لو حميزة وصله من الجبد هذا بس صوغتچ وحدها
..مشكوره حبوبه عمه اموت عليچ
..بعد روحي ..لاتگطعين بينا
..ان شاءالله مااگطع
نهيت الأتصال عمي ماحجه ولا اني مااعرف شحجي
مدري انقهر لو شنو اكله واصلا ليش الهجر هم غير مامتفاهمين ليش هذا التعلق منه
..هلو عمو
..هلا يابه ..فرك وجهه وعدل گعدته وگال
..شلونچ مرتاحه
..الف الحمدلله اكيد ارتاح وانت شايل كل همي ومفكر بأبسط اموري ..الله سبحانه يتمني صح بس رزقني بلطفه برعايتك
..ماسويت شي بنيتي انتِ ووصية اخوي وصاحبي شسويلج قليل ..فيحاء لو اتعدت حدودها وياج بحرف ..حرف واحد وادري بيج ماحاجيتلي وضامه عني زعلي يصير عليچ انتِ وتخسرين عمچ
اني حذرتها وهسه بلغتچ
..ماصاير شي عمو
..لا صاير اني مو غافل عندي اوليات المهم ارتاحي بمكانچ ولاتشيلين هم وعمج موجود
..الله يحفظك عمو
طلع وصل الباب ورجع
..تتصل بيچ على طول
..مو دائما مرات
راد يحجي شي وسكت
واني بكل ميانة مدري شجاني وسألت
..الهسه تحبها
..للموووت
..شنو المانع تواصلكم من جديد
ابتسم
..المسودن ابنها ..مو خوف منه ..خوفي من خسارته ..وانه خسرتها بخسارته ..ووعيت متأخر
سكتت مااعرف شحجي وهو طلع
شنو معنى كلامه شلون خسرها بخسارته
يعني لو كاسب ابنه هي ماترفضه هيج فهمت
وليش ماكسبه ..تعامله زين وي اولاده مدللهم شبي وياه
هوايه اسئلة ظلت ابالي
بالليل جابولي صوغتي
شگد بسيطة وحبيتها ..جادر صلاة ومسبحة الكترونية بشكل بناتي مأطره بستراس حبيتها حيل
وياها شال بألوان النود وكب
وعلچ مي وحلاوة جزرية
حسيت بشعور شلون الوحده يم عيالها ويوصلها شي من اهلها هيج فرحه حسيت
مرت كم يوم ودخلنا شهر رمضان البيت هدوء بالنهار وبالليل بس احنا البنات نسهر نوره مامصدگه مخلصه امتحاناتها
واني وياها انظف البيت بطة قليل تتواجد هنا اكثر وكتها يم سراب
والعصر الطبخ على عمه الوجبات الرئيسية واغلب الوقت فطور عمي مو يمنا هناك ابيته واكثر وقته يم حلا
من هو مو هنا عمتي ماتهتم اي طبخ سريع تسويه
والباقي احنا نسويه عصاير لبن زلايط حلاوه اطباق جانبية مال فيكات
بس اشتاقيت الاكلاته مدري اني اتحجج مدري لأن ماكو اهتمام قوي بالطبخ وهو طبخه اطيب بهواي
ومرات ودي اني اطبخ بس استحي منهم
بعد ماباركلي بقدوم شهر رمضان وحجينا وهم بهدوء انسحب وحسيت بي كل مايشوف نفسه اندمج ويايه يرجع يبتعد .. تركته على راحته مااحب الح بس ملهوفه حيل عليه
بحيث صوت سيارته صرت اعرفه من يمر واركض للشباك ركض اراقبه من ينزل لو يتمشى للبستان مرات المحه
اشهل طويل بجسم طبيعي حلوو لانحيف حيل ولا ضخم بشرته حنطيه وتميل للشقار القليل بسبب لون عيونه بس مو ابيض حيل لون عيونه الشهل ابرز مابشكله
شعره بني غامق دائما عالي ومن يتعب مرات ويشتغل اطرافه ينزل ع الجبين بس دائمًا يحرص على تصفيفه ورفعه
بلحية خفيفة وانف طويل بنهاية مدببة ومرفوع
ملامحه حادة والميعرفه يحسه ع طول مزعوج بس من يحجي ويضحك ابد مايشبه الأنطباع الينوخذ عنه
سكنت الشباك اراقبه همزين الجام مظلل وبالليل اطفي الضوه مااريد انفضح
ابين للكل اني طبيعية ثابته بينما التفكير بالدخول الگلبه وكسر الحاجز البانيه تعبني ودائما اذكر نفسي اني بنية شگد مااريد اجازف ..لازم تكون المبادرة منه
واليوم وبعد عشر ايام راسلني يسأل عني
وفرحت بسؤاله
..شلونچ ست اختفيتي لاتسألين لاتگولين
..الحمدلله بخير ..لا والله اسأل
..شخبارج
..الحمدلله
اتصل جاوبته مستغربه اتصاله
..شو حسيتچ مو انتِ التجاوبين
ضحكت
..ليش هيج حسيت
..ماادري مجرد احساس
..مع الأسف احساسك غلط اشهل بيگ
ضحك
..شو بيگ
..كل متگلي ست اگلك بيگ
..بالأخير تصيرين ست بس اني مو بيك
..منا لمن اصير الله كريم وهم انت مااتقبلها منك
..هاا؟ ليش
..مااحب
ضحك
..شلونچ مرتاحه
..الحمدلله ..عمه شلونها
..زينه عمتچ الحمدلله .. أكول ..البارحه ابراهيم گال يريدن يطلعن للبستان يوم ..عادي تأجلنها هسه بس كم يوم افرغ واخذجن اني لاتخلنه ياخذجن هسه زين
ترى الولد كلهم هناك هالفتره الشغل هواي انطني مجال وتدللن بلغيهن وياچ
صفنت اصلا هو عمو گال النور ونور گالتله مااقتنع اذا مو طلعه بعيده وافتر بيها اسواق ماأسميها طلعه ومو مال هسه واحنا صايمين يعني هو راد يطلعنا واجلناها عمي شكايله ماادري
رديت
..هذا هو ان شاءالله نأجلها ..بس شرط تاخذنا المزرعتك اشوف شبيها
..مزرعة جدي مو الي
..غير انت متكفلها ومعتمد عليك بيها وبزرعها والشباب يساعدون مو دوم عمي يكول هو والفلح اكثر شي
..اي بس هي كاعه وكاع عمي مو الي وتدللن اخذجن .يلا اخذي راحتچ وبالچ على نفسج واذا احتاجيتي شي گليلي الي
سكتت وبگلبي اكول على اي اساس اگلك مو تريد تبعدني انت وتبتعد
نهينا الاتصال
وضحكت عرفته متصل حتى مانطلع بوكت شغلهم
على اساس ماشايفين بناتهم هم شو مدري شلون يفكر
وهيج مرت ايام كل ماياخذني عقلي اله
ارجع اشغل نفسي بالبيت لو بگروبنا اني والبنات رفيقاتي الثلاثة
بنين جمعتنا بموقف وجمعتنا بگروب هم سمته "الوطن يجمعنا "
بيومها شبعنا ضحك ع الأسم
هولير كتبت
..شنو گروب عسكري مجموعة مال ضباط شبيچ بنين شنو هالأسم كتبي بنات كيوت كتبي الأميرات
وحور كتبت
..اني ادري تحسوها مجموعة مال ذوله اليدزون
ممكن ترحيب
بنين ولا تهتم بأي تعليق سلبي ولا تغير
كتبت
سكتن سكتن اليوم حبوبتي عدنا وتگلي لو بيج خير چابتيلج رجل وياچ
عمي الدنيا والله متغيره قبل بت عمي واحنا اطفال انخطبت من جامعتها جنها مسويه جريمة الف تحقيق حققو وياها خالاتها يكلن الامها شتكولين جابته من الكليات لاتنطيها احسن گوه ابوي قنعهم ومشاها
ضحكت
..مو زين بيبيتج تقدملج دعمها من هسه
..يمعوده تريد تبوگ الساني داهية حبوبتي ماتغرني سوالفها
وظلت تسولف مواقف وياها موتتني ضحك وخلتني احن
شيصير لو طالعه من خوالي مو بهيج موقف وظاله اتواصل وياهم شو اشتاقيت البيبي .
حمزة اتعودت على وجوده نكتة البيت هو بس صرت كلش حريصة يمهم اخاف امهم تاخذ بأي سالفة وضحكه وياه وتسويلها سالفة لأن شفتها هوايه مركزة وهي تردد يمي
رايد بنت اخوي ويحبها
وتكعد تحجي بسوالفه حتى ممفكره تبعد عنه هالتفكير الخاطر دراسته ع الاقل لأن هو ماكمل امتحاناته من اول دور مثل نوره اجل درس حتى يكدر يحسن معدل ويعيد اذا ماعجبه
حسيتها خايفه عمي يزوجني اله اصلا اصغر مني ولو اموت ماافكر بيه كزوج ولا افكر بنفسي فد يوم انفرض على احد اموت اهون من هذا الشعور
وبيوم وبنص ايام الشهر الفضيل كملت لم غرفتي وتنظيفها بعد الفطور ونزلت اليوم عمي ابيته ذاك
نوره منتظرة النتيجة
وحمزة يقرا الرياضيات مأجله ونوره تكله
..مو نصحتك اخلص منهن كلهن شكو مأجل ..حتى غزالة مامأجلة
..وانتِ مساويتني وي غزالة تطلع اعفاء كل سنة ..مااريد معدل نازل اريد وسط يدخلني كلية محترمة ..او معدل يأهلني ادخل كلية عسكرية
..مو بابا كلك عوف الكلية العسكرية
..من دون عمامي ابويه يكره السلك العسكري ولد عمي شگد منهم ضباط الا هو كلساع وگال ختولي العسكرية
ردت هي
..اختصاصات طبية شبيها
..مااجيبها ..انقبل مسولفچي ارفع معنويات المرضى قبل العمليات
ضحكت على سوالفه وي نوره واني اسمع ماادخل نادر ما گتله
..روح تربية
..مابيها مستقبل وتريد انسان صارم يضبط اولاد هالوكت اني اذا اصير استاذ اطلع عيون الطلاب مو اضبطهم
..يعني انت طلاب مامتأكد تضبط رايح عسكرية شلون رهمت هاي
عدل گعدته ويشرح بذمة وضمير المشكلة حتى وهو جاد متعرفيه يحجي صدك لو يحشش
.. العسكرية ارحم بهواي ماتريد خلگ وطولة بال قوانين نمشي عليها وبس وين اكو عسكري اله خلگ كلهم ارواحهم طافرة
..لا ..لاحظت عدكم ولع هنا ماكو بيت من عمامنا مابي عسكري شالسالفة
..اي صح بس ابوي مايحبها
نور گالتله
. متصير مثل فارس ابن عمو ماباقيله شي ويجي متخرج من الطيران المدني وبيده الشهادة بصفة كابتن طيران بشهادة معترف بيها دوليًا .
..ابن عمچ خواله هناك وكمل يمهم بالأردن وتكلفة دراسته عالية هم .
جاوبته
..لتفكر مادام متشتت وممخلي ابالك شي معين عدا العسكرية ..خليها على الله وتوفيقه انجح وبعدين قرر
..هي هم هيچ
اجت عمه فيحاء حاجت نوره بنتر
..شكو گاعده يمه تشغليه مو عنده امتحانات عنده قراية ماتفكرين لو بس للسوالف كاعدات كومي شوفيلج شغله عملة لو هاي ماتعرفنها بس للسوالف
كمت اني ونوره گالت
..يمه كل شغل ماعدنا روحي ارتاحي معليچ بينا
اني انسحبت ع الدرج بعدني وسمعتها تگلهم
..لاتخليها تاخذ ميانه وي اخوچ ..وامداك انت هسه ابوك يخليها براسك وعود ظل ابچي يمي
گلها
..البنيه لاتسمعچ عيب
انسحبت الدمعة بطرف عيني المن اشكي وشحجي
وبس لاصدك عمي هذا تفكيره راسي صدع من القهر
نوره صعدت بيدها موطات وعصاير
..تعاي هجورة خل ناكل اني وياچ بطة صار فتره والهسه ملتزمة بالدايت والله متعجبه منها
..خليها قوية عاشت ايدها ..وينها هي اجت
..اي صعدت وراي
فاتت بطة بيدها كاسة زلاطة جبيره
..هلوو هجوره
..هلا بطوط ..لچ والله ضعفانه انتِ عاشت ايدچ هوايه متغيره
..الله عليچ ضعفانه ..والله اني خايفه تالي الحشيش الاكله بدل لا اضعف اصير بقره رسمي لأن ماكو نوع من الخضار مااكلته
ضحكت من گلبي تقلد حتى على نفسها
..لچ ليش متجين
..متعوده هناك اكثر ..وامي هم لو شافتني بس ترزل بيه هناك امي رزق مالها علاقة وسراب مخليتني بعيونها فدوه العمرها
..حلوو تسميها امي هم
..اتعودت وي اخواني من جنا صغار
..اگلچن بابا يگول باجر فطورنا بالبستان وحتى حلا ويانا
نور گالت
..وامي قبلت؟
..اي قبلت وگالتله عاشت ايدك شو خلته يطلع وظلت تحجي ..حاير بحلا يريد يونسها حامل وتعبانه ماطلعنا قبل ومن هالسوالف فيجوز اذا اتعمقت بتفكيرها اكثر منا الباجر ماتروح
نوره كالت
.. لا تروح مدام يمه ايدت
بعدنا نسولف واجتني رسالة منه
..باجر امر عليچ ترحين الرشا ؟
..عمي يكول فطورنا بالبستان
..لعد شتفقنا ست
..والله يابيگ اتفاقك طوول نسيته اصلا
..خوش تبسمرين ..باجر رشا عازمتج
..وينها رشا بطنها واصله الخشمها. .مبين انت العازمني يمهم
..هيج مبين يعني مافاتت عليچ ..يلا خليها روحي اتونسي هم حقچ
..بشنو تفكر اشهل
..والله ماادري بس باجر مااخليهم يطلعون
ضحكت وصوت ضحكتي رن البنات گالن شكوو ضحكينا
مارديت وكتبت
..بلا شلون تعطلهم من الطلعه وليش
..اعزمهم..والليش جوابها احسن
..بعد انت وشطارتك الفطور وي عمو مايتعوض
..حقچ يابه ليش لا ..مايتعوض اي ..هو عمچ على گولت شهلة تگول شايل خرز نسوان يمكن
ضحكت اكثر ودزيتله ضحكة طويلة مااعرف شعلق وشكتب اكتفيت بيها كتب
..مبين صار هوايه ماضاحكه
..اي والله اصلا جنت مخنوگه ..زين ليش ماتجي انت تفطر وياهم هناك
..وشنو السويته اذا اخذهم
..نشوفك ع الأقل
غلس وگال
..ولا مره مخلي شهلة تفطر وحدها هاي السنين كلها وباجر راح اگابل خلقهم واتركها حتى تاخذن راحتجن انتِ والبنات
..مشكور اشهلنا عني وعنهن
..ادللن
حاجني البنات
..وين سارحه ومو ويانه ويامن تحجين مو كاعد نحجي وياج
..شنو كولن مامنتبهه
..باجر كل عائلة بينا تطبخ فطورها احنا شنسوي ماما ماطول ضايجه ايسي تسوي اكله بيها خير
..نتفق وي سراب شراح تسوي هي ونشوف
اتصلنا بيها
فتحت كامره وهي تفتر
..ترى حولتينا گعدي
..بيت ابراهيم بي گعده هو منين اگعد
هذا احمد البگده عنده جهال اثنين وهو يلعب طوبة وي ياسر ومحمد وگلبولي الكراج طين
نوره حاجتها
..طردي ياسر خلي يجي بيش مطلوبه بوصاخته انتِ لو طبگ وي محمد وعلي هناك يگلبون البيت عليج واكيد جهال عبد نزلو وانوب احمد وياهم يخبلهم بالزايد
..خليهم يمعوده ع التنظيف مو نمونه المهم متونسين ياسر اجه خده احمر سوده عليه امج ضاربته حيل ليش هيج تضربه مااقبل عليه ياسر هو وبطة حصتي
..واني بنت البطة السودة
..لا بس انتِ جبيرة حالج حالي انتِ اخت هم جهال عليج الله بالج عليه واحمي
..امي شاشت من عرفت ابوي مطلعنا فطور بره لأول مره بالبستان يفطرنا تكول الخاطر حلا
..لچ خطيه حلا غير ماعدها احد تروحله وتضوج من الغرفة يريد يغيرلها جو امي وامج غير كل اسبوع لو عشر ايام يرحن لاهلهن لخواتهن هي شعدها
حسيتها تحجي عني هم فعلا الماعنده احد حياته مدري شلون تصير
حاجتها نوره
..شناويه اطبخين روبه المحبوبه
..يمكن اسوي دولمة واشوي سمچ
..خلي الدولمة علينا بيها تعب وانتِ متفرغين الا تكعدين من وكت ..سوي بس سمچ
..لا الدولمة ابوي رادني اسويها وسمج هم اشوي ..بس سون برياني اذا تحبن واي حلاوه تعرفلها وتمر
همزين اتصلتن جنت حايره وحدي خل ابوسجن
واخيرا خواتي ساعدني خدج هاجر ابوسه نوره ع واهسج گامت تسوي
بستها بالكامره ونوره تضحك
..اي والله اتشجعت بيها ..يلا حبيبتي اخذي راحتچ
وشعدج شغل كربي بطة بي تريد تضعف خليها تمسح بدون ماسحه
بطه تاكل بزلاطتها وتعض اصبعها تريدها تسكت
..لا بماسحه بدونها اتسكرب والله
ثاني يوم بدينا نحضر صدگ وطلعنا وچانت احلى لمة والأكل يخبل رجعنا متونسين وفعلا الولد من وكت ماباقي احد منهم كل مره يبقون الحد الآذان واحنا رحنا من العصر
كم يوم وفعلا عزموني رشا وعمو عثمان اخذوني يمهم كم يوم ساعدت رشا واتونست وياها وعمو عثمان ارتاح من سألني شلوني وجاوبته شكد مرتاحه هناك اذا ابيت زوجته ام اشهل او فيحاء
وطبعا سوالف فيحاء وحجيها السطحي مااحجي مايستاهل ينذكر هي حتى وي بناتها هيج طبيعتها دائمًا هجومية وخابصة نفسها مااشوفها مرتاحه قليل كلش
اتصل بيه عمي ياخذنا نشتري ملابس للعيد
وصلوني البيت عمي لگيت اشهل ابابهم وعمي واگف وياه سلمت وفتت
بالليل اتجهزنا نطلع اتصل بيه اشهل
..ها هاجر كملتن
..ليش احنا وياك نروح
حجيتها باستغراب وفرح
حسيته من صوته مبتسم
..ويامن تردين ست
..وي عمو يا اشهل بيگ
ضحك
..عمو هم ويانا ارتاحي ..هنيالج بعموو والله
ضحكت لأن مايكدر الا يعلق بأي شي يخص ابوه
..ابوي مناظره الي يسوق بيها بالليل مكسورة وراد مهيب ياخذكم وكتله اني اوصلكم ..منتظرجن استعجلن انتِ والبنات
..منو بعد ويانا
..سراب وانتن
اتجهزت ع السريع بس احلى كشخه عندي كشختها
ومكياج خليته يبرز ملامحي اكثر بس مكياج نظيف وناعم
بحيث عمي من نزلت لمحني ونزل راسه رجع رأسا رفعه مركز بيه وگال
.. يلا اذا كملتن نطلع
استحيت حيل والله يمكن هسه يكول البنيه استخفت انوب هنه ابد ميخلن مكياج بس اني متعوده وهو يدري ماادري ليش استغرب وابرر بس اتوترت حسيته راح يكول علمود ابني
طلعنا عمي گعد يمه بالصدر
والبنات سلمن عليه ويسولفن ويضحكن واني الساني انبلع ولا عبالك عادي احجي وياه
عمو ظل يحجي وياه بخصوص سيارته وهو يجاظل بيه
..يكله شتريد اسمعك ابو البراهم
عمي يكله
..صوتك كافي
ويرجع يرد
..شنو تبت لو لأن شهر رمضان
..طبعًا شهر رمضان ناقصين ذنوب وبهذه الليالي تريد تزيدني
ضحك ويگول
..لا والله الدنيا مامطولة الظاهر القيامة جاية
وعمي يردله
..طاحظك
البنات يضحكن رحنا الشارع فلسطين وهو يوصي
..مو تتأخرن كلش اختارن على راحتجن بس خلن ابالجن احنا ننتظر
عمب ويانا وهو هم بس ماخذ مسافة بعيدة عنا ومن ندخل نختار يبقى بره ينتظرنا
اشترينا فساتين العيد وشالات واحذية وجنط وهوايه نواعم واحتياجات عمو يحاسب واحنا وحده تساعد وحده ع الاختيار
من رجعنا وعمي توه صعد ..اشهل شمر علاگه على سراب
..عيديتچن مني وعذرني على التقصير
وشمر عليه علاكه هنه مشغولات يطلعن البيها فتحنها ساعات فتحت علاگتي ورجعت ضميتها وشكرته ماادري ليش حسيتها مختلفة
واول مارجعنا ووصلت صعدت الغرفتي فتحتها زنجيل بكرستاله ناعمه وساعة هم
وكارت مكتوب بيها
..كل عام وانتِ بخير بين اهلچ وناسچ
گلبي اعلن نفيره خليت ايدي على وجهي اهفي احسه صار نار
اندكت الباب ضميت العلاكه والنزجيل والساعة بيدي فتحت الباب ونوره گالت
..اووي فدوه شوفي صخر شكاتب
نفس العبارة النا تلاثتنا
عيد سعيد الأحلى واغلى الخوات
باوعت
..هديتج هم ساعة
بلعت ريگي وگلت
..اي ساعة
..واكيد نفس العبارة
..اي نفسها ..الله يحفظه ذوقه حلوو بالاختيار
..خل اروح الحمزة يتعلم منه مو يكعد يمهم بلاش
....
سراب..
جنت مسويه حملة تنظيف للعيد گالبه البيت وابويه گال عوفي كلشي من ايدج وكومي جهزي نفسج وتعاي وصاح الاخواني وامي كلها ارجع الگه البيت يلمع الماتكدريله سخريهم عليه
رحت طايره وياه كل مره ياخذني وحدي يوم لو اني وعهود وفيحاء وبناتها يوم هالمره جمعنا البنات بس وكلهن باجر ترحن انتن وياي
احلى شرايه چانت بيها كل اذواقنا اشتركت وكل موقف نضحك عليه هذا غير جدال ابويه وصخر وسوالفهم التضحك
رجعنا متونسين فرحانين جو الألفة بين العوائل يسوى كلشي
وسبحان الله هذا چان احلى عيد يمكن
من اجانا خبر فارس راجع اول يوم العيد وكل عوائلنا معزومة على شرفه واحتفال بشهادته وجيته بسلامة
شكد مافرحت بگلبي خوف بس الله يعلم بي ايدي كامت ماتاخذ على شغل
اني صح ابين مامهتمه بس ميته بي من الصغر واني متعلقه بي وخايفه البعد غيره لأن هو الحد سفره يحاول يتواصل ويتأكد من حبي ورادتي اله وكل الأكدر اسويه اگول انتظره ..ومااعرف الغربه والبعد غيرته لو باقي على نفس الوعد
....
ملتهي نحضر للعزيمة سواها عمي الرجال ابيت جدي وعوائلنا ابيته
كلنا منتظرين جية فارس الجداري تفور للغده وعمي ابو ريم صاحني شايلي لحم ومعلاگ
..هاك ذني جهز بيهن غداك
..تسلم خلي غداك وياي اكل مناك خفايف الأكل دسم
..اني وجدك وياك
بعدنا نحجي والهورنات گلبت الجوو عرفتهم اجوو وهذا مهيب اكيد گالب الدنيا نسيبة هذا وصاحبه
طلعنا كلنا باركناله ورحبنا بيه
خلينا يرتاح وفتنا وراه هو گعد يم جدي وابوه
شويه ودار وجهه على ابوي وعلينا وگال
..الكم يمي امانة وعدتوني من اجيكم وشهادتي بيدي ماتبخلون بيها
ابوي ضحك ودك ع صدره بخفة
..امانتك محفوظة
عرفته على سراب كل ظني نسى
طلعت اريد احصلها اشوف رايها هي قابله لو لا
اتصل وماترد راسلتها
..طلعيلي اباب بيت عمي هسه وينچ وين رحتي
يتبع .