رواية كتوف مائلة الفصل الثامن والعشرون 28 بقلم نور الشمس

رواية كتوف مائلة الفصل الثامن والعشرون 28

بقلم نور الشمس

سراب...

جنت اجمع ملابسنا احضرهن للنقله وروحي رايحه من النساة تعبانه حيل 

اسمع عمي وفارس بالصالة يحجون عمتي اليوم يم بيت مهاب راحت تشوف بتها 

حاچاه فارس ع النقلة من بيتهم واسباب تعجيلها وعتب على امه ليش تسمعني وراه كلام عمي گله 

..اذا تسأل عن الي اتمناه اتمنى العمر كله تبقون ويايه واشوف جهالكم داير مادايري ..بس راحتك عندي اهم وبنت اخوي مااريد اتفاشل وي اخوي ويسمع الصار وياها شنو الأكل وينحجي عليه عيب والله وامك حجيت عليها وزعلت مني وهي تعرف بنفسها غلط بس حجتها انت تجي تعبان تريدك مرتاح وهذا مو عذر 

الافضل ياابني اطلعو استقلو لحد يحط عينه عليكم ولا تضايقون احد والحنين ماتبعده مسافات امك تعبت عليكم ودارتكم وحقها انتو لاتنسوها وهذا يكفي 

حبيت موقف عمي و اتمددت ارتاح 

تجيني دوخه تسطرني شوكت تخلص نساتي حتى الفارس مالي خلگ الحمدلله ماكارهته ولا كارهه عطره بس كارهه روحي ومزاجي مايتقبل حتى ابتسم بوجهه من ادوخ 

فات للغرفة انتبهلي متمدده وداير مدايري كوم ملابس واني ضايعه بنصهن 

..يابه هذا الجاهل شمسوي بيج اول مره اشوفچ هيج تگدرين تگعدين بمكان مامرتب مو انوب متمدده وشغلچ على النص ...تعبانه حبيبي 

..والله ميته من التعب اريد أگعد لو اوگف فتره طويلة مااكدر الدنيا ادور بيه مو نساة هايه عذاب 

اتقربلي وخر الملابس من يمي وكومهن بعيد عني 

..عادي اخلي البنات يساعدنچ لو ماتتقبلين؟

..خواتك قصدك ..لا ليش مااتقبل بس كلهن بيوتهن واطفال ومشغولات ..اني لو مااخجل منكم اتصل بنورة وبطة يلمني لم بيوم واحد ميخلن شي 

رفع خصلات شعري من وجهي

..وليش تخجلين حبيبتي بنات عمنا مو غريبات والاهم خواتچ .. اتصلي بيهن يجن يساعدنج بالملابس ع الاقل الثگل اني والولد نتكفله والاوراق وكلشي بي ثبوتيات اني طلعته بجنطة بس ملابس ومكياج اتصلي بيهن وشوفي عمي يقبل لا

حتى اجيبهن واجي 

اني لو ماهلكان بالبيت جهزت بي كم شغله وكل ظني مايحتاج هوايه شغل بالاخير هلكت جان كلشي سويته والله بس تعبان وعندي رحلة هم باجر لو عگبة انطلق

اتصلت بنورة 

..يولي سراب شبي صوتچ 

..تعبانه نوره واريد انقل غراضي مابيه اسفط الملابس واجمعهم تكدرين انتِ وبطة تعينني 

..من عيوني صدگ جذب بس اتصلي بأبوي بلغيه الهسه بعده ماجاي واكمل تنظيف ونجي لأن حلا يادوب يخليها تطبخ ابنها 

..الله يساعدها انتو علمتوه ع الاحضان وورطتوها وياه

..يلا منو گلها تجيب لعابه النا 

..نوره دخت فد مره راح اتصل بأبويه اطلبجن منه وشوكت مافرغتن تعالن 

..ادللي شكم سراب عدنا احنا 

نهيت الاتصال وياها وبعد شويه اتصلت بأبويه وخطيه قلق حيل وبسببي مرزل امي لأن مامتصله وماتدري شبيه مابيه وخابرتني تحجي 

..انتن كلجن هيج صارت سالفتجن وسرجن لابوجن يرجع عليه يلوم عبالك اني قاسية وهو حنين متخابرين تكليلي تعبانه واجيچ 

..يمه والله ماشكيتله منچ ولا حچيت وتجين شتسويلي انتِ اني ردت نوره وبطة يعرفن شنو اريد واگدر اوجهن 

..بطة بحالچ طايرة مكيفه حارث عاشكها ومنتظر يعقد البنيه حتى النا گامت ماتجي ويجوز تستنكف تنظفلچ لو گوه حاشره روحچ الهن ذنيج هنه لاگيات حلا توهن ويخدمنها اني وانتِ شنو 

..لا يمه ماتحجي شي اختهن اني مو غريبة وخواتي يعزني بعدين شتغير مو بطة هذه عزيزتج وصاحبتچ 

..مالچن صاحب بنات ابراهيم مثل ابوچن مايهمه غير روحه 

..هسه ابونا صار مو زين وليش تهتميله تركيه مبين قهرچ منه هو مو منا 

سكتت وغيرت الموضوع ورجعت حجت علينا هوايه غلست عليها وروحي طالعه مااكدر انهي الاتصال واقلل منها 

..وهاي الزريگة الاجتني مدري منين مخبله اخوج ومخليته طايح على وجهه مقشمرته بوحده وياها ..واحمد اني ماارضاله ترى واكلب عاليها واطيها 

..احمد صغير يايمه وهي تخبله شو مدري شلون تحجين 

..صغير جبير الولد ولدي واني ازوجهم ذاك وسام زوجته على رايي ومااعترض ولا حجه احمد شنو ويعارض عبد مرته هم منا وبينا مااحبها صح بس مو غريبة 

..وشلون زواجه عاد ..يمه وسام يختلف عن احمد احمد ..احمد يعاند وتعرفيه راسه يابس والله تفتحيلج باب للمشاكل ماينسد خاص ابوي مو مثل قبل يصبر ويعدي 

..لاگيله عين ابوچ گبل ماشايف شهله وطاير هسه صاير يشوفها ويسلم ويسولف ولا عبالك هي تصيح مااريده وهو يكول الماتريدني مااشوفها كله جذب واخوج الچلب مرخرخ ومكيفلهم گبل هو الصادهم مو غيره

..لا مو هو هي ماتتقبل ولو شافها يايمه شيصير يعني بعدين ولو رجعو واتراضو ترى مرته بذمته مالج حق تعترضين 

..عمه بعينجن من بنات الله يشلع گلوبجن مثل ماشلعتن گلبي 

..يمه اني روحي طالعه من روحي بياحال وادعين عليه شبيچ 

ومنو مرتاحه منهن ولاحگتها بدعاويچ عهود شافت المر وضاگته ومآرب حبايبچ راكضات وراها ومطلعات روحها هم 

..شبيجن مو حايرين بيجن يدورولجن بيوت 

..لا اله الا الله ..ترى بناتج احنا مو ضرايرج شبيج يمه 

..مو مسويات شهله ام الجن واكثر ....حجيت عليها يم مآرب اكلتني وشربتني ..حرام عليج وعيب تحجين 

اني اشكيلها من ابوجن اجه يصفن ويسمع مواويل ولا حاجاني بيومها گعد بره وعينه الهم رايحه 

عرفته شايفها ومن سألت محمد كال هم كلهم ابيت جدي حتى ام صخر يعني احساسي بمحله 

تردلي ولو شافها شيصير وترجع تكلي خاف الله يهديهم ويرجعون بالج تحجين الشيب اكل راسج عيب تطالبين ع هالسوالف 

هاي اختجن الجبيرة الگلبها على گلب امها عود 

..يمه هي وين الرجعه فدوه اروحلج ..وحجيها صح مآرب.. والله كبرتي وابوي هم مو صغير كافي حتى عيب من ولدچ والله هاي حلا تسوي سوايتچ هسه لو بالعكس تقدرها وتوجب وهي طاير بيها لأن يشوفها مريحه وتختلف تعرف تكسبه

تردين تلحكين فيحاء مو گلنا حتى المشاكل راحت وياها .. عليج الله منو يوصلج حجي وهيج مگلوبه علينا وعلى روحج لأن ابوي لو تحتركين كدامه مايهتم غيرتج هاي ماتغير شي والله

..ابوچ ادري بي بس مااگدر مو بيدي ..وانتِ تهدديني عود من طاحظج انگس من خواتچ انتِ 

ذيج عهود هم ابتليت حاجيتها تگلي لاادخليني منو منكم واصلني شايفني خلف الله على صخر بس هو يمر يشوفني يقشمرها بهالسوالف الحيال 

من واحد محد مباوع بوجهه وكلها نافرته التف ع الكل اول ماسيطر على جدج وعمج وبعدها ولد عمامج واخوانج الحد ماوصلجن انتن ام السحورة امه تعرف خوش دروب خلته يفرها كلها بأصبعه لاتكليلي هو محبوب لا هذا مو شغل عادي 

..والله من كثر ماتحجين هالحجي حوبة المره طلعت ابناتج وعيالهن هسه يمشون ويصيحون سحارات هم عهود وهم مآرب على ابو ذيج طلك مرته يلا رجعت وهذه بمشكلة صغيره راح يشيل من الديره كلها 

ويمكن حتى اني بعد يومين ينگال عني هالكلام 

..وهنه خواتج لو يظلن عمر لو مامدخل هو وخرزته يصيرلهن حل حتى من اكول عنده شي مو طبيعي تصدگني 

..صخر قصدج همزين اعترفتي محد اهتم البناتج غيره 

..اخوجن وغصبا عنه وهم يريد يكسبجن حالجن حال اللفهم جوه جناحه قبلجن اكو واحد من عمامجن يكله لا هو ابو عمار واتندم هسه خله اعز ولده وجبيرهم يطلع منهم زعلان ويبعد هم مو قريب 

..انتِ محامي صايره الهم عبالك عدوانج احنا وصخر مشكوره يمه ع السؤال ماقصرتي بس الساني خدر والله مابيه احجي بعد 

نهيت الاتصال بتعب وبجيت 

يربي هسه سوالف هايه تسولفلي بيها بياحال اني انوب الدوخه زادت كمت للحمام ماطلعت منه الا بطلاع روحي 

لگيت عمي واكف عينه عليه ومقهور حيل 

..ها عمي اخابر فارس؟ ياخذج الطبيبتج 

..لا عمي مايحتاج دخت هسه ارتاح واصير احسن الطبيبة انطتني حبوب بس ماجاي تفيد 

باوعلي مقهور 

..النقلة هاي مو وكتها انتِ تعبانه ومالچ خلگ ..بس شلون يخلني مرتاح وماشايل هم وشلون الولد مرتاح وبينا بعد سنين من البعد سوتلها سالفة 

سكتت وفتت الغرفتي 

كلها بجهه وكلام امي بجهه ..هنه مدري متعقدات مدري اشايفات من حياتهن قبل يطلعن عقدهن بينا والله شنو ناقصجن وهالگد تنغصن 

لفيت راسي شويه ورن تليفوني 

جاوبت بصوت تعبان 

..ها روبه احمد راح يجيبنا الكم حبيت انطيج علم يعني 

..ها نوره حبيبتي هلا بيجن تعالن 

شويه دقايق واجن 

گمت اشوفهن واحمد من شافني اخترع 

..ليش وجهج هيج شبيچ شصاير

..مابيه والله مالي خلگ 

ونوره تگله 

..مابيها غير حامل وتعبانه 

..وهو هيج الحمل يسوي صدك جذب ..ولا عبالك انتِ عيونج طافية 

..شكرًا على رفع المعنويات 

ضحك 

..وهاي هيج يم فارس ويطلع مناك للحلوات بالطيران 

..خلي يشوف قابل النظر بفلوس 

..همزين عاقله مو مثل امچ خبلتنا من امس واليوم 

البيت صار جحيم اني اتزوج يمهم لا والله متعجب على عبد شلون الهسه صابر فوگ رغم ابوي عرض عليه بيت ..المهم ترى اشاقه فارس مايلگه منچ وهاي فتره وتعدي ان شاءالله اهم شي سلامتكم 

..حبيبي حماده ادري والله ..والله يساعدك ترى جانت تتصل بيه امي لعبت بيه لعب وحارت شتحجي ع البنات خلوها شتسوون اهم شي بوجوده مو مثل قبل تهوس وكامت تسكت لو شافته 

..اي هم صح ..شكتلج مني هم ماتحجي وياي هسه زعلانه شنو تخطب من صديقات مرت صخر وغريبة 

..والله ماادري شكلك بس هي حياتك وانت حر بيها لاتهتم 

طلع احمد من مالكه احد من الولد وكال راح اروحلهم البيتكم هناك يشتغلون 

فاتن البنات 

بطة شمرت الشال وعباية الچتف بعيد عنها وبدت تسفط ونوره تجمع كل مجموعة بجنطة 

وبطة كل شويه وشالتلها ثوب 

..عززة سراب ولا متوقعتج هيج تلبسين 

هزيت ايدي مالي خلك احجي 

ونوره تكلها 

..يعني شنو ماتتوقعين ترى سراب عروسه شتلبس قابل 

..يعني من اجهز للزواج هم اشتري هيج عزززة مستحيل 

شمرتها نوره بالخاولي 

..ولج انتِ منو مزوجج هسه حيوانه بعدج ترى يرادلج بالقليل تلث سنين مو اخذج الواهس ست بطوط ترى اكوم انتف ريشاتج والله مطلع عينج حارث عقدو ع الاقل يلا تحجين بي 

..عابتلج نوره محسستني زعطوطه ..قريب نعقد وابويه حاجاني منتظرين اول يومين للعطلة 

..طبعًا زعطوطه بس لا عبالج كبرج حارث من كال اريدها 

عضت اصبعها 

..اخخخخ لو ادري شلون حبيتيه وشموازيج بهالعمر مرتبطة وزواجج بعد سنين هم ارتاح 

صحت بيهن 

..كافي ولجن جايات يمي تتعاركن يمعودات والله دايخه بس ساعدني حبابات 

..سوده عليه حتى سوالف يمج ماتتحملين ..يلا هسه شيرادلها ساعتين حتى انتِ نغلفچ الفارس ونخليج بجنطة هم 

ضحكت ودرت وجهي ع نوره هي تضحك هم 

..هي هاي انتِ خايفه عليها شبيج ماعدچ گلب 

..اي والله زايده مني 

بدن يركزن بالتعزيل وماقصرن ابد گوه عطلتهن ع العشه جابلهن فارس اكل من بره وبطلعتهن صادف طبة عمتي وفراس 

سلم عليهن وفات وعمتي هم باوستهن ورحبت بيهن عطلتهن اتشكرنها وراحن

من طبيت انتظرت فرسان يفوت جوه وحاجتني 

..عشيتيهن خواتج لا 

بعدني ممجاوبه اجت عينها ع العلاليگ 

هزت ايدها ماراضية ومشت بس ابد ماحجت شي 

لميت المطبخ روحي طالعه من ريحة الاكل اشمه معبي المكان مو نفس الريحة النشتمها قبل احس حاسة الشم يمي زادت عشر مرات 

شويه واجه فرسان 

..ارد اشعل فحم تتقبلين ريحته لو انتظرج تخلصين 

..لا كملت خلي الفحم اهون من الاكل 

..البنات اتعشن لو طلعن هيج

..اي اتعشن فارس دزلهن 

..عاشت ايده 

قبل لايطلع صحته 

..متعشي فرسان تريد اجهزلك عشه

..لا والله متعشي اليوم خابروني معزوم ابيت مهاب وي امي ..رحم الله والديچ سراب شكرا ع السؤال 

..ماسويت شي اخوي انت 

رحت للغرفة بعد ماتأكدت عمي ميريد اعيدله الجاي اباوع لمن كلشي فدوه صدك الخوات ماكو مثلهن الف الحمدلله شكد امهاتنا اتمالخن قبل ابد ماخربت علاقتنا وخوتنا 

خو بطة مو بس اخت بطة عبالك بنتي عاشت ويايه اكثر من الكل واقرب جانت وكحه والسان وگدرت اغير منها للأحسن من اشوفها افرح احس تعكسلي صوره عني واشوف نفسي بيها بغير هيئة وشكل 

بالليل كلش اجه فارس هلكان گمت سويتله عصير بارد 

وهو يحجي ويايه نام 

ثاني يوم جهز نفسه للرحله وبالليل وصلني الاهلي وانطلق 

لگيت حمزة جاي ومتغير سودة عليه 

..هاي هيج التدريب مسوي بيك يايمه ياحموزة انت المدلل من الصوبين ولا متخيله اشوفك هيكل هيج 

..تدريبات وضيم العسكرة هايه كلها تمر وراها اصيرلج اخوو زلمة معدل 

..فدواتك انت معدل من زمان 

..والله ياسراب الي مغيرني قهري مو التدريبات واهسي صفر والله اجيت علمود امي شهلة 

..ها حتى ابوي ماهامك 

..لا ابوي مالي غنى عنه بس هو عاذرني واني هم اريده للاقوى 

..شصاير وياك عادي تحجيلي لو ماتحب 

..لا هو اني اريد احجي الج ..خواتي الكبار استحي منهن ..والصغار مااريد احجي وياهن بهيج مواضيع 

البنت من تشوف انسان يموت عليها مايشوف بهالدنيا غيرها وحلم طفولته هي وحبيبته وتحبه وتعرف شنو يريد من نظرة عينه ونبرة صوته وفجأه تتمرد على كل هذا وتصير تسوي شكو شي تعرفه ميحبه شكو شي يغثه 

صارت تتونس بقهري كوه الكالي فرصة اخذ بيها تليفون اتصل دقايق ماافكر اتصل بأي بشر غيرها ووتعمد تخليني اشيط للسما شنو معناها وشنو الغاية من هذا كله 

..والله ياحمزة هنه امرين الاول اما تريدك تزهك وتتركها والثاني ضامنتك وتنغر بمحبتك وتريد تبقى مسيطرة تحس شكد مابعدت مرجوعك الها 

والاثنين اذية الك لو تحبك متسويهن 

.. واني فعلا بديت احس روحي بلا كرامة وكمت اكره ذاتي ..شوفي اني انسان تعرفيني احب اعيش مرتاح وتعرفين الاسباب اني مااحب ينعاد الصار وي ابويه بيه ..مااحب اتعلعل وبنفس الوقت عندي عزة وكرامة مااحب اتنازل عنهن 

وهم اخاف الله اني حابها ومواعدها من الصغر شلون ادير وجهي وامشي هي مو طبيعية مااعرف شجاها متأكد امي فرت راسها لأن قسمت يمين ماتخليني ارتاح واخذها اعتبرتني واكف وي ابوي وصخر ضدها ولا كأن مسويتلها مصيبة 

..والله شكلك ممكن امهاتنا يطلع منهن 

..اااخخخخ ياسراب ..والله القهر ياكل بيه اكل اشوف امهات شباب وياي الله يحفظهم البعضهم يبجن بجي على ولدهن والدعاء يفتح النفس اني لو ماشهلة اموت من قهري بس هي معوضتني بينهم 

..الله يحفظها شهلة حنينه وذكية تحب تزرع محبة بگلوب كل الي يعرفوها وهذا مو هين اعتبره فن التعامل الحلوو فن ...امهاتنا عدهن قساوة صح بس حتى بالفترة اليطلع بيه حنانهن ميعرفن يوظفنه ..وهم عدهن انانية ومااعرف انشغلن بمشاكلهن اكثر 

..والله صح من احنا صغار وحايرين شلون نجنبهن عقوبات ابوي ونسد جفصاتهن احس احنا راعيناهن اكثر ترى حتى ابويه مبتلي بس هو متحمل لأن نتائج اختياره وتخبط علاقاته هذا المهم اني اخاف نهايتي مثله

..انت هسه ماكتلي شجاي تسوي هي وهيج متغيره بنظرك

..تتعمد تغثني ماعدها كل احترام تحجي على ابويه اكثر من مره كتلها ابويه احترمه اني مااقبل عليه كامت تزيد واخر عركة بيني وبينها سبته وحظرتها من البرامج رجعت ثاني يوم بحساب جديد تعتذر 

وماشافت مني وجه گامت تتجاوز وتحجي وتگلي رحت الهذا الطريق تقصد الكلية العسكرية حتى هيج وهيج تسوي وسوالف والله اخجل احجيها الج 

ورجعت تتوسل من جديد ونكرت هي حاجيه هالحجي 

وهسه جايه تكلي تعال اخطب ترى اتزوج اي واحد يخطبني ومااسأل عليك 

..وانت مستعد تتزوج وحده مثلها اشبع مشاكل من هسه 

..والله بگلبي نار ..مستحيل اتحمل هيج طبع اني وماجاي اتخيل روحي اتزوج من غيرها 

..زين هي مستحيل فجأه هيج اتغيرت اكيد جانت تمثل عليك هي مختلفه وهايه حقيقتها 

..اليمثل يوم يومين مو سنين والله جانت صوتها مترفعه اني حاير بزماني مااعرف شتصرف 

..عن نفسي انصحك تتقبل جحيم فراكها فتره وتنسى ..ولاتعيش وي هيج وحده عمر تكرهك بحياتك واولادك تعقدهم مثلنا واتعس 

..گلبي يريد يطگ الله شاهد 

..الرحمن على گلبك حبيبي 

..ماتجين ندور على شهلة وابنها 

..يلا ندور ماعندي شي 

بعدني ارد البس شالي وادور صايتي لاگانا ابوي سلمنا عليه ردنا نرجع وياه ماقبل گال نروح سوه اني هم ارد اشوفه واتفق وياه على خطوبة اخته اريد اصفي الگلوب بينه وبين حارث قبل كلشي 

اتصل بي حمزة طلع النا 

..هلا شعجب شو ابراهيم وياكم شمسوين من مصيبة؟

ضحكت وكتله 

وهو يصافح ابوي 

..يجوز هو مسويها واجه ويانا 

ضحك من كل گلبه وابويه گال 

..فرحلها هاي لا ياولد الكلب سراب هم طايل السانچ 

..لا والله يابه عليك الله لاتزعل اشاقه 

وصخر وهو يباوس بحمزة ماشايفه گال 

..شبيچ ترى ابو البراهم گلبه چبير مايزعل 

..هايه بس وياك اني هسه حضرت اذاني للجر 

گعدنا بالحديقة وحمزة صاح 

..امي وين ..شهله المزيونه تعالي مشتاااق 

باوعله صخر بنص عين 

..روحلها جوه ولاتصيح تطرشنا

بعده يريد يكوم واجت عمتي الظاهر شافت ابوي سلمت من بعيد عليه وباوستني اني وحمزة ظلت شكد حاضنته 

..يمه وليدي متغير عمت عينهم شمسوين بيك 

انوب مگرعيك ليش هيج صاير طير مهلس 

احنا ضحكنا وهو گال 

..يمه تذميني هسه لو خايفه عليه سويتيني مضحكه الهم شجاج عليه 

..ولو ضحكو احسن منك هم اختك لو طالعه دورة تدريب هم ماتصير هيج مخلصه من نساتها خلها تضحك ثواب الك 

ضحكنا اكثر واجت هاجر سلمت علينا كلنا وسلامها الابوي مختلف وهو طار بيها وصخر رافع حاجبه يباوع الهم ابوي يسألها شمحتاجه شجيبلج بسفرتي هاي اخر شي طكت روحه كاله 

..وين مسافر ابراهيم ناوي تجدد مو ..اني مستغرب هالفتره طولت لاهلهوله لازفة 

..اتمنى اجدد بس من احجي ازعلك واني احبك مااريدك تزعل مني ..المهم جيتي بيها هلاهل اختك ماباقي ايام العقدها واريد الزعل بينك وبين ابن عمك ينتهي 

..اني وولد عمي مانزعل تصير بينا مشاكل جدال بس الزعل لا 

..من ناحيتهم هم مو منك وهو كلفني عليك انتم اخوان بابا وبعد يومين انت خال الجهالهم يحبوك يحترموك ويعرفون مكانتك عدنا وعد جدك شنو ومايردون يتجاوزوك لهذا هو كلفني راد يجي ويايه بس ماخليته اعرف ماتحب شي ينفرض عليك 

..تعرفني والله ..سهله ان شاءالله بس اتفقك وياه دراستها ممنوع تتساوم بيها وخلي شرط من شروط العقد 

..كل هذا حاجي بي بطة هاي العزيزة ماافرط بيها هيج كل الحايف منهن حجيتهن وشهدت عليه هم 

..هذا هو تدلل انت وهو 

..تعال ابوسك اول مره تكلي ادلل 

..والله يابه مبين عليك الجفاف ليش اني اكلك يحتاج تجدد بعمرك ماطلبت تبوسني من حجايه 

..طاح حظك لك شو صاير انت فد مره ماتنلزم 

..هسه رجعت ابراهيم الطبيعي بوس ابنك الصغير مايحتاج تبوسني 

..الله يصلحك ..يلا استأذن اني 

دار على شهلة سلم عليها ورجع بصوت عالي يأكد على صخر 

..طلعت تحاليل امك 

حك خشمه صخر 

طلعن بس بيهن خطأ وباجر نعيدهن ان شاءالله 

..خطأ شنو 

..تحليل يقرأ منهن ارتفاع حاد بأنزيم الكبد وهذا الارتفاع مستحيل يرتفع بدون اعراض كل الاعراض ماعدها امي الحمدلله 

..بي خطورة يعني 

..ان شاءالله مو صحيح 

..عيده باجر لاتتهاون وبلغني 

سكت صخر ولأول مره ميرده او يحجي ويفشله احسه هو هم خايف 

مر كم يوم وبدينا نجهز العقد بطة اني هالمره طالعه من الحمره تعبانه ومآرب توها شايله وبعدها بيتها ممرتبته مملحگه 

بيوم نقلتها شفتها من اجت تسلم على امي 

جانت تبجي من الفرح وتدعي الصخر كل شويه تگلي

.. لاتشوفي من فات ولگه المشكلة وياي خلاني بظهره ولعب بيهم لعب جنت ابجي من الفرحه مو من قهر 

واتذكرت حجايته الريمة من طلعها وخله عزام يرضيها ويسوي الي تريده كالت يكول

امي وصتني مااعتبر نفسي ربيت اذا مو ابني

اخته وبت عمه تزامط بي بوكتها بجيت لأن خسرناه ومالي عين اخلي يوگفلي ومن وگف وحده حسيت بمعنى الخوة الحقيقي الله لايحرمني وگفاته ويرضيه دنيا واخره 

ورجعت گالت التربية والمحنة بين الاخوه للأم 

امي بس تشوفنا زعلانين اول ماتجي تكول اخوانجن مااريد يتعاركون ويبتلون بزعلجن ماتظلن هنا امشن وجبناها صار سنين على هالرنة شكوى مانكدر نشكي 

حتى ابوي ماتخلينا نوصله حجايه هسه عهد عليه اخلي ولدي حتى على بنات عمهم يحنون 

وراها اني هم ظليت افكر واقارن واشوف فعلا التربية والام هي الي تخلي هاي الاواصر اما تقويها او تگطعها 

وبتحضيرات عقد بطة قررن عهود ومآرب يجن بيوم الحفلة ووگعت كل التجهيزات على هاجر ونورة وابوي وياهن اكيد ماتركهن ابد 

حلا ابنها ميخليها بعده صغير وعصبي يرجف ابجيته ابو خدود بس لو شاف ابويه يظل يكركر والمسكينة تشبع قهر تكول من هسه التعب عليه والدلال الأبوه 

بيومها اجن بالليل متأخر ارد انام ويمي نوره تسمع موال يبجي 

..ولج نوره ارد انام شكو تنوحين ترى دگ ورگص عدنا حفله خاف ناسيه 

..يمعوده سكتي سمعت هالموال عاده ابويه اربعين مره يمكن بهاليومين كل مانصعد وياه يشغله واليوم احمد طلب سيارة صخر وابويه اخذه بطريقنا وصله البغداد مناك ياخذ سيارة البيت اهل علي رايح يمر عليهم علمود يدز مهر خطيبة عمي الي هي خالته وهم يجيب غزالة وياه 

المهم من سمعه ماسكت گل الأبوي انت الواعدت وخلفت ليش تحب تعيش دور غيرك وابوي گله اعرف وسمعي اله

مثل العنده جرح ويدوسه بملح 

وهاي لطش بدماغي وارد واسمعه واركز بي 

..والله الفضول مصيبة حتى اني خل اسمعه وياج عليه 

انوب من سمعته متت قهر اكيد صخر اتعمد يضوجه اكثر 

عادته تلث مرات 

..كافي ولچ الله يكفيج شر الخذلان لتركزين بي 

..اني هسه لاعندي حبيب لا مخذوله وعشت الشعور هو شلون متحمل واحد ليش يعيد مآسيه اذية للنفس هاي 

ورجعت تسمع 

واعدتني الليل لو لملم ضواه

كتلي اصيرن شمعه وابجي لك ضوا

واعدتني جروحي لو عازن دوا

كتلي خذني وشدني لجروحك دوا

جفني مافارك ابد حرفت هواك

شما نهون عليك ياخذنا الهوا

شماتغيب الروح الكاها معاك

ومن كثر ماموت وك عودي التوا

انا خوفي عليك كد امك وازود

من اشوف تغيب يكسرني النوا

انه بجّيت الدمع كد مابجيت

جي شفت بطران يضحكله الهوا

انت ماي الجود والوادم سراب

لو عطش دلالي بس بيك ارتوا 

نمت وهي تسمع گعدت الصبح من وكت وهاجر اجتنا

اخذتهن وراحن للصالون 

امي انهدت تحجي على بطة 

..شنو من بنات طايره بالعرس لاگالت امي لاشرطت حضورها مكيفات خلصن من امهن يخدمن مرت الابو عمت عينا اني وفيحاء شمرضعين

سكتت واعرفها تريدني احجي وتنهد بيه اتصل بيه فارس 

ابتعدت عنها احاجيه 

..هلا حبيبي 

..هلا بروح الروح ..جهزي نفسج تعالي اروي نفسي بيچ ساعتين وارجعج الاهلج واني اتحضر للمشية هم 

..ماتريد تنام 

..نمت ساعتين كافيتني حبيبي راحتي يمج 

..ياروح حبيبتك من عيني ماعندي شي 

جهزت نفسي ع السريع جان برحله هو وبيتنا مابتنا بي بس ليلتين اول ليلة تعبانين نمنا وثاني يوم مر مثل رمشة عين الثالث هو سافر وجابني

وهسه مااكدر اكله لا اني هم مشتاقتله 

امي شافتني اتخبلت 

..عليمن تطلع هي بطة واحجي عليها كلجن ميتات ع الرجل 

..يمه انتِ ماميته على ابوي عليج الله ميته لو لا 

..انعل ابوجن لابو امجن 

عرفت امي واصله حدها سديت اذني وطلعت منتظرته بالباب ورحت 

بس بقيت وياه الحد ماطلعنا مناك متهجزين لكيت امي زايده اعصابها ماناقصه لأن ابوي مخلي المشية ابيته وام البيت حلا 

والبيت مسويته يجنن مغيره اثاثه وجايبه اشكال للضيافة 

وكل شويه كالت وين فيحاء تشوف مدري متشمته مدري مقهوره 

ونوره وهاجر قريبات الها كل شويه تأشرلي شوف شلون معاوناتها

..شكو بيها يمه 

غمتني سكتت 

شويه واجت تسألني 

..خابري وسام ليش مرته ماجايه 

اتصلت وسام گال اتصلي عليها هي زعلانه 

اخذت امي التليفون تسأله وتكله حقها اي والله حق 

سوده عليه يمه انقهرت لا انت لاتزعل تعال واحرج ابوك من تزعل يكيفون 

..شكو يمه شصاير 

..مرت اخوج زعلانه ..نوره ناشره كلايد ابوجن مشتريلهن هي وبطة وهاجر من مجهزات بطة 

وزعلانه تكول مايوم ذكرني بذهب واني جنته الجبيره 

..هاجر اشترالها العرسها لأن صخر رفض السفرة منه وكلها مو من حقه يرفض هديتي الج واشترالها بتوت گلاده واسوار وبطة كل وحده منه بعقدها يشتريلها ونوره ابوي ماهاين عليه بطة تعقد وهي الجبيره بس عرفها هاويه حارث ولأن ابن عمها شاف الزواج افضل لاتكبرينها انتِ ووسام 

..وليش ماودالهم الها والجهالها يشترون ملابس شي تروح تغير شكلها تصبغ 

..يمه رجلها شبيه فدوه العمرج هسه اني اروح ازعل ع عمي لو رجلي هو المسؤول 

..عمت عينج ولج اخوج مايكدر للشغل روحه رچيچه 

..كلشي مابي بس مسختجي 

غمتني وراحت 

كملنا الحفلة تخبل ومآرب علگتها وهالمره غثتهن اكثر وهنه بصفها ويشكن شلون عمار عاف اهله وامه تبجي تناشغ من تحجيها ولا عبالك هي الهججتهم بليل هي وعمي 

كل هذا اتجاهلنا وماردنا نسوي مشكلة 

تاليها انگلبت الدنيا من عركة وسام وي ولد عمي وخاص وي مهاب 

بوقت التقديم مهاب وصخر بينهم يتشاقون ومن راجع كاعد بمكانه 

جايه وسام گايله گوم منا خل اگعد 

مهاب گايله ترى اني خطارك ومو صغير تأشرلي اكوم شوكت تتعلم تحجي عدل وتتصرف 

هو گايله هاي اني لأن محترمكم بس لو صخر كلكم تتلوكون وكايله انت والولد كلكم لوگية الصخر انوب هم ضاربيه وصخر مخليه وراه والرزايل تسوه عمره 

وامي ارتفع ضغطها وماتنطي بي اجه ابوي هم يحجي يكول شكو عمل طايح حظه مسوي الله انطاني عقوبته بالدنيا من صار جبيري وسام 

وامي تسكت طبعا لا بالاخير عاتبته وعيرته شلون تنكل ذهب البناتك وجنتك وكامت تحجي وتخربط باصل خوالها ولونها وگدام نسوان عمي وبناتها وهاجر ضربها وگالخا هسه اطلعين ماتبقين بيوتي كلهن يتعذرنچ روحي وي ابنچ امشي انگبري يمه 

طلعت بعد ماطلعو الفرحه والونسة من عيونا 

وهاجر اني ومآرب بوسناها وگلنالها حسبيها علينا البنيه ماحجت شي گالت شعليكم انتو بيها 

دز عليها صخر وراحو وكل هذا وناسين بطة يم العريس بالخطار گاعدين اخر شي حمزه صايح بحارث يطلع ورزل بطة همين 

من هدأت الاوضاع ضحكنا عليها 

..ماسمعتو الدنيا انگلبت شجاكم 

..والله هو گلي انسيهم وخليج وياي 

ونوره گالت 

..مبروك من صرتي وياه وبعدين 

ضحكت بطة ووجهه صار احمر 

وابويه صدمها من گال حارث ممنوع بعد يجي الخطوبة مو شهر وشهرين ويجي براحته مطوله سنين ضمنج بعد مالها داعي 

....

هاجر ..

سمعت كلشي بس ماانغثين من شفت الموجودات كلهن يگولن هاجر هم مو شويه السواه ابراهيم الها مامسويه الظاهر صدك ابنه اعزهم عنده 

ومو مثل مايحجوون بعلاقته وي ابوه خربانه جانت تكول رزق محد يصدكها نكول الغيره عمتها 

ورجعن بينهن يحجن 

بس هو ميلام وسام مخربط ولايم ابراهيم ولا عبالك ابنه وهذا عند الكل يختلف 

وهي هم بت عاصم وابوها وابوه مااتفترگو العمر كله 

هواي كلام صار خلاني اهدأ وارتاح واني اتبختر بينهم اكثر من ما اضوج 

دز عليه صخر طلعت اضحك 

..شصار گلولي انغثت 

..لا حبيبي اني اغث وماانغث 

..محد محاجيج والله 

..حجو واتورطو عمي سواها طحين فدوه العمره شگد احبه 

..تحبين منو ولچ 

..عمو 

..وابنه 

..اموت عليه گلبي كله اله

ضحك وارتاح بعد ماجانت عيونه تنگط شر 

..طاح حظك وسام خربط الوضع كله 

..عم على رزق وانطردت وياه 

..ابراهيم صاير قاسي 

ضحكت وفتنا 

..عمتي بعدهي ماجايه 

..تبقى يم خالتي هناك هاليومين 

..صخر تحاليل خالتي زينه 

..عدناهن ونشوف اني گلبي مرتاح ماعدها اعراض ويمكن اكو خطأ 

..ان شاءالله يارب 

..خو مارگصتي هناك 

..وين احنا لحكنا نرگص 

..همزين خلي ركصچ الي وبس 

ضحكت وبيومها انطلقنا ماوعينا الا بعد العشا عمي بنفسه جاي يشوفنا اعتذر من صخر على كلام وسام وحجه وغلط عليه ورجعتله نفس القهره ولاول مره اشوف صخر يهون عليه بدل ليحرگ اعصابه ومني هم بليلتها طول يمنا ورجع يسأل صخر وكله 

..اني مااريد اقلقك بس گلبي نار امك لاتخليها 

..مو انت توصيني عليها 

..ميخالف اعتبرني قلق وحدي وارد ارتاح 

..الله كريم 

مرت ايام وعمي ابو ريمه اتزوج وبيومها خالتهن اتخبلت اتصلت بيهن ماخلت مسبه ماسبتها وحتى رقم صخر حصلته تدعي عليه 

اتجاهلوها ومرت ايام وصار موعد خطوبة احمد وعمي قرر يدز مآرب وعهود وشهله يخطبن 

وامهن من سمعت گلبت الدنيا وهم ماغيرت شي 

ورحنا نخطب متوجهين للناصرية بعد مااهلها سألو عنا وردو خبر خل يجون 

يتبع ...

              الفصل التاسع والعشرون من هنا 

لقراءة جميع فصول الرواية من هنا 

تعديل المقال