بقلم نور الشمس
سراب...
ابويه دز علينا يبلغنا بخطوبة احمد ورادنا نروح الامي نحاجيها تحضر بالمشية مالته
رحنا اني ومآرب وعهود اول مره نروح بيت وسام كلنا سوه ومقررين نبقى ع العشه ونطيب خاطرها ونقنعها بكل وسيلة
احمد قافل ع الموضوع وابوي ناطيه كل الصلاحية وگايله بالمهر الينطلب وكل شرط مابي اذلال اعتبره لعيونك تم ومخليه يزيد اصرار علينا ومتخبل ليش امي ماتفرحلي
خطبنله مآرب وعهود خطبة مبدأيه وبعدها ردو خبر ان هم سائلين وموافقين وهنا لازم تروح مشيه رسمية وام الولد ليش ماتحضر يعني محد يقبلها
ابويه يريدله حجة عليها وهي ماجاي تلين ونعرف شلون نقنعها الي مخبل ابوي منها
واصله كلام من نسوان عمامي شلون حاجيه ع شهلة يمهن
شكد حذرناها متحجي الكلام الي تحجيه يمنا وتعيده ع احد لو سمع بيها ابوي مايقبل ماتقتنع
گلنالها نروحلها نقنعها ونرجعها ويانا ابوي كال ماترجع ومكانها بيت ابنها وعود اني ادز مصرفها وياه
اول ما شافتنا بالبداية كيفت عبالها جايين ناخذها ومن عرفت سبب الجية شنو لعبت بينا لعب
سب ودعاوي وحجي ماله كل داعي
گلوبنا خلصت ومانعرف شلون تنلم
طولنا گاعدين وماتقتنع ولا وسام ومرته نزلو بس جهالهم خبصو الجو مكيفين اجيناهم
مآرب تحجي وعينها ع البيت خلتنا كلنا نتبع نظراتها ونشوف
بيت ابويه هذا جديد انطاه الهم يلمع وكلشي مجهز وبيت عروسه جان محضره الحلا وع الجاهز صار الهن
الكاونتر مقابيلنا بابه مشلوعه ومركية بصفه
الثلاجة ماشايفه وصلة المسح من بره مطبعه بأدين الجهال
الدرج هم لوحه صاير الأرضية مليانه علچ متكلس ولونه اسود صاير
بعد فتره طويلة
نزلت مرت وسام المكياج والكشخه الي يشوفها يگول هي وبس ووسام وراها
سلمت من وره خشمها زعلانه ع الذهب الهسه
ووسام گال
..شعجب خاف متيهات هذا مو بيت صخر هذا بيتي
عهود گالتله
..بيتك عامر ان شاءالله
وسكتت واحنا غلسنا
وامي شكتله من احمد ومنا ونزل بينا دوسه ونص ذاك الغلط والمسبة
وعلى اساس احنا ماميتين ع امنا وبس هو مراعيها اخر شي وقبل اذان المغرب بدقايق گال شعدجن ظالات امي وياجن ماتروح ويلا بره
طلعنا مقهورين بس مو ذيج القهره وسام ماعليه اسف نعرفه شنو ولا متوقعين منه زينه من الاساس
ماهضمنا موقفه
گتلهن لاتحجن الابويه شي ومآرب عاندت تحجي كلشي الابوي من حاجته انقهر ومتوقع يمكن
كلها خلص تاخذين خواتج وترحن الشهلة طلبن منها تروح وياجن گدام العالم مثلها مثل امه وگولن امنا مره جبيره وخرفانه ماتطلع
جان يحجي ضايج ردنا منه يأجلها فتره ويروح هو يجيب امي ويقنعها بس قفل ومابقى كدامنا الا نروح الشهلة صدگ
رحنا نشوفهم نسلم عليهم ومستحين شلون نفتح الموضوع وياها
وباستقبالهم النا شفنا شگد فرق بين الاسلوب والترحيب رجعنا من وسام البيتنا من قهرنا مااكلنا ورغم كلنا الصخر متعشين احنا
ماقبل الا وهو يسوي اكلنا بيدنا وياه گال منا لليل تجوعن سهرن هنا والليل كله عشه
هو و هاجر حضرو كلشي واحنا يم امه گاعدين
اخرها مآرب وعهود استحن يحاجنها واشرلي على اساس اني علاقتي بيهم اقوى بعد
وفعلا حجيت وياها بالبداية اترددت وگالت
..اني عمري كله هذا مايوم حاولت اتصادم وي امجن ابد رغم المشاكل الصارت مو شويه بس دوم انطي من نفسي ومااصادمها ليش مخليتلها خصوصية هي الاولى وانه الاجيت فوگها حتى لو ماجنت ادري ومااريد اقهرها ..واحمد ابنها وحاسبته ابني والله اعزكم كلكم على معزة صخر بس مااريد انحط بالوجه اعتذر منجن
..يمه والله ماتقبل اتوسلنا ردنا لا هي تقتنع ولا هو
يگول مااعوف البنيه اريدها ..وامي الماتخليلي خاطر مو لازم تحضر ..واهلها عشاير مايقتنعون بس احنا نروح لازم مره جبيره ويانا ومانلگه احسن منچ
واحنا نسولف صخر صاح هاجر وگلها بدلي ملابسج ولبسي حجاب احمد على جيه
اخواني مامتعودين يفوتون بيت صخر بس حمزة
لهذا عرفنا ابوي موديه عليها هم
اجه. ويانا وسولف هواي وقنعها وظلينا يمهم الوكت متأخر بالليل حتى نوره وبطه اجن
وقريب لدعش مدو السفرة مسوي خير من الله مشويات ومقبلات
وبيومها قررنا نبات يمهم والسوالف اخذتنا سوالف وضحك النص الليل احمد وصخر انطلقو واحنا هم وسولفنا بهواي امور من ضمنها ابويه والسنين المرت وشلون اتغير
قريب الاذان الفجر اتصل ابويه بأحمد فتح خط وحاكيه
..انت وخواتك وين
..ابيت صخر يابه
..وشوكت ناوين ترجعون وتحجولي الصار
..الصبح نجيك ..ترى بعدنا مانايمين والله اكيد حضرتك شبعت نوم وگعدت
..مانمت منتظركم منين يجي النوم منك من امك
..تريد اقسم واثبتلك لا اني ولا امي ابالك وبالك يم غيرنا والله
..انچب وتعال وخلي بس خواتك هناك يجن على راحتهن
نهى الاتصال وگال
..امري لله نامو انتو
صلينا ونمنا ودعوات شهلة شگد حلوه چان النا نصيب منها
بعدها نمنا الصبح گعدنا منريد نسوي هوسه اليوم جمعة وعطلة صخر ردناه ينام براحته
عهود بس گعدو جهالها گالت يلا نروح هناك اني اريكجن يم ابوي
كمنا نغسل ونلم الفراشات وريحة خبز التنور اجتني طلعت اتأكد لگيته خابز ومخدر الچاي ع الجمر نزل نگابه وذب الغترة وشالت الخبز هاجر تفوته
صبحت عليهم مبتسمة
..صباح الخير ..فدوه ياجمالكم الله يحفظكم ويسعدكم
هاجر ضحكت ولمت شفايفها تبوسني من بعيد وهو صبح عليه وسأل ع البنات
..ماردنا نگعدجن اني وهاجر البارحه وجه الصبح نمتن
..كعدو الجهال شبعانين نوم واني هم متعوده اسهر واكعد من وكت عادي
ريكونا انتبهت امه متأخره بنومها وشوالها طماطة شوي
الظاهر مسويلها حمية بسبب اخر تحاليل انعادت مرتين والانزيمات مرتفعه وعلاجها حمية گالوله وميعرفون شنو سبب ارتفاعها الهسه رغم سوت فحوصات مره ثانية
كملنا الريوك وهاجر ماخلتنا نمد ادينا وياها بالبيت شويه ورحنا
ابويه گال غداكم ابيتي هناك
ضحكنا
لو طاردنا وسام من زمان على عين طردته شبعنه عزابم خاص اني الاكل الماتعبانه بي ومتشبعه بريحته اكل براحتي منه والبنات متعودات مآرب وعهود خاص بعد زواجي من يجن هنه يلزمن الشغل هالمره ادللنا
لگينا حلا والبنات ممقصرات اشكال مسويات بقينا يمهم للعصر واجه حمزة نازل وقررو اهلي يطلعون الضحا حتى يوصلون بعد الظهر مارادو يكلفوهم بغدا
ابويه ماخذ هوايه ناس عمه وعمامنا منا وولد عمي ومناك خوال صخر متحضرين من نطب يتلاكون وياه ويطبون سوه
اني بقيت لأن مااكدر اروح طريق طويل ومتعب عليه وفارس هم ماقبل يخاف عليه وهو اصلا صادف برحلة ماموجود
وبيوم الراحو اجت امي ولكتنا اني واخواني الصغار وبطة هم حارث ممخليها بس هي اتعذرت متريد تروح تتعب
كتلها ماله حق حارث يمنعج بعدج ابيت ابوچ ليش وافقتيله واحنا نحجي وهجمت علينا امي
مامصدگه راحو يخطبون وهي ماموافقه وظلت تدعي وتحجي وكل شويه وگالت الله لايهنيك يااحمد ياابن بطني الله لايهنيك بيها
بعد مامليت صحت بصوت عالي
..كافي تدعين كافي بطريق هم لايصير بيهم شي
احمد شلون تدعين عليه شلون يهون عليج
هذا احمد ابو روح الحلوه الطيب الحنين ليش هيج يمه شجاج
شوفي الامهات شتدعي الولدها وبناتها شنو تسوي من اعمال تحفظهم وترزقهم انتِ تدعين
شالت نعالها شمرته عليه وگالت
..ابوچ فرحان موو جعل لافرح ولاشاف الفرحه ولاطالتله
احس گلبي انخمش
مشيت عنها بعدت فتت الغرفة الولد وسديت الباب عليه
يارب هذا ابتلاء امي هاي امي لااكدر انهرها واصيح ولا اكدر اصبر گلبي راح يطگ مدري شصار بيه روحي بدت تنسلب مني اتمددت اريد دگات گلبي تهدأ شكل ويايه خفقان عبالك
اقرا ايات وامسح على گلبي
شوكت يجي فارس اريد اطلع منا ماابقى
شويه واجتني بطة
..لاتنقهرين شتسوين قسمتنا هايه ..هسه اني مااعرف هو صدك ابويه سبب تعاستهن وتعاستنا لو هو حظه جابهن اله واثرن عليه والله قهر
..كلهم طبيعيين اني التعيسة شجابني بيتي الي ومجبوبه هناك وعمي كل شويه يجي يشوفني ويسولفلي ذيج السوالف الحلوه عن حياتهم قبل وعن الزرع وهالامور شعدي راجعه للضيم هذا المن
بس خل يجون والله بعد ولا اجي غير الساعة ساعتين وبس بس امنوكم يمي مااكدر امشي هسه
امي وين راحت
..راحت وقفلت البوب لايجينا وسام يبيع بطولات بروسنا
...
هاجر
اني وعمه شهلة ورشا ومآرب وعهود بسيارة صخر
وعمي وياه حلا وابنها واحمد والبقيه كلهم شباب علكوها الطريق كله يركصون
الطريق طويل ورشا تضحك تكول وصلنا نهاية الكرة الارضية وبعدنا ماواصلين
اكثر من ثلاث ساعات ونص تقريبا وصلنا
دخلنا المدينة الي دائما تحجي بيها بنين
مدينة حلوه مبينه على بساطاتها بس وجوه اهلها احلى واستقبالهم وترحيبهم ماله مثيل
المهر جان عمي واحمد مخلين ابالهم يطلبون مهر عالي بس المهر چان مقبول وكلشي تم بسلاسة وراحة
وصارت بنفس اليوم مشيه وعقد ولبسو بس حلقات
اني وياها بنين على طول
وانبهرت بجمالها بالعقد طالعه تجنن واحمد طار عقله
شكلها مختلف نهائيا بالبدلة وشعرها الثخين الطويل بدون صبغ چان لأن اعرفها ميمر اسبوع اذا متخلي حنة لونه على حمار صاير وبي لمعة تجنن
ومن شافتني هي هم نفس الملاحظات شافتهن عليه ما جانت تظن شعري سرح حيل وطويل
امها من الامهات الاوليات وجهه عريض احمر وتخبل
الي يشوفها يكول بيبية بنين مو امها بس الظاهر جايبتها على كبر
شكد ردت اشوفها بجياتها الها بس ماصارت فرصة وهسه شفتها حبيتها حيل وهي هم تعرفني من سوالف بنين والصور وسؤالها عني وسلامها چان يختلف
وبنات اخوها البنين شابات متوسطة واعدادية واقاربها هوايه موجودين الحفلة جانت حلوه حيل وبسيطة
العصر نريد نرجع ماقبلو نطلع قبل الغدا الحد ماادخلو خوال صخر وحلفو الذبايح انذبحت والكل متحضر
وهنا جانت صدمة النا لأن ابد مامحسبين نروح الخواله خاص بنات عمي ابراهيم ورشا كلش استحن ورادن واحد من الولد يرجعون نرجع وياهم خاله وولد خاله قفلو ع الكل
چان ابالنا بنفس المنطقة بس مشت السيارة بينا وين بالساعة ونص تقريبًا
ودخلنا مدينتهم لگينا الشباب كلها بره متحضره دشاديشهم بيض ترفرف وسبحهم بيدهم
بس شافو سيارة ابوهم بالمقدمة
اتقدمو صوبنا
سلامهم وترحيبهم للكل بصوب وسلامهم العمتي شهلة من نزلة بصوب
وهم يصيحون
..هلا بعمتنا وكل الجاينا وياها ..كل الهلا بشيختنا
..يابعد عمتكم فدوه الطولكم يحرسكم الله ويحفظكم فدوه اروحلكم
نزلنا ولاگنا نسوانهم بسلام حار ووجه يضحك
والولد وكفوها بالحوش وامهم ويعتذرون من عمتي يكلولها ترى عزيمة عروس صخر ابالنا بس گايل الخاله اجلوها
اباوع عمي وولدنا كلهم بالديوان راحو معزول عن البيت واحنا واكفين وي عمتي بالنص انتبهولنا انسحبو وراحو واحنا فتنا جوه الشفته بناتهم صغار والكبار بس شبابهم وجناين هوايه بالبيت والعرفته هنه جايات من بيوتهن هنا جناين البيتين يعني خال صخر الصغير هم يم اخو الجبير جاي هو وولده وعوائلهم
تعبانين جنا بس بيتهم مريح ريحنا وگعدنا وظل بالي يم صخر
ماماكل شي نزلو الكل بمطعم وهو مانزل بقى ياكل كيك مسويه وعصير برتقال عاصره بأيده واني وعمتي هم مانزلنا وياه
اني مااريد احسسه مختلف عنا وبديت الح عليه اشاركه من يسوي شي بحجة اقربله ابوسه اناوشه شي
اكله اثرملك او اخلي ايدي بشي بس اشوفه يرفضةومايتقبل
مرات اضوج ومرات اكول شويه شويه اعوده بس الموضوع من افكر بي يقهرني حيل
عمتي شافتني صافنه سألتني
كتلها
..صخر ماكله وماراح ياكل
..لا خواله يعرفونه وتلكيهم محضريله عدة الشوي
ارتاحيت عليه ومن مدو السفره اكلت براحه واني مطمنه واشوف البنات هم مندمجات وبدن يشيلن ايدهن من السفره شبعن بس منتظراتنا نخلص كلنا
شويه وابن رشا بحضنها اختنگ الولد حتى صوت ماطلع منه تهز بي تحرك ولا يمه اتخشب شالته بخرعه وركضت بره تصيح
..صخر اخوي الحگلي ابني مات بيدي
كمنا وراها كلنا مآرب وعهود يصيحنها يردن يشوفنه
اسمع هوسه صارت يمها بره صوت شباب ونسوان خالهم هناك
البنات استحن يطلعن اتجرأت اني و طلعت اني وراهم حجابي كامل
شفته بأيد شاب جكارته بحلگه وبكل هدوء مخلي ايد جوه صدر الطفل وايد يضرب بيها ظهره
رأسا ذب گعم خياره من حلگه
اتنفس الطفل وبچه وهي شبعت بچي
وصوت صخر اجه من بره فات بخرعه يسأل
..ها روشه شبي ابنچ
شبعت بجي والولد جكارته مانزلت من حلكه يحجي وي صخر وجءبني منظرها شلون مسيطر يسولف وتتحرك بحلگه وماوگعت
..ماكو شي الجاهل غص واتلاحگته
صاح امه
..يمااا ..ام اسعد امي شربيها شي حلوو البنيه هبطت
طلع وصاح الجوه
..ام حسن استعجلن بالچاي بساع
رجعنا جوه وبنات عمي وعمتي شهلة يبوسن برشا وابنها ويهونن عليها وامه تتوسل نكمل الغدا كاللها مكملين لمن عمتي شهلة شهدت يلا اقتنعن وشالن السفره
بهاي الليلة بتنا وبالليل تليفون رشا ماسكت من الرسايل والاتصالات
كالت عثمان عارف بيه جايه وكام يمسلت مصدك نفسه بعده زوجي وطالعه بدون علمه يدور اذن وخشم البطران
شويه وصاحها صخر
طلعتله بالحوش كالت يكول عثمان متصل بي ومهدد ياخذ الطفل ومااعرف شحاجي صخر ماراد عليه بس بأي وميخالف وسهلة لأن يم خواله وولدهم ماحاجي بس كلها اتورط واتصل على ابوي مسح بي الگاع بداله استحيت شجابره ع الاهانه
رشا كيفت لأن عمي ابراهيم مطيح حظه ورجعنا
بناتهم وجناينهم كملن شغلهن وگعدن ويانا سوالف وضحك بس صوتهن ناصيرحيل رغم هم مو يمنا بس خايفات من الولد
شويه واجه طفل عمره تقريبا اول لو ثاني ابتدائي بس تصرفاته طفولية كلش وميحجي شي كله يأشر لو بس صوت
اني اجه ابالي اخرس بس من مآرب انتبهتله عمتي شهلة گالتلها
..هذا ابن اسعد خطيه مربيته بيبيته امه اطلكت من عمره اشهر وهو بي طيف توحد
ضاجن البنات عليه ورشا سألتهم عن دراسته لأن هي معلمه كالولها ممسجليه متقبله المدارس اليمهم يومين تلاثه ويطلعوه
واستمرت المواضيع الحد وكت النوم فرشو للكل وكالت جنتهم
..عيني يالسمره انتِ مو هنا انتِ ورجلچ لبيت فضل تباتون فارغ الكم عمي ماقبل يفرگكم بعدكم عرسان
استحيت ومااعرف شگول طلعت بره بالحوش انتظره گالت راح يجيج وتليفوني بيدي خابرته شفته اجه من الديوان هو وياه عمار يحاجيه ويضحكون
گالي
..رجعي جيبي مآرب وياج
وعمار صاح
..لك لا شبيك عيب من العالم انام يم عمي ابراهيم من ريحتها
حجاها وضحك ضحكه قويه
وصخر اشرلي اروح ورد متجاوز كل الخطوط
...مع احترامي الفارق العمر والسنين البينا بس انچب اني صحتها حتى اخلص من حجيك هذا وهم اعطف عليك توك نازل ومامفتهم شي
..وكت تتذكر من جانت تلعب نفسك
..وحق الله لحد هسه هم تلعب نفسي منك ومن غيرك
ضحكت ع عنادهم وراح صوتهم مني اشرت المآرب تگوم
..وين ولچ
..انتِ وعمار ويانا
..عززة يم صخر لو اموت خليني هنا كولي لكيتها نايمه
..هو صخر دزني
وعهود حجت عليها كالتلها
..روحي
وعمه شهله هم ادخلت وحتى زوجات اخوانها
انجبرت مآرب تگوم وطول مانمشي مارفعت عينها وراسها
ولگينا البيت نظيف ومعطر يجنن ومليان فرش ومخاد ومبرده بالهول وسبالت هم مشتغلة
اخذنا غرفه وماصدكت اذب عباتي والملابس وبقيت بس بشورت وسترابلس وختلت بفراشي
فات هو سبحان واتمدد وسحبني عليه
..مشتاااق هواي
..اليوم ماشفتك هوايه شو عبالك الاحداث هوايه واليوم طويل
..لأن خلص وانتِ بعيده من احضاني
..هم صح ..يعني مو لأن فارين الدنيا كلها
ضحك
..شو صايره مو خوش انتِ
قربت عليه وحاطته بأديه ورفعت راسي احاجيه وعيوني بعيونه مبتسمه
..ليش شسويت
..بعد هالحضنه ماكو سبب انتهى
..احمد شخباره
..احمد مات يريد يطلع بينا بالليل علمود يخابر براحته
ضحكت
باسني واخذتنا نومه قبل الفجر الكل اتهجزنا نطلع وطلعنا الحمدلله وصلنا بيوتنا من وكت ونمنا نومه طويله
الله شگد حلوو واحد يرجع البيته ومكانه يرتاح من اول ثواني
العصر گعدنا على طلايب عمي عثمان اخرها صار يهدد ويتوعد وعمي ابراهيم گاله شتريد تسوي سوي
ولدوخنا بينا وبينك المحاكم وبس انت بعد عمي وعاصم مالك جبير والماله جبير راسه براس البصل
بيومها صخر رجع يضحك يگول ابراهيم بطولاته زادت هالفتره
ضحكت وكتله خوالك متعجبين على حلا وابنه الصغير خاص من بجه وعمه شهلة متنته وكالتلها ممتون شافن علاقتهن عبالك اختها
..اني يم الولد واجن نسوان خوالي يسولفن وهم ناصبين على رنا يكلولها محلوه العرس اذا هيج يحلي شكو مكابلتنا سنين من زمان وسويها كالتلهم مابيكم واحد بي خير مثل صخر زوجني عمه
خوالكم شگد ولا واحد منكم اتحرك
ضحكو يكلولها مو من صالحج لو متحركين
..مبينين اريحية حتى البنات وامهاتهم
..خوش ولد
..شو عمار ومآرب كعدنا مالكيناهم
راسلني يسب يكلي هججتني بليل اختك خل نطلع قبلهم ماابقى واطلع وياه
..اكووول عرفتها والله ولامتوقعه مآرب هالگد تخجل
..لأن علاقتنا انبنت بالجديد ..بس عمار لا هذا اقرب من الكل الي بس حمزة اقرب واحمد من كبر بدا يتقربلي وصار اقرب من الاثنين هسه بحكم دوامهم وانشغالاتهم ..احمد على طول وياي
..وسام شعجب هيج بعيد عن الكل
..وسام ابن الماما ..وهم ابويه چان يظن بدلاله اله يخليني اغار واتقربله بس الي صار العكس وهو الدلال تلفه
..عمي مدللهم كلهم اني عشت وياهم وشفتهم
..عمج حنييين مو بيده
..حتى انت يعاملك بشكل مختلف عنهم بس ماناطيه مجال يدللك
..مااريد دلاله الله يحفظه العبوسي وامه ..وهذا ابو خدود شفته اليوم صدك حلوو جان بودي اخذه اعض خدوده بس عيب من امه
..والله حلا فد حبابه متعرفها جان طارت من الفرحه لو ماخذه ..لأن هي تقدرك هوايه
..شمعنى
..مااعرف بس يمكن بسبب كلام عمي عنك تتمنى تتقرب الهم.
..هم الله يحفظ ابراهيم الها
ضحكت
..عمتي هوايه نامت اليوم من رجعت الهسه كعدت نص ساعة ورجعت نامت
..تعبت خاف؟ هاجر لتخليها تنام مو زين اطوول هالكد بنومها اني مخوفني كبدها الانزيم من يرتفع لازم اكو سبب الطبيب گال خاف بداية تليف بس جان احتمال ضعيف والهسه اخذنا مجموعة من التحاليل للمره الثالثة نريد نعرف السبب ونعالجه
..والله خوفتني انت ليش ماتحجي بهالموضوع وياها بشكل صريح ومركز كلنا ع العلاج
دنگ راسه
..اني اخاف بكلشي مااعرف الخوف والله بس وي امي اكبر جبان اني ..امي مو بس ام امي دنيا صديق واب واخت وكلشي صارتلي وشافت مني بعد وشافت مني جفا ماشفتها بيوم زهگت لو عاتبت لو تغيرت لحظة عليه
ابسط شي اني اكل اديها الحلوه رفضته
اكو عاقل ماياكل من ايد امه ..اني اتخبلت بذاك اليوم ومااكلته ولليوم ماگدرت وهي مايوم حرجتني وطلبت مني انجبر اكل لو استعطفتني بدموع حتى هي صارت تاكل من ايدي وبعد كل اكله تدعيلي تخليني يومي كله سعيد ومرتاح
والله مااتحمل افكر فكرة امي يصيرلها شي واراجع وگلبي مقبوض وكل دخول الي الطبيبها بانفراد اخاف اكو شي مامبلغها بي يريدني اعرفه اموت الف موته
وماارتاح الا من يقسم لحد الآن ماكو شي خطير
والهسه اني مامرتاح ومراح ارتاح الا اعرف سبب ارتفاع الانزيم
..ان شاءالله ماكو شي اصلا احس هالايام احسن هي بهوايه ع الحمية
..اي اني هم لاحظت بس يمكن تعبت بالسفره
..حقها هو احنا ميتين تعب
ثاني يوم اتصلت ابنين وبدينا نحجي انطباعات اهلنا عن بعض
وجانت هي كلش فرحانه ع الهدايا الي محضريها الها وي الحلقة فستان وعباية رأس نوعية زينه لأن هي تلبس عباية راس ومحبس ذهب وعلب مكياج وهذا تحضير احمد والبنات وياه
..حبيت امج هوايه
..سكتي هي ماتت عليج والله من زمان اني حاجيتلها عنج البارحه تگلي المعسولة شكثر تنحب
..فدوه العمرها ان شاءالله اشوفها بالافراح ..شكالو اهلج عن امه مريضة ومااجت
..عادي ماعقبو من شافو علاقة عمتج بزوجة ابوه الصغيره گالو الظاهر العلاقات حلوه
ضحكت لأن هي تعرف امه زعلانه بس جانت تعرف زعلها الغير سبب من ورايه يعني مو بس لأن معارضه
ورجعت اسألها مضيعه الموضوع
..شلونه احمد وياج
..فدوه العينه يجنن .
..هو غير ضاج لأن بقينا هناك ومارجعنا يريد مكان يتصل ماكو
..ههههه خلصها يراسل ..والله ابويه واخوتي ماقبلو رادو عشاكم يمنا
..ماترهم بعد
..ان شاءالله ع الجايات نضوگكم كباب القلعة الماكو منه وگيمر القلعة الي ماكو مثل طعمه ابد
..ان شاءالله الايام هوايه والافراح اكثر يارب
..انتِ شخبارج
احاجيها ورشيت مي بيدي ع الحديقة ريحة التراب اخذت روحي بحيث هي تحجي واني فصلت مو يمها واخذت مي وارش بمكانات ثانية واشتم
مارجعت وياها وانتبهت الا من صاحت
..ولج هاجر وين وليتي شو اسمع صوت تتحركين بس احجي وحدي ..شنو صرت مرت حماج وبدت حركات التسس وحگرتيني
..ههههه عابتلج ولج والله فصلت من ريحة التراب تجنن
..اليسمعچ يكول ماشايفه بحياتها تراب وتوها مكتشفته
..تورطت اكلتني بلسانها وين اكدر للسانج اني الله يساعد احمد
..بس لاعبالج احاجيه مثل مااحاجيه ..لاحياتي كله برقه البارحه اخويه فجأه فات هز ايده يكل الامي هايه منو تحجي شلون اتحول صوتها من جبار المرفت
ضحكت
..يجي يوم ويطاشف الحقيقة
..لا والله مااحب اتصنع اطلعهن اله كلهن مااخلي
اتصل عليه يلا استأذن
نهت الاتصال ورجعت رشيت مي بعيد وشمرته ع الحايط ورحت اشتم
..الله شگد طيبه ريحته
واخذني شعور الحاجه والشوق ورحت ابحث حساب امي رفعت عنه الحظر وراسلتها
يوميه صخر يكلي حاولي تصلحين علاقتج بيها امج تعبت عليج سنين متعرفين شنو واصلها وشنو تحس ويمكن سوء تفاهم او سوء تصرف بس مو جريمة
انتظرت منها رسالة وانفتحت الباب فات جاي من البستان وبيده سلة مشكل بيها مخضر وفواكه من الكاع للبيت جايبه عكد حواجبه من شاف البطل
..شتسوين شو ترشين
..اي جاي اسحرلك
ضحك
..اقوا من هءا السحر هذا شتاخذين مني بعد
..اخذك كلك
اتقربت عليه اخذ السله وهو باسني
..متت بريحة التراب الله عليك اشتمها
..ياحبيبتي اني شابع تراب وطين اريد اسبح هسه
امي وين
..جوه عمتي اتابع مسلسل النبي يوسف
..اليوم عشانا من وكت ارد اطلع وي الولد مهيب عنده موضوع وياي واشوف حل وياهم السالفة عثمان هم
..شبي
..يطلگ بالتي هي احسن افضل اله كافي طولها هواي
سكتت وبگلبي خايفه خاف يدخلوني
لگيت امي مراسلتني
بعد وكت شوكت جنتي ناويه تحاجيني من تحبلين وتصيحين تعالي ستريني
..اسم الله ليش تسرتيني بايگه قابل غير متزوجة على سنة الله ورسوله
رأسا اتصلت
..متزوجه هجوره والله
..هلا ماما اي والله اتزوجت
سمعت بجيها ومناشغها تشهگ بحرگه وقهر كسرتلي گلبي
..والله جانت امنيتي انتِ وياي وابلغچ بس انتِ كلامج اذاني هواي بآخر تواصلنا
..ليش هيج هذا جزاء تعبي تتزوجين وماتگولين عندي ام ابلغها
..ليش انتِ من دزيتيني هنا شعرفتي ..عرفتي شراح يصيرلي منو يوگفلي منو يظلمني شنو مر عليه مامر يوم ووجعج گلبج وجابج اليه
بجت اكثر
..انوب عليه اللوم مو ردتلج قيمة يم اهلج افضل اهلي حاربوني بيج اخر فتره وهذا الرجال المسكين المنتظرني سنينه كلها واني اماطل علمودج وجان ابوج موجود اني ادري بي اجله يصير وبعدها كلها نصحتني ابقيج يطلعلج حقج وهم لزمونا من ادينا بالشكوى اما يتنازلون من خالج وزوجي بتنازلي عنج واضطريت انطيهم وعد ماارجع اخذج ..بس عبالي سباعية ربيتج اني تكونين قويه ماربيتج تاخذين فلوسج ويطمع بيهن ابراهيم
..ابراهيم شعليه بفلوسي ياامي الفلوس موجوده بس ماعوضت عنج ولا عن ابوي العوضني شي واحد
صخر عوضني
..هذا هو ماما الف مبارك ودزيلي رقم زوجج اوصيه عليج
نهت الاتصال بزعل وبرود بس كلت ابقى اتزاصل افضل وارجع احنن گلبها دزيت رقم صخر
وهو استعجل خابروه راح بدون عشه سويت الي عشه والعمتي ونسيت ابلغه باتصال امي ورقمه الاخذته حتى تواصله
عمتي حست عليه وبعادتها دائما تغير الموضوع وتاخذني المكان ثاني بسوالفها
قربتني عليها
..تعاي ياحلوه ..انتِ هسه مو چنه انتِ بنيه واكثر ..احجيلي صخر زين وياچ
..والله ورد صخر زين وفوگ الزين
هو غير امه شهلة
..يم ام السان معسول ودم يلعب اكو واحد مايحبج انتِ هو صخر وبس انتِ فسرتيه
ضحكت
..علاقتكم طبيعية لو رجع يكش
..لاعمه زين والله طبيعي
..الف الحمدلله
انطيني فراشي اتمدد
..عمه ليش هيج صايره هوايه تتمددين
..والله يايمه افحط وگلبي يرفس لو گمت.. واحس الصخونه مكسره عظامي يمكن ماخذه برد
..هاي توها لو دوم تصيرلج تروح وتجي كل فتره
بس صايره هوايه اعرگ وضغطي يهبط
..ليش ماتحجين الصخر عمه مو كل شويه يسألچ
..انتِ ماشايفته من يسألني غير عيونه فاره ومغورگه يمه ابني مااريده يخاف كلشي مابيه التهاب هاي يمكن من بلاعيمي وتنزل الصدري لأن من اخر مره شكل ويايه التهاب قصبات وكحه كوه عالجتها وظلت هالحاله تصيرلي
..عندج العافية ان شاءالله
ظليت يمها اباوع وياها مسلسلات ومقرره من يرجع اگله بس رجع صاير نار
....
رشا..
طلعت وي ابوي البيت ريمه مشي هالايام ولادتها وبابا راد يشوفها
وشفت بيتي من بعيد انسلبت روحي واني اباوعله
..كل امنياتي واحلامي انهدت وانت شامخ
جنت اخاف على حيطانك وبيبانك وماحاسبه انت تسلم وحياتنا هي التنهد
اخاف من الرطوبة والماي الزايد من جاهل يجينا وبيده يشخبط ويطبع امسح وارتب واعدل وناسية روحي ترتيب حياتي وين جان
اني ليش اتماهلت من اول هفوات ليش هيج وصلت الهالمرحلة
واني امشي اجاني الهاسكي طاير من باب بيتنا يرگض ابويه اخترع رجع يريد يضربه برجله عباله يريد يعضني
شافه بين رجليه مخلي راسه يتودد
نزلت دموعي
والله جنت اظن مبالغه من يكولون الچلب اوفى من بعض البشر
هذا الهاسكي مال عثمان جنت اوكله وانطيه مي بغيابه ومن بعيد لأن استنجس اداريه واحاجيه من بعيد مالامسته ابد اخاف هم
فرته وركضته عليه خلتني ابجي ومااخجل من ابوي يشوف دموعي هو هم كال
..هذا الچلب اوفى من رجلج
وگوه مشيت يعني اكو امور ماردت احجيها الكل احد هي بينا بس لو يموت مايلگه انسانه وگفتله مثلي
فتنا الريمة وبناتها وفرحتهن بيه وبأبتي وابويه نستني كلشي
وعزام هم گال عثمان محاجي مهيب وعنده شروط ومدري شنو مهيب ماقابل بحجيه وطلب نجتمع ونحاجيه كلنا بموقف واحد هسه صخر بلغنا نجتمع ونشوف القرار الاخير يم عمي ويمه
اخذ ابويه وطلع وبالليل اجه ابويه وصار القرار
راح يكلك بدون اي عرقله البيت ابويه يدفع فلوس النص الثاني ويحوله باسمج
وابنه يشوفه يوميه ساعتين
ماقبلت بس ابويه ماقبل كال ابنج يحتاج ابو معليه بمشاكلكم
واخوج هلك من المشاكل كافي عليه مشاكله بنص كعدتنا واتصلت ام هاجر حارت شحجت وهو اتخبل وصار عصبي وردها بكلام قوي وماقبلنا عليه طلع من يمنا يفوور وصيناه البنيه مالها ذنب
كافي الخاطره اطوي سيرة عثمان كلها
سويت مثل ماراد وسكتت وبالي يم صخر ..وبعد ماجان الموضوع هم وخلصت منه
ماارتاحيت وانقهرت على نفسي والحياة الوعدني وانغريت بيها رجعت وبوكت النوم رن تليفوني
جاوبت وبالي هاجر لو صخر يبلغوني الصار متعودين يحجولي حتى لو عرفت من غيرهم
اجاني اتصال عثمان
..رشا ذكري الله وايامنا الحلوه وخلينا نرجع
كعدت الحيلي والخيال عكسلي كفشتي شكدها عبالك سعلوه هبطت الشعر بيدي وحجيت
..شنو يمه مصخن فاقد الذاكره لو شنو
..احجي صدك والله احبج ومااكدر من دونج والله مااكدر
..اي عزيزي صدك جذب هسه اني الفرحة ماسايعتني الله عليك ناوي ترجعني ..الوكت متأخر المفروض اهلهل بس خاف عيب من جدي
كتلي تحبني زين وخطيبتك المصون ؟
سكت يفكر عبالك
..ها شو سكتت شراح تگلها
..اني من البدايه بلغت انتِ ام ابني واحتمال ارجعج ماافرط بيه وبأمه
..ام ابنك كلت والخاطره احتمال نرجع ..عليك الله مقتنع تسولف هالسوالف عليه بهالليل مقتنع اقبلك
روح اتزوج وكمل الطلاگ اني هم ذوقي اتغير
..طاح حظج ماتنعدلين
..لو عدله الله ماجابك انت وعواجك الي بس ذنوبي هواي ويراد استغفر
نهيت الاتصال وثاني يوم لكيته كايل العزام تكلي ذوقي اتغير واريد واحد اسمر
عزام مرزله وكايله مستحيل هالكلام يطلع منها وكافي عيب تخرب وي الكل طلك ونبقى اهل
وكم يوم فعلا اطلگنا
رجعت فرحانه لأن شفته مقهور حيل وعلي اخوه وياه من بعيد يشمر وانغسل غسل من مهيب
صخر عنده مراجعه العمتي ضرورية بعد رجعتنا اتصل وصدمنا من بلغنا راح يدخل بعمتي شهلة مستشفى عدها تعفن بالدم مسببلها مضاعفات بدا تأثيرها بالكبد واذا ما اتعالج يهاجم بقية اعضاء جسمها
ابويه اتصل بعمي ابراهيم وبلغه بالموضوع الظاهر عمي مقرر يروح يلحگه وابويه طلع وياه
يتبع ...