بقلم نور الشمس
....
ريم..
الف الحمدلله بعد مااستقليت ابيتي وخلصت من الحجي والتدخلات.
هوايه اتغيرت حياتي للأحسن حتى بناتي بديت الاحظ سلوكهن اتغير.. بطلن عناد
ومن احاجيهن ياخذن بكلامي عكس قبل شأحجي ولا يهتمن يشوفن الجهال.. لو واحد من عيالي يدخل ويكول خليهن
رغم هي كلمة بسيطة بس تمرد الجهال بشكل ماينوصف وبالأخص سارة حسيت مشاكلنا قبل تنعكس عليهن والتفرقة الي تصير يحسن بيها
عزام بعد ما چانت ونسته بره البيت صار كل وكته يمنا ..عبالك توه لاگينا چان يشرد من المشاكل والكلام الي يغثه قبل ميغثني
اول فتره كلت بعد مااروح البيت ابويه خاص هو يومية يمر عليه يشتري للبنات ويشوفهن ويشوفني ويروح والبنات اكلهم انتم تعالولي بعدين شفت هالشي غلط بيت ابوي اروحله بكل وقت مو من حق احد يمنعني واذا ابتعدت اني تستخدم نفس الطريقة وي خواتي ومادام غزالة موجودة غلط نتركها خاص هي كلش حساسة
بس علاقتي ابيت عمي مارجعت..
لا هم اجوني باركولي ولا اني وصلتلهم.. الاجو بس عمار ومآرب باركولنا وجابو هدية وباقي اخوته هم ساعدوه ويمرونا ..بس لاعمي ولا عمتي ولا خواته وصلو
وعلى هالأساس ماگمت اروح ونهيت العلاقة .. مرات اضوج من ياخذ البنات وياه وودي اعترض بس مااحب المشاكل وياه بهالخصوص خاف يتحسس وتصير مشاكل مااريدها
رغم باقي بگلبي منهم ومن تفرقتهم ودوم اذكره واكله منو رايدهن حتى تاخذهن الهم..
بعد موقف صخر وي رشا .. هي هم ماقصرت وياه اشترى السيارة اخذنا ونسنا . وعزمنا على يوم الجمعة
من الصبح خليت عزام قبل لايطلع الشغلة يوصلني البيت عمه شهلة اخذت غزالة بطريقي وانتظرنا رشا تجينا
ورشا لأن موظفة ومتعبها الدوام الجمعة تنام بيها على راحتها خاص حملها متعب ومتعبها
عفناها مالحينا عليها بيت عمة شهلة مثل عادته ينگط نظافة على طوول ايدها بي
و الأكل هو طابخه بره على الحطب دائما الأكلات التحتاج نار هادئة بانيله بره ركايز للجدر من طابوگ ويطبخها بحطب
مالگينا بس المواعين والسچاچين المشتغل بيها غسلناهن وغزالة سألت عمه
..عمه صخر هم يحتاج غسل كوي اكمله قبل جية رشا ونوره نريد نتفرغ للسوالف والضحك
انطتها عمتي كم قطعة كوي وراحت تكوي
واجانا صوت عهود
واولادها
مدري شنو من شعور اجاني هالبيت الي سنين غلفة السكون
چان بارد وباهت من بره بس هم يحيطون الي يفوتله بدفوو عجيب
بوكت صخب الأجواء حواليهم هدوء بيتهم قاتل
بفضل الله سبحانه اليوم نشوف الكل جاي يحس باغلاطه اتجاهم واجواء هالبيت انتعش بمحبة
عهود بالذات چانت تتعقد من سيرتهم شلون اتغير كلشي بظرف اشهر
طلعت ارحب بيها وجهالها يلعبون وهو يحذرها من الجداري گلها طلعيلهم ملاعيبهم وخل يرحون جوه يلعبون لو بذيج الجهة
باوستها وفاتت وهي تصيح بيهم وتأشرلهم على العابهم جوه الدرج
باوست عمتي وعمتي تگلها هو هالگد ترحين غير اتعودنا عليچ كل شويه ارد اصيحج من الحايط واكول لا يجوز هي هناك ترتاح اكثر وعيب احرجها
ردت وهي تذب حجابها وعباية الكتف اللابستها
..لا والله خاله بالعكس بس رحت الخاطر امي كل شويه تعاتب وهم شفتها مقهورة من مرت خالي مو اقارب رجلي تصير
وماقابله شنو يدز ناس ويوسط وماارجع تريدني ارجع البيتي وانتظره يعطف عليه ويقسم ايام وامي مقتنعة وعود تقشمرني بسوالفها صارلها يومين تحاول واني قافلة
حاجيتها مقهورة عليها تحجي بقوة صح بس بصوتها كسرة وخيبة ماتنضم
..انتِ مامخليه خط رجعه يعني تردين الطلاگ لو بيها مجال
..لا ابد مابيها ...لو يختارني اني وجهالي لو هي
..وهم عرفو شرطج بعد على شنو المحاولات بقت يمه
..يكلولي اجت مناك لهنا واتزوجها شنو ذنبها بشرطچ هذا حرام... اني هم شنو ذنبي اتحملها وشنو الجابرني اتحمل ماجبرته يطلكها يريدها يطلگني
..هذا هو فعلا مامجبورة انتِ
واحنا نسولف اجه صخر يبلغها
زوجها العصر جاي هو واهله وهسه ابوي بلغني العصر نگعد ابيته هالمره جيتهم عليه ..نفس مامتفقين لو غيرتي رايج
..لا نفسه هو يختار وحده ولا يتعب
ابتسم برضا .. وگام وبگومته طبتلنا رشا ونوره وهاجر اتفاجأنا بجيتها وياهم ورشا تگول گوه جبتهن سحلتهن الغزالة سحل
هنه خلصنها سوالف وضحك وهاجر چانت خجلانه صبو الغده وهو وحمزة اكلو وحدهم وخلصناها سوالف وضحك
غزالة تگول لو بعد عشر سنين مااتعلم اسوي الأكل الي يسويه صخر
احس هاجر بطرف السانها تسأل شعجب هو يسوي واتراجعت وظلن بينهن يسولفن وگامن للمواعين سوه واني نظفت المكان
بعدها السوالف اخذتنا عهود اخذت جهالها تنومهم من الصبح گاعدين تگول.. واني سألت عمتي بحيره
..عمه شلون گدرتي ماتحقدين وشلون كدرتي تأثرين بصخر هالتأثير علميني لأن احس الحقد الي بداخلي يأثر على بناتي وگوه مسيطرة على قهري
..يا عمه الحقد مو زين ..عدو صاحبه گبل الغير اخذت عهد على نفسي من شفت صخر توه كبر عبالي فترة مراهقة وصدمة وتنتهي.. بس زاد حقده وبده يطلعه ويبينه ..انصدمت بيه من كره ابوه كره ماصاير وبدا يعكس قهره وحقده على اخوانه وصار مؤذي بتصرفاته والسانه
راجعت نفسي...اني ضحية حقد معقولة ينعاد الصار وياي على ايد ابني بأخوته لو هم يحقدون عليه بسبب تصرفاته وي ابوهم هم
لاعبالچ المر بيه هين الموت شفته ليلي ماگمت انامه وجان بوكتها الشيخ المرحوم الوائلي محاضراته عاجه واله اكثر من بحث على الحقد كل محاضره اسمعها اكعد ليلي كله اناجي ربي
يارب اغسل گلبي وگلب ابني من الحقد وريح باله ووفقه
جنت افهم من محاضراته الحقد افة العقل .
وكل ذكي بگلبه حقد تغلبه حماقه ..مثل ماصار وي عمج ..عمچ حقد عليه وعلى امي علمود جذبه وشگد ذكي هو ويميز الصالح من الطالح ويعرفني شنو بس غلبته حماقته وهذه كلها اسباب تسليم العقل والروح للحقد الحد ماتكبر وتسيطر على حواسه وهذا الصار
وخفت على صخر يصير نسخة من ابوه ويعامله معاملة اسوأ من الأتعامل بيها
واهل گبل يكولون الحقد وي الغريب يموت وياه
بس حقد الگرايب تتوارثه الأبناء ويظل الولد الولد
وصار كل همي اعالجه اعتبرته مريض .
بالبداية ماجان يتقبل مني كلام چان يعاند حيل ويظن بسوالفي اتهاون عن حقه وحقي .. لزمت مصلايتي والدعاء
اتحسرت والهم بان بملامحها وكملت
..يايمه ياريمه من نعم الله على اولادنا دعائنا هذه النعمة الماحاسين بيها لا احنا ولا هم بس هي نعمة عظيمة بيج وماتدعين البناتج بنظافة الروح والابدان ..والگلب المو سليم مايسلم
لازم تعرفين فرق بين الخضوع للظلم وبين التسليم للحقد شعرة ..هاي الشعرة تنهي كلشي ..
انه امنت بالدعاء يصنعلي المعجزات مايوم مادعيتله والحمدلله ربي ماحيرني ولا خلاني بندم بديت اتأكد بذرة ابني صالحة
بس بعد هواي بعد احتاج من عطف ربي بعده سوده عليه يصارع گلبه وعقله بعده مغلول بالماضي ومچتف ماارتاح الا واشوفه متحرر من كل هم وغم
..ياحبيبتي ياعمه الموضوع هوايه مأثر بيج
..شلون مامأثر اني نذرت عمري الراحته وشفت مابيدي شي كلشي بيد ربج والعليه ادعي واوجه وهو الرحيم يرحمني ويرحمه.
حبيت اتعلم من هالأنسانة العظيمة لأن شفت اذا ابقى اتعامل هيج وانقهر من روحة بناتي راح اثر عليهن واخسر واخسرهن وياي
العصر كلش طلعنا لبيوتنا
بقن يمهم لليل بس نوره وهاجر وغزالة لأن البيت مابي احد وام نوره يم اهلها لليل تجي
واتكررت هذه روحاتهن البيت عمه شهلة بكل اسبوعين تروح ام حمزة الأهلها الحد بيوم اتصلت بيه رشا محتارة
..شبيچ مقهورة مبين عندج كلام احجيلي
..والله شگلج .. عثمان يريد هاجر تجي هنا وعمي رافض ومحاجج عثمان بهوايه امور وهي هم حسيتها متريد تجرب يومية مكان
بس هسه عمي ذب مواد بناء يعمر بيته الكاعده بي هاجر
وراد هي ونوره يرحن يم عمه شهلة ..وبطه وحمزة يم اخوانهن ابيته الجبير ومرته تروح الاهلها واخاف عثمان يسمع ومايقبل
..خلي هو يحاجيه انتِ لاتدخلين
..والله احتاريت منا عمي عزيز عليه ومااكدر ازعله ومنا عثمان نار بگلبه وماقابل ويگول لازمني من ايدي التوجعني بوصية عاصم هو اصلا مقهور ليش عاصم خلاها وصيته ليش ماوصاني بيها
..يعني هو ميعرف علاقة عمي عاصم بعمي ابراهيم ليش مستغرب كلنا نعرف علاقتهم اكثر من اخوه واصدقاء وترى احسن الها يم عمه شهلة هنيالها والله ماكو احن من گلبها
..ماادري هسه يوافق لا .. قبل ماگدر يحجي خاص من عرف حمزة يم صخر يبات من يوم الراحت ..بس هسه اذا عرف يم صخر مااعتقد يقبل
..هم ولد عم يتصافون بينهم لاتدخلين
..مو اني شاكه عمي يخطط الشي من تصرفاته ترى بذيج روحتنا من انعزمنا عمي اتصل بيه امر اخذها من بيته البيت عمه شهلة گال خليها تغير جو وياجن بس عمي مو خالي
..شلون يعني مو خالي غير يريد يونسها
..لا واكو فد شي بعد خلاني اشك مااكدر احجيه .
..شنو يعني مافهمت
..جاي يقربها الصخر ..خلاه هو الي يوصلها وبعدين انسحب من الرجعه هم وخلاه هو يرجعها خاص دوامهم ينتهي بنفس الفتره تقريبا
..اي؟
..احس يريد يخليها مسؤوليته وخاف تتعلق بي وكلنا نعرف صخر شنو رايه من الزواج
..لا ديري بالج البنية خطية كافي عليها همها ..عندي فكرة تبعديها عنه او بينيلها ليش يكره الزواج مو بالتفصيل بس احجيلها عنه علمود متنصدم لأن تعرفين عمي من يخلي اباله شي خلص
..برأيج هيج ؟..هي هم سألتني شعجب هو يطبخ ومن هالأمور وليش اخوانه يكولون مياكل من غير ايده لأن سامعه من فيحاء تگول النور معقد هو وامه شعاجبج منه وترحين وتاخذين البنيه وياج اني كتلها تضوج منهم غيره وصح هو مياكل من ايد احد متعود ..برايج اطرق الموضوع الزواج هم؟
..مااعرف اني برأيي اذا عرفت شنو فكره عن الزواج تبطل تتعلق وتنهي كل امل
..اي هيج احس ..مشكورة
..ولو عرف عثمان ابد لاتجادليه كليله انت وعمي حلها ليفكر انتِ ماترديها
..لا والله الله يعلم شگد متمنيتها تبقى وياي
......
صخر...
انتهت فترة الدوام بيوم متعب ..حالات المرضى تخليني احمد الله على سلامتنا من الأمراض وعلى الفرص الي انطانياها واني اكون سبب بعلاج بعض الحالات ..
بطلعتي استغربت وجود مريض مخلص جلسته لليوم والمفروض طالع
رجعتله
..ليش الهسه ماطالع ..وحدك انت محتاج شي؟
اتنفس بعمق وكأن يريد يتلافى سؤالي المحرج وبين احراجه بتلعثمه بداية الكلام بعدها نطق
.. ما عندي طاقة أواجههم اليوم
فهت شعوره وثقله..هذا الشعور المثقل بالحقيقة الي تخلي الأنسان يرجع مكسور كل يوم يظن بيه هذه النهاية الهذا الألم ..ميريد يضطر أن يتظاهر أمام أهله بأنه بخير وهو مو بخير ومايريد يزيد احزانهم
..لتحمل نفسك اكثر من طاقتها ..اوعدك كلشي يرجع تمام وهذه الأيام راح تذكرها من ضمن سلسلة قتالك بسوح الحرب .هنا قتالك اعظم
رد بتعب وحسرة
..تعرف شنو المضحك؟
مو الألم.. لا
بلل شفافه الجافة وكمل واني انتظر بشنو يفكر وهو بهالوضع مرات احتاج اغير افكاري من اقارن نفسي بي وبهوايه حالات اشوفها فعلا تحارب
..المضحك إني چنت سند للكل... واليوم محد گادر يسندني
نزل راسه أكثر و گال بصوت متگطع
..حتى نفسي... تعبت مني ..وصرت اذية مو نفع
زفرت الهوا الچنت احبسه وي كل كلمة اسمعها منه
..انت لا اذية ولا عبئ انت باختبار ..واني واهلك والحواليك بأختبار هم ..انت الله سبحانه يريد يشوفك طاقتك وصبرك اقوى من الي تظنه والدليل ان الله لايكلف نفسًا الا وسعها
واحنا بأختبار المسؤولية ..اني عن عملي وارحامك برحمتهم ..ومداراتهم الك ..وكلنا نخوض الامتحان وياك خليك قوي وسبب رحمة النا يابطل ..اتصل بأهلك لاتبقى راح تضوج من الأجواء هنا اكثر
..اشكرك على دعمك الي.. ربي يوفقك ويبعد عنك مصايب الدنيا وامتحانها
طلعت وبداخلي طاقة رهيبة ..ضحكت مرتاح شهلة خلتني اسولف مثلها بعد ماجنت اضحك مستهزأ واعاند من اسمع منها هالكلام بوقت اني اعيش صراع بروحي وهي تريد تسهل عليه الواقع ومرورته
اتصلت بهاجر ماردت
مره مرتين وتلاثة .. شگول عليك ابراهيم من ورطتني هالورطة
طبگت السيارة ونزلت اشوف بلكي المحها وي الطلاب الينتظرون خطوطهم ..وفعلا لمحتها شارد بالها وتنتظر
مشيت الها واقتربت وهي مو منتبهه
..الحمدلله ع السلامة.. وصلتي المطار
صفنت بوجهي ماتعرف تضحك لو شنو لأن ملامحي جدية من حجيتها وفعلا حجيتها اعتراض مو ترطيب للجو بس نرفزني شرودها
بس نظراتها الحايره خلتني اتراجع وابتسم
..شوفي تليفونج شكم مكالمة واصلتج
..اسفة مخليته صامت والله
..ماصار شي دير بالج انتبهي للشارع نعبر ..سيارتي هناك خليتها لأن ازدحام من نرجع بالأستدارة منا نطلع گبل بدون ازدحام يعطلنا نص ساعة
انتبهتلها خايفه من الشارع
حسيت بيها مترددة تعبره
..بعيدات من الجهتين عبري ولاتترددين تربكين السواق واليعبرون امشي وياي خطوة بخطوة
عبرت سريع من خوفها وسبقتني
صعدنا السيارة وعلى غير العادة سألتها
..شلونه يومچ اليوم
..الحمدلله
..يستاهل الحمد
سكتنا وعلمودها اشوفها تتأثر المسجل گمت مااشغله
وصلتها البيت ابوي واتفاجأت عمال طالعين ابيته
اتصلت بأبوي وهي حست بيه واگف الهذا السبب الظاهر
بتلعثم حجت حسيت بكلامها تغص من خجلها
..اگلك ..عمي وصاني اني ونوره نبقى يمكم ومن الصبح نوره اخذت اغراضنا يعني
دنگت خجلانة ماكملت
واني خاف اسب ابراهيم واعتبر عاق وشيسكتني على سوالفه ع الاقل منطيني خبر مااحرج البنية هيچ
..كل الهلا بيكم تنورونا انتِ ونوره
..والله ردت اروح الرشا ماقبل عمو ابراهيم واتعارك وي عمو عثمان بالليل وصارت هوسة بينهم
خنگتها العبرة من حجتها
ضجت عليها بهالعمر المفروض اكثر فترة مستقرة بيها بين امها وابوها او واحد منهم على الأقل
حركت السيارة البابنا وحاجيتها واني اريد اطبگها
..ولد عم بينهم لاتهتمين وعركتهم بساعة تنفض عمامچ حاسبين ابوي اب واخ الهم مو بس ابن عم ..عثمان لو مايعزچ يغلس وابوي لو ماتعنيله يگول هم وخلصت منه ..عركتهم تبين قيمتج للأثنين..بس سؤال
..خو ماجوعانه كلش
..لا لا اكلت بالدوام
نزلنا وابالي ابلش گبل بغداهن لگيت شهلة مسوية الغدة الهن نادر ما تسويه بس الظاهر تعرف بخطارها هلت ورحبت بيها
واني صعدت مادام ماعندي شي وهنه هنا اجرها نومه احسن
توني ارد انام واتصل ابراهيم
وبدون سلام گلت
..مكالماتك وكروايك كثرانة
ضحك
..امانتك البنات
..حريص ابو البراهم ..طلعتك هاي شوراها
..شوراها شتشوف انت غير مأمن بيك وبأمك ومخلي يمك بنتي وامانتي اكو اكثر من هيج ثقة
..لا بالله ماكو ..بس البنية خجلانه تلطشون بيها منا ومنا انت وعثمان شبينكم
..ماكو شي اذا تحب كم يوم وتروحلهم خطار بس ياخذها يمه لا
..اكدر اعرف السبب
..يلحكنها البيت عمها يسمعنها كلام وتتعقد اكثر ..رشا زينه الها بس مايخلنهن بحالهن ..وهو هم مايستاهل ..بمشاكلنا وي امها وخوالها وابوها توه متوفي
عمامها مخابرين امها اذا واحد من طرف خوالها يتزوجها لأن تحمل جيناتهم يوافقون ينطوها وهو يدري ومابلغني.. لأن بظنهم منا محد ياخذها ..والأسوأ امها كايلتلهم اني دزيتها لأن هم مامتقبليها وردتها يمكم ترتاح ..مو تبلغها بس ردت انطيك علم ليش رافض اني ..وماراح اخليها بحاجة الطرفين
..راح تخليني احبك ..بس ماعرفتك ابراهيم من شوكت صاير انساني وماتعترف بالمجتمع وكلامه
..حقك تحجي هيج وشتريد تكول كول بس اعتبر الصار علمني ..بالمناسبة اعرف بيك هواي تحبني مو توك راح تحب
ضحكت
..تعجبني الثقة العندك ..بس عبرت للوهم انت
..ماعلينا ..بس دير بالك عليهن
..ليش لا تدلل ..احسب يمك شكم زينة صارت الشط انملى
ضحك بصوت ونهيت الاتصال وظليت افكر بهالمجتمع هو الصوج بينا كأفراد لو بالمجتمع كله ..لأن احس الخلل بالافراد بس يتهربون من اخطائهم ويذبوها بالمجتمع ويبررون النفسهم مو اكثر
نمت و گعدت العصر كلش ترددت انزل متقيد ومامتعود على وجود احد مابيني وبينه ميانه
صوت ماكو هدوء
نزلت
امي حاجتني
..سوده عليه يمه لا اكل لاشرب شجاك من اكل الصبح وياريت لو اكلت أكل زين بيضة ماكملتها
..هلا يمه ..هسه اكل ..البنات وين
..جوه ولا طلعن هاي البنية مستحية كلش
..حقها ..خليها على راحتها تتعود
ثاني يوم صادف عطلة رحت اشوف جدي وعمي
واستغليت الفرصة مااريد ارجع من وكت واضايقهن
رتبت الحديقة والمكان اليكعد بي جدي وكصيت الثيل
وقرضت اظافره بعد ماطلع غاسل غسل الجمعة وقبل الظهر رحت جبت سمچ ومريت اخذ خبز من الخبزته الصبح بنومتهن وجبته واجيت الجدي شويتها وكعدنا نتغدا ويانا عمي
حاچاني جدي
..الأكل من ايدك يختلف ياجدو ..الله يحفظك والله فرحتني بجيتك اليوم ورتبت الگعدة والحديقة صار فتره عمك مامتفرغ يطلعلها عامل
..الف عافية جدو ..اني مقصر والله بس تعرف انشغل.. اليوم اتفرغت وگلت مابيها مجال
..خو مامتضايق من البنت انت امك ..والله ياجدي سوالف ابراهيم ماتعجبني ابد بس هالمره اني وياه ..الأمانة ثگيلة وانت وامك اهل الها ان شاءالله كلها ايام وكلشي يرجع المكانه
..لا جدي شتاخذ منا ..امي متونسه بوجودهن ..وابوي اني وياك طلعته هالمره زينه البنت نرضا مانرضا محسوبة علينا ومو مال تظل تحت رحمة فلان وعلان
صفن عليه صفنه خلاني اتحمحم واريد اضيع الحجيته خاف ياخذه بغير غاية
..ابوي يدري اني رافض فكرة الارتباط حقيقة او لهوا واسبابي يعرفها وكلكم تعرفوها لهذا مأمن عليها عدنا اكثر من البقية خاف كلشي يصير لاسامح الله
سكت جدي ماعلق كملنا اكل واني مخدر ع الجمر جاي جبته واجيتهم صبيتلهم وشربت ونمت
بعد ماراح جدي الغرفته وعمي هم ..توني بادي انام والمطبخ گام ماگعد بدت هوسه وگرگعه خلتني اگعد الحيلي اسحب تليفوني اسأل نوره وين هنه وگالت بغرفة عمه جاي نقرا
صحت غزالة احاجيها وفهمت مسويه حملة ع المطبخ ..حسيت متعمدة ماتريدني اظل فترة طويلة هنا متعوده بسرعة ارجع البيتنا طلعت
ومااعرف مرت عمي هاي من ياطينة شنو نوعها
شأخذ منچ لو نمت بالخطار كل مره زينه ويايه هي صارلها فترة صايره تلمح الشي مو حلوو وتتصرف وكأنها عروس جديدة مامتعوده على اجواء بيت جدي والناس التجيهم
رجعت للبيت لاگتني هي محجبة بالبيت خلتني مرتاح اكثر
المغرب اجتنا عهود فرحانه ومن الباب گالت
..شرطي وشرطك تم
..طلگها؟
..اي باجر تسافر
..متأكده ؟ چان يماطل
..اي والله دزولي ورقة الطلاگ ..وهي هم اتصلت تدعي عليه وتحجي
..شوكت يجيج ؟
..يگلي انتِ تعاي شرطج وتم بعد ليش باقية
..لا هو جابچ ..يجي بنفسه ياخذج وهم اريد منه ضمان وتأكيد للطلاگ الورقة بصورة ماتاكل عندي بلغيه وخل يستعجل اذا صادق
..صار هسه ابلغه
..انتِ مو جنتي حاظرته
..صار يومين طلب ارفع الحظر عنه وابويه حاجاني كال اتفاهمي وياه واخر قرار الكم حددو مصير علاقتكم اخوچ ماقصر وياج وفهمه كلشي لاتماطلون بعد
..هذا هو بلغيه ..وفهميه كلشي
وفعلا ثاني يوم اجه وبعد ماتأكدت كلشي تمام رجعت عهود وهي مرتاحه الحمدلله گدرت اكون صاحب موقف وياها للأخير
رغم هوايه من اهلنا لاموني واعتبروني سبب بطلاگ بنت متغربة وجايه بس هي البنت الي تغربت شنو ضمانها وليش مااهتمت العائلته لهذا مااتعاطفت وياها ولا خفت من العواقب ابد
هو جان مخيرها بينها وبين ام اطفاله
رجعتها بشروط هوايه واهمهن مصرف شهري الها والاطفالها وللبيت
مرت الأيام هاجر يمنا ماينسمعلها صوت بس لأكثر من مره من امر من غرفتهن بالليل اسمعها.. تسمع ياليل البنفسج
گمت اشغلها مرات ماتبين تأثيرها مرات دموعها تخونها
وبيوم واني مشغلها ..قررت تحجي واني اسمع
..هاي الأغنية چانت تحبها امي ..وجنت من اشوفها وهي تسمعها وتنقهر وتسافر وي كلماتها ولحنها اگول ليش ابويه خذل امي ..بس هسه من اسمعها احس امي هم خذلتني ..اني خايفه بديت اكرهه ومااريد اكرهه اريد ابقى احبها .. معقولة اكو بشر يكره امه ..خاف صار بيه شي مو طبيعي وهذا المخوفني
سكتت لحظات وگلت
..بعلم النفس دائمًا الأنسان المخذول بنسبة عالية راح يكون سبب خذلان الغيره ..مقارنة بالأنسان الطبيعي
يعني يمكن الظروف سبب
..الله ياخذني گبل لا اخذل شخص ماله ذنب بخذلاني
..الله يبعدچ ..المهم حاولي لا تتأثرين وظروفچ خليها دافع للنجاح راح تشوفين هوايه فرق
..شلون گدرت انت تتغلب على ظروفك
..ومنين عرفتي ظروفي انتِ ..او شنو الوصلچ منها
..مو هوايه بس عرفت حياتك ماچانت سهلة ..والصراحة چنت استغرب تصرفاتك او كلامك وي عمو بعدين فهمت قليل عموميات يعني
..مو مهم اذا عموميات او خصوصيات اني من الناس الي مااخجل من ظروفي ابد ومااخجل من ظلمهم الي بالعكس ..وهم مااخجل من ردات فعلي وياهم ولا احب اخفيها
..شلون گدرت توصل هالنقطة لأن اني اريد اموت مو بس خجلانة مكسورة ..وجنت كلش قوية وصعب تنهز ثقتي بنفسي بدت للأسف تزعزع هذه الثقة وصرت اشوف اني سبب مو بس ضحية
..سبب بشنو؟
..يعني لو مالوني ابويه ماهجر امي اشهر ولا حست امي كرامتها انداست ولا قررت تهجره ..ولا خوالي عاملوني هالمعاملة ولا اضطريت ارجع وهوايه امور بعد مااريد اطرق الها
..اسبابچ هذه بيد الله ووحده هو يعرف حكمها وتدبيرها ..لو بيدج اكلج صح انتِ السبب بس اعتقادج منفي بأنتفاء القدرة على التحكم بهذا الشي السميتيه خلل
..الحمدلله اني مسلمة امري الربي بدون اعتراض ولو قدر رمشة العين مااعترض ولا فكرت بيوم اعاتب او اكول ليش ..وهم اني راضية عن نفسي وشكلي ابلغ معنى الرضا والقبول ..بس المجتمع مشكلة
..المجتمع اني وانتِ جزء منه
..ان شاءالله نكون جزء نافع
..ممكن اي وممكن لا
وهاي وصلنا ولأول مره مانحس بالطريق
خلي ابالچ شگد ماعرفتي عني عرفتي القليل ..وقليل كلش هم
..تمام ..شكرا الك على سعة صدرك للحديث وعلى تعبك وياي ..ولو الأخيرة متاخرة بس ماجنت اگدر اعبر بحكم معرفتي بيك اقل
..ولا يهمچ ادللي
.....
هاجر ...
صرت اعد الأيام بس حتى تخلص واشوف نهاية هالسنين شنو
ادرس بدون واهس واحقق نجاح بدون فرح وهدف
بدت تتلاشى قوتي وصرت مثل طالب يراجع دروسه اراجع نقاط القوة عندي وافكاري حتى اتشبث بيها واستمر
بيوم بالليل بعد العشا گاعدين احنا والبنات
بطة تقرا وبيدها لفة بيتنجان مقلي وياه كوب چاي
واني ونوره نسلس حب
هي غرگانه بملازمها واني اراجع المواد العندي
اجانا صوت عمي عالي
لحظات وفهمنا هو يتعارك بأتصال مو بالبيت
سمعته ردد اسم عمي عثمان واتحول الموضوع العركة بينهم وصل بعمي يغلط عليه
وگفت بخوف وحيرة حسيت الموضوع يخصني وفعلا طلع
حتى زوجته گالتله حقه عمها ويحرص عليها
ماانطاها مجال ابد گلها صوتج مااريد اسمعه محد طالب رايچ
صاحني نگعد وحدنا هو يمشي واني وراه بغرفة الخطار راح وقفل الباب
وقبل لايحجي اترجيته
..عمو خليني يم عمو والله رشا ارتاحلها وعمو زين هم
..عندج ثقة بيه
..اكيد شلون ماعندي ..خليچ وراي مااريد تنصدمين بأحد ولا اريدچ تفكرين مادام اني عايش مااخليج بحاجة بشر ولا هذا احساسج بالغربة يستمر
..الله يحفظك عمو ..بس عمي يجوز يتحسس قبل شويه نوره بلغتني بالبناء ووين لازم نروح واني هم خجلانه والله ..
ماخلاني اكمل
..لاتخجلين عمو .. ماامن عليج الا يمهم مو وحدج نور وياج وكلها كم يوم
والكم يوم صارن فتره طويلة مااعرف شنو من بماء هالكد طوول حتى العمال يطلعون كل كم يوم نهار
اول ايام متقيدة حيل بعدين اتعودت بيتهم هادئ وهو على طول بغرفته لو بالمطبخ يحضر حتى لفات يسويلنا بالليل من عشاه لأن نتعشى قبله وي عمه من وكت صرنا
وعمة شهلة شكد مااكول عنها انسانة مؤمنة ومحبوبة مااوصفها وصدك صرت ارتاح يمهم بالعطلة رحت البيت عمو عثمان وحسيت وجهه ثگيل عليه لأن بقيت يم عمو ومااصريت اكون يمه بس رشا مثل ماهي وبدينا نسولف ومواضيع هوايه فتحتها من ضمنها علاقة صخر بأبوه وشلون عمو يحاول يتقربله بعد سنين من اتخاذ اسلوب خاطئ وياه
وبدينا نحجي حسيت اني وياه نفس المعاناة
وخاص من عرفت رفضه للزواج واي علاقة بسس مشاكل امه وابو متعقد ميحب الزواج بسبب التفكك الاسري العاش بي
ايام واني افكر واراقب شلون هو مهتم ومعتمد على نفسه الظاهر بسبب المشاكل لو اكو شي مااعرفه صار عندي فضول واحس كلام رشا ناقص
بس زاد فضولي
فد يوم حجيت الي بداخلي وخوفي وافكاري مو قصدي اطلع منه الكلام بس انفتح باب للحديث الحد ماصار حديثنا شبه يومي وگمنا مانكتفي بكلام الطريق نتراسل مرات
قيل ..ان الحب لايبدأ بنظرة اولى ولا موقف.
الحب للأنثى ..يعني وجود رجل تشعر معه بالأمان
والحب للرجل حين تطغى انوثة المرأه ..لدرجة يستشعر رجولته كل ما رأها.. ويرى انه الوحيد القادر على حمايتها
..يتبع..