رواية كتوف مائلة الفصل السابع والثلاثون 37 بقلم نور الشمس

رواية كتوف مائلة الفصل السابع والثلاثون 37

بقلم نور الشمس

هاجر...

بهذاك اليوم بتت يم البنات ابيت عمي ابراهيم كلنا ملتمين سوالف وضحك مامتعودين نبات كلنا سوه 

چانت بنين تصبغ الحلا جذور شعرها توحده وي الباقي وبطة ناصبة عليه 

..شعجب صخر قرر يروح يم اخواني اكيد حن الحياة العزوبية هو من الاساس فكرة الزواج رافضها

ابتسمت امشي الأمور لأن مااريد احسس بنين احمد متخربط ويشيلوله مرارة 

..اي احس هيج مل مني مو ..من يرجع نتحاسب اني وياه شو هم حسيته هيج اني 

.. يا يا هذه صدگت انتِ نويتلا الدارك چوكليت نطقتي الصخر وخليتيه يتفنن بالغزل .. وين يمل منچ 

..اوووي فدوات الچ واله لقب اخوچن طششش فدوه الأسمك ربي من الزرگة والملحه الى نوتيلا وسوالف حلوه صدگ لو گالو عوض الله جبير الحمدلله 

ضحكن على سوالفي واضحك على ضحكهن 

گامت بنين تنزع كمامتها وجفوف ايدها وراحت تغسل 

وحلا كورت شعرها منتظره ياخذ لون 

وعباس ملخها يريد يوصل شعرها وهي تتهرب منه صحته عليه اريده يجيني صديقي هو والملعون ولا باوعلي صارن عيونه بشعر امه 

أخذت تليفوني راسلت صخر ماكو مارد اتصلت هم ماجاوب

ظل بالي يمه وعيني على بنين ماتدري برجلها مااعرف دخلوه هسه لو لا 

هي مامرتاحه هم ونوره تگلها الله يعينجن حقجن شعدهم باربيل 

حاجتها بنين 

..نوره تهونين علينا لو تقهرينا انتِ ترى جايينكم مانتحمل وحشه ونسونا 

..هسه اركصلچن بس اخاف على خشمي 

صحت 

..يبوو شراح يخلصنا وي خشمچ صار قرن من سويتيه وبعدچ تخافين 

..مو حقي دشوفيه شلون ينباس من سويته الهسه مافارگت المراية 

رن تليفون بنين وفرحتها ولهفتها ماتنوصف من جوابها عرفناه احمد

...هلا يابعد روح بنين هلا ..والله گلبي طاگ عليك 

نباوعلهم مبتسمين عبالك ممار علينا اتصال قبل بلا ذني ممتزوجات اني شبيه ماادري لهجتها اميزتها طالع الكلام من گلبها وبغير نكهه عبالك انتبهتلنا وضحكت على ضحكتنا وياها 

وگامت تحجي بغير مكان تاخذ راحتها

گلت الحمدلله يعني كلشي تمام راسلته ومارد 

ياربي هسه يطلع صخر ناصب عليه لاعملية ولا شي جان كل الزوجته شنو نمونه المرارة 

بعدين استغفرت ربي وذكرته

هذا الظن مو حلوو وصخر ممسويها قبل 

من نهت الاتصال و رجعت حاجيتها بينا 

..بنين الجذابه كل هاللهفة وتكولين مااحبه بعد الحجي السمعته ولج تموتين عليه لاتخلين الصار يأثر عليچ كافي طناگير 

..ولچ والله بالبداية گلت ابد گلبي مات بس هو والله ينحب غصبا عني اتعلقت بي..ولو تشوفين من اجيته عروس جنت متأكده من عشقه الي ومبادلته اضعاف 

الف لعنة على الفضول الخلاني اسمع ومايروح السمعته من بالي ابد 

..يروح يروح بعدكم بالبداية ترى ..المهم خليچ مرتاحه ولتنغصين على نفسچ 

..ان شاءالله ..اني هوايه اشكرچ على وكفاتچ وياي 

..شوف انتِ شگد باهته وبلا طعم شكر شنو غير خوات وصديقات احنا ..سولفيلي شلونه هو 

..منو احمد؟ الحمدلله زين والنوبة مااجته من زمان

كتلهم دزولنا صور شو مغلسين كلي راح ادز ومادز 

ظليت اتهرب بعيوني ..وگلبي مدري شبي انقبض 

شويه واجتها صورة 

هو وصخر وحمزة سِلفي اباوع الصخر تعبان حيل بالصورة بس ضاحك وي احمد وحمزة متكأب حيل 

بطة گالت 

..دخيلك ربي شوف حمزة الله لايوفقچ ياسالي ولا يريحج على الصار بي 

اخذته نوره تشوف اشرت النا على شاب من بعيد مدري شلون لمحته 

..وياهم حسام ؟..الله عليج هذا حسام سأليه يمهم هو شجابه 

اخذت التليفون اتأكد ..حسام قليل يتواجد بس اعرفه 

..اي والله هو 

راسلته تسأله ماجاوب 

كالت لازم طلعوو هسه يتونسون 

اتصلت رفضني 

..جاي يجهزوه اذا وضعيته تمام هسه يدخل 

..صخر عليك الله هو زين ليش مابلغ مرته

..ماقبل هسه عاركتهم لا ابويه لا مرته الحالهم يتصرفون هو واخوانه ..راح انشغل اني اتصل بيج بعدين 

بعد فتره گال جهزوه بس مو هسه يدخل بعد 

گمنا يم نوره بالمطبخ وحلا اتصلت على عمي گلها لتسوون عشه اني اجيب 

اجه متأخر بس ممخلي شي مجايبه فرحان بينا حيل 

.. ياهلا بيچن كل الهلا ..بنين شلونچ اليوم 

..بخير عمي الله يحفظك ويسلمك 

بنين هي يمهم قبلي لأن صخر اليوم يلا لحگهم واجيت 

حاجاني اروحله واشرلي اكعد يمه منا وبنين اشرلها منا هم 

رحناله نضحك عبالك مسابقه عدنا واتذكرت حجاية بنين عنه ولزمتني الضحكه اول ماشافته

گالت 

..كلشي چنت احلم ومتوقعة بس مال احلم بشايب صاك ونازك هيج ابد ماجاي على بالي چنت متخيلته كرشه وكلابيته ويفتر ويطفي اضويه هذا الفلك عمچ منين 

حضني وبسته 

..مشتاقتلك عمو 

..حبيبة عمچ ..اني اكثر والله بس فرحت بسفرتكم طلعو سافرو غيرو جو بعدكم شباب ..امج شلونها شفتيها 

اتنهدت بداخلي حسرة جبيرة بلعتها 

..اي عمو شفتها الحمدلله زينه وتسلم وتسأل 

..الله يسلمها ...اليوم عايفچ صخر صدك ؟ شعجب مو عوايده 

..خلي عمو يغير جو وي اخوانه مل مني يمكن 

ضحك 

..لا ماتخلي يمل سباعية انتِ ..بس اخوانه حقه وحقهم عليه واني هم ارد اشوفچ من زمان ماگاعدين وحدنا واكفلج حارس المسودن 

ضحكت على كلمة عمتي تگولها عنه 

..عمتچ شخبار سفرتها مااجت 

..باجر تجي ان شاءالله

..متأكدة ؟

..اي خابرتنا الصبح 

..اشهل وراه شي مايعوف امه مايسويها ..هم حجالج صاير شي وياهم 

ارتبكت واحس بس يشوف عيوني انفضح 

..لاعمو كال اتونس 

..غريبة مامسويها الا انتِ فارة راسه 

ضحكت وهو هم كمنا نتعشه وظل بالي ماكو خبر 

نمنا كعدت الفجر فازة اشوفه يلكي متصل 

سمعت صوت بره عمي وحلا مخبوصين 

طلعت مالحكت على عمي طالع وحلا گالت 

..احمد متخربط وصخر خابره يجي يشوفه شيقرروله كايله احتمال اكو ورم الطبيب يكول 

دخت افتر راسي هو ورم لو رفع مرارة ورم شنو اسم الله 

..حلا ورم شنو خاف مشتبهين ترى مرارته مأذيته كالو 

حلا بجت وبجيتها تخوف مهضومه بصوت ناصي حاجتني 

..ولج هاجر ورم بالدماغ يكولون يامرارة شفايتلنا المرارة اكو اسهل من رفعها 

گلبي وجعني ومتت خوف 

..اسم الله الرحمن ..يارب رحمتك يارب ..معناها يدرون وماحجو 

مسحت دموعها 

..يعرفون وصخر معاركهم وحجه الابوه لأن هو موصي اخوانه ميحجون شي بس الطبيب مامطمن صخر ابد 

..احمد امانتك يارب رجعه سالم الزوجته والنا 

الخوف العشناه القلق ماينوصف ومحد يعرف بس اني وحلا وماكو احد يجاوب ومرت ساعة وره ساعة گعدت بنين مانعرف شنحجي وشلون نبدي 

حلا بدت وياها 

..تريكي بنونه واخذي علاجج يلا 

..مااشتهي 

سكتتا وحلا كالت 

..احمد متخربط هناك وعمج لحكهم 

شهكت بخوف ولطمت وجهه 

..يممه شبي عليچ الله خو مو نوبة 

..اي وراح يدزه الطبيب يسووله فحوصات يعرفون شنو السبب لأن 

بلعت ريكها وعيونها تستنجد بيه احجي اني انخرست مااكدر ودموعي ملن عيوني 

..كملي حلا شنو شصاير وكفتن گلبي.. خايبة هاجر احجن شصاير شبي احمد جنه ورد البارحه حاجاني

گامت ادور على تليفونها وگعدت 

..عليج الله هاجر جيبي اليه رجليه وگفن هبطتني وجوهچن تخوف خو ماحادث صاير وياهم وهو متأذي 

حلا جاوبتها 

..لا والله 

..چا ليش عمي راح ؟

..لأن شاكين عنده ورم بالداغ وراح يتأكد ان شاءالله مو صحيح 

پجت بصراخ واحنا وياها 

حاجيتها اهون عليها 

..ادعي ماكو شي بنين ادعيله 

بيتنا انخبص البنات گعدن مرعوبات دخيلك يارب من هالصباح 

شويه وعمي اتصل بحلا وصوت حلا ملخ گلوبنا ملخ 

..مالحگت عليه سوده عليه ابراهيم ماشفت ابنك مالحكته 

ولچن احمد ماااات ولچن راح شبابه عمت عيني عليك الطيب المؤدب 

مااتذكر شصار بينا بس اتذكر هو موقف ذهول اتحول الصدمة چبيرة بيها الم ماينوصف بيها حقيقة مرة ماتنجرع نريد نصدك مانصدگ نريد نچذب الخبر هم يتجذب شي فوگ تصورنا بهواي ماينعقل ابد روحته بهالشكل ماتنعقل 

اتذكر بنين شعرها صار يطاير گدام عيوني ونوره وجهه نفط دم من ملخته 

اتذكر البيت انگلب بلحظات وكل اهلنا اجو اليكره واليحب ..اتذكر شفت امه جايباتها سانداتها ومابيها روح وكل شويه وكالت حمودي يمه تعال وگلي جذب ولك ماشايفتك صار هواي وجذب گلبي ماشال عليك 

ملخت گلبي بروحتك يمه 

الكل چان مفجوع خواته من اجن مذهولات اكثر منه هيج مات بدون مقدمات الكل مفجوع 

مآرب شالت البيت شيل بصراخها وهي تندب بأسمه عهود و سراب كل شويه وواگعه اعرفه اقرب شخص الها من البنات 

نسيت جية عمتي وماوعيت الا على صوتها وبجيتها چن توه طاب الخبر نعيها نعي ام الابنها وكل شويه وصاحت يعينك الله صخر يمه على اخيك 

بالي يمه وفكره ابالي ماتروح ابد مامستوعبة هو مات صدك مااريد اصدك 

بنات عمي سليمان كلهن بجهه ورشا الي انتهت بجهه ثانية 

هو عزيز عند الكل هيج ..لو لأن شاب كلشي ماشاف بعده عريس فرحان ابنته ويدورلها اسم قبل ايام واني بكربلا سألني ماعندج اسم حلو الها جاي اختار ماشافها ولا شافته وبنين شلون بيها 

احس كلش الدنيا ضاگت بعيني ..عفيه دنيا نركض الها ليل ونهار ومحد ضامن بيها لحظة من عمره 

گعدت يم بنين اريد الزمها وجهه اتلون من الضرب وعيونها على لحظة تنطفي ومو حاسه عليها فرفحت بينهن تصيح ولچ يمه الحكيلي شگالچ گلبچ عليه تعاليلي 

امها بعيده وماادري وصل الهم الخبر لو لا 

وكل شويه وصاحت

.. مو حلفتلي مااعوفج مو گتلي اني مو ناقص واعوف حرمتي وبنتي چا شو عفتني منو النا بعدك مو راح تلطشنا الدنيا خلافك احمد 

وترجع تگول 

..لا والله يطبنا مرض كلنا نعيش شعلينا بس انت شلون شبابك طولك جمالك ملابسك المالحگت تلبسهن ماتهنينا بكلشي بعدنا مامتهنين 

اتخبلت واني فاقده الحيلة وياها ما احس نفسي اگدر اصبرها واني بهالوضع 

ساعات طويلة ها اجو ها بعدهم اجراءات المستشفى وطلعتهم من الشمال لهنا 

العصر جابوه هنا كلشي يوگف لاعقل يفكر ولا موقف ينسى عمي چان محني اباوعله مذهزلة البارحه يمشي على طولة وكل الحيل بيه اليوم ظهره مقوس ورغم اخوته وولده ولدهم كل داير ميدوره 

بس كسرته كسرة حمزة فاقد حسام صخر تلكته عمتي بنعيها وهوايه حچه وياها ويصيح بأسمه 

وشيعوه بذكر لا اله الا الله 

.

شيعوه بعد ما شالو بنين گوه من التابوت هي وخواته 

وامه جانت فاقدة وكلها تلوم بيها .. حتى خواتها واهلها يگللها هاي فر من ايدچ شحصلتي من الزعل هسه 

مآرب چانت اكثر وحده ماخذه موقف ابد مااتقربتلها اما سراب وعهود لا بجن وياها وگعدتهن يمها 

وهيج اتبخر كل وهم وحلت محلة الحقيقة بالدفن من رجعو بسرعة بدونه لأن يدفنون يمنا قريب مو بالنجف 

تونا خلصنا صلاة العشا ومو بس البيت القرية كلها نشالت بأصوات امهاتها 

بس سمعت الصوت هي عرفتهن اتلگتهن فايره وجهه شصاير بحاله 

وانعاد العزة من جديد امها وخواتها وزوجات اخوانها حافظات الگولات والنعي كل حسرة بگلوبنا طلعت وياهن 

وبعد ماشافنها منتهيه اخذنها سندنها گعدنها وگعدن يمها .. وامها تكلها 

..ياحظچن يايمه عمت عيني ولچ بنين غمجتي صواب گلبي ..ولچ يمه جرح اختج لساه يدي وانتِ چمليتيني 

امها بچت ونعت وبچت النسوان اكثر من امه خاص من يتگابلن هي وعمتي شهلة بالنعي مستحيل احد يقاوم صوتهن ويظل صلب 

مرت ايام العزاء ثگيلة وكلها تسأل شلون الولد راح على طوله وكلشي مابي ورجع جثة واشكال الملامة على عمي كل هذا الخير العنده ماسفره ماطلعه وحاول يعالجه بغير دولة 

عمي تعب من الحجي ومايگدر يبرر ويگول ماادري ولا وكته ولايفيد و هذا غير الشماته 

مرت ابوي واهلها حقدو اكثر لأن خرب زواجها من عمي الجبير ..وعمي عثمان النذل منا يمر من يمهم وميعزي 

احمد چانت روحته كسرة للكل بس كسرة عمي ماكو مثلها 

شگد صخر گلبه شايل على عمي بس كلش باله يمه واكثر واحد اهتم بيه بهالأيام 

وكل هالايام واليوم رابع ماشايفته غير مرتين تلاثه وكدام الكل عزيته ماكاعده وياه افهم 

عمتي حاجتني اروح للبيت قبل لايروح يسبح ويغير ملابسه هذا وكته رادتني اشوفه بلكي ياكل شي واهون عليه وافهم منه هم

وگالت اني الحگم اشوفه 

خليتها گاعده يم ام بنين ابوها واخوانها اخذو اختهم وزوجاتهم ثالث يوم وگالو الأمهم خليج يمها لاتعوفيها هالأيام ..عمتي شهلة ماعافتهن وظل بالي خاف يصير حجي لو يسمعنها حجايه لأن بنات عم رزق وخواتها اجن وصارت عبالك تحالف واحزاب حتى مرت ابوي وطليقة عمي سليمان جايات ومنا رنا هم ظل يالي يمها وايدي على گلبي ..وطلعت للبيت 

رتبت ملابسه الذابهن الصبح وخليتهن بالغسالة بعدني افتر اجه 

وبس حضنته وبچيت شهگ 

مايروح من بالي صوته بالتشييع من صاح اخخخ ياابن ابوووي اخخ حجايته كسرت گلبي وظلت ابالي نبرة صوته شگد مكسور بيها 

حاچاني بعد مابلع غصته ونشف دموعه بيده 

..راح احمد هاجر مامحسبها ابد ..احمد اصغر منا شلون هيچ يروح ومريض هم ..ليش هو مبين عليه مرض وجهه يشع ويضحك الآخر لحظة دخل بيها احنا خايفين وهو يضحك علينا رغم متأكد العملية مو سهلة وشاك ما يعيش لأن وصانا كلنا ..وصاني بأبوي ادير بالي عليه وگالي امانتك ابوي انت ..ووصى حسام وحمزة بمرته وبنته ووصانا حتى بأمه گال كلولها مبرية الذمة وخل تبريني 

بچيت 

..الله يرحمه ويصبركم ويصبرنا والله اني روحي ممروده عليه مامصدگه 

..بالچ على بنين وبنتها مااوصيچ ولاتعوفينها ابد خليچ يمها واي شي تسمعيه من اهلها بلغيني بي

..مثل شنو يعني 

..مثلا ياخذوها ؟ الأي عذر ..وصانا ممنوع تطلع وياهم وممنوع تفترق عن بتها 

سكتت محتاره مااعرف شحجي اعرف اهلها ناس يمشون بالأصول والعرف السائد واهمها الزوجة تنقطع صلتها وي اخل زوجها مادام الزوج مات خاص اذا شابه 

..ليش ماتبات هنا انت ع الأقل ارتاح بنومتك 

..مااگدر اعوف حمزة ..متخبل وخايف عليه حيل محمل روحه مسؤولية يگول شلون طاوعته وبيدي اخذته الموته 

..هو ليش هيج صار ..اني خايفه على عمي كلها تلومه وهو مايدري خطيه خليك يمه وهون عليه 

اتحمحم وگام 

..ابوي تعبان 

سكتت 

..واحمد الله يرحمه هو مراجع بدون علمنا وي حمزة بس هو منا مبلغه ومامقتنع بكلام طبيب واحد داز تقاريره للخارج نفس الكلام كايليله مكانها خطر وواصله مرحلة ممكن تضرب اعصابه ينشل او يفقد النظر الى ان يموت او يسوي عملية بنسبة نجاح قليلة وهو مختار الطريق الأسها اله 

..حسام يعرف قبلك 

..هو وياهم اول بأول مبلغهم وهم موصل تقاريره بتركيا وحتى للهند النسبة نفسها الجراح السواها مو قاصر بس هو هذا يومه ولا اعتراض على حكم ربي العامين انا لله وانا اليه راجعون 

كوه قنعته ياكل شي بسيط وطلع 

رجعت لگيت الاوضاع الحمدلله مستقرة 

طلعن الحبايب وخلصت على خير اتفاجأنا من انفتح بيت احمد ودارت عليه رزق وحبايبها وبنين محد صاحها اصلا بقت هي وامها يم بيت عمي ..اصلا بيتهم الطابق الثاني جان مفتوح بس للولد وحتى عمي بات بي بعد من راحت هناك يعني واضح رجعت للبيت وقررت تكعد هي بي 

بنين فاقده بالها مو يم الموضوع اصلا وامها تستحي تسأل مريه كلش بسيطة وخلوقة مو من النوع التدخل 

گعدت يمها 

..بنونه 

دارت عليه كوه فاتحه عيونها طافية من البچي وداير مدايرها زراك وحمار مطعون 

..مفتاح غرفتج وين اريد اقفلها راحن هناك البيتكم 

بجت 

..يابيت ولچ هاجر ..ماظلي بيت وراح راعيه 

بس ركزي وياي من اخذو المفاتيح هنه سوه لو غرفتج مفتاحها معزول 

..بجنطتي مفتاحها بي مدالية تلگيه يختلف مو وياهن شوفي 

رحت دورته واخذته ودرت ع البيت ولگيت يحجن بيها يگللها شجابكم عليها مبينات گصصهن فگر هي واختها ياكلن زلم 

استغفرت ربي وهنه مامنتبهات وانصدمت من ظلت تدعي عليه وعلى عمتي واحنا السبب 

لا والله ابو طبع مستحيل يغير طبعه 

خليتها تشوفني دارت وجهه وهنه هم يباوعلي بطرف عينهن وكعدن يترحمن ويواسن على اساس ونص حجيهن تحريض الى ان كم وحده من خواتها ونسوان عمامي كاللهن ذكرن الله مو وكت هالحجي البنية حظها هذا ونصيبها قابل فرحانه هي تريد تموت مبينه تحبه

رجعت لگيت عهود بالمطبخ لاحگتهن هم 

مارضت 

..امي المن جابتهن البيته شلون الها نفس فاتت البيت العمره بعرسه وماتهنى 

وهي تحجي بدا يعلى صوتها الى سمعن كلهن وفقدت السيطرة على نفسها من لطمت وصاحت بصوت عالي 

..شلون تفوت بيته بغيابه المن فايته بعديش جايه بعديش 

ول عيني يمه شكثر توسلچ شكثر رادچ 

اجن خالاتها يحجن عليها ويخزرنها تسكت وصوت مآرب مناك صراخها وبچيها بالحوش خلاني مااشوف طريقي دموعي ماؤكفت طلعت يمها وهنه وراي 

..ياابن امي ياخيي 

اجيت ادور بالمنازل واشوف اخيي وين نازل 

بيتك اظلم يابعد اختك 

وهم لازمت امها هواي 

..المن جايه بس لا ابالچ ابوي بعد الصار يخليچ 

هاي سوالف خواتچ توهن صارن خيرات ونبهنچ 

صوت مرت وسام تصيح 

.وانتن شعليچن شبيچن عليها..ترى البيت بيت عمتي بيتها هذا شبساع اتفرهد البيت وصار لفلان الله يرحم احمد سدن هالسالفة وبلا حجي 

دارت عليها مآرب 

..تعاي يمي هنا وحاجيني مو مناك تصيحين الا اطلع حرگة گلبي ولوعته بيچ وادوس راسچ برجلي ولچ خاف عبالچ غافلة عنچ ..وحق الحق اذا مااتكفيتي شري وبطلتي حيلة ومشيتي عدل تشوفين مني شي بعمرچ ماشايفته 

ادخلن ام مرت وسام وعماتها حجن على مآرب بس مبينات متحذرات منها ويردنها بس تهدأ

..مآرب محروگ گلبج على اخوج وحقچ بس لاتحچين هيج شسوت بت خالجن على كيفچن 

ردت مآرب فاحطه ومقهورة 

..سكتنها لا اعرف شلون اسكتها وخاف عبالها العدها يخوفني لا والله ماله يمي غير احترام وبس ..الحچي الحچته وي ام بنين ماينعاد سمعتها شتسولف تريد تخوف امها و تهجج البنية بس لا ابالها ترجع تاخذ بيت احمد..بعد ترابه ماناشف استحي وهذا عهد عليه وهاي انه وهذا راسي اتفل بهالگصيبة لو خليتچن تتهنن ابيت وتوصلنه حتى امي 

طلعت وهنه يحجن عليها ورجعت امها تدعي وعهود تگلها جوزي من الدعاوي ماترتاحين لمن كلنا تلفنا الگبور يلا ترتاحين 

فزيت على صوت ناسيته اصلا صاح 

..عهد 

درت مامتعوده يصيحوها بهالأسم وهي اندارتله بلهفه 

اباوع حسام 

حضنته تبچي 

باسها وسألها 

..شكو شبيها مآرب 

عيني على عيونه حمر مبين جان يبجي على نعيها وحجيها 

لو خانگ دموعه كوه 

وهي تجاوبه ونزل حمزة جكارته بيده ترجف وصخر لازمه من ايده وهذا متخبل يصيح 

..ولا وحده تبقى هنا يلاااااا الكل يطلع لحد تناقش الكل بررره 

هنه يحجن عليه وصخر هم سحبه يگله بس اهدأ والله اخذها مني محد تبقى هذا بيت مرته وابنه واخوانه وبس 

رزق گالتله

.. تطردني من بيتي حمزة هاي بدل ما تجيني اطيب خاطري تبجي وياي تگلي اني بمكانه 

..بيتچ ذاك بيت ابنچ ..احمد شگد راد يصالحچ مو گلتي البيت البي هو ومرته ماافوته ولا اريده الا يطلگها البيت هذا المرته وبنته وبحمايتي والكل يطلع يلااا 

جره صخر وحسام اشرله باصبعه يسكت طلعوه كوه وهنه خواتها طلعنها زعلانات والحجي كله على عمي ابراهيم 

وحده تكلها 

..عمت عين حظچ من انطاج ابوي اله شنو الشفتي من حياتچ بس هم وقهر ..هاي تاليها ابن رجلچ يطردچ وابنچ واگف يتفرج 

ومرت وسام ردت 

..ليش حسام يسكتله ..غير مكيف عليه وتلگيه حاقد اكثر على عمتي هو بسبب زعلها وياه بعد اول نوبة صرع وماراحتله گلها شكو متصل بيج اني انتِ اليمچ ماحانه عليه مو انوب اني البعيد وهذا كله تعلوم مآرب اربعة وعشرين ساعة تحاجيه وتعبي براسه 

لبسنها وطلعن ماقبلن ياخذنها البيت عمي رجعن البيت وسام 

وگفت منتظرة حمزة يقفل بيبيان الطابق الجوه ويسلمهن الي 

انداريت على صوت حسام 

..هاجر شلونچ 

..الله يسلمك الحمدلله 

حك طرف خشمه 

حركة صخر هايه من يريد يحجي شي ومحرج 

ظليت منتظرته يحجي انحرجت من طول بسكته بس لايكول هاي صفنت عليه شبيها امداني 

نقذني من شعور الذنب من گال 

..حاجي مرت احمد تجي هي وامها وامي شهلة هنا حتى احنا هناك اريحلنا ابيت ابونا لانتقيد ولا هي تتقيد 

..ان شاءالله احاجيها 

صاح عهود 

..انتِ وحرمة صخر حاجنها وقنعنها ترجع البيتها ماتطلع منه 

..ان شاءالله بس والله يخيي مااعتقد اهلها يخلونها 

حجتها وبجت 

..نقنعهم سهلة ان شاءالله المهم ماتطلع 

طلعو واحنا وراهم ورحنا حاجيناها وامها گاعده گالت 

..لا يمه اني هنا ايام احترام العزاء ابنكم وحتى ماتظل بحسرتها واول وتالي ماخذتها شنهي ظلتها هنا 

بنين ساكته ودموعها تنزل الحد ماگالت 

..وبتها سنتين ان شاءالله تفطمها واخذوها 

فزت فزة 

..سنتين شنو يمه بنتي ماانطيها 

سكتت امها وهي شيسكتها ماحت نوح ولطمت لطم نريد نوكفها انهارت 

امها تتوسل باست اديها اتخبلت 

..مااخليها الطفلة تموت ولا اجيبها وتحرموني منها 

ماتخافون الله منو الوداچ بهذا الراي منو 

نتوسلها تلزم نفسها گامت تضرب بطنها بقوة 

تردون تموتوني انتم ماتخافون الله بيه 

گوه امها قنعتها محد گايل وماراح يصير شي بس ظلت خايفه ووصل الحجي العمي وبالليل دز على امها يحاجيها 

گعدو هو وعمتي شهلة وعمي سليمان والولد حالفلها البيت الها وولا نفر يدخله غيره وغيرنا احنا النسوان وبس اني وحلا وعمه شهلة وخواته مو كل وحده هم 

ع الاقل تكمل عدتها هنا وبعدين يحجون وي ابوها ميصير من هسه ياخذوها وهي على وجه ولادة 

جنا خايفين اني وياها جنت يمها وماندري على شنو اتفقو وخاص هي مخابره ابو بنين واخوانها يمهم ومفهمتهم 

احس بطني گامت توجعني من الخوف هي شلون 

وجهه اصفر وتعبانه وتعض اصابع ايدها كلساع القلق موتها 

..مايخلوني اهلي ..والمن ظاله اني بس خاف اروح وصدك يسووها 

..گولي يا الله حبيبتي بلكت الله يهديهم 

..والله اهلي حنان حسبي الله على الگطع سبيل المعروف وخلاهم يشوفون تربية ابن الأخت مسؤولية لو ما اهل ابن اختي وبهذلتهم وسجنهم لاخواني وكوامتهم والفصل ماصار كل هذا 

امده حظج بنين .. امداني جنت اصبر باختي واتعذر عنهم طلع كله جذب محد مثلها ومثل نارها 

..سوده عليه ولج راح تموتين من التفكير خلي حمولج على الله وتصفى 

..والله انسلبت عافيتي حتى ماخلوني اعيش مصيبتي وابجيه على راحتي خلوني محتاره بزماني شلون من اولد 

وهي تحجي اندكت الباب فاتت حلا 

..يلا بنونه حبيبتي قوي گلبج وصيري سباعية ولزمي بيتچ ابد لااطلعين امچ راح تظل وياچ الحد ماتخلصين عدة بولادتچ 

حمدنا الله وشكرنا قنعوهم 

ومرت الايام بنين امها يمها ومرات عمتي شهلة تبات يمهن بس ارتاحت بنين لا والله مگابله صورة وذكرياتهم وتنوح 

حسام رجع التركيا وحمزة الدوامه وصخر هم التهى بدوامه شويه يكسر حاجز الحزن هناك والحالات التجيه تشوفه انواع الناس وقصص تهون عليه مرات ومرات تزيده 

واني ممقصره وياه ساندته رغم محتاجه انسند عليه بس ماابينله ..امي حتى من عرفت بموت احمد والمر علينا ماوصلتني ..اتصلت مرتين ومارديت عليها ورجع بينا ذاك البرود والانقطاع 

الولد وعمي والبنات راحت ذيج لماتهم وضحكهم صخر روحه بطرف خشمه احمد موصيه بابوه وابوه تيه شغله وكلشي

ماله خلك يومية ضغطه مرتفع 

يروح يومية يشوفه يسأل عن صحته ويرجع مامتعود يظل وياه على طول ومن تطوول گعدتهم الا يتناگرون لا هو اله خلگ ولا عمي يفوت مثل قبل هو زهگان من كلشي خاص من عمتي رزق الي مابين عليها ندم ايام الفاتحه ووراها ذبت اللوم كله بي 

مرت فتره ودخلت بشهري وجنا راجعين من الطبيب تعبانه اريد بس اوصل اتصل حسام بصخر واسمعه يغلط ويسب وصخر اتخبل هم 

عرفت من كلامهم وسام بايگ ابوه 

نهى الاتصال وبالطريق اتصل بحمزة يبلغه جان توه نازل 

وفهمت عدهم شركة توزيع توصل مخضر للمطاعم وتتعامل وياهم بجملة وكميات كبيرة نظامهم يتحاسب شهريًا وكل مره احمد الله يرحمه مجرد يحاسبهم يستلم الفلوس منهم ويسلمهم وصل بتوقيعه 

واكتشفو اليوم بعد انشغالهم هالفترة وسام محاسبهم الشهر الفات وهالشهر مستلم قبل سابع احمد دفعه والشهر هذا هم دفعة والمجموع كله وي حسابات الشركة بتوزيعاتها وفروعها واصل الشهرين 30مليون 

صخر اتخبل 

..هذا ماعنده احساس شنو من نفسية قذرة اني الهوا هذا گوه اشمه شلون يجي اباله ياخذ مكانه ويتحاسل على ابوي بهالطريقة 

هي هاي تاليها الزين يروح وظلت الوسام وامثاله 

انفعل حيل وكوه هديته 

...عمي يدري 

..هسه نوصل واشوف حمزة اكيد راح يبلغه اني اتصلت بي لايسمع ويتصرف وحده كتله جايك 

..والله عمي تعبان حرام عليه وسام منا هو منا مرته الادبسز كل مااتذكر شحاجيه الأم بنين اموت قهر ودي انتف عطوبها 

..ختولي ادبسز هاي هي لو ادمية ماصارت الوسام اثنينهم نفس القذارة 

خو مااهلها رجعو يحاجوها بهالموضوع 

..لا امها مامبلغتهم ابد ..هي الچلبه گايله الأمها بعدهي صغيره وتطلع عليها حجايه هنا لتخلوها 

امها لو حجت الأهلها يقتنعون بكلام عمي مستحيل 

..وهي خايفه على وسام منو يگلبه على گولت امي منو تقبل بي عمت عينه النذل ياخذ مكان أحمد هالناقص

سكتت حسيته انقهر اكثر مااريد احجي وازيده

..رشا شخبارها ماعرفت شلون صارت اليوم 

..اتصلت بعمي مساع بدخلتچ يگول مثل ماهي وحالتها تسوء اكثر 

..ترى لازم تبلغون اسعد بحالتها مو مال اعذار 

حك ذقنه ودار الستيرن 

..بلغته واجاهم هسه 

وصلنا البيت وباب بيت عمي هوسه صياح من بره 

فتنا حمزة يتحلف بوسام وعمي ابرود گله 

..خل ياخذهن خيولي بس خل يطلع من الشركة اني مابيه حيل شماته ولو طلع كلام وكلها عرفت شراح احصل غير النقد البيه كافيني ظهري مكسور والله اعلم بحكمته من اخذ الزين وخلالي النذل هذا شسوي اطرده من البيت واهجوله هم اخاف الله بجهاله افضحه الفضيحه الي سدو السالفه وسكتو ترى گلبي يوجعني ومالي خلك احجي الساني خدر 

حلا خايفه عليه وتنوسل بيهم يسمعون منه وصخر اشرلها تجيب جهاز الضغط بس قراه جكك اصابع ابوه وعصرهن مااعرف ليش واخذه وطلع للمستشفى كوه قنعه يروح 

والظاهر خاف عليه من الجلطة لأن عنده قديمة عابره 

الحمدلله متلاحكينه منزلين ضغطه تفاجأت برجعته صخر استلم افرع ابوه الي هنا كلها 

شلون اقتنع يلزم كلشي جان رافضه شلون قبل يتعاون الهذا الحد ماندري چان ضايج وكاره روحه مسؤولية وماحابها ابد بس مجبور حسيته وهم خايف على مشاعر عمتي عبالك خاينها رغم عمتي اكثر وحده واست عمي ويوم كامل كلها بس انعيلي وابجي وياي وماكالت لا 

بس هو حساباته تختلف 

ومن شافها فرحت بوگفته الأبوه وشجعته شويه ارتاح وهان عليه الموضوع 

بس صرنا ابد منشوفه الا وكت النوم يجي ميت تعب 

متحمله وياه واحاول اخفف عنه تعبه 

الى ان ثکل حملي كلش ووصلت اخر ايامي وبدت عندي علامات ولادتيتقتربت وعمتي عرفتني عينها عليه وگالتله اخذها الطبيبتها مالحك اول يوم خليته وثاني يوم هم اتعذر ثالث يوم اجه متأخر واني طنگرت مااروح 

حاول يقنعني ابد قفلت 

اني شفته مو مثل قبل والتهى عني وهو يشوف الزعل مو وقته واني بطرانه واتحجج 

طلع ضايج وعمتي محتاره بينا 

رجع بعد ساعتين واكفه ع الكاونتر اغسل مواعين حضني وسحبني راسي صار على صدره باس رگبتي 

..ترى والله اني تعبان على كيفچ وياي 

..اني هم تعبانه وعاذرتك بس مو هيچ انت صرت ماتهتم الي ابد 

..منو مامهتم اني مهموم وفكري يمچ ويم ولادتچ شاغلتني اكثر جاي احاول اخلص شغل ليگدام ارتب اموري حتى اتفرغلكم 

..هم منو تتفرغلهم مخليني وي الكل ماجنت هيج ابد 

اني هم خايفه وقلقه وايام المرت علينا مو شويه جنت اريد حجه عبالك 

عيوني غورگت وعصبت حيل 

..انتِ واحمد 

..شبيك صخر ركز شنو هالحچي 

..راح اسمي ابنا احمد 

انتبهت عيونه تلمع دموع ضامها بمكابره وفرحه بعيونه وامل 

..عاشت الأسامي ان شاءالله يكون مثله خلوق ووطيب وينطيه عمر اضعاف 

..امين هو خل يجي اريد گلبي يرجع يدگ بصورة طبيعية اريد امل يغير نظرتي للحياة من بعده ..اني متندم على كل لحظة ابتعدت بيها عنه متندم لأن مااتقاربنا الا على كبر 

..ان شاءالله يبقى ذكره وراعو بنته لو صارت 

..ليش رفضت تروح وياچ بس لأن لازمه عده 

..لا معانده تروح خبلتني شكد حجيت ماتسمع وتتمنى تظل بتها ابطنها العمر كله تكول اتمنى مااجيب وكل مااقترب من الولادة اخاف 

سكت مقهور 

..يلا امشينا نروح مدام اكو وكت بعد 

..والله بعد ماترهم باجر ان شاءالله وبدون زعل 

باسني 

..هذا هو باجر ..حاجه عمتي راح 

حسيت بلويه خفيفه 

وراحت 

اني سامعه هالايام كلها هيج كالو الام تجي وتروح 

وزادت اللويات بس مو قوية حيل الحد اثنعش بالليل صارت تنعاد بفترات قريبة بلغت عمتي گالت هسه تجهزين جنطتج مانبقى بعد شمتانيه ياعمه غير هي هاي الطلوگه 

راحت خبلته وهي تحجي عليه 

..بنيه ماتسأل ماتكول المن ساكته حاجيني المن 

..عمه خوفتيه شبيج مو هيج 

..خوفته شعليه يطلگ يجيب هو شو امشي جدامي يلا 

طلع مخبوص يحسب فلوسه ويتأكد من الهويات 

..على كيفك يمه 

..انتِ خليتي بيها كيف يايمه غير خبلتيني 

كل شويه ودار عليه يعرفني من اتصفصف ووجعي ينگلب جايتني لويه ومن حالتي طبيعية يكلي هسه يطلع مقلب بيه وبأمي 

وصلنا والحمدلله بعد الفحص گالو عدها ولاده ودخلت عمتي شهلة وياي الموت شفته ودعيت بشدتي البنين تجيب بسلامة والله لايفرقها عن بتها ويشافي عمي ويخفف همه ودعيت الرشا هم محد عرف علتها 

مااعرف شلون اوصف الم الولادة بس فعلا روح تطلع من روح بعد ساعات وقدرة تحمل ظنيت الألم فاق طاقتي بس عده وگدرت اولد بسلامة ونور حياتنا احمد حبيبي الي نزلت دموعي بشوفته جنت اريد اشوفه وهو بديهن شنو لون بشرته اكثر موضوع شاغل بالي بشكله وشفته لا اسمر طوخ مثلي ولا ابيض 

باستني عمتي وهي تمسح بوجهي وتبجي 

..ياهجوره يايمه فدوه اروحلچ الف الحمدلله على سلامتكم ..سباعية بنيتي هل جبتي بسلامة وعين الله على وليدچ بعد روحي هو وابوه 

ابتسمت واشرلها خل اشوفه 

اخذنه يسبحنه وبدلنه وجابنه اباوعله عبالك مالكه الكون 

..ياحبيبي يا ماما ان شاءالله اصيرلك ام صالحه تستاهل هالوجه الحلو واتذكرت دعاء عمتي شهله بسته بجبينه 

..الله يرزقنا برك ياحبيبي ويرزقك رضانا اني وابوك 

شويه وجهزني ونقلوني الغرفة ثانية 

فات باسني براسي وخدي 

..الحمدلله على السلامة حبيبتي الف الحمدلله 

باوعت نوره واكفه تصور وباچيه وراها حلا وعمي فاتو كلهم يباركولي بجيت من شفت عمي دموعه نزلن من صخر يسمع الطفل ويگله سميتك احمد 

ارتاحيت وفرحت بلمتهم هم ذوله اهلي واهله الله لايحرمني لمتهم وتواصلهم 

رجعنا للبيت كلهن البنات اجن ماقصرن بس مكانه خالي بوجوه الكل 

وعمي گابله وگعد عبالك هو مولود من جديد وفوگ انتظاره الابنه ومعزته المتوقعيها الاسم خلاه يزيد تعلق بيه 

بعد ماكلهم راحت اتصلت بيه بنين تسلم وتتحمد عالسلامة ماتكدر تجي لازمه عدة ويمكن تخاف عليه من المايصلح هم امها الكلشي تحسب وعاداتهم هم بيها اختلاف بس عرفت منها نوره مشوفتها كل اللحظات واللقطات الي مصورتهن 

وبدت حياتنا تترتب وياه رغم السهر والتعب بس هو صار كل حياتنا خاص صخر وعمي وعمتي ..خو عمتي من يجي عمي تتكدر وتظل ادردم مرات يضحك مرات يعاندها مرات يغلس جن الكلام مو يمه ابد 

وكلشي مر تمام الحد ماجابت بنين بيوم ولادتها تعبت حيل وگالت حلا گوه جيبنها مالها طاقة ابد البنية سحبنها سحب كوه حتى خفنا عليها لاتنخلع ودزوها الطبيب الاطفال يجيكها الحمدلله سليمة وبنين منتهيه تعبانه حيل وتحتاج عنايه وهسه امها تريد تاخذها بس تتعالج وتصير احسن وترجع 

عمي ماتركهن بنفسه وصلهن هو وحمزة بعد ماانطو مصرف زايد وجهزوها من كلشي ورجعو 

عمي گال اربعين يوم ونجيبها وخلال هالأيام راحلهم صخر وعمي مره ومره حمزة 

وبموعد جيتها منطين العمي بنتها ورافضين تجي 

وحتى من عمي گايلهم خلوها يمها ماقابل اخوها الجبير 

من عرفنا اتخبلنا عمي من قهره خايف يتخربط بالطريق ماخذها ورايح الخوال صخر واتصل بالولد بلغهم وطبعا الولد الي يفهمون رايهم راي حمزة وصخر والصغار مابيدهم سي ولا الهم راي البنات من عرفن گلبنها مناحة واني بالي كله يم بنين مخليه حمودي بحضني وابجي 

طلعوله بعد الظهر صخر وحمزة ورجعو بالليل متأخر بنين والبنية وياهم شلون قنعوهم محد حجه وهم بالطريق

الى ان صخر بالليل اجه وصدمني من گال 

..عقد عليها حسام بالتليفون ومااريد احد يعرف ابد هذا شرطه احمد ماصارله هواي وهو بالخارج ماجاي ولا واصلها .. هنا ياكلون وجهه اكل على ابو اتزوج مرت اخوه قبل لاتدور سنته 

..شلون قبلت بنين 

..الله يعينها ..انجبرت ترى 

سكتت واريد بس يجي الصبح واروحلها 

واول ماطلع الصبح درتلها بش شتفتني شبكتني تنحب 

يتبع ...

              الفصل الثامن والثلاثون من هنا 

لقراءة جميع فصول الرواية من هنا 

تعديل المقال