رواية كتوف مائلة الفصل الحادي عشر 11 بقلم نور الشمس

رواية كتوف مائلة الفصل الحادي عشر 11

بقلم نور الشمس

...

صخر...

بعد مااخذت عهود وايام وهي كلش متقيدة وتعبانه گدرت يوم بعد يوم واني احجي وياها اكسر الحاجز البانيته هي لأن اني عن نفسي من رحت جبتها هدمت كل الحواجز 

بعد ماگدرت تستوعب الصدمة العاشتها حاجيتها بجدية تنطيني رقم شخص تحسن الظن بي من اهل زوجها

اب اخ اي شخص غيره لأن مااريد اسويله قيمة ويگعد يهوس براسي واني مااتحمل اجاريه واسكت 

انطتني رقم حماها الجبير سلمت عليه وعرفت عن نفسي وگتله 

..اني خال انس واريد الأطفال الأمهم رجعه رافضه ترجع ومامعقولة تقبلون اطفال يبعدون عن امهم اكثر من هيچ 

الولد چان مهذب بس ظل يطالب بالرجعة 

..انت اخوها ؟ ولو ماحصل النا الشرف واتعرفنا عليك نعرف عبد واخوته ونعم منهم ومنك .. بس اتمنى تصلح بينهم والزواج احنا اهله ماراضين بي ولا شجعناه عليه بس امر وصار وهي تبقى الاولى ام الجهال معززة مكرمة ابيتها وشگد مابعد اخرته يمل ويرجع للأصل 

..ياحبيبي ميخالف بس اني شلون اصلح والبنية رافضه أي كلام يخص الرجعة 

..مو هي من تشوفك مساندها طبعا تتشجع وتصر على الانفصال

..يعني لازم اشيل ايدي واخليها بين خيارين موت او ترجع للأنسان الكسرها ورخص بيها وسلب حقها بالاختيار ماكلف نفسه وسألها تقبل ترفض تگدر تتقبل او لا 

..لا موت شنو اعوذ بالله ام انس عاقله وماتسويها وهو ماكان يظن ترفض نهائيًا خاص هي من بيئة عدهم الزواج والتعدد امر عادي ابوك عمامك ولدهم انت اعرف بيهم مايحتاج اعددلك 

..لا غلطان بظنه هي لو تريد مثلهم جان انفصلت بأول ازمة مر بيها لأن مابيهم واحد گعد على خسارته وظل يتحجج بيها ومايصرف على اهل بيته .. ولا يوم شكت منه وقللت منه وهو چان فرحان اهلها مكفينها وهو يدز حوالات الصاحبته واهلها الحد ماجابها يمه 

صح اعلها يعددون ومو عادلين اني اكلك مو عادلين وهذا السبب الخلاني اوكف وياها بس يطلعون قوت اولادهم وزوجاتهم من جوه الگاع 

واذا عدنا واحد من اخوانا مابي خير الاهله احنا نتكفل عائلته بينا ولا نخليهم بحاجة ونبرر السوالفهم 

اني مااريد اعيره بس هو تذكير 

ام انس اتقبلت كلشي بس ماتگدر تبلع خيانته واستغفاله الها واتصالي بيك مو باب للعتب بس رايد منكم تدخلون والاطفال اريدهم الامهم ماقصرنا وياهم وهم عنده ماراح نقصر وهم بنصنا 

..كل هذا نعرف بي مانگدر ننكره اهلها ماقصرو وحتى من خيرات گيعان يدزون ...والاطفال اكيد ماالهم غير امهم يقبل مايقبل هي احن من كل شخص عليهم امي تعبانه وخواتي البنات يدرسن مامتفرغات الهم وزوجته من اول يوم رفضت تتقبل نفر منهم 

..تمام الله يجزيك الخير المغرب استلمهم من العصر اطلعلكم للدورة واريد انت تسلمهم الي مو غيرك 

..هذا هو ولو اني مااتمنى الطلاگ ابد وراح ابقى احاول وياكم ع الصلح 

مارديت عليه بخصوص كلامه الاخير سلمت ونهيت الاتصال ورجعت يمها هي وامي مندمجات يسولفن والظاهر امي حبت تشوفها مصايبها بلكي تهون عليها مصيبتها 

تركتهن على راحتهن وطلعت اريد من وكت اجيبهم لاگوني عزام وعمار راجعين من البستان وكفت اسلم عليهم واريد واحد منهم يوصلني للشارع اجرلي سيارة هنا ماكو مااحصل 

وشفت وراهم يتمشون جوگات اولاد عمي واخواني متربين وبيدهم ادواتهم 

صار يومين اني ماطالع وياهم 

صاح احمد 

..اشهلنا الفايخ العطر من بعيد يهب واني ريحتي تراب وعرگ الحمام هسه اشتري بفلوس بس كون حمام مضبوط مو اني المتعاجز اسبح بيدي 

..تعال وياي واوديك حمام رجالي مضبوط بين مااجيب الجهال الأمهم

وسام يمشي وياهم يريد يعبر على بيته ووگف 

..ياجهال تجيبهم 

..جهال اختك عهود 

..المن جايبهم مسؤولية منو يتحملهم خليهم يم ابوهم وتنجبر ترجعلهم 

..اني ارد اجيبهم مااريدها تنجبر ..احمد استعجل جيبلك ملابس وتعال وياي 

احمد رجع متسائل 

.. صدگ لو ناصب عليه بداعة امك 

..الف مره گتلك لاتحلفني على يوم اكسر ظهرك ..تعال والله حمام مضبوط وياه اطگطگ ظهرك شتريد بعد 

..اوگفلي اجيك 

وسام رجع يحجي واني تركته حاجيت الولد 

هم يگلون الاحمد روح هنيالك هم حمام وهم طگطگة 

وعمار يكلهم صخر يشوفنا هياكل جسم للأنسان مو هيئة بشر كل ماحلاله طكطگنا 

..انت بالذات ولا يوم عرضت عليك اسمك تتوسل الوثاب عندي بي ألم چتفي يوجعني صوجي اسويلك زينه 

ضحكو ووسام گال 

..مو احجي وياك 

..شنو تريد ماانتبهت 

..تريد تجيبهم وحدك لو يدرون ..ابوي بس اني اتعاجز من لگمة جهالي وهجولني وجايب ولد الغريب يربيهم

..يخوي اليسمعك يصدگ مهجولك..ابوك منطيك بيت مأثث وعبد شجيب هنا يمر على اهلك ينزل مسواگهم يلا يرجع الأهله هنا ..انت بنعمة غيرك مامحصلها بعدين ولد الناس شنو.. ولد اختك ذوله الهم منك ثلثين الله لايكولها 

ضحكو الولد وهو هز ايده راح مقهور صحت وراه 

..لاتخاف مو يم ابوك يمي اني اصرف عليهم 

مادار وجهه وفات البيتهم عمار گال 

..همزين اني بصفكم امهم من تظل هنا جهالي يرحون البيتنا مامتعودين يظلون 

..طارديهم جهالك شو ماتستحي انت 

..هسه انت شعليك ادافعلها كلها يجوز عمي وعمتي يطردون شعليك انت 

..ابراهيم تلاف وعايش اللحظة احفاده يمه ونسوانه سلطان زمانه وطرده الوسام يريد يسويه رجال يعتمد عليه اجراء متأخر بس صحيح 

..منتبه صاير هواي ادافعله 

..اني ؟..دولي اشتعلت لشتك انت وعمك مو مال احترام انت

صحت بصوت عالي 

..احمد راح اعوفك 

طلع بيده علاگة ملابسه ومنشف ووراه حمزة 

..خير شطلعك من البيت انت 

..اسبح وياكم ترى اني وصخ كلش حتى اسأل امي مااسبح الا وبيدها واير يلا افوت 

..طاح حظك ماخذكم نسد مجاري الحمام امشي ارجع 

..يول سابح امس بس اختنكت ارد اطلع مليت من الكتب 

..يلا عمار وصلنا ..عزام روح المرتك خو ماهم تريد تسبح 

..اني اسبح باليوم اربع مرات ماميت على حمامك 

..انعل لشتك انت وسبحك لعبان نفس ولي منا يلا انزل 

..تعال يلا بمكاني 

..تعال احمد اكعد هنا بمكان عزام ..مكانه هم مااريده 

اتحرك بينا عمار وصلنا المكان نكدر نأجر منه سيارة 

نزلنا واجرنا گبل للحمام الرجالي 

اول مافتنا خلو غراضهم باللوكر 

اتعاركو ع المكان كل واحد يگول هذا الي 

ونفس الشي من لبسو برجليهم 

ومثل الجهال بس دخلنا للقسم الجوه رگضو يتزحلگون وصوت ضحكهم هز المكان 

..وتالي وياكم قشامر ..لا والله اني القشمر الجبتكم 

صاح احمد 

..عليك الله لاتصير نفسية بعرس ابوك ماشايفين هيچ حمام اذا انت متعود خلينا 

..ههههه تحسسني بعرس ابوك متونسين مو تشردون من المشاكل ..هذا الحمام ابوكم معميله حتى زفات گامو يزفوه هنا 

..لاعليك الله شمدريك 

..ادري بي شعليكم منين دريت 

..والله زين منه ابوي جنت متوقع اكثر خاف غير كوادر بالشفت الثاني كادر متنوع لو نفسهم 

.. طولان السانك حمزة 

كملو مرحلة الساونا والتدليك والمساج اني طگطگتلهم ظهرهم كتفهم رجليهم عالجتها احمد من التعب رجله متشنجة الحد ما

طلعو جدد بالباكيت ونفسيتهم اتغيرت الطريق كله يحششون بينهم 

شويه وحاجاني حمزة 

..اوگف يم اقرب واحد عنده ميزان اكيد نزلنا كم كيلوو لأن هسه صرت ريشة 

خزرته لأن زهگني 

..هو يلام ابراهيم يكلك وخر عينك اكيد يخاف من هاي النظرات 

احمد ضحك وگال

..لا ولك تذكره بعين ذولاك الناس 

..احمد انچب انت وياه بدون لغوة والتوبة اذا جبتكم بعد ..سوه وياي مااطلعون جنكم جهال 

اتصلت بعم الجهال ورحنالهم للدورة جبناهم فرحو من شافو احمد وحمزة راحولهم ركض 

حاجيتهم اضحك 

..هسه ان شاءالله وصلتلكم الفكرة ليش جبتكم ؟

احمد گال

هذا النوع من الاستغلال محبب بالنسبة الي 

وحمزة يرد

..عليك الله استغلني هواي شگد ماتكدر استغل واحنا هم راح نستغلك بس اريد مطعم متنا جوع من بعد الحمام جعنا 

..جاهل وتجوع من الحمام ابن نفاس انت 

عافني وحاچه الجهال 

..انوسي خالو خالكم صخر يريد يعشيكم شنو تحبون؟

سويتله حركه بيدي 

.. ابوك على ابوهم ..تلعب نفسي مطعم ماافوت 

..لاتفوت انت اتونس هنا بره واحنا ناكل عنك وعنا 

..امشي فوت اطلبلهم واني انتظركم هنا يلا

ادخل احمد ومدري شعجب طلعت منه زينه 

..لا هيج هواي عليك ماقصرت اشهلنا 

اني ادفع الحساب بس حمزة اطلبله نص نفر زايد عليه لو اگلهم يتيم وماعنده الراجع من الناس وكلوه

ضحكت 

..استغفر الله فضوني يلا 

..وناكل وانت لا 

..ماكل متأخر هو غدا هو عشا مااريد بس خل تفض وخلصوني 

راحو نزلو اكلات واحمد كل طلب ياشرون عليه يأشر على گلبه 

الحد مانزل الاكل اكلو طلعنا اشتريت الهم حلويات مني مستغربيني حيل وكلش خجلانين 

..ماتتعلمون تستحون منهم 

باوعلهم حمزة يضحك 

..لاتنغر صخر اني اعرفك اذكى من هيج يابه من يوگعون الميانة تظل تبجي على طاري الخجل والحيا 

..ها هم عدهم سوالف 

..اووو خليهم يومين يمك وتشوف بعينك 

اجرنا سيارة ورجعنا وسيارات بالليل مايفوتن مناطقنا جوه الهسه تخاف الناس 

اتصلت بمهيب يطلعلنا ينتظرنا ويرجعنا 

واني بالطريق راسلتني رشا تريد تتصل بيه تسأل مشغول لو لا ومن كتلها اتصلي واتصلت حجتلي الموضوع

ماجنت ادري شصاير وي ابوي وأهل عاصم ماصادفته واعرف شنو الصار بس من رشا حاجتني وتريد اتوسط يمه تروح البنيه البيت عمها لأن هو رافض

وحجت شصاير وياها

ولأول مره تعجبتني طلعة من طلعات ابراهم 

من اخذت الجهال الامهم عهود استحت يمكن من اجو جهالها اخذتهم ودارت هناك وصيتها الباب مفتوحلها شوكت ماتجي لو نص الليل 

وعدتني تجيبهم وتجي بس يومين تبقى هناك 

شويه واندكت الباب 

وحمزة اجه وقرر يبقى يمنا مو هناك لأن هو واخواني الأصغر منه مايتوالمون وعبد من يزهگ منهم يطبگهم كلهم بالرزايل ...وهم هو يرتاح الأمي اكثر شجعته يجي هنا خاص اجواء بيتنا مناسبة اكثر المراجعة السادس 

بالليل ظل يفتر مامستقر ..چنت اتصفح بتليفوني اتابع معالجة حالات بعلاج طبيعي واقرا تقارير هم 

وقلقني گد ماافتر 

..شبيك ماتثبت شكو لو صار بيت اهلك عزيز اليوم 

..خايف من طلعات ابوك 

..شعجب واحد منكم خاف من طلعاته شمسويلكم ابراهيم الفقير.

..مادام جابهه يمه ورافض عثمان ياخذها بحجة تقصيرهم وراه موال وخاف يجبرني اتزوجها والا شمعنى اختار امي !

..تتزوجها شنو البنت اكبر منك بسنتين اول كلية ومتأخره سنة اذا مو اكثر ..وابوك يدري بيك بالك وين انت.. لاتخاف مايسويها وخلاها يم امك لأن بنات وهي بنيه اخواني صغار ماينحسبون وانت نفر لو اجيت يمي ويم باقي اخواني ماتتأثر

..اول مره ماتتشائم انت مع هذا گلبي مامرتاح 

..اعوذ بالله منك من تقلق تقلق الأمة كلها الله يحفظلك الوالده مدري عليمن طالع ..عوف هالقلق وأقرا ولا تشغل بالك بمواضيع مو وكتها 

بالليل ارد انام اجتني رسالة من عهود فرحت بيها مدري شنو من شعور جاس گلبي 

كاتبتلي 

..مااعرف شلون اشكرك بس ادعي الله يوفقك ويكتبلك الخير واول مره ادعي الابوي من صدگ لأن جابك اخ الي 

ضحكت وكتبت 

..الله يحفظج خيتي.. واني هم لأول مره افرح بدعوة تجي الابوي بسببي 

دزتلي ضحكه 

واندكت الباب طلعت لگيته ابراهيم يمكن رجله حكته 

بدون سلام گال 

..ويامن تروح يومية الدوامك ؟

..وي مهيب متحملني الولد الله يجزيه الخير..ليش؟

..باجر الصبح عندي شغل بت عمك مااگدر اوصلها الصبح.. اني اجيبها بس وديها انت تكدر لو هم تردني 

..اني مو صاحب السيارة اني حمل على الولد اخذلي تعلاوة ؟

.صح مهيب مو غريب ومايگول بس بطبعي اخجل لاتشوفني وياك ..حاجيه وبلغه انت..

..ادري بيك وياي زايح الخجل ميخالف اني هم مااحب اليخجل ..بس اني اريدها وياك انت مو وي مهيب ..يعني تأجر هي وياك وي مهيب وياك وي غيره هم وياك 

..اوامر هاي لو طلب 

..بكيفك شتشوفها انت ..بس ماامن عليها وي غيرك وتعرف هي بنية .. واختك حجتلك كلشي بعد ليش تسوي روحك ماتعرف

..ليش مأمن بيها وياي لأن تدري بفضلك اشرد الف ميل عن كل علاقة ومايترتب عليها 

..نيتك مو خوش نية ..ومنو كلك غيرك يستغلوها من ولدنا كلكم بيكم غيرة بس القصد انت اكثر حرص وقريب على دوامها هم 

..اذا تدري برشا حاجيتلي يعني تدري هي موسطتني احاجيك تروح يمهم 

..ماتروح انسى ..

..ليش؟

قلصت عيوني مركز بيه اريد افهم ابتسم وهو يباوعلي 

..شنو الموال الي براسك ابو البراهم 

..سافل وماتجوز ..ماكو موال بس عمامها مابيهم خير ومااخليها عدهم وابوها لو يدري بيهم خير ماخلاها بوصايتي 

..هو حتى ابوها دايخ الله يرحمه ..ضربني بجتفي ارتديت الوره من قوتها رغم هو مترهي بس اني جنت مامحسب الها

..اخخ ..بيك حيل بعد زواجتين مااطلگ رسمي وتخليلك مجال تداور بي وحده بعد 

سرح شعره بيده وضحك 

..لوو تمووت هاي السالفة ماتصير ..جايك بموضوع ركز بي ولا اتعبني 

..شسووله هذا الحيوان 

..علي وعثمان يتهددون الكتله واجدادك اتخذوا قرار يشيل ابوه منا وتخلص السالفة بينا 

..بينكم ؟ كل هذا ومافضحتوها 

..نفضحها شنو..بابا البنية مالها ذنب بالعكس سباعية وماخلته يطول اظفرها .لاتحسسها بشي باجر

..كل ظنك اگعد اسطر سوالف؟ هواية وحده ماخذها منك الحمدلله باقي الهوايات مو يمي 

دار وجهه وراح 

رجعت افكر احس تقيدت بيها هسه اني وحاير بروحي يومية انوب بنت عاصم يلا هو يوم مايأثر

ثاني يوم الصبح ابويه لگيته واكف وي مهيب ويحجون بينهم صعدت واشرتله يلا خل تجي

شويه واجت البنية صعدت 

بعد ماساعة يوصي ومهيب وياه يسولف ويضحك 

گال 

..مااوصيكم بعد 

..ابراهيم من البارحه تصيح مااوصي بعد وكل شويه تعيدهن لاتوصي حفظنا 

الطريق كله مهيب يسولف وعينه ع المراية يراقبها 

ويحجي وياي بمواضيع مدري شلون سوالفه بمكان وتركيزة بمكان 

..لاتدعمنا خرب بيومك انت شلون بمرضاك !؟

..طاحظ نيتك والله ولا ابالي ..ومرضاي قاسم عليهم قسم مااتجاوزه 

..هنيالنا عمي بهالأيمان 

..اني بالبيت فوگ راسي ضابط وهنا انت مكلف بيه 

..اني مقدر وضع الرئة عندك واتجاوز هوايه بس هالمره لا مااگدر الا الامانات 

..زوج الي يصعدك بعد ماتنجرع مو وحدك انت وابوك وسوالفه 

ضحكت وعرفت قصده امانته 

وصلناها ونزلت اجرت تكسي الدوامي وهو طلع الدوامه لأن يتأخر

بغداد تقفل الصبح وكت الدوام 

اتصل بيه ابوي حفظت رقمه لأن هوايه لح هالأيام

بس متعمد كتله 

..رقم غريب منوو حضرتك 

گدرت انرفزة على غير عادته وبنتر رد 

..ابوك المشعول

ضحكت وهو سأل 

..بت عمك وصلتها؟

..اي وصلناها ولاتنساها مر عليها خاف نسوانك يلهنك 

..لا ماانساها شلون انسى 

ومرت ايام يومية مطلعله عذر ناخذها ويانا 

وهو يرجعها وماكو اي حديث بينا 

وبيوم بالليل اتصلت بيه رشا هي وريم مجتمعات يم اهلها ورحت اشوفهن 

وبعد السلام وسوالفنا وضحكنا 

انطتني فلوس السيارة 

..هاي فلوسك وفوگهن عيوني الك هم 

..شسوي بعيونچ فلوسي كافي ..وسلامتج اهم واني اترخص بالجمعة تعالن مرنا عازمچن على بأچات وكسور

..اوكف مااتفاهمنا شدعوه مستعجل 

..عهود يمنا وجهالها يحتاجون اغراض وعدتها مااتأخر 

..الله صخرنا الاشهل جبت عمري اتمنى خواتك يقدرنك ويعرفن قيمتك الحمدلله وتحقق مناي بس احنا مو تنسانا 

..انتن الأصل لأن حسستني بالأخوة بالنفاه وبالضيگ وبكل مواقف حاضرات بگلبي وگدام عيني ..ماكتيلي صدك مشيلينه اخو مرت عاصم

..اي شال البارحه وهي ظاله تدعي على البنية ليل ونهار لأن اهلها لايميها وشابعه رزايل وقهر ماگعدت ابيتها وسكتت معززه مكرمة اتعافت

..خل تدعي دعاها مثل دعاء رزق يوصل للسگف ويرجع عليها 

ضحكن 

..اوگف ليش مستعجل 

..غير تحجيها للدرة الضامتها 

شضامة اختجن 

ضحكن البنات وهي تلح 

..اكعد خل تتفاهم وياك 

..شكوو 

..صخر فدوه لاتردني انت مو وگفت وياي بضيق احوالي وقبلتها منك برحابة صدر 

..غير اخوج اني غصبا عليج مو طيب منج اكو وحده تستنكف من اخوها 

..عليك نور يااخي واني هم اختك واستلمت سلفتي 30 مليون واخذت الاحتاجة وزادن عشره منها مو بحاجتها اخذهن فوك الطلب العندك فلوسك وذني زيادة مني دين وهاي السنة اكيد هم جمعت بيها واشتريلك سيارة حتى انتعبك بمشاويرنا 

اجمعهن واشتري يصيرن مبلغ زين 

..لا رشا هي وحده بوحده لو شنو ؟

..غير اخوان احنا 

..اني من انطيتج فارغ ماوراي حية تعترض العربيد العندج يدري لو من راسج تتصرفين 

ضحكت والبنات وياها دخلن نوبة ضحك بهستيريا 

فاتت خالتها سلمت وگعدن بدون كلام 

ماحبيت ابقى طلعت وبيدي فلوسي 

جابت جنطتها بيدها وتمشي وراي توصلني للباب ووراها غزل 

صاحت 

..عليك الله اخذهن اريد اطلع وياك ترى الحبسة موتتني 

..اني الاغراءات ماتنفع وياي غزولة

ورشا حجت بجدية 

..والله عثمان معليه مايدخل سلفته هو اخذها للبيت وسد الدين الف الحمدلله وسيارة عنده 

واني نصحوني اشتري ذهب شسوي بي العندي مالابسته لاتردني ترى ازعل 

..ابو الروش وگفات اخوو وكفاتك هاي راح اخذهن وبأقرب وكت اسددج والله 

..شلون شعور حلوو جنت مطلوبه وصرت اطلب 

ضحكت ومشيت بس وصلت البيت اجتني منها رسالة 

..تصبح على عشرة مليون خير 

..اللهم طولج ياروح شراح يخلصها وياج بعد شهرين تخليني اجدي اباب ابو الجوادين 

من ثاني يوم بديت ادور بالمعارض عن المواصفات الأريدها 

واخيرا اشتريت سيارة جيب عالية 

واول ماطلعت بيها اخذت امي وخواتي للإمام الكاظم عليه السلام وللشيخين ابو حنيفة والشيخ عبد القادر 

بس خطيه رجعن ميتات جوع وياي لأن ماقبلت اوكف يم مطعم واكل واول مارجعنا

بالحديقة حضرت المناقل وشويت كل وجبه تطلع ادزها الهن الحد اخر وجبه الي توني اكل وابوي صاحني من الباب 

لفتي بيدي وبگلبي گلت كثرانه جياتك 

اشرت للبنات وامي يفوتن جوه اصواتهن طالعه

وطلعت 

باركلي على السيارة ورجع يأكد 

..لاتنسى بت عمك 

..ها شو التوصيلة ركبتها براسي رسمي 

..باجر طالع محافظات 

..لو مامقبط گلت راح يتزوج ويجدد

.. شگد ماتصير سافل اكثر احبك اكثر ..المهم لاتنسى 

.. هسه طمنتني ضمنت الجنة بحبك ..وولا يهمك ابراهيم نسوي زين ونذب بالشط 

....

هاجر ...

أكثر ما يُتعبني في رحلة الأغتراب هذه أنني أصبحتُ مضطرة أن أبدوا قوية كل يوم، 

حتى في الأيام التي أتمنى فيها لو يربّت أحدهم على قلبي فقط.

اتعب واني اشرح شكد صعبة عليه هالمرحلة 

رغم البنات هوايه هونن عليه هذا الأحساس بس امهم مبينه كلش صعبة ومتتفاهم على اقل موضوع 

تخبصهم خبص من الامهات الي يحبن يرزلن 

واتي من يمي اتقيد اكثر بصياحها 

اما عمو ابراهيم صح احبه وصرت اتلهف الجيته اكثر من جية ابوي نفسه بأول جيتي الهم وبحياته 

وبسببي الظاهر كثر جياته البيته وجنت اشوف مرته فرحانه الهذا السبب 

وهو يعاملها طبيعي عادي بس كل شويه يعيد عليها 

وينبهه على صوتها 

وبيوم ماصبر گدامنا صاح 

..فيحاااء اكره الصوت العالي ومااتعودتي على طبعي وبدلتيه اني يمج تصيحين ليش

..المفروض انت تتعود وتعرف شگد حاولت ماكدرت وهم انت سبب من وراك ظلت عندي اعصاب اكدر اتحكم شوفتني الويل وصوتي ماعاجبك 

..مشوفج الويل بيمن متكليلي شجاريلچ 

..بزواجاتك غير 

..ترى انتِ ثالثة 

..هم اغار عليك منهن 

ضحك وغمزلها تسكت لأن گاعدين احنا 

شويه وگال النور اخذي خواتج وخل بطه تقرا زين عبد يكول مدرستها تشكي منها 

بطه بسرعة راحت ترفس برجلهه وتبجي 

عبالك انبسطت وسبوها 

حاجيتها اني 

..شبيج بطوط ترى بس رادوج تقرين اكثر 

..اني مسويه دايت ومن اقرا اجوع معناه الدايت خرب من هسه 

ضحكت من گلبي صار شگد ماضاحكه هيچ 

..والله يابطوط حقچ صح القراية تجوع بس العنده اراده يتحمل 

..گلتيها العنده واني ماعندي 

..وليش هيچ مأثر بيج الموضوع بعدج صغيرة مجرد حركة وترك الحلويات يغيرچ ..بس انتِ ليش مصره على الضعف هسه خليها للعطلة لو لأن يتنمرون عليج 

..اي يتنمرون خاص ولد عمي هذا حارث السز ولا عبالك جبير كل ماشافني وگال دبدوب متبيع خدود عابت چهرته 

..مااعرفه منو هو بس يجوز يقصد حلوات ترى تموت خدودچ ..واذا يتنمر ترى المتنمر هو انسان قبيح من الداخل وهذا القبح مساوؤة اكثر 

..والله انتِ حبابه عليچ الله ابقي على طول يمنا صيري اختنا الوحيدة المحترمتني بهالعائلة انتِ ضحكت ونور يمنا تقرا ومامدخله الحد ماسدت كتابها وگالت 

..حبيبتي بطوط محد خلصان من كلام الناس مثلا اني كن جنت صغيرة اخواني وولد عمي كلهم يسموني خشوم واكيد هسه باقي ابالهم خشمي حتى لو الخجل خلاهم ميذكروني بي المهم خل نكبر ونتزوج اول شي نسوي انتِ قص معدة واني قص خشم 

ضحكت 

..والله مشاكلكم حلوه وبيها حلول اني ماكو حل اللون بشرتي مع هذا صرت اعشقها واحبها لهذا ابد مايوم اتأثر بكلام احد وصرت ابدع بابراز نقاط الجمال ترى كل بنت جميلة بس تعرف تشتغل على نفسها 

ضحكت نوره 

..والله انتِ حلوه واحسچ مثقفة هم يراد سراب تتعرف عليچ 

..منو سراب 

..سراب اختنا الحنونة اكبر منا بس امها للأسف ماخلتها تكمل دراسة وانشغلت وياها بالبيت على طول محبوسة ومتنفسها نروحلها احنا وبس امها ماتخليها تطلع بحجة محد الي ولأخوانج 

نصيت صوتي 

..امها اصعب من امچ 

..نفس الرنة وداعتچ بس هي حبابة زيادة عن اللزوم احنا نعصي اوامر هوايه ونتمرد خاص بوجود ابويه 

..عمو ابراهيم كلش طيب الله يحفظه 

صاحتهن امهن واني التهيت احضر ملابسي الباجر وافكر بالأيام الراحت 

الولد عرفته من ولد عمامي وطبيب 

والثاني انصدمت من عرفته ابنه صخر مااعرف اشهل كل شويه يصيحوه اسم 

بس العجبني بي كلش ثگيل الطريق كله عبالك اخرس 

شويه وراسلني عمي ابراهيم 

..باجر ترحين وي اشهل بسيارته اني حاجيت مهيب انتِ ترحين وي اشهل وانطيتج علم وهو هم اتفقت وياه 

شكرته واطمنت گلت ليش باقية كاعده هنا خل اكوم اساعدهن وياريت مارايحه 

عمتي تگل العمو 

..همزين مابقالك مجال للزواج جان گلت ابراهيم يريدها اله 

رد عليها مستهزأ 

..عقل ماعندچ بكد نورة احط عيني عليها بعدين بنت اخوي هي ترى عاصم عاده اخ مو ابن عم عوفي عقلچ جامد ولا هالتفكير التفكريه 

رجعت معصور گلبي عمر شراح يخلصه هذا 

اني مرتاحه هنا بس هالكلام گلب عقلي ومعدتي اشتعلت نار للصبح مانمت 

طلعت تعبانه بشكل مو عادتي ابد

اول يوم ومشكلة النذل ابن اخو مرت ابوي وهم كدرت ادوس على نفسي واتحضر... اليوم ابد مااكدر بعد فتره طويلة مرت هنا ماشافت مني شي ليش هيج تگول عني 

حتى بالطريق كل فكري چان بهالموضوع 

سلمت وبصوت تعبان گلت مرحبا وهو اكتفى بالرد 

..اهلا ..نطلع لو عندج شي ناسيته 

اتحمحمت وگلت 

..لا نطلع ماعندي شي 

شويه وشغل اغنية والسيارة بس صوت محركها ينسمع مخالط صوت ياس خلتني ابلع ريگي كوه گد ماموجوعة 

ماكدرت اسيطر على دموعي بكل هدوء انسابت على خدي واني مركزة بكل كلمة وتجي ابالي امي 

يا طعم ... يا ليله من ليل البنفسج

يا عذر ...

يمامش بمامش و أحبك

طبع بگلبي من اطباعك ذهب

ترخص ... وأغلّيك و أحبّك

أنه متعلّم عليك هواي

يا سولة سكتّي

يا طواريّك ... من الظلمه تجيني

چانن ثيابي عليَ غربه گبل جيتك

و مستاحش من عيوني

و علىٰ المامش حنيني

چلمة الهجران زارتني

گبل حبك يغالي و ألّمتني

علىٰ المامش علّمتني

گبل حبك ...

اخذتني الذكريات رغم اتحول المسجل للراديو والاغنية ماكملت بس بقت الذكريات اطاردني 

وصلت الكليتي 

فتحت الباب صوته وگفني 

..انطيني رقمج بالطلعة امرلچ ابويه مسافر اليوم 

رجعت انطيته رقمي ونزلت 

وبگلبي اكول هذا هم ابتلى بيه 

المحاضرات حضرتها بس جسد فكري غايب ويومي كله كئيب احس بگلبي هوايه حجي غاصة بي 

رجعت مالي واهس باي شي ومتقيدة حيل چني اليوم اجيتهم 

بالليل وفكري يودي ويجيب واني اتصفح بحسابات امي من حساب مامعروف اراقب بلكي يبين عليها يحسسني هي فاقدتني 

اجتني رسالة 

..باجر اداومين؟

كتبت 

..اي ان شاءالله اداوم 

ومارسلتها اترددت ارد طريقة اعتذر بيها عن حيرته بيه 

اكتب وامسح 

..اي لو لا 

مسحت كلشي وكتبت 

..اي 

..ليش تبچين اليوم؟

هو سؤال مدري عادي مدري لا بس فجر بروحي حسرات وبچي ولوم ماعندي جواب 

مارديت وثاني يوم هو هم اتصرف وعبالك ماسائل 

بس هم رجع شغلها 

لبست مناظري مااريد ابچي 

واجاني صوته 

..مشكلتچ وياها لو وي الصوت حتى اغيره 

..مشكلتي بيه وبظروفي 

..سهلة كل ماتشوفيها ضاقت گولي الفرج اقترب 

مسحت على صدري واكول ياااارب

يتبع ..

                    الفصل الثاني عشر من هنا 

لقراءة جميع فصول الرواية من هنا 

تعديل المقال