بقلم نور الشمس
هاجر..
عمتي فرحتها ماتنطيها البشر قبل لايرفع راسه من السجود رجعت باستني
..يايمه ياهجوره اروحلج فدوه مو بس ابني سعدتيه رجعتيني شباب بهالفرحة والله
مااعرف شرد بس گلبي ابد ماهدأ يدگ دگات سريعة وغريبة خجل وفرح وماادري شنو من شعور اجتاحني
درت وجهي عليه عيونه حمر حيل چن حاسر دموعه بكبرياء بس وجهه يشع فرح مبتسم حاجاها ينبهه هو خلص
..ها يمه
..ها يبعد امك وگلبها ..الف مبارك ابوي وامي انت مبارك ينور العين ربي يسعدك ويرزقك خيرات الدنيا والآخرة يايمه ..الله يرضا عليك بكثر ماراضيه واكثر
الله يجعلك سعادة واهل الها ويجعلها الك عوض وباب للخير
منك المال ومنها العيال ياروح اميمتك
..فدوه اروحلج يمه الله لايحرمني من دعائج
لف مصلاه وگاملها باسها
مسحت دموعها تريد تتهرب من نظراتنا هي هم مو بس احنا الي بداخلنا شي غريب.. حسيت بداخلها شي اكبر
..يلا يمه خذ راحتك اروح اصلي اني هم
عمتي طلعت وهو حاچاني
..نشفي شعرچ حبيبتي
وبحركة سريعة نسيت ألم رگبتي قبل شويه ولا عبالك اتشنجت
ميلت شعري حيل ودنكته ولفيته بالخاولي ورفعته بسرعه
باوعلي مبتسم وعمزلي بعينه
..مبين العلاج مضبوط ..بعد لتشككين بطرق العلاج
ابتسمت وبگلبي الوم بنفسي والله حتى نسيت الألم هاي صدك هو هيج عالجها لو انه من الفرحه استخفيت ونسيت الامي لو شنو ..لايمكن من الخوفه هم لأن گلبي بلحظتها مدري شصارله
گطعت صفنتي وروج افكاري ..لمساته حضني عليه ظهري وراسي صارن على صدره وحنى راسه الرگبتي باسها حيل وشمها بقوة
عيوني بالمراية عاكسة لوحه جميلة النا وبالي وفكري يمه احس بداخله لهفة اكبر بس گوه لازم نفسه
..نستني كلشي مو رگبة لوح من الككووو مصبوب ولمعته وحلاته تاخذ الروح والله
ابتسمت ونصيت راسي
..السانج وين ياسمره ..شو رفعيلي راسچ
دارني عليه باسني بگصتي
..احبچ..لا مو بس احبچ ..احب كل يوم ولحظة وموقف جمعني وياچ ..احب حتى ابراهيم بلحظة الكلفني بيچ وخلاچ من مسؤولياتي
ضحكت على حماسه وفرحانه حيل الفرحته
..واخيرا عمي ابراهيم انحب منه موقف وياك
..سواله حسنة غير ..ماننسا احنا لاحسنات ولاسيئات
..حبيبي الأشهل الوسيم واني هم احبك واحبه هواي العمو سبب وجودك بهالدنيا ولأن لولا من بعد ربي ماممكن اعرفك واشوفك والتقي بيك بيوم
شدد حضنته الي باسني وابتعد
..ارتاحي حبيتي بس اشوف امي اطمن عليها وارجعلج
..ترى والله مو اني گعدتها ..لكيتها كاعده وحبيت افرحها
..عاشت ايدچ ..اساسا امي من شهرين لليوم مانامت لا اني ولا هي صار شگد مانايمين
صفنت عليه كل مره انام واني اظن انام سوه
احس عمتي حتى مرضها بسبب هالشي بلكي تتحسن
شويه ورجع
..ها نامت
..لكيتها گاعده وكتلها الخاطري نامي ..تعاي انتِ نامي بحضني وراج دوام وامتحان اريد درجتچ عاليه تعبتي هواي وقريتي هواي اي خلل بالنتيجة احسبه مني واني سبب
..لا والله واثقة من نفسي راح اجاوب
قربني عليه
..انتِ زينة؟
اشرتله براسي اي
..والله؟.. مامحتاجه شي الله عليج احجي مو تسكتين
.لا والله بخير بس ابالي اسأل
سكتت واني افكر بكلامة قبل شلون منطي النفسه فترة واذا مارهمت يطلگني
العبرة خنگتني توني بديت استوعب خلص كل خوفي انتهى بعد مااخاف من كلشي من اليوم اني اله وهو الي العمر كله
نبهني وهو يتحمحم وكأنه يصارح نفسه مو بس يصارحني ..
..قبل لتسألين شهرين عشتهن بقلق الليل ماانامه ابد افكر شلون ممكن البشر يكون سجين للذكريات
شلون ممكن موقف يأسرني عمر كامل ..وشوكت اتحرر واذا مو وياج اتحرر وي منو
اني ماچنت عاجز ولا انسان انخلق بدون رغبة ولا عندي شذوذ والعياذ بالله ولا اي امر من هذا
جنت اتلووع من اشوفچ بين اديه اوصلچ بلهفة وحبال تجرني وتخنگني كل مااقترب منچ اكثر تزيد بداخلي الخنگة الدرجة مره من المرات انگطع عني الهوا تماما صارعت وي نفسي يلا گدرت اسحبه بصورة طبيعية
چنت اگول يارب اذا الانسانه الحبيتها الكسرت وياها كل القواعد ..البنت الأرغبها من راسها الرجليها ماحررتني الي يحررني شنو
ايام مااستوعب والعلاج بفتره من الفترات صعبها عليه اكثر من ماسهلها
بالأخير طبقت العلاج وكأنه وسيلة مو هدف وماردت بي اثبات لأن حسيت ضغطي عليج وعلى نفسي يأذيني ويهلك طاقتي
وخليتها على رب العباد وزرت بوصية من امي الأمير المؤمنين علي عليه السلام بزيارتي تركت كل علاج وشمرته هناك وعلاجي صار الدعاء وقوة الأيمان بالله
وخليتها على الله سبحانه والف الحمدلله
..ماچنت تعالج اخر فتره شكيت بيك مستمر ؟
..لا لأن اتأذيت اكثر واني اراجع كلشي بتفاصيله ..المهم عوفينا من كل هذا تعالي اگلج شي
..شنو بالله ..ادنيت عليه اكثر
ضحك وصوت ضحكته خلاني اطير من الفرح بديت استوعب
چان كل مره يمثل بالضحك وهذه ضحكاته حقيقة
ضحكت وياه
..اول فضولية يحبها گلبي
..ترى انت صحتني فخ هذا منك ...فضولية شنو
..ردت اگلج شي
..اي حبيبي شنو ؟
..شدعوه هالگد حلوه ..وشنو هالجاذبية البيچ
ابتسمت وبغرور گلت
..توك شفتني
..لا شايفچ ومتعذب من زمان بس توني استذوقت وانبهرت اكثر
ضميت راسي بصدره
..لا والله مبين ماراح اجاوب ابد على سوالفك هاي
ظل يمسح بشعري وباس راسي
..نامي حبيبتي مابقالج وكت هواي للنوم كلها كم ساعة
..راح انام بس سؤالي بعده ووياه عتب هم
اشرلي بعيونه
.. بعيوني اجاوبچ والعتب دلالات المحبة
بديت افكر بالصار ..يوم طويل چان وبي كوم احداث بس نهايته احلى من العسل تفكيري چان كله بي الحمدلله سهل الموضوع وگدر يتجاوز اهم واصعب وازماته
فرحت واني اسمع اطراءه وكلامه بهدوء خلاني انعس من صدگ وبس صوته يدخل مسمعي واحتفظ بكلماته بأصغاء واغفى وصوته بأذني وارجع افز ارد اسمع كل كلامه اخذتني باحضانه سكرات نوم مريحه ويقضات احلى
..حبيبتي القوية الصبورة الي انطتني دافع اتخطى كل مُر مَر عليه واشوف الحياة بعيونها الحلوات ..انتِ حبيبتي وعزيزة گلبي وبكل فخر احجيها ولا وحده گدرت تجذب نظري وگلبي مثلچ
وماعرفت لمشاعري طريق ولا شنو هو وذوقي الا وياچ
باس وجناتي بهدوء وگال
"سمراءُ تكحلت، فأربكت قلباً عن الهوى تائباً".
فتحت عيوني بتعب مبتسمه وشعري گد مالعب بي وبخصلاته اتبعثر
..احسك جاي تبالغ موو
رفع وجناتي بأصابعه لمهن ورجع باسهن
..وداعة شهلة مامبالغ احچي صدگ ..ترى تنگرطين نامي عليچ الله ارتاحي وخليني متأمل بعذاب
..مو توك گلت ارتاحيت
..مو كل راحة راحة ولا كل عذاب عذاب ..وعذابچ حلوو هم
نمت وفزيت الصبح بيده ورد طبيعي يشممنياه ابتسمت واتبدد شعور الانزعاج والفرحة ترست روحي بديت استرجع الصار
احس روحي بخف الريشة الهم الي چان مثقلني انتهى
يارب اصبحنا واصبح الملك لله
الحمدلله عدد ماكان وعدد مايكون
..صباح العسل لعيونچ ..كومي حبيبتي صلي واتريگي لانتأخر ع الدوام
طلعت ودعاء عمتي اليوم يفوق دعائها كل يوم ووجهه مستبشر
..هلا بهالصباح ..هلا بهجورة
..هلا بصباحچ احلى شهلة بهالكون ..شلونچ اليوم
..بخير مادامكم بخير
ريحة معطر الجوو ماليه البيت وريحة الهوا ونسماته التجي من الحديقة احلى
الگاع مرشوشة وريحة تراب توها طالعه
وي ريحة الثيل والاشجار واصوات الطيور والدجاج وديجهن الخابص الجوو
الطبگ على الكاونتر مليان خبز تنور طين حار
عرفته خابز
رحت توضيت ع السريع وصليت قضا اليوم ماگعدت قبل الشروق وفاتتني صلاة الفجر بوكتها
بدلت وطلعت ناويه اسوي لفات گيمر وجبن البنات من اجن البارحه جابلي وياهن
لگيته مسوي مخلمه هم ذب جفوفه من ايده وغسل وبدل واجه عطره سابقه ويصفف بشعره على جام الباب
..ماتتريك حبيبي
..اكلت يروحي ..انتِ وامي اكلو الف عافية
خلص اني كملت
..لاتستعجلين اشوف احمد واجيچ رادني بشغل اكلي وكملي وطلعي
مااكلت هوايه احس شبعانه من الفرحه
حاچتني عمتي
..شصار على صاحبتچ ماردتلچ خبر
..لا والله عمه بعدها تفكر وحقها بعيده واهلها بعاد هي هنا دوام عدها وامها ابد ماتتعطل عنها كل شهر تجيها ومرات بالشهر مرتين تجي واكثر
..الله يحفظلها اميمتها حقها
سكتت وغصة بداخلي صارت ..امي وين من كل هذا
شگد مر عليه اشياء احتاجيتها بيها هي ليش هيچ تغيرت ..امي ماچانت هيچ
چانت تگلي دوسي على كلام اكبر واحد اني بظهرچ مااعوفچ ولا اتخلى عنچ
صحة هي تعبت وماشافت من حياتها شي ويديت استوعب زواجها صح بالأخير اني حتى لو يمها مادايمه الها بس ليش هالقطيعة وليش المعاملة اختلفت
گمت غسلت ومااريد دموعي تنزل
الأنسان بكل موقف يحتاج امه بأحزانه وافراحه الأم مانگدر نستغني عنها مهما كان بگلبي نار لأن كل مااحاول اتخطى وابدي وياها من جديد تأذيني بكلامها وظنها بيه وتخليني اشرد واحلف ماارجع واحاول وياها بعد
بس احساس بداخلي يگلي كسري الزعل وحاجيها هذه امچ حاولي انتِ ..وارجع واكول ليش متحاول هي شنو السويته اني هي ام لازم تستوعب الأهل مسؤوليتهم مو وقتيه
طلعتله شكله اناقته تاخذ العقل النيلي والأوف وايت كلش لايگله
اخذتله صورة وهو مندج ويحجي وي احمد بموضوع ومن قربت عليهم وسلمت دار احمد اله بدون مايرد السلام
..ماحاجيتلي مرتك يول ماعدكم مروه ..عاجبكم متعذب من بعيد اراقب؟
..مااضمنك اني ..ولد ابراهيم ماعليهم ضمان حشا عبد
..وانت ابنمن سيد صخر ؟
..ابن شهلة اني ..لا صدگ اذا رايدها ومضبط وضعك لاتعتمد على احد روحلها حاجيها انت يمكن منك تقتنع اكثر
..بربك وين چنت اني متوجه ورايدلي دفعة وانت ماقصرت ..اتوكل وخليني اوصل هاجر ونفتح طريق
..مريتي اني اوصلها افتحلك طريق الحالك ياسبع
..هيج صارت ..بسيطة تحتاجوني فد يوم
..غصبا عليك الخوة تجيبك
..ماتجيبك الخوة عليه وتفزعلي
..من تحتاجني مااقصر
..اكو اكثر من هالحاجة لحيتي وگلبي بيد مرتك
..هجورة ماتقصر بس انت اذا تخلصها توصيات وتنتظر علاقة ماترهم اكو بنات مايحبن هالطريق ومايأمنن بيه وخاص بنات العشاير ..مثلهن مثل بناتنا اذا مو من نفسهن يرفضن وراهن حساب ةكتاب والا ماكو بنية ماتحب وتنحب
اباوعله اول مره اشوفه منطلق بهيج موضوع
رجع قاطع احمد
..خل تخلص امتحانات اختك ..هذا ابن عمك گوه عطلته للعطلة وكتله الخطوبة قبل الامتحانات ماترهم لأن راح تنشغل بي
..حارث قصدك وبطة ..زين سويت سهلة اصبر كم يوم ماظل شي
سلم وطلعنا واول ماصعدنا گال
..احمد عزيز عليه هاجر.. البنيه اذا مابيها امل تفكر ترتبط او تشوف المكان بعيد گليله ترى مبين متعلق بيها حيل
..والله ماادري شلون هالگد حبها وعجبته وهو ماشايفها الا مرات قليلة ..البنيه كلش حبابه وبنت اصول ومتربية حيل ..بس تخاف من مجتمع غريب عنها ولا تنسى اختلاف المذاهب هم والناس الها الظاهر يظنون هذه مناطقنا متعصبه
..حقها بهالأمور لأن من نفس البيت تلگين افكار مختلفه بس اذا هو رايدها الباقي مو مهم اني اقنع ابوي يعزللهم من البداية ومحد من اهلي ينخاف منهم عدا امه وبس
..امه ليش
..اهلها عدهم نفس عنصري مناطقي مو طائفي بس العنصرية باب للطائفية اعتبرها ..وهم لأن امي مناك تكره طاريهم كره العمى فمامعقوله راح تحبها يعني
..ترى رزق هم خطيه مااعرف بس اهلها ظلموها
..هي نفس فكر اهلها ماتختلف
سكت حسيته مايحب يحجي بيها رن تليفونه ومن جوابه وصوته عرفت المتصل عمار
..شلونك حبيبي صخر هسه نزلت وام ياسر تليفونها مغلق ماادري صدفة لو اتفاق وتعرف اني جنت بدوره ثلاث اشهر مجبور ابقى بيها لانزول ولا اتصال شصاير اريد اعرف؟
..هلا بالحبيب ابو ياسر ليظل بالك ..مآرب ابيت ابوها وين تروح يعني والصاير تعرفه من اكمل دوامي وارجع ونسولف ..واذا تحب اتمشى على اولادك وامهم ابيت عمك وتعرف الصاير بس خلي عيوني گبالك قبل اي تصرف
..انت تعرف معزتك عندي بس غريبة اول مره تدخل هيج وتاخذها بغيابي وبدون اذني شلون تطلع من دون اذني مافكرت بيها ؟
.. اني وياك مانختلف بس بالمقابل تقديرك الي شنو ..مآرب اختي ترى والي يصيرلها مامقبول ومااتقبل اي عذر نهائيا ..هي غبره لو حاجيتلي من زمان والله مااخليها بهالوضع
..شبي وضعها فهمني ؟
..ماتفهم بالتليفون ومالومك لأن خطأها حتى الك ماتحجي تكول يجي تعبان روحه طالعة وبالدوام واجباتهم متخلي يتفرغ هواي للتليفون وكل ماارد احجي واحس بتعبه من صوته اتراجع
ومن تبدي تحجيلك وتفضفض برجعتك انت تململ
وتنهي الحديث
..هسه انطيني راس خيط افهم
..اني راح اسألك على اي اساس نسابتك بالبيت من الصبح لليل مستغلين غيابكم ولازم تخدمهم ليل ونهار حجابها ماتذبه الوكت النوم ومتقيده لاماخذه راحتها لاتگدر تنام وصلو مرحلة ينامن عدكم وازاجهن وياهن
واخر مره بالصدفة سمعت عرك ومصايح من بيت اهلك رحت اشوف الصاير لگيت الكل يلومها وكل وحده ماده السانها متر عليها
لو بس عمتي امكواحترام الكم مااحجي غير عمس واكف ويحجي وازواجهن هم
يابه شكو ماخلن لا عار ولانار وسونها نحسه وگطعية وماريحتهم ولا انت مرتاح وطلعن يدورلك مره هم والله شنو مآرب رافضه تفتح الباب الهم يطلعلهم هوا من السبلت للصالة لأن المبردة ماتكفيهم ولأن رافضة تفتح الباب هاجمات عليها واشكال الحجي
انت احجيلي يرضيك مرتك تفتح بابها وتنام ونسابتك موجودين غيرتك ترضاها.. مااتوقع ترضا لهذا هي ماطلعت .. اني اختي بيدي طلعتها بعد ماخيرت عمي بينها وبين بناته ونسابته من اختار بناته ورجولتهن بعد ماعليه حرج
صار معلوم يمك لو لا
عمار چانت بس انفاسه مسموعه ينفث عصبية وبس اي يحجيها لو ممم
الحد مافهم گله
.. هذا هو ماقصرت وماعليك اي عتب كمل دوامك واجيك
..مرتك روحلها وطيب خاطرها مآرب تحبك ترى
..ليش اني مااحبها مو عزيزة عندي اقبل الها هالمعاملة اسألها ..وهاي مال اتململ ومااعرف شنو عيب تحچيها هيج مشاكل ماتنحجي بهالطريقة
..هذا العتب بينك وبينها عالجو اخطائكم بس شغلة مهمة خليها ابالك
..اسمعك احجيها
..عمي الخلاني اطلع وبيدي اختي ومافرط ابناته وارجولتهن وجهالك نايمين اجرجر بيهم كوه كعدو كال مايبقون للصبح تاخذهم وياها ..اكسر رجلها لو رجعت طبته حتى لو وياك وبدون زعل هذا العندي
..لا اذا ابوي الطلعت واني مأمن عائلتي يمه هيج حاجي ومهون بعائلتي بغيابي اني مستحيل ارجعها ولا امن عليهم يم اهلي بعد
..وشتحتاج اني بالخدمة وعمك ابراهيم اقطه الك اذا تحب
ضحك عمار
..لا عندي خير والله بس الكاسر ظهري ابوي چان يزعل بس افتح موضوع الطلعة وكلت الخاطره كلشي يهون بس هسه يعذرني
..العصر نتشاوف واتفاهمو على كلشي جدي وابوي وعمي عدهم علم
..يم جدي نلتقي ان شاءالله
نهى الاتصال وتوني يلا غرفت سبب طلعة مآرب هو گال مشاكل بينهم بس ماحجه شنو الخلاه يجيبها بهالليل
رجع حاچاني بموضوع بنين واحمد گلي بس انطيها علم هو يحاجيها ويفهمها واتمنى ترد بواحد من الاثنين اي او لا حتى نعرف نتصرف وي ابوي وامه ونحضر امور الخطوبة كلها
..ان شاءالله احجي وياها
وصلني للدوام
عيونه تباوع الكل تفاصيلي
..ها حبيبي
..يروح حبيبچ تخبلين .. احاول اطلع من وكت اليوم خلي بالچ يم تليفونچ اريد نرجع من وكت
..من عيوني صار
امتحنت وكل شويه بالي يشت وارجع اركز بامتحاني الحمدلله جاوبت وكلش زينه
طلعت من الامتحان لگيته متصل اتصلت وجاوبني
..اني جايچ بالطريق اتحضري نطلع اذا كملتي
..انتظرك حبيبي كملت وجاوبت زين
..عفيه والله.. ظل بالي يمج تجاوبين زين لو لا ...
حاچيتي صديقتچ
..حاچيتها اي وشرطت يشوفها بمكان عام وبحضور امها وحضوري
..عاشت ايدها بنت اصول ..شوكت امها تجي
..بعد ايام
..هذا هو ..يلا حبيبي شويه واوصلچ
رجعت يم البنات حجيت البنين عن احمد وشگد ذابح نفسه عليها هولير شجعتها بس حور گالتلها مااعتقد العلاقة ناجحة من يكون اكو اختلاف مو قليل بين الأثنين عادات وتقاليد وعقيدة صعبة ترتاحين
واحنا نتناقش بعد ..واتصل بيه اطلعله
وأول ماصعدت گال
..مشتاق هواي هواي ..بوجهچ الغرفتچ
..اي والله نعسانة حيل
باوعلي بطرف عينه مبتسم
..اي ليش لا نامي عود
لگيت عمتي تغسل مواعين
..خلي من ايدج عمه ارتاح واغسلهن ..انتِ ارتاحي
..ماعندي شي عمه ..اتمرض من النوم اني ..روحي غسلي الجو حار وشوفي صخر شمحتاج
سلم وفات ويكلها محتاج انام ..مانايم البارحه وعندب موعد العصر وي عمار
..رشا هم حاجتك عدها جلسة بعد وتكول الهسه معاند يطلك والمحكمة روحتين واجلوها تريد حل وعمها ابراهيم يدخل
..ماحاجت عمها؟
..تريدك انت تحاجيه
..احاجيه ونشوف ولو اني شاك بي يستفزني يريد اني احاجيه عثمان بلكي نتصادم ويساوم رشا بيه وماانوله الي يريده هالنذل
..البيت بي نص الها مساعدته بالبناء والاثاث وتسديد دينه ومسجللها نص بحضور عمك وهسه عمك يكول اني مستعد اشتري حصته ومااخليه يتصرف بحصتها لأن گايل ماعندي انطيها فلوسها
..خلي يخليه عليه بس هي ماعدها صبر متخبله ع الطلاگ الا هسه
..من حرگة گلبها يايمه چا وين تروح وهو خطب
..والله مااخليه يتزوج ويگعد ابيته قبل لايرجعلها كلشي حقها وحقوقها بس لاتلح على عمي ونفسها الهذه الدرجة هو اخذ طريق المحاكم حتى يمللها يعرفها ماعدها صبر ويريدني ازهگ عليه ويچلب بعدين اني متجاهله واعرف شلون احركة وبالأخير ينجبر ينفذ
..احجيلها هالكلام ريحها المسكينة
..صار اني هم التهيت بمآرب عنها
رحت اسبح خليتهم يحجون وطلعت هو فات
لبست ملابس نوم حلوه ورتبت نفسي وخفت لاينعاد الموضوع والصار البارحه صدفة
بس الحمدلله عشت احلى واجمل الساعات وياه بوعي وادراك كامل منه ومني تأكدت ذيج المحطة عبرناها
نامله ساعة وحده وگال كعديني اروح العمار ومن گعد گلي تعاي وياي عمي ورشا دائما يسألون عليچ
..هو صح جاي يجهزون العمي غرفة جديدة وقريب عرسه من خالتك
..صحيح عشر ايام بالزايد ويتزوجون عگبه يمشي ع خوالي ويعقد بنفس اليوم والاسبوع الثاني زواجهم بفندق واستقبلهم بغدا وننجمع يمهم
..وموضوع عمتي الشاغلها
..نهيته من يم عمي والبنات وخالتي اني اعرف شحاجيها ترى اطيب خوالي هي وامي تفكيرها مبالغ بيه بس حقها
..انتظرني اجهز نفسي
..ماشي ياحلوه ..لاتتأخرين
لبست بشت وجواه بينصل ورتبت شالي والميكب وطلعت وياه
باوعلي مقلص عيونه
..ها
..بس نزلي الشال على صدرچ شويه وخلينا نطلع
صاحت عليه عمتي
..هسه انت ماتاكل متعود تنتظر العشه البنيه شذنبها ظاله وياك
هاجر شوفي اختج شمسويه اكلي يمها هناك
..ساعة وارجع متبللها مندي ماتنسى طعمه
..يمه على هالجوع لو كلتلها بيضه تكلك ماكو منها
..شهلة لاتگورعيني صوجها هي اخذتني فلاحه ملاچة على گولتج وطيرت عقلي نسيت الأكل كله ..وهي لو جوعانه جان اكلت
..والله نسيت الجوعه كلها بس هسه من ذكرتني عمه جعت
رجع هو
..يمه ماتجين ويانا ..ناخذ الأكل الي محضره وهناك نشوي
..والله صعبه استحي من جدك اروح مامخذه عليهم
..البيت راح يصير الأختچ واحسن من ماترحين بعدين بس الها سبقي الأحداث وتعالي ويايه ورشا محتاجتج هم اريد من احاجيها انتِ وياي ونقنعها سوه
..والله فشله يايمه بعد هالعمر اطبلهم
..لامو فشلة ماارضالچ الفشله اني.. هسه هم اليستحون من طبتچ انتِ ماغلطتي وياهم وجدي تعرفين شگد يعزچ ويقدرچ هسه
..يلا هاي الخاطر فرحتك ادوس الفات كله
انتظرناها تبدل عمتي من النوع الكشاخة حيل والي ماتحب تبين للمقابل هي مكسورة بكل الاحوال ورغم شگد جانت مستصعبه الروحه بس من فاتت الهم فاتت براس مرفوع ووجه يضحك
جده گاملها من مكانه باس راسها فرحته ماتنوصف بجيتها وكل شويه وگال
..ياهلا بأم صخر كل خطوة بألف هلا نورتينا ياعمي الله يرضا عليچ شگد بنت اصول وعزيزة نفس عزة نفسچ دوم احجي بيها
..الله يحفظك عمي من طيب اصلك
واحنا گاعدين بالحوش واجه عمار هم تفاجأ بعمتي وسلامه الها يختلف الحد جية عمي ابراهيم هم طار من الفرح بيها سلم عليها وردتله السلام وي عمي ابو ريمه گعدت شويه وگالت الرشا نروح هناك
فتنا جوه وهم يحجون عن الصار المآرب وحجيتلهن اني الاعرفه وطلعت عمتي تعرف حاجيلها صخر ورشا ظلت تحجي ع عمي ابو عمار ومرته وبناته
..عفيه عوائل ادري شنو ولو چنه على يااساس يستعبدوها وهاي عود مآرب ترد الكلمة بكلمة وماگيشت وياهن وصمدت ريمه خبلنها خبال الله ينطي صخر الخلصها وقنع ابوي يشوفلها حل ..ومآرب هم من زمان رايده صخر يوگفلها بس تخجل منه وتگول مالي عين ..حظها هالمره حلوو وجابه الها بهالمشكلة والا الي اعرفه اكثر من هالمواقف مسويات وياها
مثلا هنه لو شافنه يظلن يدعله بالعرس ومن تكلهن يوم الزلمجن تقوم القيامة وتصير سالفة شكدها ويرجع اللوم عليها
هسه هو شمقرر هم عرفتي
..اي سمعته گال الصخر ننتقل قريب الدوامي هناك نستقر
..زين يسوي والله خل يبعد ماوراهن الا المشاكل
امهم قبل باليه ريمه بلوه ع الولد هسه من سمعت حامل بولد توصيلها تگلهن گللها لاتفرح هم تاخذ وحده وتطلع بيه بالجاهز يصير الها وتعبها ورباها بالشط ..رغم عزام مايمر يوم اذا مايروحلها وينطي مصرف وعلاج يجيب بس مدري ليش تنكر الله يهديها ويصلحها
عمتي گالت
..امين يارب ..نسمع ونسلم ربي يدري مايسعد گلبي بهالدنيا الا سعادة وليدي وگبل لا اصير سبب العذابه واذيته واذية عايلته ربي ياخذ عمري ونايشوفه هاليوم ..اذا هو طبع اني طبعي مااحب المغثة واذا هي مرحلة ولازم تمر ع الامهات الله لايشوفنياها بحق ام البنين
..اسم الله عمه لاتحجين هيج وين اكو منچ انتِ
ورشا قربت عليها لزمت اديها
..فدوه الچ عمه وين اكو منچ شفايتلنا لو كل الناس عدهم گلبچ چان احنا بخير
وبساع گلبت الموجه وگالت
..صدگ شافچ عمي ابراهيم عيونه طايره صوبنا وده يلمحلچ خيال
..المسودن شوكت ماطارن عيونه هو
..هههههههه عمه انتِ هم ظالمته
بعدهي تريد ترد وصوته اجانا
..شهلة شلونچ شو متغيره خو مامريضة ؟
..الله يسلمك ابو وسام ..منين اتغير بنص الخير وخيرك وسابق
سكت حس بيها تبسمره واحنا هم نصينا عيونه نراقبهم اني ورشا من جوه الجوه
..هم راجعتي وجهج اصفر ليش؟
..الحمدلله ماكو شي تعب السنين والعمر اله حوبه
..الله يمد بعمرچ وينطيچ الصحة والقوة
طلع الحد ماراحو فات صخر وگال الرشا الجبتهن طلعيهن عشانا اليوم هنا يمكم
..عرفتك جايب ادواتك وموادك وياك ..اني هم متبله اثنين بثواب امي ..ناويه اسويهن بفرن الطباخ اشويهن وياك بعد
..يوصل ان شاءالله جيبيهن وخل اخابر عزام يجيب ريمه وياه
اندار على عمتي
..مو هاي جنج ورد شبي ابراهيم يسأل ويحلف اراجع بيچ خاف شفتي واصفريتي
..اي من المحبة
ضحك واتمشالها يحجون
..شوفي غرفة اختچ وخابريها احجي وياها شو بعدهي متردده
..احاجيها سهلة
اخذتنا رشا مسويه غرفة ابوها تجنن مجهزتها من كل گلبها
..يمكن اول وحده تفرح بعرس ابوها اني
حاجيتها اضحك
..هم لاحظتچ والله ..رشا سباعية انتِ مو كل وحده مثلچ
..وداعتچ هي حتى القوة هاي عامه عليه تجيني شغلات اكبر من طاقتي گوه استوعبها
..سمعت عثمان بعده معاند
..حرامات بيوم حبيته ماكو نذالة ماسواها وياي
ساومني بأبني ع الغايب واتنازلت عنه ويريدني اتنازل عن الديون وحصتي بالبيت يسددني اقصاد شهرية شايفه هيج نذاله وراح خطب كل ظنه اظل ارجف عليه تفوو على گلبي الراده
جان يحجي على عزام وعمار مامقدرين زوجاتهم عود يروحلهم فدوه
..لاتنقهرين الله يعوضچ
..والله ياهاجر مااريد الا ابني اگعد واربيه جربت نصيبي وكافي
..الله يحفظه الج يارب
..صدگ ماگتلكم غزولة حامل
..ياحبيبتي الف مبارك
خالتي طاؤت من الفرح واتصلت بخالتي تباركلها ولكت علي وغزاله عدها وباركتلهم هم
اتونسنا يمهم بعد العشا رجعنا بعد ماصخر قنع رشا تخليه يمل وماتتواصل وياه ولاترد عليه بكلمة وصدك حظرته من كل البرامج والارقام حتى الشاكة بيهن اله انطتهن حظر
مرت ايام احلى من العسل حيل منسجمين ومتفاهمين وحتى هو هدأ ذاك التشنج الجنت اقابله بخلك يطلب رضاه بكل الاحوال اختفى
وكملت الامتحانات بتعب انتهيت بيهن
وصادف بوكتها عقد بطة سووه قبل عرس عمي سليمان بتلث ايام
بطه طلعت اية من الجمال فرحتها مو سايعتها احلى الحفلات حفلتها واني الجنت متفرغة الها بشكل تام اني ونوره ترتيبها تحضيرها حجزها للصالون بكلشي وياها حتى باختيارها للبدلة والفستان
ماتركناها لحظة البنات مشغولات باطفالهن خواتها الكبار وسراب حملها متعبها
بيومها الكل انجمعت حلا ومآرب صارن حديث الحفلة جانت تجنن حلا وابنها بحضنها ينكرط والكل يسولف بمرت ابراهيم
ومآرب ماشاءالله مبين دلال عمار الها لابسه ارقى الفساتين ومن الصالون النا اجت والذهب اللابسته خلت خواته وامه يحيرن شيحجن
اما اني كل شويه وبعضهن سألن
..لو طلع ولد لو بنت عليچ يتقبلهم ابوهم ؟
..عليه شلون يعني
..بلونج يعني سمر
..يموت عليهم مو بس يتقبلهم
وحده منهن گالت
..طبعا بعيد عن اللون الدم واحد والدم يحن اثنينهم امهاتهم مناك
وصدمتهم نوره من گالت
..وجايتنا جنا ثالثه ورابعه مناك ..تلث ايام وتنور بيت عمي خالته الصخر
ووراها نعقد الأحمد مناك بنت من الناصرية رايدها
دارن ع رزق يسألن ليش وشلون وهي اتخبلت صاحت نوره وترجف اعصابها
..منو گالچ تحجين بكيفج خطوبة احمد مااتم بدون رضاي ذيج الغريبة مايخطبها
..ابوي اليوم گال وراجن حفلتين بعد ووعدني قبل عرسه بسلامه خشمي صاير مسقوول
حجتها وهي تتماوع ولأول مره حسيت نوره متعمده تغثها
..ابوجن مو على كيفه اني امه وماارضا وارد اشوف شلون تصير ..بيه خير ابوج خل يطلع الرايدها حمزة من اهلها انوب يعرس الأحمد على رادته
..هم اوصله كلامچ واشوف رايه ادللي يمه لاتضوجين
عافتها ومشت رحت وراها لزمتها من چتفها
..ولچ نوره شبيچ اتخبلتي
..لا والله بعقلي واني الها هم
..شكو شصاير
..تريد تتفرعن رزق امنت وعبالها تنسيه فتره وترجع للمشاكل ..جفصت ابطن رشا من الصبح الهسه وحجت على بطة لمن ملت يم النسوان ..ورجعت على صخر وخلتهن يتمادن ويسألنچ هيج سؤال يرحن فدوه الچعب رجله
..رجل منو عود
..رجل اخوي وابنه غير
..اكو ناس معجبين بيچ
..عوووع ولا افكر بزواج اريد اتخرج واكمب ماستر واقطلي بابا بكم سفره عود اتزوج بعدين من الگالي زلمة صدگ مو نمايم هالوكت
..انتِ وصخر احسكم مامرتاحين الحارث ليش
..مجرد احساس والله ان شاءالله مو صحيح
شويه واجو طلبو هدوء يردون يعقدون تم العقد الحمدلله باركنالها ونصبنا عليها شلون جانت خجلانه ومتلهفه الطبته تباوعله بنظرات عيونها تسولف شگد هي تحبه
وبنص هذه الهوسة صارت عركة جبيره بره بين وسام وولد عمه
يتبع ...