بقلم نور الشمس
هاجر..
گاعده بنص سريري اكتب رسالة وادزها
وانتظر الرد واني اتلفلف بالغطا عبالك هذا الغطا يغطي الكتبته ويدفي مشاعري ويحضني يهون عليه هذه الخطوات بالتلميح من بعيد الحب واضح بينا واثنينا نخفي خطوطه
هو يخفيه الاسبابه واني اخفيه لأني بمجتمع يمنع ان تكون المرأه مبادرة
راجعت شكتبت اتغطيت اكثر بس وجهي طالع
لا اني ابد مو طبيعية
قريت شكاتبة من جديد حتى وجهي غطيته
..احيانًا من اكون بينهم وافقد شعور الأنتماء للمكان والبيه ..وبوقت ماكون خايفة من تهديدهن المبطن وهوايه كلام صرت اسمعه من اروح
اباوع لعيونك ويتبدد كل خوفي بنظرة عيونك امان الي .
تأخر شويه اكلت شفتي واني افكر بس لا ماعجبه كلامي جاي اتواقح هواي بس احس ماكو بهالكون بس هو
رد
..واني كلي امان الچ مو بس نظرات عيوني شوكت مااحتاجيتيني بس كولي ..منو الهددچ منهن بعد ؟
..الكلام هوايه مااحب احجي بي
..لاتهتمين عمچ الحنين مايعوفچ واني بكل وكت تحتاجيني موجود
ضحكت لأن اي موضوع بي ذكر العمي ابراهيم يرد بهالطريقة عمي فعلا حنين بس مااعرف شنو مشكلته وياه
رجعت اعيد قراءة الرسالة ..
اتمنيت يكتبلي اكثر ما ردته ينتظر حاجتي اتمنيت هو موجود بكل وقت لأن فهم كلش زين اني بحاجته فعلا
شكرته ونهيت الحديث واني اتحجج بالنوم
وبعدها اتوالت الأيام والمشاوير
وظلينا بدوامنا بالطريق نلتقي..
عيونه على طول عليه وصار مايخفيها حتى لو اني انتبهت بدا يلاحظ تغييري ..يلاحظ التعب الباين عليه رغم احاول اخفيه بمكياج وترتيب وضحكة مزيفة .
حتى صوتي صار يميزة بالفرح شنو وبالقهر شلون يكون
بهالفتره عمي صار ياخذني وياه البيت جدي ع طول جدي تعبان وبس يباوعلي وعيونه تدمع حتى حجي مايكدر يحجي
فهمت من تصرف عمي مايريد يخليني هناك وهم يعرفون فيحاء مو بالبيت خاف احد يحجي ويتهمني وهم احسه يستفز عمامي بتمسكه بيه عبالك يكلهم انتو مابيكم خير والهذا السبب وجودي بينهم وبرعايته صار يوتر الكل
عمي عثمان الوحيد الي اتفهم عمي ابراهيم بعد ماجان زعلان البقية صارو يتنحسون كلش منه ومني وحتى زوجاتهم
الي معجبني مرت ابو ريمة لا الي موقف وياها ولا علاقة وكارهتني هيج بسبب مرت ابويه
عرس سراب رغم احلى واجمل الاعراس الشفتها وايام واحنا نتحضرله وياها طلعنه من خشمي بكلامهن وبساميرهن .
وبيوم اني ابيت جدي وي عمي وهو تعبان كلش صرت ادعي الله يرحمه ويهون عليه بموته سهلة ولا هذا العذاب
احس سكرات الموت تاخذه وترجعه يصحى
بهذا اليوم كلت ابد مااهتم للبقية بالي يمه وبس وبطلعتنا منهم رفرف گلبي من سمعت صوته بينهم واتحول النقاش الجدال وصارت عركة قوية فهمت اني سببها
متت الف موته وهنه يحجن ويعلقن سبب هالمشاكل بت عاصم
كلام نسوان عمامي صار باذني ومااهتميت كل تركيزي وياه جان يحجي بقهر خله دموعي يجرن طلعت الهم صار بينهم مدافع واخذوه الولد يهدأوه مشيت واحس روحي مشلولة
اريد اشرد بمكان محد يعرفلي اثر بس اعرف مستحيل
بهاللحظة قررت ارجع الأمي وبعدها نفسي ماهانت عليه
ظليت اكل بروحي الى ان راسلته حسيته مو واعي شيكتب وشنو حاجاني ماجاي اربط وافهم كلامه لو مااعرفه اكول سكران
واني افكر برسائله اجاني عمي مخبوص وخايف
..شبيچ عمو خو ماكو شي
..لا عمو شكو مابيه
حجيتها واني اداري دموعي ماكدرت اصبر نزلن وفشلني وياه اتقرب عليه يمسح على راسي
..ادري البيج مو هين وادري التسمعيه يصعب عليج خليج وراي وكلشي يترتب اني ابوج مو عمج وخل يضربون روسهم بالف حايط عجبهم او لا ماانطيج الاي واحد الا شخص يعرف قيمتج يعوضج عنهم كلهم
گومي شيلي راسج وگومي وياي
..لا عمو وين اروح مرتاحه هنا
..تعاي وياي يم حلا اخذج انتِ ونور
..لا عمو لا هنا مرتاحه والله
.بس هالليلة تعالن اتونسن هي الحمل مخليها طكه ونص وطاكه روحها من الوحده تعالن ونسنها واني اتونس على ونستجن
حرجني اخذني كوه اتخيلت حلا هم تتلكاني متخبله البشر مامضمون
نوره اصلا يمهم من اخذني عمو البيت جدي هي وبطة راحن هناك
فتنا البيتهم الكل نايم الظاهر الوقت متأخر
بس نوره وحلا كاعدات لاكتني بضحكة كوه كامت ترحب بيه تعرج من حملها رجلها تشكل بستها اعتذر من جيتي بهالوقت ماقبلت ابد كالت
..لو الله يهدي عمج ويخليج دوم وياي جان مااضطريت انزل من الوحده واخبل رزق وتخبلني بسوالفها
..شتسوين بيه يمعوده ابقي الوحدج مرتاحه
..اتونس وياج سراب الها وحشه وانتِ مثلها مريحات وتونسن
كعدنا وهي ونوره شكد سولفن ضحكن وحجن ماكدرت اندمج ونمت وگلبي محمل تعب
گعدت على صوت هوسه وصياح نزلت اتعثر
الهوسه شكل والصياح شكل بعد لحظات استوعبت جدي مات
موته رحمه اله اكو شي عصر گلبي بس مااعرف شنو هنه لأن ماعندي وياه ذكريات وحتى المحبة الي انزرعت بگلبي الهم محوها بمواقفهم ..خايفه من عمامي وشراح يسوون التفكير ذبحني
والجو مخبوص خبص على صوتهن وطلعن بسرعه بنات اخوه ماليات البيوت ماشاءالله وكلهم قريبين
والهوسه ماخفت اصوات عمي وولده عاليه
هاي الهوسة عليمن جانت والهسه مستمره
اذا مو على موت جدي عليمن
رجعت للبيت شويه وفات احمد من الباب يصيح وين بطة
كعدت مكفش شعرها مبينه چانت نايمه بس شافها لزمها من حلكها فركه بيده فرك
اول مره اشوفه هيج بس خفت احجي وادخل احس اني عاله عليهم وانوب ادخل
انسحبت منهم بس گلبي يرجف مااعرف ليش احس اكو شي راح يصيرلي ومحد راح يسكت ع الصار البارحه توني بديت استوعب كلامه وردهم عليه
فتت للمطبخ گعدت بيه بعيد عن صوتهم
محتاره بروحي والف فكره تجي ابالي واشتتها
اجه حمزة ومن كلامه عرفته يتصل بصخر ويحلفله
..وداعتك ماكو شي ..متأكد تعال فوت حاجيها لو اني اجيبها الك للبيت وانت بنفسك اعرف ..ابوي راح الهم غير الرجال مات ..هسه هو شكو وتحجي عليه صدك جذب مامتعود عليك هيج ..هايه والله مابيها شي هسه اخليها تخابرك
نهى الاتصال.. بخوف سألت
..شكو حمزة شصاير ؟
كام وبصوت عالي صاح
..بطه وين
لكه احمد يحقق وياها شوشو عقلي
طلعت منهم وايدي على گلبي والله صاير شي مايكدرون يحجون براحتهم يمي
شويه اجه عمي رجع اتفاجأت بجيته وهم بهالوضع عمه متوفي وماراح ومو اي عم مبين يعزه
اول ماطب صاح
.. بطة جيبي تليفونج وتعاي
لو اعرف بطة شسوت
صوت احمد بأستغراب سأل
..عفتهم يابه ؟شعجب روح واحنا نتصرف
..اختك وين
..هاي هنا ..يابه صخر وين خل يجي يفهم لو نروحله احنا
..صيح اخوك بلكي يقتنع ويفوت خل نشوف هاللعبة شنو تاليها
فززني من صاح
..هاجر وينج تعالي عمو
فتت وراهم الغرفة الاستقبال بطة گاعده تبجي وتحلف هي جانت نايمه
اجه صخر وجهه متغير متأكده بي شي ارد اسأله وخايفه وخجلانه منهم
ماشال عينه مني يريد يتأكد شصاير.. ماصبر يمهم وگال
..هاجر انتِ زينة بيچ شي شو گومي اشوف
عمي رد بهدوء
..مابيها شي يابه اگعد ارتاح خل نحجي
وين الرسالة الاجتك من بطة
بطة بجت وحلفت
..صخر والله مادازتلك اي رسالة اني. جنت نايمه والله
ركز بيها بعيونه احسهن يجدحن من العصبية ونظراته بيها الف سؤال وتشرح كل قهر يحس بي
طلع تليفونه وشوفها
..مو انتِ اني مصدگ بس تليفونج وين جان اذا جنتي نايمه انتِ
..ماادري والله مخليته مالي علاقه بي حتى رمز ممخليه بي ابويه خلالي وگال انتِ واخوانج بي مليان بالعابهم ودوم عدهم
احمد كلها
..اخوانج الهسه نايمين
..والله ماادري ليش متصدكون
..ويعرفون يراسلون منج ويحذفون شمعرفهم
سكتت تناشغ واني افكر هي الرسالة شبيها
وانصدمت من عمي گال الصخر
..اكو لعبة بهالرسالة واذا ثبتت الك عليه عهد السوتها ماتسلم والخلق الكون ماتسلم
صخر بقهر رد
..لو هاجر باقيه هناك وبذاك البيت وجايتني الرسايل ورايحلها جان افتهمتو اني صاعدلها وحدي وصار الموضوع اكبر
حمزة انت مو بايت بالبيت؟
منو الصاحت ابيتكم جوه من النسوان وليش ابيتكم الفاتحه هناك شجابها هنا واني نزلت مالكيت احد
سكت حمزة ماجاوب رجع صخر سأل
..مامعقولة ماشفتها اجيت لكيتك بالحوش وهي توها طالعه
..امي اجت تريد تعزي ابوي ولكته طالع
..امك جايه قبل موته؟ اهلها بعاد منا ..وابوي هم جان بعده لايدري ولا طالع
..امي هنا جايه مسيره على عمتي مرة عمي سليمان من امس هنا
دار عليه ابوي متفاجأ
..امك شعدها ضايفتهم بالطرده عرفتهم ماسيرت الهم قبل
..يابه هي اجت تشكي الجدي منك
..سهلة ليش لا خل تشكي شلون اهتم للشكاوي اني ..بطة امج مخابرتج تراسلين اخوچ تسوين سالفه بهاجر؟
بجت بطة اكثر
..والله امي زعلانه وماتحاجيني اصلا
..هااا وليش زعلانه
..لأن مااصير وياها
..وياها بشنو ؟
حمزة راد يدارك الموقف
..يابه هنه دوم مايتفاهمن امي شعليها بتليفون بطة والرسالة عادية خاف بطة مسويه مقلب
صاح صخر مرزله
..عاديه شنو مقلب شنو هيج اني تافه ومتعودات هيج يسوون بيه ..بطة احجي من الاخير اني احترمج وراح اصدكج امج عليمن زعلانه
..لأن مااقبل بحجيها تريدني ازعل ع زعلها والماتحبه هي مااحبه وهذا ماارضاه وزعلت بس والله الرسالة مو اني دازتها
صاح عمي
..كعدلي ياسر ومحمد بساع جيبهم هنا
ياسر اجه مافاهم محمد حيل مرتبك وبأول صيحه من عمو ابراهيم وهو يسأل
صخر كال الاحمد جيبلي حزام لو صونده ركض ختل وره ابوه يحلف
..والله امي كالت مقلب بسيط تسوي اجيبلك هدية تليفون..
عمي حاجاه
..وماسألت مقلب شنو الي اطلبه امك منك وي صخر من شوكت يتقبل مقالب هو ؟
..والله ماادري شغلة بسيطة كلت لأن سمعتهم گالو يحبها واعرفه يخاف عليها تأكدت راح يصدك
..شگالتلك بعد
.. بس هاي و كالت من ادك عليك تركض تصيح ابوك وتكلهم حرامي بالبيت انتظرتها مااتصلت وصارت هوسه وعرفت جدي ابو عاصم مات صعدت العب بس من سمعت صوت حمزة واحمد يسألون ع الرسالة وضربو بطة خفت ورحت اتلفلفت على اساس نايم
صخر مسح وجهه بقهر وعدل گعدته اباوع ايده ترجف
نزلت دموعي احس يوميه الحفره تتسع وتسحبني للقاع اكثر مااعرف شنو من حياة حياتي
عمي حاجه محمد وهو متوتر يهز رجله بقوة وعينه مخليها بالكاع
..ماسألتك وين ابوك ووين اخوانك
..كتلها ابوي يم حلا واخواني وهاجر بالبيت هناك
..يعني انت ماتدري هاجر ونور اجن من الليل وانتم نايمين وبس حمزة بقى هناك
..لا اني عبالي هناك والله ..يابه والله عبالي مقلب صدك
صخر بعصبية دار ع ابوه وحمزة
..عوفو ترى محمد جاهل بعده صفوف اولية عرفتو القصة منه خلص فهموه امه مستغلته وتريده ينتقملها من هاجر ومني ..يعني مرتك يااستاذ ابراهيم وامك ياحمزة تريدني اروح للبيت واصعد الها گبل مثل ماصار وسويتها لو لا ستر الله تريد تفضحني وتفضح البنيه وتشيع عليها كلام وعليه هم
تريد اطلعنا بفضيحة
دار على عمي مقهور صاح
..الامانة اذا انت مو كدها تتكفل بيها شكوووو
..بس على كيفك انت الثاني اهدأ ..ولو گالت صاعدلها اصدك بيها اني اعرفك ماتسويها لاتحرك دمك وحقك وحقها اطلعه والله ماافوتها الها تدفع ثمن فعلتها غالي
وهم يحجون دك تليفون بطة الشبعت بجي احس خوفها اتحول من نفسها الخوف على امها واني هم حتى رؤيتي اتغوشت من الدموع
اتجمعن الحسرات بگلبي وصار مابيها مجال قررت خلص ارجع الامي وشيصير خلي يصير
عمو ابراهيم اشرلهم يسكتون وكل لمحمد جاوبها وجن محد يمك واسألها ليش هيج سوت وشنو تريد
جاوبها محمد متوتر وعينه تتنقل بوجوهم حس اكو غلط بالموضوع واول ماجاوبها صوت هوسة نسوان يمها الظاهر بالفاتحه واتصلت بدون اي كلام كالتله
..حمود ماما امسح الرسالة من تليفون بطه ولاتحجي شي حتى لو سألوك
..ماما ليش كتيلي هيج سوي
..معليك ليش عبالي حظي يكعد هالمره وهم ماكعد عمي صارله سنة مريض والا هسه مات صحت اريد افضحهم طلعت كلها تصيح وياي ومشيتها ع صياحهم وطلعت خفت اتورط اكثر
انت هم ركز ولاتفضحني امسحها الرسالة
نهى الاتصال عمي حاجه حمزة
..تروح هسه اطلع امك من عزا جدك البيت اهلها اذا لكيتها اطلع روحها وگللها يكول ابوي هذا اخر يوم وانتِ بذمته
حمزة ماحجه شي دنك واني كتله
..لا عمو اني ارجع الامي وكل واحد يرجع المكانه الصحيح وخلص انت حاولت واني حاولت بس مو كلشي يمشي مثل منريد راح اخابر امي اتفاهم وياها
عمي مارد بس لزم راسه بقوة وصخر كال
..وين ترحين انتِ الثانية؟ ياام الام الي تساوم بيج اني اكثر شخص جنت اريد تصلحين موقفج وي امج بس الام الماتسعى السعادتج والي تتآمر من وراج وياهم بس حتى تذبج الحاجه وصعوبة حياتج عليها وترجعيلها بسهولة بدون تعب منها لا ماتستاهل انتِ مكانچ لاعدهم ولا عنده مكانچ يمي يم شهلة وبس
اني بجيت بجزع لأن كلامه صحيح ومامستوعبة كلامه للنهاية الحد ماعمي كله
..تجيك بأي صفة هي يمي والف تهمه تهموها ووياك انت بالذات ليش اني مااعرف انتم اكثر امان الها بس شلون فهمني
فرك وجهه حيل وگال
..تحجي الناس شتكول رايدها؟
اي رايدها اذا يهمك ويهمهم اعلنها وخلص بس اسألها
هي تقبل بواحد مثلي؟
حجاها وطلع وعمي طلع وراه يصيحه تعال انت فهمنا شبيك انت وماتقبل ؟
حمزة بطلعتهم اتخبل حار شيحجي على امه وبطة ظلت تتصل بيها وماترد واحمد هم حاجه حمزة وكله لتلوم ابوي شيسوي قليل
اني صعدت فوك افكر بكلامه
..هو شبي وكل ساع وكال تقبل بواحد مثلي واتذكرت من كال عالجيني اعالجه من شنو
عمي ابراهيم بعد مارجع لليل رايح للفاتحه
العصر اتصلت بيه عمتي شهلة تريد حمزة تكول غالق تليفونه الظاهر ماتعرف شصاير نزلت ابطئ اصيحه احس مااريد اواجه واحد منهم بس ماكدرت اخجلها واتعذر هي الهسه عبالها اني ابيتهم وهو هنا
خلتني اوكف من الدرج وهي تكلي
..فدوه هجوره يمه استعجلي اخوه خرب فد مره انتهى ومحد يمي وبس حمزة متعوده عليه
نزلت اركض لاكاني حتى وجهه متغير بظرف ساعات انبلع بلع وعيونه غارت من القهر قهرني حمزة مايستاهل مؤدب حيل لكيته واكف وي نوره يحجي ونوره تبجي ومعصبة
..حمزة عمه شهله وياك ع التليفون
اخذه بدون مايخلي عينه بعيني كلها
..ها يمه ..تليفوني ماادري بي مخلص شحن يمكن ونوره هم مو يمها تليفونها فوك وهي جوه
فز من جابتله طاري اشهل وصاح احمد وراح يركض
نور تسأله ماجاوبها
احس گلبي راح يطگ متت قهر
صعدت فوك يم حلا ماتدري شنو صاير جانت نايمه الصبح
لكيتها اطرز ثياب صغار وفرحانه بيهن ماحبيت اشكيلها بس شافتني انتبهت
..هجوره شبيچ ليش ضايجه بس لامن حجي العگارب خيولن يرحلج فدوه
بجيت
..اني الله نقذني اليوم من سالفه جبيره ..كليلي حلا شسوي واشكره صليت ركعتين واحس بعد اريد اسوي شي بلكي يخلصني فد مره من كل هم حتى لو ياخذ امانته المهم اخلص
..ياسودة عليه مبين مهضومة حيل شصار وياج ولج
حجيتلها باختصار لطمت صدرها
..يييمه ياحافظ دخيلك ربي ..الله يستر دخيلك الهي صاحبة بنات فيحاء شلون هيج تسوي شلون متأكده ولج ..واكول ابراهيم ليش مايرد حتى لو ميت عمه التليفون شعليه لازم روحه طالعه هسه
الاول مره اكولها طاحظها من صدك صخر اخو بناتها وسمعته تضرهن وانتِ بت عمهن وبنص بيتها الغبرة شلون تفكر تصيحج بي غبية لو نذلة الهالدرجة
..والله محتاره بروحي وين اولي
..اكلج وماتزعلين مني؟
باوعتلها واشرت
..لا ماازعل
..صخر مبين يحبج والله الكل ملاحظ اهتمامه واني بعيدة ولاحظت حتى حبج الطارية ..ليش ماتتزوجون احسن
..مدري شكلج بس مو هيج الموضوع سهل اكو غلط ماجاي اعرف وين
..اهدي هسه وابقي يمي لاتنزلين بعد خل نشوف وين تصفى
شلت الحظر عن امي لكيتها ناشره صور الها وشفت بطنها كبرانه مبينه حامل
اتصلت بيها ماردت راسلتني
..هلا هجوره ماما شعجب حنيتي وعرفتي امج مااكدر اجاوب رجلي نايم خل نتراسل احسن
حرت شكتب وكتلها
..هم يوجعج گلبج عليه تحسين بيه لو لا
..والله عرفتج راح تسممين يومي من رحتي الهسه انگلبتي عليه ولا جن اني امج تعبت وربيت وعلمت بس للشكاوي مخليتني ستورياتج ورد ومزارع تصورين وونسه وقصور وسيارات وكلية وزيارات بس من تخابريني تنوحين واطردين عيون ..كالو عمامج تركيها وهي برجليها تجيچ ابراهيم مخبلها ع الكل يدلل برعبال لأن مو بنته انتي.. ولو صار شي مايتأثر هو تأثيرج علينا اني امج وعمامج بس
..احتركتو انتو وعمامي بنار كلبي ان شاءالله ..انتِ متحامله عليه على شنو مو صوجج والله صوجي اني
..ولي هاجر الفلوس غيرتج ونستج اهلج ولي وبعد لاتسألين اعتبر روحي لاجايبه ولا مربيه الله عوضني بغيرج بلكي اعرف اربيهم صح
گمت افور اريد املخ نفسي واخاف من العيب اريد اذي روحي واصحيها اريد ابجي بصوت عالي واصرخ والم الكون على قهري
سويت نفسي نايمه والعبرة اتكسرت بصدري ودموعي نزلت وحده وره وحده بس ماارتاحيت ابد احس چني ماباجيه وبعدني بقهري نمت نومه مدري غيبوبه ماكعدت بيها الا بالليل كلش عمي يحاجي حلا
..ماشفتيها شبيها ليش هالكد نايمه
..والله حاولت اكعدها هوايه ماكعدت نوم القهر اكثر وحده اعرفه اني نوم ثكيل الوحده تشرد بي من وحشة الدنيا العالم خيالي
..والله كسرت ظهري هي وياه ..هي اهون ذاك مدمر واني سبب اذيته لو علاجه موجود والله ابيع العندي والماعندي واشتريه بس مامعروف علاجه شنو
..هو شبي ؟شو جنه ورد الولد مابي الا العافية
..مرضه بروحه اني عقدته ومرضته وهسه هو هاويها وخايف
..منين يخاف
سكت ماجاوبها كلها مرغيلي راسي راح يطك وراحو من غرفتهم هاي ام الشاشة وميز الطعام الغرفة نومهم
كعدت سحبت تليفوني اتصلت بي رن مرتين وتلاثه رد بصوت تعبان
..وينج انتِ اراسل وماتردين؟
..شلون صرت انت
..زين مابيه شي ارهاق وهبوط ماماكل جنت وصرت زين
..اكلت لو لا
..المغذي صحاني واكلت هم زلاطة مالحه
..مريض وتاكل زلاطة
..مابيه حيل اسوي ومااكدر اكل من غيري والمغذي كافي احجيلي شلونج انتِ ؟
..مو زينه اني اتصلت بأمي
كلتها وبجيت حيل
..طلع كلامك صح امي من كلامها متفقه وي عمامي ارجعلها بدون تعب وتكلي انتِ مرتاحه وتتشكين
اتنهد بقهر وبصوت بي بحة وكلامه مليان حسرات حاجاني
..ليش تتصلين هاجر ليش شحجيت اني
...ماعندي غير حل كلي وين اروح احجيلي ترى خلن عقلهن وياي واعوذ بالله منهن ومن شرهن
..وين ترحين لو تعيديها الف مره اكلج تعاليلي!
..وين اجيك وشلون وانت اصلا مامستعد
..انتِ مستعده؟
..الشنو؟
..مستعده نتعاون بينا وننهي كل هذا الجدل
..اساس التعاون شنو؟ ضيق وضعي اضايقك بي هم
..لا لا مو هيج تعرفين الاساس شنو وحاسه بي مثل ماحاس بيج ..انطيني مجال اصحصح وكلشي يتصلح اخذتلج اجازة اليوم واخذت الي هم جنت تعبان حيل
..تسلم حتى وانت بهذا وضعك وتفكر بيه
..لأن عندج امتحان مهم واستاذ المادة من النوع الي يحب التزام كلتي عنه قبل خفت ميعيده الج
..الله يحفظك صخر ويوفقك ويشافيك من كل سوء والله مرات تفكر بأمور مامفكره اني بيها
..وهذا ميخليج تفكرين هوايه قبل لاتگليلي اضايقك بضيق وضعي وتسألين شنو اساس التعاون بينا
سكتت مااعرف شحجي وهو احسه يريد يكول شي اكبر ومتراجع
ثاني يوم داومت وامتحاني ابد مقاريته هم مااعرف شلون راح ادبرها ولا الي خلك احضر بس احس كلشي اسوي مجبورة اداري فشلتي
بالي يم البيت واجواءه البارحه
بعد كلامه ماكدرت انزل يم البنات واني سبب بخراب بيت امهن حتى لو هي سبب احس بروحي فشله شكبرها
لأن اني دخيلة وصرت افكر بكلام الناس اني قبل وطلعت عليه سمعة اخرب البيوت الادخلها واسوي مشاكل هسه شلون صعدت وبالي مدري وين انتبهت هذا مو هو؟
هذا مهيب
سلمت عليه بخجل بين ارتباكي عليه وهو كال
..صخر صار عنده شغل وماوصلج اليوم
اشرت براسي وماكدرت احجي احس غصاتي عبرن الحنجرة واتسطرن بگلبي ..يمكن هو هم مل
طلعنا بين افرعنا للشارع ولاكوه عمامي الظاهر الفاتحه هنا مسويها بمضايف كبار اجو للسيارة شافوني يتأكدون وحاجاني عمي علي
..ليش ماجيتي العزا جدج؟
سكتت ومااكدر اجاوب اي شي
..الهالدرجة مانهمج احنا ترى ابراهيم وابنه مادايميلج وهاي بس منعنا ابنه يوصلج اتخلى وماكال لا هي امانة عندي لان ماتخصيه انتِ فعلا
سكتت ماحجيت واعتبر سكوتي وقاحة وقلة احترام
واني الحجي البگلبي لو احجيه اعلمهم قلة الاحترام والوقاحة شنو
مهيب كله
..علي ماكو داعي الهالحجي وتعرف صخر زين لايتخلى ولا يخاف من احد بس احترم مصابكم وماراد يسوي مشاكل اني وهو مابينا فرق لاتنسى انت ابن عم ابوي بس هو ابن عمي الحجايه التمسه تمسني
سكت علي ورجع فتحلنا الطريق
گمت ارجف من الاعصاب الكتمتها احس خدي گام يرف بقوة خليت ايدي گفا ايدي على حلگي ضاغته بقوة مشه مسافه اتنفست بعمق جني ناسيه اتنفس
وگف مهيب وسيارة صخر طابگة على جهه
اشرلي انزل
مهيب حاجاه
..مالها داعي توكف انت ماتثق بيه اوصلها ليش هيج تتصرف لاتسويلنا مشاكل يرحم اهلك ترى ابوك ع الشعراية وياهم ولا جن جان قريب الهم ولا عبالك اهله جانو اكثر منا اتنكروله وكعدولة ع الزلة خاص بعد طلاكه البارحه الفيحاء اعتبروه اهانه الهم وعدم احترام الفقد عمه وعمها
..اني تعبان مالي خلك اسمع جريدة واسولف اكثر بس بلساني جواب يكتمك انعل ابوهم لابو مصابهم لابو ابراهيم لابو فيحاء وكل من اله صلة بيهم ..وهسه مشكور وماقصرت وگفتك هاي ماانساها لأن ادري بيهم جانو محضرين ببرزون عضلاتهم مسوين سيطرات ولد الكلب
..خرب حظك صخر الرجال البارحه اندفن شبيك اتخبلت شنو هالمسبة صاير مثل ابوك وتحجي عليه
..مات البارحه وولده يجمعوله رحمات اشتعل هو وابراهيم هم يدلل عليه مااقصر وياه
..انت مخبل والله الله يساعدها عليك لو صارت صدك
.. ولي يلا
صعدت بسيارته بدون مااناقش وسكتت
دار عليه مبتسم ولاعبالك وجهه ذاك
..صرنا نغامر من وراچ ست هاجر
باوعتله بدون اي رد
..لاتحرگين دمي وتسكتين هيج مامتعود اشوفج مكسورة
..شباقي بيه وماانسكر ارد اموت اني
..يرحولج فدوه تموتين عليمن
..ليش هيج مانعين جيتي وياك وليش انت مهتم الكلامهم
..مانعينها لأن مطيح حظهم ومااحترمهم من صرت مو اليوم.. لان هم مو مال احترام وخافو لا اصير نسيب مفروض عليهم
..نسيب المن
..الامي شهلة انطيها العمج وهي براس ابوي ..شبيج صايره ماتجمعين
..مو مااجمع ولا غبية اني بس من تصير تكولها بشجاعة واقتنع بيها ابطل اتغابى مااحب هذه نبرة التمويه على اصل الموضوع وكثرة نبرة الاستعطاف منك تموتني اكثر
..ها انوب گلبتي عليه
انتبهت الكانولة بيده
..بعدك مريض شعدك شكالولك
..نفسيتي مرتبكه وماتكدر تبوح
ابتسمت وهو ضحك
..هاجر ..اني احبچ والله احبچ الشخصچ ..وهم والظروف وخواطرهم واللابسته برجلج اني ماعندي بهالدنيا خط احمر بس شهلة وانتِ
فهيت بوجهه مااعرف شحجي ركز بطريقه اتعدى كم سيارة ورجع گال
..اذا تحبيني احجيلي اني متأكد بس ارد اطمن وراج صبر لو لا
..صبر على شنو
..عليه لأن تعبان والبيه اثر سنين لايوم ولا يومين
..شبيك انت جنك ورد ليش تكول مريض وتخوفني عليك
..لو خوفج عليه ياريت افرح والله ..اني اخاف من خوفج مني مو عليه
صفنت بكلامه افكر وهو سكت
..شنو صاير وياك
..هواي امور وكلهن من زواجات ابوي
رحت للدوام وبعد الامتحان الصخمت الاجوبة بي كعدنا اني وبنين هي تسولف وتضحك سألتني على صخر
..بربچ الولد الوصلج اكثر من مره متزوج ؟
..لا ليش
..خل اسألج وجاوبي بس بـ اي لو لا لتضيفين سؤال والج مني لفة
ضحكت
اني بحال لعبة ولج
..شبيج مشاكل الدنيا كلها بيج وجهج يلطم
..والله يابنين بيه لطمه بس الله يدري بيها ميته قهر اني .. عليج الله خلي بيبيتج تدعيلي الله يفرجها عليه ذاك اليوم البنات يكولن خليناها تدعيلنا وصار الردناه
..اي والله حبوبتي بخيته وگلبها طيب ولو دعت الواحد تدعيله من گلبها
..خل تدعيلي فدوه
حجيتها وبجيت
..تحبي مووو
بجيت اكثر
..يااا سوده عليه هاجر منين اجاج الحب كسر گلب الحب شگد يكسر گلوب الله يبعدني اني لو كسرو خاطري بنستله اموت مو انوب حب وينوخذ مني
احجيلي ليش تبجين
جنت محتاجه احد اشكيله وافضفضله وهو بعيد عني مو عايش وياي ومن اهلي المحسوبين عليه
واعرف المفروض بالدوام ماانطي سري الاي بشر بس ماكدرت اقاوم اكثر خفت انجلط واموت حجيت كلشي لكيتها تبجي وياي
..ولج طلع هو يحبج ..بس ليش هيج يفكر بالزواج شصاير وياه
..ماادري
سكتت شويه وكالت
..خاف صايرله موقف من اهله مو زين يذكره ومخلي ينفر
..شلون يعني؟
..ماادري بس حاولي انتِ تساعديه حتى تتأقلمون ويحجيلج
..مااريد اتزوج بهالطريقة
سكتت شويه ورجعت حجت
..حقج والله بس شلون هسه شراح يصير عمامج مايتركوكم بعد الصار
واحنا نحجي اتصل عمي ابراهيم كال اني عمج انتظرج بره الجامعة اليوم اني ارجعج
طلعت محرجة حيل منه توني فتحت باب سيارته وطبك صخر باوع العمي ونزل
..بعدك امين والله ابو البراهم بس ماعندك حظ وي عمامك
..بابا خلي تعدي هالفتره والي تريده يصير بس انطيني مجال
..الصبح كتلي اني اوصلها تالي الكاه مهيب امين وي الناس كلها وتخون الشخص الغلط كل مره ماتنصح وياي ..ليش يعني ابالك اصدك تترك الناس التجيك الصبح تعزي من محافظات ومعارف وتروح توصلها للكلية ..ابو البراهم محد يعرفك كثري
ضحك عمي
..شوف جنت شاك بشي ومن اتصل بيه مهيب تأكدت وهاجر ماتصير الغيرك وشاربي مو عليه لو مازفيتها بيدي الك بس برضاها كون
دنكت عبالك اني مو يمهم يتناقشون باريحية
..كل هذا مايمحي ذنبك هاجر شتسوي بيه اني وعلتي ..ناقصة قهر هي بس شكول رضاها محكوم بقضيتي وشلون تفهمها وتتعامل على اساسها يصير كلشي
سكت عمي ماحجه وصخر اشرلنا مسلم بيده وراح وظل يمشي ورانا بطيئ عمي يسبقه ويرجع ينتظره
بالليل راسلني صخر
..الطريق وحشة بدونج چنه سچة غريبة وماعليها رجل
ابتسمت لاهو شعر لاهو نثر ولا هذا كلامه المعتاد بس فرحت بيه
رديتله
..لاتخاف اني هم ماصايره اونس اسأل عمو نفسيتي مجعوصة واتأفأف لاتتحسفني
حجيتها اضيع كم المشاعر والافكار الي بداخلي واسوي نفسي طبيعية مامتأثره
..اغنية ماجد اتعودت اسمعها بالجديد واشوف كلشي بعيونج وانتِ تسمعيها سمعتها اليوم بدونج فارغة مابيها كل شعور
..صخر
..ها يعيونه
..شجاي يصير وياك
..الي يصير وي كل الناس من تحب
..شنو الي قالقك من خطوة الخطوبة ورضاي المو ضامنه مساع من حاجيت عمي رغم تعرفني احبك ومتأكد هم
..اخاف ماتتحمليني
..والي تگلك اتحمل كلشي منك ووياك مدام نيتك صالحة شتكول ؟
..اگول افدي الجكليت الدراك بروحي اني..بس مافاهمه الموضوع انتِ
..فهمني انت وخليني افهم
..تتحملين تسمعين البيه ؟
..اكيد والله مو بس اسمعه مستعده اعيشه وياك
....
صخر ...
شعوري شعور انسان يعيش تناقضات حياته حتى بمشاعره واحساسه مو بس واقع مرير اعيشه حاضر ومستقبل وماضي
وبعد كلامي وياها واني متأكد منها ومن حبها الي بديت احجيلها كل مخاوفي بس تبقى بنية وبعدهي غريبة عني مااكدر اشرحلها بتفاصيل دقيقة بس وضحت هوايه من شنو اعاني وليش .. بتمويه الحدث الحقيقي اكيد
لكيتها متحمسه الهذه التجربة وهذا الترابط المتين
فاتحت امي فرحتها ماتنوصف شجعتني هوايه وقوتني الهالخطوة اكثر
اتصلت بابوي ابلغه جان متوقع وعبالك منتظرني اقرر
خابرت عمي سليمان ماردته يعرف من غيري ورحت بنفسي بلغتهم هو وجدي من عرفته بالبيت
طلبو مني اتأنى بس هالفتره كد عشرين يوم لو شهر ع الاقل
سمعت منهم ووافقت من باب الاصول الناس ماتعرف بالبيوت واسرارها
وظل احمد يوصلها ومية وصية اوصي وابويه بنفسه يرجعها الحد بيوم رجعت من البستان اني وعلي جاي يتفق وي عمي على زواجه من غزالة اخر زواجهم موت ابو عاصم
لكيت بيت ابوي هوسه وعلي واخوانه بالباب
عثمان وينه مو وياهم اتقدمت اشوف شكو لكيت ابوي لازم علي يضربه كل راشدي ولا الثاني ووي وسام وعبد وحمزة واحمد مانعين باقي اخوانه من ابوي هم
وياهم زوجاتهم يصيحن بهاجر
..يلا امشي راح يتذابحون من وراج
حاجيتهم انهي الجدل
..طلعه ماتطلع هاجر واليوم مايعدي الا وهي على ذمتي
انصدمت من اصرارهم على رفضي وهم يگلون الابوي اخذها الاحمد ولا اله
بدون نقاش اني واحمد هجمنا عليهم ومافضت شغلتنا الا وعمهم الجبير حضر وقرر خلص كلشي ينتهي اليوم وحضرنا للعقد
...
غزالة ..
بعد ماشافني علي صدفة واني افتحلهم الباب تابع حسابي بعد ايام وانطاني اعجاب وبعدها اخته حاجتني
جنت خايفه وافكر هوايه بالرفض وبالقبول اكثر
لأن علي اعرفه من خلال كلام صخر عنه وشكد هو يحبه اكثر شخص مقرب اله والوحيد من خواله مقربه هيج وعنده طلعات كلش حلوه تبين شهامته هم
ولأن وضعي خاص مستبعده يجيني انسان مثله واحتمال هذه فرصة ماتتكرر
وهم خفت مايعرف بتفاصيل حالتي وحجيتلها اريد اتفاهم وياه بهالخصوص وعرفت منه كلشي يعرف عني حاجه صخر وصخر حاجه ابوي وصارت مشاكل كومه بينه وبين مرته
خالتي رافضه الزواج منه وكعدت تكله هم بعد يوميت ابنها يتعير وتاليك جد للشروك مو كافي صخر ابوه مالفاه وانت لفيته من كبر يلا اعترف بي انت ليش تغلط وتنطي بتك
ابوي بيومها صار نار ورزلها رزالة تسوى عمرها كلها
..على شنو شايفه نفسج بيمن احسن منهم انتِ ..تعرفين الشروك معاشرتهم لو هي فكرة عنصرية انزرعت بيكم من الصغر كبرتو وماعرفتوها خطأ واستمريتوا ..تعرفين الشروگ من جنت بنص المعارك واخطط العملية صعبة واحتاج جنود وضباط كلوبهم ميته اسألهم عن مدنهم واعزل الي تسموهم شروك بصرة عمارة وناصرية عن البقية واكلهم هاي المعركة تريد شباب گلوبهم ميته مستعدين للموت يطلعولي من هاي المدن ضعفين اعداد البقية من الشروك اربعة من غيرهم واحد مستعد للموت وهذا واقع عشته يخص الشجاعة
احجيلج بالكرم ..كل اهلنا اكرام من كل المدن ومنهم ينعرف للكرم طاري هم
للغيره مااحجي عن غيرتهم الدنيا كلها تشهد
كل مجموعة ناس يطلع بيها زين ومو زين بس اكو صفات عامة يشتركون بيها وهذه صفاتهم
الكلام هذا الطلعتي بي بالجديد مااسمح بي ينعاد وصخر اذا قللتي من مكانته كدامي لو كدام خواته تطلكين وخاف عبالج بعد هالعمر ماسويها لا والله اسويها واسوي الاكبر منها
..شتسوي بعد شو اكلتني وبلعتني شدعوه عليك شحجيت اني ..يعني هو احسن لو ابن اخوي
..هو طبعًا انطيتها اله ولتناقشين ابد
بيومها فرحت حيل بس ظل بداخلي خوف وخالتي حقدت عليه اكثر بتحضيرات الخطوبة شنو يجيبون اطلعه من عيني تعيب وتستهزأ صح مااهتم الرايها بس نفسيا اتعب
انخطبنا وعقدنا باجواء عائلية تجنن خواتي ماقصرن وياي وهو غناني بحضوره وكلامه عن كل موقف انغث بي وصار كلشي بحياتي هو وعلى طول وياي
خالتي بدت تحقر مو بس ويايه ويه الكل واخرها وي رشا علمود صخر وهاجر تلاغن خابرت عثمان تكله مرتك مايهمها بنت اخوك الي يهمها صخر وبس ولا عبالك ابن عم وتريد ترتبله واطمطمله هم
عثمان رغم هو وي عمي ابراهيم ومتفاهم وياه اندفع واتصل برشا زمخ بيها وغلط عليها
رشا حلفت ماترجعله تأدبه وگالت الخالتي شوفي شراح اسوي بيج
وكصي ايدي اذا رجعت البيتي گبل لا اعرس الابوي وبيدي ازفة
وهنا الدنيا اشتعلت ماسكتهن الا بصوت جدي يأمرهن بالسكوت
واني احجي على خالة واكلها ابويه تعب من المشاكل واحنا تعبنا انتِ شنو الترديه
هي تحجي وتغلط رن تليفوني خابرتني عمه شهلة تكلي جيبي خواتج وتعاي بساع
..عمه والله خوفتيني شصاير
..خير ان شاءالله لاتبطن
صحتهن وع السريع اتحضرنا لكينا جدي وابوي بالباب رايحين الهم واخذونا وياهم
انصدمت بعمي ابراهيم موجود وعمتي شهلة لأول مره تخليه يلمحها عادي بدون نقاب وبوشية
ذاك اليوم ضجت عليه من عرفت يتوسل بنور وبطة يصورنها ومايقبلن يخافن من صخر بس يوصفله
والصدمة نور حجتلي سر بيني وبينها مشتري گتر شعرها من نور بمية الف وسفرة التركيا دزها وي عبد ومرته
هسه شنو شعوره واتوالت الصدمات من عرفت بصخر يعقد
وبدل مانفرح بعقده سواله مشكلة شكدها وكسر عمها علي تكسر
يتبع