رواية سنيين الضياع الفصل السادس 6 بقلم جمانه السعيدي
هاشم....أخذنا ليلى ويانا وصلنا للمدرسه دخلت مهند
للصف ورجعت للسياره لان ليلى جانت تنتظرني
رحت وياها للمتوسطه قدمت اوارقها
وبقيت واكف لمن شفتها استلمت كتب ودخلت للصف
هاشم...هااا اروح
ليلى....اي روح
هاشم...عندج مصرف لو انطيج
ليلى...لا عندي مصرف بس لا تتأخرون عليه
هاشم...حتلو اتاخرنا لا اطلعين من باب المدرسه
فهمتي لو لا لمن نجي ناخذج
ليلى...تمام
ورجعت المدرستي المدير ماقبل ادخل لان اتاخرت
عن الحصه الاولى
بعدين مدرس العربي شافني واجا عليه
سئلني ليش اتاخرت
هاشم....رحت قدمت البت عمي احنا من القريه
بقيت وياها لان اول مره تنزل للولايه جانت خايفه
بقيت وياها حتى تتطمن
المدرس....ادخل بس مره ثانيه اخذ اجازه اذا ناوي تتاخر
من خلص الدوام طلعنا نجيب ليلى
بس شافتنا ضحكت
نزلت وفتحتها الباب
هاشم....هااا بشري شلون اليوم الاول بلمدرسه
ليلى....جنت خايفه مااعرف البنات بقيت كاعده بلصف ما طلعت ابد
بس بنيه وحده حجت وياي
شكد حلوات البنات ولبسهن حلو
هاشم...انتي احلى منهن شنو البنات
ليلى...ملابسهن حلوات
هاشم...اجيبلج احلى من ملابسهن بس الأهم من الملابس
ندرس وننجح
حتى نرفع راس الشيخ
بنات القريه كلهن يغارن منج محد وصلت للولايه
ودرست بس انتي
لازم نجاح وتفوق اتفقنا
ليلى.. اي اتفقنا
بدينا نداوم كل يوم نروح سوه ونرجع سوه
زينب ضاجت من شافت ليلى اداوم
زينب.....هاشم انت ليش مااجيتنا من زمان
هاشم...ليش
زينب...حتى تقنع ابوي اداوم بلمدرسه
هاشم...بعدها على اولها امشي اسجلج بلمدرسه
زينب...وين صاحاباتي السنه بلكليه
هاشم...ميخالف تلحكين
زينب..... بعد فات العمر
بهاي الفتره اجو خطابه على زينب بيت عمها
اجو يخطبونها
ابن عمها مخلص ابتدائيه وحاليا عسكري عدهم كاع يشتغلون بيها
صار شي ابد ابد ابد ما متوقعه
تخيلو الشيخ طلب منهم مهله ليش بس حتى يسئلني
نوافق على هاي الزواجه لو لا
هاشم...شيخنا واني شنو علاقتي انت ابوها وهمه بيت عمها
الشيخ....شلون انت اخوها الجبير انت اعرف بمصلحتها
هاشم...اعرف منك انت ابوها
الشيخ....شوف صدك وثق اذا تكول زينب ما تزوج ماازوجها
هاشم....بويه شيخي عيوني انت الخير والبركه
كلمتك سيف يمشي علينا كلنا
انت الي تكول واني انفذ
الشيخ....شحلاتها كلمة بويه بحلكك
انت موافق على هاي الزواجه
هاشم....اذا انت موافق اني موافق كول وااشر
اي شي تامر بي واني حاضر
الشيخ...هاي هيه باجر تروح البيت عمك ابو صالح
تبلغهم موافقين
رحت العصر للكاع ومناك مريت عليهم بلغتهم الشيخ موافق بهاي الزواجه
بيومها ماكدرت انام شلون الشيخ ينتظر رائي
بهيج قرار مصيري يخص بنته
هو ابوها وهو يقررر بعدين العريس ابن عمها
يعني أقرب الها مني
معقوله زينب زواجها واكف على موافقتي
ولله ماادري شلون راح اكدر اجازي الشيخ على هذا التقدير
جمانه السعيدي
اجت المشيه واني كنت الكل بلكل
اني الي استقبلت الزلم واني الي اضيف
اسمي ما وكع من السان الشيخ
تعال هاشم بويه هاشم ااريد هاشم ووين هاشم
منا لمن خلصت المشيه بخير وسلامه
اسبوعين وزوجت زينب
حقيقتا البيت صار وحش عبالك عشيره شايله
مو بنيه وحده
جانت شايله البيت كله على راسها
لا تعتذر ولا تتمل تعجن وتخبز وتطبخ
واكفه على الطباخ تخدر جاي تنظف
احس البيت صار مو حلو بعد ماطلعت منه
الله يوفقها ويسعدها
نكعد ندرس اني ومهند وليلى تجي يمنا
اذا ما تفهم شي ندرسها ويانا ماشاء الله شاطره
ودرجاتها عاليه
صرت خبير بحياتنا اكثر من الشيخ
اعرف لو رحت للكاع شسوي وشلون أوجه الفلح
لو رحت للسوك شجيب من مسواك
لو اجانا احد شلون اضيفه واسوالف علي
اذا الشيخ كلفني بمهمه تخصه وتخص الشيخه اعرف شلون اتصرف
كمت اعرف الناس اعرف الحجيه صدك والي يجذب
الحيال المنافق ابو وجهين
كله هذا تعلمته من كعدتي بلمضيف
اذا تمرض احد بلبيت اني اخذه للولايه للطبيب
اني المسؤل عن البيت كله
فضل تعامل الشيخ وياي صارت ثقتي بنفسي عاليه
امشي واحجي وما يهمني اي واحد
كملنا الاعداديه معدلي بوقتها جان ٨٠
اما مهند ٨٥ وليلى نجحت للاعداديه
ليلى...اني اريد اكمل دراستي
الشيخ...بعد ماكو دراسه اكعدي واسكتي
هاشم....لا شيخ ليلى شاطره الله يخليك
عوفها تكمل
الشيخ...شسوي بلشهاده اخر شي تزوج وتكعد بلبيت
حالها حال اختها
هاشم...لا ليلى راح تكمل وتتخرج وتتوضف
الشيخ.... ماعدنا بنيه من القريه توضفت
هاشم...ليلى راح تكون أول موضفه من القريه
وراح يكولون بت الشيخ اتوضفت
الشيخ....انت شراح تدرس
هاشم... اريد هندسه زراعيه حتى اتعلم اكثر
بمجال شغلنا
الشيخ...بكيفك وانت مهند
مهند...اني اريد تربيه انكليزي
الشيخ......تمام ليش ماتروح مثل هاشم
مهند ....اني ما تفيدني هندسه زراعيه التربيه على كد قابليتي
الشيخ... يابويه انت معجزه وصلت بالدراسه هيج
مهند....راح أقدم وادرس خارجي
لان مااكدر بهذا وضعي اروح وارجع
ولا اكدر اعيش بلاقسام الداخليه
لا م اطلع تقرير طبي وأقدم بلجامعه حتى يقبلون ادرس خارجي
مهند...اني اخذك اسويلك تقرير
الشيخ... اي هاشم ياخذك
جمانه السعيدي
هاشم...اخذته الدكتور اختصاص وسويتله تقرير طبي
ورجعت اخذته للجامعه
رحنا اني ومهند العميد طلب يرفع التقرير
للوزاره وبعدين يرجعنا خبر
رجعت اخذت ليلى قدمتلها بلاعداديه
ليلى.....لو ماانت جان هسه لو كاعده بلبيت اطبخ واخبز
لو مزوجه حالي حال زينب
هاشم. اهم شي النجاح حتى لا تشمت الناس بينا
ليلى...راح أنجح وارفع راسك وراس ابوي
هاشم....هذا المطلوب يابت الشيخ
بهاي الفتره بديت احس اكو مشاعر تجذبني اليلى
اكو شي يفرحني من احجي وياها
يمكن لان جنا نروح ونرجع للدوام سوه
يمكن لان انفتح الكلام بينا اكثر من قبل
بس مااكدر أبين مشاعري بعدها زغيره
واحتراما للشيخ الي أمني على بيته وعلى عائلته
لازم اسكت والوقت المناسب يله أبين مشاعري
بنفس الوقت اني كنت احس هيه مهتمه بوجودي
تفرح من ارجع للبيت تسئلني ليش اتاخرت
اذا تحتاج شي تطلب مني
احس عدها مشاعر اتجاهي
راح انتظر واشوف هاي المشاعر وين راح توصل
بدينا نداوم هيه بلاعداديه واني بلكليه
شكد شفت بنات بلجامعه بس ليلى احلى منهن
على الاقل بعيوني هيه احلى وحده
كلبي يحبها ويريدها ياترى اذا اخطبها الشيخ يقبل
لو يرفض ليش افكر ومحتار
كلشي بوقته حلووو
بعد دوام اتلث اشهر
الشيخ.....بويه هاشم يصير تدرس خارجي مثل مهند
هاشم.. ليش شيخنا تعبت من لمصرف
كعد على حيله لا لا شلون تكول هيج
يامصرف يافلوس صدك جذب ازعل عليك
حلالي ومالي كله الك
هاشم.. اعذرني شيخنا بس ليش تسئل
الشيخ...ولله اني ضايع بدونك ابقى منتظرك على نار
تنزل بس يومين وترجع تروح
احس روحي ضايع كلشي مااعرف اسوي
هاشم.... ماادري شيخنا اسئل واشوف
الشيخ....اي ولله تسوي فضل
هاشم...فعلا سئلت بس مايصير الدراسه خارجي الها شروط وكلها ما متوفره بيه
كنت أحاول من ارجع للبيت اخلص اكثر الشغل
حتى الشيخ يرتاح
للعطله بلجمعه مرات مااداوم كم يوم
منا لمن مشت الامور
خلصت اول سنه دراسيه
بلعطله ام مهند تعبت حيل
اخذتها اني وليلى للولايه للطبيب
حجزنا وكاعدين ننتظر
جان نجي بنيه ازغر مني بس شكد وكحه
اول شي تعلرمت على سعر الباص
شلون هيج السعر وليش انتم غالين بقت تحجي
صوتها عالي الصراحه مستفزه
جمانه السعيدي
كمت اني من مكاني
هاشم...من رخصتك اني ادفع الباص
راسا التفت عليه وبصوت عالي
....واني شنو محتاجتك شنو جاي تتصدق عليه
هاشم....اريد اساعدج اذا ما محتاجه ليش صار ساعه صوتج
عالي ادفعي وخلاص
عيب المره صوتها عالي بهيج مكان
...وانت شكووو منو طلب منك تدخل
هاشم....رجعت المكاني وما حجيت وياها الضاهر وحده قليلة التربيه
كصت باص والتفتت عليه وكالت اخذ فلوس الباص من الاخ
هو تبرع يدفعلي
التفت عليه الولد ااشرت براسي ااي
بلقريه عدنا عيب المره ترفع صوتها وخاصه اذا مكان بي زلم
لازم تحتشم وتسكت بس هاي لا محتشمه ولا سكتت
ضليت متفاجئ بيها اول مره اشوف هيج نموذج
كعدت شويه عيونها منا ومنا ورجعت تعاركت وياا اله أدخلني
اني ليش انتظر اريد ادخل
الولد كللها بعد كدامج ثنيين
مصممه اله تدخل قبلهم حجز باسمنا وحجز باسم وحده ثانيه
اني ااشرتله خليها تدخل قبلنا رغم طريقنا بعيد بس اريد اخلص من هوستها
بس الحجز الثاني المره ما قبلت تدخل قبلها
تعاركت وياها وتحجي وتعيط عليها شلون ماادخل كدامج
المشكله محد.يكدر يردها السانها شطوله وتغلط بدون تفاهم
المره دخلت وهيه بقت تحجي صوتها شعلاته
من طلعت المراجعه الولد سئلني تدخل قبلكم
كتله اي خليها تدخل ماكو مشكله
دخلت على الدكتوره وطلعت دخلنا احنا وراها
من طلعت لكيتها واكفه تحجي ويا ابو الصيدليه وتضحك
استغفر الله مبينه مو راحه
( خليكم مذكرين هاي البنيه لان راح تطلع شخصيه اعرفها)
المهم اشتريت العلاج وطلعنا للبيت السايق منتظرنا
مرن سنوات الجامعه مثل الحلم اسرع ماكنت متخيل
اتخرجت سنة ٢٢ ومهند تخرج وطلع من الاوائل
اما ليلى نجحت من السادس وطلعت معدل ٩٠
فرحتلها اكثر ما فرحت بنفسي
الشيخ....انت بعد تخرجت ولله الحمد
بعد ماكو غير العرس لازم تزوج اريد اشوف جهالك وافرح بيهم
هاشم....تحت امرك شيخنا بس اني اريد وحده
الشيخ...كووول وااشر لو بت صدام حسين
هاشم...لا موبت صدام اني اريد وحده من ثوبي اعرفها وتعرفني
الشيخ...كول مايردك غير السانك
هاشم...اني اريد ليلى
انتظرونا......