رواية سنيين الضياع الفصل السابع 7 بقلم جمانه السعيدي
هاشم.....اني طلبت ايد ليلى من الشبخ موبس لان اني احبها ومقتنع بيها
لكن اكو سبب اهم بيت الشيخ اهلي
اذا ازوجت وحده غريبه لازم اطلع من بيتهم
واني تعودت عليهم ذوله اهلي تعبو عليه وربوني
منا لمن كبرت وتخرجت مو معقوله بعد كل هذا التعب
أدير وجهي واروح
بلاساس اني من طلبت ايد ليلى كنت واثق الشيخ راح يقبل
لان هو يتمنى ابقى بهذا البيت ومااطلع منه
الشيخ يعتبرني ابنه الي معتمد علي بكل شي
هاشم...اني اريد ليلى انتم اهلي ومااريد اطلع منكم
الشيخ...تحجي صدك الله يرضا عليك
ونعم الاختيار كنت اتمنى من كل كلبي ماتطلع من هذا البيت اللهم لك الحمد والشكر يارب العالمين
واليوم تحقق حلمي كل تكلفة الزواج عليه
تعال قرب خل احبك انت اليوم فرحت كلبي
ماشفت سعاده مثل سعادتي بهذا اليوم
دخل الشيخ يحجي ويا ام مهند وليلى
كلهم فرحانيين وفرحتهم اكثر من فرحتي
قرر الشيخ يجهز بيت زوجته الثانيه الي كانت ساكنه بي
حتى نزوج اني وليلى
بعد ما خطبت ليلى منعوها تطلع كدامي
منا اليوم العرس
بدينا نجهز بيتنا بنينا هول على الغرفه والمطبخ
وصبغنا البيت صبغ جديد
وجبنا غرفة نوم واثثنا المطبخ اثاث حلووو
كملنا كلشي
كل هاي الترتيبات وحنا بعدنا ماعاقدين ولا كاطعين مهر
قرر الشيخ يحجي لخوانه بزواجي من ليلى
اخو الشيخ الزغير اعترض لان جان يريدها الابنه
اما اخو الشيخ الثاني الي اخذ زينب
ماعنده مانع لان هو بس ولد واحد وأخذ زينب اله
هاشم...رحنا اني والشيخ البيت اخووو حتى الشيخ يقنعه
يوافق على هذا الزواج
الشيخ...انت تعرف زين اني ربيت هاشم على ايدي
وهو سندي بهاي الدنيا بعد رب العالمين
صدك مااتحمل يغيب عني دقايق
يفهمني بدون مااحجي هاشم ابني ومايطلع من بيتي
واني انطيته ليلى
اخو الشيخ.....يبقى هاشم غريب واحنا ماراضين على وجوده بيتك من زمان
زلمه غريب شلون يدخل بيتك وسط عيالك
وانت تدري اني حجيت وياك قبل بهذا الموضوع بس انت ما تسمع كلامي
الشيخ...خويه فدوه انت اخوي وكلامك على عيني وراسي
بس انت ما وكفتلي مثل هاشم
بسبب هاشم ابني تعلم وصار عنده شهاده
وهو جان محبوس بلبيت حتى للشارع ما يطلع
انت اخوي وتكول كلبك عليه إذا اخطب منك مره المهند تنطيني
ااكيد لا بنتك عزيزه عليك
واني هاشم عزيز عليه وما افرط بي ابد
هاشم شايل مسؤلية بيتنا كله على راسه
انت اخوي كل أسبوع لو عشر ايام تمر عليه تكول شلونك
وتروح
بس هاشم شايل كلشي ومتحمل
الكاع والفلح والمحصول مريضنا ياخذه للطبيب
جايب المسواك
واكف للخطار اذا اكلفه بشغله يركض عليها ركض
ليش ابنك مااجا من سويت حادث وخدمي مثل هاشم
وانتم كلكم تعرفون ابني معوق
ومايكدر يخدمني
اجيتو حالكم حال الخطار شلونك تشرب استكان الجاي وتطلع
بس هاشم حتى للحمام يدخل وياي
انتم تعرفون الحق وديرون وجهكم عنه
انت اخوي ومااريد اخسرك
اخطب اي وحده تعجبك ومهرها عليه واني
اروح اخطبها بس ليلى لا
ليلى الهاشم محد ياخذها غيره
جمانه السعيدي
هاشم...من شفت الشيخ يدافع عني بكل هلحماس
عدلت كعدتي
صار عندي ضهر يدافع عني
طلعنا من بيت اخو الشيخ وهو بعده زعلان
شلون الشيخ يفضل هذا الزلمه الغريب على ابن اخوو
بس الشيخ مااهتم
بيوم عرسنا عزم القريه كلها وذبح الذبايح
وعزم اخووو بس مااجه لا هو ولا ابنه
بس اخو الشيخ الثاني عيال زينب كلهم اجووو
كطعنا مهر بنفس يوم عرسنا
شكد حلوه طالعه ليلى بيوم عرسنا
جبنلها وحده من الولايه مكيجتها وبدلتها تخبل
حتى العطر الي خالته ريحته كلش حلوه
جانت مستحيه حيل صار تقريبا شهر ما شايفها
حاسبينها بلغرفه
من يوم حجيت بزواجي منها لليوم
منعو عليه شوفتها منا اليوم عرسنا
هاشم...مبروك
تفرك بايدها ومستحيه مني
رفعت البركع ورفعت وجها شو خل اشوفج
رفعت راسها ورجعت دنكت
هاشم...مستحيه مني
اااشرت براسها اي
هاشم.....اني صح ما سئلتج انتي موافقه بهذا الزواج لو لا
لان الضروف تمنعني احجي وياج بهيج موضوع من ورا اهلج
اني مااكدر اخون ثقة الشيخ
لان هو أمني على بيته وعيشني بنصكم
رباني وتعب عليه
هسه اني اريد اسئلج انت موافقه بهذا الزواج
ولو سؤالي اجا متأخر حيل
بس ماكدرت اسئلج قبل هذا الوكت
سكتت ماردت عليه
هاشم...يعني افتهم انتي ماترديني
رفعت راسها اجن عيوني بعيونها
ليلى....لا اني احبك من زمان من يوم حجيت ويا ابوي
علمود مدرستي اني احبك
وجنت اتمنى تصير من نصيبي
هاشم...وليش ما ججيتي
ليلى...استحي عيب البنيه تحجي هيج
هاشم...وهذا الشي الي عجبني بيج تستحين وثكيله
ليلى.....اني اليوم فرحانه
هاشم..واني فرحان اكثر منج
مرن ايام العرس مثل الحلم شكد فرحان لان تعمقت
بهاي العائله ااكثر
وصرت ابنهم ونسيبهم بنفس الوقت
حلو يكون اهلك هم أهل زوجتك
اخذ الشيخ مشيه بعد زواجنا وراح صالح اخووو
الحمد لله تم الصلح بينهم على خير
وفعلا ابن عم ليلى خطب
وكلنا رحنا بلخطبه
بس مااعرف ليش احسهم يكرهوني
بس ساكتين علمود الشيخ
ولا واحد بيهم طايقني لان الشيخ فضلني عليهم
ماكدرت اقدم على اي جامعه الليلى
اولا بعد شهرين طلعت حامل
ثانيا سقوط بغداد سنة ٢٠٣
والجامعات كلها بغداد لو بصره لو موصل
مستحيل اجازف هيج مجازفه
طبعا احنا ابد مااثر علينا السقوط
لان بلقريه نفس وضعنا ماتغير لا يمنا مؤسسات
حكوميه ولا دوائر
ولا جيش ولا عصبات تهجم علينا
كلمن لازم كاعه وكاعد بيها
اني كنت محافظ على حلال الشيخ واحرسه
ومحافظ على الكاع
بليل ابقى حارس للصبح على حلال الشيخ
الصبح ارجع انام شويه وارجع اروح للكاع
جنا ننتظر خير من الحكومه الجديده بعد السقوط
دعم الفلاح توصيل الماي للمناطق البعيده
وضائف للخرجين
منا السنة ٢٠٠٦ لمن استقر الوضع
وبدت تطلع التعيينات
اول شي قدمت اوارق مهند الحمد لله تعين
مدرس بمتوسطة الولد قريبه علينا
واني طلع تعييني بدائرة الزراعه والري بلولايه
صح بعيد عليه المشوار كل يوم ساعه يله اوصل وساعه يله ارجع بس اهم شي تعينت
جمانه السعيدي
الشيخ انطاني سيارته اروح وارجع بيها
صار عندي ولد وبنيه ووضعي جدا مستقر
بس بعدني ما قدمت اليلى تكمل جامعتها
اريد الوضع يستقر ااكثر
تعييني اجا بنفس الولايه الي بيها اهلي
بلبدايه ماجنت اعرف هاي ولايتي
بس كلام الناس عنها وعن اسمها
حسيت نفسي اعرف هذا الاسم او سامع بي
اسم الولايه مو غريب عليه
عندي شعور اهلي قريبين عليه
كلما اشوف موضف اسئله عن هاي الولايه
كلما يجي مراجع للدائره اسئله عن شوارعها وناسها
اريد اجمع معلومات بلكت احصل اهلي
اريد اعرف اخبارهم
هذا اذا بعدهم بهاي الولايه ما انتقلو الغير ولايه
سنه كامله واني مابقى واحد ما سئلته
اسم الشوارع اسم المناطق
الأسماء مو غريبه عليه ااكو شوارع سامع بأسمائها
طبعا ادور بدون مااحجي قصتي
ولا احد. يعرف اني جاي ادور على اهلي
احس نفسي راح اوصل الحقيقه بالقرب وقت ممكن
لازم الكه اهلي قابل راح ابقى ضايع طول عمري
بعد اني كبرت واكدر ادور عليهم وحدي
اريد اعرف شصار وياهم كل هاي السنيين
وين صفا بيهم الوكت
ليلى...شبيك مهموم صار فتره مو على بعضك ااكو مشاكل بلشغل
هاشم.. مابيه شي
ليلى...وشنو هاي الورقه الي كلها اسماء شوارع
ليش كاتب هاي الاسماء
هاشم....احجيلك الحقيقه بس مااريد الشيخ يعرف
ليلى...طبعا احجي
هاشم...اني جاي اداوم بنفس ولاية اهلي الي جنت عايش بيها
نشغت بصوت عالي وكالت يمه
هاشم.. شبيج
ليلى.. اهلك انت تعرف وين اهلك
هاشم...لا مااعرف بس قريبا راح اعرف
من يوم تعينت لليوم واني اسئل وادور اني متأكد هاي الولايه الي بيها اهلي
اريد اعرف وينهم شلون وضعهم
شصار وياهم بعد كل هاي السنيين
جمانه السعيدي
ليلى....وتعوفني
هاشم....طبعا مااعوفج انتي حبيبتي وأم جهالي
ليلى...وتعوف بيت ابوي اكيد تروح تعيش ويا اهلك
هاشم...ليش تحكمين هيج
ليلى...يعني تريد تقنعني اذا لكيت اهلك تبقى هنا وتعوفهم
اني مااكدر اعوف اهلي واجي وياك
هاشم...يعني انتي ماتكدرين تعوفين اهلج و اني تحكمين عليه اعوفهم
ليلى.. لا قصدي ابوي مراح يقبل
هاشم...اهلي ليلى تعرفين شنو اهلي
ايجوز محتاجيني ايجوز جاي يمرون بضروف صعبه
شلون اعرف اني قريب عليهم وماادورهم
اهلي لازم اعرف شصار بيهم من حقي ادور اهلي
ليلى....بكيفك الشيخ اذا سمع تريد ترجع الاهلك وتعوفه
يموت انت بلنسبه اله السند
والابن الي ماجابه
هاشم.. منو كال راح اعوفه اني مو قليل الاصل وانسى
تعبه وياي
اني مراح اعوفه ابد
بس من حقي اشوف اهلي
اشوف ابوي وامي صار عشرين سنه مااعرف اي شي عنهم
معقول من اقرب عليهم
واداوم بنفس ولايتهم ماادور عليهم
اريد اعرف اي شي عنهم
ااي شي حتى تطفى نار كلبي
عشرين سنه واني افكر بيهم واتمنى اعرف اخبارهم
ليلى....اني خايفه لا تلكه اهلك وتعوفني
هاشم...ليش اني قليل الاصل
الي ماله خير بااهله ماله خير بيته
المفروض انتي اشجعيني ادورهم
تعرفين اني الولد والوحيد على اربع بنات
الله اعلم امي شصار بيها من ضعت
وابوي شلون اتصرف
لازم ابقى ادور منا لمن الكاهم واعرف اخبارهم
ليلى...ليش بعدك تفكر بيهم ااكيد هما نسوك
هاشم...مادام اني اذكرهم هما هم يذكروني مستحيل يكونون ناسيني
انتظرونا........