رواية سنيين الضياع الفصل الثالث 3 بقلم جمانه السعيدي
هاشم رحت اتريكت وياهم
اجا الشيخ وراي للمطبخ
الشيخ.....غسلي الهاشم ولبسي من ملابس مهند
بلكت يجي احد اليوم ويتعرف علي حتى نرجعه البيت اهله
ام مهند....صار يدلل
دخلتني ام مهند للحمام وجلفتني جلف بعمري ماسابح هيج سبحه
حتى وجهي جلفته بليفه طلعت واحد ثاني
مو هاشم الوصخ
من كملت لبستني تراك من مهند شويه ازغير عليه
لان مهند ضعيف حيل
مشطتلي شعري وخلتلي عطر ابو الدعبله
بس ريحته كلش طيبه
اخذتني للمضيف دخلت وكعدت يم الشيخ
الشيخ...الله طلعت حلو
دنكت استحيت من كلامه
شويه واجا رجال عنده سياره تيوته حمل جايب مسواك
البيت الشيخ
من طلع الشيخ طلعت ويااا
الرجال سئل الشيخ عني
الشيخ حجا قصتي من البدايه للنهايه
بعدين وصا الرجال اذا سمع احد ضايع عنده ولد بعمري
ينطي عنوان الشيخ
هاشم...اني نزلت المسواك ويا الشيخ ودخلته بلبيت
الشيخ.. عفيه عفيه وليدي السبع
رجعنا للمظيف
اريد اطلع اللعب بلشارع اني ما متعود على كعدت البيت اريد اروح بلشارع
بس استحي من الشيخ خاف ما يقبل
بعدها اجو زلم ثنيين عندهم مشكله
الشيخ التهى بمشكلتهم ونسى يحجي قصتي كدامهم
التفت عليه وكال بويه هاشم روح جيب جاي العمامك
دخلت للبيت كلت الخالتي خاله الشيخ يريد جاي
بقيت كاعد يم مهند لمن خدر الجاي
وصلتني خالتي الباب المضيف بعدين اني اخذت الصينيه
ودخلت
الشيخ ...عفيه ابني السبع
هاشم....حسيت نفسي سويت انجاز
لان الشيخ كلمه والثانيه وكال عفيه السبع
عفيه ابني
يمكن بوقتها الشبخ جان يتمنى فعلا ابنه سليم
مابي شي ويخدمه
من خلصو الزلم و طلعو الشيخ باوع عليه وكال
الشيخ...لا نسيت احجيلهم عنك
جمانه السعيدي
هاشم...سكتت بعدين كتله
هاشم.. تقبل اروح اللعب ويا مهند
الشيخ. اي اقبل روح
ركضت ماصدكت حتى اروح اللعب ويا مهند
بيومها شكد لعبنا وشكد اكلنا اني ويااا
بليل كعدنا نتعشى
ام مهند....هذا الولد وجها خير
الشيخ...شلون
ام مهند....يوميه مهند بس يبجي وحتى اكل ما يقبل ياكل
اليوم شكد لعب وشكد ضحك
وااكل ااكل عبالك صار سنه ما ماكل شي
الشيخ...الف عافيه بطنه وبطن هاشم
بلقريه الناس تتعلل من وكت يعني يجمعون يم الشيخ
بعد أذان المغرب بشويه
يشربون جاي وكهوه ساعه او اكثر شويه والناس تروح تنام
لان اغلبهم فلح وعدهم اراضي زراعيه
ويكعدون من الصبح
فرشت النا خاله ام مهند بلحوش ونمنا كلنا
اني هلكد ما تعبان وكاعد من الصبح بس خليت راسي
على المخده نمت
هذا اليوم الثاني خلص واهلي ما يعرفون اني
ضعت ابوي يعتقد اني رجعت البيتنا
وامي متوقعه اني ويا ابوي
اليوم الي بعده كعدت الصبح من الفجر
كعدت مهند حتى نلعب اني ويااا
ليلى تلعب ويانا بس زينب جبيره تفتهم
تشتغل وياا امها بلبيت
دخلنا المضيف الشيخ كاعد
حسيت بملل ومحد اجا للشيخ
هاشم....شيخنا تقبل اللعب ويا مهند
الشيخ....هنا تعالو اللعبو حتى الناس تشوفك
هاشم...رحت المهند بس مااكدر اشيله لان بكدي
هاشم...زينب جيبي مهند نلعب اني ويا بلمضيف
الشيخ كال خل يجي
شالته زينب ودخلته لامضيف
بقينا نلعب اني يااااا كدام الشيخ
هذا اليوم الثالث الي تخلص بي الفاتحه
الضهر بلفاتحه ذبحو العقيقه وتغدو الناس ابوي ودع اهل صديقه
ورجع للبيت
اول مادخل امي وخواتي سلمن علي امي بلبدايه ما انتبهت
بعدين سئلته وين هاشم
ابوي.. هاشم رجع من اول يوم
امي .شنو رجع غير وياك
ابوي... اكلج رجع اني كمت احجي علي ورجع للبيت
راسا امي لطمت على وجها ياااا
صدك تحجي ابني وين
ابوي.. يعني مارجع للبيت
امي شلون يرجع هو وين يندل ويرجع انت من كل عقلك
عايف الولد يرجع وحده
ابوي...هو كال اني اندل البيت
اصلا اني مااخذته هو اجا وراي وحده
يعني يندل لو اني ماخذه اكول ما يندل
اني تفاجئت بي يلعب ويا الجهال اصلا مادري بي
جمانه السعيدي
امي...يااا وهسه شلون اريد ابني
طلع ابوي على عمامي وامي لبست عبايتها وطلعت
يدورون ويسئلون بلمنطقه
عمامي اقترحو على ابوي يرجع المكان الفاتحه يسئل
بلكت واحد شايفني
بلكت الناس تعرف وين
ااجر ابوي تكسي ورجع على مكان الفاتحه
اما عمامي انتشرو بمنطقتنا يدورون عليه
بيبي ام ابوي ماكو على السانها
غير الله لا ينطيج فليحه ( امي) ضيعتي الولد
بيش ملتهيه وولد واحد وماكدرتي تحافضين علي
انتي شني من مره
امي تبجي وتلطم
ابوي وصل هناك ودخل على أهل الشهيد حجالهم القصه
طلعو الناس الله يكثر خيرهم
يدورون ويا ابوي ماكو شارع ما دورو بي
الرجال الي لكاني رجال عسكري بعدها بيوم التحق
حتى ابو حازم هم التحق للعسكري وبعده ما نزل
يعني ماكو واحد من الي شافوني يعرف وين اني
عمامي قدمو بلاغ بمركز الشرطه
طبعا الشرطه من عرفو اني مختفي صار ٣ ايام
تخبلو شلون ساكتين وشلون ما بلغتو من اول يوم
حتى الي يحجوله قصتي ما يصدك
شلون ابوي أأمن ارجع وحدي
وشلون امي ما اتاكدت اني ويا ابوي
اهل الشهيد بلغو مركز الشرطه بختفائي بمنطقتهم
بس محد يعرف اني وين
طبعا الشرطه مو تروح تدور عليه
ااكيد يحتفظون بلبلاغ واذا احد اجا للمركز وكال
لكينا طفل يتواصلون ويا اهلي
بقا يوم وتخلص اجازة ابوي
ماكعد دقيقه بلبيت يدور عليه بكل مكان
وامي عافت كلشي شغلها وبيتها وبناتها
بس تبجي عليه
ما متخيله ممكن اضيع منها
خلصت اجازة ابوي ولتحق للعسكريه
حاول يطلب اجازه ويرجع يدور عليه
بس منو بحاله منو ينطي اجازه الحرب قايمه
والقوات كل شويه منتشره بمنطقه على حدود ايران
والشهداء اجر ليل نهار
ماكدر ابوي ياخذ اجازه وينزل حتى يدور عليه
وامي بقت بحزنها
اما الشيخ وعائلته فرحانيين بيه
افتح الباب أقدم جاي يحتاجون شي من الدكان اروح اجيبلهم
الشيخ حس اني العوض الي الله عوضه بي بمكان مهند
مايريدني ارجع الاهلي
حتى صحة مهند اتحسنت من اني اجيت
بعد شهر تقريبا الشيخ بطل يحجي قصتي
كدام الناس مايريدني ارجع الاهلي
حتى بطل يفرض عليه اكعد ويا بلمضيف
ولا سمعته حجا قصتي كدام اي احد
عمري زغير واهم شي عندي اللعب اذا لكيت اهلي او ما لكيتهم ماكو مشكله اهم شي اللعب وواكل
مااعرف شنو الفقد والموضوع بلنسبه اليه مثل الزياره
والونسه ماافكر بااهلي ابد
هذا حد عقلي وحد تفكيري بذاك الوكت
اني هم تعودت على بيت الشيخ الصراحه اكلهم طيب
جابولي ملابس حلوه
ويعاملوني احلى معامله
كلمه والثانيه وكالو عفيه سبع
هاي الكلمه تصعدني للسما من الفرح
الشيخ عنده كاع يطلعلها كل يوم ساعتين
ياخذني ويااا طبعا هيه بيها فلح بس هو يروح يشرف عليهم كل يوم
كلما يروح ياخذني ويااااا
افتحله الماي واساعده
اسولف علي
رجع ابوي مجاز بعد واحد وعشرين يوم
امي مريضه بلفراش بطلت تشتغل مثل قبل
حتى البيت مالها شغل بي
بس تبجي وحزينه على فقد ابنها الوحيد
من نزل ابوي مجاز رجع يدور عليه مره ثانيه ورجع النفس المنطقه الي ضعت بيها
يفتر ويسئل ويدور
بس حتى الرجال الي خلصني من الجهال
يعتقد اني رجعت البيت اهلي لان ابو حازم أأكد علي يعرفني وبعد ماخذني وياا
مارجعني ولا كال طلعو بيت شيوع مو اهله
اصلا ابو حازم نسى الموضوع والتهى بحياته
اهلي ايسو مني بعد مادور وما لكوني
والشيخ فرحان بيه بس ياامرني على شي اركض
فاتت سنه
وصرت استحق اسجل بلمدرسه
سمعت ام مهند تحجي ويا الشيخ
خل انسجل هاشم ومهند بلمدرسه
قبل اني جنت اخاف على مهند بس هسه ويا هاشم
يدير باله علي
بلكوه يله اقتنع الشيخ بهاي الفكره
بلقريه اكو مدرسة بنات ابتدائيه بس ابتدائيه
ماكو متوسطه ولا اعداديه للبنات
بس الولد اكو ابتدائيه ومتوسطه وبس
الي يريد يكمل دراسته ويدرس اعداديه يروح
للولايه
بس اكو مشكله مهمه اذا اسجل بلمدرسه
لازم عندي جنسيه
واني جنسيتي بقت بيت اهلي
انتظرونا......