رواية لأجلها الفصل الثلاثون 30 بقلم احمد سيمبا
*لم تُحاول من أجلي ، هذا جرحٌ لا أعرفُ كيفَ سأتخطاه*
بعد م الحفلة انتهت و العرسان مشوا ، ركبت تاليا العربية و عايزة اركب سمعت زول بناديني ..و قال لي قبلك بس! ..عاينت ل تاليا وقلت ليها هسي بجي ، تمام ..و قفلت الباب و امنت العربية ، اتلفت لقيتم أخوات مازن الاتنين ، مودة و مها ، شكلو أمهم اشتكت ليهم لأنو أي واحدة نافشة ريشها أكتر من التانية ..وقفت استعداد عشان اتضارب معاهم ، لكن فجأة جا مازن وقف قدامي وقال ليهم في شنو؟ ..مودة قالت ليو الحيوانة دي قال بتهدد في أمنا!! ..عاين لي بطرف عينو ، عملت رايحة ، رجع عاين ل مودة ..وقال ليها أنا بتفاهم معاها ..مها قالت ليو تتفاهم معاها في شنو!!! ، خليها لينا نفطسها ، والله كان مسكتك.. ..قاطعتها وقلت ليها ح تعملي لي شنو يعني!! ، ح تضربيني وأنا اقيف اتفرج فيك!! ، شكلك م بتعرفيني لسه!! ..مودة قالت ل مازن عان اللسان ، شافعة مولودة امبارح جاية تقل ادبها فينا ، اجي ي الكوارع البقت تصارع!! ، عان الباايرة الوسخة!! وأنتي مالك يختي متحكحكة في أخونا كده!! ، م لقيتي غيرو تصطادي!! ..قلت ليها هييي وتاني هييي ، مكرونة و م عرفنا لونا ، كركدي وم عرفنا ليه ، شيلي مني الأصلية و قومي لفي ي وهمية ، م تكوركي فيني بصوت عالي ي المقامك واطي ، ي الراخية اضانك و ناسية حنانك ، م عشان اغتربت كم سنة معناها نسيت أصلي و فصلي ، لا حبيبة أنا متربية هنا في حارات امدرمان دي و الشافعة البتتكلمي عنها دي ، لو قامت بتوريك الشطة و المغطى!!! ، أخوك شنو الاتحكحك فيو أنا!! ، أخوك هو الجاري وراي!! ، و اطمني م عندي نية اعرسو ولا عندي نية اناسبكم!! ..بقو يعاينوا لي كلهم بخلعة ..عايزة تردح لي مازن قال ليها خلااص!! ، امشوا البيت وأنا بتفاهم معاها ..اختو قالت ليو تتفاهم معاها شنو المقطعة دي.. ..قاطعها بنهرة وقال ليها أنا مش قلت خلااص!!! ، معناها اقفلي زفت خشمك ده و أمشي!! ..حمرو لي و مشوا ، بعداك مازن اتلفت علي و عيونو دي بطلع شرار شرار ..قلت في قلبي دي أول مرة اشوفو غضبان كده ، الليلة شكلو ح يجيب أجلي ..عاين لي من فوق ل تحت وقال لي الحقيني ..و مشى ، لحقتو مشينا ورا الصالة ، بقى ماشي و جاي وأنا واقفة و مربعة يديني بعاين ليو ..قال لي أمي ي ميرا!! ، بتهددي في أمي!!! ..قلت ليو أنا م هددتها أنا بس حذرتها!! ..قال لي تحذريها زاتو لشنو!! ، عارفك م محترماني ولا محترمة العلاقة الكانت بيناتنا على الأقل كان تحترمي أمي!!! ..قلت ليو أنا م عملت حاجة لأمك عشان أقلل احترامها ، هي الادخلت في حاجات م بتخصها!!! ، ليه تقول ل بتي بت حرااام!!! ..وقف وقال لي هي قالت كده؟ ..قلت ليو يعني م قالت ليك سبب المشكلة شنو!!؟ ..قال لي م قالت لي ..قلت ليو تاليا لمن بتلعب اتصدمت فيها ، ف هي قامت كفتتها و قالت ليها زحي مني ي بت الحراام ، ليه تقول ليها كده!!! ، ذنبها شنو هي!! ، هي بس كانت نتيجة وضحية زاتا في نص الحصل!! ، ليه تتحمل تسمع كلاام زي ده؟!! ، كانت غلطتها يعني إنها اتولدت بطريقة غير شرعية!! ، أمك خليها ، أنت قول لي القالتو أمك ل بتي صااح!! ، صاح إنها تجرح مشاعر بتي!! ، صاح إنو تحرجها قدام الناس!! ، صااح إنو تكسر قلبها و تعايرهاا!! ، أنا لو م سكت أمك الليلة ، بكرة في مكان تاني كمان ح تعيدها!!! ، و بقولا ليك في وشك أنا م ندمااااانة على أي حرف أنا قولتو ليها!! ، ولو زعلّت بتي تاني ، أنا كمان ح ازعلها!! ، و أعلى ما في خيلكم اركبو!!! ..عاين لي مسافة وقال لي بغض النظر عن الحصل ، دي أمي وأنا م برضى العملتي فيها! ..قلت ليو أول شي م بغض نظر عن العملتو! ، تاني شي عشان هي أمك أنا احترمتها واتكلمت معاها براحة!! ..قال لي برضو العملتي غلط!! ..قلت ليو م ندمانة! ..قال لي أمشي اعتذري منها! ..قلت ليو م بعتذر! ..قال لي بنهرة ميرا!! ، قلت ليك أمشي اعتذري و راضيها!! ..قلت ليو ببرود لو عليت صوتك ولا وطيتو ، إجابتي واحدة ، لأ يعني لأ!! ..قال لي أنتي كيف بقيتي كده!! ..قلت ليو من اليوم العرفت فيو حقيقتك! ..قال لي يااتو حقيقة؟ ..اتلفت على الإتجاه التاني وقلت ليو م بعرف ..جا مسكني من كتفي وقال لي م تستفزيني اخيير ليك! ..عاينت ليو وقلت ليو ليه؟ ، ح تعمل شنو أكتر من العملتو؟! ..قال لي عملت شنو أنا!!؟ ..قلت ليو فكر!! ..عايزة أمشي مسكني من يدي و لصقني مع الحيطة وقال لي قسماً بالله م بتمشي من هنا إلا تحكي لي في شنو!!! في شنو!!!! ، كل يوم علّاني بأني اذيتك ، اذيتك في شنو!! ، عملت ليك شنو أنا!!! ..قلت ليو بنهرة أنت كذبت علي!!! ..قال لي في شنو!!! كذبت في شنو!!! ..اتفكيت منو وقلت ليو أنت دسيت الحقيقة وم اتكلمت!! ..قال لي بهدوء حقيقة شنو؟! ..ضحكت ضحكة استهزاء في نص دموعي و قلت ليو حقيقة شنو!!! ، حقيقة أخوك الوسخة!!! ، كنت عارف إنو تاليا بت أخوك وسكت!!! ، لا والاحلى حلّفتو و قلت ليو شنو "م تكلم زول بالحقيقة خليها تتحمل مسؤلية العملتو" ، عملت شنو أنا؟!! ، اااا ، عملت ليك شنو لمن تعمل فيني كده!!! ..بقى ماشي و جاي و قال لي م كنتي بتردي على مكالماتي ، اتصلت ليك مية مرة بس عشان كنت عايز اكلمك بموضوع مُهاب ، لكن أنتي ابيتي تردي!!! ..قلت ليو عشان كده عاقبتني كده!!! ، دفنت الحقيقة و سكت!! ، أنا م كنت برد لأني خايفة عليك وفي النهاية جزاتي بأنك تعاقبني بالطريقة دي؟!! ، يعني كانت غلطتي إني حبيتك لدرجة إني كنت خايفة علييك؟!! ، غلطتي إني م كنت عايزاك تتورط معاي؟!! ..قال لي ميرا!! ، الموضوع م كده!! ..قلت ليو أنت عارف الوجعني شنو في الموضوع؟! ، إنو كنت أنت!! ، يعني لو كان أي زول تاني في الدنيا دي م كان وجعتني زي لمن عرفت إنو أنت!! ، لأني م اتخيلت في يوم إنك تأذيني ، لكن أنت دمرتني مرة واحدة!! ، م اهتميت في الح يحصل لي بسبب كلامك ده!! ، ولا اهتميت ح أعيش كيف!! ، ولا أي شي!! ، طيب على الأقل كان تكلم أبوي ي مازن! ، كان تقول ل أبوي إنو بتو م عملت كده! ، م أنت كنت عارف إني فخر أبوي البعتز بيو! ، طيب ليه م كلمتو هو بس ، و قلت ليو إني م وطيت ليو راسو في الأرض وانو دي م غلطتي؟! ..مسح دموعو وم رد لي ..قلت ليو شوفت الحقيقة دي مُرة كيف؟!! ، أنت عارف صدمتي فيك للان م قادرة اصحى منها ، خمسة سنة وأنا حقيقة الموضوع ده بتاكلني أكل بجوة و بتخليني اسأل نفسي كل يوم ، أنا عملت ليك شنو لمن تعمل فيني كده!! ، وم بلقى إجابة! ، لكن بما إنك قدامي الليلة ح اسألك ، ليه عملت فيني كده؟! ..قال لي أنا آسف ..قلت ليو دي م إجابة على سؤالي ..قال لي الغضب ، كنت زعلان و اتصرفت تصرف غلط! ..قلت ليو تصرف غلط!! ، اممم ، أنت عارف تصرفك الغلط ده عمل فيني شنو؟!! ، بسبب تصرفك الغلط ، عرسو لي واحد كان ح يقتلني أنا و بت أخوك الاتنين ، و بسبب تصرفك الغلط ده اتضطريت اسمع كلام أشكال ألوان من البسوى والم بسوى ، بسبب تصرفك الغلط ده اتضطريت اتشرد في الشوارع أكتر من مرة ، بسبب تصرفك الغلط ده بكيت أيام و ليالي كتييرة شديد على فكرة!! ، عشان لمن أقول ليك إنك دمرتني م تقول أنا ببالغ ، لأ ، أنت بالجد دمرتني ي مازن و ذنبي في رقبتك ليوم الدين!! ..قعد في الأرض وقال لي أنا م عندي تبرير ، وم عندي كلام اقولو غير أنا آسف! ..قلت ليو كلكم بتعتذرو لي و بتنتظرو مني أقول ليكم أي خلاص م مشكلة ، هو الموضوع بالسهولة دي يعني؟!! ..م رد لي ..عاينت ليو وقلت ليو أنت عارف ، كده أنت بتذكرني بنفسي ، كنت قاعدة بنفس المنظر ده لمن طردوني من البيت ، وقتا كنت بفتش عليك بين الناس عشان تجي ترفعني ، عشان تمسح دموعي و تحضني وتقول لي ي ميرا أنا معاك حتى لو العالم كله ضدك ووو ، كنت بريئة ياخ واحلامي وردية أكتر من باربي ، والمشكلة إني كنت تلاتة سنين محملة نفسي مسؤلية انفصالنا ، لحدي م عرفت الحقيقة و وقتا الصورة وضحت لي و عرفت إنك كنت بتلعب بي ساي! ..رفع راسو و عيونو مليانة دموع و قال لي و ربي م كنت بلعب بيك ، من أول مرة شوفتك فيها و للان بحبك! ..قلت ليو ماف فايدة من حبك ، إذا من أول مشكلة بتتخلى عني! ..قال لي كان تصرف غلط وأنا معترف ، وآسف شديد ي ميرا! ..قلت ليو ماف كلام في الدنيا دي بوصف حسرتي فيك ، أنت خذلتني!! ..قال لي اسمعيني! ، ميرا أنا آسف و ربي كنت زعلان و بعدين أنتي عرستي و افتكرتك ح تنسيني!! ..قلت ليو ده م سبب بخليك تعمل فيني كده!! ، أنت كنت بتقدر تكلم اهلك و تسوق أخوك وتكلم أهلي الحقيقة ببساطة و تدافع عني!! ، كنت بتقدر ترجع لي كرامتي و سمعتي في نفس اللحظة!!! ، كنت بتقدر تنهي معاناتي قبل م تبدا!! ، لكن أنت م عملت كده! ، أنت عملت زيهم ، حمّلتني مسؤؤلية الحصل و رميتني ورا ضهرك ولا كأنك بتعرفني! ، و دي حاجة أنا ما ح أنساها ليك أبدًا! ..و مشيت خليتو ، و أخيراً قلت ليو الكلام الحابسة في قلبي ليو خمسة سنة ، كده خلاص ارتحت و طفيت النار المولعة جواي ، العايزة اقولو قولتو ، و بعد ده ماف حاجة تتقال تاني ..مشيت ركبت العربية ، لقيت تاليا نامت ، عاينت تلفوني لقيت كم مكالمة من عُمر ، مسحت دموعي و اتنحنحت ..و رجعت ليو وقلت ليو أيوة! ..قال لي تعالي نحنا منتظرنك في ستوديو ".." ..قلت ليو طيب جاية ..و قفلت الخط و اتحركت على هناك ..في الطريق بقيت أتذكر كلام مُهاب قبل خمسة سنة ، كنت حافظة كل كلمة في راسي زي الكأنو كنا بنتكلم هسي ، كل م اتذكرو قلبي بوجعني بزيادة ، م عشان العملو هم فيني ، لأ! بس عشان م اتوقعتها منهم هم تحديداً ..
*فلاش باك*
بعد حلفت ليو إني ما ح أكلم زول ..قال لي أنا ..عاينت ليو بصدمة وقلت ليو أنت؟!! ، أنت كنت سبب مشاكلي؟!! ..قال لي كانت غلطة والله ..قلت ليو طيب ليه هي م قالت لي إنو ده أنت! ..قال لي والله م بعرف ، لكن الشي البعرفو إنو انتوا الاتنين علاقتكم م كويسة اصلا ..م علقت ، لأنو فعلاً نحنا م بقينا قريبات لبعض إلا في فترة حملها دي بس ..قلت ليو طيب احكي لي من البداية ..قال لي الموضوع بدا يوم عرس مها أختي ، يومها كنا متشاكلين بسبب موضوع بنات وم بنات ، ف أنا طلبت منها تجي العرس عشان نتصالح لكن هي ابت تجي ، فا أنا مشيت ليها البيت وم كان في زول غيرهاا ..قلت ليو اي أبوي كان مع الرجال في بيتكم ، ونحنا و مجتبى في الحفلة ..قال لي بالظبط ، فكنا برانا والشيطان تالتنا ، فحصل اللي حصل وأنا بحمل نفسي مسؤلية الحصل كله لأنو م كان مفروض أدخل بيتكم في غيابكم ..قلت ليو الزمن م برجع ل ورا ، حتى لو ندمت الحصل م بتغير ..هز راسو وقال لي صاح ، المهم بعد فهمت غلطتي ، قلت ليها إنو اعرسها أحسن عشان لو حصل حمل ولا حاجة م نتسمبك ، و هي رفضت وقالت لي بصريح العبارة إنو هي م عاايزة تعرس هسي ، وأنا م ضغط عليها وقفلنا موضوع العرس ده ، بعد كم يوم من الكلام ده اتشاكلنا تاني بسبب بت و.. ..قاطعتو و قلت ليو بت؟! ..قال لي ااي بت ، أختك مشكلتها راسا خفيف و بتصدق أي شي بقولو ليها و طوالي بتنفعل ، ف ده السبب الخلاانا ننفصل مرة واحدة بلا رجعة ، و والله والله ي ميرا م كنت عارف بموضوع الحمل ده ولا جايب خبرو ، إلا لمن حصلت المشكلة في بيتكم ..قلت ليو طيب ليه م اتكلمت؟! ..نزل راسو و قال لي كنت خايف! ..قلت ليو وقت بقيت راجل و عملتها ، ليه م اعترفت! ..سكت وم رد ..غيرت الموضوع و قلت ليو طيب ، أنت قلت إنو في زول حلفك عشان م تتكلم منو الخلاك تحلف؟ ..رفع راسو عاين لي وقال لي مازن! ..هنا حسيت قلبي اتكسر بطريقة وجعتني ..قلت ليو بصوت خافت مازن؟ ..هز راسو وقال لي ااي ، قال لي م أكلم زول و اخليك تتحملي مسؤلية العملتي ..دموعي بقو جارين وأنا بعاين ليو ، قلت ليو لكن أنا م عملت حاجة! ..قال لي ده نفس كلامي ليو ..قلت ليو طيب ليه قال كده! ..و زدت في البكا ..قال لي ميرا الله يرضى عليك م تبكي ..قلت ليو م أبكي كيف بس! ، أنا انطعنت في ضهري و في نص قلبي كمان! ..قال لي هو والله بحبك ، أول لمن عرف إنو أنا السبب كفتني وم أتكلم معاي خمسة يوم ، لكن بعدااك بفترة م عارف الحصل شنو ، فجأة اتقلب 180 درجة و بقى همو كلو بس إنو يسافر إسبانيا و يكون بعيد من هنا ..قلت ليو م من حقو! ، م من حقو يقرر مصيري ، انتو الاتنين خربتو لي حياتي و كملتو حياتكم زي الكأنكم م عملتو حاجة! ..قال لي آسف ي ميرا ، أنا والله بحبك و معتبرك مرت أخوي و زي أختي الكبيرة ، و أقسم بالله لو كنت عارف إنها حامل من أول كنت طفيت الموضوع ده بهدوء بين أهلي و أهلك ..قلت ليو لكن الموضوع لمن بقى فيو فضايح ، بقيت غريبة صاح؟! ..قال لي و ربي كنت خايف!! وم قدرت أعترف ، والغلطة اتحولت ل مصيبة كبيرة والأمور اتشربكت ببعض ، و دخلنا في حتة بتاعة شرف و أهلك لو عرفو كان قتلوني وم اترددو لحظة ، ف م عرفت أعمل شنو ..قلت ليو غلطتك أنت!! ، و غلطتها هي!! ، أنا مالي ، أنا الدّخلني شنو؟! ..م رد لي ، زفرت بغضب و سكتنا الاتنين و كل واحد فينا بعاين في إتجاه ..في النهاية قال لي م عندي كلام اقولو ليك غير أنا آسف على الحصل ليك وعايزك تسامحي مازن كمان ..عاينت ليو وقلت ليو أطلع برة ، أنا م عايزة اشوف وشك تاني ولا وشو كمان! .....
*عودة من الفلاش باك*
مسحت دموعي بعد م اتذكرت الحوار الدار بيناتنا ، كنت منتظرة اللحظة دي من زمان ، من زمان وأنا نفسي اسألو ليه عمل كده ، و لمن عرفت طلع عذرو أقبح من ذنبو! ..وقفت العربية في الرصيف بعد م غلبوني دموعي ، يعني مهما اتظاهرت بالقوة م بقدر أواصل فيها لأني مجرد م أكون براي بنهار ..بكيت لمن حسيت إنو قلبي بقى يوجعني ، بكيت حتى أكتر من البكا البكيتو لمن عرفت إنو مُهاب هو أبوها .. أنا ك إنسانة عندي مشاعر زيهم ، م بستاهل العملو فيني ، لأ م غرور ، لكن بالجد ماف إنسان يستاهل يتعاقب على غلط زول تاني مهما كان صغير ولا كبير ، عشان يبرئو نفسهم ، ضحو بي أنا و خلوني اتحاسبت بدلهم ، و عشان يحافظوا على شرفهم ، ضيعوا شرفي و بعد ده كله بقولو لي إني غالية عليهم ، طيب لو كنت غريبة كان عملوا شنو؟!! ..و بعدين قصة إنو مازن كان أساس الموضوع دي ياها المصعبة علي المسامحة أكتر ، لأنو أنا حبيتو بكل مشاعري حرفياً ، ف لمن اتخذلت بالطريقة دي منو ، زي الكأنو قلع قلبي من نص صدري و فجروا قدام عيوني ، حبي ليو بقي يزعلني أكتر من إنو يفرحني ، حاسة إني بدفع تمن كل لحظة كنت مبسوطة فيها معاه بالوجع العايشة هسي! ..اتكلت في الكرسي و رفعت راسي وأنا باخد نفسي بالجلالة من العبرة الكانت واقفة في حلقي ، في اللحظة دي شوفت تاليا بالمراية غرقانة في النوم في الكراسي الورا .. ملامحها البريئة كانت سبب كافي تخليني اهدأ و ابتسم في نص دموعي ..و لو عاينت للموضوع من ناحية تانية ف غلطتهم هي كانت السبب في إني أصل للمكان الصاح ، مهما كان التعب التعبتو و العذاب الاتعذبتو ، أنا لقيت سعادة بتعادلو و أكتر ، و نتيجة الغلطة الكلهم م كانو عايزنها ، بقت هي الدافع لي عشان أصل لكل الاتمنيتو و أكتر ..الحسنة الوحيدة الحصلت لي هي إني بقيت أم ، و بالجد الشعور ده هو بس المصبرني و مُديني سبب أعيش عشانو ، أنا ممكن أنهار ك بت شرفها ضايع ، و ك ابنة مظلومة من أهلها ، و حتى ك حبيبة مجروحة من حبيبها ، لكن م بقدر أنهار ك أم ، عشان بتي بس لازم أحاول اتناسى الحصل و اعمل فيها مبسوطة عشانا و عشان راحة بالا ♡..اتنهدت بهدوء بعد م اتذكرت إني م ميرا حبيبة مازن و لا حتى ميرا بت محمد ، أنا بس ميرا أم تاليا وم عندي هوية غير كده ..مسحت دموعي و أخدت تلفوني و نزلت ..فتحت الواتس و فتشت رقم مُهاب الخاص داك و فكيت الحظر و اتصلت ليو ..رد لي من تاني جرس وقال لي بلهفة ميرا؟! ، تاليا كويسة؟!! ..قلت ليو كويسة ، اتصلت ليك عشان أقول ليك إني كلمت مازن إني عارفة ..سكت شوية وقال لي جد؟ ..قلت ليو ااي ، وأنا متأكدة إنو ح يتصل يعرف منك اتلاقينا كيف و متين ، فكنت عايزة أكلمك إني خلفت وعدي و كلمتو ..قال لي م مشكلة ..عايزة اقفل قال لي ممكن طلب؟ ..قلت ليو أنت ما في مكانة تسمح ليك تطلب مني حاجة ..قال لي طلب صغير بس ، عايز صورة ل تاليا ..قلت ليو ليه م كفتك الصور الرسلها ليك مازن؟! ..قال لي عرفتي كيف؟ ، هو قال ليك؟ ..قلت ليو لأ ، لكن شوفتو كم مرة بصورها ، و فهمت إنو ده أنت عايز صورها ..قال لي كنت مشتاق ليها ، ملاحظة إنها بتشبهنا أنا و مازن؟ ..قلت ليو اصلا أنت و أخوك الاتنين بتتشابهو تقول توائم ما شاء الله ..قال لي ح اعتبرها مجاملة ، تسلمي ..قلت ليو اممم ..و نزلت التلفون عايزة اقفل قال لي دقيقة! ..رجعتو بزهج وقلت ليو شنو؟ ..قال لي ح تصوريها لي؟ ..قلت ليو أفكر! ..عايزة أقفل تاني وقفني ..قلت ليو مُهاب لا إله إلا الله ، ده رصيد!! ..قال لي بس داير اسألكم إذا اتصالحتو؟! ..قلت ليو اتصالح مع منو؟ ..قال لي راجلك! ..قلت ليو بانفعال مُهاب م تهظر معاي ، أنت عارف إنو أنت و أخوك الاتنين طلعتكم من حياتي عدييل ، هسي بس لأنو الموضوع مهم اتصلت ليك ، لكن م تتوقع إني سامحتكم ولا نسيت العملتو فيني! ..قال لي طيب آسف ..قفلت الخط و رجعت بلكتو ، حتى ركبت العربية و مشيت الاستوديو ، اتصورنا و ودعنا العرسان و كل زول رجع بيتو ..بعداك مرو كم يوم عادين م فيهم حاجة مهمة ، غير الزحمة طبعاً لأنو البيت ملان ضيوف لآخرو منتظرين عرس سحر ، حتى بعداك يرجعو بورسودان يحضرو عرس عُمر عشان ينتهو من لفة الاعراس دي ..و أنا وقفت شغل و بقيت قاعدة في البيت معاهم و على حسب الكلام القالو لي عُمر ، ف حالياً هو ح يمسك الشغل ، لكن بعد عرسو ح أمسكوا أنا لحدي م يرجع ، يعني بالواضح كده ما ح أقدر أسافر الفترة دي نهائيا وح أقعد في الخرطوم شهر تاني ..المهم الايامات الفاتت كنت صايمة كفارة لأني خلفت بوعدي ل مُهاب ، عشان كده رزان كانت بتجيني مرة مرة كده عشان تساعدني في شغل البيت و أحياناً عشان تقنعني اصالح ناس البيت و أنسى الحصل و طبعا كنت برفض ..لكن لاحظت ليها يومين م جات ، فقدتها و اتصلت ليها تلفون ..ردت لي بعد مسافة وقالت لي أيوة ي ميرا ..قلت ليها كيفك ، مالك مختفية كده؟ ..قالت لي والله ي ميرا ، حمودي ولدي عيان عشان كده م قعد اطلع ..قلت ليها سلامتو ، مالو؟! ..قالت لي تقريباً لوز ..قلت ليها تقريباً ، مالك م وديتي المستشفى؟ ..قالت لي لا لا والله ، كنت ناوية اودي الليلة لكن شايفة بقى أحسن ..قلت ليها طيب شوية كده أنا جاياك ..قالت لي تمام ..كلمت أخوات فريال يخلو بالهم من الضيوف و طلعت مع تاليا ..وصلت بيت رزان ، نزلت و دقيت الباب جات وعودة فتحتو ..سلمت عليها و دخلنا البرندة ، لقيت رزان قاعدة و ولدها نايم جنبها ، مشيت سلمت عليها و لمست راسو لقيتو محموم ..قعدت في السرير التاني وقلت ليها رزان الولد ده تعبان ليه م وديتي المستشفى؟ ..سكتت شوية وقالت لي ااي مجتبى هسي لمن يجي بودي ..قلت ليها ليه ننتظرو لحدي م يجي ، ارح أنا و أنتي ، بس كلمي مجتبى أول ..قالت لي طيب ..اتصلت ليو ..رد ، قالت ليو أنا ماخدة حمودي المستشفى ..سمعتو قال ليها ي رزان ، أنا قلت ليك م عندي قروش هسي ، اصبري علي يومين كده تاني ..عاينت لي ، عاينت ليها و عملت فيها م سمعت شي ..وقلت ليها قال ليك شنو؟ ..قالت لي م قال شي ، اها ي مجتبى أمشي ولا م أمشي؟ ..قال ليها لو لقيتي ليك دين أمشي! ..وقفل الخط ..اتنهدت و ابتسمت لي وقالت لي ارح ..ابتسمت أنا كمان و اخدنا الأولاد و طلعنا ، في الطريق كنت بعاين ليها مرة مرة و أنا سايقة لكن م اتكلمت ..وصلنا المستشفى ، بقيت أنا ماشة قدام ، دفعت قروش الاستمارة و اديتا ليها ..قلت ليها أنا ح انتظرك هنا ..دخلت وأنا قعدت مع تاليا و وعد لحدي م طلعت ..وقالت لي كتبو ليو فحوصات ..قلت ليها تمام ..بقيت بالمضرة ماشة قداما و بدفع أنا ، عشان م تتحسس ، بعد خلصنا الفحوصات ، قعدنا في الكراسي منتظرين النتيجة هي بتنوم في ولدها ، وأنا بعاين للبنات بلعبو بعيد مننا ..قالت لي ميرا! ..عاينت ليها ..قالت لي شكراً ..قلت ليها باستغراب على شنو؟! ..قالت لي أنتي سمعتي مكالمتنا قبيل صاح؟ ..قلت ليها لأ ، ياتو مكالمة؟ ..قالت لي فاشلة في الكذب والله! ..ابتسمت وقلت ليها يعني بالحيل أنتي الشاطرة ، ملامحك كانت فاضحاك ، وبما إننا واضحين ف أنا بقول ليك إني بالجد زعلت منك! ..قالت لي لشنو! ..قلت ليها عمرنا كله اتربينا مع بعض ، و أكلنا و شربنا في نفس البيت ، ضحكنا مع بعض و بكينا مع بعض ، هسي فجأة بقيت غريبة عنك! ، ولا أنتي كمان لحقتي الجماعة الطيبين و طلعتيني من حياتك؟ ..قالت لي ميرا ليه بتقولي كده ، أنتي صحبتي و أختي ..قلت ليها هي الأخوة دي بالكلام بس! ، مش الأخوة إنو نقيف مع بعض في المواقف الصعبة؟ ، إنو نسند بعض و نساعد بعض؟ ..قالت لي ميرا! ..قاطعتها وقلت ليها رزان ، أنا لمن أحتاج منك حاجة قعد أخجل ، م بجيك بالواضح و بقول ليك ي رزان أنا محتاجك! ..هزت لي راسا وهي بتبكي ..قلت ليها طيب ليه بتخجلي مني؟! ، لو م عندي معليش ، لكن الحمدلله عندي ، و هو كله حقك زي م حقي! ، بيتك بيتي و بيتي بيتك ، أولادك أولادي و أولادي أولادك ، رزان الدنيا دي من غير أصحاب م بتتجازف! ، مهما عملتي فيها قوية و مستقلة برضو ح تحتاجي كتف تستندي عليو! ، وأنا عايزة أكون الكتف ده! ، أنا أصلا عندي منو في الدنيا غيرك أنتي و الأولاد و تاليا؟! ..نزلت راسا و قالت لي أنا آسفة ..رفعت ليها راسا وقلت ليها هاا البت المتخلفة دي ، م تعتذري و البينا عامرة ، لكن والله تعملي حركة زي دي تاني ، أزعل منك و أسوق الأولاد رحلة و اخليك في البيت! ..عاينت لي و ضحكت ..قلت ليها ااي كده وريني الضحكة الحلوة! ..حضنتني ..قلت ليها زي م بتعرفي تحضني ، اعرفي اتكلمي! ..قالت لي حاضر ي ماما ميرا ..ضحكت و فكيتا ..كنت عايزة اسألها و اترددت شوية لأنو سؤال شخصي و هي انتبهت لي ..قالت لي عايزة تقولي حاجة؟ ..هزيت راسي وقلت ليها ااي ، أنتي ليه وقفتي شغلك؟ ، مجتبى منعك يعني؟ ..ابتسمت وقالت لي لأ ، أنا خليتو ..قلت ليها لشنو؟ ..أشرت لي في ولدها النايم في رجلينا وقالت لي عشانو ♡..ابتسمت ..قالت لي كان متعلق فيني بطريقة غريبة وأنا برضو ، يعني وعودة لمن كانت قدرو كانت بتقعد مع أمك عادي ، لكن محمد لأ ، كان ببكي شديد و أحياناً بتجيو حمى من البكى ، و طبعاً الموضوع ده كان بوجعني شديد ، أنا م بقدر أتحمل اشوفو تعبان ي ميرا ، خصوصي إذا كان بسببي ، في النهاية هو جزء مني و بحس بيو ♡..ابتسمت و هزيت راسي ..كملت كلاما وقالت لي ف وقفت الشغل ، و كلهم هاجوا كيف أخلي و عشان شنو ، و هو بتعود مع الوقت وكده ، لكن أنا نفسياً م كنت مبسوطة لمن أكون بعيدة عنو ، بحب أكون جنبو و اشوفو و هو بكبر قدام عيوني ، و هو بمشي و هو بتكلم و هو بضحك و بفرح قلبي ، أنا عارفة إنو يمكن تشوفي ده م سبب لكن.. ..قاطعتها بسرعة وقلت ليها ده أهم سبب في الدنيا ، كلمة "عشانو" دي سبب كامل و مكمل ، و المفروض م يكون في أي تبرير بعد الكلمة دي ..مشت يدها في شعرو وقالت لي أنتي فهمتي علي؟ ..عاينت ل تاليا و هي بتلعب مع وعد و بتجارو وقلت ليها منو بقدر يفهم معنى الكلام ده أكتر مني ♡..هي كمان عاينت ليهم و ابتسمت و قالت لي ربنا يحفظهم ..قلت ليها آمين يارب ..و منها ندهو أسم محمد عشان يستلم النتيجة ، شالتو و مشت أخدتها و دخلت للدكتورة ، بعد ربع ساعة كده طلعت شايلة الروشتة ..شلتها منها وقلت ليها اقعدي هنا أنا بمشي ..ادتني ليها ، طلعت مشيت الصيدلية ، صرفت العلاج و طلعت كده ، لقيت مايا قدامي ، وقفت وبقيت احمر ليها ..جات وقفت قدامي ، اتجاوزتها و مشيت خطوتين ..قامت قالت لي دقة آخر مرة ادبتك ولا شنو؟! ..اتلفت عليها وقلت ليها نعم؟!! ..عاينت لي بنظرة مستفزة وقالت لي شكلك اتأدبتي من آخر مرة اتلاقينا فيها ..رجعت ليها تاني وقلت ليها أنتي دقيتيني أنا؟! ، حبيبتي أنتي متذكرة القصة بالعكس ولا شنو؟ ، ولا كسرة اليد أثرت على مخك! ..حمرت لي مسافة و دفرتني ..كنت ح أقع لكن اتوازنت و وقفت و قلت ليها مايا احترمي نفسك نحنا في الشارع! ..قالت لي و يعني شنو؟! ، خايفة منهم!! ، خايفة من الفضيحة؟!! م هي أصلا مبصومة في حياتك بصم ، و على كل دي ما ح تكون أول مرة تتفضحي فيها قدام الناس!! ..استفزاني كلاما و مشيت اديتا كف و عدلتها بالتاني ..قلت ليها إياك تستفزيني عشان أنتي م بتعرفي أنا ممكن اعمل فيك شنو! ..دفرتني بأقصى م عندها و رمتني في الأرض وقالت لي بتي ح اشيلا منك ، حتى لو اضطريت اقتلك!! ..قلت ليها تقتلي منو!! ، كان هبشتي بتي بدفنك ي مايا!! ..و قمت وقفت ..قالت لي بصرخة ميرا خلي بالك!! ..وقبل م كلاما يصلني و استوعبو ، حسيت بحاجة ضربتني بقوة و طيرتني عديل ، و وقعت في الظلط ..كنت لسه مخلوعة وم عارفة الحصل لي شنو بالظبط ، عيوني مفتحين لكن م شايفة بوضوح و حاسة بحاجة جارية في وشي ، قبل م المسها في زول مسك يدي وخت يدو التانية تحت رقبتي و رفعني ..قلت ليو بصوت خافت أنت منو؟! ..سمعت صوتو بعيد قال لي مازن ..و منها غمضت عيوني و أغمى علي .....
*كنت أخشى حدوث ما يحدث لي الآن*..