رواية لأجلها الفصل العشرون 20 بقلم احمد سيمبا
*من غبائي أنني اشتاق لشخص تخلّى عني بارادته*
مشينا ركبنا العربية و عُمر بتكلم معاي وأنا اصلا م سامعة ، كنت بحاول استوعب كيف مازن خطب فريال؟ ، كيف سمح لنفسو إني يحب غيري أصلاً! ، يعني م حنّ لي ولا شوية ولا مقدار ذرة طيب!! ، ل هسي كلاما بتردد في راسي ، "ده خطيبي ي ميرا ، مازن!" ، لمن قالت كده بطني وجعتني وحسيت إني شوية وح يغمى علي ، الدموع بدت تتجمع في عيوني وقدر م حاولت اتحكم في زعلي م قدرت ..م قادرة أصدق إنو هو خطب واحدة تانية ، هو ضاع من يدي وخسرتو للأبد ، أنا اتوقعت إنو لو رجعت و اتكلمنا في الحصل ح نتصالح و نرجع لبعض ، لكن هو خلاص بقى لواحدة تانية وقريب ح تبقى مرتو وح تاخد مكاني في قلبو وح ينساني! ..طيب وأنا مالي ، أنا كمان م عايزة خلاص ، أنا كمان اتجاوزتو ونسيتو وما ح اتذكرو تاني ، و زي م وجع قلبي أنا بعرف اوجع قلبو كيف! ..وعاينت ل تاليا القاعدة في رجليني ، واتلفت على الشباك مسحت دموعي وفضلت بعاين لحدي م وصلنا البيت ..دخلت تاليا غرفتي و اديتا بندول وقعدت معاها لحدي م نامت و طلعت برة ، لقيت فريال و عُمر قاعدين بتكلموا ..مشيت قعدت وقلت ل فريال أنتي جيتي متين؟ ..قالت لي عُمر وصف لي البيت و جابني مازن ..قلت ليها ايواا ..بقت تعاين لي و مترددة بين تسأل ولا لأ ، و عُمر بعاين ليها وعايزها هي تتكلم لأنو م بسألني من حاجة زي دي اصلا ..عاينت لقيتا تفتح خشمها و تقفلو واتكررت الحركة أكتر من مرة ..قلت ليها مالك؟ ..قالت لي أنتي قلتي إنو مهند طليقك لكن م أبو بتك ..قلت ليها ااي ..قالت لي طيب منو؟! ، ولو م عايزة تكلمينا عادي ..قمت اتأكدت إنو تاليا نايمة ، وقفلت الباب ببرة حتى رجعت قعدت ..عُمر قال لي أنتي م مجبورة تحكي ..و هو فعلاً م مجبورة ، لكن أنا عايزة أبكي ولقيت سبب ..الدموع بدو يتجمعو في عيوني وقلت ليهم لأ ، م مشكلة ..و مسحت دموعي وقلت ليهم تاليا م بتي ..فريال قالت لي نعم؟!!! ..عُمر قال لي أنتي بتهظري صاح؟! ..قلت ليو دي الحقيقة تاليا م بتي ، هي بت أختي الصغيرة أسمها مايا ..فريال قالت لي أنتي عندك أخت؟! ..قلت ليها كان ..عُمر قال لي اتوفت؟! ..قلت ليو ياريت لو اتوفت ، حية وعايشة دنيتها وبتكون متزوجة هسي كمان ..و بديت أحكي ليهم الحصل بالتفصيل وأنا ببكي بحرقة ، وم خليت شي ، طردي من البيت ، و عرسي من مهند ، و شكلتي مع عمتي لحدي م جيت بورسودان ، وحتى مازن لكن م قلت ليهم إسم حبيبي الخليتو ، بس قلت إني خليتو لأني م كنت عايزة اشوه سمعتو ..بعداك بقيت امسح دموعي واتنهد وقلت ليهم كل مرة بتذكر الموضوع ده زي الكأنو حصل الليلة ، نفس الوجع البحس بيو كل مرة ، نفس إحساس الظلم المر ، نفس إحساس الحقد والغل ل مايا ، أنا والله حاولت أكون زولة كويسة واسامحها لكن م قدرت لأنو العملتو فيني م بتنسي ، مايا خربت حياتي بطريقة خلتني محرومة من أهلي عمري كله! ..عُمر قال لي لا حول ولا قوة الا بالله م كنت قايل في ناس زي ديل! ..قلت ليو حتى أنا م اتوقعت تعمل فيني كده ..قال لي طيب ليه م حكيتي لينا من أول؟ ..قلت ليو كنت خايفة إنكم تكرهو تاليا وتعاملوهاا معاملة م حلوة لأنو هي بت م شرعية ، أو م تصدقو قصتي وتعتبروني كذابة ..فريال مسحت دموعا وجات قعدت جنبي وقالت لي نحنا عمرنا م كنا ح نعاين للموضوع بالطريقة دي ، تاليا م عندها ذنب بالحصل ف لشنو نكرهها نحنا؟ ..قلت ليها أنا بعد الشوفتو م كان عندي ثقة إتجاه أي إنسان ولا في طريقة تفكيرو ..عُمر قال لي وللان م بتثقي فينا؟ ..قلت ليو لو م بثق فيك ، م كان خليتك خال ل بتي ، بس أنا خوفت الحقيقة تسرق منها خالا ..قال لي مافي حاجة في الدنيا بتخليني اكرهها ي ميرا ، أنا كمان زيك أول م شوفت تاليا في يدك لمن كنتي قاعدة تحت الشجرة لفتت نظري ، أنا حسيتها زي بتي من م شوفتها عشان كده كنت خايف على مصلحتها ، أنا مستحييل اكرهها بسبب موضوع زي ده لأنو هي الضحية فيو اصلا ، هسي أنتي لو م كان ربيتيها كانت أختك ح تعمل فيها شنو! ..قلت ليو ع الأغلب ح ترميها بعد الولادة أو تجهضها ..قال لي بالظبط ..فريال قالت لي بغض النظر عن الحصل أنتي قدمتي تضحية عظيمة ، ضحيتي بأهلك وبيتك واحلامك وشغلك وحبك عشانا ، أنا متأكدة أختك دي مستحيل تعمل العملتي ..قلت ليها تاليا تستاهل اتخلى عن أي شي عشانا ، و كلمة ماما البتقولها لي كل يوم دي كفاية جداً إنها تنسيني الحصل ♡..قالت لي قلبك احن من م اتوقعتك ..عاينت ليها و قلت ليها أنتي قايلاني قاسية ولا شنو؟ ..قالت لي عصبية شويتين ..قلت ليها ده طبعي كده م بقدر اخلي ..عُمر قال لي المهم ، الموضوع ده ح يفضل سر بيناتنا نحنا التلاتة و مافي داعي الباقين يعرفو ، حتى مازن ..وعاين ل فريال ، هزت ليو راسا ، م عارفين إنو مازن عارف أي شي و عندو يد في الموضوع كمان ، شوية سمعنا الباب بكركب ..فريال قالت لي دي تاليا ..قمت فتحت ليها الباب ..قالت لي ليه قافلاني بجوة؟ ..قلت ليها عشان م نزعجك ..قالت لي خوفتيني ..فريال قالت ليها حتى بالنهار بتخافي!؟ ..غزت يدها في نصها وقالت ليها ااي ، لأنو المكان جديد علي و ماما م جنبي ، كيف م عايزاني أخاف؟؟ ..قلت ليها لأ ، كان كده أنتي بقيتي كويسة ، من رجعتي ل لئامتك ولسانك الطويل ده ..ولمست راسا لقيت لسه عندها حمى لكن البندول خفف ليها الصداع ..جرت مشت قعدت جنب عُمر وقالت ليو عُمر أنا لساني طويل! ..قال ليها أبدًا ، بس أطول من الظلط ده بشوية ..زعلت ومشت قعدت جنب فريال وقالت ليو تاني م تتكلم معاي! ..فريال قالت ليها أنا م لقيت سلمت عليك زاتو ..وحضنتها وعاينت لي و قالت لي جسمها مولع ..هزيت ليها راسي وقلت ليها بعمل ليها مكمدات بعدين ..هزت راسا وسكتت ، بعداك فكتها وبقو يتونسو و قعدو معانا للمسا و عُمر مشى جاب شنطة فريال لأنو ح تسكن معانا و هو ح يسكن براهو ..اليوم التاني أول شي لمن صحيت شوفت حمت تاليا ولقيتا أحسن من أول ، قمت رفعت صحن المكمدات وديتو المطبخ ومسافة اعمل الشاي فريال صحت ، ساعدتني و جهزنا الشاي حتى مشيت صحيت تاليا ، ونفس حركة أمس بتحانيس قامت من السرير ولبست ، وبتحانيس جات قعدت معانا عشان تشرب الشاي ..فريال عاينت ليها وقالت لي وديها المستشفى أحسن ..قلت ليها ااي ، إلا كده ..تاليا قالت لي لأ ، م ماشة ..فريال قالت ليها خلو يودوك عشان تبقي كويسة ..كانت راقدة قامت قعدت و بقت تبكي وقالت ليها لأ م ماشة المستشفى ، ميرا م توديني المستشفى علييك الله لأ ..قلت ليها ما ح اوديك خلاص ..مسحت دموعا و رجعت رقدت ، فريال عاينت لي ..قلت ليها الموضوع وراثة عندنا ، كلنا م بنحب المستشفيات ..قالت لي وح تخليها كده؟ ..هزيت ليها راسي ب لأ وأشرت ليها عشان تسكت ، وهي فهمت وقفلت موضوع المستشفى ..بعد ربع ساعة كده طلعنا الشارع لقينا الشاب بتاع أمس واقف منتظرنا ..ركبنا وقلت ليو ودينا المحلية أول عايزة أجدد رخصتي ..مشينا هناك و قدمت أوراقي و أي شي والاستلام بعد تلاتة يوم ، حتى ركبنا مشينا الشركة ، بعداك فريال مشت قسم الحسابات لأنو هي مديرة القسم داك ..وأنا و تاليا مشينا مكتبي ، قعدت وشغالة عادي لحدي بعد الضهر ، قمت صليت وقعدت في الكنبة شايلة الايبود وتاليا راقدة جنبي وخاتة راسا في رجليني ..شوية الباب دقة وقبل م اتكلم جا مازن داخل ..قال لي السلام عليكم ..رديت ليو ببرود وقلت ليو وعليكم السلام ، خير؟ ..قال لي جيت اشوف بتك بقت كيف ..قفلت الجهاز وختيتو وعاينت ل مازن وقلت ليو ولشنو إن شاء الله؟ ..قال لي عشان اطمن ..قلت ليو ومالك ومالا تطمن عليها ، من بقية أهلك وأنا م عارفة؟! ..قال لي أنتي مالك منفعلة كده ، قلت ليك عايز اطمن عليها بس! ..قلت ليو م تطمن عليها ، تطمن عليها ليه!!؟ ، مش أنت خاطب أمشي شوف درب خطيبتك ب وين! ..م رد لي وجا لمس راسا ..وقال لي ميرا البت دي بتغلي!! ..على صوتو العالي هي صحت وبقت تعاين ليو ..قال لي أنتي كيف ممكن تكوني مهملة كده!! ..قلت ليو دي بتي أنا ، وأنا بعرف أتعامل معاها م منتظراك أنت تجي تعلمني!! ..قال لي اصلا م جاب اخرتك إلا عنادك و طولة لسانك!! ..قلت ليو أنت مالك!!!! دخلك فيني شنو؟!! ، لساني طوويل قصيير م أظن ده من مجال تخصصك! ..قال لي بنهرة ميرا!!! ، أي شي تلعبي و تعاندي فيو إلا البت دي!! ..نبرة صوتو شدة م كانت عالية ، تاليا قامت قعدت ومسكت فيني وأنا زاتي اتخلعت ، مازن عمرو م أتكلم معاي كده ولا علا صوتو علي إلا الليلة ، أصلا ماف زول في الدنيا دي بخاف منو وبقدر يهرشني إلا هو ..قلت ليو وأنا متظاهرة بالثبوت م تتنهر فيني ي مازن!! ..قال لي تمام ، بما إنك مهملة البت دي وم عايزة توديها المستشفى أنا بوديها ..وشالا مني وهي بتبكي وبتضربو ..قلت ليو اديني بتي أحسن ليك!! ..قال لي بعد اتأكد إنها كويسة ..واتلفت عليها نهرها عشان تسكت ، ومشى على الباب ..وقفتو وقلت ليو بنهرة مازن!!! ، رجع لي بتي يااخ عاين عملت فيها شنو!!! ..عاين ليها ، لقى الدم جاري من أنفها ، وبنقط في كتفو وهي خاتة يدها بتحاول م تخلي يوسخ الجاكيت بتاعو ..عاين لي بخلعة وقال لي ده شنو! ..قلت ليو م شايفها بتبكي وترجف كيف ، خوفتها يااخ ، أنا بتي عمري م رفعت صوتي عليها وأنا أمها! ، وأنت الجاي أمس بتتنهر فيها!!! ، أنت منو لمن جاي تشيلا من يدي!! ، أنت منو لمن بتعرف مصلحتها أكتر مني!! ، أنا ربيتها 8 سنين ، يعني في ال 8 سنين دي معقولة تكون دي أول مرة تمرض؟!! ..م رد لي ، ومنها عُمر جا داخل قال لي في شنو؟ ، سحر قالت لي إنو اصواتكم برة ..عاين لي م رديت ، عاين ل مازن شاف حالة تاليا والدم جاري ..رجع عاين لي وقال لي مالا ، خافت من شنو قدر ده؟!! ..م رديت ..عاين ليها وقال ليها مالك؟! ..م ردت ليو بس بتبكي وتتنهد ، قام شالا منو و مجرد م مازن فكاها و عُمر شالا ، مدت لي يدها ، شلتها من عُمر ..عُمر قال لينا ي جماعة م تفهموني حاجة!! ..حمرت ل مازن و م رديت برضو و مشيت دخلت الحمام ، غسلت ليها وشها و يدينها بموية باردة و حنستها مسافة لحدي م سكتت حتى طلعنا برة ، لقيناهم مافي شكلهم طلعوا ..اتنهدت و قعدت وقعدتها في رجليني وضميتا كانت لسه بترجف ..قلت ليها مالك كنتي خايفة كده؟ ..قالت لي كنت خايفة يضربك ..قلت ليها أنتي عارفة إنو أنا مستحيل أخلي يضربني ..قالت لي هو كان بتكلم بصوت عالي وبتنهر فينا وكان عايز يضربنا! ..قلت ليها م كان ح يضربنا ، هو م زول كعب للدرجة دي هو بس صعب شوية ..قالت لي هو كان عايز يخطفني يوديني وين؟ ..قلت ليها المستشفى ..قالت لي ليه؟! م أنا قلت م ماشة هو ليه عايز يوديني بالغصب ..قلت ليها عشان خايف عليك ..قالت لي م يخاف علي وم يقرب مني كمان ، ميرا أنا خايفة من الراجل ده ، خايفة يخطفني ..قلت ليها م بعمل ليك حاجة ، أنا قاعدة وم ح اخلي يقرب منك ..سكتت وشدت على فستاني ، أنا م اتوقعت في يوم مازن يكون متهور وغبي للدرجة دي ، م عارفة اتغير كيف كده في السنين الفاتت دي لكن تغيرو سلبي وم إيجابي ، هو بحاول يقرب من تاليا بالقوة وأنا م ربيتها على كده ، تاليا م بتعرف غير اللين في حياتها ، يمكن مزعجة ولئيمة لكن في النهاية هي طفلة ، و بتخاف وبتتحسس وم بتتحمل حاجات زي دي ..شوية الباب دقة ، طوالي تاليا اتخلعت ومسكت فيني قوي وغمضت عيونا ..قلت ليها دي سحر م تخافي ، وكان عايزة شوفيها هديك ..م ردت لي ، اتنهدت وقلت اتفضل ..جات سحر دخلت وقالت لي أستاذ عُمر قال ليك في إجتماع بعد ربع ساعة في قاعة الإجتماعات ..قلت ليها طيب ، ولو سامحتي نادي عامل النضافة ينضف المحل ده ..وأشرت ليها محل الدم ، شافتو و هزت راسا و طلعت ..قلت ل تاليا قومي خلينا نمشي البيت ، لأنو ملابسي وملابسك اتملو دم ..هزت راسا وطلعنا ركبنا الاسانسير ومن سوء حظنا مازن جا ركب معانا ، تاليا مسكت يدي وبقت ترجف ..عاينت ليها لقيت دموعا جارين وبتعاين ل مازن ، لمن لقتني بعاين ليها قالت لي شيليني ي ماما م تخليو يشيلني قبلك! ..م اتوقعت في يوم الخوف يصل بيها ل هنا ، أيا كان البفكر فيو مازن لمن عمل الحركة دي فالموضوع انعكس تماماً اخيير أول ..شلتها مسكتني قوي و دست وشها في رقبتي ..مازن عاين لينا مسافة وقال لي بقت كيف؟ ..اتلفت حمرت ليو و رجعت عاينت قدامي وم رديت ، يعني هو م شايف الحالة الوصلت ليها بسببو! ..مجرد م الباب فتح ، طلعت أنا أول و اتكلمت مع الرسبيشن اتصلت للشاب البجي بسوقني ده ..وبعد كم دقيقة كده جا وصلني البيت ، غيرت ملابسي وغيرت ل تاليا وختيت الملابس في الغسالة وطلعت مشيت الشركة ..اتلاقينا أنا و عُمر قدام غرفة الاجتماعات ، عاين لي وعاين ل تاليا ..وقال لي مشيتو غيرتو ولا شنو؟ ..قلت ليو ااي ..عاين ل تاليا الواقفة جنبي وقال ليها بقيتي كيف؟ ..قالت ليو كويسة الحمدلله ..خت يدو في راسا وعاين لي و هز راسو ب لأ ، يعني حمتها م نزلت ..قلت ليو عارفة ..سكت و دخلنا جوة ..لقينا جواد و مهند و مازن بس قاعدين ..قلت ل عُمر وينهم الباقين؟ ..قال لي وقعو العقد وسافرو ، بس باقي المستثمر الإسباني وخلاص ..مشينا قعدنا وختيت تاليا في الكرسي الجنبي و عُمر جنبها والباقين قصادنا ..مازن عاين ل تاليا وعاين لي واتلفت ، أما مهند ف ياها ابتسامتو حقت كل يوم ، و جواد بعاين لي بابتسامة استفزازية م قادرة افهما ..سفهتهم التلاتة وعاينت ل عُمر وقلت ليو اهاا؟ ..قال لي عايزين نعرف راي المستثمر الإسباني ..عاينا ل مازن قال لينا المدير قال م بقبل بأقل من 50% من الأرباح ..قلت ليو نعم ي بابا؟! 50%؟!! ليه ح يبني براه؟! ..قال لي ده كلامو! ..عُمر قام طلع تلفونو وقبل م يتصل قال لي أقول ليو كم؟! ..قلت ليو نفس الأرباح الح ياخدوها ديلاك ، ولو رفض بنلقى غيرو أو بنكتفي بالعندنا م محتاجين ليو شديد ..هز راسو وطلع ..مجرد م عُمر قفل الباب ، تاليا قامت وقعدت في رجليني ..مهند عاين لينا وقال لي شكلك مدلعاها شديد ..قلت ليو ااي ، في أي اعتراض؟ ..جواد قال ليو ااي هي م لسه صغيرة ..مهند قال لي عمرها كم؟ ..أنا و مازن قلنا ليو بصوت واحد 8 سنين ..اتلفتنا كلنا عاينا ل مازن بخلعة قال لينا مالكم؟! ..جواد قال ليو أنت عرفت كيف؟ ..قال ليو كلمتني قبل شوية ..جواد و مهند عاينو لي قلت ليهم ااي ..سكتوا ، قعدنا شوية كده تلفوني رنة ، اخدتو و عاينت لقيتو أسامة ..قلت ليو اهليين أسامة كيفك؟ ..بس من هنا كلهم ركزوا معاي ..أسامة قال لي ميرا!! ، حمدلله على السلامة ..قلت ليو الله يسلمك ، كيفك أنت و روان و أحمد ولدك و أحمد أخوك كيفو ..قال لي كلهم كويسين الحمدلله ..قلت ليو منو اداك رقمي؟ ..قال لي عُمر ، هسي زاتو لو جنبك اديني ليو ..عاينت بالقزاز لقيتو لسه بتكلم ، قلت ليو عندو مكالمة ضرورية والله إلا بعد يخلص ..قال لي تمام ، قولي ليهو يرجع لي ..قلت ليو تمام ..وقفلت الخط وختيت التلفون في الطاولة قدامي ، قامت تاليا شالتو و طلعت السماعة من الشنطة ولبستها ، وبقت مشغلة أغاني وبتلعب ..كلهم بصوت واحد قالو لي ده منو؟ ..عاينت ليهم بالدور و قلت ليو ولشنو السؤال؟ ..مهند قال لي عايز أعرف ..قلت ليو م ضروري تعرف ..مازن قال لي يعني ما ح تكلمينا؟! ..عاينت ليو و قلت ليو مازن! خطيبتك أنا!! مرتك؟! بتدخل في حياتي مالك؟! ، انتو كلكم دخلكم شنو في حياتي؟! ..جواد قال لي خلاص م تنفعلي م عايزين نعرف ..مهند عاين ليو وقال ليو أنت بتعرفا من وين؟! ..قال ليو كانت الطباخة حقت.. ..وعاين لي واتذكر إني قلت ليو إني م حقت زول ، قام عدل كلامو سرعة و قال ليو كانت الشيف البتطبخ لينا زمان ..عاين ل مازن وقال ليو وأنت بتعرفا من وين؟! ..رديت ليو أنا وقلت ليو درسنا في نفس الجامعة ..مازن عاين لي وم اتكلم ..سكتنا وبقى أي زول يعاين في إتجاه وفي توتر واضح في الجو ، قام جواد عاين ل مازن وشاف بقع دم في الجاكيت بتاعو ..قال ليو دي شنو البقع دي؟ ..وأشر ليو عليها ، مازن جر الجاكيت وعاين في كتفو ..وقال ليو ده دم ..قال ليو اتجرحت؟ ..قال ليو لأ ..وعاين لي ، جواد هز راسو وسكتو الاتنين ، شوية جا عُمر داخل قال لينا اتفقت معاو خلاص و وافق ..ماف زول رد وكلنا كنا سرحانين ..قال لينا مالكم انتو؟ ..عاينت ليو و قلت ليو ولا شي ، كده الإجتماع خلص مش ..قال لي ااي ، بس باقي التصاميم ..وعاين ل جواد و مهند ..جواد قال ليو لسه شوية ..قال لينا طيب ، معناها الإجتماع خلص ..قلت ليو طيب وعلى فكرة تيشرتك فيو بقع دم أحسن تمشي تغيرو ..عاين ليو و قال لي ااي والله ، طيب تعالي معاي عايزك ..مازن قال ليو وين؟ ..عُمر قال ليو مكتبي ..مهند قال ليو أنت ماشي تغير تيشرتك هي تعمل شنو هناك؟ ..قال ليهم أول شي دي حاجة شخصية بيني وبينها ، تاني حاجة أنا المدير هنا و ماف زول من حقو يسألني حاجة! ..سكتو ، أنا قوّمت تاليا من رجليني واخدت تلفوني وشنطتي ومشينا مع عُمر مكتبو ..قعدت في الكرسي و عُمر مشى قعد في الكرسي القصادي و فتح الدرج طلع ملف مداهو لي ..اخدتو وقلت ليو ده شنو؟ ..قال لي دي أوراق المشروع بتاعت الفندق ، اقريها تمام و وقعيها ..قلت ليو تمام ، و صاح اتذكرت أسامة اتصل ليك عايزك ضروري ..قال لي معناها لقى المكان المناسب ..وطلع تلفونو اتصل ليو واتكلم معاه شوية وقفل ..قلت ليو اهاا؟ ..قال لي لقى المكان المناسب ، أنا ح أسافر بكرة أمشي اشوفو ..قلت ليو تمام ..وفتحت الملف بقيت اقرا فيو ..قال لي لو حصلت أي حاجة في غيابي اديني تلفون ..رفعت عيني عاينت ليو و قلت ليو بشك حاجة زي شنو يعني؟ ..عدل قعدتو وقال لي ميرا ، أنا خطيب فريال ده م مرتاح ليو ، و مع إني حذرتو قبل شوية إنو يبعد منك لكن برضو قلبي م مرتاح ليو ، لو عمل أي تصرف أو حركة اديني تلفون واقسم بالله امسحوا عن وجه الأرض ..قلت ليو م تخاف علي لو عمل أي شي بعرف اتصرف أنا ، مع إني م أظن يعمل حاجة ..قال لي هو عمل ل تاليا شنو لمن خافت كده؟ ..عاينت وراي لقيتا نايمة في الكنبة ، رجعت عاينت ل عُمر ..وقلت ليو اتناقشنا أنا و هو قداما وشالا مني بالقوة ..قال لي لشنو؟ ..قلت ليو موضوع مستشفى و م مستشفى ..قال ليو هو دخلوا شنو؟!! ..رجعت عاينت ل للورق و رفعت ليو اكتافي ب لا مبالاة وقلت ليو م بعرف ..قال لي المرة دي مشيتها لأنك م كلمتيني ، لكن حاجة زي دي لو اتكررت كلميني وأنا بتصرف ..قلت ليو أنا بعرف اتصرف ي عُمر م صغيرة أنا! ..قال لي برضو كلميني ..عاينت ليو و قلت ليو كوويس حاضر تمام ، ارتحت كده؟ ..قال لي ااي ، واهاا عايزة توديها المستشفى متين؟ ..قلت ليو بعدين بالليل بعد تنوم بوديها براحة من غير م تحس ..قال لي ولو صحت؟ ..قلت ليو بعرف اتصرف ..قال لي تمام ، ح امشي معاك ..قلت ليو لأ ، أنت عندك سفر بكرة ..قال لي أنتي مالك ، أنا المسافر ولا أنتي؟! ..قلت ليو خليتك ي عُمر اعمل البريحك ..قال لي ااي بس! ..وقام وقف ومشى فتح الباب ..وقفتو و قلت ليو ماشي وين؟ ..قال لي ماشي البيت واحتمال م اجي راجع هنا ، عشان كده نتلاقى في بيتك بعدين ..قلت ليو تمام ..وطلع وقفل الباب ، أنا قعدت قريت الأوراق على أقل من مهلي و وقعتهم ، واخدتهم ، مشيت مكتبي ختيتهم في الخزنة وقفلتهم و رجعت عشان اخد تاليا ..فتحت الباب براحة لمحت زول قاعد ، عاينت براحة لقيت مازن قاعد في طرف الكنبة جنب تاليا وبمشو يدو على شعرها ، بعداك نزل باسها وبقى يتبسم براو ..وقفت وبقيت مراقبة ، هو مدام بحبها قدر ده وعايزها ليه م فتش عليها! ، هسي بعد السنين دي جاي يعمل فيها أبو اللطف والحنان! ..فجأة قام وقف ، قمت رجعت ورا و ادسيت بالجنبة ، و رجعت عاينت ليو ، لقيتو طلع تلفونو بصور فيها وهي نايمة وبتبسم ..هو يمكن شخصية مازن اتغيرت ، لكن حنيتو لأ ، لسه حنون وبحب الأطفال زي عيونو ♡..ابتسمت وأنا بعاين ليو ، بعداك فجأة اتذكرت العملو فيني ، قمت رجعت قفلت الباب براحة ، وفتحتو بصوت عالي و دخلت ..قام دخل تلفونو سرعة وعاين لي ..قلت ليو أنت الجابك شنو؟ ..قال لي جيت أشوف أستاذ عُمر ..قلت ليو طلع ..قال لي تمام ..وقبل م يتحرك فريال جات داخلة ..قالت لينا مالكم واقفين؟ ..قلت ليها اصلا أنا جيت اخد تاليا ..مازن قال ليها وأنا جيت أقابل أستاذ عُمر ..قالت لينا طااايب ، المهم أنا جيت عايزة عُمر برضو ..قلت ليها مشى البيت ..قالت لي طيب تعالي ، عايزة اوريك كشف الحسابات ..قلت ليها تمام جاية ..ومشيت صحيت تاليا ومسكتها من يدها وهي نعسانة وبتتثاءب ..فريال قالت لي كان تخليها عادي ..قلت ليها الشركة دي م أمان في ناس كتيرة حركاتهم م عاجباني ..وعاينت ل مازن ، قام حمر لي ..قالت لي طيب ارح ..وطلعنا خلينا واقف بحمر لي ....
*بالمناسبة ؛ أنا حقًا لم أعُد ألتفت لك ، لا يعني لي برفقة من أنت ، ولا ماذا تفعل الآن.