رواية علاقة سامة الفصل العاشر 10 بقلم ورود الخالدي
دعاء:::
سد الاتصال بوجهي طبعا من صوته احسه صاير نار عزا بعيني شلون مفكرت بالكاميرات شلون راحت عن بالي واذا صدوك احد شايفني ..شلون تنسد هالفضيحة..وتذكرت من نزلت من الشباج نفنوفي نرفع لحد بطني وكوله جسمي طلع يربي شلون بيه وكعدت ابجي وادعي واكول يارب الستر منك واني ممسويه شي غلط وبعمري مسويت ..
الصبحيه كولها مرت متصل بيه ولا كال شي..وماما قبل الغدة جتني للبيت
وج ليش رحتي كعدت من الصبح ملكيتج شنو رحتي لبيت خالتج!!
لا يوم الفجر جيت لبيتنا ونمت
وشوكت كعدتي
قبل شويه((جذب اصلا منمت من مكالمة محاق لحد الان كاعده وابجي وادعي والوب))
الساعة هسه11ونص هذا كوله نوم
اي غير اول البارحة منمت ولادقيقة
يله كومي روحي بمكاني لبيت ام محاق اني اروح لخالتج اطمن علي غزوله واجي
اي يوم روحي هسه اتريك واسبح واروحلهم
وراحت ماما..بقيت وحدي مستحيل اروحلهم اخاف احد شايفني فعلا شلون اواجه الناس بس لو احد شايفني غير تصير فضيحة وتوصل لماما..اشو ماما عادية من جتي مكالت شي .بس..لا..لا حتى لو شايفيني ام محاق مستحيل..تكول لماما تستحي منها قابل تكولها شفنا بنتج..طالعة الفجر من شباج غرفة ابني!!
اكيد مراح اروح فكرت اتصل بملك اتأكد منها واتصلت واستفسرت منها بشكل غير مباشر حتى متحس ومن كلامها حسيت ماكو شي. بس هم ما اروح ..وره ساعتين رجعت ماما للبيت تريد تبدل شافتني بالبيت كالت
وج لهسه مرحتي..
لا ماما جنت عدهم قبل خمس دقايق رجعت دخت من الازدحام والنعي والبجي ورجعت
يله كومي وياي نروح
لا ماما تعبانه انتي روحي عسما تضلين يمهم لنص الليل اني ما اروح راسي داخ. عود باجر اروح وياج
يجوز اتاخر عدهم
عادي
وعشاج شلون
يوم اكل اي شي شالسالفه قابل عايشه ع اكلهم !!
وراحت ماما وفعلا تاخرت ورجعت الساعة بالتسعة بالليل منهم اخذت علاجها وكبل نامت..اني لحد الان منايمه ومتحملت اكثر ساعة ب11ونص دزيت رسالة لمحاق:
محاق خو ماكو شي طمني !!؟
وره خمس دقايق..رد:
فد ساعة افرغ واخابرج
وبقيت انتظر رحت للاستقبال وكعدت انتظر اتصاله وفعلا وره ساعة اتصل
الوو
الوو محاق حيل قلقانه خو ماكو شي!!
لا ماكو شي محد شايفج..
متأكد..
اي متأكد
الحمد لله
بس و الله لشه و زوج زرور؟!!!!
جانت نبرة صوته مليانه خباثة بسرعة كتله
شنو!!
سد،الاتصال ودزلي فديو انتظرته يحمل ومن فتحته شهكت عززا عززا هذا شنو الفديو الي دازة طالعة بيه اني وكولش واضح شلون من نزلت من الشباج وشلون جلب نفنوفي وجسمي كوله مبين عقلي طار اتصلت عليه..بسرعة رد
محاق شنو هذا!
هاي انتي غير..رحت للدي ڤي ار وطلعت التسجيل ردت امسحة كولشي يصير خاف احد يعيد الكاميرات لاي سبب بس من شفتج..مكدرت ما احفظ هذا الفديو بجهازي بصراحة فديو يصير ترند!!
خررب محاق صدوك تحجي مسحة رجاءا
لتخافين حذفته من الدي ڤي ار بقه بس التسجيل الي بجهازي..
وليش محتفظ بيه مسحة رجاءا مسحة
سد الخط ودزلي فديو ثاني مال هاي المرة العجوز الي تكول يااا شوف شلوون ..مسحة خاله مسحة
فور دمي خابرته
محاق تحجي صدوك رجاءا حذفة فورا من جهازك
اسف ما اكدر
متكدر شنو وليش تحتفظ بيه يعني؟؟
اي الدنيا طويلة عريضة ويجوز يفيدني!
مفهمت!!
يجوز اغلط وياج فد يوم ع الاقل من تصير صدك اشوفهم اهلي واهلج هذا الفديو واكولهم شوفو هي الي جانت تجي عليه وتطلع من شباج غرفتي
تريد تخوفني ...لو تحجي صدوك
هههه.. ..شتتوقعين اسويها
رغم كل المواقف الي بينا بس لا ما اعتقد
زين ليش انتي خايفه متوقعه نغلط فديوم اني وياج
لا..ابد مستحيل هالشي يصير!
لعد امني ومعناها الفديو ما اله قيمة لو يضل عندي الف سنه
بس احسن مسحة
تمام راح امسحه
اشكرك
وبقينا ساكتين وهم سمعت صوت الجداحة وحسيته ديدخن جنت مستغربه جان كولش هاديء وصوته بيه نبره غريبه مختلطة قهر وحزن رغم هو يحاول يبين فكاهي ولان جنا ساكتين اكثر من دقيقة كتله
اني اروح هسه
لا..ابقي وياي..!!!!!
هم استغربت اكثر يربي مو عوايده ولا هذا محاق الي اعرفه..لان كلي ابقي وياي بس ميحجي ساكت ويدخن اسمع نفسه وهو يدخن فكتله:
محاق انت زين ..اقصد ..انت مو ع بعضك رغم اول مرة تصير فكاهي ....بس وره هذا كوله احسك حيل ضايج ومقهور!!
اي والله ضايج
ليش
من البارحة لليوم ماشفت الحجية!
ياعيني مفتقدها
اي والله فوك ميتصور اي بشر
وبده يسولفلي عنها وعن مجموعة مواقف من طفولته وشلون جانت تحبه وتفضله ع كل احفادها وشلون جان يجي من المدرسه وتتلكاه..وشلون ركصت بعرسه..وشلون وشلون نص ساعة واكثر هو يسولفلي خطية حيل ضايج عليها ومفتقد وجودها..لان هي الي مربيته يكولي اخر ايامها نست الناس كولها وبعد متعرف احد بس اني تعرفني وتتذكرني..جنت ساكته واسمعة..اول مرة انقهر عليه اول مرة احس محاق شخص ثاني مختلف عن ذاك الي سمم حياتي من عرفته لليوم.. بس هو شعجب هيج انفتح بالكلام وليش ديحجيلي اني بالذاب وبهالوقت لان اعرف عدهم فاتحة وتعبان وطول النهار واكف ع رجليه.. ومن سكت كتله
الله يصبرك..كولنا هذا مصيرنا ..هي كبرت ودخلت بمرحله..صعبه ورب العالمين اخذ امانته منها حتى متتعذب اكثر
ونعم بالله..
سكت شويه وكلي
روحي نامي دعاء.
اي راح اروح تصبح ع خير
سده قبل ميرد
من خلصت المكالمة احساسي جان مختلف ..معقوله هذا محاق يعني هو انسان مثلنه هم عنده مشاعر واحاسيس ينقهر ويتألم ويضوج ويفتقد اليحبهم..لعد ليش مبين لكل الناس هو شخص جامد وبارد اصلا من شفته ..بالكاميرات يسلم ع الناس ابد ممبين عليه لامقهور ولاشي واكف عادي ..بس بعد هذه المكالمة..عرفت انه شخص ابدا ميحب يبين مشاعره جدا متحفظ وكتوم وشخصيته حلوة مو مكروه مثل ما راسمته بخيالي..
وثاني يوم رحتلهم اني وماما وثالث يوم خلصت الفاتحة جنت اشوفه واكف وياهم بشاشه الصاله الي تعرض الكاميرات بس ملتقينا وراها ولا جمعنا موقف جديد ولان رقمه عندي...وره اسبوعين من وفاة الحجية فكرت اشوف ستورياته وردت اعرف بشنو مهتم وشنو ينشر بس من فتحتهن شفت منشوراته كوله عن المعمل مالته والانتاج والغرف والتصاميم واضح انه الواتس مالته خاص بالشغل وبس..ورغم اني افتح ستورياته بس هو ابد ولا مرة فتح اي ستوري خاص بيه اني اخلي كل يومين او تلاثه عن الام والاب ومرات انزل صور الاكل او الاشياء الي اشتريها يعني ستوريات مال بنات موكولش مهمه بس ولا مرة شفته بالمشاهدات ..
المهم مرت الايام واجه يوم اربعين الحجية وماما اصرت اله اروح وياها ..كلت عادي اروح وياها مبيها شي وع اساس سيارة ابو محاق بيها عماتهم وبنات عماتهم..وسيارة محاق ماما وامه واني وملك.. وبيت اهل مرت مصطفى عدهم سيارة ستاركس تروح بيها هي ومصطفى ومجد واهلها وامها بس من ردنا نصعد قبطت سيارة ابوهم وردت اصعد جتي وحده من بنات عمه كالت ماكو مكان بسيارة عمي اصعد وياكم فصعدت قبلي. كلت..لماما روحي اني ارجع ام محاق كالت
ليش ترجعين خاله تره الستاركس مال اهل مرت مصطفى فارغة..روحي صعدي وياهم.
حيل خجلتني مكدرت اتراجع لان ماما ايدتها..فاضطريت اروح اصعد وياهم وياريتني مصعدت.. الطريق كوله هذا ابنهم الي يسوق تفريبا بعمري او اكبر مني شويه حيل ضوجني صافن بوجهي عبالك مشايف بشر كبر شكد ملطلط وين ما التفت الكاه كبالي ويسولف ويه اهله ويبتسم..ومبين كونيه مال جذب لان هوايه يسولف ومحد سائلة النوب يسولف ومكابلني ويبتسم شلون ورطه هاي..
وما صدكت وصلنه للمقبره ومن نزلنا محاق صح جان ويه اهله ومهتم بيهم بس حسيت عينه يمي وديراقب هذا كرايب مرت اخو شلون صافن عليه كل الوقت حسيته راح يلزمة يكطعة لوما الناس يمه..وحتى اني نظراته جانت الي تشبه الغضب..لا وجماله هذا الملطلط راح جابلي بطل مي ويعزم عليه كتله
شكرا معطشانه
اخذي يمعوده هو مي
اضطريت اخذه..
يبوووو هم شافني محاق اخذ البطل منه ومن ردنه نرجع كلت لماما
يوم خلي اصعد يمكم ذوله غربه حيل ضجت يمهم
يااا قابل نكول للبنيه نزلي زحمة ماما تحملي هي مسافة طريق وتفض
ورجعت كعدت وياهم ..بالستاركس وكوه تحملته الى ان وصلنا لمنطقتنا ونزلنا..ومن نزلنا كبل رحنا لبيتنا رغم ام محاق كالت تعشن يمنه بس ماما اعتذرت لان حست تعبت حيل من الطريق..
ومرت الايام عادية يعني نروح اني وماما مرات يم ملك وتصير صدف اشوف محاق وقت قصير ..بس ماكو شي جديد صافيه دافيه..وبمرور هالوقت الي مابيه شي جديد جنت مرتاحة لان اني ومحاق متعاركنا ولا صار موقف يخلي الجو مشحون اومتوتر بينا من فترة طويله..
الى ان جابت ملك صادفت ولادتها بنهاية الشته طبعا جابت بعمليه لان الطفله كاعدة ومجايه ع راسها ماما رادتها ادور يمنا حتى اداريها بس ام محاق مقبلت كالت لماما انتي مره مريضة وبتج مامتزوجة متعرف اداري النفسه فخليها يمنا احنا نداريها..بالكوة قنعت ماما لان ماما حيل مكيفة باول حفيده الها واصلا اول مجابوها لبيتهم ماما بقت يمها..وفروحة مكيفه كل شويه تجي ركض من بيت خاله تشوف الطفله وترجع يم غزل..هلكت خطية من الروحة والرجعة ولان ماما شبه مقيمه عدهم بس بالليل تجي يمي للبيت جنت اضطر اروح يمهم مرات..ومرة. جنت دا اطلع من بيتم اندكت بابهم فتحتها جان بسرعة يفوت هذا الملطلط اخو مرت مصطفى اول مشافني كال
هاي شلون صدفه واحلى صدفه شلونج دعاء
اهلا
ردت امشي كال
شبيج مستعجلة
اي عندي شغل ابيتنا ومستعجلة
ردت بس اخلص منه لان لزكة..
هاا..لعد هذه الاغراض دزوهن اهلي بلكي ادخليهن لام ادم..
وبس مديت ايدي اخذت العلاكة شفت محاق فوك روسنه وجهه مثل جهنم حيل عصبي هو انطاني العلاكة وراح بس محاق ضل واكف كبالي عبالك شافني بالجرم المشهود..ردت التفت ادخل العلاكة جوة كلي:
اوكفي
وكفت..وباوعت بوجهه
خير شكو!!
لا سلامتج..بس اذا تحبين تتشاوفين انتي وهذا العار اتفقي وياه تتشافون ابيت اهلج لو اهله مو هنا!
اتفق وياه ليش شعندي وياه
والله انتي اعرف
الى متى تضل يوميه تتهمني اتهام شكل اني لا اعرفه ولاعندي اي شي وياه تره شفته مرتين مره بالاربعين مالتكم من اضطريت اصعد ويه اهله وهسه شفته جايب علاكة لاخته..
اي..صار معلوم
صار وله مصار ..انت شبيك..مخليني موضع شك دائما ليش اشايف عليه لو شسامع بس فهمني
قبل ميكمل كتله
تره الولد نسيبكم انتو ممناسبنا احنا. ليش تتهمه وتتهمني شنو اني حايط نصيص كل تهمه تذبها براسي متروح تسأله وتكوله شعندك وياها لو متكدر تحجي وياه خاف يفهم لو يحس انه انت تغار منه
هههه منين اغار من هذا المكبسل ابو المخدرات وعلى منو اغار بس لا عليج انتي لج اني بحالج شايفج اصلا كدامي حتى اغار عليج...كل ما بالموضوع ما اريد مهزله تصير اباب بيتي..
ها مو بحالي..ومشايفني اصلا ليش منو حاول يتحرش بيه قبل فتره..
لا هوايه واثقه بنفسج ..انتي لج منو يكلب سلعتج تره زايد عليج هذا ابو الحبوب يهتم بيج..
حسيته حيل جرحني هل مره بكرامتي وبانوثتي متحملت رأسا بجيت ودموعي جانت قويه من كتله
ليش..ليش شبيه اني ومحد بحالي..شبيه ومحد يكلب سلعتي...واختنكت بعبرتي وكملت:
هوايه ناس يردوني..ومهتمين بيه بس اني الي جنت ارفض..انت اذا تكرهني مو معناها كل الناس تكرهني.. مو معناها اني بنيه ممرغوبه..وو
مكملت اختنكت حيل وعفته واكف وطلعت من بيتهم لبيتنا امشي ودموعي تجري هالمرة حيل حيل اذاني كلامه والكل يعرف اصعب شي. تنجرح البنيه بانوثتها
اول مفتت لبيتنا جان ورايه دخل وسد الباب كلي
دعاء
البجي مالتي تحول عصبية احجي بعصبيه وابجي كتله
ليش جاي ورايه شتريد مني بعد عندك بعد كلام جارح اكثر توجهه اليه ..خليه غير وقت لان حاليا ابد مااكدر اسمع اواتحمل حرف منك تعبت..منك تعبت والله
سكت جان بس يتأمل انفعالاتي طلع جكارة وواخذ منها نفس وكلي
اسف !؟!؟
استفزتني كلمة اسف فكتله
صارت زحمه عليك..تذبح وتكول اسف؟!
روح..منا روح محاق
ردت ارفع ايدي امسح. خدي هو اقترب بسرعة لزم اديه اثنينهن وبعدين حضني كلبي طار رغم حضني بهدوء مو بقوة اديه ماتت..كتله بصوت متقطع
وخر عني
بس عبالك ميسعني ضل حاضني وبايده خله وجهى ع صدره وبقه يمرر اصابعة ع شعري عبالك طفلة زغير بحضنه
كافي..لتبجين كتلج اسف
دناني شويه جنت ساكته اريد استوعب تصرفه الهاديء والحنيه الي نزلت عليه فجاة ومن دناني رفع اديه اثنينهن ومسح خدودي جانت جكارته بعدها بيدة كلي بصوت ثابت:
والله...والله..كلبي مثل رماد هذه الجكارة صاير من وراج
هدني.وعافني وطلع..
هذا شبي يربي..شبيه بس اريد اعرف شنو نوع العلاقة الي تربط بيني وبينه..يكرهني..يحتقرني..لو يحبني ويغار عليه..زين اذا يحبني هذا شنو من حب بس اريد اعرف شنو معنى عبارته وذيج نظراته وحضنته الهادئة..كلي اسف..يعني يختصر كل عباراته. الجارحة ويريد يمحيها بكلمة اسف.. وشنو كلبه صاير مثل الرماد شمسويتله اني شنو هالقهر والعذاب الي حسيته بصوته من كال هالعبارة
(كلبي ..مثل رماد هذه الجكارة صاير من وراج).