رواية احببت متلازمه داون الفصل السابع والعشرون 27 بقلم نوسه حمد
علي عدل حالتو وكتب متزوج من اريج ونزل صورتو ومعاهو ولدو وكتب عليها اجمل شي في الحياة انك تتولد مرتين والصوره كان فيها هو ضاحك ومحمد ولدو ضاحك حتي الوجنه البشمال شبه بعض والعيون واللون واي شي وزي م بقولو فوله وانقسمت لنصين وانا كنت جنبو وهوكان مبسوط شديد اول لايك جاهو من ثويبه وتاني لايك من حسام وبدت تعاليق اهلو باركو ليهو الرجوع وكانو مبسوطين بي محمد ولدو شديد وهو اشيل وارد علي اي تعليق جاهو قلت ليهو علي انا م عارفه بس خوفت علي مشاعر ثويبه عشان م ولدت منك قال لي شنو شنو ثويبه دي م راعت لمشاعرك اتهمتك في شرفك وكانت سبب في موت امي اي نعم دا يومها بس ماتت بالخلعه ونسيتي التمثيليه الظريفه العملتا هو والدكتور واتهمتك في شرفك وفي ولدي اللحمي ودمي وقالت ود حرام ولا نسيتي انا محتكراني معاها وهي الشكلها فيها العيب ومعيشاني اهانه وزله وانا استحملت عشان قلت انا م بلد وماف واحده ح توافق علي ولا كمان ضيعت عشره سنين بعمر محمد ولدك عايش معاها ومحسساني انها مستحملاني عشان انا عقيم وخايفه ع مشاعري وطلبت منها كم مره نتطلق وتتزوج كانت بتقول لي لا انا عاوزاك انت وهي م عاوزاني حب فيني عشان كذبت علي بعدم الولاده وهي الما بتلد وقالت احسن اعيشو علي انو م بلد واعيش اللحظه هسي لو كانت خلتنا في حالنا كان ولدنا غير محمد دسته وانا ممكن اغفر ليها اي شي بس انها تكذب علي وتتهمني بالعقم والمنشور دا م عشانا هي ي اريج دا اشهار لي زواجنا ولي ولدي اللوثت سمع الناس بي اني طلقتك عشان انتي حملتي بالحرام واهلي كلهم سالوني من الموضوع دا وانا عشان دي حاجه م متاكد منها والله ي اريج قلت ليهم انا طلقتها سوء فهم لكن للحظه دي ي اريج م حصل قلت لي زول بالكلام الحصل وم عارف ي اريج انا لو فديتك بي روحي م ح اكون وفيت ليك اول شي انتي حبي الاول والوحيده الوقفت جنبي وساعدتني في امي والربيتي ولدي في غيابي قلت ليهو دا الواجب م عاوزه شكر بس انت خزلتني ي علي قال لي عارف نفسي قلت ليهو انا من جيت معاك السعودية ولا يوم م طلعت بدونك كيف تتهمني كده قال لي انا م شكيت فيك و الخلاني اصدق كلام الدكتور وم عارفه علاقتو بيها شنو ولو طال الزمن لو قصر ح اعرف وم ح اخليهو زي م اتهمك في شرفك وطلعني انا عقيم ببقيهو هو العقيم قلت ليهو علي لا لا عليك الله انا م صدقت رجعت لي ولدك وولدك فرحان بيك وشبعت مواجع في الدنيا دي تعال ننسا الفات ونبدا صفحه جديده قال لي حاضر ي عيوني قلت ليهو عارف انا مشاعري ماتت قال لي كيف قلت ليهو عديل كده والله م حاسه نفسي مشتاقه ليك ولا فرحانه انو رجعت لي قال لي معليش ي اريج مشاعرك تعبت شديد بالمواجع وم ح الومك ع اي شي بس خليها للايام ومشاعرك ح ترجع ليك واحسن من اول قلت ليهو خير ان شاء الله قلت ليهو بالمناسبه دي حاجه غريبه ثويبه عملت ليك لايك وم رسلت ولا ردت عليك قال لي علي فكره ثويبه انا اتناقشت معاها وم انفصلنا بس رجعتها السودان وهجرتها عشان تتعظ قلت ليهو مالا ولا م بتقدر تحكي دي اسرار قال لي ماف سر بدسو منك يلا يوم سمعتها تتكلم مع مرت حسام وقالت ليها علي بقا اكورك فيني عاوزاك تمشي للشيخ الفلاني وتكلميهو لي وبرسل ليهو القروش في حسابو بس ابكم لي علي وانا عشان صبرتا عليها دخلت عليها وسمعتها كلام حار وتاني يوم حجزتا ليها وسفرتها قلت ليها بعد تنعدلي بجي ارجعك قلت ليهو اعوذ بالله وكان نفسي اسالو من حسام بس خوفتا يزعل مني بس براهو قعد احكي لي قال لي دايراك اخلني طرطور زي حسام قلت ليهو لا لا ياخ حسام لسه في حالو ديك قال لي لو شفتي م بتعرفي وشكلو بقا يتعاطا وانا لو في محلو كان موش اتعاطيت وبس كان الصباح اسكر وبليل اشرب بنقو والمغرب انطعن حقنه ماف راجل بقبل مره تهينو وهن مسكتتاتنو بالمصايب وفوق دا كلو مرتو باقيه راجل ومره ولو شفتيها تقولي هي الراجل وحسام المره وحضرت سيادتها ثويبه عاوزه تبقيني زي اخوها بالمصايب قلت ليهو اعوذ بالله منهن وم تحكي الكلام دا لي زول خليهم في حالن قال لي لا لا والله م بقدر احكيهو لي زول وبالمناسبه دي عاوزه اقول ليك خبر حزين قلت ليهو محمد مات صاح علي عاين لي بخلعه زي الحسيتو داير اقول لي انتي متواصله مع حسام قلت ليهو عشان م تخت ف راسك كتير انا كلمتني فلانه جارتهم زمان كنت مشتاقه اشوف محمد واعرف اخبارو واتصلت اسألها قالت لي الخبر الشين دا قال لي اي والله امو الغبيه في مطره وخلتو العب ف الارض وهو زول م بفهم ومسك سلك الكهرباء ومات وبالمناسبه دي عندك صوره في تلفوني انتي وامي ساعه جينا اول عمره وم قدرت امسحهن عشان امي كانت معاك وهو شافن بالصدفه قال لي دي اما فهمتو قاصدك لكن قلت اشوفو قلت ليهو اي دي امي واشرت علي امي قال لي لا دي دي اما انا فهمتو قاصدك انتي وقال لي وين هي قلت ليهو ماتت والولد يوم كامل ابكي وابقول ليهم اما ماتت ولمن سالوني قلت ليهم شاف صوره امي وقلت ليهو ماتت وهو بحكي لي كده انا قعدت ابكي بكا ساعه حتي علي قدر اسكتني وعلي ولدي جا داخل لقاني ابكي قال لي ماما م تبكي وبقا ابكي معاي ضميتو علي شديد وبقيت اتخيل في شكل محمد اخوهو وابكي بعد شبعت بكا سكتا دكتور محمد جا قال لي مالك ي اريج ي بتي قلت ليهو لا لا ماف شي قال لي علي ولدك جانا ابكي قال امي تبكي حكيت ليهو بقصه محمد الحكاها لي علي وابوهو والحاصل عليهو دكتور محمد زول طاهر قال لي معقوله في ناس بالشكل دا قلت ليهو اي والله بس الله كريم وربنا يشوف حال حسام قال لي لخير ان شاء الله والصبر علي المصايب زاتو اجر وحسام دا شكلو صابر علي مصايب الدنيا و العالمين دكتور محمد قال لي اليوم عازم كل الناس عشاء وعاوزك تتصلي لي اخواتك اجو بي ازواجهم واولادهم عشان نتعرف عليهم وابقا تعارف اسري قلت ليهو حاضر والمناسبه احتفال برجوع ابو محمد علي قال ليهو انت عارف ي دكتور كنت مشتهي اسمع كلمه ابو دي والحمد لله ربنا سمعني ليها قال ليهو ان شاء الله تسمعها اكتر واكتر وبالمناسبه انا أخصائي نساء وتوليد ان شاء الله الولاده الجايه تكون علي يدي وتؤام ان شاء الله علي فرح شديد قال ليهو ان شاء الله قريب
احلام زوجت دكتور محمد جابت لي البت البترسم والبتشتغل ميك اب ف البيت وقالت لي اسبوع كامل م ح تلمسي اي شي واولادك شيماء وشاهندا قاعدات م بقصرو منهم وكل واحد ح تسوق واحد ينوم معاها في غرفتها وغرفتك ح تكون حقتكم انتي وعلي قلت ليها م اظن علي يوافق بس دا حل مؤقت وم قصرتي ي احلام قالت لي علي شنو انتي عمرك دا كلو تخدمي فينا وساعدتيني كتير وكنتي لينااخت وامان ♥️♥️
انا اتميزت وكنت مبسوطه شديد واولادي فرحانين بالحنه اكتر مني كل دقيقه اجو اقولو لي ماما انتي حلوه وعلي زاتو مبسوط وبليل الناس جو اخواتي واولادهم ورجالهم واصحاب محمد وعملو عزومه كبيره وناس امي وابوي حاسين انو دا حلم بعد العذاب الشفتو ربنا اكرمني بي اسره كامله وقفت جنبي ودا إشارة لي انو التوبه في حد زاتها سعاده والطريق الصحيح سعاده
وبعد الناس اتفرقو اولادي واحد قال لي ح انوم مع ماما شيماء وواحد قال لي ح انوم مع ماما شاهندا وانا وعلي رقدنا في غرفتي وقبل م نقعد سمح تلفون علي اتصل وكان المتصل حسااااااااااااام .
يتبع..