رواية أرهقني الفجور الفصل الخامس عشر 15 بقلم نوسه حمد
صفيه قالت لي نوسه انا حاسه انو سعاد دي حامل ما شايفه بطنها كبيره قلت ليها بصوت عالي حامل شنو يا صفيه كدي استغفري انا النوع الما بصدق الشينه علي الناس سريع وبستبعدها وبشوف كل الناس زيي مستحيل اغلطو سعاد قالت لي نوسه قوميني عليك الله البت قطع قلبي بتتالم لمن بتدردق بالارض والناس واقفين اقولو لينا البت دي ودوها الدكتور وفي البسال دي بت منو وسعاد ما فتحت وشها لي زول وابو شهاب اظنو كان ماري بالشارع شاف الناس واقفه وقف عربيتو وجا قال لي مالكم يا بتي ان شالله خير قلت ليهو والله يا ابوي دي زميلتنا واضايقت في المدرسه والمدير كتب ليها اذن وقال لينا ودوها البيت وهي من الالم ما قادره تتحرك بقا يتكلم مع الرجال الواقفين ويكورك فيهم قال ليهم مافيكم راجل قدر يشيل البت دي من الارض لو دي بتكم بتخلوها تكون واقعه كده وحاول يشيلا بس سعاد صحتها سمحه فجاه عيني جات في جلاابيه ابو شهاب ملانه دم وسعاد تبكي قالت لي نوسه قوميني بمشي براي عليك الله قوميني انا وصفيه حاولنا نسندا علينا وهي حيلا كلو نازل تحت لي فوق ما بتقدر تقيف قدرنا وقفناها وخطوتين ما خطتهن فجاه نسمع ليك صوت طفله سعاد ولدت في الشارع انا وصفيه لمن انخلعنا فكيناها في الشارع ومن غير م نشعر جرينا انا الدنيا ظلمت في وشي وقلبي ابا اي شي حتي المدرسه معقوله سعاد دخلنا للمدير قلنا ليهو سعاد ولدت وهو شغال لينا سعاد منو وما تلد كان والده قلنا ليهو سعاد ما متزوجه قال لينا كيف الكلام دا وهي وين وبتقرا معانا هنا قلنا ليهو اي لكن من المدرسه قفلت ما نزلت الا الليله وانت قلت لينا ودوها بيتهم وولدت في الشارع والناس متلمين فيها ونحنا جرينا المدير بقا يستغفر ويتشهد وقال لينا ارجعو الفصل انا ما عايز كلام وسمعه ونحنا دخلنا الفصل لا انالا صفيه فهمنا شي وروحنا طلعت عديل ودقات قلبنا في السماء استاذه منال قالت لينا مالكم حلفنا ما نتكلم قلت لي صفيه الناس ح تخلي المشكله الرئيسيه وح تبقا فينا نحنا ديل وانا طبعا كل ما اتزكر ابو شهاب بطني تطم وخلاص ما ح يخلي ولدو يتزوجني للمنظر الشافو دا صفيه قالت لي انتي هبله نحنا دخلنا في الموضوع شنو قلت ليها خلاص تاني الناس بتشك في سمعه المدرسه بعد خلاص قلنا الفساد راح بس بقاياهو قاعده ويا عالم تاني تكون منو الضحيه انا بعد سعاد بشك في اي واحده في المدرسه لانو سعاد دي لدرجه انو لمن طلعو فيني الكلام ابت تقعد جنبي معقوله استغفر الله صفيه قالت لي والله انا متاكده الورا الكلام دا كلو علا وشلتها وماضيهم القديم ويا نوسه اساليني انا لمن مشيت معاهم الناس ديل بشربو ممنوعات وانتي عارفه لمن الزول يكون ما واعي بعمل اي شي اكيد ديل هم متاكده منهم والمشكله الاولاد المعاهم كبار اولاد جامعات اصلهم ما اولاد ثانوي زينا عشان نقول مراهقه واقصا طموحهم كلمه بحبك لا لا يا نوسه الشافتهم عيني ديل بطمعو وفي حاجات تانيه وانا لو ما شغلت عقلي اليوم داك كان اكون ضحيتهم يا نوسه لكن اسمعيني نحنا لازم نساعد البنات ديل عشان ما يقعو ضحيه قلت ليها نساعد منو فالنفترض يا صفيه قالن لينا مالكن ومالنا وانا شخصيا يا نوسه عارفه الاولاد ديل بتلمو وين وعارفه كمان البساعدهم البواب بتاع الجنينه وتقريبا في الاولاد ديل ولد ابوهو صاحب الجنينه قلت ليها صفيه انا وضعي اختلف احتمال شهاب ما يرضا صفيه قالت لي انا براي بخاف يا نوسه انتي ما شفتي الضلام كيف قلت ليها لو مسكونا يا صفيه لا لا ما نتهور بكره اطلعو فينا كلام الناس كلهم يصدقو نحنا معاهم قالت لي اسمعيني عندي خطه قلت ليها شنو قالت لي انا اموش مثلت لي علا اني خاصمتك الليله بمش اعمل فيها نفسي عاوزه انحرف قلت ليها صفيه لا اسمعيني راجلك بطلقك قالت لي لا راجلي ما بطلقني ما تخافي المهم يا نوسه انا ح اعمل الخطه دي والصباح بحكي ليك فهمتي قلت ليها ظابط ولو لقيتي علا تابت فعلا قالت لي انتي مفتكره التوبه دي ساهله كده كدي النقول ليها انا عاوزه اعمل كده والله ولا تصدق اساليني انا قلت ليها الله يستر عليك انا خايفه قالت لي ما تخافي اها نسكت كده لمن تاني وتالت ورابع تلد واحده ياخ سعاد دي اهلهم ناس محترمين والله وناس علم ماليهم في الطريق دا شوفي سعاد وقعت ضحيتهم الله اقطع المديره الاتسترت علي القصص دي من اولها بت قدرت شربت سجاره غالبها تنحرف والله. اعملن اي شي بس كان همها انها ما تفقد الاداره هسي شوفي المدير دا هارش المدرسه كلها ونسبه النجاح بقت عاليه شوفي الكلام البقولو لينا في كل طابور ما قال انا مدير واكتفي بالاداره بحسو انو شايفنا زي بناتو ومتاكده لو في بت عاوزه تضل الطريق ح تتاثر بي كلامو وتتراجع نوسه المدرسه ما تعليم وبس تربيه قبل التعليم وكل ما صلاه الظهر تجي لو في حصه بقطع الحصص وبطلعونا للصلاه نوسه اعترف ليك انا م واظبتا علي صلاتي الا بعد المدير دا جا وبقا يدينا محاضرات مرات بتمني اقول اريتو ابوي بس ابوي ربنا عالم بيهو الحمد لله عشان كده يا نوسه انا ح احارب البنات ديل ومتاكده لو في واحده ما رفدوها هنا بتسوق باقي البنات زي ما قدرو اقنعوني واقنعو سعاد ومتاكده تسعين في الميه سعاد ضحيتهم وتقولي صفيه قالت
خلصنا اليوم الدراسي ورجعنا البيت انا قلبي في يدي ومنتظره مكالمه شهاب ومنتظره ابوي اجي يسالني بس العصر اتفاجات بي ابوي قال لي ابو شهاب دا قال لينا بعد اسبوع النسوان جاينكم احترت شديد معقوله ما يحكي لي ابوي قلت ليهو تمام والحيرني بليل شهاب اتصل علي وبرضو ما جاب لي سيره قلت معقوله ابو شهاب دا فاهم كده ولا ياربي مالو اتونسنا كتير وشهاب حكا لي انو ح يجو اهلو وقال لي ح تلبسي شنو قلت ليهو طبعا يا شهاب انا ماعندي زوق وخايفه احرجك مع اهلك قال لي تحرجيني شنو عمرها المظاهر ما كانت مهمه بس انا اقصد انو دا يوم مهم جدا بالنسبه ليك عشان كده سالتك تلبسي شنو وهسي ولا يهمك يا غاليه انا بتصرف قلت ليهو لا لا ما تتصرف خليني بتصرف انا قال لي نوسه يلا انا طبعي لو قلت حاجه لازم اعملها مابحب الجدال انا عرفتك انك عزيزه شديد بس ممكن ما تستعملي الاسلوب دا مع الح يكون ابو اولادك ولا عندك راي تاني قلت ليهو طيب تمام وبقينا نتونس كتير ونومتا متاخره
الصباح طلعت المدرسه لقيت صفيه منتظراني جنب الباب ومن الشارع في المدرسه الحيط ملانه كلام كلو قيم واخلاق ياحليلو المدير بي اي طريقه عاوز يحسس البنات الراسهن قوي دا وفي الطابور وقفنا ساعه بقا يتكلم كلام مبالغه بقا يقول لينا مافي فايده من التعليم اذا مافي اخلاق والبت اهم شي تكون عندها اخلاق وطالعه من بيت رجال وما تنزل سمعه ابوها واخوانها الارض بي تفاهات الدنيا واي شي ملحوق وعمرو الفجور ما كان ميزه حلوه البت تفتخر بيها البت اول ما تتخلا عن الحياء انعدمت الحياه عندها لازم تحافظن علي نفسكن وتكونن فخر لي اهاليكم وما تتعبو المعاصي كلامو اثر علينا كلنا حسيتو شايل الهم ما عاوز يفشل فينا بس هو ما عارف البنات السوابق قادرات يتلفن جيل كامل لانو الفجور جاري في دمهم بقيت اقول لي صفيه في الكلام دا قالت لي اصبري ي نوسه اخلص اليوم ولا فسحه الفطور واحكي ليك بقيت منتظره الفسحه بفارق الصبر مشينا فطرنا سوا وصفيه قالت لي ماقلت ليك علا اخر واحده تتوب قلت ليها كيف قالت لي قلت ليها انا زهجانه نفسي اغير جو ومانفسي في شي الا جلسه زي حقتكم ديك انتو تشربو السجاير وانا استنشقو اكتر منكم قعدت تضحك قالت لي معقوله قلت ليها جد نفسي قالت لي طيب هاك السجاره دي وادخلي غرفتنا القصاد الباب دي اشربيها قلت ليها لا لا انا عندي الاذمه بس عاوزاكم انتو التشربو وانا اشمها وبيني وبينك اشتقت لي علاء قالت لي انتي ما عاقدين عليك قلت ليها انتي عارفه اني ما بحبو وبحب علا قالت لي تمام بكره المساء نمشي وطلعت تلفونا وبقت تتكلم ليها مع واحد قالت ليهو بحول ليك قروش ظبط الجو وصوت التلفون كان عالي قال ليها ان شاء الله الجديده تكون مزه قالت ليهو لا قديمه دي قلت ليها يعني شنو يعني الناس ديل لسه قالت لي طبعا وسبحان الله يا نوسه خطوبتك علي خير علا كانت عاوزه تقودك لنفس الطريق وانا متاكده انك بي ارداتك ما ح تمشي بس علا ما بغلبها السبب البتوديك ليهو لو قدرت تقول ليك ابوك هناك بتسوقك بتسوقك اسالي مجرب قلت ليها مبالغه قالت لي المهم ي نوسه انا الليله ماشه معاك بيتكم عاوزه اتصل لي خطيبي ولا العاقد علي دا واحكي ليهو قلت ليها مفتكراهو ح يخليك انتي غبيه قالت لي بتصرف قلت ليها صفيه نسيتي ابوك والله يقتلك قالت لي ابوي الايام دي عيان قلت ليها تمام المهم خلي بالك من نفسك قالت لي ان شاءالله يا نوسه البنات ديل لو طلعن فيني اي كلام انتي شهوده علي اني ماقصدي امشي في طريقهن وطبعا يا نوسه قصه سعاد ملت الحله والاغلبيه قالو السنه الجايه ما بنزلو بناتهم فيها اظننا ح نكون برانا يا نوسه نحنا والغلابه الزينا الماعندهم قدره للخاص قلت ليها حرام عليهم شوفي المدير دا تعبان قدر شنو وانا والله لو بقيت براي ما بخلي المدرسه طالما واثقه في نفسي واهلي واثقين في تربيتهم لي قالت لي وانا كمان قلت ليها تمام انتي حاولي وقعي الشله دي وانا ح اقدر ااثر علي البنات واخليهم ما يتحولو من المدرسه دي مهما حصل دي مدرسه عريقه من زمن جدودنا معقوله قله ادب بنات تمسح تاريخها قالت لي اصلا البنات شايفاتنك قدوه بالنسبه ليهم قلت ليها ان شاء الله اقدر ااثر عليهم قالت لي ان شاءالله وما ننسا قرايتنل المره دي عاوزه انافسك يا نوسه قلت ليها اساسا انتي شاطره بس علاء دا الرجعك لي ورا قالت لي دا ماضي ورميتو وراي
نهايه اليوم مشت معاي البيت واتصلت لي العاقد عليها وفهمتو الحاصل قال ليها مستحيل تمشي وشكلو واعي بقا يتفاهم معاها وهي تقنع فيهو انها لازم تكشف حقيقتهم قال ليها علي شرط انا اكون معاك قالت ليهو كده ح يخافو مننا قال ليها طيب انتي امشي ووصفي لي المكان ما عليك وكانك ما بتعرفيني كويس قالت ليهو تمام قلت ليها راجلك شكلو فاهم قالت لي فاهم ورومانسي لكن ابوي الله ادي العافيه ما مديهو فرصه
قلت ليها م عارفه بس ابوك دا مكيفني كيف اجيكم كيف ويعديها ونسه ودخله ومرقه والله اخليهو اجيكم ما بسوقك خليهو متشوق كده قالت لي طبعا يا نوسه انا ما ح اعرس نهاي الا بعد اخلص تالته نفسي ازيعوني قالت لي وانتي قلت ليها ما عارفه والله البقولو عليهو موافقه عليهو قالت لي ربنا يسعدك غايتو حظو شهاب وكدي وريني صورتو قلت ليها ما رسل لي والله المره الجايه بصورو ليك قالت لي تمام وودعتني وفاتت قالت لي بكره بحكي ليك والله يسترني وفاتت
تاني يوم مشيت المدرسه صفيه ما جات اليوم كلو منتظراها ما جات نهايه اليوم خوفتا عليها وقلبي اكلني ومشيت ليهم في البيت امها قالت لي صفيه ما معاك قالت ماشه ليك بليل وتاني ما جات راجعه وابوها من امس عيان علي واتكلم بره من راسو وما عارفه اتصرف كيف انا غلبني البقولو قلت ليها اي صفيه معاي والصباح فاتت المدرسه وانا الليله كنت عيانه ي داب جايه من المستشفي قلت اغشاها اشوف ادوهم شنو ومشيت منهم قلبي ادق وأعصابي كلها بايظه وغلبني البعملو اتزكرت الولد العاقد عليها اتصلت ليهو مني اتصلت في تلفونو لقيتو مغلق وخلاص راسي داير انفجر والف سؤال في راسي ودموعي ما وقفت ياربي اكون الولد العاقد عليها دا كسبها فرصه وساقها معاهو ولا ناس علا اكتشفوها وعملو فيها حاجه تتوقعو الحاصل علي صفيه شنو …….يتبع..