رواية أرهقني الفجور الفصل السابع عشر 17 بقلم نوسه حمد
صحيت الصباح مشيت المدرسه لقيت صفيه منتظراني جنب المكان البتقيف لي فيهو وانا العبره كانت خانقاني بقيت حاضناها وابكي قالت لي اقسم بالله عرفتك ح تكوني م كويسه وانا قلبي فيك انتي ويوسف نوسه ما عارفه اقول شنو بس علا دي شيطان حمانا الله منها موش مشيت منك ع اساس انو ح نمشي الجنينه تفاجئني ليك بي ودتني بيت في القريه الجنبنا بيت سمح سماحه ما عاديه وسيدو غنيان بس قالو ما متزوج بس اتزوج كيف وهو غرقان في الحرام نوسه الزول دا ساطلها سطله ما واعي من شافني اتعابط فيني وعلا بت الحرام ما عارفاها شربتني شنو انا ما وعيت الا وانا في بيت ناس علا وهسي انا خايفه ما عارفه اكونو عملو فيني شنو حسبي الله ونعم الوكيل فيهم قلت ليها كيف يعني قالت لي ما عارفه صحيت لقيت نفسي في بيت ناس علا وجسمي كلو مخدر ي نوسه ماشه انقذ بنات بلدي شكلي اضررتا انا وخايفه شديد ومافاهمه اي شي ولو حصل علي حاجه اقسم بالله يا نوسه انا علا والغيرها ما برحمهم قلت ليها طيب نمشي لدكتور نتاكد ماف زول لمسك قالت لي نوسه مستحيل انا اعمل كده ربنا يسترني بس اشهد الله ما بي ارادتي ودموعا نهاي ما وقفت قلتا ليها صفيه قطعتي قلبي اريتني مشيت معاك علي الاقل نتسند بي بعض قالت لي حصل خير بس جد ما واثقه انهم يكونو ما عملو لي شي عيون صفيه كانت بتقول انو حصل عليها حاجه بقت متخوفه من الولد العاقد عليها قلت ليها علي فكره تلفونو ما بدخل معاي قالت لي بعد نخلص بنرجع ليهو انتهينا اليوم الدراسي ورجعنا البيت لقيناهو متصل علينا سبحان الله وكان شفقان علي صفيه وصفيه كانت منهاره وحكت ليهو اي شي وهو يشيل ويتحلف ليها وقال ليها تطلعي توصفي لي البيت ولا اقتلك انتي زاتك معاهم ولو ما عاوزه توريني انا بعرف بي طريقتي حسيتو منفعل شيلت منها التلفون قلت ليهو صفيه ما عندها ذنب قال لي صفيه مالا ومال بنات الحله حريقه فيهن كلهن بنات فاكات وما محترمات اعملو ليهن شنو في بت رجال بتباري الرجال نص الليل يا صفيه تطلع توصف لي البيت يا انا بتصرف براي وان شاء الله اضيع فيها قلت ليهو عليك الله اهدا شويه الموضوع دا ح يتحلا
انا اتكلمت مع خطيبي وقال ح يبلغ معاهو شباب الجامعات والمعاهد العليا في حلتنا ويعرفو الحاصل شنو وليه بالذات مستهدفين بنات الثانوي انت ممكن تخت يدك معاهم وكلكم تتفقو عليهم وتوقعوهم بالبنات المعاهم قال لي ما عندي مشكلة بس والله العظيم لو صفيه دي جااها صداع بسببهم اقسم بالله اولع فيهم بي جاز قلت ليهو ان شاء الله ما يحصل مكروه انت بس ما تنفعل ح تخرب اي شي قال لي تمام خلي صفيه كل مره تتصل علي منك وخلي بالك منها صفيه ما عندها اخت قلت ليهو انا اختها ان شالله قفلنا آلخط وصفيه كانت تبكي قالت لي اول مره احس انو في انسان بخاف علي وما ندمانه اني اتزوجتو قلت ليها الحمد لله وربنا اتم ليكم علي خير قالت لي امين وعقبالك بقينا نتونس وقالت لي علا بعد انتهت مني ح تقبل عليك قلت ليها لا اطمني طوالي ح اعمل فيها ما فاهمه شي وح احرجها وانتي قالت لي انا لو لقيتا في النار ازيدا حطب بت حرام دي اصلها حركاتا ما حركات بت حلال يعني عشان هي ادمرت عاوزه تدمرنا كلنا قلت ليها اصلا الزول الكعب بحاول يفسد كل الحوالينو عشان كده علا لو م وقفت عند حدها كتار ح تضيعهم طلعوهن من المدرسه وما بخلن البعملن فيهو قالت لي زكرتيني لاقتني معاهم بت شفتها في ثانيه متوسط بت كده قاتله حيلا تقولي مسكينه بس جواها واحده فاجره ما بنسا شكلها وهي يد ماسكه بيها الشيشه واليد التانيه سجاره لهفانه للتعاطي قلت ليها اسمعيني بكره نمشي ليها قالت لي اصلا ما ح اخليها صفيه ودعتني وفاتت وقالت لي جمله عمري ما انساها قالت لي ممكن تخلينا اخوات لمن نموت ولو حصلت علي حاجه ما تخليني براي حضنتها وبقيت ابكي قلت ليها اوعدك ح اكون ليك اخت وسند فاتت ودموعا نازله قطعت قلبي شديد امي قالت لي مالا صاحبتك تبكي حكيت ليها بس ابوها عشان امي لو عرفت الحقيقه ح تجنني اتاثرت شديد وقالت لي ابوك بقيف معاهو قولي ليها ما تبكي في كلامنا داك ابوي جا داخل قال لينا خير مالكم واقفين كده امي قالت ليهو صاحبت نسيبه مرقت تبكّي ابوها عيان مرت ابوهو شالت حقو وخلتو ما واعي ورافض يتعالج قلتا ليها كلمي ابوك يقيف جنبو قال لي طوالي لو حابه العصر نمشي ليهم وما بقصر منو لو الدنيا حرمتو من اخوانو ح ابقا ليهو اخو قلت ليهو ما بتقصر يا ابوي دخلت غرفتي وكنت تعبانه حاولت انوم غلبني بالي مشغول علي صفيه اتاثرت شديد لانو لو حصلت ليها حاجه ح تبقا مصيبه لقيت شهاب مرسل لي رساله قال لي بعد تفضي ارجعي لي اتصلت عليهو قال لي الغاليه كيفك قلت ليهو الحمد لله انت كيفك قال لي تمام بس ما حاسيك تمام صحبتك جات قلت ليهو جات بس في قصه غريبه حصلت قال لي شنو حكيت ليهو بالحصل علي صفيه قال لي نوسه اسمعيني نهاي ما تطلعي من البيت لاي سبب والبت الاسمها علا دي لو جاتك تطرديها عديل عشان انا ما ادخل في الموضوع قلت ليهو حاضر يا شهاب اصلا صفيه قالت لي نهاي ما تتكلمي معاها قال لي تمام انا اتواصلت مع صاحبي من الحله وفهمتو اي شي بس عاوزاك تسالي لي صفيه من حاجات بقولهم ليك قلت ليهو حاضر قال لي اتاكدي علاء كان معاهم المره الفاتت ولا لا والبيت وين بالظبط واسم الراجل انا عرفت الولد الابوهو عندو جنينه ودا خلوهو علي بس يا نوسه حزرتك نهاي ما تطلعي من البيت عاوزك الفتره دي تركزي في امتحاناتك وقرايتك حاصل اي شي اتصلي علي قلت ليهو حاضر وكدي خليك من دا ما اشتقتي لي غلبني اقول بس اشتقت ليهو قال لي حاسي بيك اشتقتي لي صاح قلت ليهو اي قال لي وانا كمان والايام دي عارفك ممتحنه انا عاوزك تركزي قلت ليهو حاضر بعد تخلصي الامتحانات تعملي الواتساب ممكن قلت ليهو حاضر قعد اضحك قال لي انتي اصلا مطيعه كده ولا شنو قلت ليهو لو حاجه ما عاجباني بقول ليك لا ما بخجل قال لي دا العاوزو ومن هسي اي شي ما بعجبك ما بعملو مالقيتك بالساهل شهاب كلامو حلو وحسيت نفسي بقيت احبو بس شكلو نسيتو عديل خجلانه اقول ليهو لكن عشقت صوتو
تاني يوم مشيت المدرسه لاقيت صفيه كانت زعلانه لي حاله ابوها قلت ليها ابوي عاوز يجيكم وقال ما بخليهو براهو قالت لي عارفه يا نوسه انا اكتر شي قاتلني انو ابوي لا اخ لا صديق لا جار ما بسال عليهو ولا كان بتردد علي الجامع عشان علي الاقل يفقدوهو ناس الجامع قلت ليها ما تشيلي هم يا صفيه يبقا كويس وشهاب قال ح يكلم صاحبو الدكتور داك الوقف جنبي لمن بقيت افتش لي براءتك قالت لي بلاي دا صاحبو قلت ليها اي وابوي منو ما بقصر اصلا ابوي بجي بدري من الشغل مرات وبقعد معانا تاني بنخليهو يجي يونس ابوك الدنيا من غير رفيق ما تسوا شي قالت لي فعلا والله وامي بسبب مرض ابوي مافي مره بتجيها داخله البتجي كلها بطردها قلت ليها عارفه انا طردني كم مره بس لمن عرفت الحاصل عليهو نهاي ما زعلت وفي مره كده سكاني بالعكاز قالت لي اي اصلو كده هسي اهل امي نهاي ما بجو شبه انعزلنا من العالم اخواني الصغار مسكتهم عقده الشفع البجوهم بطردهم وما بخليهم يطلعو قلتا ليها خففي عليهم انتي ان شاء الله العبي معاهم لمن تفرج قالت لي انا اخفف علي امي القهرتا الدنيا وهي معاقه ولا اخفف علي اخواني ولا ابوي الما عارف هو زاتو منو قلت ليها فتره بتعدي وغايتو ما عارفه لكن مرت ابوهو دي ربنا ح ينتقم منها قالت لي ع فكره خطيبي دا ولد اخو ابوي الوحيد اللمن عرف الحقيقه بعد منهم وحالتو الماديه عاديه بس من عرف الظلم الانظلمو ابوي حارب امو واهلو ولا بمشي ليهم وديك متمتعين بالعز قلت ليها حق الحرام ما بدوم بالذات تعب ابوك وشقاهو ياريتو لو اشتغل براهو ما اشتغل في حق ابوهو لانو الضرات ديل ما عندهم ضمان ممكن عادي ابوك اعملو فيهو اكتر من كده قالت لي اكتر من كده الا يدوهو طلقه في نص راسو هسي دا ما موت قيد الحياه وابوي استسلم والمرض سيطر عليهو لو اتعالج كان يكون عادي قلت ليها بالمناسبه انا ح احكي لي شهاب بي الحته دي عشان بحجه انو مريض هسي اقومو يوصفو لينا طبيب نفسي ومن غير ما يحس يعالجو ابوك لو شما العافيه يوم صدقيني تاني براهو بمشي للدكتور قالت لي فكره والله طبعا سعاد شكلها نزلت المدرسه والمدير رفدها ولاقيناها طالعه جنب الباب ودموعا مغرقاها قطعت قلبنا مشيت عليها قلت ليها سعاد حسيتا متوتره شديد لامن بترجف وزي الجاتا حاله نفسيه بقت تقول لينا انتو ما احسن مني وانا ح ارجع اقراء واتزكرو كلامي دا كويس وح اجي الاولي عليكم قلت ليها ان شاءالله يا سعاد والله متمنيه ليك الحاجه دي عاينت لي بي استفزاز قالت لي ما تدعي المثاليه مصيرك في يوم تقعي وقعتي طالما علا صاحبتك حسيت انو علا كانت سبب في الحاصل لسعاد بس كيف قلت ليها سعاد اسمعيني انتي الحصل ليك شنو قالت لي عاوزه تشمتي علي قلت ليها اقسم بالله لا عاوزه انقذ غيرنا قالت لي ابعدي من علا وانقذي نفسك انتي مفتكره الحصل لي دا بيدي ولا بس ارادتي وحكت لينا قصه مشابهه لي قصه لمن فاتت معاها صفيه وضربات قلب صفيه بقيت سامعاها وانا زاتي اتوترتا طلعت من المدرسه وطلعت ليها سجاره من شنطتها في نص الشارع بقت تشرب فيها والناس تعاين ليها في اللحظه دي حسيت انو سعاد عينا انكسرت وبقا ما فارق معاها شي تشرب سجاير يرفدوها وزي الجاتا نفسيات ربنا يصلح حالا صفيه قالت لي نوسه اسمعيني علا لو جاتك اطرديها ممكن تكب ليك شي في عصير وتوصلك للانحنا وصلنا ليهو دا انا هسي ما عارفه مصيري شنو ياربي ما يكون مصيري زي مصيرها ومصير سعاد انا لو بقيت زيهم احسن لي اموت يا نوسه ولا بنتظر لمن الد والفضيحه تملا الحله حسيت انو صفيه شكت انو اكونو عملو فيها حاجه قلت ليها صفيه اتزكري اي شي قالت لي نوسه والله العظيم ما بتزكر اي شي انا من الشفتو ساي دوختا والله
شهاب تاني يوم رجع لي وقال لي علي فكرة انا واجهتا علاء عديل ونكر الكلام دا قال انتو بتهيأ ليكم قلت ليهو كذاب والله قال لي اصلو كذاب حسيت من نبره كلامو وفي بت اسمها رغده بتعرفيها قلت ليهو طويله كده قال لي اي ياها زاتا قال لي يلا دي سبب اي شيء وشكلو علا دي وقعت ضحيتهم والشي العرفتو للاسف البت دي سافرت دبي هي لو ما بت كعبه تمشي دبي براها في العمر دا قلت ليهو اعوذ بالله منها قال لي شوفي يا نوسه انا ح اجي وح امشي بليل الجنينه بتاعتهم دي واي شي تسمعي ما تصدقي انا ما براي معاي مقداد دا العرف يصل لي حاجات كتيره واول ما انزل عاوز الاقي المدير قلت ليهو خايفه عليك قال لي انا الخايف عليك انا ماعندي شي اخسرو عشانك انتي وعشان بناتي في المستقبل لازم البنات ديل يتأدبن لو اهلم ما عرفو يأدبوهم نحنا بنأدبهم بنات ما تمن العشرين سنه يطلع منهن كل الكلام دا قلت ليهو والله لمن اتزكر بحس اني في حلم بس الله يستر قال لي بالمناسبه عارفه بواب الجنينه منو قلت ليهو منو قال لي غفير مدرستكم لمن اتعوذتا قال لي ما تركزي خلينا فيك انا بعد بكره نازل جايب معاي حاجات الخطوبه كلها وبقعد يومين وبرجع ان شاءالله خلال اليومين ديل ح اصل لشي في الموضوع دا قلت ليهو تمام
بعد يومين شهاب ما قال لي انا جيت اتونس معاي لاخر لحظه وكنا في المدرسه سمعت البنات قالو في ولد وجيهه مع المدير حسيت مجرد احساس انو شهاب قلت لي صفيه دا شهاب قالت لي قالو وجيه ما لي درجه شهاب قعدت اضحك قالت لي وارح نشوفو مشيت معاها دايرين نلف شهاب لقيناهو يتكلم مع المدير وفي وشنا انا خشمي ما فتحتو صفيه قالت لي نوسه دا هو قلت ليها اي قالت لي معقوله نوسه انتي جاده قلت ليها البخليني اكذب شنو والله دا شهاب وكان بعاين لي واتبسم لمن المدير سكانا بالسوط وشهاب مات بالضحك قلت لي صفيه كلو منك هسي شهاب يقول علينا شنو قالت لي يقول شنو يا بت نحنل لافين في حوش المدرسه والمدير زاتو ليهو مراد في بيوتنا الحقنا ويأدبنا قلت ليها دا لو كان من زمان المدرسه دي كان تكون عريقه قالت لي هي اصلا عريقه وع فكره كل الحاصل في المدرسه دي سببو المدارس الخاصه وعشان اوريك انا المرتين المشيت مع علا لاقيت بنات منها وولد برضو شغال استاذ فيها ودا الحاول يلمسني والشي الما قادره اثبتو الراجل المشينا بيتو داك حاساهو هو صاحب المدرسه الخاصه المنافسه لي مدرستنا الحكوميه قلت ليها معقوله قالت لي شنو الما معقول بنات المدرسه الخاصه ديل جلابه لمن بهناك واهلن زاتهم ما شغالين بيهم نجحو ما نجحو ما بفرق معاهم ولمن حصلت المشكله القفلو فيها المدرسه شفتي نص المدرسه سجلت فيها بس الناس الشطار نهاي ما مشو قلت ليها دي حاجه كويسه نحنل نثبت ليهم انو المدرسه دي ح تكون عريقه حتي لو شوهو سمعتها ومن هسي تالته دي نتفرق نهاي بس الخوف شهاب يقول العرس قالت لي وانا كمان بس مافي عرس بمنعنا النجاح قلت ليها فعلا والله خلينا نتكلم مع المدير نعمل قروبات من هسي حسب المستويات والمستوي الاول يشارك الاساتذه في القرايه قالت لي تمام نشوف البحصل شنو
شهاب جانا في البيت وكنت مبسوطه بس امي نهاي ما عاجبها انو يجينا ليها مراد تطردو اتونس معاي شويه وطلع وقال لي اجتهدي في الايام دي وعلي فكره لقيت المدير عارف كلام كتير شديد بس ما عارف يعمل شنو وانا الليله ح امشي اشوف الحاصل شنو ودعني وفات قلبي بقا فيهو نوم ما جاني وضربات قلبي زايده لبستا وطالعه للمدرسه لاقتني علا قالت لي العروس طبعا جيت اوريك خطيبك ورتني صوره كده شهاب جنبو بت بهنا وبت بهنا قلت ليها اسمعيني شيلي شهاب من راسك وخليني في حالي قالت لي عاوزاك تجي معاي وتشوفي خطيبك العامل فيها محترم دا ………يتبع.