رواية أرهقني الفجور الفصل الخامس والعشرون 25 بقلم نوسه حمد
قلت ليها صفيه استحملي صدقيني الحق ح يظهر ام سعاد رفعت قضيه في الشله كلها وانا مشيت كتبت اقوالي ومن ضمن اقوالي كتبت انو انتي حصل ليك غصبا عنك وكتبت انك اتزوجتي وبسببهم عايشه في جحيم صدقيني الحق ح يظهر والناس ديل ح يتكشفو وبعد زوجك يعرف الحقيقه انا متاكده يا صفيه ح يندم علي اي لحظه زلاك فيها واهانك قالت لي نوسه انتي م جاده يابت لو مفتكره الراجل الشافتو عيني دا بقع اكون كذبت عليك يابت دا يدو واصله بطلع منها زي السلام عليكم وكل الشله والمعاها ح يقعو وح يصفونا بالعاهرات زي م حصل المره الفاتت والقضيه ح تتلم وتقولي صفيه قالت صفيه ما تابعت كلاما زوجها جا ساقها وحسيت انو ممكن زي ما قالت الناس ديل ما يقعو وتكون المشكله قايمه وفساد يتوارثو الأجيال حسيت بقهر ما طبيعي اتمنيت ف اللحظه ديك اكون انا القانون واعاقب اي انسان اتعدا حدود علي بت قاصر ويوصلها لمرحله الفجور بس الحمد لله شهاب اتصل علي قال لي اجهزي نحنا ح نسافر قلت ليهو طيب وامي كانت بتجهز لي في حاجاتي وبتوري فيني ونهاي ما قادره تعاين لي ودموعا بللت شنطتي وحاجاتي قلت ليها يمه عشاني ما تبكي حاولت تمسح دموعا وقالت لي ما تبكي ح تخربي مكياجك دي دموع الفرح ما هاين علي فراقك وما اتوقعت انك تفارقيني بدري كده قلت ليها يمه انا ح اجيكم كل فتره مع شهاب قالت لي ربنا يسعدك خلي بالك من نفسك ومن راجلك ونصيحتي ليك حبي اهل راجلك قبل راجلك واحترميهم ما بقصرو منك وكان سمعتي شين مشي يابتي الدنيا ياها حالا يوم حلو ويوم كعب وعادي ما وقفت بتمشي هوني علي راجلك كل ظروفو واقيفو جنبو وخليك ست بيت شاطره اخدميهو بعيونك ونصيحتي ليك بلد ما بلدك ابعدي فيها من الصحبه والاختلاط بي ناس ما بتعرفيهم ما تفتكري الكوارث بتقع علي البنات بس ممكن انتي متزوجه تحصل ليك الف مشكله خليك حزره وما تدي الثقه لادي زول واسمعي كلام راجلك ما بقول ليك خليك نجيضه وشيلي قروشو واعملي دهب اعملي القلتو ليك دا بي رضاهو ح يملأك دهب وما بقصر منك ما تحسبيها ماديا عيشي مستوره قلت ليها حاضر يمه ابوي جا قال لي راجلك جا برا وابوي اكعب من امي بقا يبكي باعلي صوت لمن كلهم جو جارين وقدرو فكوني منو بالعافيه حسيت قلبي انقسم النص اصعب فراق فراق الاهل بس دا المصير وسافرنا والشارع كلو ابكي كل ما اتزكر منظر ابوي اقعد ابكي وشهاب بطبطب علي وبقول لي معليش حقك علي حبيبتي والمسافه كانت بعيده وانا ببكي نومتا وكنت بتنهف من البكا لغايه ما سمعت صوت شهاب بصحي فيني قال لي وصلنا ونزلت من العربيه ونزل الشنط وفتح الباب دخل العربيه وجا ساقني قال لي دا بيتك ان شاء الله تمليهو بالعيال انا بقيت مخلوعه معقوله من بيت طين لبيت فخم كده قال لي تستاهلي تعيشي في قصر لانك اميره شهاب كان كلامو حلو شديد حسيت نفسي في حلم جاتني لحظه قلت انا لو ما اتزوجتا كان اكون لسه في المرمطه والقرايه وتاني الجامعه وداخليه والله اعلم منظري ح يكون كيف صحي الزواج ستره وتعليمي بكملو حتي لو متزوجه لانو عندي حلم دخلنا جوه وكان مفروش فرش رهيب وكل تفاصيلو حلوه قال لي نسبه للظروف الحاصله ماقدرت اطلع ليك جواز وعرسنا جا فجاه رايك شنو بكره نبدا اجراءات الجواز وبطلع في اسبوع نسافر اي مكان تحبيهو قلت ليهو نفسي امشي السعودية عمره قال لي تامريني انتي قلت ليهو انا بحمد ربنا انك في حياتي قال لي انا بحمدو ليل نهار انو ربنا قسمك لي واوعدك يا نوسه تلقيني اب قبل زوج وتلقيني سند واعوضك عن اي تعب وزعل عشتيهو في حياتك قلت ليهو وانا كمان بوعدك اني اسعدك طول ما انا حيه وما ابعد منك قال لي وجودك اكبر نعمه وبقا يتغزل فيني ودي كانت اول مره في حياتي زول يتغزل فيني بالطريقه دي لمن خجلتا وبقيت ارجف قال لي انا جيت عشان اطمنك ما اخوفك
مرت الايام وحجزنا وقبل نسافر اصحابو في الشغل عزمونا كانو بنات واولاد نظيفين شديد والعجب البنات مبالغه كل مره اسرح واقول معقولة خلاهم كلهم وعاين لي وطبعا تعاليقهم كلها اني صغيره ولسه قاصر وبقو يسألو في شهاب دي عملتها كيف وردود شهاب كانت كلها فهم وكان طول قعدتنا قاعد جنبي وماسك يدي وانا زاتي بقيت فيهو اعبط منو عدينا لحظات حلوه ورجعنا البيت والصباح سافرنا السعوديه ونزلنا في فندق اول يوم نومنا لانو كنا تعبانين في السفر وتاني يوم مشينا ادينا مناسك العمره وكانت اجمل لحظات عمري وعمري ما ح انساها وبقيت ادعي ربنا انو يظهر الحق ويستر صفيه ويرحم سعاد ويغفر ليها نسيت نفسي ادعي ليها شهاب جا وقف جنبي وبقا يدعي لينا دعواتو كانت حلوه شديد الفرحه الدخلت قلبي يوم عرسي مافرحتها وعدينا اجمل ايام ومشينا زرنا اخواتو كانو بنات فاهمات وواعيات شديد حتي اطفالهم بتعاملو بطريقه هاديه ومريحه شديد اتمنيت اعيش نفس استقرارهم دا وعدينا ايامنا ورجعنا السودان وتاني يوم شهاب قال لي ح ينزل شغل بكيت قدرتي قال لي نوسه لازم انزل في عمليات اتأجلت بسببي وما صاح اقعد اكتر من كده ماقدرت استوعب فراقو نهاي لاني من اتزوجتو كان مالي علي البيت قال لي عشان ما تزهجي اكتر في مدرسه جنبنا قريبه ح انزلك فيها تمتحني الشهاده السودانيه فرحت شديد وشكرتو قال لي نوسه انا وعد اخليك تكملي تعليمك لغايه ما تحضري الدكتورا شكرتو شديد قال لي تاني ما تشكريني دا واجبي
تاني يوم شهاب نزل الشغل واتصل علي قال لي بجي اتغدا معاك جهزت الاكل ونظفت البيت وجهزت نفسي وانتظرتو لمن جا قال لي ما بتكوني اشتقتي لي قلت ليهو انا اشتقت ليك قبل تمشي الشغل جهزت ليهو الاكل والحمام قال لي عندي ليك خبرين الاتنين ح يعجبوك كنت متشوقه اعرف انتظرتو استحما وصلا وجا عشان ناكل قلت ليهو احكي قال لي الخبر الاول انا سجلت ليك في المدرسه بعد ناكل ح نمشي السوق نشتري ليك شنطه وكراسات وملابس قلت ليهو عاوزه امشي بي عبايه ممكن قال لي ممكن شكرتو قلت ليهو ربنا ما يحرمني منك قال لي الخبر التاني قبيل كنت بتكلم مع الضابط وقال لي قبضنا علي البنات وانكرو وجود راجل معاهم وانجبرنا ناخد اقوال صفيه وزوجها رفض بس غصبناهو وشيلنا اقوالها واكدت انو كان معاهم راجل وبعد تحريات وتحقيقات اكتشفنا الراجل دا متزوج ام علاء بعد وفاه ابو علاء وهو صاحب المدرسه الخاصه المنافسه للمدرسه الحكوميه والكلام دا اكدو لينا مدير المدرسه الجديد بعد اخر اخبار المدرسه بقت فيها مشاكل كل أولياء الامور خافو علي بناتهم وحولوهم للمدرسه الخاصه ودا كان الغرض من الاول والقضيه متشربك فيها علاء وراجل امو وامو وماقادرين يصلو ليهم لانو اول ماقبضو علي البنات شكلهم عرفو مصيرهم بس هانت والكل ح ياخد جزاتو وعشان ننصف الحق عاوزين نعمل حلقه في التلفزيون عن المدرسه الحكوميه والمأمره الحصلت فيها والفساد والاسباب ونطمن قلوب أولياء الأمور عشان المدرسه تواصل تعليم انا بقيت مندهشه وكنت حاسه بحاجه زي دي لانو فتره قفلو المدرسه كانو بحاولو يخلونا ننتقل للمدرسه دي رغم انو الحصل كان سلوك طالبات جابوهو من بره م من المدرسه والظلم وقع في كل المدرسه حتي التهم كانت تحاوط كل البنات بس الحمد لله الحق ظهر وعقبال ما يقبضوهم وينالو جزاهم وسالتو من صفيه قال لي ما تشيل هم انا ح اجيبهم وح اخلي علا تحكي اي شي قدامهم فرحت شديد نفسي صفيه تتنصف وزوجها ما يعاقبها
مرت الايام واتصلت علي صفيه شكرتني قالت لي الحمد لله يا نوسه ربنا انصفني وما بنسا وقفتك جنبي الضابط حكا لي وشفتي ي نوسه المصايب قلت ليها طبعا انا مندهشه قالت لي مصدومه في علاء قلت ليها العجب انا طلع بتاع كلام ساي قالت لي الحمد لله ما عندي نصيب انا اطلقتا وجيت اهلي ……..يتبع.