رواية أرهقني الفجور الفصل الثاني عشر 12 بقلم نوسه حمد
كلام علا خلانا انا وصفيه في دهشه ما يعلم بيها الا ربنا علا قالت ح تمشي ونتلاقه تاني صفيه قالت ليها تمام انا قاعده شويه حسيت صفيه عاوزه تتكلم قدمناها حدي الباب ورجعنا صفيه ما مستوعبه القصه قالت لي نوسه في شي قلت ليها كيف يا صفيه قالت لي كلام علا ما صدقتو قلت ليها صفيه المؤمن صديق نحنا ليه نخلي الشك يدخل قلبنا استغفري قالت لي شك شنو يا بت بما انو اليوم يوم صراحه احكي ليك السبب الخلاني ما اصدقها قلت ليها شنو قالت لي موش انا كنت مايله لي استاذ علاء والبنات كلهم كانو حاسين قلت ليها اي قالت لي قبل ما اتعرف عليهو كنت بعاين ليهو من بعيد لغايه يوم كنت بتأمل فيهو شديد وكنت واقفه معاي بنات لدرجه انو حسيت اني واقفه براي والبنات ما شايفاهم بس بعاين لي استاذ علاء كان بشاكل في بنات واظنو البنات المعاي فاتو فجاه علا جات خلعتني قالت لي ما بظهرو كده يا هنايه حاولت اتهرب منها بس عيوني فضحوني قلت ليها لا انتي فاهمه غلط قالت لي غلط شنو وانتي عيونك كلها قلوب اسمعيني الحب ما بندسا رايك شنو اخليك تتعرفي عليهم طبعا انا بقيت مخلوعه وبعاين لي صفيه قالت لي اصبري خليني اكمل المهم علا قالت لي رايك شنو العصر اخليك تتعرفي عليهو قلت ليها كيف قالت لي كيف دي خليها علي انا المهم العصر لبستا وانتظرتها ساقتني الجناين الورا الحله اول مره في حياتي امشي ليهم اليوم داك رغد مافي المهم يا نوسه مشينا تحت البحر وفي بواب الجنينه خاتين عندو حاجاتهم دخلو شالوهم وفرشو فرشاتهم وعملو القهوه وشربو شيشتهم انا رفضت ادخل اي شي في خشمي خوفتا وفي ولد معاهم اول مره اشوفو حاول يقرب مني طوالي قلت ليهو اياك تمد يدك علي وعلا دي زاتا معاها واحد تقولي مرتو اتغزل فيها وكل دقيقه امسك يدها وتتنايص فيهو وعلاء قاعد انا طبعا كل شي طار لي بقيت في الحاجه البتطلعني من المكان دا بسلامه وطبعا المكان بقا ظلام نور خافت والجنبي منو ما عارفه وبدو يشربو حاجه كده انا مفتكراها عصير لقيتا حامضه فهمت انو دي خمره قلبي بقا ادق حسيت نفسي في بيت دعاره يا نوسه طوالي مشيت علاء بقا اقول لي انتظري يا بت مل تمشي براك وانا بقيت ابكي ومشيت وعلا ولا جايبه لي خبر طلعت علاء قال لي خليني اوصلك البيت الكلاب هنا ضاله قلت ليهو اخير لي عضه كلاب من السمعه قال لي طيب اسمعيني تعالي لي بكره المكتب والشفتي الليله ما تحكي لزول المهم مشيت البيت وقلبي ادق في لحظه حسيت الفقر رحمه ياخ الناس العندهم قروش ديل قلبهم محدثهم بعملو اي شي تخطر علي بالك وجريئين شديد اليوم داك للصباح ما نومتا وشبه بطني طمت من علاء بس اليوم التاني مشيت ليهو المكتب قال لي صفيه اعملي حسابك من البنات ديل ما اتوقعت اقنعوك بالسهوله دي عشان يضللنك الطريق حسيتو واعي بس ليه مباريهم قلت ليهو ممكن سؤال انت مدام حاسي كده ليه قاعد في المكان دا قال لي طيش شباب بس المهم انتي تاني ما تمشي معاهم والشفتيهو م تحكي لزول جاتني جراءه وقلت ليهو انا جيت عشان اتعرف عليك حسيتو اندهش وانا خجلتا ومشيت تاني بقيت ما بعاين في عيوني لغايه ما يوم ناداني قال لي انا عاوز اتعرف عليك بالحلال نفسي البتزوجها تكون زيك ودا كان اخر يوم شفت فيهو علاء وكان اداني رقمو وابوي غصبني علي ود عمي ومشيت لي خالتي ما اتوقعت ابوي ح يعقد لي غيابيا ولمن امي مرضت جيت راجعه واقتنعتا وقعدتا بس السؤال يا نوسه فكرك لو علا زي ماقالت لينا هسي بتحب علاء ح تعرفني عليهو ليه نوسه في حاجه غلط انا كلام علا ما صدقتو وانو الحمل حصل ما بي ارادتها برضو ما صدقتها ياخ انا شفتها ملصقه في الولد لمن قربتا يغمي علي والحاجه دي عندها عادي عشان كده في قصه ورا القصه دي انا خوفتا قلت ليها انا ما خايفه منها ربنا عالم بينا عاوزين نساعدها وما تخافي نعمل العلينا وبعدين منها شديد ربنا يهديها واحتمال نعرف الحقيقه المهم يا صفيه الحمد لله انك ما ارتبطتي بي علاء بجد ما بشبهك قالت لي اخير لي ولد عمي وهو زاتو مسكين يا نوسه وبرضو مغصوب علي نفسي احبو ويحبني انا رضيت بيهو حلالي قلت ليها ربنا عالم بالنوايا ان شاء الله ح تحبو بعض وتقولي نوسه قالت لي وانا زاتي نفسي احب الخطبني دا ما دايره اتزوج زواج تقليدي قالت لي اكيد ح تحبو بعض شديد قلت ليها نشوف البحصل شنو وح احكي ليك واستاذنت مني وودعتها وجيت راجعه ابوي قال لي الولد قال عاوز يشوف رايك بي نفسو مناسب الليله يجينا ولا بكره عشان هو ماشي الشغل قلت ليهو انا تعبانه خلي بكره قال لي بي راحتك يابتي
مشيت اتوضيت صليت دخلت دايره انوم لقيت امي تنظف قلت ليها بسم الله يمه المكان دا نظيف نظفتو انا قبيل فشنو قالت لي يابتي شهاب بكره بجي قلت ليها شهاب منو يمه انتي عيانه ولا حاجه قالت لي يابت شهاب خطيبك قلت ليها هو اسمو شهاب قالت لي اي ابوك ما قال ليك اسمو قلت ليها ما بتزكر والله وبعدين المكان نظيف وبكره لمن اجي من المدرسه بنظفو تاني اخدي راحتك يمه قالت لي يابتي الولد بيتهم سمح لو لحسنا الواطه ما بنلحق بيتهم قلت ليها يمه بيتنا احلي من بيتهم بي الف مره بيتنا دا ملان حنيه وتفاهم وحب يمه عمرها المظاهر ما كانت اسمح من الاستقرار انا لو علي اتزوج راجل من مستواي قالت لي ما البنتمناهو ليك انا وابوك نشحد في الله ليل نهار تضوقو حياه العز والحياه السمحه قلتا ليها عشان ما نجيب خبر لي اولادنا ونتلهي بالحياه احسن نكافح وزول اكون عاوزنا ماف عشان ناس بسيطين افضل لينا مليون مره من عيون الناس كلها تكون علينا وسيرتنا في خشمهم هسي عليك الله يا امي ما مرتاحه انا متاكده راحه في غرفتنا دي ولا راحه في قصر امي ابتسمت وقالت لي انا بحب تواضعكم بس دعواتنا ليكم للافضل لانو رغم الانتي شايفاهو دا في حاجات انتي ما شايفاها يابتي نحنا بنعدي ايام نوم ما بننوم مجرد ما نحس انكم اقل من غيركم وابوك لمن مايقدر يوفر ليكم حاجه والله يابتي ما هدا راجل ببكي بي دمعتو في الم جوانا انتو ما بتشوفوهو ولمن اخوانك يبكو في حاجه ونحنا ما عندنا قدره والله قلبنا دا بنقطع حسيتهم اتألمو كتير بسببنا رغم اننا نحنا لو الواحد جابو ليهو سفنجه جديده بكون حاضنها ونايم بيها وبكون مبسوط حضنتا امي شديد وقعدت ابكي قالت لي بعد الشر عليك يابتي من الدموع وانا ماقلت ليك كده عشان تبكي انا شايفاك عاجباك حياه الفقر ونحنا نوم ما بننوم بي سببو قلت ليها يمه ان شالله حياتنا ح تتغير صدقيني انا حتي لو اتزوجتا ما بخلي هدفي ومستحيل انسا تعب ابوي وشقاهو قالت لي نحنا دا واجبنا اقنعتها انها تنوم وانا ح اجي بدري انظف طلعت مشت تنوم وانا قلبي انقطع نحنا ما حسينا بي الهم حاسين بيهو بعد تعبت حتي قدرتا نومتا
الصباح صحيت مشيت المدرسه وقررو لينا امتحانات نهايه السنه صفيه قالت لي لازم نجتهد اها كيف بعدين خلينا نخلص ماده قلت ليها ماف طريقه اللليله الولد الخاطبني قال جاي اتكلم معاي صفيه شغلتها لي وانا اتخجب ساي قالت لي ما تتهابلي بعدين عايني لي لو ما شفتي ملامحو ح تحبي كيف قلت ليها ان شالله ما وريتك الحصل علي امس ود عمي العاقد علي اظنو جا اسلم علي ابوي سكاهو بالعكاز قال ليهو اوعك تعديها لي دخله ومرقه امش جهز حالك وتعال سوقا مني تاني أوعك تجيبا لي قلت ليها ابوك رغم انو صعب بس كبر في نظري قالت لي ابوي الماعارف مشكلتو بفهمو غلط الحمد لله يا نوسه بس حق ابوي في رقبه مرت ابوهو واخوانو ربنا ح يعاقبهم ومصيرنا حياتنا تتغير واقدر اسعدهم بس هم ح يجي يوم ويضوقو كل الضوقناهو قلت ليها ربنا كريم انا حكت لي امك وقالت رافض يتعالج قالت لي فعلا قلت ليها رايك شنو تقنعيهو وانا والله اخلي ابوي يقيف معاهو دموعا جرت قالت لي ابوي ما عندو صاحب كلهم بعدو عنو عشان حالتو قلت ليها انا متاكده ابوي ح يقدر علي الما قدرتو عليهو وح يستحملو وابوي اكتر زول بحب اساعد الناس خلي الموضوع دا علي وفي المستشفى في دكتوره نفسيه انا شفتها مره والله ابوك ح يبقا احسن من اول قالت لي ما عارفه اقول ليك شنو انا اي لحظه بعدتها عنك ندمتا عليها انتي اكتر انسانه مخلصه شفتها في حياتي نوسه ع فكره انا سمعت بقصتك انتي وسعاد قلت ليها ياحليلا والله رغم الحصل بس اشتقت ليها قالت لي نوسه انتي طيبه شديد عارفه سعاد دي خسيسه طبعا زعلت واضايقت من صفيه قلت ليها حرام عليك سعاد طيبه وساعدتني عشان نلاقيك قعدت تضحك قالت لي لانك مسكينه سعاد صاحبتهم وبتحب الولد القلت ليك حاول يلمسني لمن كنت مع ناس علا وسعاد ما صاحبتك الا عشان توريهم انتي بتعملي فشنو نوسه الزمن دا نفسك ما تثقي فيها قلت ليها اعوذ بالله ماقادره اصدق قالت لي لا صدقي يختي دي الحقيقه وقالا لي علاء قلت ليها فعلا علاء حزرني منها والضابط زاتو حزرني فشنو عارفنو قالت لي م عارفه بس علاء لمن اتصلت عليهو حكا لي بالعملتيهو وقال لي خايف عليها من سعاد علاء رغم اي غلط غلطو بس حسيتو ندمان قلت ليها فعلا والله انا زاتي حسيت كده ووراني عديل قال لي انا استقمتا بسبب صفيه بس الحمد لله ع قسمتك وصدمتيني بي سعاد غايتو اتعلمت دروس المدرسه ما ح تعلمني ليهم قالت لي معليش با نوسه طلعنا رجعنا البيت
لقيت امي تجهز في الاكراميه الحا تقدمها لي شهاب دخلت نظفتا واستحميت ونومتا صحيت بصوت امي قالت لي قومي البسي عبايتك الجديده وغسلي وشك دا بي صابون وسرحي شعرك دا وتدخل وتمرق تجي تعاين لي لغايه الولد ما جا ابوي جابو وجا سلم علي من بعيد ابوي قعد اتونس معاهو لغايه ما اكرمو واخر شي امي عملت القهوه قالت لي تعالي شيليها ليهو وديتا ليهو وابوي طلع انا بقيت ارجف كشحت القهوه في الصينيه هو حسا بي مضايقه قال لي معليش خليها ح اكبها انا انا انحرجتا ومشيت قعدتا وهو اعاين لي ساي عينو ما نزلا مني ما اداني فرصه زاتو اعاين ليهو قلت ياخ دا امتحان صعب قربتا اطردو وضربات قلبي زايده قال لي انا مقدر شعورك بس لازم اتكلم معاك قبل اي خطوه نعملها انا صراحه ما بعرفك ولا شفتك بس سمعت عنك كتير كنت كل اجازه بنزل شغل مع ابوي وابوك كان بحكي لي عنك طوالي وبقول لي بتي شاطره نفسي تطلع دكتوره زيك كلام ابوك عنك بالخير هو الجذبني ليك كنت بتمني البت البحكي عنها عمي موسي دي بعد اتخرج واشتغل القاها ما اتزوجت واخدتا عهد بيني وبين نفسي اني اعمل المستحيل عشان اتزوجها انا عاوزك تعايني لي في وشي عشان تفهمي اي كلمه بتطلع مني بقا يحنس فيني ورفعت راسي الشهاده والعمل الصالح القصه ما جمال الولد دا عندو هيبه كده وصفاتو ولا في الاحلام ابتسم لمن عاينت ليهو قال لي امي نفسها تشوف البت الاخترتها قلت ليهو كان تجي معاك قال لي انا جيت هسي عشان اشيل مقاسات الدبله عشان اهلي بعد يجوكم يجو مره واحده وبقا يتونس معاي ويحكي لي لغايه ما امي جات قالت لي علا جاتك انا خوفتا خوف قربتا اطردها عشان اكيد بكون شاف الفيديو بتاعها امي ما قالت لي سمح هي توش جات داخله لمن شافت شهاب بقت منططه عيونا وتعاين ليهو هو انحرج منها واعتزر تتوقعو علا ليه بتعاين ليهو هل هي بتعرفو ولا في قصه تانيه وربنا يستر………يتبع.