رواية أرهقني الفجور الفصل العاشر 10 بقلم نوسه حمد
حسيت انو الدنيا بقت مسيخه والحياه كعبه لمجرد التهم الاتوجهت لينا دي مفترض تكون تربيه قبل التعليم بس للاسف الما مربين غطو علي المربين وانحسبنا من ضمنهم والوزاره عرفت بالكلام وقفلو المدرسه ودا كان يوم صعيب علينا كل الناس تتكلم عننا وضربو كل حايط المدرسه بوهيه بس الفضيحه بتاعت البنات بقت في سيره اي لسان اسبوع قاعده في البيت ومنهاره وببكي اهلي غلبهم البعملو معاي حسيت نفسي انكسرتا مدرسه كامله اتقفلت بسبب غباء بنات وغيره وهن اصلا السمعه ما بتهمهم شديد كنت متشوقه اعرف الفضيحه العملنها شنو او السبب القفلو بيهو المدرسه شنو بقيت اقرا في البيت وقررت اشتري تلفون لاني بقيت ما قاعده اطلع رجعت لعمل الاسكريم والحمد لله اموري ماشه تمام اهلي بقو ما بتناقشو معاي كتير وشايلين همي اني اتاثر بالحاصل انا اتاثرت بس ما للدرجه خوفهم علي استاذنت ابوي قلت ليهو عاوزه اشتري تلفون عشان اقرا منو في الاول رفض ورفض شديد قال لي سبب المشكله الحاصله التلفونات دي وانا اي شي بقيت معاك فيهو الا دا ما بسمح ليك نهاي احترمت وجهه نظرو وكلامو فعلا صاح قال لي لكن لو دايره تقري بيهو بديك تلفوني دا لمن اجي من الشغل قلت ليهو تمام
مرت الايام وابوي بديني تلفوني وبكون قاعد جنبي بدخل احضر الحصص وبطلع اديهو التلفون في يوم ما قعد جنبي كان تعبان ونام انا اصلا الشمار حارقني بقيت افتش في الفيس بصفحه ابوي ما لقيت حاجه اتزكرت اللقب الاطلقو علي مدرستنا كتبتو ظهر لي قروب عديل دخلت فيهو وفتحت الصور والفيديوهات انا لمن جسمي بقا يرجف جاتني اول شي فيديو بتاع علا في مكان مظلم وفيهو اضاءه ضعيفه وكانو مكان مشبوه ولابسه لبس م كويس ومعاها شلتها بتاعت المدرسه ومعاهم اولاد ومن ضمن الاولاد المعاها استاذ علاء انا اعصابي باظت وبقيت افتش في الفيديوهات وشكلهم كانو بعملو رحل في البحر مع بعض قهوه وشيشه وقله ادب ما. طبيعيه وعندهم صور وفيديوهات في حمام المدرسه والتعاليق كلها نبز في المدرسه والمديره وشكلو الموضوع بقا متداول بقو يتكلمو عنو كتير بطني طمت من المدرسه وفي لحظتي قررت ادخل المدرسه الخاصه رغم انو سمعه المدارس الخاصه اصعب بس قلت اجرب قفلت التلفون وختيتو جنب ابوي كان نفسي اتكلم مع علا وانصحها بس قلت مالي ومالها الحقد الجواهم قادر يحرق دوله كامله اتزكرت استاذ علاء والفيديو قلت معقوله بقيت اراجع في زاكرتي لمن قال لي انا سيئ شديد وبسبب صفيه استقمتا حب صفيه خلاهو اتغير ودي حاجه كويسه بس صفيه لو عرفت الحصل ياربي ح توافق عليهو وانا بقيت بعيده كل البعد عن كل ناس المدرسه بس فجاه اتزكرت استاذه منال وقررت اسجل ليها زياره
الصباح كلمت اهلي قلت ليهم عاوزه امشي لي استاذه منال قالو لي ليه قلت ليهم انا قررت ادرس في اي مدرسه ان شاءالله خاصه ابوي قال لي يابتي انتي شايفه براك ما عندي قدره للخاص النشوف نهايه المدرسه شنو قلت ليهو ابوي انت ماشفت المدرسه والبقولو فيها صعب جدا سمعتها ترجع ليها قال لي القال ليك منو ح ترجع اذا وقفو الفساد الحاصل المديره ادارتها فاشلة وهمجيه وتعاملها بالسوط اكتر من انها تتعامل بفهم وهسي انا اخر مره سمعت انو مرشحين استاذ محجوب للاداره لو الموضوع دا طلع صاح ح تشوفي المدرسه دي سمعتها ح تبقا كيف ما تستعجلي يابتي وانتي ما شاء الله بتقري في البيت كلها ايام والمدرسه تفتح ولو ماشه لي استاذتك ساي انا م عندي مانع كلام ابوي طمني شويه قلت ليهو طيب النمشي للاستاذه قال لي سمح انا لمن اطلع بغشيك ليها قلت ليهو سمح نظفتا لي امي البيت وطلعت مع ابوي مشينا لي استاذه منال ابوي وقف لي لمن جات استاذه منال زاتا ودخلت معاها قالت لي كيفك قلت ليها بعد الحصل م كويسه قالت ليه ليه مالك انتي اصلا ما داخله في فضايح البنات قليلات الادب ديل قلت ليها الخير بخص والشر بعم انا بتلفون ابوي دخلت النت وشفت الفيديوهات والصور والقصص الحاصله والنبز اكتر للمدرسه بالفيها من غير ما يراعو لي شعور الزينا قالت لي اصلا المشكله لمن تبقا في السوشيل ميديا ما ليها اول ولا اخر عشان كده م تركزي كلها ايام والاداره يمسكها استاذ محجوب ونكون ارتحنا من المديره وولدها لانو هو سبب البلاوي دي كلها طبعا انا انخلعت قلت ليها كيف يا استاذه قالت لي البنات ديل اتستر عليهن كتير من تاني مشكله بتاعت الطفله المجهوله لحاجات كتيره غايبه عن انظارنا وهو سبب انو طلعن لينا في راسنا من الاول ولمن بقن عاصيات عاوز يعمل فيها روحو الله هداهو قلت ليها هو فعلا الله هداهو عاينت لي بي استغراب قالت لي حتي انتي يا نسيبه ما سلمتي منو قلت ليها ماتفهمي غلط انا والله نهاي ما حصل بيني وبينو حاجه كل الاتقال كانت تهم وانا ح احكي ليك الحقيقه بس توعديني تكون بينا قالت لي احكي حكيت ليها بي اي شي قالت لي سبحان الله ان شاء الله فعلا يكون ربنا هداهو بس يا نسيبه اسمعي نصيحتي دي الولد دا ابعدي منو قلت ليها حاضر يا استاذه ممكن سؤال قالت لي طوالي قلت ليها الولدت منو سكتت ما ردت علي قالت لي الموضوع دا انسيهو قلت ليها انا اصلا نسيتو بس عاوزه اعرف الحقيقه دي رغد صاح قالت لي لا دي علا انا لمن راسي لفه قلت ليها شنو شنو قالت لي السمعتيهو دي علا والمديره عرفتها واهلها اترجوها انها تستر عليها سبحان الله سترتها بس فضحت روحها براها بالفيديوهات الاتسربت وعرفت انو سربها الولد الغلط معاها لانو تلفونها عندو وشكلو ماسك عليها حاجه انا خوفتا وضربات قلبي زادت قلت ليها معقوله قالت لي عشان كده انسي المواضيع دي وخليك في نفسك وقرايتك انا قاعده افتخر بيك ما تخزليني قلت ليها وعد يا استاذه ما اخزلك مشيت منها البيت وانا مصدومه علا تغلط وتظلم غيرها سبحان الله ربنا اخد حق صفيه المسكينه
مرت الايام وانا مشغوله بس في قرايتي ونسيت اي شي واعلنو لينا انو المدرسه ح تفتح ان شاءالله وكل الطالبات الظاهرات في المقاطع وزاره التربيه والتعليم فصلتهم وتاني ما ح يقرو في اي مدرسه لانو من الفيديوهات بتاعتهم هم ما ناس قرايه عاوزين يشوهو سمعه المدارس وادمرو بقيه الطلبه لانو في واحدات وقعو ضحيه نفوسهم الضحيه واتبعوهم جاتني لحظه اتوجعتا لي علا بس هي براها الجابتو لي نفسها ابوي قال لي اتجهزي يا بتي المدرسه ح تفتح وكان مبسوط شديد قلت ليهو حاضر يابا انا جاهزه اصلا منتظره اليوم دا قال لي تمام
مرت الايام ونزلنا مدرسه واتفاجأت بي صفيه جات المدرسه لمن شافتني فرحت وانا فرحت اكتر منها حسيتا ما صفيه الزمان زوله واثقه من نفسها قلت ليك كيفك ووين انتي قالت لي بحكي ليك انتي كويسه قلت ليها كويسه سالتها من علاء قالت لي تاني ما عاوزه اعرف عنو حاجه بعد الفضيحه الحصلت قلت ليها صفيه انتي عارفه استاذ علاء اتغير عشانك قالت لي شنو قلت ليها والله قال لي بنفسو انا كنت سيئ بس صفيه خلتني انسان تاني قالت لي نوسه انا اتزوجتا غصبا عني وح احكي ليك بعد الحصص طبعا نص الاساتذه اتغيرو والمدير الجديد زول جادي شديد وسبحان الله المدرسه بقا نفس ما فيها الناس كلها مشت عديل وقال لينا الما عاوز القرايه اطلع اهلو طوالي لاني ح افصلو ح افصلو ما عايز اي لعب كل الطالبات خافو وبقو مجتهدين من اول يوم حسيت اني مبسوطه شديد نهايه اليوم صفيه حكت لي انو ابوها بقا يضرب امها وامها في النهايه جات تشكي لي خالتي ولقتني هناك وحالها اتبهدل شديد واكتشفت انو ابوي عقد لي غصبا عني وخالتي اقنعتني اني ارجع مع امي وارضا بقسمتي ورجعتا يا نوسه وابوي بعديها بكم يوم جاتو جلطه بقا طريح الفراش وولد عمها العقدو ليها عليهو الوحيد الوقف معاهم وقالت لي حسيت انو عاوزني وافضل لي من استاذ علاء وامو قلت ليها يازوله مبروك ربنا يخفف عليكم قالت لي نوسه انا بشكرك امي حكت لي عن اي شي بس ي نوسه الله كريم قصدهن اشوهن سمعتي بس ربنا كريم فضحهن هن في روحهن والحمد لله الاشكال دي طارت من وشنا قلت ليها اي والله نبقا في قرايتنا ماشين في الشارع مبسوطين لاقتنا بت لابسه نقاب سلمت علينا ونحنا ما عرفناها رفعت لي النقاب لقيتا علا انا وصفيه طوالي مشينا قالت لي نوسه زي ما وقفتي مع صفيه اقيفي معاي انا محتاجه لسند زيك انا تعبت وكرهت نفسي وكانت بتبكي في نص الشارع بكا هستيري كانها قلبها محروق صفيه بقت تعاين لي وانا اعاين ليها وغالبنا البنعملو ليها ….. يتبع.