رواية أرهقني الفجور الفصل السابع والعشرون 27 بقلم نوسه حمد
شهاب جا لقاني واقفه مع ريان وكان مخلوع علي قال لي نوسه كويس لقيتي ليك صاحبه قلت اخد اذنك اجي اوصلك البيت وبالي مشغول بيك قلت ليهو الحمد لله جيت مع ريان وعرفتو عليها سلمت عليهو وودعتني وفاتت وصاها علي شديد ومسكني من يدي حسيت راسي لافي والدنيا ما شايلاني حاولت جاهده احرك رجولي غلبني وعيوني زغللن قلت ليهو شهاب انا انشيلت وتاني ما وعيت الا هو جنبي ومبسوط وفرحان انا قلت خلاص انشليت فعلا عاوزه انزل بي خلعه قال لي دقيقه براحه قلت ليهو انا مالي قال لي مالك كويسه يا نوسه ما تخافي انتي مافطرتي صاح قلت ليهو عرفت كيف قال لي نوسه انتي جسمك كلو مهبط وشكلك علي اكل امس معاي ليه ما اكلتي في المدرسه قلت ليهو بعد مشيت اشتري فطور حسيت بطني طمت من الاكل وخليتو قعد اضحك قال لي طيب مافكرتي اكون حاصل شي عليك قلت ليهو كيف وانت مالك مبسوط كده ختا يدو في بطني قال لي مبسوط عشان ح تجيبي لي بيبي قلت ليهو منو انا قال لي اي بقيت ما عارفه افرح ولا ازعل ولا هو انا زاتي اشهد الله حمل يعني شنو ماعارفه ما مشغله مخي في الحاجات دي نهاي وقلت ليهو كده قعد اضحك قال لي انتي ما شغلتي مخك فيها عشان اصلا دي ما كانت حياتك بس اكيد بعد كده بالك كلو ح يكون في الحاجات دي قلت ليهو ان شاء الله ربنا يقدرني بس من اول يوم حصل لي كده قال لي لانك م ماكله والطفل دا عاوز تغذيه كويسه لازم تخلي بالك منو ولو حابه انا بجيب ليك اكل المدرسه قلت ليهو لا لا يا شهاب وبنتكلم كده حسيت بطمام فظيع وبقيت استفرغ وحيلي لمن مات شهاب لبسني عبايتي وساقني المستشفى وكنت ما قادره اسند نفسي وحيلي كلو تاكلاهو في شهاب دخلني غرفه في المستشفى وركبو لي دربات وكنت تعبانه شديد رقدت في المستشفى تلاته يوم لغايه ماقدرت اكل واشرب قلت لي شهاب ما تكلم اهلي لانهم ح يشفقو علي قال لي تمام م تشيلي هم في غربتك انا اهلك ما ح احوجك لي غيري وفعلا شهاب ماقصر مني نهاي لغايه ما شديت حيلي وبقيت كويسه ريان جات زارتني معاها امها ناس طيبين شديد امها قالت لي مدام حامل ما تنزلي المدرسه قلت ليها نفسي اكمل ماخدين عهد انا وصديقتي صفيه اننا نتفوق سالوني من صفيه قلت ليهم دي صديقتي في المدرسه وبقت لي اكتر من اخت رغم الظروف والمشاكل الواجهتنا بس الحمد لله شبه الدنيا راقت عندهم اتكلمت معاهم كلام مبهم ما خوضتا في التفاصيل ام ريان قالت لي ما تهمي اعتبريني امك وراجلك فضلو كتير علينا ماقصر مننا اي زول مريض بخدمو بدون مقابل لازم نرد ليهو جزء بسيط من العملو عشانا قلت ليها ما بتقصري يمه قالت لي في اي وقت محتاجه لينا تعالي لو زهجتي تعالي اتونسي معانا قلت ليها حاضر ح ازوركم شكرتهم وفاتو مني شهاب جا من الشغل دخل المطبخ عشان يعمل لي اكل لقاني سبقتو زعل مني قال لي انتي حامل لازم تدلعي وانا عارف الحمل صعب قدر شنو ما عايز اشيلك فوق طاقتك عاوزك بس تساعديني بي انك تاكلي وتهتمي بنفسك قلت ليهو ماتخاف ان شالله انا كويسه وبكره عاوزة انزل مدرسه رفض قال لي انا ما مانعك الدراسه بس وضعك صعب قلت ليهو انا كويسه والله احسن امتحن قبل الد وهو في بطني والجامعه ملحوقه بس لو اجلت السنه دي ح اتعب صدقني وبعدين انا وعدت صفيه قال لي انا م رافض بس خايف تضايقي في المدرسه قلت ليهو ان شاء الله ح ابقا كويسه انت بس خليني قال لي تمام بس ع شرط لو ما قدرتي توعديني توقفي قلت ليهو حاضر
مرت الايام وانا مرات بتعب في المدرسه وما بكلم شهاب كانت عندي عزيمه اني امتحن كنت مجتهده شديد وشهاب ما كان محوجني لي حاجه جاب لي بت يتيمه تشتغل لي في الاول رفضت بس قال لي البت دي ماعاوزه مساعده من زول طالبه انها تاكل رزق حلال وافق وجابا تشتغل معاي في البيت بت صغيره ومؤدبه ومحترمه مرات بسرع اعاين ليها بقول هسي جميله دي بت يتيمه لا ام لا اب ولا خال لا اهل اسالو منها الطريق قدامها انها تغلط وتعمل المابخطر في بال الناس بس الحوجه ما خلتا تبيع نفسها عكس علا وشلتها بي اهلهم لا عملو حساب لي اهلهم لا لي نفسهم غايتو الربنا هاديهو ما داير ليهو اسباب عشان يغلط كنت بحسها انها بتخجل من شهاب وبتعمل الف حساب في وجودو ونهاي ما بتدخل علي وهو قاعد وهو كان بحترمها شديد وشايفها زي بتو لدرجه انو بتقول ليهو ابوي حسيتا انها محتاجه تقول الكلمه دي قلت ليها وانا امك قعدت تضحك قالت لي انتي صغيره قلت ليها اتزوجت تاني مافي صغر قالت لي الحمد لله ربنا اديك العافيه ويخليك لينا قلت ليها امين ويخليك انتي كمان لي
مرت الايام وجميله ريحتني شديد طلعت طباخه واي شي بتعملو وكانت بتحترم شهاب جدا وهو نهاي ما حسسا انها بت شغاله عندنا بعتبرها زي بتو وطوالي بقول لي نسوقها نشتري ليها حاجات وهي النوع الما عندها طلبات وملتزمه ومتحجبه وزوله الله والرسول لو لقت اكلت ونامت بسلام تاني ما دايره حاجه من الدنيا امي وابوي ارتاحو ليها شديد وقالو لي ابقي عليها عشره وانا نهاي ماقصرت منها ولا هي قصرت مني ساعدتني شديد من غيرها ما كنت عرفت عملت حاجه حبيتا من جوه قلبي
مرت الايام واتصلت اسلم علي صفيه قالت لي ابوك بقا يزور ابوي وما كده ساقو اشتغل معاهو في الورشه وامي ربنا اديها العافيه تدعي لي ابوك ليل نهار انبسطتا شديد انو ابوها طلع من الكابوس دا وقالت لي استلمت قسيمه الطلاق وحسيت نفسي كويسه شديد الحمد لله والفات كلو خير ما زعلت ابدا انو ود عمي غصبني عليهو علي الاقل لو اتزوجت بعديهو ارمي الماضي الكعب وراي وما ازكرو واكون في نظر الناس والبتزوجني مطلقه نوسه انا اتغيرت شديد وعلي فكره المدرسه فتحت والمدير غير الاستاف كلو اي استاذ ليهو علاقه بالمدرسه الخاصه طلعوهو وجاب اساتذه مبالغه اتمنيتك تكوني قاعده وانا الحمد لله مستواي اتصلح شديد وعندي وعدي ليك قدر المنافسه قلت ليها الحمد لله يا صفيه بجد فرحتيني بالاخبار الحلوه دي انا سعيت جاهده لي انو المدرسه تصل للوصلت ليهو دا احتمال موت سعاد كان قاسي علي قلوبنا بس كشف الحقايق ربنا يربط قلب امها عليك الله ما تنسي تزوريها وبلغيها تحياتي وع فكره سا صفيه شكلك ح تفوتيني قالت لي كيف معقوله يابت انتي ما شفتي المدير قال عنك كلام كيف قال بسبب الفساد الكان حاصل المدرسه فقدت اشطر طالبه وانبغ طالبه عندنا اختارت انها تستر نفسها ونحنا كنا لسه في غفله لغايه ما واحده من ضحايا البنات الخربو سمعت المدرسه انتحرت بسبب انها وقعت في الغلط من غير ارادتها واتكلم كلام كلو عنك وقال في النهايه نجاحك بفرحو لانك كنتي واحده من طالبات المدراسه رغم انو الحمل كان هادي حيلي بس جاتني قوه وشجاعه اني اكمل وما كده وبس قررت اني اقرا هنا وانزل امتحن في الحله صفيه فرحت شديد قلت ليها طبعا انا حامل قالت لي اخيرا ح ابقا خاله الف مبروك حبيبتي وما تتعبي نفسك قلت ليها صفيه ما عارفه بس ياربي تلقي راجل زي شهاب صفيه شهاب بجد معقدني عديل طيب وحنين شديد والله العظيم حبو لي زي الفي المسلسلات الكنا بنشوفو تمثيل ياربي يا صفيه حظك يكون احلي قالت لي لانك تستاهلي شهاب مخلوق عشانك انتي مافي بت زيك خلقه واخلاق وعلم نوسه عشان الجواك نظيف صدقيني البمر عليك كلو ح يكون حلو ما عارفه اقول شنو بس ما بنسا لمن انتي نصحتيني ما احب علاء واخلي بالي في قرايتي انا زعلت منك وقلت ما عايزه اكون جنبك بجد كل ما اتزكر رغم المعامله السيئة العاملتك ليها وانك ما زعلتي والوحيده الدافعتي عني في غيابي بضرب نفسي كفوف انتي سند م صديقه بعد وقعت ضحيه اكتشفت انك انتي الكنز وكنت ع ثقه المدرسه كلها لو مشت في طريق ناس علا انتي لا ربنا ح انجيك منهم لانو جواك نظيف ما بقول تربيتك سليمه مع احترامي لي اهلك اي نعم هم ربوك نعم التربيه بس انتي زينتي تربيتهم بصفاء روحك ونقاءها اقرب مثال ليك زهير اخوك كان ح يمشي معاهم لو ما شهاب كشفو بس ربنا ستركم ودي دعوات والديك انا اتعلمت دروس لا مدرسه لا تربيه ما ح تعلمني ليها قلت ليها صفيه والله انتي كنتي طيبه ومؤدبه بس اكتشفتي الحب بدري ودا كان اكبر غلط اي مافي زول بقدر اتحكم في مشاعرو بس جربي انك تفكيرك ما يكون حب وعلاقات صدقيني ربنا بعميك من الحب وقصصو قالت لي الحمد لله من شابا علي شي شابا عليه طرت طيره من الحب وقصصو قالت لي بالمناسبه ماف خبر من القضيه قلت ليها بعرف الجديد من شهاب وبكلمك وابقي علي روحك عشره ودعتها وقفلت
ما انتظرت دقايق شهاب جا داخل سلمت عليهو واطمئن علي ودخل استحما واكل وجا عشان نتونس قلت ليهو شهاب ممكن انا امتحن في مدرستنا الفي الحله قال لي ممكن قلت ليهو نفسي امتحن هناك قال لي ان شاءالله وبتكوني تقيله زاتو عشان تلدي هناك ولا ح تلدي هنا قلت ليهو لا بلد مع ناس امي قال لي تمام البتشوفيهو ولو قلتي امك تجي هنا ماعندي مانع قلت ليهو امي الله اعلم تقدر تجي قال لي تمام انا بكلم ناس المدرسه الهنا انك ما ح تقدري تمتحني معاهم عشان ح تكوني ع وش ولاده وبتصل للمدير اسجل ليك للامتحانات هناك وربنا يقدرك ويوفقك قلت ليهو امين وسالتو من الحصل في القضيه قال لي دقيقه النتصل للضابط قلت ليهو طيب النمشي اعمل ليك قهوه من يدي نفسي فيها قال لي لكن ع شرط تشربي فنجان واحد قلت ليهو حاضر مشيت المطبخ لقيت ريان تغسل في العده قالت لي خليني اعملا ليك قلت ليها لا لا أنتي ماقصرتي الليله وبقيت اونس فيها لغايه ما ظبطت القهوه وهي كانت عامله كيكه بقت تجهز لي فيها في وختت لي المكسرات وظبطت لي جو القهوه والبخور مشيت قعدت مع شهاب وبعد خلص المكالمه قال لي نوسه اخبار حلوه اتخيلي الراجل اتمسك واعترف بي كل عمايلو وقالو اخوانو جو واكتشفو انو مريض نفسيا عندو قروش واي شي بس مريض نفسيا وجابو شهاده بتقول كده بس علاء وامو اثبتو عكس كده وطبعا الضابط شكلو اتمكن شديد في المعلومات من ضمن المعلومات في معلومه صدمتني انو انتي كنتي اول المستهدفين قلت ليهو كيف ………يتبع.