رواية أرهقني الفجور الفصل التاسع عشر 19 بقلم نوسه حمد
شهاب قال لي نوسه انا عاوز اقول ليك كلام بس ما تزعلي قلت ليهو قول ما ح ازعل قال لي ولا ح تضايقي قلت ليهو شهاب وقعت قلبي احكي فشنو والحاصل شنوو قال لي زهير اخوك. قلت ليهو مالو ما تقول لي لقيتو معاهم قال لي دقيقه احكي ليك اتفقنا مشينا انا وصاحبي مكان بقعدو دا بعد ما قلنا لي علاء زهجانين والحله بقت ما زي زمان قال لينا ابشرو عازمكم سهره من امها قلنا ليهو سهره وفي الحله الا في النادي قال لينا نادي شنو لا سهره فيها بنات طوالي انا بديت اظهر ليهو اني فاسق والجو دا نافع معاي وقال لي معقوله اتغيرت يا شهاب قلت ليهو تقول شنو الزمن وشغلي ضاغط المهم قلنا ليهو تما بنجي عليك اتفقنا انا وصاحبي نمثل للنهايه انو عاوزين الجو دا اتجهزنا ومشينا الجنينه ولقينا ما شاء الله بنات اشكال وانواع واولاد من الحله وبره الحله ما عرفتهم كلهم بس ح اوريك صورهم قدرت اصورهم طبعا علا اول ما شافتني قالت لي انت خطيب نوسه غريبه جيت هنا قلت ليها جيت اشم هواء شويه وكانت بتعمل في حركات اتجاوزتها شديد لمن ما عبرتها غمزت لبت وطبعا انا بنظري متابعهم كلهم بت صغيره كده جات قعدت جنبي وبقت تتمايع وتضحك انجبرتا اندمجتا معاها وادتني رقمها وقالت لي كل مره تجي قلت ليها ان شاء الله المهم دورو الشيشه وانا اعتزرت قلت ليهم عندي التهاب وسدري كعب المهم عملو القهوه واخر ونسه فجاه شفتا زهير اخوك معاهو ولد صغير علا قامت مسكت زهير من يدو وقالت ليهو شوف خطيب اختك معانا زهير انخلع وما اتكلم معاي طلع طوالي صاحبي دمو حار لحقو ومن بعيد هو والولد اداهم الاتنين كل واحد كف وكان بكورك فيهم لمن قومنا حجزناهو وكان مضايق شديد وبقا جايط فيهم قال ليهم كيف تخلو اولاد صغار زي ديل ي داب في عمر المراهقه يقعدو معاكم عاوزين تفسدو اخلاقهم وانا اشيل واغمز ليهو قال لي عاجبك كده بنات صغار وصايعات وقليلات ادب وبقا جايط شكلو الشيشه فيها حاجه خلتو اقول اي شي وعلاء قال لي جايبو معاك ليه ودا بعمل لينا موضوع انا بقيت شغال اهدي فيهو قلت ليهو نحنا مالنا ومالهم اي زول حر في نفسو وهو لسه شغال يكورك قلت ليهم خلوهو شكلو الشيشه دي اثرت معاهو طلعت منهم خوفت يقول كلام اكتر علاء قال لي الزول دا ضامنو قلت ليهم ضامنو شديد ما تركزو معاهو وطلعت منهم وبقيت فيهو هو انتظرتو لمن مفعول الحاجه الشربها دي راحت قلت ليهو كنت ح توقعنا وهو زاتو انخلع من الحكيتو ليهو بس الموضوع عدا علي خير وما شكو فينا كتير واتفقت معاهو انو تاني لو مشا معاي يتحجج بي اي شي وما يدخل حاجه في خشمو. قلت ليهو زهير اخوي شرب معاهم قال لي م عارف بس اخوك في طور مراهقه شكلو دي علا استدرجتو انا طبعا خلاص الدنيا ضاقت بي حسيت انو دا هم ونزل فوق دماغنا وبقيت ساكته شهاب قال لي نوسه استهدي بالله وخليك فاهمه انو شهاب ولد ما زيكم بالكلام ممكن يبعد من الغلط حسيت نفسي ابكي ودموعي بقت سايله شهاب حسا بي قال لي اسمعيني بي امكاني اني ما اكلمك واقول انو هو ولد وحر بس عشان انا شايف ابوكم تعب فيكم قدر شنو ونفسي زهير يكبر ويبقا سند لي ابوهو موش يضيع من ضمن الشباب ديل وما اكذب عليك يا نوسه فيهم شباب مدمنين عديل بتعاطو حاجات تانيه انا طبيب وبفهم الواحد من عيونو وعلا دي اول ما شفتها عرفتها انها ما تمام بس عمري ما فكرت انك تكوني زيها لاني بفهم وبعرف قلت ليهو انا خايفه علي ابوي قال لي نوسه ما تهمي زهير اخوك بالكتير لو غلط بكون شرب سجاير قلت ليهو حتي لو سجاير ابوي ما برضا قال لي نوسه انتي مفتكره الاولاد ديل بكونو زي ما اهلهم عاوزين لا لا ي نوسه الواحد من يصل سن معين بجيهو احساس اني راجل وخلاص ممكن اعمل اي شي وماف زول بسالني انا كنت كده شربت سجاير وحبيت وباريت اولاد م كويسين بس الدنيا ادتني دروس انو الحاجه الغلط مافيها راحه نهااااي الزول بكون ما مرتاح وشويه شويه بحس انو البعمل فيهو دا غلط وانتي هسي لو قلتي اي كلام لزهير ح يعتبرني ما راجل واني بنقل الكلام احتمال ما يحترمني تاني وانا ما عاوز الحاجه دي انا قلت ليك عشان تكوني قريبه منو احتمال يحكي ليك واحتمال يا نوسه زهير دا ما معاهم زاتو بس لكن انا شفتو هناك وبسببهم صاحبي كان عاوز يوقعنا وما نقدر نصل لحل للبنات ديل قلت ليهو تمام ربنا يهون زهير اخوي انا بقدر عليهو زهير بحترم ابوي شديد صدقني حتي لو غلط احتمال اكون شرب سجاير بس لكن يعمل البعملو دا الله اعلم لكن برضو الاحتياط واجب انا ح اجيهو بفوق واحكي ليهو الحاصل في المدرسه انا متاكده ح يخاف شديد قال لي تمام وانا زاتي لو شفتو معاهم ما ح اخليهو يدمر وعلا تدمرو قلت ليهو طبعا ما حكيت ليك علا جاتني تاني يوم الصباح قالت لي خطيبك خاين وصايع وورتني صور ليك انا لمن انخلعتا قالت لي اتوقعتها ترمي فيني البت عشان تقول فيني حاجه بس انا مافارق معاي شي غيرك قلت ليهو قالت لي لو عاوزه تشوفي خطيبك ارح معاي قال لي نوسه اسمعيني لو لا قدر الله جابت ليك صور لي ابوك وقالت ليك ارح معاي ما تمشي ياخ صحبي دا شرب معاهم الشيشه طشا شبكه رغم انو الشيشه ما بتعمل كده وهو متعود عليها بس شكلها مخلوطه بي حاجه اوعك يا نوسه تباريها وفي الشارع ما تقيفي معاها اياك يا نوسه انا راجل لو عملت اي شي راجل وانتي ممكن عادي تخليني لو ما عجبتك بس لو لا قدر الله عملو فيك حاجه تبقا ليك فضيحه مدي العمر وتاني براك بي ارادتك بتمشي ليهم لانو كده كده حياتك باظت نوسه انا والله خايف عليك قلت ليهو ما تخاف يا شهاب باذن الله ما بمشي معاها وما عندي فيها شغله وح اكلمها عديل اقول ليها ابعدي مني قال لي بس مظبوط وانا اخليك تنومي بكره امشي مدرستك عادي انا بجي بالنيابة عن ولي امرك قلت ليهو تمام ابوي لو عرف القصص دي احتمال انجلط عديل قال لي ما تخافي باذن الله محلوله قلت ليهو تمام ودعتو وقفلتا
نومتا صحيت جهزت المدرسه وزمان ما كنت بشتغل بي زهير بس حسيت نفسي عاوزه اقرب منو طبعا زهير اخوي اصغر مني بي سنه عمرو بكون ١٥ لقيتو يلبس ويتشاكلو في حاجه هو واخواني لمن دخلت حسيتو ارتبك ودسا مني حاجه تقريبا يا ولاعه يا كبريت عرفت انو خلاص بدا يشرب سجاير ما حاولت اتعمق معاهو في الكلام قلت ليهم ما تتشاكلو وطلعتا وقلبي مقطوع لقيت امي واقفه لينا بالشاي وابوي مطلع لينا قروش الفطور منظرهم قطع قلبي لدرجه انو غلبني اشرب الشاي اول ما دخلت المدرسه المدير قال لي وين ولي امرك قلت ليهو جاي قال لي انتظري بره ما تدخلي الفصل مشيت لقيت صفيه زاتا منتظره بره وبقيت احكي ليها في الحاصل وطبعا صفيه بقت تخاف منهم قالت لي نوسه ما تسمعي كلام شهاب الحقي اخوك والله اشربوهو حاجه الناس ديل ما شفتيهم انا شفتهم قلت ليها انتي مفتكره زهير ح يسمع كلامي بالعكس هو في مرحله عامل فيها انو كبير وممكن اعمل اي شي ومافي زول يسالو لكن شويه شويه ح اقرب منو ما ح اخلي لي علا والغيرها قالت لي بس وريتك ما تطنشي قلت ليها كويس
لمن جا شهاب المدير ناداني وقال ليهو البنات ديل رغم انهن متفوقات بس دايما بجيبو لي مشاكل كبيره وانا فصلتهم عشان اتهمو بت وقالو انها كانت زي الدفعه الاترفدت شهاب طلع تلفونو ووراهو صورتها قال ليهو دي والصوره البت كانت تشرب فيها في شيشه المدير بقا يتعوذ وقال لي امشي الفصل وخلي زميلتك تدخل معاك عرف انو نحنا ما غلطانين والقلنا فيها صاح خليت شهاب اتناقش معاهو ومشيت والحلوه انو شهاب قبل كده اتناقش معاهو في حته البنات دي صفيه قالت لي حصل شنو قلت ليها المدير كان شايفنا نحنا غلطانين بس لحسن حظنا البت يوم مشا شهاب كانت معاهم وصورها ووراها للمدير المدير قال لي امشي لي فصلك وبقا اتناقش مع شهاب قالت لي الحمد لله انو المدير قدر يتفهم الموضوع دا لانو البت دي ممكن عادي تسوق بنات معاها ويحصل فيهم الحصل لي سعاد وصحي ي نوسه سعاد بعد فصلوها الحصل عليها شنو قلت ليها والله ما عارفه رايك شنو نمشي ليها نهايه اليوم قلت ليها تمام
اليوم الدراسي خلص ومشينا لي ناس سعاد لقينا امها معاها نسوان سلمنا عليها وقلنا ليها نحنا زميلات سعاد وجينا نطمن عليها قالت لينا سعاد يا حليل بتي الشاطره يا حليل بتي الكنت بفخر بيها وبقت ماشه قدامنا ونحنا وراها وكل ثانيه تتحسر علي بتها قالت ليها صاحباتك جو يسلمو عليك سعاد بقت تكورك وتقول ليها انا ما عندي صاحبات انا م دايره اشوف زول وكانت خاته كراساتها جنبها حسيتها زي العندها حاله نفسيه وامها تقول ليها يابتي استهدي بالله البتعملي فيهو دا ما حل قالت لينا صحي انتو صاحبتها منو قلت ليها انا نوسه ودي صفيه قالت لينا في بنات. صاحبتهم الفتره الاخيره دي دمرو بتي وفيهم واحده كل يوم تجي تقول ليها ارح بيتي معاي قلت ليها يا خالتي والله ما سعاد براها الاتضررت البنات ديل كانو ممثلين فيها انهم صديقات ومافيهم عيب وتحت تحت اكتشفنا عنهم بلاوي قالت لي انتو بتعرفوهم لو بتعرفوهم ما تجيبو اسمهم ابو سعاد حالف اقتلهم نحنا خوفنا وغيرنا الكلام وسعاد تعاين لينا عين حرقه كانو نحنا سبب في الحصل ليها قلت ليها سعاد انا متفهمه الانتي فيهو بس انا نا عايزاك تصلي للمرحله دي عشان ما تندمي اطلعي من الانتي فيهو دا ان شاءالله ربنا بكون في عونك وساعدينا نحنا معاك انتي ما براك الفي المدرسه الحصل ليك الحصل بس عاوزنك تورينا الحصل شنو واللمسك منو سعاد من قلت ليها كده اتجننت علي ودفرتنا بره الغرفه لمن وقعنا وخوفنا منها عديل حالتها النفسيه محتاجه دكتور والحصل ليها اكبر دليل انو غصبا عنها طلعنا دموعنا في عينا لدرجه انو صفيه داخت علي في الشارع وما قدرت اسندها وبقيت اكورك لغايه ما جو شباب شالوها وودوها المستشفى وانا مشيت معاهم الدكتور بقا يسال فيني الحاصل عليها شنو قلت ليهو داخت علي ونحنا راجعين من المدرسه قال لي ح اديها درب والاولاد ما قصرو مشو جابو الحاجات من الصيدليه والدكتور عمل ليها فحوصات صفيه وعت وكانت بتقول لي حصل شنو وسعاد مالا قلت ليها مافي شي انتي بس دوختي رفعت راسها قالت لي ديل منو قلت ليها اولاد من الحله ما بعرفهم ساعدوني في شيلك لغايه ما جينا هنا المستشفي الدكتور ناداني قال لي تعالي صفيه قالت ليهو انا مالي ما اتكلم معاها مشيت وراهو وقال لي صاحبتك دي متزوجه انا هنا طوالي عرفت صفيه مالا بقيت اتمتم اتزكرت انو صفيه عاقدين عليها قلت ليهو ما متزوجه بس عاقدين عليها قال لي يلا صاحبتك دي حامل خلي العاقد عليها يتسرع يعمل العرس قبل بطنها تكبر ونحنا عندنا عيب قبل اتمام مراسم الزواج النهائيه والشهره يحصل كده وخليها تاخد الفايتمينات دي ضروريه قلت ليهو تمام مشيت بقدره قادر الغرفه الفيها صفيه والاولاد يا حليلهم قالو لي ملاريا صاح قلت ليهم لي وبقيت محتاره اكلم صفيه ولا اسكت انتو رايكم شنو ……….يتبع.